اجازة قصيره

اعتذر عن الرد علي البوست السابق
اجازة تلات ايام والعوده مساء الاربع

****************

************

*******

انظر الحل بالمقلوب

قرأت تدوينه عند العزيزة نوارة تنتقد سلوكيات الستات وبعدها تدوينه تانيه تنتقد الرجاله

وتدوينه عند الصديقه حفصه تنتقدسلوكيات ونماذج من المدونين....تدوينه جميله وخفيفه الدم ولها الف حق فيها

الحكومه كمان بتنتقد الشعب اللي بيخلف كتير وطلباته مش بتخلص وبيزوغ من الشغل وسلوكه مش حضاري

طيب الشعب كمابينتقد عنده قائمه اتهامات للحكومه تخليها تنتحر

المسلمين بينتقدوا المسيحيين وشايفينهم مستقويين وممكن عندهم وجهه نظر والمسيحيين ليهم انتقادات للمسلمين وشايفينهم همج وبربر وبرضه عندهم اسباب..الله طيب مين الغلطان بقة؟؟

طيب !!

الست طوال النهار تنتقد الراجل ووتغني يا ظالمني وانه حابسها وكابسها وظالمها ومستعبدها رغم انها عايشه ومتعابشه وقابله الظلم ده وبتكرسه من خلال تربيه عيالها..بس عندها حق!!

والراجل عمال يرقع بالصوت ان الست زنانه وقرارة مهمله في روحها وغاويه نكد وبرضه ليه الف حق _حاجه تجن!!

طيب امي عماله تشتكي من مرات اخويا وتعد اسباب وجيهه جدا ومرات اخويا برضه بتشتكي من امي وعندها اسباب اكثر وجاهه_عجيبه !!

الجيل الجديد بيشتكي من القديم.. ومش طايقه وبصراحه القديم ما يطاقش والجيل قديم بيلعن في ام التربيه البايظه بتاعه الجيل الجديد رغم انه هو اللي مربيه..عمايل ايده يعني..الله امال زعلان ليه..؟؟

كل الناس بتنتقد الفيديو كليبات وبرضه بيشوفوها ويرددوها ويرقصوا عليها وبتوع الكليبات يقولولك برضه الناس بيحبونا وبيرددوا اغانينا حتي الاطفال برضه طب ما راخريين عندهم حق !!

طيب الحل ايه بقا؟؟

كله عمال يشتكي من كله وينقد كله كله مش طايق بعضه وكله عنده اسباب وجيهه طب نفسي افهم الله لا يسيئكوا هو مين مع مين؟

ولا ليه ؟

ما هو لازم في حد صح والتاني غلط ولو كل واحد شايف نفسه صح وضحيه ومظلوم وعماله يشتكي سلبيه وظلم الاخرين رغم اصلا ان الاخرين مش طايقينه ولا قابلينه !!

كل واحد شايف نفسه صاحب الحق والحقيقه المطلقه وانه المنّظر الاكبر وممكن يكون رغم ان التاني برضه شايف نفسه هو كمان الاعمق والمطلق وصاحب الرؤيه وتيجي تناقش ده ولا دوكهمه تلاقي دماغ اهله ولا الأولد شوز

طيب يا ناس يا هووو لازم يكون في حد غلط لازم يكون في خطأ وصواب لازم يكون في جاني وغلطان عشان نحاسبه ونقفشه .

ونولع فيه بقا كلنا ونرتاح ..

لازم نلاقي حد نفش فيه غلنا ...

لازم نلاقي مجرم نشنقه ونخلص ....!

بجد والله مين هو بس؟

حد يقولي عشان ارتاح ويكتب لي الحل الصحيح ولو حتي انظر الحل بالمقلوب..

********************

قررت انافس ذو النون في لعبه تلخيص الكتب

الله اشمعني هو؟؟وعشان انا ديموقراطيه ها اخيركم نبدأ بالتدين المنقوص فهمي هويدي ولا مواطنون لا ذميون برضه هويدي؟؟ها أعد من هنا ليوم الجمعه والكتاب الاعلي تصويتا ها ابدأبيه

!!مع أن مش كل البشر فرحانين

لسه الطيور بتطن

والنحلايات بتفن

والطفل ضحكه يرن

مع ان مش كل البشر

فرحانين

حين اشرقت شمس الله في السماء امس وكنت اشرب قهوتي صباحا واراقب المارة من شرفه احدي الغرف ..

تذكرت هذه الاغنيه واللحن الشجيين..

كان المارة مسرعين لحضور صلاة الجمعه

والصغار يمرحون فرحين باجازة نصف العام

لا شيئ جديد في هذا اليوم

لم تزل احلامي معلقه

لم تزل صراعاتي مع ذاتي ومع العالم والآخرين قائمه

مشكلاتي مازالت قائمه.. ومستمرة..

...تصفحت تدوينات اليوم سريعا

..غالبيه المدونات تتحدث عن غزة وحصارها بما يفطر القلب..

وبقيه المدونات عن معرض الكتاب القاهري الذي لا نراه في الاسكندريه..

وحتي لا يقتلني الحسد فاستعدت بعض كتبي القديم من بيت امي اعيد قرائتها واجترها من جديد

كان برنامج اليوم هو الذهاب للسينما

ورغم اني كنت قد رضخت لرغبه الصغيرة في الذهاب لخليج نعمه رغبتها _بدلا عن الجزيرة كما كنت ارغب..كالعاده

ولم يكن هناك ما يستدعي الفرح ولا جديد يفجر الاحزان.. فكل الاحزان قائمه وثابته بلا تغيير

نفس الاخبار العراق وفلسطين

..نار الغلاء

..الاحباطات الانكسارات

..وأحلام ذات لم تتحقق كما تمنيت

ورغم اني فقدت رغبتي في الحزن أو قدرتي علي السعاده ايضا

ها انا اذهب للسينما واحاول الاستمتاع بأجازة نصف العام

في نفس اللحظه التي لا تزال احباطاتي مستمرة

!!استرجع قراءاتي القديمه !!وفي نفس اللحظه التي اشرب فيها قهوتي يموت الكثيرون في بلادنا

بردا وجوعاوتحت الاحتلال

في نفس اللحظه التي اضع فيها عطري او ارتدي معطفي

!!ما زال الوطن يعاني من الجهل والتخلف من المرض ومن الانكسار

..وتئن البشريه من الالامها

!!تعايش غريب

بين الحلم والواقع بين الامال المكسورة والالم المتواليه

ادي اللي كان وادي القدر وادي المصير

نودع الماضي بحلمه الكبير

نودع الافراح نودع الاحزان

راح اللي راح معدش فاضل كتير

تعايش مع الواقع بكل قسوته والمه وبين حركه الحياة المستمرة بلا توقف

فالنخله امامي مازات شامخه والعصافير تغرد لي وتبحث عن حب او شربه ماء من برك المياه بفعل المطر

!!اخذتني افكاري من فنجان قهوتي وعدت اليه ارتشفه سريعا قبل ان يبرد

وداع

حين افترقنا منذ سبع سنوات كامله

وقد اسقط الموت كل ديوني المعلقه لديه!!!

بقيت وحيده

مع اسئله بلا اجوبه..

تحاوطني بعض أمال تتبدد...

وألام تجدد....

.......................

مضيت وكل شيئ ورائي

والقيت ذكرياتي الملونة بالمرارة في بئر عميق.

حاولت جاهده

......

لم اعد اذكر شبحي بسوء ولا بخير!

كنت اخشي حتي من ذكراه

................

أوان اواجه اشباحا تثقل كاهلي

وتمنع عيوني من الانطلاق نحو سماوات بيضاء

وحين واجهت الحياة بعدها...

ولقيت عواصفها وغيومها

.........

اخرجت شبحي القديم من مرقده

عفوته من كل ديونه

طلبت له الرحمه

واهديته صك غفراني

وودعته بكل سلام

ومضيت في طريقي

.................

حينما كنت ذئبا

حين كنت ذئبا في الماضي كنت انطلق مع قطيع الذئاب كل صباح ابحث عن فريسه اسد بها جوعي واطعم بها صغاري كنت اشرك بقيه القطيع في العمل واخذ في النهايه حصه محدوده منها لااتعداها ابدا ولا اكل منها قبل ان يشبع صغاري

وحين تحولت روحي الي عصفورة كنت انتقل من غصن الي غصن في كل صباح ادعو الله ان يطعمني ورغم ان جسدي كان هزيلا صغيرا الااني كنت اعمل بكل نشاط ولم اتواكل ابدا علي احد في اعالتي فكنت اجمع القش واصنع العش واجلب الحبوب للصغار و امضع الطعام ثم اضعه في افواههم الجائعه

وبعد فترة تحولت الي ثعبان وحينها كنت اختفي في جحري طوال النهار لاؤذي بقيه الكائنات وحين كنت اخرج منه لجلب فأر اوكتكوت لاكله لم اكن الدغ ابدا الا من يعترض طريقي منهم ولم امد يدي بسوء الا من حاول اذيتي

اما حينما صرت نحلة فكنت اعمل طوال النهار مثل الاخريات من النحل لم يتسرب الي نفس كبر او غطرسه اني لي ادني ميزة تفوقني عنهم وتجعلني استحق ان لا اعمل او ان اترأس الاخرين واصدر لهم الاوامر فكنت فردا عاديا في خليه النحل مجرد نحله

وبعد ان صرت طاووسا ذو الالوان جميله وريش زاهي لم استعرض الواني واتفاخر بريشي علي انثي طاووس اخر لاسلبه اياها او اشاغلها عنه مهما كنت اطمع فيها او اظنه غير جدير به

اما عندما كنت حمارا فكنت افهم دوري وما منحني اياه الاله من قوة لحمل الاثقال ومساعده الانسان بلا كلل مهما آذاني وسخر مني ومن نهيقي الذي اقسم اني لم اضايق به احدا الا متألمااو مذعورا منه

وكنت اخجل من صوتي كما اني كنت اتفهم حقا حجم عقلي ولم افتي يوما بما لا افهم فقد كنت مجرد حمار وبداخلي رضا كبير بدوري في الحياة

وحين تسللت روحي الي جسد كلب كنت متفانيا في خدمه صاحبي وفيا له لم اعض ابدا يد امتدت لي بمعروف او ربتت علي او منحتني طعاما

وحينما كان صاحبي يموت كنت احزن لفراقه شهورا طويله وغالبا ما تبعه كمدا والما لفراقه

وبعد ان سكنت روحي جسد بقرة كنت اعيش راضيه امنح الصغار اللذين اعرف ان مصيرهم الذبح مثلي وامنح اللبن واللحم للانسان الذي كنت اعرف انه جلادي وذابحي ولكن كنت اؤدي دوري ووظيفتي تماما بدون ان اركله يوما او اقطم يده اللتي تضرب ظهري وانا اعرف ان تلك اليد ستقتلني وتقتل صغاري حتما يوما ما

وحين عادت روحي الي جسدها الادمي تجردت من تلك الفضائل جميعا فأنا مجرد انسان له نقائص عديده لا يستطيع ان يغيرها او يكون انسانا بدونها

حول كثلكة العالم

حين اطلت الدكتورة عبله الكحلاوي علي دريم بثوبها الابيض ووجهها الملائكي تتحدث عن الوحده الوطنيه وكيف اننا نعبش معا من الالاف السنين وكيف ان الامر لم يخلو احيانا من التلاسن واستشهدت بأغنيه واحد اتنين سرجي مرجي .. التي فسرتها بسير جرجس ومار جرجس

حين تحدثت عن رأب الصدع الحتمي بين ابناء الوطن حتي لانصبح جميعا لقمه سائغه وسهله لاعدائنا

ازاي راحت بورسعيد لاحتواء فتنه علي وشك الاشتعال من بعض الزعلانين بعد احداث كنيسه اسكندريه

وازاي عملت زيارات لاهالي بورسعيد

وان 138عالم مسلم توجههوا الي رؤساء الكنايس في العالم في اوروربا وامريكا رساله سلام ومحبه وان كلنا بنعبد رب واحد ولازم ننسي خطايا الماضي والالام الحاضر عشان نقدر نعبش

المبادرة الاسلاميه دي بقياده الشيخ النايض وهو ليبي وضمت وجوه اسلاميه مثل الحبيب علي الجفري وغيره

ان رؤساء الكنايس في امريكا وغيرها حوالي 300 عالم ردوا برساله جميله خالص برضه واعتذروا عن الحروب الصليبه والحرب الحاليه ضد الارهاب

واننا الحمدلله اتصافينا وبقينا سمنه علي عسل مش عارفه كنت مبسوطه اوي

الحمدلله احنا اتصافينا وخلاص ها نعيش في محبه وسلام وسمنه علي عسل

واكيد الباباهات بتوع الكنايس دول ها يأثروا علي حكوماتهم ونبقا فله ولا حروب ولا بتاع

والحكايه بقا اخر زقططه وجرجس ومحمد بقوا اخوات ومينا وعمر رجعوا صحاب الحقيقه ان الدكتورة عبله الكحلاوي كانت مؤيده جدا لرساله علماء المسلمين

ووششها بينقط ملائكيه وصوتها حلو وتحس انها امك ونفسك تاخدك في حضنها وعلي الجنه حدف وحلم اخر جمال

تاني يوم اللي هو امبارح المحور تستضيف دكتورة في الادب وتاريخ الحضارة الفرنسيه د زينب عبد العزيز الدكتورة معترضه خالص علي الرساله ونصها ومحتواها وتوقيتها االدكتورة شايفه ان البابا بندكنت يسعي الي تنصير العالم تحت المذهب الكاثوليكي

وانه قال في رسايله ان العالم لم يعد ييحتمل دينان كبيران الاسلام والمسيحيه وان لابد لاحدهما من الوجود والاخر للفناء وان الناس اللي راحوا ال138 دول مقصرين ومفرطين ووان ده نوع من التنازلات بتبدأواحده واحده لحد ما نخسر كل شيئ زي القضيه الفلسطينيه بالظبط

وهنا بقا بدل الدكتورة ما تلقي حجر في البحيرة رمت قتيل مرة واحده

الكتورة زينب قالت اننا مختلفين ابتداء وانتهاء

وبعدين ازاي بيقولوا بنعبد اله واحد احنا بنعبد ربنا وهما بيعبدوا بسوع والتثليث دا في القرن الرابع بعد مجمع نيقيه 325

وان فكرة التثليث مخالفه كليه وجزئيه للعقيدة الاسلاميه وكلام كتير عن طبيعه السيد المسيح وان الاناجيل فيها كيت وكيت

واستشهدت بنصوص انجيليه من العهد الجديد تحث علي تنصير الاخرين كاثوليكيا حسب بندكت

وان بقيه الكنايس الغير الكاتوليكيه والمذاهب اللي بتوصل في امريكا بس الي 30 الف مذهب لازم وحتما ها تتوحد تحت لواء الفاتيكان برضاها اوبعدمه وان دا مشروع البابا بندكت السادس عشر الاعظم

والحقيقه الست كتر خيرها كرت الكلام ده كله في رساله وبعتتها للبابا يقوم المذيع العبيط بسألها والبابا رد عليكي تقوم تقوله: لا!!ا

مش فاهمه سؤال ده ولا استهبال يعني ها يرد عليها يقولها ايه ولا يرد ليه اصلا ويقولها اه يا زينب انا ها انصر العلم كاتوليكيا ها وريني ها تعملي ايه بقا؟؟

وان البابا كمان عاوز يضم لعرشه العالم الاسلامي طوعااو كرها واو عمليات التبشير علي قدم وساق في افريقيا وبتستعمل فيها مبالغ رهيبه وبعد الدكتورة ما رمت القتيل اتصل بالاب جريش المتحدث الرسمي باسم الكنيسه الكاتوليكيه في مصر والراجل بكل هدوء اعصاب طنش كلامها بتاع تحريف الاناجيل وطبيعه يسوع وكل ده والحقيقه اعصابه كانت فولاذيه

ورد علي سؤال التبشير بس وقال: اه بنبشر حسب المذهب الكاثليكي وايه يعني؟؟

مش عيب اللي عاوز يجي هو حر واللي مش عاوز هو حر

ما احنا طول النهار بنتبشر بالاسلام بنسمع التواشيح الجميله 5 مرات في النهار بقصد الاذان طبعا

و وولادنا بيدرسوا نصوص قران في المدارس هو ده مش تبشير بالاسلام برضه؟؟

وايه يعني لما احنا بقا نبشر؟؟

وهنا بقا خلص الحوار

الله دا جرجس ومحمد قلبوا تاني

والحلم قلب كابوس والعالم ده مش مكان امين نعبش فيه

وعبله الكحلاوي طلعت بتحلم

وانا صدقت

والحروب ها تفضل والسكاكين مسنونه

وومفيش سلام ولا محبه ولا زقططه ورجعنا لنقطه الصفرتاني