الجمعة، نوفمبر 26، 2010

عن الشخص المؤذي

الشخص المؤذي مش كريه الشكل ولا متعجرف بالعكس ممكن يكون شيك وجميل ولبق جدا، واكيد ها يكون ناعم ومجامل ودحلاب، الشخص المؤذي احدي علاماته الاساسية انه بيظهر في حياتك يقتحمك بالود والمجاملة بيسمعك بود حقيقي واهتمام، يشاركك ويقعدك علي حجره وبعدين هوب يلف حوالين رقبتك في ثانية يلدغك، الشخص المؤذي ها يكون غالبا أذي اخرين قبلك بس لسه معرفتش ضحاياه او في الطريق لذلك او كان بارع جدا في التبرير لحد ما تقف في الدور معاهم، الشخص المؤذي لازم يكون خدوم ومتفاني ومهتم بالتفاصيل، يسالك في اول مقابلة عن تاريخ ميلادك او اكلاتك المفضلة او زوقك في اللبس وممكن جدا يسالك مباشرة عن مشاعرك او مشاكلك، الشخص المؤذي لازم تعرفه انه دايما بيحب المقارنات، وكل قصه تحكيها عن نفسك يرد عليها بقصة عن نفسه، حالتك العاطفية او المادية لازم يرد عليها بحالته وظروفه، مستقبلك المهني والوظيفي يرد في نفس الاتجاه ، غالبا بيقتحمك بسرعه عشان يجيب اخرك ويشوف كفة مين فيكم ها ترجح لانه مهتم انه يطحنك و يفرمك لصالحه في الاخر هي مجرد مساله وقت،وكل مقارنة بتكون في غير صالحه بتزيده حسد ومرارة، الشخص المؤذي عنده قدرة هائلة علي التلويع و اللعب باللالفاظ وتغيير الحقايق في مجاولة لتجنيدك في صفه، الشخص المؤذي مهتم دايما يورطك معاه في مشروع او علاقة او ارتباط مادي او معنوي بسرعه بشرط تخرج منه انت بس محمل بالخسارة وبيكون ماهر جدا في حسابات التخارج اللي في النوع ده من العلاقات،الشخص المؤذي كذاب لما تلاقي واحد طول الوقت بيكدب علي الاخرين اعرف انه بيتكدب عليك انت كمان بس انت مش قادر لسه تصدق او تكتشف ده الشخص المؤذي هيستيري مهما ظهر عليه انه ودود وهادي وجميل لكن بيكون هيستيري ومضطرب في ردود افعاله، غير قادر علي كبح جماح غضبه وفاجر في الخصومة،لما تلاقي شخص بالصفات دي اتاكد انه شخص مؤذي،الشخص المؤذي علاقاته قصيرة بالاخرين،معندوش صداقات طويلة ولا علاقات مستقرة يا فاشل اجتماعيا او نموذج متسلق ومكروه وفي الحالة دي بيكون مكشوف جدا، في شخص مؤذي اكتئابي وشخص موذي هيستيري استعراضي غالبا بيكون الهيستيري اكثر اذية من الاكتئابي والانسحابي، الشخص المؤذي بيسمع اكتر من ما بيتكلم في حالة وقعت في ايد شخص مؤذي، الافضل دايما الانسحاب اللطيف التدريجي دون المواجهه لان قدرته علي الاذية ممكن تكون فوق تصوراتك ، التخلص سريعا من جميع الروابط المادية والشراكات والمصالح قبل الانسحاب احرق سفنك واخلع في صمت..


الأربعاء، نوفمبر 10، 2010

عن الانتخابات

تنويه واجب:قبل قراية التدوينة لازم تقرا كلام دماغ ماك.

منطقة الرمل في اسكندرية الدايرة الانتخابية اللي بتبعها مترشح فيها الوزير المحجوب وهو محافظ الاسكندرية السابق ويقال والعهدة علي الراوي انه اسمعلاوي_ سلم لي عالتوزيع الجغرافي_ اما دائرة محرم بيه فنزل فيها الوزير مفيد شهاب_برضه مش اسكندراني ولا شرب من بحرها_ لك ان تتخيل بقي منافسين مستقيلن اوتبع احزاب نازلين قدام منافسين مرشحين من الحزب الوطني لا وكمان وزرا:-)) بطولة ورجولة ولا مصارعي التنين في في اليابان!!
الصبح عرفت ان صديق فيسبوكي محامي وصاحب مركز حقوق انسان تم رفض اوراق ترشحه لدايرة محرم بيه قام رفع طعن ضد سيادة الوزير لان اوراقه غير قانونية!! ممكن تقرا اسباب الطعن!!
انا اطمنت بما اني متابعه موضوع الانتخابات كويس جدا انه ممكن انتخب ببطاقة الرقم القومي، مش شرط البطاقة الانتخابية وانا متابعه الموقف لاخر فيمتو ثانية ،لحد ما اخد قراري ومتحملة جميع سمّ ّالبدن من اصحابي القائمين علي حملة خلي عندك صوت"ياللي معنكش دم"!!
بكل روح رياضيةمع كل محبتي ليهم ولحماسهم وتحفظاتي علي الاسم..
واوعدهم ان الموضوع قيد الدراسة..

ممكن تضغط عالصورة هتلاقي خبر نكته..... بعد الضحك ممكن تحمل رواية البصيرة لساراماجو ازاي تشارك في الانتخابات بصوت ابيض وايه ممكن يحصل لو اهل مدينة اجتمعوا ان اصواتهم تكون بيضاء!!