السبت، مارس 29، 2008

انا ورابعة العدوية

البحث عن الخلاص...

يتمسكون بقرآنهم وسنتهم أو بصلبانهم وإنجيلهم.. في حين يتشبث آخرون بعقولهم

وميتافيزيقيتهم واستاتيكيتهم الجميع يبحث عن خلاصه

يزعم امتلاك الحقيقه والخريطه وبوصلة النجاه.. يتصارعون ويقاتل بعضهم

بعضا.. حقيقه الصراع وأصله من يملك الحقيقه.؟؟.

ومن سلك طريق الخلاص؟؟!

ينكر بعضهم علي الاخرين خرائطهم وبواصلاتهم.. لكن الجميع ويبحث عن راحته

وخلاصه يتجهون الي نفس الغايه.. عبر طرق مختلفه

{ ما هي إلا حياتنا الدنيا نموت ونحيا وما يهلكنا إلا الدهر} هكذا نطق

البعض ومازال البعض ينطقون!!

وانكر ملكوت السماء وانتظر جنّه في الارض.. فلم يحصل علي اي منهما...حتما

سيعلم كل واحد منهم الي أين قادته خطاه يوما ما...

..أنا ورابعه العدوية....

انبهر بسيرتها وزهدها.. انبهر بتلك الشخصيات الصوفيه الزاهده دوما

وقدرتها علي الاستغناء عن العالم بأسره عشقت الذات الالهيه بلا غرض.. اختلف

عنها كثيرا فما زلت علاقتي بالله.. تتراوح بين الخوف والرجاء لم تصل يوما الي

الحب المطلق الغيرمشروط..

ما زلت انتظر خلاصا.. ..

كانت لرابعة أحوال شتى: فمرة يغلب عليها الحب، ومرة يغلب عليها اليأس،

وتارة يغلب عليها البسط، ومرة يغلب عليها الخوف"..... وفي كل هذا التقلب

والتقولب اتفق معها فيه وتتطابق احوالي واحوالها

غير أني مازلت ارجو من الحياه الكثير!!!!ا


وان كنت اخجل من إشارات الهيه كثيره تأتيني.. فهو حتما يحبني.. الله حقا يحبني

رغم كل تلك العذابات من حولي..


مازلت انتظر لروحي مستقرا افضل من سجن الجسد وخارج هذا العالم الارضي ..

جورجيت.. وآخر... والقرآنيين.. وجدل لا ينتهي..

امسك بالريموت واتجول بين الفضائيات لا شيئ جديد!!

اتذكر جورجيت قليني وفي جدل برنامج فضائي حول الطلاق في المسيحيه من

اعوام..

جورجيت: الدين جه عشان يغّير الناس مش عشان الناس تغّيره!! يرد قس

اخر في الجبهه المضاده: انتوا خطفتوا الدين _ الدين لراحه البشر مش

لتعذيبهم!!ما وزلت اتذكرالجملتان.. ومازلت مقتنعه بكلاهما!!

جوله في المدونات تحمل نفس الجدل علي الجبهه الاسلاميه.. لا اجتهاد مع النص..

في مقابل مصلحه العباد مقدمه علي النص.. الاجتهاد والقياس العقلي حين

يتعارض النص مع المصلحه.. الخ

القرآنيين.. محاوله الهروب من النص وصنفره الاسلام وتقشيره من السنّه..

للتحايل علي قسوة النص وإلزامه والالتزام به

كثير من التدوينات تنطلق من منطقه ماسخه.. لا تقبل النص المقدس ولا ترفضه

فقط تتحايل عليه..لا تستطيع المجاهرة برفضه ولا التعايش مع مشاعر الاثم من

التمرد عليه..ترغب فقط في ان تقدم رؤيتها الشخصيه فتكون رؤيتها بديلا عن

رؤيه الشيخ الفلاني والدكتور العلاني فقط تأخذ مكان من رفضتهم مسبقا!!

اتذكر القابض علي دينه كالقابض علي الجمر.. حقا هو جمر.. فلكل شيئ ثمن

والخلاص ..ثمنه جمر!!

جاذبيه ...

اشعر بإنجذاب كبير الي هؤلاء اللذين يملكون يقينا خاصا.. ملتحي ابيض الوجه

قصير الثوب اثّرت الصلاه كثيرا في جبهته ..راهب اسود الثياب ذوصليب خشبي كبير

تشققت شفاهه من كثر الصيام المتوالي..ثوري مناضل ذو عقيدةو مبدأترك

العالم من اجله!! كم احسدهم علي قوتهم كيف استطاعواتطويع انفسهم والعبور

فوق شهوات الحياه والترفع عن متعها... تبهرني قوتهم وانحني امام ايمانهم

وترفعهم.. كم أحب هؤلاء الاقوياء واعشقهم..

..تشويش ...

اشعر بالضيق في فترة تغيير الفصول.. واشعر بالكسل.. ارتدي بيجامه خريفيه

وانظر في المرآه اين اختفت ملامحي؟؟ هل سقطت حين غسلت وجهي وأزلت مكياجي

يبدوكأنهما اتحدا سويا !!

اذهب الي الصلاه متثاقله .. ابذل جهدا فظيعا كي أصّفي ذهني اقف علي

السجاده دقائق تلو دقائق كمن يمارس اليوجا قبل ان أبدا في قراءه

الفاتحه.. اتلو سورة اخري واواصل الركوع والسجود. فقط ارغب ان اكون مع

الله والله وحده ولا شيئ سواه

اتذكر كلمات حفصة.ما القران منزلش طريقة معينة للصلاة، ليه احنا عملنا

زي بني اسرائيل في موضوع دبح البقرة واتفذلكنا على شكل و كيفية

الصلاة؟؟؟الصلاة ليها اشكال كتيرة و ربنا بيسمع الانسان في اي مكان و اي

جهة و اي وضع و بيسمعه بالقول و بالفعل و بالنية و القلب ..طيب ليه

احنا نخنق على نفسنا؟؟

اردد منك لله يا حفصة ..تتوه مني السكينه

ويضيع مني التركيز.. انهي الصلاه ولم اعي نصفها.. اعد نفسي غدا بصلاة اكثر

صفاءا وسكينه اتجه للنوم اضع كثيرا من العطر..

علّه يبعث في نفسي فرحا وبهجه..!

هناك 66 تعليقًا:

Alexandrian far away يقول...

العزيزه بنت القمر
بما أننا وقفنا الهدنه يبقى أعلق بقى
ومن قال أن هناك خلاص؟
ومن قال أن الخلاص شىء موجود فعلا؟
أتعرفين ما كانت القوة الخارقة للفلاسفة السوفسطائيين؟ أنهم أكدوا وأثبتوا ان كثير مما يعد قضايا فلسفية أو منطقيه هي في الحقيقة مجرد قضايا لغويه
مجرد كلام، تعبير لغوي
ماذا يعني الخلاص؟
أولا ثم لنتحدث عن كيف نجده ، لن اولا رجاءا تعريف صغير لأجل خاطري حول ما هو هذا الكائن المسمى بالخلاص

تحياتي وأحترامي

nonoymm يقول...

مش عارفة اقول ايه بجد كلامك اد ايه عميق انا موجودة من بدري وكل شوية ارجع اقرا واحاول اكتب تعليق مش عرفة بجد
الموضوع اشعرني ان البشر بس عمالين يتصارعوا اكتر من ان حد فيهم عاوز فعلا يوصل للطريق اللي منه للخلاص لكن للاسف بننسى في وسط الصراعات اننا اصلا بنبحث عن الخلاص
اللي المفروض معرووف معية الله
متالقة كالعادة
تحياتي

HafSSa يقول...

والله يا قمر انا مكنش قصدي سحب السكينة من قلبك لان اولا السكينة شئ لا يعطي من بشر لبشر و لا يؤخذ
هو شعور يا بتوصليله لوحدك مع ربنا يا مش بتوصليله
مش من حق اي بشر انه يحرمك منه
ثانيا انا سؤالي ده بالظبط لبعث الهدوء و الصفاء في قلب الناس بدل ما هي شاكة في ربنا و متخوفة منه اوي كده انا عندي اقعد بهدوء و سكينة اناجي ربي و اتواصل معاه ولا انيش اقوم اصلي و عقلي مشغول في مليون حاجة و قلبي مش صافي من الناس و مخي بيودي و بيجيب

اصلي مش حضحك على ربنا و اقوله اديني صليت بقى فلمكش حجة عندي
نهار اسود
ده مطلع على القلوب يا ناس
يعني لو كل جمسي بيصلي و قلبي مشغول
متبقاش صلاة
و الله اعلم يعني
انا عندي موضوع الصلاة ده بيتبع الكيفية و النوعية و ليس الكمية

تحياتي

Desert cat يقول...

صراعات بداخل ذواتنا من يصنعها لنا بشر لان بالفعل الاديان انزلت لتريح البشر وليس لتتعبهم ولكن هناك من يستخدها لاغراض خاصة فيصبح عقل من يستمع لهم مشتت فاين الصح واين الخطأ ومن الصادق ومن الاصدق
فى النهاية لكل دين مرجعيته التى منها نسترشد الطريق الصحيح
تحياتى

Nsreen Bsunee يقول...

الحقيقه فوجئت بانك عايشه نفس الحاله اللى انا عايشاها وكتير من اللى بيدور فى عقلك شاغلني برضه وبافكر فيه بس باختلف معاكي فى اعجابك وانبهارك بمظاهر من وجهه نرى فارغه كالصليب واللحي والنقاب وغيره
انا بانبهر بالعقول مثل رامز الشرقاوى وحفصه رغم انهم بعيدين كل البعد عن المظاهر اللى بتبهرك
لو بالمنطق ده يبقي بن لادن شخصيه مبهره وهب حياته لله ورسوله وزهد الدنيا وما فيها
مش شايفه انه المبهر اكتر هو شخص عامل توازن مبهر بين ايمانه ودنياه
انا شايفه ان لما انسان يوهب نفسه للكنيسه او يربي لحيته ويزهد الدنيا ويمشي يكفر فى خلق الله شئ سهل مش صعب هو بيحشر نفسه فى جزء ضيق اوى من الدنيا منتظرا للموت
والشخص اللى بيكفر بكل شئ وبيعيش عشان رغباته ونزواته برضه شئ سهل جدا هو مش بيفكر فى حاجه غير اللحظه اللى هو عايشها وهو عايز ايه وبينفزه وخلاص
لكن المبهر هو شخص بيسعي لتحسين حياته فى كل شئ على مستوى الروحانيات والحياه العمليه والعاطفيه وكل شئ
اللحيه والنقاب والصليب الخشبي فى نظري هى مجرد قشور مالهاش اى دلاله بالسلب او بالايجاب ياما شفت منقبات واصحاب لحي زيفهم ونفاقهم يبعث على التقيوء وياما سمعنا عن رهبان بيمارسو فواحش فى الكنائس
بانبهر لما باشوف راهبات مسخرين نفسهم لعلاج مرضي الايدز من الاطفال فى افريقيا بانبهر من سيده محتشمه هادئه الطباع تطبخ كميات هائله من الطعام فى اول يوم لرمضان وتوزعهم ساعه الافطار بسيارتها على عساكر المرور والمشردين فى شوارع الاسكندريه احسها فى هذه اللحظه قريبه جدا من الله دون ان ترتدي النقاب او تدعي انها افضل من باقي خلق الله
انبهر من بنت باره بحماتها رغم انها شخصيه لا تطاق
انبهر بام تربي اطفالها على الحب والتسامح وتقبل الاخر
انبهر بزوج يسعي لاسعاد زوجته على حساب نفسه
انبهر بسيده تتمنى كل صلاه ان تكون التاليه افضل منها واكثر سكينه مما قبلها واكثر قربا من الله"يكفيها شرف المحاوله"
عن نفسي ورغم التزامى بالفرائض لكن اجد نفسي قريبه من الله اكثر ما يكون عند الدعاء ومتفقه مع حفصه ان مناجاة الله والتواصل الروحانى ليس له طقوس او موعد محدد فليس كل فرض من الصلاه اشعر فيه بهذه السكينه وهذا التواصل ولكن الامر بالنسبه لى لا موعد له يأتي ربما اذا رأيت كابوس واستيقظت فزعه فاستعيذ بالله فاشعر بقربه ومحبته لى

بوست رائع
تحياتى يا قمر

Nsreen Bsunee يقول...

اضافه بسيطه
الخلاص شئ نسبي على ما اعتقد فالخلاص عند شخص ما هو الفرائض والنقاب عند اخر هو مساعده الاخرين عند اخر هو النيه والقلب وعند الله اعتقد ان ممكن خلاص انسان يكون شئ بسيط اوى يعني مش تفتكرى ان رحمه ربنا واسعه اوى مش تفتكرى ان ممكن شخص يراه كل الناس فاسد يكون بار بامه فيكون هذا هو خلاصه
انا مؤمنه بكده عشان كده مش باحكم على ايمان حد ابدا ولا بافكر باسلوب ده داخل الجنه وده داخل النار والاسلوب ده هو اللى بيسبب امتعاضي من السلفيين والمتاسلمين

الصارم الحاسم يقول...

ما بين مش عايز اولعها خناقة في بيتك - مدونتك - ولكن مش قادر اسكت برضه


حتى الصلاة
!!!!!!!!!!!!

حتى الصلاة بنفتي فيها

حتى الصلاة بقت اختراعات زودها البشر

وياترى مين البشر اللي اخترعوا لها الحركات ؟؟؟؟؟؟؟؟؟؟؟؟؟

النبي صلى الله عليه وسلم بقى فمافيش غيره

يا ربي
!!!!!


آه نسيت...اصل السنة مش معترفين بيها...الناس اللي جمعوها كدبوا...فبالمرة الصلاة يعني هي كبيرة


او حتى النبي مش معترفين بيه...راجل عاش زمنه وخلاص....فضوها سيرة بقى
!!


يعني تفكيرنا واختراعاتنا وتخيلاتنا وجدالاتنا السفسطائية توصل الى اننا نخلي الصلاة اختراعات وحركات بشر

فاضل ايه في الدين

مش فاهم والله

عالم غريبة
!!!!!!!!!!!!

يعني افهم ان احيانا الانسان مرهق..مكسل يقوم يتوضى....او الظروف غير مناسبة في مكان عمل او اي ظروف اخرى

فاسكت شوية ومع نفسي وادعي

تمتمة حتى ...عن نفسي باعملها

ووالله من احلى اللحظات لحظات الدعاء

لكن ما الغيش الصلاة واقول بلاها ما انا باعمل حاجة تانية....وكلها اختراعات



طالما بنطنش بجرة قلم وجرة عقل السنة والاحاديث يبقى حديث ارحنا بها يا بلال مش مهم

وكوووول احدايث الصلاة المتفق عليها مالهاش وزن

ده ايه الدين المودرن ده ...وايه الراجة دي

ياخي بلاش خنقة...تقولي كمان اخش الحمام واتوضى واقف اصلي ركعتين او اربعة كمااااان

يا عمي.....الدين في قلبك


في الحوار ده كله .....طبعا زعلان على صاحبة هذا الكلام لكن واضح انها اختارت السكة دي...ربنا يهديها



لكن زعلان اكتر على صاحبة المدونة



عن النبي صلى الله عليه وسلم قال

‏"‏ لا الفين احدكم متكئا على اريكته ياتيه الامر من امري مما امرت به او نهيت عنه فيقول لا ندري ما وجدنا في كتاب الله اتبعناه ‏"‏ ‏.‏


قال رسول الله صلى الله عليه وسلم


‏"‏ الا هل عسى رجل يبلغه الحديث عني وهو متكئ على اريكته فيقول بيننا وبينكم كتاب الله فما وجدنا فيه حلالا استحللناه وما وجدنا فيه حراما حرمناه وان ما حرم رسول الله صلى الله عليه وسلم كما حرم الله ‏"‏



وما اكثر من يتكئ على اريكته هذه الأيام

لا حول ولا قوة الا بالله

راجى يقول...

ببساطة شديدة وبدون فلسفة ، الانسان عبارة عن روح ونفس وجسد
الروح من امر ربى وهى مثلما عبرتى سجينة الجسد ومعا بتتكون صورة الانسان على هذا الكوكب وهى فى شوق الى التحرر من الجسد الثقيل والعودة الى بارئها
النفس هى عقل الانسان و شخصيته الخاصة بتجاربه وخبراته واجتهادته وذنوبه وهى مقر الضمير الذى قد يكون حى يقظ فيدفع الانسان نحو الخير ويصارع كيد الشيطان فيغلب او يغلب لو نام هذا الضمير او مات
الجسد هو ذلك الصندوق المكون من العضلات والدماءالذى يحتاج الروح ليبقى على قيد الحياة وفى نفس الوقت تسيطر النفس على حركته ونشاطه
والانسان فى رحلة تبدا بمولده وتنتهى حتما بموته ثم ينتقل الى البرزخ ثم الى جنة او نار ويمكن ان يكون الخلاص هنا بمعنى الفوز فى اختبار الحياة الدنيا والفوز بالجنة حيث الخلود
ّّّّّّّّّّّّ................

والناس دائما فى الدنيا فى انتظار المخلص او المسيح او المهدى او الامام الغائب او الفقيه العالم الذى يأتى على رأس كل قرن ، لتخليص الناس من ذنوبهم و هدايتهم الى الخلاص
وارى ان هذه اكبر خدعة لبنى البشر من بنى جلدتهم الذين يروجون لهذه الفكره التى تحط المسئولية من على عاتق الناس وتحملها لذلك المخلص المنتظر
ولما قال الرسول الكريم عند عودته من احدى الغزوات
لقد عدنا من الجهاد الاصغر الى الجهاد الاكبر
كان يقصد ان جهاد النفس فى مواجهة الحياة اليومية التى يعيشها الانسان انما هو اكبر واثقل من الجهاد فى الحرب ، حيث ان خوض التجربة والتعرض للفتنة وايقاظ الضمير هو مضمار السباق الحقيقى وليس الرهبنة او التصوف او الزهد
فرجل او امرأة يخوض غمار هذه الحياة واقف على قدميه يخطيء ويصيب لهو افضل الف مرة من راهب او زاهد او متصوف
..................
من صور الصراع السابق بيانه وجود الصفاء الروحى اثناء الصلاة وطبعا كلنا يلاحظ ان ذلك اشبه ما يكون بالرياضة البدنية التى تحتاج الى تدريب مستمر ولكن هنا رياضة النفس اصعب ولعلك لاحظتى يا سيدتى كم تكون الصلاة فى جوف الليل اكثر تاثيرا وكم تكون الصلاة ونحن صائمين اكثر تطويعا للنفس وهكذا

.................

هيئات الصلاة وحركاتها وقوفا وركوعا وجلوسا وسجودا فيها من الفروض التى لا تصح الصلاة بتركهاوفيها من السنن التى تصح الصلاة بتركها سهوا
ولها حكمة بالغة وان لم ندركها كلها ولكن الطاعة هنا واجبة
والتعبير عن الايمان فى الصلاة بالركوع والسجود هام جدا لكون الانسان كما اسلفت يتكون من روح ونفس وجسد فاذا اقبلت النفس غير المادية على الصلاة فيجب ان يتجاوب معها الجسد
كذلك ولان المسلمين مأمورون بالتزام الجماعة والتعاون فى كل الاعمال ففى الصلاة الجماعة اولى ، وكيف يصلى المسلمين جماعة لو لم تكن هناك حركات معروفة تنظم الصلاة؟
.............
اود ان اقول لكى يا سيدتى ان الفتور فى العبادة والسرحان فى الصلاة امر انسانى تماما وان شاء الله يغفر لنا طالما النية صادقة
اكرمك الله وبارك لكى وفيكى

بنت القمر يقول...

Alexandrian far away
اولا:اعتقد اني اتكلمت عن الخلاص وشرحت كذا مرة قصدي
وتلاقي تحديدا في بوستك قبل الاخير
تانيا:
اذا كان الهدف جري الي جدل لغوي او سفسطائي مضطرة اقولك يا عزيزي ده مش وقت مناسب بالنسبه لي عشان انا بحاول ادور علي حاله من السكينه والصفاء الداخلي
ابحث عن سلام داخلي فقط
تالتا:
اعتقد انه بقا عندك مريدين كتار وتلامذه في مدونتك يمطروك بنفس الاسئله اللي سألت عنها قبل كده وغالبا لم احصل علي شيئ
مريديك يا سكندري احق بمجهودك وتلعب معاهم لعبه اليويو وتتحفهم بما في جعبتك الذي لاينتهي.. ما اشبه اليوم بالبارحه
حقا ليس تحت الشمس بجديد
رابعا:اعتقد ان مرحله مراهقتي انتهت من يجي15 سنه وبطلت انبهر بالمدرسين والسفسطائيين واللغويين
اسفه يا عزيزي
اسفه جدا اني دايما بخيب ظنك انا انتقلت الان الي مرحله البحث عن قديس
بدور علي قديس حقيقي معلش اسفه تاني..خيبت ظنك
منيش نوال السعداوي مجرد رجعيه ومتزمته وامرأه تبحث عن شويه سلام وقليل من ترتيب الافكار فقط
تحياتي
اشكر مرورك

بنت القمر يقول...

nonoymm
الخلاص يا عزيزي راحه النفس وتخلصها من شقائها الانساني
ولقد خلقنا الانسان في كمد
خلاصك علي الارض هو لحظات قليله واندرة تقتطعيها في البحث عن معيه اله في الصلاه
او تنتظريها في حياه اخرويه بعيدا عم عالم مليئ بالشرور
والالام
وعدنا الله ان طريق الخلاص عي عبادته وده مش سهل ابدا عشان كده قلت القابض علي دينه
يعني طريق ربنا صعب وصعب اوي ومش سهل
والاصعب انه يكون عندك يقين انك علي حق!!
تحياتي
واشكر مروروك

Alexandrian far away يقول...

أنا أسف على أختراق شرنقة يقينك وطمأنينتك وبحثك عن قديسك


حظ سعيد

بنت القمر يقول...

حفصه
يا بنتي ولا اسف ولا بطيخ
هو انا يعني ها ارمي بلايا عليكي
كل الفكرة أني كل كلمه وشارده ووارده بتلف في عقلي وتنط واقعد افكر فيها
ولما كنت بصلي افتكرت الكلمتين بتوعك
كل الفكرة اني كنت بحاول احصل علي شويه سكون وهدوء وللاسف فشلت وده مش بسببك اطلاقا ده بسبب أن عقلي اصلا مشغول ومطحون بمليون حاجه
واليومين دول يا صفصف
طالبه معايا أني ابقي كووول شويه بس هيهيات
أنا عارفه أن ربنا مطلع والصلاه لازمها السكون
عشان كده ربنا قال انه في صلاه زي نقر الديكه
ودي بترجع لصاحبها
بس اعتقد كمان ان التركيز والهدوء علي الاقل معايا وبالذات اليومين دول صعب الي درجه الاستحاله أنا اصل في حاله غريبه يمكن بسبب الفصول الله اعلم
منورة صفصف
تحياتي

بنت القمر يقول...

ديزرت كات
الدين مفروض يكون طوق النجاه
حقيقي بس تفتكري اليقين والتمسك بالدين سهل في هذا الزمن
ده شويه صلاة مش عارفه اصليهم عدل
تحياتي

بنت القمر يقول...

نسرين بسيوني
انا مش بنبهر بقشور ومظاهر يا نسرين
اقري كلامي تاني بليز
انا بنبهر بنماذج القوة بالناس اللي عندها قدرة علي التخلي عن هذا العالم
ها اديكي مثل
انا مش قديسه ولا شيخه ولا نيله خااالص
ده حبه صلاة مش عارفه اصليهم
لما بصحا الصبح انهارده مثلا
عيني ضربت علي التسريحه لقيت عليها 5 كريمات
اشي ايدين ورجلين ومزيل مكياج واصر ومدرك
وبتاع 7 بارفان
وكل دي حاجات مقدرش استغني عنها
بس الحقيقه هي دي القشور هي دي قشور الحياه
اني مقدرش استغني عن شويه كماليات هو ده الذل بحد ذاته
ان لما عربيتي تبوظ مقدرش انزل واتحبس في البيت ده تخلف وكمان يركبني العصبي
عشان كده بحب النماذج اللي تقدر تستغني فاهمه يا نسرين
الناس اللي مفيش حاجه تذلهم
لا علبه كريم ولااي متعه.. قيسي بقا الاكل والشرب وغيره
تانيا.. الناس اللي بتوهب نفسها للغير كتير الولد اللي ما بيجوزش عشان يوهب نفسه لخدمه امه المريضه وهو يقدر لكن يحرم نفسه بأرادته
ده قديس واحد عنده هدف وعنده رساله
انا لا اخوانجيه ولا شيخه يا نسرين
انا إنسانه عاديه جدا ومليانه عيوب
يا نسرين انا عندي 35 سنه وغطيت شعري بس من شهرين
فما تقوليليش متزمته ومتعفرته انا حتي حبه صلاة وتركيز أني اهرب من العالم ده مش قادره عليهم
فبلاش تحكمي احكام قاسيه ومغلوطه علي وعموما كتر ما هتابعيني لو ربنا اراد هتفهمي شخصيتي وشخصيه كل واحد هنا ايه

بنت القمر يقول...

نسرين بسيوني
الخلاص اللي قصدته
هو راحه الانسان وخلاصه من عذابه شقاءه الدنيا دي عالم مليئ فقط بالعذابات التي لاتنتهي والصراعات الازليه
في عالم افضل
في جنه الله او ملكوت السماء زي الساده المثقفين ما بيحبوا يقولوا نهايه يمكن لعذاباتنا كبشر
اقري تاني يا نسرين انا ليه قلت انا ورابعه
؟؟
انا مازلت ارجو في دنياي الكثير
عشان كده
قلت انا بحب رابعه لكن مش زيها ولا قدها..
نقطه اخري مفيش حاجه في أيي الشخصي اسمها متأسلمين
لان المتأسلم مدعي اعتقد انكي تقصدي الناس بتوع السواك والجلابيه وجوه النفوس خراب
فعلا يا نسرين دي نماذج منافقه وفي حياتي منها الكثير
منقبه محجبه وكل تصرفاتها لا تمت للدين بصله بس دول مش متأسلمين دول منافقين منافقين بس وحسابهم علي الله
تالتا واخيرامش دول بس المنافقين
كمان اللي بيدعي انهنصير المرأه و تحرري وتقدمي وهو بيدي مراته بالجزمه او بيستغلها او بيهينها هو كمان منافق او بيحقد علي اي نموذج نسائي ناجح ويحاربه من باب الغيره كمان منافق
اي حد بيمشي عكس الشعار اللي بيشيله او بيدعيه منافق
سواء الشعار ده اسلام تقدميه او غيره
تحياتي اشكر مرورك

بنت القمر يقول...

الصارم الحاسم
قريت تعليقك من ساعتين
اجلت ارد عشان مردش وانا عصبيه
واضح انك مقريتش كويس
او في جمله عصبتك قمت فاشش غلك فيّا
بس لانك اخ وصديق محترم
انا ها اجز علي سناني واكتم غضبي وارد بهدوء
اولا كلام حفصه هي اقدر ترد عليك مني
تانيا احقاقا للحق
هي ما انكرتش كيفيه الصلاه لكن كنا في مدونتها وهي سألت مدون محترم وداعيه محمود المصري بتاع مصر اسلاميه تلاقي لينكه عندي علي جنب السؤال ده قام مشكورا رد عليها
وعموما ده مش موضوعنا
ديه قناعتها ولا ده مجرد سؤال؟؟
مش ها احاكم ضماير الناس ولا احكم عليها
تانيا
بصراحه الحديث اللي اوردته مفهمتهوش؟؟ ولا تقصد بيه ايه؟؟
ولا انت ناقم وزعلان عليا ليه؟؟
تالتا
كل اللي قلته اني مش قادرة اركز في الصلاه
*****************
..تتوه مني السكينه ويضيع مني التركيز.. انهي الصلاه ولم اعي نصفها..
اعد نفسي غدا بصلاة اكثر صفاءا
******************
يعني اقول ايه؟؟
أمعر بضم العين واقول اني شيخه وصلاتي مفيش زيها
لا مش ها اكدب يا صارم صلاتي احيانا كتيربتكون ناقصه السكينه وخواطر الدنيا بتيجي في راسي
انا قلت اني حاولت اكون في معيه الله
والله وحده
وللاسف سرحت
انت ما بتسرحش يا أخي في الصلاه
انت راضي عن نفسك وصلاتك كلها تركيز؟؟
يبقا ماشاء الله ربنا يكرمك وانا من بركاتك يا سيدنا
انا بقا يمكن ايماني ضعيف ونفسي ضعيفه ومقدرتش اركز يبقا ربنا يسامحني مش العبد
صديقه مدونه اول ما دخلت التدوين قالت لي نصيحه : قالت قدمي نفسك وافكارك بدون رتوش للناس اللي يعجبه اهلا وسهلا ولكن متغيريش نفسك ولا تدعي عشان تعجبي الاخري
انت بتكلمني زي ما تكون بتكلم الزنديقه وغيرك بيكلمني كأنه بيكلم الشيخه السلفيه الاخوانجيه
وانا لاده ولا ده
انسانه عااااديه جدا تبحث عن ذاتها وراحتها فقط
اقرا تاني بليز يا صارم
اشكر مرورك

بنت القمر يقول...

راجي
معلش انت عارف انك صديق المدونه وعزيز جدا ها استسمحك تقرا ردي الاول والتاني علي نسرين ثم ردي علي الصارم
مع كل تقديري لتشريفك المدونه بالتعليق بس عشان معدش تاني
لو في اي تعقيب او تساؤل تاني بعد
القراءه اهلا بيك
تحياتي اشكر مرورك

بنت القمر يقول...

اليكساندريان
مفيش اسف حقيقي انا التوقيت ده من حياتي مش حمل جدل طويل
مع احترامي
اشكر مرورك

عدى النهار يقول...

صح.. كل واحد سيعلم إلى أين قادته خطاه. ربنا يهدينا جميعاً لما فيه رضاه

أنا عندى حساسية ناحية الشخصيات الصوفية من كثرة ما ينسبه لهم أتباعاهم من خرافات. وأيضاً فى كلام كثير منسوب لهم ينكره عليهم كثير من العلماء لما فيه من خروج عن الدين

لا أعتقد إن فى إنسان بيؤمن بالله ويخلو هذا الإيمان من حٌّب إلى جانب الخوف والرجاء. المشكلة فى رأي إننا مش بنعرف نعبّر عن هذا الحب من خلال تفكيرنا وسلوكنا. الشيخ القرضاوى له رأى قيم جداً فى هذا الموضوع ، علّق مرة على التركيز على تحفيظ الأطفال الصغار القرآن بأنه من الأفضل تعليمهم حٌب الله وحب الرسول منذ الصغر

بالنسبة لحديث القابض على دينه كالقابض على الجمر.. الحمد لله إحنا لسه بعيد جداً عن هذا وإن كان فى مسلمين فى أماكن كثيرة يتعرضون لمصائب فظيعة ربنا يرفع عنهم الغٌمة ويلطف بهم

حاسس إنى باكتب بوست مش تعليق :) وإن كان تعليقى لم يشمل كل نقاط البوست

عدى النهار يقول...

وأنا باكتب تعليقى كان فيه 8 تعليقات فقط!! قرأت ردك على التعليقات والتى جاءت لتؤكد لي أن فهمي للبوست عند قراءته قبل وجود أى تعليق هنا كان بالضبط كما أوضحتى فى ردودك

HafSSa يقول...

بجد يا قمر عاوزة افهملك منطق
ايش عرفك انه الافندي بيتكلم عني
خلاص بقيت انا رمز الكفر فلما هو بيتكلم بقيتي متيقنة اني انا المزعومة من ضمن خزعبلات سيادته؟؟
ليه تحطي اسمي على كلامه؟؟
انتي شافياني ايه ؟؟
للدرجة دي زنديقة مثلا و لا ايه بالظبط؟ظ
امتى اسلوبك حيكون مسايس شوية بدل رمي البنزين على النار و شعللةالمواضيع عالفاضيةو المليانة و بعد كده ترجعي تقولي كنت بهزر و انتي مفهمتيش
ده حتى لو بالفعل كلامه واضح انه عليا انا مش لازم انتي تيجي و تعنونيه
في حاجة اسمها نقصر الشر يعني مش نمده
سلام

Nsreen Bsunee يقول...

الصارم الحازم

طبعا تعليقك موجه للى اتكلمو عن ان التقرب من الله مش بالفروض بس
طيب ما انت يا اما مش بتفهم وده واضح يا اما مش بتشوف وده ممكن برضه


انت تقول مش عايز خناقه وبعدين تروح راصص الكلام الغبي المستفز اللى انت كاتبه ده حد قال يا ابني انت ان الرسول اخترع الصلاه حد قال متصلوش حد قال الصلاه حرام وخزعبلات ولا انت عندك فراغ وعايز تستفز الناس وخلاص

طلعللى كلمه من كلامك الفارغ العبيط ده حد قالها
مع ان الكلام مع امثالك مفيش منه فايده بس حاوضحلك اللى ان اللى اتقال ان مش بالصلاه فقط ممكن الواحد يقرب من ربه وان مناجاه ربنا ببعض الهدوء والسكينه افضل من الصلاه من غير خشوع واداء مجرد حركات ركوع وسجود

بس مفيش كلام تانى اتقال
يبقي انت بتقول الكلام ده ليه
عشان تتخانق ولا عشان تستفز الناس ولا بتستعرض ذكاءك الخارق ولا ايه

ويعني ايه عالم غريبه
ويعني ايه صعبانين عليك
منتظر الرد عليك يكون ازاى وانت كل كلامك استهزاء واتهامات فارغه

فعلا لا حول ولا قوه الا بالله

عباس العبد يقول...

هيه
أنا جيت , و نورت المدونة , و بما أنك بتدورى على قديس , فكان لازم البى سؤالك . شبيك لبيك .
بتحليل الردود و البوست نلاقى الاتى : 7 برفانات و شوية كريمات و لو فرضنا البرفان من أبو 150 جنيه و الكريم من أبو 35 جنيه و بحسبة بسيطة .........يا خرابى ,,, اللهم لا حسد , و اللهم صلى على النبى . بلاش قر , في ناس عينيها وحشة و أنا و الحمد لله مش منهم ..... هههههههه
======
الخلاص كذا مستوى , من اول المادى المباشر زى ما تخلصى من مصيبة كده , أزمة انت فيها , أمتحانات , مرض او حتى سيطرة شىء مادى عليكى زى الأكل و الشرب أو حتى الكريمات , لغاية أعلى درجات الخلاص الروحى لأن حتى الخلاص الروحى درجات من أول ما تخلصى من خطيئة مسيطرة عليكى , او شهوة , او عيب نفسى ( كذب , سرقة ..... ) لغاية الخلاص الدينى و هو دخول الجنة أو الملكوت . فالخلاص كلمة معناها واضح أو زى ما يقال " علتها فى ذاتها " و محدش يقولى يا لئيم ... قصدك أيه ؟ ههههه
========
أما بالنسبة للصلاة , فشجاعة الاعتراف الى أنتى بتمارسيه ده يا ريت لو عشر الناس الى فى بلدنا تعمله . كان حالنا أتحسن كتير و كان فى حاجات كتير اوى أتصلحت و كنا أتقدمنا قد أيه . لو كل واحد قال بكرة حصلى احسن من انهاردة , بكرة حشتغل بضمير احسن من انهاردة , بكرة حبطل نميمة أقل من انهاردة , بكرة حقلل الكدب و الشتيمة و الحلفان و الافتراء على الناس أقل من انهاردة , شوفى بقى كان حالنا بقى أيه ؟؟؟ .... اغلبية الناس الى بترد و الحمد لله معندهاش و لا بتعمل أى حاجة غلط , كله داخل يصححلك . ربنا يكون فى عونك . انتى الوحيدة الى بتغلط و مش من حقها تفكر و لا تعمل أى حاجة .
========
نسرين
البسطاء دايماً فى أيمانهم أو فى تصرفاتهم , هم دائماً الأكثر أبهاراً . لأن افعالهم صادقة لأنهم معمولة بعفوية و فطرة المؤمن الى مش شايل هم بكرة لأنه عارف انه بكرة على الله مش عليه . و مفيش فعل أصدق من الى عملته بنت القمر من انها قالت انها حتحسن نفسها
========
الصراحة بما ان صديقى الصارم دخل علق عندك و بما انه حبيبى فيا ريت يسمحلى " أنكشه " شوية لو ينفع و من باب المحبة مش اكتر , و لا أحنا أعداء يا صارم ؟ .
الحرف يقتل يا صارم , الحرف يقتل .
لو كل حاجة عملناها بدون تفكير يبقى عمرنا ما حنعمل حاجة صح . لأن زى ما فى خطية فى غفران . زى ما فى غضب فى حلم . زى ما فى عدل فى رحمة , و احنا مين احنا علشان نقدر نتكلم على رحمة ربنا . هى متكلمتش على انها معترضة على طريقة الصلاة , هى كل الى قالته انها أتشتت فى صلاة و بتتمنى أن الى الصلاة القادمة تكون أكثر روحانية و صفاء , و لا انت شايف أن الأنسان ميتحسنش و لا يسعى نحو الأفضل و يسعى الى مزيد من الخشوع و الخضوع و طلب الرحمة و المغفرة من الله كل يوم ,,,, و لا يقول هو كده حلو قوى و انا بقيت عظيم و محدش احسن منى و اكيد اكيد ربنا حيرحمنى .
و بعدين
هو الشغل بضمير مش صلاة
قراءة القرآن مش صلاة
المناجاة مش صلاة
مساعدة الأخرين , توجيهم بالحسنى مش صلاة
لو واحد مشلول ميقدرش يتحرك و ميقدرش يقوم بحركات الصلاة , يبقى ربنا مش حيرحمه ؟
الابتلاء و الشكر على الأبتلاء مش يبقى صلاة
الحرف يقتل يا صارم .
=========
رابعة العدوية و القديس أغسطينوس ليهم كلمة مشهورة جداً و هى :
يارب لو اننا نحبك و نصلى اليك من اجل الجنة فاحرمنا منها , لو اننا نحبك و نصلى اليك خوفا من النار فأدخلنا اياها .
========
متشكر جداً على البوست ده
خليتينى أفكر فى حاجات كتير و أراجع نفسى فى حاجات كتير .
شكراً مرة تانية

الصارم الحاسم يقول...

بنت القمر

أكييييد بسرح وانا بأصلي...وبأبقى تعبان احيانا..ومش مركز

كوووول ده بيحصل

أكيد احيانا بأفضل اني ادعي

دعاء فري يعني مش مقيد ان جاز التعبير

لكن لكي ولنسرين البسيوني الاقتباسات من كلامك وكلام حفصة اللي انا مستغرب انه في نفس البوست ومكتوبة بايدك وبإيدها ومع ذلك لم تلتقطي فكرتي...يمكن لعصبية الاسلوب لكن العصبية لها ما يبررها


ما كتبتيه


"
اتذكر كلمات حفصة.ما القران منزلش طريقة معينة للصلاة، ليه احنا عملنا

زي بني اسرائيل في موضوع دبح البقرة واتفذلكنا على شكل و كيفية الصلاة
"

القرآن منزلش اشكال معينة للصلاة...يبقى خلاص يعني !!!!!

وبعدين تاني

"طيب ليه احنا نخنق على نفسنا؟؟
"


"اصلي مش حضحك على ربنا و اقوله اديني صليت بقى فلمكش حجة عندي"


وماتنسيش ان الكلام والاستنتاج مرتبط بحاجات تانية العبد لله بيقراها لنفس الشخصية اللي بتأيد في اماكن اخرى مهاجمة كل ثوابت الدين بدون اي اساس .....او على نفس الاسس الي هي مش اسس واللي ذكرتها في تعليقي


تعليقي كان في سياق معرفتي بمن تتكلمين عنها وبهذا الاتجاه من التفكير غير الشخصية ذاتها

الموضوع لا هو بنزين ولا هو نار ...ربنا يهدي عبيده ...لكن مش ممكن ان التفكير يوصل للدرجة دي ...وكمان في كلام حضرتك انه احيانا بتخش الافكار دي على دماغك

اعتذر ان كنت ضايقتك انتي يا استاذة بنت القمر


عباس العبد...انكش براحتك يا استاذي وبجد انت من اكتر الناس المحترمة اللي باختلف معاها

الكلام ماكانش على التشتت...الكلام كان بوضوح على الفكر اللي كمان عايز يلغي الصلاة بما ان القرآن لم ينزل هيئة معينة للصلاة




اخيرا نسرين البسيوني

ياريت اما يكون فيه ناس محترمة بتتكلم وتتناقش...اما ان الواحد يخش يتكلم باحترام او يخرس.....عشان ان لا ده ولا ده الرد هيكون بالمثل

الصارم الحاسم يقول...

طلب تاني اذا سمحتي



ممكن ايميلك اذا تسمحي

ايميلي هو
alsarem_alhasem@hotmail.com

ده اذا تسمحي...ان ما نفعش مفيش مشكلة خااالص.....ولا غضاضة

HafSSa يقول...

عاجبك كده يا قمر؟؟
اديكي خليتي اللي يسوا و اللي مايسواش يتكلم عليا و يدعي الفهم و يتكلم كانه العالم ببواطن الامور
شفتي بقى اقتباساتك و عنونتك للكلام بتؤدي لايه مع ناس متعرفش تشغل عقلها و لو بالتساؤل؟
مشتكرة اوي
ادي اللي اخدته من التدوين و اللي بيدونوا و فاكرين نفسهم فاهمين و هما
ولا بلاش اقول

الطائر الحزين يقول...

وادعوة خوفا وطمعا

محمود المصرى يقول...

بسم الله الرحمن الرحيم

بصى يا ست الكل

الصلاة فيها حاجتين مهمين اوى اعتقد هما اللى تقصديهم .
الخشوع والسكينة
السكينة بتكون فى الجوارح وهى شرط فى صحة الصلاة , يعنى الواحد لو فضل يتحرك كتير يبقى مافيش سكينة فى الصلاة وبالتالى صلاة الانسان تبقى باطلة .
اما بقى الخشوع فهو هشوع القلب لله وتعظيمه وتبجيله واجلاله وبالتالى يصبح القلب خجلا وجلا حييا من الله عز وجل , ودا من شروط كمال الصلاة وليس من شروط صحتها , واعتقد هو دا اللى بتدورى عليه او تقصديه .
لكن الخشوع دا تكريم من الله لعباده الذين بذلوا اسبابه , يعنى مش اى حد يخشع لازم قبل ان يتذوق طعم الخشوع فى قلبه ان يقدم ثمنه وثمنه هو تقوى الله عز وجل فى السر والعلن , يعنى نقدر نقول ان صلاة الانسان هى مرآة حياته , يقدر يعرف من خلالها مدى قربه من الله , واقامه الصلاة حتى لو كانت خالية من الخشوع هى جزء من الطريق للخشوع , يعنى ماينفعش ربنا يكرمنا بالخشوع ونحن لا نطيع امره بالصلاة .
وانا اؤكد انى للاسف لست خاشعا فى صلاتى واسأل الله ان يكرمنا جميعا به .

محمود المصرى يقول...

عذرا تعليق اخر

بالنسبة لمن وصف اللحية والنقاب بأنهما مظاهر فارغة ياريت بغض النظر عن قصد حضرتك من اللفظ ان ننتقى الالفاظ فى وصف احد اركان الهدى الظاهر التى تدور بين الوجوب والندب , يعنى لو حضرتك ما تقصديش تستهزئى بها يبقى ياريت لو تكرمتى تنتقى الاوصاف ليس الا , انا لا احاكم ولا اتهم ولا اى شىء كل الموضوع انى ادين استخدام مثل هذه الالفاظ فى وصف ما يعتبر جزء من الاسلام , وزى ما قال رامز شرقاوى اللى بتحترمى عقله الحرف يقتل لكن الروح يحيى .

nonoymm يقول...

تحياتي لحضرتك بنت القمر وعلى الحوار الهادف والتعليقات اللي بستفيد منها وعرفتني اكتر وربنا يباركك فيكي واسمحيلي اشكر اخي محمود والاخ راجي على اثراءهم للموضوع والاخ الصارم
والاخ رامز والله كلامه ينم عن شخص متزن فكل الاحترام لحضرته
اسمحيلي فقط اقول للاخت نسرين هما ليه المنتقبين والملتحين مزعلينك كدة عمرك ابدا ما قابلتي حد فيهم يسر ابدا
عموما انا مش بدافع عن حد بس عاوزة اقول لحضرتك ان الواحد ممكن يقول كلمة لا يلقي لها بالا فترميه في النار سبعين خريفا والكلام دة مش من عندي دي من حديث شريف صحيح
وبقوله لحضرتك من باب التناصح اذا سمحتي
تحياتي

Nsreen Bsunee يقول...

رامز

نسرين
البسطاء دايماً فى أيمانهم أو فى تصرفاتهم , هم دائماً الأكثر أبهاراً . لأن افعالهم صادقة لأنهم معمولة بعفوية و فطرة المؤمن الى مش شايل هم بكرة لأنه عارف انه بكرة على الله مش عليه . و مفيش فعل أصدق من الى عملته بنت القمر من انها قالت انها حتحسن نفسها
========

افتكر يا رامز انا مقولتش غير كده

*************
اللحيه والنقاب والصليب الخشبي فى نظري هى مجرد قشور مالهاش اى دلاله بالسلب او بالايجاب

بانبهر لما باشوف راهبات مسخرين نفسهم لعلاج مرضي الايدز من الاطفال فى افريقيا بانبهر من سيده محتشمه هادئه الطباع تطبخ كميات هائله من الطعام فى اول يوم لرمضان وتوزعهم ساعه الافطار بسيارتها على عساكر المرور والمشردين فى شوارع الاسكندريه احسها فى هذه اللحظه قريبه جدا من الله دون ان ترتدي النقاب او تدعي انها افضل من باقي خلق الله
انبهر من بنت باره بحماتها رغم انها شخصيه لا تطاق
انبهر بام تربي اطفالها على الحب والتسامح وتقبل الاخر
انبهر بزوج يسعي لاسعاد زوجته على حساب نفسه
انبهر بسيده تتمنى كل صلاه ان تكون التاليه افضل منها واكثر سكينه مما قبلها واكثر قربا من الله"يكفيها شرف المحاوله"


تحياتي يا رامز بس مش عارفه هو انا فى تعليقي هاجمت بنت القمر فى حاجه وانا مش اخده بالى انا كل اللى قلته ان القشور والمظاهر مش بتبهرني
كفرت

Nsreen Bsunee يقول...

الصارم الحاسم
راجع تعليقك الاولانى كده
آه نسيت...اصل السنة مش معترفين بيها

حتى النبي مش معترفين بيه

مش فاهم والله

عالم غريبة

ده ايه الدين المودرن ده ...وايه الراجة دي

ياخي بلاش خنقة...تقولي كمان اخش الحمام واتوضى واقف اصلي ركعتين او اربعة كمااااان

يا عمي.....الدين في قلبك

يعني بتدعي على الناس بالباطل ولجبنك او لسبب تانى ماعرفوش موضحتش انت موجه الكلام لمين واشرت لان الدعاء شئ جميل بس ميغنيش عن الصلاه وانا فى تعليقي
********************
عن نفسي اجد نفسي قريبه من الله اكثر عند الدعاء
********************
اعتبرت ان التعليق موجه ليا وكان لازم الرد يكون عليك كده واسوأ كمان عشان متتجرأش وترد على تعليقاتى تانى باسلوبك اللى انت معروف بيه من استهزاء واتهام للاخرين بالكفر وانا مش حاسمح لواحد زيك انه يغلط فيا يا شاطر ويتمادى فى الغلط فا ياريت تسكت التعليقات كلها كانت فى حدود الموضوع وبمنتهى الادب لغايه ما شفنا طلعتك البهيه فا متعتبرش نفسك من التعليقات المحترمه انت عارف كويس انك بعيد كل البعد عن كده وربنا يشفيك ويستحسن متوجهليش كلام تانى

Nsreen Bsunee يقول...

عاشقه النقاب
ربنا يخرب بيتك انتى رمتيني فى النار وتقوليلي من باب التناصح تناصح ايه بقي
وايه النفاق ده بقي اخوكى الصارم الحاسم اثري الحوار مش عيب عليكي بالزمه اثري الحوار في ايه انشاءلله ده دخل قلبها خناقه والكلام كان فى حدود الاحترام لغايه ما هو اتدخل ومكانش ليه فيه اساسا انا اشوف ان الدعاء بيقربني اكتر من ربنا انا حره انتم مالكم بيا مش بحب المنتقبين والملتحين انا حره سيبونى فى حالى وبلاش دور النصح والارشاد ده لا انتى صاحبه علم ولا انتى شغاله فى دار الافتاء فا متجيش تقوليلي الصارم الحاسم اثري الحوار وانتى يا اخت نسرين فى النار اولا انا مش اخت حد ومتفتكريش ان عندى تسامح بنت القمر وسعه صدر رامز ربنا يكمله بعقله على اللى هو بيشوفه ده والله بطل انه لسه محتفظ بالهدوء والتسامح لكن انا بقي معنديش ولا سعه صدر ولا تسامح معاكم متوجهليش كلام ولا نصح لو سمحتى


********************
بنت القمر
هو انا هاجمتك فى اى تعليق برضه حاسه بحده فى ردودك عليا واكتر من الحده شويه انا لا قلت انك شيخه ولا قلت عن ايمانك اى شئ كل اللى قلته ان يكفيكي شرف المحاوله وانى باختلف معاكى فى انى بانبهر بالتصرفات البسيطه اى كان المظهر
وتعليقي عند الكسندريان قلت انى اتوسم فيكي التحرر لكن بعض اراءك متزمته يبقي فيه ايه ممكن تفسير لحده الردود من البوست اللى فات
وشكرا

الصارم الحاسم يقول...
أزال المؤلف هذا التعليق.
الصارم الحاسم يقول...

رد نسرين خير دليل واشارة على نوعية الصنف ده من البشر

فعلا اللي يسوى واللي.....بيتكلم في الدين

هاحاول امسك نفسي بس لو الكلام استمر من البعض بهذه الطريقة مع عدم تدخل صاحبة المدونة هأضطر للرد

بنت القمر يقول...

يا جماعه مش ممكن كده
شويه تسامح بس وشويه
مرونه
ارجوكم بلاش حد يغلط في حد خلوا الكلام ليا بس والشتيمه كمان ليا
:(
ارجوكم بلاش المرة دي مناقشات جانبيه خلوا كلامكم معايا
بلييييز
اعتذر لكل واحد اتشتم واتهان في بيتي
اعتذر من قلبي لكل واحد ضايقته بدون قصد
اعتذر بصدق وبألم عن كل واحد اعتقد اني برد بعصبيه
في سوء فهم كبير وواسع
مسكتوا في كلمه في البوست والبوست مليان افكار
واتحانقتوا...كلكم افاضل ومحترمين خلي عندنا حبه سعه صدر ورحابه نفس
مش عارفه ارضي مين ولا اصالح مين
شكلي زعلت الكل
):
اسفه بجد

بنت القمر يقول...

عدي النهار
اشكر مرورك يمكن التوصيف خاني في حكايه التصوف
مقصدش التصوف اقصد خليط من الزهد و الترفع والقدرة علي الاستغناء
تحياتي

بنت القمر يقول...

حفصه
الاعتذار السابق يشملك وانت اول واحده اوجهه لها
بعت ليك ميل قبل ما انام امبارح ومجانيش رد منه
:)
يا ريت انتي كمان ما تفشيش غيظك فيا
):
اشكرك تحياتي

بنت القمر يقول...

عباس العبد
الحمد لله المدونه جت فيها عين تفلق الحجر مش عارفه منين
بس بما انك زي بتوع الضرايب وعمال تحسب
وضحكتني
ها اهديك تلك الطرفه
امبارح كنت بكلم بلو بالليل وخليتها قرت البوست والردود وحلفتها تجاوب بصدق ان هي شايفه ايه
هل انا رجعيه متزمته؟؟
كان ردها انه بوست ممتااااز وانها نفسها تقول نفس الكلام عن علاقتها بالله
واني مش متزمته بالعكس ده كلام ليبرالي جداااااا
واستغربت اني استعملت لفظ الخلاص وهو لفظ مسيحي وممكن ازعل المسلمين مني
المهم ناقشتها اني مش شايفاه ابدا لفظ مسيحي واعتقد انه لفظ انساني عام
المهم
مما سبق وزي ما قلتلها وقعدنا نضحك
(((:
واضح انهى تم تصنيفي كمتزمته رجعيه ليبراليه متحررة ذات مصطلحات مسيحيه!!!!!
ومن ذلك اكون سوبر وومن جمعت كل المتناقضات
(:
وممكن اكون خدعت جميع الاطياف الموجوده في المدونه _وممكن اشتغل عميل مزدوج كمان
ده انا ولا رأفت الهجان!!
***************
سعيده جدا انك فهمتني_ سعيده انك شفت كلام كتير وافكار تانيه غير نقطه الصلاه في البوست الزهد الاستغناء علاقتي بالله.. الخ
كويس ان حد لسه بيقرا براااحه************
هو اغسطينوس قال زي ما رابعه قالت
رغم انه كان قبلها
يبقا اكيد هي قلدته
(:
عموما
الشكر ليك
وانا برضه بقول التضامن بين المدونين واجب قومي
:)
تحياتي العميقه لشخصك المميز

بنت القمر يقول...

الصارم الحاسم
شوف يا استاذ انا مش ها اناقش تانيه حكايه الصلاة ولا مين قال ايه
بس ارجو منك رجاء
بليز حاول قبل ما ترد او تكتب تعليق تعد لعشرة حاول تكون اقل حده
مش بالزعيق ولا بالاتهام
لو كنت فظا غليظ القلب لانفضوا من حولك
ربنا قال كده للنبي
قاله لانفضوا متبقاش فظ الدعوة بالحسني
ليس القوي بالصرعه ولكن من ملك نفسه عند الغضب
حتي لو قلت انك بتغضب لله او للدين وده غضب مشروع
ها اقولك الطريق لجهنم مفروش بالنوايا الحسنه
حضرتك مسكت في كلمه الصلاه وسبت افكار تانيه كتير مقدرتش تسمع كلمه مش عاجباك من زميله
يا اخي انساها
اعتبر اني قلت انا سرحت في الصلاه في فيلم عربي
في مصروف البيت مش بكده تقدر تغير قناعة الناس هالتك فكرة مناقشه كيفيه الصلاه وعصّبتك وزرجنت واسمح لي غلطت
ممكن كان تناقش بهدوء او تتجاهل الحكايه كلها
لو ها تناقش ناقشني انا وحاسبني انا!!
بلاش تمسك واحد واحد تسلخه
امال لو حد انكر وجود الله قدامك ها تعمل ايه؟او شفت مسلم بينقد النبي وينتهك سيرته؟؟ انت مش شايف المدونات فيها ايه؟؟ وطوفان الافكار والاتجاهات
الحكمه والهدوء يا عزيزي
وادعو الي ربك بالحكمه والموعظه الحسنه
اعتذر منك بخصوصو الميل
الميل شخصي.. واللي تحب تقوله .. مربع التعليق يساعه
شكرا

بنت القمر يقول...

الطائر الحزين
ما هو انا لسه في مرحله خوفا وطمعا
مقدرش اني ارتقيت لمرحله اعلي
ايمانيا
اشكرك

بنت القمر يقول...

محمود المصري
معلش يا محمود
كان نفسي تشرف والجو اهدي من كده
********************
وكان نفسي الحوار ما يقتصرش فقط عند نقطه الصلاه
لكن لو اتكرمت وقريت هتلاقي افكار كتير
عموما واضح ان شويه فضفضفه
نصبت للانسان مشانق من كل نا حيه وزعلت القاصي والداني
********************
اما بقى الخشوع فهو هشوع القلب لله وتعظيمه وتبجيله واجلاله وبالتالى يصبح القلب خجلا وجلا حييا من الله عز وجل , ودا من شروط كمال الصلاة وليس من شروط صحتها , واعتقد هو دا اللى بتدورى عليه او تقصديه .
************************
حلو اوي حكايه شروط كمال الصلاه وليس صحتها
اهو انا لسه في مرحله الصلاه الصحيه وليس الكامله
اشكر دماثه خلقك
واجل هدوء اعصابك
تحياتي

بنت القمر يقول...

نسرين بسيوني
لا في حده ولا يحزنون يا نسرين انتي اختي الصغيرة انا بس تعبت اوضح واشرح واعتذر وانفي اتهامات
وانا لا شايله منك اللي قولتيه عند اسكندراني ولا حاجه اصلا رأيك وبراحتك وجيت بعدها علقت عندك دليل انه مفيش حاجه في قلبي
ان شالله تقولي ايه طالما في حدود الاحترام مفيش مشاكل
تانيا كل واحد ليه فكره وتوجهه وزوقه في الناس
اللي يعجبه يتحاور معاه
واللي يحس انه بعيد عنه يتجاهله ويبعد عنه بهدوووء
وارجع اقول لا جبت سيره منقبات ولا لحي ولا اي حاجه انا قلت ملتحي اضائت الصلاه جبهته
او راهب عشان محدش يقول متزمته ورجعيه ورجعت قلت ثوري يحمل قضيته علي كتفة
يعني مش قشور دينيه
ورجعت وضحت في ردي الاول عليكي ان اللي بيخدم امه ويمتنع عن الجواز يستحق الاجللال ويبهرني
مش عارفه اوضح تاني ايه وفين الحده في كلامي تحديدا
خلينا نكون اهدي شويه.. واكتر سعه صدر وتسامح وتقبل للاخرين
اشكرك

بنت القمر يقول...

نونويم
مش ها قدر ارد بالنيابه عن حد عشان محدش يزعل
كل واحد يرد عن نفسهويتاقش باسمه
انا مش قادره علي حد
:(
ولا عارفه اراضي
حد
لكن لكي مني اعتذار عن اي كلام ازعجك في مدونتي
):
اشكرك واقري تعليقي الجماعي تاني
اشكر مرورك

nonoymm يقول...

والله يا اختي بنت القمر ان حزني الكبير ان نسرين ماشية تشتمني في كل حتة بدون سبب واضح
والله انا ما اعرف ليه ؟؟
بس الظاهر فعلا انها عندها عقدة من المنتقبات والمتاسلمين على حد قولها
ويا ريتها تفتكر اني قبل كدة قبلت لها دعوة على لينكات وضعتهم لي
فهي مش قادرة تستحمل كلمة قلتها من باب النصح خلاص يا ستي انت احسن مني مليون مرة
واللي قلتيه لي في مدونتك كمان انا مسامحاكي فيه واللي هنا واللي قلتيه واللي لسة هتقوليه
بس من فضلك ابتعدي عن خراب بيتي
يعلم الله تعالى اني لم اقصد اي شيء سيء لك او لغيرك
ولما ذكرت ان الصارم اثرى الحوار دة وجهة نظري
بفهم او ما بفهمش يعني انا حرة يمكن انا شايفة اني استفدت منه لكن انتي لا
ايه مزعلك وايه يخليكي تردي على شكر موجه لغيرك
انا بقولك بمنتهى الحب حاسبي على كلامك
انتي حرة وانا حرة
لا تحزني ولا تحاولي ترضي احدا اختي بنت القمر
ارضي الله وكفى
وانا جد مش زعلانة منك وفيه يوم اسمه رد المظالم
تحياتي

Nsreen Bsunee يقول...

انتى حتستعبطي يا ست انتى وحتعيشي دور الشهيده انا ماشيه باشتمك فين انشاءالله هنا انا واحده دخلت عجبني البوست وجهت تعليق لصاحبه المدونه مخلصتش وموجهتلكيش ولا كلمه انتى اللى عملتى جدعه ووجهتيللى كلام ودخلتيني النار رديت عليكي الرد اللى يناسبك وعندى فى المدونه داخله تقوليلي دول زى القطط والكلاب قلت انك مش مرحب بيكي عندى فى المدونه فا متتكلميش كانى باجرى وراكى فى المدونات اشتمك
انا ولا عامله مدونه مخصوص اشتم الناس واكفرهم واهاجم الدين المسيحي زى ما جوزك عامل ولا بامشي اكفر الناس واقولهم انتو غلط وانا صح فا ياريت وحياة ولادك يا ست سبيني فى حالى وحافظى لنفسك على شويه كرامه عشان انا مش عايزه اغلط فيكي اكتر من كده اصل نيتك الحلوه وقعتك معايا فى وقت مش ظريف انا ولا عندى دلوقتى تسامح ولا سعه صدر

nonoymm يقول...

طيب
انتي غريبة اوي بالفعل
ومحتاجة لطبيب نفسي يشوفك دة افضل
على فكرة زوجي لا يكفر ولا يهاجم الدين المسيحي
لا تدخي مدونته وحافظي انتي بقى على كرامتك وكلامك للاسف هعذرك لظروف قلة سعة صدرك
على فكرة اسفة مش هقدر ارد عليكي تاني لاني لا احبذ تضييع وقتي في مهاترات وكلام فارغ لا يودي ولا يجيب
=================================
بنت القمر ممكن حضرتك بمنتهى البساطة تحذفي تعليقاتي بما فيهم التعليق دة
واوعدك ان كان دخولي لمدونتك بيزعلك ويضايقك
انا مش هدخل تاني ومن غير اي زعل

Nsreen Bsunee يقول...

اخيه على الغباء
اوووووووف لما اقول متوجهليش كلام يبقي تحطى نقابك فى بقك وتخرسي

محمود المصرى يقول...
أزال المؤلف هذا التعليق.
محمود المصرى يقول...

بسم الله الرحمن الرحيم

اختى عاشقة النقاب

انصحك ان تتمثلى بقول الشاعر

فلو كان عبد الله مولى هجوته*** ولكن عبد الله مولى مواليا

او ان شئتى بقول الاخر

شاتمني عبد بني مسمع***فصنت عنه النفس والعرضا
ولم اجبه لاحتقاري له***ومن يعض الكلب ان عضا

اسكندراني اوي يقول...

الاخت الكريمه
بنت القمر
ارجووووكي عيدي حساباتك
لن تجدي ما تبحثين عنه في ذلك الطريق
لكي كل الدعاء الخالص ان تلهمي الصواب

الصارم الحاسم يقول...

طيب اركز الاول مع بنت القمر

اولا

الكلام بصريح العبارة لم يكن موجه ليكي بأي شكل...الا من ناحية ذكرتها في هدوينة قريبة تجديها في مدونتي

ثانيا

بعد كل الخبرات السابقة في الافكار يعني وليس التعاملات مع الشخصية صاحبة الكلام...كان الفكرة واركز على كلمة الفكرة مستفزة جدا جدا

زي ما قلت في تعليقي اللي حضرتك شايفاه عصبي ان مش ممكن النكار يوصل لغاية الصلاة ...يعني حتى الصلاة بقت اختراعات زودها البشر بل ويشبه مزوديها ببني اسرائيل في حين ان ده امر نقله النبي عن رب العالمين... واظن اني فصلت في هذه الفكرة بما فيه الكفاية

متطلبيش مني بقى ابقى هادي...انا بشر....وعندي احساس خاصة من ناحية ديني...مش معقول مع كل الشتيمة اللي بلاقيها من هذه الشخصية للمتدينين والمتدينات وثوابت الدين في اماكن اخرى انتي عارفاها كويس ...وكمان توصل للصلاة

ربنا يهديها بجد....لكن الموضوع لم يكن انفعال وقتي ولا شخصي واللي عايز يصدق يصدق....الموضوع عبارة عن خبرات مع هذا الفكر واكرر الفكر ...ومن لا يستفزه هذا الكلام في وجهة نظري اما انه ثوابت الدين عنده مش اولوية اولى او شئ آخر مفيش داعي اقوله





نيجي لنقطة الفظاظة.....مش دايما الموضوع يسمى فظاظة....ولم يكن اندفاعا...ولست شخصية هوجائية ومن يعرفني في الحقيقة يعرف جيدا ما اقول...يمكن زمان ايام المارهقة كنت...الان الامور تختلف ..راجعي فكرة الفظاظة دي مع اي شيخ ثقة بالنسبة لك هيذكر مواقف للنبي وللصحابة تؤكد ما اقوله

الأصل اللين نعم....لكن فيه مواقف مالهاش حل ولابد من الرد فيها بهذا الشكل...ومع شخصيات تحمل افكار مثل هذا

اخيرا...كنت افضل الميل لان فيه مناقشات كنت افضل تكون على الايميل عشان ماتعملش ولعة زي دي خاصة اني ما باسكتش في مواقف معينة ولابد لي من التعليق...لكن كما تشائين..هاحاول ما اخشش هنا كتير - وهذا ليس ضغطا من اي نوع لا سمح الله ولا غضبا - لكن مفيش داي انكد عليكي هنا

لكي اصدقاء وانتي على طريق ممتاز بامر الله

الصارم الحاسم يقول...
أزال المؤلف هذا التعليق.
الصارم الحاسم يقول...

الأخت عاشقة النقاب

وماعاش اللي يخرب بيتك

وجزاك الله خيرا كثيرا على شكرك لي

وجزاك خيرا وجعل في ميزان حسناتك النقاش الغبي اللي حصل وما طالك من سخافات البعض

معلش المناقشة مع السفيه احيانا بتجيب مثل هكذا امور..وربنا بيربينا بيهم وبيعلمنا الصبر وبيفهمنا نفسيات مريضة موجودة معنا في الحياة



نسرين

وانتي بقى هتعلميني ما اتجرأش وارد عليكي

لأ عندي المقدرة أرد وأمسح بيكي المدونة والمدونات اللي جنبها...وانتي عارفة كده كويس ...بس فقط عارف ان ده بيحزن الاخت بنت القمر وده اللي حايشني

وحايشني برضه ان شايف الموضوع معاكي مش مهم اوي...خليني شوية امشي على الاسلوب الهادي للاخوة الملتحين اللي ردوا هنا والاخت المنتقبة


ماخدتيش بالك ان الأخت المنتقبة اللي بتتميزي غيظا عندما ترين احدا منهن اثبتت انها اكثر ادبا منك الف مرة

سبحان الله
:)


ده اسقاط زي ما بيقولوا علماء النفس....رافضة للنقاب او حتى الحجاب....يبقى كل دول سيئين وتريحي بالك


وعد مني....لو رجعتي واستعرضتي سخافتك ...والأخت بنت القمر سابت تعليقك وقتها....لهيكون الرد بالمثل واكثر هذه المرة...هتكون الثالثة


ربنا يهدي

الصارم الحاسم يقول...

نقطة برضه عايز اوضحها

كلامي الحاد وردي الحاد على بعض من اختلف معهم لا اقصد به ارهاب فكري او منعهم من الكلام - معي او مع غيري - او تخويفهم منه مثلا او عدم احترام للبشر



لكن الطريقة الحادة تأتي من :

لا معقولية الفكرة+اصرار الشخص+عدم تهذيبه في النقاش....الثلاثة معا



للناس المحترمة اللي بتعدي هنا عشان الامور تبقى واضحة


خلافي مع حفصة ليس لاختلافها....خلافي بدأ في نقاش عند رامز هاجمتني فيه وغلطت فيا...رديت عليها بأدب...هاجمتني تاني وفوجئت بوجودها وتأييدها للمدونة اياها التي لا اريد ذكر اسمها وبنت القمر تعرفها جيدا


الخلاف ناتج من التلاتة : اسلوب+فكر+اصرار على الخطأ

ومع ذلك كلامي هنا هذه المرة على الفكر ولكن بمعرفتي ايضا بهذا الفكر عموما هنا وغير هنا...ومن يريد ان يصدق فليصدق

مثلا واحد زي الأستاذ الفاضل رامز.....انتقدني مرة في مدونته بشكل غير مباشر....تناقش معي بحدة مرة في مدونتي...هذا غير اختلافنا العقائدي

لكن ما غلطناش في بعض مرة بشكل شخصي....ولا نتناقش نقاش الطرشان ابدا


و الله يعلم لا احمل له اي غضاضة......وبأقدره جدا...لان كل اختلافنا وخلافنا في اطار فكري نحترم فيه بعضنا


لا اعتبر نفسي ابدا وصيا على البشر ولا مسيطر عليهم...الا من ظلم وقدرت على رد ظلمه طالما هو مصررررررر عليه


ربنا امر بالموعظة الحسنة نعم...واستثنى الظالمين وهذا في القرآن


من حقي ادافع عن ديني وارد عنه ...بل ويجب ان ادافع عنه طالما قدرني الله...وبالطريقة المناسبة للموقف ونسأل الله التوفيق في هذا الأمر


وعلى المستوى الشخصي لي الحقين الرد او السكوت....ربنا كفل لكل بني آدم هذا الحق...صحيح السكوت افضل...لكن هذا لا ينفي الحق...والموضوع فيه تقديري ايضا احيانا


فقط اردت التوضيح......للناس المحترمة ولكن قد تكون لا تعرف كيف افكر او يوسوس لها الشيطان تجاه اخيها - اخوكم يعني

عدى النهار يقول...

صارم.. مع إحترامى لتعليقك أنا شايف إنك كان ممكن تختصر الأمر بإيضاح إننا بنتبع فى الصلاة سنة الرسول صلى الله عليه وسلم

الفكرة إنه أحياناً بيكون أفضل ترك مساحة للناس لمراجعة كلامهم وأفكارهم بأنفسهم وعدم محاصرتهم بما يثبت أنهم ، من وجهة نظر أخرى ، على خطأ

عباس العبد يقول...

نسرين
أنا مهاجمتكيش . أنا عملت أقتباس من كلامك بس من وجهة نظرى . محبش حد يفهمنى غلط . و اذا كان الموضوع أتفهم غلط , فأنا بعتذر .
====
بنت القمر
الى بيحصل فى الردود على التدوينة دى أثبت أن دى أعظم تدوينة كتبتيها لأن كل الى فيها ظهر فى الردود . الظاهر ان أحنا مش محتاجين الهدوء و التأمل فى الصلاة بس , لأ ده محتاجينه فى كل حاجة حتى فى القراية و الكتابة و توصيل الأفكار . معتقتش و انا و أنت متفقين فى كده ان المدونات " ثقافة " يعنى ممكن حد يغير فكره علشان قرا كلام فى المدونة أنبهر بيه و بالتالى كلام المعلقين لا يزيد عن توضيحات من وجهة نظرهم و من " ثوابت " لا خلاف عليها فى الفكر الأسلامى , و بالتالى لازم المعلقين يعرفوا أنهم مش حيغيروا رأى بعض . يعنى مينفعش أنا و الصارم نخش نتخانق فى نقطة خلافية لأن مش حنوصل لحل طبعاً , لكن ينفع ندور على المشترك و نقبل كل واحد فى اطاره , أرحم و اسهل و أكثر واقعية و قبول للأخر . فعلاً الواحد لازم يكون اكثر هدوء و صفاء و سكينة حتى فى معاملاته البسيطة مع الناس مش فى الصلاة بس .
=====

nonoymm يقول...

جزاكم الله خيرا الاخ الصارم الحاسم والاخ محمود والله عادي انا احتسبته عند الله
اعتذر لبنت القمر بشدة مرة اخرى ويمكنها حذف ما يضايقها من تعليقاتي بدون اي زعل

بنت القمر يقول...

اسكندراني اوي
لن تجدي ما تبحثين عنه في هذا الطريق؟؟
هو ايه يا ابواسكتدر اللي بدور عليه
البوست وللمرة ال45عبارة عن مقتطفات من افكاري لا مع ولا ضد اي جهه ولا تيار
اعتقد انها مفيهاش حاجه ولا انا ماشيه في سكه غلط
دي مجرد شويه فضفضفه انسانيه
وعموما ربنا يتقبل دعائك
شكرا

بنت القمر يقول...

الصارم الحاسم
هيييييه استعنا علي الشقا بالله
(:
***************
يعني انا اعتذرت للجميع وراضيت الجميع واترجيتهم بلاش الحوارات الجانبيه
برضه يا صارم مفيش فايد
ه!!
وعشان انا بحترم الكلمه اللي بتتكتب عندي
ها ارد للمرة الاخيره ارجوك
لا معقوليه الفكرة والاصرار ..
يا صارم امال امتي الواحد يروض نفسه ويمسكها عند الغضب
لما ليلاقي حاجه تضايقه يعني مش ها تتخانق مع ناس انت متفق معاها
وارجع اقولك
ولو هما بيقولوا كفر بينّ
ازاي تكون نموذج للمسلم المتزن المستنير
هو ازاي تعرف تتناقش مع ناس مختلف معاهم وتغير قناعاتهم بالحسني
انا مش زعلانه منك اكتر ما انا زعلانه انك بتأذي رسالتك بأسلوبك!!
اصرارك المستميت علي انك تكون صارم حاد حاسم حتي من اختيارك لاسمك بيأذي رسالتك من غير ما تعرف
عارف يا صارم ليه الناس بتكره الاسلاميين او بعضهم من اسلوب زي اللي بتتكلم بيه
ها يقولوا اهو الاخوانجيه اهم بيشتموا ومش بيطيقوا الخلاف مع المختلفين عنهم
اهم رجعيين ..اهم لسانهم ..
مينفعش يا صارم تحت اي سبب تقول لانسه
وتحت اي استفزاز
تخرس.. امسح بيها المدونه.. والمدونات التانيه
ما ينفعش
لو اختك دي ها تكلمها ازاي
لازم اللين والرفق
لازم الحلم والصبر
مرة ومراات
واحتسب ده عند الله
مفيش فايده خلاص عملت اللي عليك
مش معني ده انك تسمع حاجه غلط وما تناقشهاش
اتناقش اللي ادامك مقتنعش خلاااااااص
عملت اللي عليك
الاستاذ محمود المصري
اللي مشرفنا في التعليقات فاضل ومتدين وسؤال الصلاه اتوجه ليه مباشره.. يا سلام لو تشوف اجابته وهدوء اعصابه.. بالتالي اجبر الطرف التاني يحترمه ويرد بذوق برضه
عشان كده ده يقدر يخدم دينه ورسالته
لكن مفيش داعيه يعمل زي ما انت بتعمل
والنيه الحسنه مش كفايه الزميلتين اللي اختلفت معاهم قدامك كان زمانك غزتهم بمطوة!!
وبعدين انا رجيت الكل يقف النقاش عند كده انت مصر انك تجيب سيرتها
خلاص يا حاسم انسااااها
ربنا اللي بيحاسب الناس
مش البشر
يا رب بتسع صدرك
لكلامي
تحياتي

بنت القمر يقول...

عدي النهار
الله ينور
تحياتي

بنت القمر يقول...

عباس العبد
*************
عارف يا عباس المشكله انك لما تكون مشتت ومشوش ودماغك مليانه افكار
والنيا طاحناك
وعاوز تفضفض وتحط افكارك ادام الناس ومجرد بدور علي شويه سكينه وتركيز تقوم تتحط في موقف زي ده
محدش فاهم حد ولا سامع حد
انت عارف ايه اللي اكتشفته يا عباس
فكرة الدين والديناميت
اه والله مازال الدين والنقاش فيه وحوله وعنه قنبله موقوته
لاحظ ان كل اللي اتكلموا مسلمين
امالبقا لو مسلمين ومسيحيين!!؟؟
هيقل المشترك وها تنعدم نقاط الاتفاق
كل واحد ليه رؤيه ودماغ في اطار دين واحد
امال لودينين
لا حد ناقش فكرة الزهد ولا ناقش فكرةالنص والمصلحه ولا ناقش الفقره بتاعه جورجيت قليني ولا ناقش فكرة الخلاص
ولا اي حاجه رغم اني عملت الفقرات منفصله عن بعض
كله مسك في كلمه
وعلي رأي عدي النهار ايه كميه الغل دي؟؟
اما كونه من اعظم ما كتبت وانت شايف كده يبقا اشكرك
(:
المهم يا باشا
تحياتي

بنت القمر يقول...

نونو يم
يا ستي احذف ليه بس هو انتي قولتي ايه؟؟ بس بس صحيح هو انتي جوزك مدون ومين هو؟
وايه لينكه؟
وايه حكايه شتم المسيحين؟
وامتي ؟
وازاي؟
وانت تعرفوا بعض واشتبكتوا قبل كده انتي والزميله المدونه؟
وعرفتي مدونتي ازاي؟
قولي؟
اعترفي؟
ومين بيمول التنظيم؟
وانتي بتدوني من امتي؟
وايه دورك؟
(:
اعترفي!! بسرررعه
الهيئه الرقابيه العليا للتفتيش في المدونات
وضبط جميع اعضاء التنظيم المنقبي
(:
اهلا بيكي يا نونيم
تحياتي

الصارم الحاسم يقول...

اوكيه انا هأقفل الموضوع برابط لتدوينة قديمة عندي اتمنى تقرأيها وتلتقطي المعنى فيها

وعلى فكرة هما على الاغلب ال قليلا بيقولوا في اي حال ان الاخوانجيه اهم بيشتموا ومش بيطيقوا الخلاف مع المختلفين عنهم اهم رجعيين ..اهم لسانهم ..


سواء الكلام كان بالحسنى او غير الحسنى



انتي شفتي هي عملت ايه مع الاخت عاشقة النقاب اللي اتكلمت معاها بكل ادب



الرابط اهوه

http://alsarem-alhasem.blogspot.com/2006/06/blog-post_15.html



وده مينفعش اني برضه بأقوم اسلوبي..اون كنت حتى الان ارى اني افعلها طبقا للموقف


السلام عليكم وتحياتي وآسف ان كنت ضايقت اي حد من الاخوة هنا..وآسف اني نكدت عليكي في المضوع بدون ارادة مني

الصارم الحاسم يقول...

وانا آسف ان كان حدة الكلام ضايقت نسرين او حتى حفصة

لا اعتذر عن الفكرة ولا عن الاسلوب...لكن أعتذر ان كان الاسلوب سبب ضيق لهما وفقط فلا اريد ان اسبب ضيق او ازمة لاي بني آدم...لكن ايضا اسلوبهما هو اللي جعل الواحد يتكلم كده

عل وعسى يفكروا في الفكرة الاساسية للكلام بغض النظر عن الاسلوب


ومعلش هأكرر تاني ....لا اعتذر عن الفكرة ولا عن الاسلوب...لكن أعتذر ان كان الاسلوب سبب ضيق لهما وفقط فلا اريد ان اسبب ضيق او ازمة لاي بني آدم


اخلاقي كمتطرف ارهابي متعصب متشدد سلفي وهابي تخليني لا احتمل اني اسبب ضيق لحد

nonoymm يقول...

السلام عليكم
اخي الصارم نحتسب والاجر على الله
اختي بنت القمر
احنا منظمة ارهابكوا الدولية :D
ارهاب ايه ومنظمة ايه يا ستي انا ماشية جنب الحيط ست ام عيال بحاول اجتهد واعرف ديني وخلاص علشان اعلمه لاولادي
واقول اللي بعرفه للي ما بيعرفش واهو بنتعلم وبرده خبرات بس اختلف الوضع معايا لما لقيت الهجمة اللي في النت وخلتني اكون ايجابية اكتر
بالنسبة بقى للمدونة اياها حظي ال---
اوقعني فيها عند مدونة تانية لا تختلف عنها قلت كلمتين اني باتفق مع تعليق لاخر ما خلصتش من المدونة دي وكاني بكلمها وما خلصت من لسانها السليط لما دخلت مدونتها وجهت لها برضه نصيحة بما يرضي الله برضه سليطة اللسان
صاحبة المدونة اللي علقت عندها اصلا عرفت لما قريت لها ان اللي اتفقت ي تعليقه دة بينهم ما صنع الحداد فعذرتها

اما بقى عن مدونة الحاج زوجي هي عابر سبيل ولينكها عندي في مدونتي تنوريني كدة وتعالي خديه

وهو بالطبع لا يهاجم الدين المسيحي ابدا وان اختلفنا عقائديا معه

انما مثلا مثلا

مسلم يدعي انه مسيحي وطبعا من وراء الكي بورد يقوم بمهاجمة الدين المسيحي والدعوة للاسلام ومسيحي يدعي انه مسلم ويقوم بمهاجمة الدين الاسلامي دة اسلوب غير محترم للتبشير وحتى للدعوة
دة لابد كشفه لمن لا يعلم اصله عابر سبيل بقى ولو اني بستخسر الوقت دة باعتبره ضايع الا اني خفت على البعض ممكن يتاثر خصوصا وان اغلبهم شاطر اوي في اضاعة الحق وبث الضلال
هتقولي طب ما يتكلم ويتناقش معاه الاول وبالحجة والدليل
هقولك حصل كتيييييييير وبالايميل كمان ومع اكتر من مدون وينتهي الحال بحذف التعليقات وطبعا لا يخلو من السباب وتلبيس الحقائق وطبعا عدم الانصات لاي نصح والنهاية احنا ارهابيين متشددين متعصبين ووهابيين ومش بعيد ننسف المدونة وما يضرش نهدر دمه
السلفيين دول يووووووه عليهم
دة باختصار يعني
بدون من امتى من حوالي 5 شهور وعرفت مدونتك من مدونة الاخ راجي
دوري انا زعيمة التنظيم المنقبي هههههههههههههههه
وتحياتي لخفة دمك يا قمراية