الاثنين، مارس 31، 2008

البحث عن بهجة

انطلقت لواجب اجتماعي سخيف_عزاء حماة صديقتي.. ارتديت بدله سوداء وصندل اسود وحقيبه سوداء
اكره اللون الاسود بشده ولا امتلك الا تلك البدله باللون الاسود _ لمثل تلك المناسبات لم اشعر حقيقه بالحزن علي الفقيده
فقد جاوزت السادسه والثمانين وجلبت للعالم احد عشر كائن بشري.. وعانت اخيرا من امراض عدة!!
لا بد انها الان بين يدي الله ارتاحت من عالم خانق ملئ بالصراعات والاحقاد والشرور..
انهيت ارتداء ملابسي الكئيبه اضطرارا
وبعد ان توجهت الي الباب عدت ادراجي طليت اظافري بلون احمر قاني متحديه سيمفونيه السواد..
ثم استبدلت الصندل الاسود بآخر ملون
وصلت عند صديقتي حنان كانت تشعر بالضيق من فترة الحداد عرضت عليها ان نخرج قليلا وافقت
انطلقنا بالسيارة الي مكرم ..اشهر بائع جيلاتي .في منطقه ميامي.
خجلت من زوجها واخفت عنه اننا سنتناول جيلاتي واخبرته حين اتصل هاتفيا اننا نشرب عصير!!
تذكرنا صديقه اخري اتصلت بنا ايضا
عرضنا عليها ان نشتري جاتوه ونتناول معها الشاي فجأه قارب تنك البنزين علي النفاذ لم نستطع الي الوصول الي اقرب محل جاتوة علي بعد 300 متر اسمه برنيس
وهو اسوأ مكان تأكل في جاتوه في الاسكندريه ولكننا كنا في حاله اصرار علي الخروج من حاله الكآبه بأي ثمن انا وهي
قلت لها: تسمعي ايه؟ قالت وانتي عندك غير عبد الحليم فاجأتها بشريط اليسا..
ذهبنا الي اقرب بنزينه ونحن ندعو الله ان لا ينفذ البنزين قبل ان نصل استمتعنا بهواء البحر البارد وصوت اليسا وتلك الرحله القصيره ثم الي صديقتنا الثالثه التي تنتظرنا علي الشاي
فتحت الباب كنا نرتدي السواد ونحمل علبه الجاتوه.. فقالت : ايه قاليبنا ضلمه وداخلين بجاتوه علي روح المرحومه؟؟
انفجرنا ضاحكين...
اكلنا الجاتوة وشربنا الشاي واستغليت سفر ادم يومين في التأخير قليلا
والحصول علي ساعه اضافيه بعد مواعيد العوده الرسميه للبيت!!
تبادلنا الحديث والضحكات والحكاوي وعدت
وقررت ان احاول مرة اخري البحث عن بهجه بأي ثمن!!



السبت، مارس 29، 2008

انا ورابعة العدوية

البحث عن الخلاص...

يتمسكون بقرآنهم وسنتهم أو بصلبانهم وإنجيلهم.. في حين يتشبث آخرون بعقولهم

وميتافيزيقيتهم واستاتيكيتهم الجميع يبحث عن خلاصه

يزعم امتلاك الحقيقه والخريطه وبوصلة النجاه.. يتصارعون ويقاتل بعضهم

بعضا.. حقيقه الصراع وأصله من يملك الحقيقه.؟؟.

ومن سلك طريق الخلاص؟؟!

ينكر بعضهم علي الاخرين خرائطهم وبواصلاتهم.. لكن الجميع ويبحث عن راحته

وخلاصه يتجهون الي نفس الغايه.. عبر طرق مختلفه

{ ما هي إلا حياتنا الدنيا نموت ونحيا وما يهلكنا إلا الدهر} هكذا نطق

البعض ومازال البعض ينطقون!!

وانكر ملكوت السماء وانتظر جنّه في الارض.. فلم يحصل علي اي منهما...حتما

سيعلم كل واحد منهم الي أين قادته خطاه يوما ما...

..أنا ورابعه العدوية....

انبهر بسيرتها وزهدها.. انبهر بتلك الشخصيات الصوفيه الزاهده دوما

وقدرتها علي الاستغناء عن العالم بأسره عشقت الذات الالهيه بلا غرض.. اختلف

عنها كثيرا فما زلت علاقتي بالله.. تتراوح بين الخوف والرجاء لم تصل يوما الي

الحب المطلق الغيرمشروط..

ما زلت انتظر خلاصا.. ..

كانت لرابعة أحوال شتى: فمرة يغلب عليها الحب، ومرة يغلب عليها اليأس،

وتارة يغلب عليها البسط، ومرة يغلب عليها الخوف"..... وفي كل هذا التقلب

والتقولب اتفق معها فيه وتتطابق احوالي واحوالها

غير أني مازلت ارجو من الحياه الكثير!!!!ا


وان كنت اخجل من إشارات الهيه كثيره تأتيني.. فهو حتما يحبني.. الله حقا يحبني

رغم كل تلك العذابات من حولي..


مازلت انتظر لروحي مستقرا افضل من سجن الجسد وخارج هذا العالم الارضي ..

جورجيت.. وآخر... والقرآنيين.. وجدل لا ينتهي..

امسك بالريموت واتجول بين الفضائيات لا شيئ جديد!!

اتذكر جورجيت قليني وفي جدل برنامج فضائي حول الطلاق في المسيحيه من

اعوام..

جورجيت: الدين جه عشان يغّير الناس مش عشان الناس تغّيره!! يرد قس

اخر في الجبهه المضاده: انتوا خطفتوا الدين _ الدين لراحه البشر مش

لتعذيبهم!!ما وزلت اتذكرالجملتان.. ومازلت مقتنعه بكلاهما!!

جوله في المدونات تحمل نفس الجدل علي الجبهه الاسلاميه.. لا اجتهاد مع النص..

في مقابل مصلحه العباد مقدمه علي النص.. الاجتهاد والقياس العقلي حين

يتعارض النص مع المصلحه.. الخ

القرآنيين.. محاوله الهروب من النص وصنفره الاسلام وتقشيره من السنّه..

للتحايل علي قسوة النص وإلزامه والالتزام به

كثير من التدوينات تنطلق من منطقه ماسخه.. لا تقبل النص المقدس ولا ترفضه

فقط تتحايل عليه..لا تستطيع المجاهرة برفضه ولا التعايش مع مشاعر الاثم من

التمرد عليه..ترغب فقط في ان تقدم رؤيتها الشخصيه فتكون رؤيتها بديلا عن

رؤيه الشيخ الفلاني والدكتور العلاني فقط تأخذ مكان من رفضتهم مسبقا!!

اتذكر القابض علي دينه كالقابض علي الجمر.. حقا هو جمر.. فلكل شيئ ثمن

والخلاص ..ثمنه جمر!!

جاذبيه ...

اشعر بإنجذاب كبير الي هؤلاء اللذين يملكون يقينا خاصا.. ملتحي ابيض الوجه

قصير الثوب اثّرت الصلاه كثيرا في جبهته ..راهب اسود الثياب ذوصليب خشبي كبير

تشققت شفاهه من كثر الصيام المتوالي..ثوري مناضل ذو عقيدةو مبدأترك

العالم من اجله!! كم احسدهم علي قوتهم كيف استطاعواتطويع انفسهم والعبور

فوق شهوات الحياه والترفع عن متعها... تبهرني قوتهم وانحني امام ايمانهم

وترفعهم.. كم أحب هؤلاء الاقوياء واعشقهم..

..تشويش ...

اشعر بالضيق في فترة تغيير الفصول.. واشعر بالكسل.. ارتدي بيجامه خريفيه

وانظر في المرآه اين اختفت ملامحي؟؟ هل سقطت حين غسلت وجهي وأزلت مكياجي

يبدوكأنهما اتحدا سويا !!

اذهب الي الصلاه متثاقله .. ابذل جهدا فظيعا كي أصّفي ذهني اقف علي

السجاده دقائق تلو دقائق كمن يمارس اليوجا قبل ان أبدا في قراءه

الفاتحه.. اتلو سورة اخري واواصل الركوع والسجود. فقط ارغب ان اكون مع

الله والله وحده ولا شيئ سواه

اتذكر كلمات حفصة.ما القران منزلش طريقة معينة للصلاة، ليه احنا عملنا

زي بني اسرائيل في موضوع دبح البقرة واتفذلكنا على شكل و كيفية

الصلاة؟؟؟الصلاة ليها اشكال كتيرة و ربنا بيسمع الانسان في اي مكان و اي

جهة و اي وضع و بيسمعه بالقول و بالفعل و بالنية و القلب ..طيب ليه

احنا نخنق على نفسنا؟؟

اردد منك لله يا حفصة ..تتوه مني السكينه

ويضيع مني التركيز.. انهي الصلاه ولم اعي نصفها.. اعد نفسي غدا بصلاة اكثر

صفاءا وسكينه اتجه للنوم اضع كثيرا من العطر..

علّه يبعث في نفسي فرحا وبهجه..!

الثلاثاء، مارس 25، 2008

ادب الانحطاط


ايام الكليه كنا بناخد مايسمي عصر الانحطاط وعصور الانحطاط هي المرحله التي تعقب ما يسمي مرحله الدوله الفتيه او مرحله القوة وهي ماقبل سقوط الدوله نفسها سواء فراعنه او رومان او مماليك او عثمانين

مش عارفه بقالي كام يوم طالبه معايا اتابع الكتابات الادبيه.. وطبعا في تيار موجود الكل شايفه وعارفه ما أطلق عليه زميل مدون ادب قله الادب

ادب قله الادب.. اصنف انا تحته كل الكتابات التي تكتظ بالالفاظ البذيئه والشتايم بلازمه لغرض في نفس الكاتب او بدون. لازمه.. من باب الواجهه وادعاء التحررو التقدميه..كتابات تعج بالتوصيفات الجنسيه وشطحات الخيال وحكاوي المغامرات الماجنه والسلوكيات المنفلته والكلمات المبهمه احيانا التي لا تحوي معني او قصد, والتي تشبه الصراخ بصوت عالي للفت النظر وشد الانتباه

ادب قله الادب كمان ها اصنف تحته بعض التدوينات القويه التي تناقش قضايا هامه اوتحكي حورات متخيله او لقاءات وهميه المؤرخ الفلاني والكاتب العلاني او المفكر الترتاني بعد نعته بجميع البذائات الممكنه

الحقيقه خبطت في احد المدونات.. ربنا يسامح اللي في بالي وبروح اشحت من عندهم لينكات ما يسمي ادباء.. تدوينه تحكي عن مفكرة المانيه وتحكي صلتها بالصهيونيه وكلام جميل لكن يعج بكل انواع الشتايم والبذائات الممكنه .. وتدوينه اخري تحكي خيالات مريضه لمغامرات منحرفه لا يصدقها عقل لصاحبها مع الافاضه والكرم في كم البذائات.. بعض تلك التدوينات لها قوام ادبي رشيق تستعمل الكنايه والرمز والتوريه وغيرها من اساليب الادب او تستعمل تراكيب جديده وصور خيال جميله وكل ده طبعا اذا نحينا جانبا المعايير الاخلاقيه في الحكم علي العمل الادبي والحقيقه فكرت احط ليكم مقاطع وامثله وبعدين تراجعت لان دي مش الفكرة الاساسيه للبوست ده

لاحظت تيار احدث وهو ادب العفن

اه والله وهو ما اسميه ايضا الادب الصديدي..التيار ده بقا قالك الناس زهقت من الشتيمه بالاعضاء التناسيله وسب الدين قوم ندخل علي منطقه اجدد..اوريجينال وهو التوغل وصرف البوست في وصف..رائحه الشراب.. ووصف طبق طعام عفن او وصف احدهم فضلات الفئران وكيف تؤنسه في وحدته!!! يصف اخر الغازات المنطلقه من امعائه او كيق يختفي في شق كنبه مهترئه..احيانا الحكي عن وصف صدأعلي الجدران او رائحه عفونه مياه او صوت حشرات في منور عمارة.. احيانا بعض المدونات بتستفزني اقوم اشوف التعليقات عليها ايه يعني؟؟ يمكن انا العيب فيا وتذوقي الادبي هو اللي فاسد وذوقي غبي _ طب نشوف الناس غيري رأيهم ايه الحقيقه مش دايما بلاقي قبول لذلك النوع من الادب الصديدي واحيانا بلاقي قبول والقبول ده نعرفه ازاي وخصوصا ان اصحاب هذه الكتابات يعيشون في دوائر ضيقه في عالم التدوين زوارهم قليلون في عالم نرجسي كئيب

كتب احدهم معلقا مشيدا ببوست براز الفأر وكتب اخر انت بتشتغلنا يا فلان؟؟ يقصد صاحب البوست!!

الله اكبر يبدو ان احدهم اخيرا ادرك لامعقوليه وسخف تلك التراهات المكتوبه.. يبدو ان احدهم شعر بأنحراف ذلك الخيال الذي كتب تلك السطور ومدي مرضه

الحمدلله يعني مش العيب فيا. اذن هناك من يشعر مثلي ولا يستسيغ تلك الكتابه
ويبقي للامر في النهايد منوطا بالتذوق وذوق المتلقي هو الحكم والفيص وكل واحد وذوقه بقا!!

نرجع مرجوعنا طب ليه انا بديت بحكايه عصر الانحطاط ...يبدو ان البعض ممن ينتظرون ثورة الجياع زادوا شخصا هو انا ممايراه ويظنه علامات انحطاط عامه في الادب كما في بقيه مناحي الحياه

الاثنين، مارس 24، 2008

فلتسقط العولمه.. وليسقط الفاشيست.. ليحيا الانسان حرا مستقلا


التدوين وثقافه الشارع




اتصفح كل صباح الريدر وارد علي التعليقات واشوف مين كتب ايه

وبعد ما اخلص اروح استلف من ريدرات الجيران ولينكاتهم غالبا من بثينه وعباس العبد ونوارةوبيلا

ولينك يشيلني ولينك يحطني وتعليق يجر مدونه ومدونه تجر تعليق ومن ده لده واكتب تعليقات وانسي ارجع اشوف ردها واللي يمخمخني اوي احطه علي الريدر ما يغركوش اللينكات اللي عي الجنب دي قديمه الريدر خلاص اتخنق مني

المهم من مدونه الي اخري احيانا بيكون الانتقال زي الانتقال من الساقع للسخن وبيعمل حاله تششششش

حاله التشششششششششششش دي خطيره جدا ليه؟؟ لانها بتشقق قشرة الدماغ وبتحولها الي ما يشبه الزجاج المسرطن؟؟

او ما يشبه شظايا الكريستال


ليه؟؟

لاحظت ان التدوين لم يقدم لي ثقافه حقيقيه بجد والله محدش بيثقف من التدوين او علي الاقل انا لكن مجرد عرض لنماذج مجتمعيه متباينه ومختلفه الي حد مرعب. وده اعتقد هو ما نحصل عليه من الشارع يعني ثقافه شارع او فن الحياه...تلاقي اتنين او تلاته بنفس الاسم كل واحد دماغه ملهاش علاقه بالتاني ومختلفين من اقصي اليمين الي اقصي الشمال مثلا في تلاته هيومان كلهم ناس زوق بس مفيش واحد بشبه التاني

الصبح كنت بقرا الجمله دي في احد التدويناترقة شدة انتباهى من جمالها وتدرج لونها الواحد ما بين الفاتح والغامق ـ سبحان الله الخلاق العظيم } هكذا كتب احد المغتربين المصريين في امريكا

ثم قرئت بعدها مباشره تلك الجمله{، أن الله لا بد أن يستيقظ يوماً ما فيأخذ كل المرضي والأغبياء والمجانين والعواجيز، والجالسين على الكراسي،}

وهكذا تحدث حاله التششششششششش او التقشير الدماغي والشرخ الكريستالي اللي حكيت عنه

ليه بقول التدوين مقدمش ثقافه ليا؟؟ عشان بصراحه حاسه ان الواحد عشان يتثقف لازم يروح المكتبه او يشتري كتاب ويدفع فيه دم قلبه حتي الانتاج الادبي في التدوين مستواه مختلف جدا ومساحه الحريه المتاحه بتخلي الواحد يقرا الغث والسمين يعني زي اللي بيدور علي ابرة في كوم قش


او تلاقي مدونه مخصصه لحكايات جنسيه.. تغلب عليها احيانا الشطحات لاصحابها لكن موضوعه في قالب ادبي مميز او تلاقي تجارب شخصيه بحته برضك مكتوبه احسن من ادباء معروفين بيتنشر لهم

المهم تاني طب انا استفدت ايه.. عرفت ناس..بس!! خصوصا الكتابات والتدوينات الرجاليه يمكن طبيعه مجتمعنا مش بتخلي الواحدة عندها فرصه يكون لها اصدقاء حقيقين للمحاذير المعروفه او العكس الواحد مش بيكون عنده نفس الفرصه قوم اكتشفت ايه؟؟ ان الرجاله شبه الستات جدا.. والله فيهم الغبي والذكي المثقف والمدعي الاديب والمؤدب!! الطيب والخبيث!! يا سلام!!حد ها يقولي امال ايه؟؟ مش عارفه بس اكيد الانطباع مشترك واحده غبيه وواحده ذكيه وحيث اننا بنختفي تحت اسماء مستعارة في الفضاء الالكتروني اللانهائي

ناسلها كاريزما وناس متنطقش

بيكون الحكم علي ما تنقرة اصابعنا علي الكيبوردات فقط وفقط لاغير وبنحكم علي الشخص من خلال كتابته بس


طيب انا عاوزة اقول ايه في الاخر ولا حاجه ربنا يخلي عم جوجل كان راجل طيب عرفنا بعض وجمعنا في التدوين اهو بدل الرجاله ما تنزل علي القهوة تشرب شيشه وتلوث البيئه والستات تروح المول تصرف فلوس الرجاله..


ادينا نعرف المجتمع رايح علي فين وبلدنا ايه اللي فيها؟؟ اول باول ونفك علي نفسنا شويه قيود من اللي مخنوقين بيها وربنا كريم ودمتم


السبت، مارس 22، 2008

انا وأمي



حين حملت هديتي وذهبت الي امي هذا العام لم يكن ككل عام كنت اراجع ما بيني وبينها في السنوات السابقه..

فهي من ذلك النوع القوي الصلب.. واجهت من محن الحياة الكثير.. ما اكسبها صلابه غير عاديه واكسبها عملها كطبيبه.. عمليه وواقعيه شديده

تحملت مسؤليه تربيتي منذ طلاقها من ابي حين كنت في سن الخامسه فتربيت بحزم شديد في نظام ما يشبه المدرسه الداخليه
لا اتذكر اني حظيت منها كبقيه الاطفال بقبله او حضن دافئ

لم تربت يوما علي شعري

لم تختر لي يوما اسم للتدليل..
تحملت مسؤليات كثيره في سن صغير منها حمل مفتاح البيت في سلسله صغيرة في رقبتي لافتح الباب واكل لحين عودتها من العمل,,,, تحملت مسؤليه المشاركه في شراء مستلزمات البيت .. وترتيبه في سن صغير..كانت نظرتها امراعسكريا واشارتها مرسوما لا فكاك منه
ورغم ذلك حصلت علي تعليم جيد وملابس جيده.. كانت تهتم بي في مرضي .. فقد كنت طفله نحيفه ضعيفه كثيرة المرض وما زلت كثيرا
لم تقصر في تعليمي وكان النجاح الدراسي امرا لايقبل التفاوض او النقاش
حصلت علي ما يلزمني لاكون انسانه ناجحه
ولكن صنعت الايام بيننا جفوة كبيرة.. فاختلفت ارائنا كثيرا.. وتناقضنا الي حد لا يوصف

يكفي اي حوار صغير بيننا الي ان يفضي الي نقاش لا ينتهي وجدال مرير لاتتنازل فيه احدانا الي الاخري ابدا

كنت اري دوما اخطائها واري نقائصها.. ارفض اختياراتها واجادلها الي مالانهايه
اتعصب لرأيي..وانتصر لارادتي.. منحني الزواج مساحه كبيرة للافلات من قبضتها.. والتمرد علي سطوتها
وبعد سنوات

اما الان وانا علي وشك الاحتفال بعيد ميلادي ال35بعد اسبوعين.. بت انظر لها بعين اكثر رحمه وعقل اكثر تفهما..

اصبحت اكثر حكمه واكثر تسامحا لما اعتبرته تقصيرا منها
.. اكثر غفرانا لما اعتبرته خطأ منها او تسلط
نفضت عن كاهلي ما اعتقدته عذابات الطفوله.. وما رأيته مرارات لا تنسي..
افهم الان حقا كيف تأثرت بظروفها ومحيطها ...و كيف صنع بها الزمن وجعلها تلك القويه الصلبه
بت انظر اليها بعين اخري تنظر اليها ككيان متكامل بعيدا عن ان افصل جزيئاتها الي عيوب ونقائص وميزات وفضائل

ربما هو فعل الزمن الذي يغير كل شيئ

كل سنه وهي بخير

الخميس، مارس 20، 2008

المدونه... واشباح الستينات

حين اخبرت ادم في حوار عائلي لطيف عن وصيه قريبتنا ان لا اتحدث في السياسه خلال رحلتي لدبي ساخرة من تلك النصيحه
رد بجديه :ومالو خايفه عليكي عندها حق
اجبت: حق ايه وسياسه ايه؟؟
هو احنا لسه عايشين في ايام صلاح نصر والناس اللي بتتصنت علي بعض واللي يتكلم في السياسه يبعتوله زوار الفجر!!
اجاب ادم: صلاح نصر في كل زمن وكل حين ومين قالك ان زوار الفجر خلصوا؟؟
واتجه بالحوار الي اتجاه اخر
مين قالك ان التدوين ده كله مش تحت الرقابه؟؟ مين قالك ان مفيش فيه ناس مدسوسه !!كأنهم مدونين لاثارة نقاشات ومعرفه ورصد اتجاهات الشارع وهما تبع الحكومه
هما مش كل شويه بيقبضوا علي حد مدون.!!. كل اللي بينكتب بيتعمل بيه تقارير وفسحه الحريه اللي في التدوين متراقبه ومرصوده
انا:: اخدتني الافكار ومش عارفه ليه افتكرت نوارة وجماعه بتوع مدونون ضد التعذيب والبوستات الصغيرة اللي بتعملها زي البرقيات
فلان اتقبض عليه فلان اعتقلوه
تماسكت قليلا.. ورديت لا طبعا بلاش نظريات المؤامرة واشباح زمان دي والنظريات البوليسيه دي
اصل انت يا بيبي مواليد الستينات ايام صلاح نصر لكن انا مواليد السبعينات زمن الانفتاح والحريه
انزلق في كرسيه ونظر الي من خلف نظارته الطبيه بعينيه الضيقتان.. براحتك انتي فاكرة استبيان زي بتاع العيال بتوع معا الي الله
اللي انتي كتبتي معاهم بتاع المصالحه ده
مش مرصود؟؟ امال جابوهم في العاشرة مساءا ازاي.؟؟. الداخليه تقدر تعرف اي شيئ مكتوب مين كتبه وامتي ومن اي مكان في مصر
انتي بس اللي طيبه... تصورت نفسي في دور الناشطه السياسيه او الحقوقيه والبوليس جاي يقبض علي في البيت الفجر وافتكرت البنات.. اكيد ها يدّمروا لو حد قبض علي امهم.. ثم طردت تلك الافكار من نفسي وده لاني اصلا مش ناشطه في اي مجال الا مجال البحث عن نفسي وذاتي!!... الحقيقه ان ادم لا يعير التدوين اهتماما جديا ولا يتابعه الاحين يملأ وقت فراغ قصير جدا لحين تحضيري للعشا او لحد ما اخلص واجبات البنات ..,
ان كان ينظر اليه كمنفذ يمتص طاقاتي المتجدده.. او كشيئ طيب اتلهي فيه بعيدا عن ان ازعجه باحباطاتي وعذاباتي او طلباتي المعقوله احيانا والسخيفه احيانا اخري
اخدتني الافكار..مرة تانيه .. وحاولت ان اقتل بذرة الخوف التي يريد زرعها في رأسي.. ان كل شيئ مراقب ومحاصر..اجبت بتحد حقيقي لاثبات اني مش قلقانه ولا شاكه في حد او شيئ
سألت كي اغيظه:تخيل كده لو طلبوني في العاشرة مساءا
مفروض البس كلاسيك ولا كاجوال البس جينز ولا بدله كلاسيك.. ؟؟اكيد ها اكون اجنن وانا جنب مني الشاذلي!! صحابي ها ينبهروا لما يشوفوني
اجاب ادم.. في الثواني الاخير قبل ان يسرقه النوم ربنا يهديكي.....

الأربعاء، مارس 19، 2008

نحن والعالم

ا
الصين
الرهبان التبتيون ينتفضون ضد الحكم الصيني في حركه عنيفه بعد ان تخلوا عن النهج السلمي الذي انتهجوه عبر عقود منذ نشوء مشكله التبت 1951كل شيئ حين يمسك الراهب السلاح فتلك النهايه
الكويت
انشاء اول مستشفي متخصص لعلاج الصقور!!المستشفي يضم اقسام العظام والجلديه والباطنيه!!الشباب الخليجي يحافظ علي هويته وتقاليده في تربيه الصقور ضد موجات العولمه وتحديات الحداثه!!!!!!!!!!!! ويثبت تمسكه بجذورة وتراثه!!!!!!!!!
العولمه والحداثه مرة واحده!! الله يرحم اطفال فلسطين من غير مستشفيات!!
ابوظبي
انشاء اول مسابقه عالميه!!للسيارات اللاسكليه.. {العربيات الصغيرة اللي بتشتغل بالحجارة والريموت} شباب ابو ظبي يجتمعون تحت سماء الامارات في اول مسابقه من نوعها في العالم!!!
فعلا افضل اما اجتمع عليه شباب العربي!!امراض الرفاهيه
!!!مصر!!!
الاستاذ... رئيس جمعيه .. يطالب الرئيس مبارك بتدخل الجيش!!!!من اجل حل ازمه الخبز!!!بعد التقاتل الذي يعاني منه المصريون للحصول علي الخبز!!! الازمه تتفاقم بلا اي نذر للحل..خسارتك يا مصر!!
نشرة اخبار تلفزيون دبي الليله الاخيرة قبل السفر... احلام غيرهانئه

الاثنين، مارس 17، 2008

قمر في دبي

في رحله ترفيه قصيره في دبي لخمسه ايام كنت اظن ان اقسي شيئ ترك ابنتاي فقط لكن.. بعد الرحله اكتشفت كم تعلقت بالاسكندريه وكم احب مصربكل ما فيها من سلبيات قبل الايجابيات.. الي حد الهوس!!
مطار دبي




وصلت يوم التلات دبي الانطباع الاول كان الانفهاش الحضاري والحقد النوعي بعد القدوم من مطار برج العرب البسيط ضعيف الحال

المطار كبير بصروة غير طبيعيه
وبما ان_ ولسه ها اجيلكم في الكلام_ العالم هناك عندها هوس بالاكبر والاعلي والاطول وكل افعلات التفضيل
فالمطار كبير بصورة لا تصدق.. ودرجه الرفاهيه فيه عاليه المسافرين لا تتحرك الا علي سلالم كهربائيه وسيور متحركه لتسهيل المشي في ردهات المطار اللانهائيه

البشر في المطار من كل صنف ولون كأنه يوم القيامه امريكان واوربيين هنود وصينيين وعرب اللقطه الاولي ان محلات المطار مليئه بالخمور الابيض والاحمر وشوكلاتات مخلطه بالخمور بصورة كثيفه جدا

في شوارع دبي
الشوارع كبيرة جدا وحر ببشاعه لاتري فيها الا المول خلف المول.. والفندق تلو الفندق البلد مافيهاش الا مولات وفنادق وابراج للسكن الفندقي والمكاتب الاداريه اشهر الابراج برج دبي توين تاور المماثلين لابراج نيويورك وتوين تاور الامارات وبرج دبي وهو اعلي برج في العالم الذي يسكن طابقه الاخير الشيخ محمد حاكم دبي ووبرج 0800الذي يعتبر اعلي سكن فندقي وبرج العرب الذي اهداه الشيخ محمد لزوجته الثانيه فضحكت احدي زميلت الرحله متسائله اذا كان الشيخ مش محتاج زوجه جديده اسعار المبيت في الفندق تبدأ من الف دولار فما يزيد

هوس بالبناء هوس بالمولات هوس بالفنادق يصل الي حد العته وخصوصا اذا عرفت ان الاوربييين والامريكان هم مرتادو تلك المولات سكان تلك الفنادق.. ويرتبط وجودهم اساسا بوجود البترول وحيث ان البترول ها ينشف بعد99سنه فكل تلك الابراج ها تبقي خراب وفراغ

فكرة التطوير الاقتصادي للبلد هي تعميرها بالمولات لخدمه الاجانب

وجعل دبي منطقه تجارة حرة وطبعا في رأيي المتواضع ان التجارة مرتبطه بالاجانب المرتبطين اصلا بالبترول يعني سلسله اذاكسرت حلقتها الاولي انفرطت باقي الحلقات
الامارات مول
اكبر سوق تجاري في دبي عبارة عن 3في 4 كم من الماركات العالميه دولشي اند جابانا.. ديبنهامز..زارا..كارفور..كارولينا هيريرا..اغنر .. باسلر.. بينتون.. كالفن كلاين.... وغيرها من الماركات اللي بنشوفها في المجلات الخليجي واو عند الكوافيرات الاسعار نار ببشاعه النطلون المتواضع يبدأ من 200 درهم يعني 300 جنيه ويصل الي 5 الالاف درهم حوالي7.5الاف جنيه مصري
اسعار الايس كريم بسكوته عاديه عليها اتنين بوله ب 40 درهم حوالي 60جنيه.. والشاي 30 درهم =45جنيه الاسعار عاليه بصورة خرافيه اتصلت بصديقه مصريه هناك وسألتها علي الاسعار المعقوله في دبي فوصفت لي بعض المحلات المتهاوده..محلات اطفال وحريمي في الامارات مول ومول سيتي سنتر وغيرها من المولات.. بعض المصريين في الرحله معانا اتجهوا الي سوق نايف وهو احد الاسواق الشعبيه الرخيصه متواضعه الذوق من الصناعه الصينيه لا يشتريها الا الهنود والباكستانيين
الدعارة في دبي

المولات في دبي مليانه بالروسيات التي يحترفن الدعارة بصورة علنيه وواضحه ومقننه وبشعه.. لا تخطئها العين ولا مجال للنصاحه لاكتشاف حقيقه الروسيات في دبي.. توجد جنسيات اخري لكن الرسيات يتربعن علي عرش تلك المهنه القذرة.. كميه الانحلال والفساد والعري بصورة رهيبه ومقرفه كأني انا الوحيده اللي لابسه بكم في دبي الروسيات يتحرشن بالاجانب والموطنين علانيه في المولات ..

متحف دبي الوطني


متحف دبي هو نكته الرحله وهو عبارة عن قاعات صغيرة مليانه بتماثيل الشمع التي تصور اعمال المواطن الاماراتي القديمه قبل مرحله البترول من صنعه فخار وحلي وصيد لؤلؤ.. المتحف صغير جدا جدا في مساحه متحف الاحياء المائيه بتاع اسكندريه حاجه زي الصالات تذكرته ب3درهم=4.5جنيه وهو لا يستحق الزيارة الا عشان تشوف النقله الحضاريه والمعنويه اللي اتنقلها سكان الامارات من حياه بسيطه بدائيه الي صرع حضاري واستهلاكي

سفاري
كان من ضمن برنامج الرحله سفاري في صحراء دبي بسيارات لاند كروزر يقودها اماراتيين او ايرانيين ومش عارفه اشمعني ايرانيين ??
رحت الرحله مع مجموعه سكندريين في نفس العربيه الرحله شاقه ومرهقه حتي الوصول الي كامب داخل الصحرا.. الكامب يضم عشا و او بن بوفيه مع رقص شرقي سموه ليله مصريه!!
بعض او كتير من زمايل الرحله المصريين من الملتزمين خرجوا بره الكامب واستنوا في الصحرا عشان يرجعوا الاوتيل لانهم مش عاوزين يشوفو الرقلصه وبعضهم اعترض علي عدم وجود مسجد قريب وبعضهم ما فوتش الاوبن بوفيه وقعد وادي ضهرة للرقاصه

مش فاهمه ليه الرقاصه اللي بترقص علي سعد الصغير وعرض الرجاله اللي بيرقصوا بالجييات الملونه اللي بتلف زي بتوع الطريقه الرفاعيه هو ما يعطي طعم انها ليه مصرية كان مفيش حاجه تعبر عن مصر الا الرقاصات وسعد الصغير وشغل الموالد وعدنا بسلام للفندق
المواصلات في دبي

المواصلات العامه منعدمه في دبي مفيش غير الاتاكسيات.. هي مش بتمشي زي تاكسياتنا كده ..لكن لازم تطلبها في التليفون او تاخدها من امام باب المول بعد ما تقف في طابور من ميتين شخص منتظرين دورهم في تاكسي طبعا حاولت استنصح واخد تاكس من باب دخول المول مش معقول قمر بنت الفراعنه تقف في طابور تاخد تاكسي وسط الهنود بتوع نيهي نيهي..ولا وسط الروس والصينيين
طبعا المحاوله باءت بالفشل ورجعت حجزت دور في الطابور ووقفت في محل مجاور لحد ما قرب وقت خروجي من المول اسعار التاكسات هناك نااار التاكس من الامارات مول الي فندق شيراتون فور بوينت حيث نزلناوهي حوالي تلت ساعه بالكتير تمنها 40 درهم يعني 60جنيه البنديرة ديجيتال بتبدأ ب3 درهم فتح كلام يعني الله يرحمك يا تاكسيات اسكندريه الصفرا ملقحين في الشوارع من اول البلد لاخرها ب10جنيه بس وسوق بينا يا اسطا علي الكورنيش ناكل درة ونشرب منجه ونطلع عينه كمان
البحث عن مواطن في دبي
سكان الامارات قليلين جدا نادرا ما تلمح مواطن{ابن البلد}في المولات بيسموا نفسهم جاليه اماراتيه للاسف عايشين وسط طوفان من الهنود والصينيين والروس والملل والثقافات من كل شكل ولون.. مما يجعلهم وسط بزرميط ثقافي ديني لغوي حضاري يهدد وجودهم ويهدد ثقافتهم وروحهم الوطنيه واقفين ادام مغريات فساد وانحلال اخلاقي وادام هوس استهلاكي في الولات يجعل همهم امتلاك الاحدث والاسرع والاكبر والاعلي..عموما البلد خانقه مافيهاش روح ما فيهاش نكهه ولا طعم.. اعان الله اهلها علي احوالهم وما هم فيه
العودة
كانت عودتي علي مطار برج العرب وعمار يا اسكندريه عمار يا مصر والله والله ما في زي مصر ولا تراب مصر ولاهواا اسكندريه ولاناس اسكندريه ومصر
تحديث هام...
لم اري في دبي غير مصنع دبي للمكرونه بجوارة مصنع للمرطبات طوال الرحله وحقيقه مش عارفه يعني ايه مرطبات يعني بيسي ولا ايه
____________________
اعتذر عن التأخير الرد علي كومنت البوست السابق وابدا الرد من اليوم ان شاء الله

الاثنين، مارس 10، 2008

الي بيلا.. وفضفضه,, وزمزم..وحفصه.. واخريات


اتشرف اليوم بدعوة سيادتكم الى حضور الاجتماع التاسيسي الاول لرابطه المود الكحلي

والتى تهدف الى في تاسيسها الي تقديم خدماتها للاخوات المكتئبات

ارهاصات.......

لاحظت العضو المؤسس اللى هو انا زياده الضغوط الرهيبه علي المراة فى مصر

من قهرازواج وتعنت اباء ونكد امهات وقرف عيال وارتفاع اسعار وغلاء معيشه وما يلىانحدار فنى وغنائى, وفيديو كليبات, وتردى فني وسينمائي ,وما تعانيه من تحرش جنسي ومعاكسات, وانتهاك كرامه

, ومضايقات مروريه

, وجميع اصناف الضغوط والتى تلقي بظلالها عليها من احداث يمر بها الوطن

من فساد حكومىومالى واداري وانهيار تعليمىوعلاجى ودروس خصوصيه وثانويه عامه ورداءه مواصلات,وزواج وطلاق وعنوسه وسن يأس وتسلط مجتمع ذكوري ووطن منكمش وحكم متهالك ....

خدمات الرابطه

تقدم الرابطه لعضواتها جميع اصناف حبوب الموتيفال ومشتقاته

واصناف جديده من القهوه عاليه التركيز والكابتشينو لزوم ضبط الدماغ

كما توفر مكابح نفسيه جديده لكبح الغضب وارد المانيا باسعار زهيدة

وتقدم الرابطه ايضا مصدات واكصدامات صلب
لزوم الحمايه والدفاع عن النفس من الانهيار والانفجار فى الاخرين
وتوفر ادويه الضغط والقولون العصبي وقرحه المعده..

كماتقوم الرابطه بتقديم كورسات تعليميه فى كيفيه التبلد وتتخين الجلد محاضرات قيمه فى فنون ضبط الانفعال وما بقي منه
محاضرات فى مواجهة الاستفزازوالاستهبال والاستعباط بوجه بشوش
وما يجد من خدمات تقدمها الرابطه لبنات مصر المحروسه وعلى من تجد نفسها تنطبق عليها الشروط وترغب في الاشتراك مجانا
التقدم باوراقها للعضو المؤسس اللي هو انا والرد ها يكون في اقرب وقت

> وشكراتصفيق حاد حاد
***********************
بمناسبه اليوم العالمي للمراه
احد بوستاتي القديمه
مناسبه للمناسبه....... اعتذر عن الرد علي التعليقات لمده خمس ايام اجازة قصيره.... كل سنه والكل بخير

السبت، مارس 08، 2008

عشبيه العينين


حين عاد بعد سنوات من ذلك البلد الصحراوي وبعد أن كوّن ما يكفي لحياه كريمه كانت الغربه قد سرقت سنوات من عمره

وتركت روحه خاليه ومشاعره جافه و قد نبت في قلبه اشواكا بفعل الوحده والغربه

.. احتاج بشده الي ان يضخ الي شرايينه الدفء والي وحشه روحه النور

بحث عن شريكه وزوجه وكّل الام والاخت في البحث عن من تعيد اليه دفء الايام ومن تبعث في روحه الحياه

كانت جارة رقيقه الحال جميله بيضاء بعيون ملونه بلون العشب الاخضر وشفاه كانهاجرح نازف ما كان يعيبها الافقر اسرتها وكونها ممرضه في مستشفي حكومي مجاور

حين رآها ملكت جوارحه واسرته عيونها..

مضي سريعا في خطبتها... ما ضير عملها فلا حاجه له بعد الان فلقد شيد القصر بسنوات الكفاح

ولم يتبق الا ان تسكنه سيدته وسيده القصر!!ا

كانت حلما امتلكته يداه ..عاش معها احلي الايام وذاق حلاوة الحب وعرف لهيب العشق.

أسرته رقتها وحلاوة طبعها وملئته سنائه نجوما واقمارا بعد ان ملئت بساتين عمرة بفراشات الحب الملونه

وشرب من راحتيها شهد الحب ونبت من قاحل ايامه عمرا جديدا لم يعشه من قبل..

كان يهيم بعيونها التي بلون العشب وحين يجن بها يقبلها في عيونها

واكتملت سعادتهما بعد ان جلبت له ولدا يحمل اسمه ويحمل ايضا لون عيونها العشبي

فكانا ملاكاه وكنزاه الاثيران

اتي صديقه من غربه مماثله وقد دعاه السهرة رجاليه لمشاهده شريط زفاف صديقهما الثالث في بلد مجاورة

وبدأ ت السهرة بالقفشات والنكات وشرب الشاي... تابعت عيونه الشريط بلا اكتراث.. حتي اتت فقرة الراقصه فإذا بعشبيه العين تؤدي دورها

تتمايل بأقدام حافيه.. وثوب مهترئ... تجمد الدم في عروقه وجف حلقه !

وكأن صدره سوف يغادر صدرة بلارجعه اعتذر عن إكمال السهرة وانصرف عائدا للبيت...

استقبله الصغير عشبي العينين فاحتضنه بقوة وقد اختنقت الدموع في عيونه...

التزم الصمت برهات ثم واجهها بما رأي لم تكذب عليه

صارحته بعملها في قريه مجاورة في الرقص لبضعه شهور لظروف اسرتها الضيقه وقد اخفت الامر عن الجميع

لم تدافع عن نفسها!! ولم تطلب الصفح منه علي ماضيها!!ا

لم تحاول ان تبرر كذبتها فقط اخبرته الحقيقه والتزمت الصمت القاتل

قتله صمتها بعد ان قتله ما رأي وعرف... ذهبت الي الغرفه تجمع ملابسها وقد ايقنت نهايه حياتهما سويا........

ذهب خلفها ودعاها الانتظار الي الصباح ليقرر مايريد

لم يكن حقا يعرف مايريد كل ماكان يعرفه انه لا يعرف ما يريد.... ولكنه عرف ان الشوك نبت في قلبه من جديد

وعادت الي فمه مرارة الايام

الجمعة، مارس 07، 2008

طباخ الرئيس


الرئيس للوزراء معقوله كيلو اللحمه باربعين جنيه الناس تاكل ايه؟
الوزير: ما هو يا فندم من الزياده السكانيه الرهيبه..
الرئيس يعني الزياده بتيجي علي البني ادمين بس!!
مش بتيجي علي البهايم برامج تنظيم الاسره ما نفعتش الا علي البهايم؟!!
**********************
الرئيس للطباخ:العيش ده بتاعنا يا متولي؟
طبعا يا باشا دقيق امريكاني.. وخميره طلياني .. بس مخبوز هنا يا ريس.. نمرة واحد يا باشا!!
*****************
الوزرا يتأمرون حتي لا يقابل الرئيس الشعب بعد ان قرر النزوزل للشارع بنفسه
احدهم :نودي الشعب فين؟
احدهم: نفرض حظر تجول يقوم الريس ما يلاقيش حد يكلمه؟؟
اخر: انا عندي فكرة احسن نستدعي فريق البرازيل يلاعب المنتخب واهو حسن شحاته فاضي؟
اخر انا عندي حل نعلن يوم الاتنين عيد بأي مناسبه والناس يا تقعد في بيوتها يا تسافر لاهلها!!
اخر او نجيب نانسي وهيفا ونعمل تذاكر مجانيه والشعب كله يروح الاستاد.. والريس ما يلاقيش الشعب
اخر:احسن حل نعلن كسوف الشمس الناس تستخبي في بيوتها ها يخافوا يتعموا وبكده الريس ما يقابلش حد!!
الاخرين احسن حل
نعلن كسوف الشمس!!
*********************
الرئيس: بتحبني يا متولي... انتخبتني يعني؟؟
متولي الطباخ: اه والله يا باشا انتخبتك مرتين مرة ببطاقتي ومرة ببطاقه جوز عمتي!!!

الثلاثاء، مارس 04، 2008

قضيه عمري



حين تحدثنا طويلا الي تلك الصديقه حول مبادرة الله معا واشياء اخري كنت اشعر بحماستها بين سطور الماسنجر
وكنا نتفادي نقاط الخلاف نمزح حينا نتكلم جديا حينا اخر وتنفلت بعض القفشات بين سطورنا
فتنطلق ضحكات لم تسمعها احدانا وان بعثت دفئا في روحينا تلك الليله البارده
كانت تردد كثيرا ده حلم عمري.. دي قضيه عمري.. وكنت اراها كلمه كبيره تدنوالقضايا والاحلام دونها.. فأخذتني افكاري اي شيئ يستحق ان يكون قضيه عمري او حلم عمري
بحثت في شأني الخاص و احلامي السابقه والحاليه فلم اجد ما يرقي الي ان يكون قضيه عمري
احلامي آنيه ومرحليه جدا فما تمنيته من عشر سنوات يختلف حتما عما اتمناه الان ويختلف قطعا عن سنوات لم تأت بعد....
تترواح امنيات الشأن الخاص بين تحقيق الذات وتجاوز الاحباطات والعبور فوق محن الحياه والالامها
او بين امنيات الحياه الامنه لاسرتي بعيدا عن تقلبات الاقدار.
اما الشأن العام فلم اجد ما ما اعطيه لقب قضيه عمري فطموحي في وطن افضل ينعم بالحريه والرخاء والسياده...
اواحلامي بمحيط انساني ارحب وعالم بلا حروب نزاعات لم اجد سوي انها تمنيات لم تصل يوما ان تكون قضيه عمري
وربما صرفت نفسي ان احتكر عمري واحلامي لقضيه واحده او لحلم واحد
ربما خفت في قرارة نفسي ان لايتحقق
اوربما خفت ان يضيع
ويتسرب من بين اصابعي فأفقد قدرتي علي اكمال السير في الحياه من بعده
لا ادري هل هي نقمه ان لااكرس حلما وقضيه لعمري
ام هي نعمه ان اعيش بلا احلام وقضايا تثقل كاهلي

الأحد، مارس 02، 2008

اقر واعترف..امام الله

اقر واعترف اني معنديش مشاكل ولا حساسيات ضد الاخوة المسيحيين تحديدا
اقر واعترف ان علاقتي بالمسيحيين طيبه في المجمل اني اتعامل مع كل انسان كحاله منفصله
بعضهم بحبهم وبعضهم بكرههم عمي
اقر واعترف اني حزنت لما حصل للسيده وفاء قسطنطين وتقهمت مشاعر المتظاهرين لتسليمها
اقر واعترف اني حزنت لظهور حالات من المتحولين الي المسيحيه زي حجازي واعترف اني اعتقدت في صميم قلبي انه افاق او انتهازي قبل ما يكتشفوا كده
اقر واعترف ان تسهيل باب التحول من دين لاخر ها يفتح علي البلد بركان مشاكل طائفيه واجتماعيهلا حصر لها بدون لازمه
اقر واعترف اني بحب ناديه وماريان واحلام المسيحييات وباكل وبشرب في بيوتهم ومش بخاف انهم يحطولي حاجه في العصير
اقر اني ا تعزمت عند ماريان وعملت لي اكل فطاري وهي صايمه ولما دقت الاكل الصيامي لقيته خنيق اوي ربنا يعينهم
اقر واعترف ان المسلمه اللي مش بتشرب حاجه في بيت المسيحيه بتجرح شعورها احيانا المسيحية بتتقمص بدون لازمه خصوصا لو المسلمه معدتها بتوجعها او صايمه او مقاطعه البيبس مثلا
اقر واعترف ان بعض المسلمين بيقرفوا او بيستحرموا يشربوا حاجه من المسيحيين عشان معندهمش احكام طهارة من العلاقات الحميمه
اقر واعترف ان اجارتي المسيحيه تحبني حب صادق كبنتها تماما.. وانا احبها كأمي واستشيرها في ادق خصوصياتي رغم فرق السن واختلاف الدين
اقرواعترف اني اكره الراهبه مريم مديرة مدرسه بنتي من صميم قلبي لانها متعصبه جدا وقالت لبنتي في طابور الصباح ايام احداث كنيسه اسكندريه ان كل بنت مسلمه لازم تتأسف لكل بنت مسيحيه عن افعال الارهاب اللي عملوها المسلمين ان مصر اصلا بلد المسيحيين وعيب الضيف المسلم يعمل كده في صاحب البيت المسيحي!! واقر ان حكايه البلد بلدنا بتجنني وتنرفزني الي درجه االعته!!
اقر واعترف اني اكره الراهبه مريم الكاتوليكيه لانها تجبر بنات ناديه الارثوذكس ياخدوا حصه الدين في بدروم المدرسه..بحجه ان الارثوذكس بيرموا قشر لبان وكياس شيبسي في الكنيسهّ!!!
انها نموذج وحاله تستحق الدراسه لو ملقيتش حد تتعصب ضده تتعصب ضد نفسها
اقر واعترف ان التعليم الرهبني في مصرفي رأيي بقا مش زي زمان ايام الاجانب وانحدر بعد ما مسكوه المصريين
اقر واعترف بكره منظر المسيحيين ايام الكليه وهما واقفين شلل مع بعض ومش بيختلطوا بالمسلمين زي اعضاء الجماعه السريه
اكره رغبه البعض في اعلان هويه مختلفه بلازمه ومن غير لازمه
زي حكايه السمكه اللي حطوها علي العربيات زي المسلمين ما بيحطوا لا اله الا اله
واقر واعترف ان اكبر مشكله للمسيحيين انهم منعزلين داخل شلل ومجموعات وكنايس وبيتحركوا غالبا في دواير مغلقه بتحرمهم فرصه تواصل انساني حقيقي وعميق مع المسلمين
اقر واعترف اي بشوف او تي في
اقر واعترف اني بشتري بقاله من سوبر ماركت مسيحي وبزعل من ناديه المسيحيه عشان بتشتري من سوبر ماركت بعيد عن بيتها نص ساعه لانه مفيش جنبها سوبر ماركت الامسلمين
اقر واعترف ان اهم ميزة في المسيحيين انهم شاطرين في شغلهم ووامناء وناجحين في الاعمال التجاريه والطب وانهم سياسيين خصوصا الجيل الاقدم سياسيين لدرجه الدهاء
اقر واعترف انه تسرب الي اعماق نفسي في فترات سابقه ان البنت المسيحييه ممكن تنصر المسلمه وتوديها دير في الصعيد وتخفيها عشان البنت دي هي اللي ها تخلف عيال مسلمين
اقر واعترف انه تسرب الي اعماق ناديه ومونيكافي فترات سابقه ان البنت المسلمه بتصاحب المسيحييه عشان تجوزها اخوها المسلم وتهرب معاه والبوليس يحميهم
اقر واعترف اني سمعت بودني ام مسيحيه بتزعق لبنتها عشان وسخت هدومها بأنها بقت مقرفه زي عيال المسلمين!
اقر واعترف اني بكره من صميم قلبي مايكل منير.. وامنحه جايزة الشخص الاعلي استفزازا في العالم
اقر واعترف ان يمكن اكبر مشكله من ناحيه المسلميين ضد المسيحيين هي دعاوي الارتباط بالخارج وطلب الحمايه و واعتقد ان الخارج معملش حاجه للمسيحيين اكتر من انه كرّه المسلمين في المسيحيين وحسّسنا انهم شويه خونه ها يبيعوا البلد للاجانب تحت دعاوي الاضطهاد
اقر واعترف ان بعض المسلمين عندهم يقين ان السفارات والقتصليات الغربيه بتمنح تأشرات وفيز هجره للمسيحيين لتوفير فرص عمل ودراسه دون المسلمين
اقر واعترف المركز الثقافي الفرنسي بينمح المسيحيين شهادات ديلف ودالف للمسيحيين بسهوله لانها تؤهل الحصول علي فيز هجرة كندا في المقاطعات الفرنسيه بسهوله
اقر واعترف ان الوزرا المسيحيين معملوش حاجه للبلد زي المسلمين تماما
اقر اني زرت بعض المدونات العنصريه زي مدونه تحتمس اللي بتضخ مشاعر كره وبغض رهيبه وكافيه في حد ذاتها لاشعال حرب اهليه
اقر اني بزعل من بعض المدونات اللي اصحابها مسلمين وبتاخد موقف مضاد للمسيحيين لمجرد انهم مسيحيين
اقر واعترف اني اخاف علي هذا الوطن من كل قلبي والله علي ما اقول شهيد
تفاعلا مع باقي الاصدقاء بلوستون بيكيا وعباس العبد العداله للجميع

السبت، مارس 01، 2008

المقاطعه والاوبريت وحبايةالأنديرال!

تصفحت الميل كعاده كل صباح قبل ان ابدأ في رؤيه جديد التدوين واذا بالاثنين يمتلئان بتجديد دعوة المقاطعه . وتلك الصور عن البضائع الدنماركيه تحاصرني هنا وهناك

تخطفني الافكار تاني مقاطعه تاني !!وبعدين ايه البضايع السخيفه دي؟؟

مفيش شيئ منهم بتعامل معاه الا يمكن زبده لورباك نادرا اما الباقي فهو بضاعه مجهوله.. يعني عقاب غير ذو جدوي.. طب ما هي نتيجه المقاطعه الاولي؟؟

اهم اصرورا اصرارا والحوا الحاحا وعادوا نشر الصور!!

لكن برضه يا بنتي لازم تقاطعي عيب كده ما انتي مقاطعه الامريكاني من سنين و قلبتي من ايريال لبيرسيل ومن بيبسي الي فيروز وشويبس ها تيجي علي الزبده؟؟!!

تسرب الي داخلي ذلك الشعور بالضيق من التساؤل حول المقاطعه بجدوي او بدون جدوي

نخز ضمير من مرسلي البريد الالكتروني وهم يقسمون علي ان امررة للاخرين

تطلب مني أمي حبه الانديرال بعد ان اتحفتني باوبريت الحلم العربي.. ده فيه صور فظيعه ... رهيبه فيه صور سيده يلتهم يدها كلب تصر ان اراه وان كنت خمنت محتواه.. قلبها تضطرب دقاته وتاخذ دوائها بعد رؤيه الاوبريت

طب ليه يا ماما كده؟؟ طالما انتي عارفه اللي فيه؟؟ انتي بتعذبي نفسك؟؟ لا ترد وتهمهم حسبي الله ونعم الوكيل .. ربنا ينتقم ..منهم ربنا ينتقم منهم.... تبتلع دواؤها وتواصل المشاهده!!

وخز آخر للضمير وبين الحيرة في رد الفعل وجدواه او عدم وجود فعل آخر... نحتاج الي حبايه انديرال يوميا!!