الجمعة، يونيو 29، 2007

انا وتليفونى و........ المحامى العام

ربقدرة القادر اتسرق تليفونى فاشيك شارع فاسكندريه او بمعنى اصح اتنشل من شنطتى فاشيك محل برضه قلت اعمل الاجراءات الضروريه اللى البنى ادمين بتعملها فى المواقف دى من البحث والتدوير واللى انتهت بعمل محضر فقسم البوليس والحقيقه دخلت وانا بقدم رجل واخر التانيه لانه المرة الاولى يعنى الحقيقه قلت ليه اتصل بحد من قرايبى من الضباط؟؟؟ وهوانا يعنى صغيرة؟؟؟ انا موواطنة وعادى يعنى!!! عشان اطلع ادن تتبع واهى برضه الشرطه فخدمه الشعب ودا بلاغ عادي خمس دقايق واافيلم يخلص....ا


انا: وماله يا ماما دا حقى والا احنا كدا نبقي بنشجع السرقه
مهم رحت وبعد سين وجيم وورينا بطاقه الرقم القومى اللى بكرهها كرة العمى وتليفونك ماركته ايه وجبتية منين وبكام والسريال نامبر ايه وناقص يقولولى عملتى بية كام مكالمه المهم مش هاحكى على نظراات السخريه التهكم وكانى كائن جاى من الفضاءومرت لحظات عصيبه وانا ضاغطه على اعصابى وشم جميع الروائح البغيضه من اوضه الحجز القريبه كان الله فعون الساده الضباط على شمها ....

المهم اخرتها روحى ياشابه ما بنديش ازونات تتبع روحى بقى النيابه العامه خدى تلات ازون تتبع لموبينيل وكليك واتصالات الحقيقه لحد المشهد دا من الفيلم وامى سوطت لى وقالتلى هو دا اللى ناقص تروحى النيابه العامه هى: وماله انتى فاهمه يعنى ايه نيابه يعنى نصابين وسفاحين وقتالين قتلا؟؟

انا: طب وانا مالى يا ماما ومالهم انا راحه عشان ازون التتبع؟؟؟ وهامشى علطول

هى:انتى فاكرة حد ها يعبرك انتى وتليفونك متهزئيش نفسك واتلمى بقي وكفايه فرد صدر

انا: يا ماما انا مواطنه.... ومن حقى

هى : ورحمه ابوكى ماانتى رايحه ماشى ياحاجه مش رايحه ...وعشان تسكتنى عهدت بالوضوع لاخى باعتبار انه برضه راجل ومش عاوزين فضايح الناس تقول ايه لو حد شافك فالنيابه هناك كان الصاعقه ان المحامى العام واقف ازون التتبع لاجل غير مسمى طب روحوا مباحث التليفونات فسنترال المنشيه يمكن يدوكم ازون التتبع وازا بالبيه الضابط يقول لنا بنفس الابتسامه الصفرا مفيش ازوناااات المحامي العام حتى احنا تليفوناتنا ضايعه وهكزا الساده الضباط اللى المفروض يرجعولنا المسروقات ويحمونا مش عارفين يحموا نفسهم ويحيا حراميه الموبيلات.... ويعيش تكبير الدماغ وهاتى لك تليفون تانى يا شاطرة.... وعلى راىالست ناديه سلم لى عالبدنجان!!!!!!ا

الأربعاء، يونيو 27، 2007

انا بحب ربنا... يا رضوى


صحيت انهاردا عندي مشاوير كتير والجو حر جدا حتى طريق الكورنيش مع الموجة الحر دى تحس ان البحر بيرمى بخار سخن كانك فاتح حله ميه مغليه الحقيقه انه كان يوم عادى مفهوش حاجه مختلفةلكن كان عندى نشاط وحماس اكتر من ايام كتيروفكرة مسيطرة على دماغى انا بحب ربنا .. اة والله انا بحب ربنا كنت قريت بوست لاختى رضوى حزينه لفقد شخص عزيز والفكره كانت فراسي انا فعلا بحب ربنادا عن اسباب عقليه منطقيه بحته مش كلام بديهي او محفوظ رغم كل الالم والاحباط انا بصحى الصبح وبلاقى عنيا بتشوف واديا بتتحرك ورجليا بتمشى بيكون عندى احساس بالرضا ..انا بحب ربنا لانى طمعانه فيه اوى واوى اوى كمان انا لسه عايزة منه حاجات كتير عايزة راحه ونجاح وصبر وصحه ومال وحب الاخرين وامل فبكرة فعلا امل فبكرة انا بحب ربنا لانى خايفه من بكرة ونفسى بكرة يكون حلو او حتى عادي فيا رب اكفينى شر بكرةلان الوحيد مالك بكرة.....يارب حلي لي بكرة...بحبك يارب

الأحد، يونيو 24، 2007

انا .....بنت مصريه



انا .......ومدونتى




وبعد شهور من تصفح المدونات وبعد تفكير مرير وحبه اه وحبه لااعمل مدونه ولا بلاش طب بلاش ؟؟ بس ليه بلاش اعمل مدونه ولالا؟؟ والحقيقه ان السؤال الاصعب هو يا ترى المدونه دى هتبقى شبهى ولالا؟؟كنت ولسه خايفه موت اني اكتب حاجه متبقاش شبهى او متعبرش عنى وحبه الحريه اللى كنت هامنحهم لنفسى ياترى صادقه فيه ولالا وطبعا كل الاجابات دى لسه ملقتهاش المهم قلت اهو ابدا وخلاص وزى ما تيجى مش هاخسر كتيثر وبدأت الخطوات الاولي لعمل المدونه اللى هاحاول اديها اكبر كم من نفسي ومن روحىويارب تكون واحه هاديه للجميع وسعيدة باقتراحتكم وتعليقاتك....بنت القمر

السبت، يونيو 23، 2007

عجميستا


عجميستا؟؟؟ زوارى الاحباب فيلم عجميستا من احلى الافلام فصيف2007فبلم يبان انه اكشن لكنه فكرة جديده مختلفه عن افلام الحب والقصص الممله المكرره كنت رايحه وانا عارفه ان شريف رمزى قايم بدور صياد ومش عارفه كنت متوجسه لان ملامح وجهه اجنبيه وابيض يعنى مش شكل صيادين خالص لكن الحقيقه بهرنى باحساسه العالى اما التلات بنات مى ودنيا وريهام فملهومش لازمه خالص فيلم تشم منه ريحه البحر وهوا العجمى... شوفوه ما يفتكمش ..

السينما..... ومتعتها


السينما..... ومتعتها ]من صغري والسينماعندى متعه كبيرة كافيه انها تخرجنى من حاله الكابه وتمدنى بحاله من السعاده الشديده مازلت اتزكر سنواتى الاولى وانا التهم حبات الفشار مع انطفاء نور السينماوالشاشه الفضيه تسكب انوارها على المشاهدين بصاله العرضوانهاردا رحت فيلم تيمور وشفيقه..هادى وناعم ورومانس يفكرك بافلام الابيض ولاسود وثنائيات زمان فاتن وعمر الشريف وشاديه وزوالفقلر حاجه كدا بطعم النعناع البلدى بتاع زمان اوبريحه الفراوله اللى كانت تملى البيت..المهم القصه تحكى عن صراع المراه والرجل اللى لاينتهىعشان تحقق نفسها والحقيقه انا كنت قاعدة كاتمه نفسى لحد النهايه مستنيه اعرف لكن الحمد لله لازم طبعا ان السادة المؤلف والمخرج يخلوها ان مني زكى بتتنازل عن كرسي الوزارة عشلن كرامه حبيبها احمد السقا ضابط الحراسه الخاص بها و الزى لايبخل عليها بحمايتها بحياته لكن عقده لا طبعا...بعد طبعا ما جرت نص الفيلم وراه تتحايل انه يتجوزها ..المهم سيبكم من تحليلي النقدى ودماغى اللى مش عاجبها العجب...وروحوا شوفوا الفيلم ومتنسوش الفشار

الجمعة، يونيو 22، 2007

عجميستا





زوارى الاحباب فيلم عجميستا من احلى الافلام فصيف2007فبلم يبان انه اكشن لكنه فكرة جديده مختلفه عن افلام الحب والقصص الممله المكررهكنت رايحه وانا عارفه ان شريف رمزى قايم بدور صياد ومش عارفه كنت متوجسه لان ملامح وجهه اجنبيه وابيض يعنى مش شكل صيادين خالص لكن الحقيقه بهرنى باحساسه العالى اما التلات بنات مى ودنيا وريهام فملهومش لازمه خالص فيلم تشم منه ريحه البحر وهوا العجمى... شوفوه ما يفتكمش


















..