السبت، مارس 01، 2008

المقاطعه والاوبريت وحبايةالأنديرال!

تصفحت الميل كعاده كل صباح قبل ان ابدأ في رؤيه جديد التدوين واذا بالاثنين يمتلئان بتجديد دعوة المقاطعه . وتلك الصور عن البضائع الدنماركيه تحاصرني هنا وهناك

تخطفني الافكار تاني مقاطعه تاني !!وبعدين ايه البضايع السخيفه دي؟؟

مفيش شيئ منهم بتعامل معاه الا يمكن زبده لورباك نادرا اما الباقي فهو بضاعه مجهوله.. يعني عقاب غير ذو جدوي.. طب ما هي نتيجه المقاطعه الاولي؟؟

اهم اصرورا اصرارا والحوا الحاحا وعادوا نشر الصور!!

لكن برضه يا بنتي لازم تقاطعي عيب كده ما انتي مقاطعه الامريكاني من سنين و قلبتي من ايريال لبيرسيل ومن بيبسي الي فيروز وشويبس ها تيجي علي الزبده؟؟!!

تسرب الي داخلي ذلك الشعور بالضيق من التساؤل حول المقاطعه بجدوي او بدون جدوي

نخز ضمير من مرسلي البريد الالكتروني وهم يقسمون علي ان امررة للاخرين

تطلب مني أمي حبه الانديرال بعد ان اتحفتني باوبريت الحلم العربي.. ده فيه صور فظيعه ... رهيبه فيه صور سيده يلتهم يدها كلب تصر ان اراه وان كنت خمنت محتواه.. قلبها تضطرب دقاته وتاخذ دوائها بعد رؤيه الاوبريت

طب ليه يا ماما كده؟؟ طالما انتي عارفه اللي فيه؟؟ انتي بتعذبي نفسك؟؟ لا ترد وتهمهم حسبي الله ونعم الوكيل .. ربنا ينتقم ..منهم ربنا ينتقم منهم.... تبتلع دواؤها وتواصل المشاهده!!

وخز آخر للضمير وبين الحيرة في رد الفعل وجدواه او عدم وجود فعل آخر... نحتاج الي حبايه انديرال يوميا!!

هناك 9 تعليقات:

نداء يقول...

عندك حق في كل كلمة
بس هنعمل ايه هو ده الشعب العربي
حسبي الله ونعم الوكيل

محمود المصرى يقول...

بسم الله الرحمن الرحيم

المقاطعة تؤثر ام لا تؤثر؟
دا مش السؤال المظبوط , السؤال السليم انتى يا استاذة بنت القمر لما واحد يتطاول عليكى هاتفضلى تكلميه وتتواصلى معاه؟ الطبيعى انك هاتقطعى علاقتك بيه , طيب احنا كمسلمين علشان نكون مسلمين المفروض ان الرسول يكون احب الينا من انفسنا , طيب الرسول الذى نحبه اكتر من انفسنا هل نمتنع عن ان نقدم له ما نقدمه لأنفسنا؟ ماحدش قال ان الدانماركيين هايموتوا من الجوع ولا هايشحتوا , لكن على الاقل مش يبقى واحد بيشتمنى وبيشتم نبيى وانا اشترى منه وتعود عليه فائدة منى , وفى النهاية مش هو دا التصرف اللى يجبر الدانمارك ودول الغرب على التوقف عن مثل هذا الامر , لكن دا اقل شىء فى ايدينا , نعمله ونعتذر الى الله به ولا نقول يعنى جت على اللورباك ؟
طبعا انا اؤمن ان نصرة النبى الحقة تكون بأتباع سنته واقامة شرعه واعلاء الاسلام بالقول والعمل , ولكن المقاطعة لا تعطل كل هذا بل هى مكملة له , اتمنى ان كلامى يكون خفيف عليكى وماتحتاجيش معاه حباية الانديرال .

خمسة فضفضة يقول...

السلام عليكم ورحمة الله وبركاته

عندك حق
بس احنا مش محتاجين لحباية اندرال واحده ولا حتي الشريط بحاله عاد يحوق فينا
احنا محتاجين لانعاش القلب باستخدام جهاز الصدمات الكهربائة

appy يقول...

طيب بالمرة يقاطعوا الكمبيوتر اللى بنقعد نبعت من عليه الرسايل للناس علشان المقاطعه ليه بقى اعرفى كل مكون فىالكمبيوتر صناعته ايه ممكن يبقىامريكانى وامريكا بتساند الدنمارك المهم
معندناش بديل
عارف اي البديل الحوار التثقيف النقاش مع الناس انما احنا خلاص عقولنا تحجرت
طبعا مش موافقه على الاساءة انما فيه طرق كتير كل الدنيا لما لقتنا بنقاطه الدنمارك الدول الاروبيه كلها ساندتها اسالى بقى هما كسبوا قد ايه وخسروا قد ايه

بنت القمر يقول...

نداء
والله الشعب مظلوم يا نداء اهو بيتصبر يبالانديرال
حسبي الله في الحكام والوزرا والنقابات ورجال الاعلام والمال
تحياتي

بنت القمر يقول...

محمود المصري
يا سيدي انت دايما تفهمني غلط
ما انا قولت لك انامقاطعه
والبوست هدفه مش المقاطعه لها جدوي او لا لكن هدفه انه ضغط علي رجل الشارع ونخز في ضميرة وهو اصلا مليان مشاكل
وخصوصا ان حكايه المقاطعه لو حضرتتك لاحظت شويه بضاعه هبله بدون تأثير لكن العبء الاكبرعلي الحكومه ورجال الاعمال والنقابات والسياسيين والفنانين ومش الراجل المصري البسيط اللي عمالين يقطعوا فيه باوبريتات الحلم العربي وصور المجازر وخصوصا انه مشلول اليد بلا قدرة ولا قرار مؤثر
يعني احنا ليناثقل في القرار الحكومي ؟؟
لو لينا يبقا الاجدي الحكومه تاخده عننا وتوجههنا اليرد فعل مؤثر
بالبلدي تعمل حمله شعبيه اوحمله وطنيه زي تنظيم الاسره بس بقا لما مزاجهها يجيلها
فهمتني يا استاذي الفاضل
تحياتي

بنت القمر يقول...

د فضفضه
واللله حرام اللي بيعملوه في الشعب ده
الاوبريت خنيق ومؤلم وكل شويه من الجزيرة للاوبريت ومش عارفه الناس اللي في ايدها القرار دي مش بتحس ولا بتشوف التلفزيونات ولا ايه؟؟
ولا ده مخطط لاباده الشعوب عن طريق الاوبريتات ودعاوي المقاطعه
منورة فضفضه

بنت القمر يقول...

آبي
انا مش ضد المقاطعه
اتمني يكون عندنا صناعه عربيه او وطنيه تغنينا عن سؤال اللئيم بس الواحد تعب من قاطعوا قاطعوا يجي واحد تاني يقولك المقاطعه غير مؤثرة اهم ركبوا راسهم وعادوا الرسوم
والقرارات المؤثرة اصلا في ايد ناس تانيه اولي تاخدها بدل ما يقضوا علينا بالاوبريتات سواء في موضوع الدانمارك
اوفلسطين اولي ياخدها السفير او وزير الخارجيه او النقابات ورجال الاعمال
منورة آبي

اسكندراني اوي يقول...

الاخت الكريمهبنت القمر
السكندريه الاصيله

بالرغم اني بعيد هذه الايام عن مجال التدوين

الا اني احب ان اعلق على البوست ده
اقولك ...في مناطق كتير في الوطن العربي فيها كل المنتجات اللي شايفاها في البوستر اللي منتشر اليومين دول واللي انا عملته بوست عندي

وبالفعل الكثير من سلاسل الهايبرات الشهيره في الخليج بدات تاخذ خطوات ايجابيه في طريق المقاطعه

اختلاف الراي لا يفسد ابدا للود قضيه
وخاصه ان كانت قضيه عقائديه مثل اللتي نحن بصددها

اشكرك انك اخرجتيني من صمتي
لكي كل التحيه والتقدير