الثلاثاء، مارس 25، 2008

ادب الانحطاط


ايام الكليه كنا بناخد مايسمي عصر الانحطاط وعصور الانحطاط هي المرحله التي تعقب ما يسمي مرحله الدوله الفتيه او مرحله القوة وهي ماقبل سقوط الدوله نفسها سواء فراعنه او رومان او مماليك او عثمانين

مش عارفه بقالي كام يوم طالبه معايا اتابع الكتابات الادبيه.. وطبعا في تيار موجود الكل شايفه وعارفه ما أطلق عليه زميل مدون ادب قله الادب

ادب قله الادب.. اصنف انا تحته كل الكتابات التي تكتظ بالالفاظ البذيئه والشتايم بلازمه لغرض في نفس الكاتب او بدون. لازمه.. من باب الواجهه وادعاء التحررو التقدميه..كتابات تعج بالتوصيفات الجنسيه وشطحات الخيال وحكاوي المغامرات الماجنه والسلوكيات المنفلته والكلمات المبهمه احيانا التي لا تحوي معني او قصد, والتي تشبه الصراخ بصوت عالي للفت النظر وشد الانتباه

ادب قله الادب كمان ها اصنف تحته بعض التدوينات القويه التي تناقش قضايا هامه اوتحكي حورات متخيله او لقاءات وهميه المؤرخ الفلاني والكاتب العلاني او المفكر الترتاني بعد نعته بجميع البذائات الممكنه

الحقيقه خبطت في احد المدونات.. ربنا يسامح اللي في بالي وبروح اشحت من عندهم لينكات ما يسمي ادباء.. تدوينه تحكي عن مفكرة المانيه وتحكي صلتها بالصهيونيه وكلام جميل لكن يعج بكل انواع الشتايم والبذائات الممكنه .. وتدوينه اخري تحكي خيالات مريضه لمغامرات منحرفه لا يصدقها عقل لصاحبها مع الافاضه والكرم في كم البذائات.. بعض تلك التدوينات لها قوام ادبي رشيق تستعمل الكنايه والرمز والتوريه وغيرها من اساليب الادب او تستعمل تراكيب جديده وصور خيال جميله وكل ده طبعا اذا نحينا جانبا المعايير الاخلاقيه في الحكم علي العمل الادبي والحقيقه فكرت احط ليكم مقاطع وامثله وبعدين تراجعت لان دي مش الفكرة الاساسيه للبوست ده

لاحظت تيار احدث وهو ادب العفن

اه والله وهو ما اسميه ايضا الادب الصديدي..التيار ده بقا قالك الناس زهقت من الشتيمه بالاعضاء التناسيله وسب الدين قوم ندخل علي منطقه اجدد..اوريجينال وهو التوغل وصرف البوست في وصف..رائحه الشراب.. ووصف طبق طعام عفن او وصف احدهم فضلات الفئران وكيف تؤنسه في وحدته!!! يصف اخر الغازات المنطلقه من امعائه او كيق يختفي في شق كنبه مهترئه..احيانا الحكي عن وصف صدأعلي الجدران او رائحه عفونه مياه او صوت حشرات في منور عمارة.. احيانا بعض المدونات بتستفزني اقوم اشوف التعليقات عليها ايه يعني؟؟ يمكن انا العيب فيا وتذوقي الادبي هو اللي فاسد وذوقي غبي _ طب نشوف الناس غيري رأيهم ايه الحقيقه مش دايما بلاقي قبول لذلك النوع من الادب الصديدي واحيانا بلاقي قبول والقبول ده نعرفه ازاي وخصوصا ان اصحاب هذه الكتابات يعيشون في دوائر ضيقه في عالم التدوين زوارهم قليلون في عالم نرجسي كئيب

كتب احدهم معلقا مشيدا ببوست براز الفأر وكتب اخر انت بتشتغلنا يا فلان؟؟ يقصد صاحب البوست!!

الله اكبر يبدو ان احدهم اخيرا ادرك لامعقوليه وسخف تلك التراهات المكتوبه.. يبدو ان احدهم شعر بأنحراف ذلك الخيال الذي كتب تلك السطور ومدي مرضه

الحمدلله يعني مش العيب فيا. اذن هناك من يشعر مثلي ولا يستسيغ تلك الكتابه
ويبقي للامر في النهايد منوطا بالتذوق وذوق المتلقي هو الحكم والفيص وكل واحد وذوقه بقا!!

نرجع مرجوعنا طب ليه انا بديت بحكايه عصر الانحطاط ...يبدو ان البعض ممن ينتظرون ثورة الجياع زادوا شخصا هو انا ممايراه ويظنه علامات انحطاط عامه في الادب كما في بقيه مناحي الحياه

هناك 41 تعليقًا:

خمسة فضفضة يقول...

السلام عليكم ورحمة الله وبركاته

ايوه فعلا احنا في عصر الانحطاط في كل حاجه حتي الادب و جولةصغيره في المدونات تعرفك الدرجة اللي وصل ليها الانحطاط ده

وللاسف بالرغم من ان الناس دي اسلوبها الادبي احيانا يكون اكثر من رائع بس بيستخدموا موهبتهم بطريقه اقل ما يقال عنها انها مقرفه ومقززة مش عرفه ليه بيعتبروا ان كل ما كان مستوي الكلمات منحط وكمية الالفاظ البذيئة والمقززه كتير دا معناه حرية وتقدم ووجاهه اكتر ؟؟؟؟؟

فترة الانحطاط عامله زي ما الحيوانات بتغير جلودها القديمة اللي بالرغم من انها في يوم من الايام كانت لامعه وجميله ومناسه جدا ليها الا انها لازم تغيرها لانها خلاص ماعدتش تنفع اكتر من كده وفي الفتره الانتقاليه دي بيبان مظهرها مقرف ومقزز و بعدها تكتسب جلود اجدد واحسن وليها منظر افضل

اهو احنا دلوقتي في فترة خلع كل جلودنا القديمه ربنا يسهل وما تطولش

Nsreen Bsunee يقول...

انا حاقولك على حاجه
فيه مدون اسمه احمد\بيسو
مدونته "وسع خيالك\عش كانك تلعب"
احمد انا متبعاه وباحب كتاباته جدا مع انه بيستخدم الفاظ فى منتهى البذاءه وفيه ناس مش بتستخدم اى الفاظ بذيئه ومش باطيق امر بالصدفه حتى على مدوانتهم
فا بالنسبالى الموضوع نسبي يعني القرف مش بيجيللى من كلمه معينه لكن السياق اللى بتتقال فيه الكلمه والاسلوب اللى بيكتب بيه صاحب المدونه ممكن حد يتكلم عن الجنس وماحسش ان الكلام بذئ وممكن حد تانى يتكلم عن نفس الموضوع بس احس ان فيه قرف فى تدوينته
الموضوع نسبي جدا
بس فعلا موضوع الادب المعفن ده انتشر اوى خصوصا فيما يخص غازات المعده الموضوع متفشي فى المدونات وريحته طالعه فعلا وفضلات الفيران ديه جديده ماعدتش عليه لسه

بس المثل الشعبي التراثي بيقولك ايه

"اللى يدوم ياما يشوف"

واعتقد ان التغزل فى فضلات الفئران مقدمه طبيعيه لاننا داخلين على مرحله حناكل فيها الفيران والضفادع وكل ما يمكن هضمه لنتقي شر الموت جوعا
:(

Nsreen Bsunee يقول...

تصحيح واجب ولابد منه

"اللى يدون ياما يشوف"

عباس العبد يقول...

أنا عارف أنتى بتعدى على مين و رحتى لمين أخدتى من مين لينكات و طلعتى على أنى أدباء
بس دعوتك بأن ربنا يسامحه مقبوله بدل فيها مغفره يبقى تمام

راجى يقول...

ويقول الأستاذ سيد قطب في الظلال في شرح آية النساء { لا يحب الله الجهر بالسوء من القول إلا من ظلم وكان الله سميعا عليما إن تبدوا خيرا أو تخفوه أو تعفوا عن سوء فإن الله كان عفوا قديرًا } :

إن المجتمع شديد الحساسية، وفي حاجة إلى آداب اجتماعية تتفق مع هذه الحساسية، وربَّ كلمة عابرة لا يحسب قائلها حسابا لما وراءها .. تترك في نفسية المجتمع وفي أخلاقه وفي تقاليده وفي جوه آثارا مدمرة ; وتتجاوز الفرد المقصود إلى الجماعة الكبيرة.

والجهر بالسوء من القول في أية صورة من صوره سهل على اللسان ما لم يكن هناك تحرج في الضمير وتقوى لله وشيوع هذا السوء كثيرا ما يترك آثارا عميقة في ضمير المجتمع كثيرا ما يدمر الثقة المتبادلة في هذا المجتمع فيخيل إلى الناس أن الشر قد صار غالبا وكثيرا ما يزين لمن في نفوسهم استعداد كامن للسوء ولكنهم يتحرجون منه أن يفعلوه لأن السوء قد أصبح ديدن المجتمع الشائع فيه فلا تحرج إذن ولا تقيه وهم ليسوا بأول من يفعل.

وكثيرا ما يذهب ببشاعة السوء بطول الألفة فالإنسان يستقبح السوء أول مرة بشدة ; حتى إذا تكرر وقوعه أو تكرر ذكره خفت حدة استقباحه والاشمئزاز منه ; وسهل على النفوس أن تسمع بل أن ترى ولا تثور للتغيير على المنكر ذلك كله فوق ما يقع من الظلم على من يتهمون بالسوء ويشاع عنهم وقد يكونون منه أبرياء ، ولكن قالة السوء حين تنتشر ; وحين يصبح الجهر بها هينا مألوفا فإن البريء قد يتقول عليه مع المسيء ; ويختلط البر بالفاجر بلا تحرج من فرية أو اتهام ; ويسقط الحياء النفسي والاجتماعي الذي يمنع الألسنة من النطق بالقبيح ; والذي يعصم الكثيرين من الإقدام على السوء .

تحياتى

Cleo يقول...

أنا عندى اقتراح...

أقترح إن كل واحد فينا يحط فى المدونة بتاعته مداخلة الأستاذ راجى ويطل من كل مدون من اللى بيعلقوا عنده انه هو كمن ينقلها فى مدونته من باب الأمر بالمعروف... ونبدأ حملة وليكن لها شعار محدد وياريت لو حد يصمملها لوجو .. الحملة دى تكون ضد استعمال الألفاظ البذيئة أو المقززة فى التدوبن او المشاركات المتاحة للعامة على النت ولنبدا بأنفسنا..

إيه رأيكم؟؟

إبـراهيم ... معـايــا يقول...

لسه الدنيا بخير يا بنت القمر، لا أعتقد أن أحدًا يختلف حول أنما يقدمه بهاء طـاهر يمثل أدبًا راقيًا متميزًا ، وأرى فوزه بالبوكر فوز لطائفة من الأدباء ، ولمصر كلها .....
لهذا أدعوكم، وتدعوكم ورقة وقلم:
إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً

بنت القمر يقول...

د/ فضفضه
افتكرت البوست بتاعك لما كتبتي عن افشخ مدونه ولقيتي مدونتك فش فيهم
واضح يا عزيزيتي ان ممكن يكون العيب في تذوقنا الادبي
او في ذوقنا الفاسد فلم نعرف الحكمه من تأمل براز فأر او شراب نتن
مش عارفه برضه افتكرت ليه ثورة الجياع اللي الكل منتظرها
تجي شوطه ان شاء الله تاخدتلك الكتابات
وصحابها في ون هاور
عشان كده كتير
بجد كتير
او يظهر جيل جديد من الكتاب يعادل الكفه شويه وعموما انتظري ليسته الادباء اللي بجد وها احطهم علي جنب عندي
منورة فضفضفه

بنت القمر يقول...

نسرين
طيب يا نسرين يا بسيوني شفتي عم بيسو اخر بوست كتب ايه واصفا العاملات في التوحيد والنور مشي في البوست عدل عدل عدل بعدين لوح
متهميش ليه ولا ايه الغرض
وان كنت اعتقد انه نوع من التحرر من اي قيد ولقفت النظر نوع من الصراخ بالصوت العالي
وعموما البوست بتاع ثقافه الشارع وكنت اوردت جملتين الاولي للمدون جدو والتانيه لعم بيسو روحي بصي عليهم
وعموما بما ان الامر كله يخضع للتذوق اللي يتذوق بيسو عادي واللي بيسو او غيرة يقلب معدته براضه براحته وكل واحد وتذوقه بقا بوست براز الفأر تبع تدوينه اسمها الكنبه الحمرا اتفرجي هناك هتلاقي انيل من اللي كتبته وميت مره
اشي فيران اشي شرابات
وعاده سريه
منور العمارة
دي اللي قريت التعليقات فيها
ازيك يا نسرين بقا
تقدري تقولي انك ممكن تستمتعي كده
بتتذوقي النوع ده؟؟
انا عن نفسي لأ
تحياتي

بنت القمر يقول...

عباس العبد
ربنا يسامح الكل بما انك لاطع عندك ليسته ادباء..
ومستغل ثقتي فيك.. تقدر ترد علي انت بتتذوق النوع ده من الادب؟ ولا مجرد جرأته بتبهرك؟؟
يعني بيعجبك بيستمخ في دماغك وبتطلع في الاخر بشعور مريح ولا شايف انه ده توابع الزلزال مرحله ما بعد الحداثه
متفق معايا علي تقسيم التيارات ولا لأ؟؟
وعموما يا عزيزي
انا عندا فيك ها احط لينكات لادباء حقيقين
ونشوف ادابائك ولا ادبائي وكبرت في دماغي
معلش يا رامز.. لازم الناس تفهم ان في ناس بتكتب حلو اوي مش من بتوع براز الفار.. ودين ام.. ودين اب..
مبدئيا ارشح لك.. اسامه ياسين.. جامد طحن ولا عشان هو بيقول قال الله وقرآن ما يبقاش اديب ومستخسر تحطه عندك لازم الجماعه بتوع سب الدين
وارشح لك كراكيب هاني جورج عشان متقولش اني عنصريه.. بتهيألي تعرفه
((:
والولد ده لو ركز وحد ساعده هيبقا حاجه جامده
ارشح لك طيارة ورق وخد لفه في مدونتها..عندها بوست رائع اسمه.. فلاشه..او اسطورة او كتير من كتابتها
وده عموما منحه مين للمدونين لتحسين زوقهم الادبي والاطلاع علي اتجاهات ادبيه مغايرة اكثر شياكه!!
منور

Sherif يقول...

من أحسن ماقلت ..وطرحت أيضا ..

وفى هذا الشأن لابد أننا ننقسم الى فريقين .. الأول يرى أن الكتابة والأدب والخيال هو بالأساس نوع من الفنون .. والفن هو صنو الجمال .. يعنى كل مايؤذى احساسى لايندرج تحت اسم فن .. زمن ثم فهو غير مطلوب .. كلمة .. منظر .. رائحة .. أى شئ ..
بالتالى كل شئ أيضا لابد أن يكون له منظور جميل ..

عكس ذلك طبعا يثير الاشمئزاز .. ويصبح السؤال بعد كل عرض .. هل تشعر بجمال الشئ أم لأ؟ فاذا كان نعم .. فانت من الفريق الأول .. وهو مااميل اليه .. وإن كان لأ .. فانت من الفريق الثانى ..

هناك شئ آخر مثير للدهشة .. أن كثرة التشويش أدت بالضرورة الى فساد الذوق العام .. كما انك اذا استبد بك الجوع .. فسوف تأكل أى شئ يلقى إليك ..واعتقد اننا أصبحنا فى صحراء ادبية وضع على مائدتها كل شئ .. الطيب والغث ..

الملاحظ أيضا دخول مفردات عجيبة فى قاموس لغتنا الادبية أقل ما يقال عنها أنها سوقية .. مثل مزّة ونفّض له وغيرها ..
فاذا كانت كلمة مثل حريم ونسوان ثقيلة على اسماعنا إن لم تكن هى التخلف نفسه .. فما بالك بما قلت ..

يبدو أن عندك حق أن قلت زمن الانحطاط

آسف للإطالة

Bella يقول...

تحياتي على البوست الرائع والاختيار الاروع للصورة المصاحبة للبوست

الحقيقة لااجد مااضيفه اكثر مما قلتيه وقاله من سبقني بالتعليق

فقط اقول ان الأدب سمي أدباً من التأدب واللغة مليئة بمفردات تستطيع التعبير عما نريد بمنتهي الرقة والشياكة والرقي والحقيقة انا ايضا يزعجني بشدة استخدام الالفاظ غير اللائقة في الكتابة وصفع العيون بكمية مهولة من الاوصاف والالفاظ التي لاتمت للأدب باي صلة.

ونحن في مرحلة انحطاط كامل فطبيعي جداً ان يمتد هذا الانحطاط ليشمل التعبير سواء المكتوب او المنطوق

لاحظي ماتسمعيه في حوارات الممثلين في المسلسلات ستجدي الفاظ غير لائقة اكثر مما تتصوري
ولن اقل لك اسمعي في الشارع أو في اي مكان آخر

اذا كانت الدراما التي تحاصرنا في كل مكان اصبحت مرتعاً لهذا النوع من الكتابة فمابلك باقي مجالات التعبير

ومعذرة على الاطالة و شكر خاص للاستاذ راجي على تعليقه

تحياتي

بنت القمر يقول...

راجي
يا عزيزي الناس دي لا ينفع معاها ان الله لا يحب الجهر بالسوء ولا سيد قطب الرد ها يكون سوري يعني: انت متخلف!! انت ظلامي! زوقك وتلقيك تعبانين!
المعايير الاخلاقيه لا تحكمنا....!
وعشان كده انا مناقشتش الموضوع من زاويه اخلاقيه او دينيه لكن من زاويه المتلقي فقط
هل الخيال العذب = الخيال المريض
هل وصف تفاصيل منمنمه كريستاليه لحياه بشر= وصف ريحه شرابه وبراز الفار
إذا كان البعض يستسيغ هذا النوع نو بروبليم
لكن انا لأ حتي علاقه الرجل بالمرأه ممكن تتعالج بشياكه ورقي وممكن بإسفاف..
تحياتي

بنت القمر يقول...

كليو
في مجموعه مدونين فعلا رفعوا شعار مدونه مدونه نظيفه أو لا للبذائات
البانر ممكن تاخديه من عند فضفضفه اول تعليق
لكن الحكايه مش بانر وشعار
الحكايه مجرد مع او ضد
بيعجبك او لأ
منورة كليو

بنت القمر يقول...

ابراهيم معايا
معلش بقا يا إبرهيم اصل انا في اسكندريه علي عيني اكون معاكم\تانيا اهلا مرورك الاول ويا رب يتكرر
تالتاواضح انك مهتم بالاعمال الادبيه وعشان كده انا ها ابتدي اتابع عندك وسعدت بالتعرف علي مدونات راقيه من مدونتك اشكرك وتحياتي

بنت القمر يقول...

شريف
كويس جدا انك متفق معايا ان اذا كان المعيار هو التذوق فأكيد صعب ان حد يقتنع بأن التيار ده يصعب تذوقه
لو نحينا المعايير الاخلاقيهها تفضل نفس الاشكاليه
هل الخيال العذب = الخيال المريض
هل وصف تفاصيل منمنمه كريستاليه لحياه بشر= وصف ريحه شرابه وبراز الفار
وطول براحتك البيت بيتك تشرف المدونه اي وقت
تحياتي

بنت القمر يقول...

بيلا اهلا بيلا
كلك زوق التحيه ليكي انتي
انا كمان بموت في الصور
البذاءة بقت محاوطانا والخيال المريض بقا محاصرنا
ناقص بقا التيار الاغبي بتاع سب الدين
والعاده السريه وبراز الفيران
لو تحبي واكيد ما تحبيش ابعتلك اللينكات حصيله القراءات الاسبوع اللي فات
حاجه تجن
لو نحينا المعيار الاخلاقي تفضل اشكاليه التذوق
الكلام ده جميل وممتع ولا لأ؟؟
تحياتي ومنورة

nonoymm يقول...

تصدقي انتي حتة سكر
وعصر الانحطاط بقى للاسف خلى الانحطاط نفسه انط اكتر ما هو منحط
في ناس كدة ما تعرفش تتذوق غير الانحطاط علشان بعيد عنك يعني -----ولا هو دة اصول الادب دة واحنا اللي ما بنعرفش نتذوق ولا ايه
والله ساعات كتير بقول ليه هو يعني الادب اللي لمؤاخذة يعني العفن ولا الادب قليل الادب بس هو اللي ينفع يوصل الهدف ولا الرسالة اللي سيادةالاديب عاوز يوصلها
طب يا ترى الاديب دة ابو ادب لمؤاخذة معفن هيفضل لمؤاخذة يرجع علينا لمتى دي حاجة تأرف
تحياتي ليكي يا قمراية

Nsreen Bsunee يقول...

حاسه ببعض الحده فى كلامك
المهم
انا شايفه ان "حديث مع تروتسكي" اخر تدوينه لاحمد ناجي تدوينه هايله جدا مش معنى انه قال لفظ يعتبر غير لائق اننا نحاكمه انت ليه فى اخر التدوينه-الهايله-قلت اللفظ ده ده غير لائق ومالوش لازمه
ببساطه فيه حاجه اسمها الموضوع عاجبني او مش عاجبني بس مش من حق حد يحاكم الكلمه لانها ملك صاحبها بس عايز تقراله اقراله مش عايز براحتك وخلصنا
احمد كمان مؤخرا كتب تدوينه اسمها "علهم يعقلون" برضه تحفه مش معنى كده انى متفقه مع كل اللى بيكتبه بس مش معنى كده انى احاكمه

اسلوب محاكمه المدونين لبعض ده مش عاجبني ومدونتى نظيفه جميله متطوره مش عاجبني برضه مش باحب التصنيفات اى كان نوعها
ده ظهر مدونات فاتحه مخصوص عشان تهاجم مدونات تانيه يعني حاجه تخنق فعلا
مش بانكر عليكي عدم اعجابك بكتابات معينه حضرتك حره وليكي كل الحق خصوصا لما يكون الوصف والالفاظ اوفر زى مدونه بلال\الكنبه الحمرا لانى كمان مش معجبه بكتاباته مش بتضيفلى اى شئ ولا بتشدني التدوينات اللى بيكتبها

اجابه سؤالك الاخير
مفيش حاجه اسمها انا باتذوق الادب اللى بيتخلله وصف للعاده السريه مثلا لان فيه كبار الروائيين والكتاب بيتكلمو فى مواضيع شائكه اكتر وبالفاظ واضحه مش "شيك" وباحب رواياتهم لكن مش باحبها عشان بيتكلمو عن الجنس او العاده السريه لكن لانها روايه كويسه زى ما فيه روايات فجه مبتعجبنيش وفيه روايات "نضيفه" لو تفضللى التصنيف ده مبتعجبنيش برضه
الفكره كلها فى السياق والموضوع
بس

سمراء يقول...

منذ فترة بعيدة وانا لم الحظ وجود ادباء مصريين مميزين كما كان سابقا مثل الحكيم ومحفوظ وطة حسين وفعليا لم يعد هناك من يقرأون كتب او روايات وتعد من القراءة من العادات القديمة لكنهم اليوم يشاهدون فقط القناوات الفضائية ويقرأون الصحف الصفراء من اين لهم ان ييكتسبون اللغة وطرق التعبير بها وخاصة مع المصطلحات المستخدمة اليوم
للاسف ان تلك الطريقة المبتزلة في الحديث او الكتابة هي ما يسمونها بلغة السينما ( نجم شباك ) وبلغة الكتب ( الاكثر مبيعا )
اقرا الكثير وتعف اصابعي عن التعليق
اما عن من ينتظرون ثورة الجياع فقد زادوا اثنين انا وانت
اشكرك
سمراء

Cleo يقول...

النور نورك يا نور القمر :-))

ياريت لو نقدر نخرج بالموضوع من حيز "مع أو ضد" لساحة أمر بالمعروف.. ايه المانع؟؟

تحياتى

Desert cat يقول...

ادب الانحطاط منتشر فى كل مكان من حوالينا مش فى التدوين والنت بس
بمعنى ان المدونين حقيقة موجودة فى الواقع متستغربيش من اى واحد بيكتب ببذائه او خلافه لان غالبا بيكون دى طبيعة عيشته وبالتالى اعتبرها ثقافة ولازم ينشرها
تحياتى

بنت القمر يقول...

نونو يم
مش عارفه تلاسم كده صح ولا غلط ولا معناه ايه عموما
اشكرك عاشقه النقاب منورة المدونه
اعتقد يا عزيززتي ان الامر لا يخرج عن تفسيرين لا ثالث لهما
الاول
هو لفت النظر عن طريق الغرابه
تانيا انه نوع من الخيال والافكار المريضه ان لايري الانسان جمال الا في براز فار او رائحه شراب
وزي ما قلنا
انحطاط عام يؤدي اليه انحطاط في الادب بالضرورة
تحياتي
اشكرك

بنت القمر يقول...

نسرين بسيوني
اهلا
مفيش اي حده في كلامي انتي صديقه المدونه والاسكندرانيه لهم عندي معامله خاصه وديسكونت
بصي يا نسرين
انتي الاول قلتي
مدونته "وسع خيالك\عش كانك تلعب"
احمد انا متبعاه وباحب كتاباته جدا مع انه بيستخدم الفاظ فى منتهى البذاءه
******************
بعدين قلتي مش بحب اسلوب محاكمه المدونين لبعض؟؟!!
مين هنا اللي حاكم وجاب اسم محدد واطلق عليه لقب محدد؟؟
انا ولا انتي؟؟
انا قلت في اتجاه ادبي انا ملاحظاه
والكلام ده مش انا اول واحده اقوله اسمه ادب قله الادب وده توصيف لاحمد شقير
يعني مش من جيبي وقال انه يقصد بيسو تحديدا!!ا
ابقي دوري في بوستات شقير علي بوست اسمه ادب قله الادب
تانيا انا اللي رصدته هنا ما اسميته ادب العفن
وخلي بالك لا ذكرت اسامي ولا جبت مقاطع لكن لو عاوزة تعرفي اقصد مين وايه اقولك
عموما
برضه الامر مفيهوش محاكمه احنا يا صديقتي في الفضاء السيبري اللانهائي بنكتب في صفحات مفتوحه مش مدونه للريدرز الخاصين
وكمان سايبين التعليقات مفتوحه
وبنحب نعرف رأي بعض
وما تنسيش برضه اني مذكرتش اسامي
لاني مش الهدف انقد حد لكن ارصد اتجاه
طيب بتقولي السياق
انا معنديش اعتراض ابدا علي المواضيع الحميمه لو اتناقشت بشيكه
لكن لما البوست يكون 15 سطر مش اكتر
نصهم في وصف براز الفار اوالعاده السريه يبقا السياق راح احنا مش بنكتب هنا روايات طويله
زي نجيب محفوظ تقومي تبلعي شتمه او كلمه نابيه وتقولي انها وسط السياق لكن السياق هنا بيكون مختصر ومركز
فاهماني
فبيكون الفكرة راحت ومبقاش منها الا ديم ام ودين اب
وعادة سريه في اتجاه السقف
قريتيها دي ولا لأ؟
عشان كده قلت انه يبقا خيال مريض
ولغه ركيكه
وعموما الاختلاف في الرلأي لايفسد للود قضيه
تحياتي

بنت القمر يقول...

سمراء
اهلابيكي زيارتك الاولي
عندك حق في كل ما قلتي انحطاط عام بالنتيجه يؤدي الي انحطاط ادبي
واستأذنك تقري ردي التاني علي تعليق نسرين بسيوني
****************
بصي يا نسرين
انتي الاول قلتي
مدونته "وسع خيالك\عش كانك تلعب"
احمد انا متبعاه وباحب كتاباته جدا مع انه بيستخدم الفاظ فى منتهى البذاءه
******************
بعدين قلتي مش بحب اسلوب محاكمه المدونين لبعض؟؟!!
مين هنا اللي حاكم وجاب اسم محدد واطلق عليه لقب محدد؟؟
انا ولا انتي؟؟
انا قلت في اتجاه ادبي انا ملاحظاه
والكلام ده مش انا اول واحده اقوله اسمه ادب قله الادب وده توصيف لاحمد شقير
يعني مش من جيبي وقال انه يقصد بيسو تحديدا!!ا
ابقي دوري في بوستات شقير علي بوست اسمه ادب قله الادب
تانيا انا اللي رصدته هنا ما اسميته ادب العفن
وخلي بالك لا ذكرت اسامي ولا جبت مقاطع لكن لو عاوزة تعرفي اقصد مين وايه اقولك
عموما
برضه الامر مفيهوش محاكمه احنا يا صديقتي في الفضاء السيبري اللانهائي بنكتب في صفحات مفتوحه مش مدونه للريدرز الخاصين
وكمان سايبين التعليقات مفتوحه
وبنحب نعرف رأي بعض
وما تنسيش برضه اني مذكرتش اسامي
لاني مش الهدف انقد حد لكن ارصد اتجاه
طيب بتقولي السياق
انا معنديش اعتراض ابدا علي المواضيع الحميمه لو اتناقشت بشيكه
لكن لما البوست يكون 15 سطر مش اكتر
نصهم في وصف براز الفار اوالعاده السريه يبقا السياق راح احنا مش بنكتب هنا روايات طويله
زي نجيب محفوظ تقومي تبلعي شتمه او كلمه نابيه وتقولي انها وسط السياق لكن السياق هنا بيكون مختصر ومركز
فاهماني
فبيكون الفكرة راحت ومبقاش منها الا ديم ام ودين اب
وعادة سريه في اتجاه السقف
قريتيها دي ولا لأ؟
عشان كده قلت انه يبقا خيال مريض
ولغه ركيكه
وعموما الاختلاف في الرلأي لايفسد للود قضيه
تحياتي

ه اللي اقصده تحديدا
اهلابيكي سمراء

بنت القمر يقول...

كليو
انا بنت القمر مش نور القمر
الا اذا كنتي بتدلعيني
(:
تانيا اسلوب الحلال والحرام والتناصح ينفع مع اللي ممكن يسمعه
واعتقد انه مش ها يكون مجاله هنا ولانه اول كلمه ها تسمعيها
انتو بتخنقوا الادباء والوهابيه والاذواق الفاسده وكلام ملوش لازمه لكن ولو قلنا ان احنا فقط بنحتفظ بالمعايير الادبيه فقط
يبقا ده الحكم
ساعتها نقدر نقول ده عجبني او مش عاجبني او انا تذوقت العمل الادبي ده اوما تذوقتوش
او بصنفه ازاي وتحت اي خانه
اي نوع من الادب
وخصوصا ان سبق فعلا ان البعض اطلق حمله مدونه نظيفه
او رفع بانر لا للبذائات
يعني الفكرة ها تبقي مكررة وعموما
اشكر مرورك وحماستك
تحياتي

بنت القمر يقول...

قطه الصحراء
اهلا بيكي اكيد النوع ده من الادب بيعكس واقع الناس وحال البلد
ادعوكي لقراءة ردي علي تعليق نسرين بسيوني الاخير
تحياتي
اشكر مرورك

Nsreen Bsunee يقول...

جميله قائمه الادباء الجديده اللى فى السايدبار
هانى بالتحديد يستحق تسليط الضوء عليه لانه فعلا متميز

نرجع لموضوعنا
حسيت بحده فى كلامك فى الجزء الاخير من اول تعليق لان سؤالك غريب شويه


وعاده سريه
منور العمارة
دي اللي قريت التعليقات فيها
ازيك يا نسرين بقا
تقدري تقولي انك ممكن تستمتعي كده
بتتذوقي النوع ده؟؟
*****************************

وفى ردي عليكي وضحت ان الفكره مش انى باستمتع بالكلام عن العاده السريه او الجنس لكن ممكن روائي او روايه تتكلم فى نفس الموضوع وتكون الروايه عجباني مش معنى كده انها عجباني عشان الروائي اتكلم عن حاجه معينه لكن عجباني عشان هى روايه كويسه
متفقه معاكي ان فى كتير من القصص القصيره او البوستات اللى على البلوجر لمدونين معينيين بيضيع السياق ماختلفناش لكن انا وضحت ان بيسو تحديدا رغم انه معروف ببذائة الفاظه بيكتب حاجات كويسه يعني الى حد ما فى كتير جدا من تدويناته او قصصه القصيره السياق والمضمون مش بيضيع وسط السب والشتيمه او اى الفاظ هو بيستخدمها
فى حين ان فيه مدونات تانيه بتستخدم نفس الاسلوب وبيضيع السياق ومش بيبقي فيه اى مضمون غير ممارساته الخاصه وسبه ولعناته فقط
مثال:بلال\الكنبه الحمرا
فا النوع ده مش بيعجبني فا مش بادخل مدونته مدخلتهاش غير مرتين او تلاته عبر رامز الشرقاوى ومحبتش انى ادخلها بعد كده دخلت بس عشان اشوف البوست اللى اشرتى ليه
واسمحيللى ده مش ادب ولا تدوين ولا يحزنون ده اشبه بمذكرات خاصه لحياته وممارساته الشخصيه مصمم انه ينشرها على الملأ وفيه ناس بيقروها وخلاص
اساسا فى مدونه الكنبه الحمرا مفيش اى اشاره لاى موضوع مهم او عام او قضيه او حتى حادثه كلها مذكرات شخصيه وديه نوعيه من المدونات موجوده زى برضه مدونه اسمها لادو وميشا وغيرهم

يارب تكون وجهه نظرى وصلت

فى الادباء عندك علاء الاسوانى
استاذ علاء نشر روايتيتن افضل من بعض :يعقوبيان و شيكاغو
اكيد انتى عارفه شيكاغو كانت عامله ازاى الفيبراتور والاورال وغيره وغيره من المشاهد الجنسيه اللى ملت الروايه مش معنى انى بحب الروايه انى بحبها عشان ده لكن بحبها عشان روايه كويسه زى مدونه بيسو مدونه كويسه بيتكلم فى اوقات كتير عن قضايا عامه زى نواره ممكن ناس متحبش الفاظها لكن هى فى النهايه بتتكلم عن حاجه مهمه او بتعرض خبر او حدث مهم ماليش دعوه بقي بالفاظها هى حره فيها المهم انها بتنقللى موضوع كويس وهى حره تنقله ازاى

اسفه على التطويل

ذو النون المصري يقول...

و الله لسه قاري في جريدة القاهره عن نفس الموضوع لكاتبه تتحدث عن مصير الادب و انه اوشك ان يصبح مثل السينما
يسال قاريء الروايه قبل ان يشتريها
الروايه دي قصه و للا مناظر؟
شيء فعلا منحط

Lasto-adri *Blue* يقول...

مش بس المدونات يا بنت القمر
:(
دا بقى حتى فى الكتب!
بقى لى كام كتاب أشتريهم.. وكل ما أبدأ فى قرائتهم الاقى قلة الأدب على ودنه فأقفل!

واحد زميلى قال لى.. زمان كان الكتاب يكون فيه مشهد ولا بتاع فى النص خلسة يعنى.. دلوقتى بقى الكتاب كله مشهد والكلام النضيف خلسة

شئ مقرف ومستفذ.. عشان لو إن الحجة هى تمثيل الواقع.ز يبقى فين واقعنا إحنا ... مش إحنا م البلد دى ولا إيه؟



شئ يغم!

يا مراكبي يقول...

لا أندهش أبدا من أن تجدي من يشجع مثل ذلك النوع من الأدب (إن جاز أن نسميه أدبا) .. فنجاح هؤلاء المؤلفين مبني على وجود طبقة ما تتذوق إنتاجهم وتشيد به

هذا ليس في التدوين فقط

فالأغاني لبذيئة تنتشر وتشتهر بمقدار أعداد الناس الذين يحبونهم ويشجعونهم ويطلبونهم

إذا وجد المتلقي الذي يشجع ويطلب ذلك .. زاد إنتشار المؤلف .. إذا هو إنحطاط في ذوق الجمهور المتلقي في واقع الأمر

nonoymm يقول...

والله عند حضرتك حق
انا اسمى نونو والحروف التلاتة y m m
دول اول حروف في اسماء تلاتة من ولادي يعني نونو واي ام ام
حلو ولا انا شايفة اني اغيره احسن
انا عموما متواصلة معاكي جدا وشوري علي
بارك الله فيكي يا قمراية

fatima يقول...

بنت القمر
و الله موضوع حلو اللى بتتكلمى فيه دا
بس إستخدام الالفاظ دى بيبقى عادى فى الحياة اليومية و دى هيا المشكلة ..
فى مدونة علاء و منال ...دخلت أشوف لراجل دا دماغه شكلها إيه لأانى تعاطفت معه جدا لما اتسجن ...
طبعا اتصدمت لأنى قريتله بوست بيختلف فيه مع صحفى فى جريدة البديل تقريبا ...بس الاختلاف كان بشتيمة...
استغربت جدا و قررت الا أدخل مرة اخرى الا من باب الملل
و كمان مدونة نوارة نجم ...مع ان دماغها كويسة و الله
بس محبتش الاسلوب ....
الواحد ممكن سشتم و يستخدم الفاظ خارجة فى حياته اليومية كلنا بنشتم محناش ملايكة يعنى
بس أول ما الواحد ييجى يكتب ... بيفكر الف مرة قبل ما يحط أى كلمة كدا و لا كدا
لان حد بيقراه و بيسمعه ...
و انت موش بتكلم حد معين انت بتكلم كل المستويات و الاعمار ...
المفروض كدا ...
بس التدوين عموما خارج نطاق الرقابة الذاتية دى
لأن كل مدون يكتب بحرية عن نفسه ...
و بالتالى اللى عجبه نوارة كدا يدخل جبهتا
و اللى موش عجبه أسلوبها يروح حتة غيرها
و أجمل ما فى المدونات ..الحرية
تحياتى ليكى يا حبيبتى

بنت القمر يقول...

نسرين بسيوني
اولا مفيش تطويل ولا حاجه
طيب يا جميل احنا كده متفقين
يعني الملخص انتي ممكن تتقبلي بذاءه بيسو وتغفريها له في وسط السياق
كنبه حمرا بتشوفيها خاليه من الفكرة اصلا
اوكيه
انا ما اقصدش ابدا اني اتهمك انه بيعجبك النوع ده من الادب ابدا ادب الانحطاط كل ما قصدته انتي بيعجبك اكيد ها تقولي لأ يبقا متفقين
تانيا بالنسبه لحكايه لسته الاىدباء
انا لسه عاملاها بقالها تلات ايام وفيها ناس كتابتهم بتعجبني وهنا برضه متفقين يعني احنا الاتنين بيعجبنا كراكيب
يبقا كمان نقطه اتفاق
تالت حاجه علاء الاسواني الروايتيتن اللي قولتيهم روايات طويله وانا سبق وقلت لك معنديش اي اعتراض علي مناقشه العلاقات الحميمه والعاطفيه داخل العمل الادبي المهم طريقه العرض والشياكه
واعتقد ان الاسواني يختلف كليا عن من ذكرتاهم كمان زي ما قلت لك الروايه الطويله شيئ والقصيره شيئ تاني
عشان محدش يقول دي بتاعه مدونه نظيفه وبتاعه شعارات
اخيرا
اهلابيكي دايما وسعيده بالكلام معاكي
ومفيش بينا الاالاحترام دايما
منورة

بنت القمر يقول...

ذو النون المصري
المدونه نورت
مبروك يا اخي رجوع النت
طيب تقدر بقا تقول انه توارد افكار مع الصحفيه اياها
او تطابق رؤيه
ويا ريت يا نون بقت علي المناظر لأ دي بقت مناظر مقرفه
تحياتي

Abdou Basha يقول...

حظك وحش انك وقعتي في المدونات دي
هو ده أدب القبح اكتر منه ادب انحطاط، وتسلية أكتر منها متعة
بتهيائلي كده
:)

بنت القمر يقول...

لست ادري
مش بس التدوين لا الكتب كمان

فعلا لست
وزي ما قال نون دي قصه ولا مناظر
دول حتي استخسروا فينا المناظر وقلبوا علي منور العمارة وبراز الفيران
يعني حتي لو نحيتي المعيار الاخلاقي
مش هتقدري تستمتعي بكونها حتي روايه جريئه
منورة لست
اشكرك

بنت القمر يقول...

يا مراكبي
**********إذا وجد المتلقي الذي يشجع ويطلب ذلك .. زاد إنتشار المؤلف .. إذا هو إنحطاط في ذوق الجمهور المتلقي في واقع الأمر
****
تفسيرك يا مراكبي واقعي تماما
حاله انحطاط عامه
مؤلف ومتلقي
اشكر مرورك

بنت القمر يقول...

نونو
بصراحه طالما طالبه رأيي غيريه
لان نطقه صعب
وملوش معني..
اختاري الاسم اللي تحبيه ها اديكي اقتراحات
الاول خليه اسم عربي بلاش الانجليزي..عشان يثبت في الدماغ
عشان التواصل
ممكن
نبراس
رساله
وهج
شمس
كوكبه
او اسمك الحققيقي
ممكن نهر ..هدايه..علي فكرة رسالة حلو اوي.. ونبراس
بس اكتبيه عربي
وخلي اللينك زي ما هو عشان الناس تقدر تروح تتابعك
بس غيري الامضاء
تحياتي
ولما تغيريه قوليلي
اشكر مروروك

بنت القمر يقول...

فاتيما
لأن كل مدون يكتب بحرية عن نفسه ...
عندك حق فاتيما
يكتب عن نفسه ويقدم نفسه زي ما يحب برضه
اعتقد ان علاء ومنال يختلف عن نوارة
نوارة مبتجبش الفاظ ربعهم ولا غيرهم ما بيجيب
كمان نوارة ممكن تعرض فكرة كويسه لكن بعضهم لا فكرة ولا اسلوب
اشكرك

بنت القمر يقول...

عبدو باشا
منور المدونه
ادب القبح
ادب الانحطاط كلاهما واحد بس افتكرت ليه الكلمه دي عشان كانوا واكلين ودانا بيها في الكليه
وقعت في التدوينات دي عشان لما بخلص الريدر افضل الف من لينك للينك صدفه بحته وكل مره الاقي الملاحظات بتتغير
من ادب قله الادب علي رأي شقير الي ادب العفن اللي لاحظته انا
وهل من مزيد(:
حاله انحطاط عامه علي رأيمراكبي
اهلابيك عبدو باشا
اشكر مرورك
تحياتي