الاثنين، مارس 17، 2008

قمر في دبي

في رحله ترفيه قصيره في دبي لخمسه ايام كنت اظن ان اقسي شيئ ترك ابنتاي فقط لكن.. بعد الرحله اكتشفت كم تعلقت بالاسكندريه وكم احب مصربكل ما فيها من سلبيات قبل الايجابيات.. الي حد الهوس!!
مطار دبي




وصلت يوم التلات دبي الانطباع الاول كان الانفهاش الحضاري والحقد النوعي بعد القدوم من مطار برج العرب البسيط ضعيف الحال

المطار كبير بصروة غير طبيعيه
وبما ان_ ولسه ها اجيلكم في الكلام_ العالم هناك عندها هوس بالاكبر والاعلي والاطول وكل افعلات التفضيل
فالمطار كبير بصورة لا تصدق.. ودرجه الرفاهيه فيه عاليه المسافرين لا تتحرك الا علي سلالم كهربائيه وسيور متحركه لتسهيل المشي في ردهات المطار اللانهائيه

البشر في المطار من كل صنف ولون كأنه يوم القيامه امريكان واوربيين هنود وصينيين وعرب اللقطه الاولي ان محلات المطار مليئه بالخمور الابيض والاحمر وشوكلاتات مخلطه بالخمور بصورة كثيفه جدا

في شوارع دبي
الشوارع كبيرة جدا وحر ببشاعه لاتري فيها الا المول خلف المول.. والفندق تلو الفندق البلد مافيهاش الا مولات وفنادق وابراج للسكن الفندقي والمكاتب الاداريه اشهر الابراج برج دبي توين تاور المماثلين لابراج نيويورك وتوين تاور الامارات وبرج دبي وهو اعلي برج في العالم الذي يسكن طابقه الاخير الشيخ محمد حاكم دبي ووبرج 0800الذي يعتبر اعلي سكن فندقي وبرج العرب الذي اهداه الشيخ محمد لزوجته الثانيه فضحكت احدي زميلت الرحله متسائله اذا كان الشيخ مش محتاج زوجه جديده اسعار المبيت في الفندق تبدأ من الف دولار فما يزيد

هوس بالبناء هوس بالمولات هوس بالفنادق يصل الي حد العته وخصوصا اذا عرفت ان الاوربييين والامريكان هم مرتادو تلك المولات سكان تلك الفنادق.. ويرتبط وجودهم اساسا بوجود البترول وحيث ان البترول ها ينشف بعد99سنه فكل تلك الابراج ها تبقي خراب وفراغ

فكرة التطوير الاقتصادي للبلد هي تعميرها بالمولات لخدمه الاجانب

وجعل دبي منطقه تجارة حرة وطبعا في رأيي المتواضع ان التجارة مرتبطه بالاجانب المرتبطين اصلا بالبترول يعني سلسله اذاكسرت حلقتها الاولي انفرطت باقي الحلقات
الامارات مول
اكبر سوق تجاري في دبي عبارة عن 3في 4 كم من الماركات العالميه دولشي اند جابانا.. ديبنهامز..زارا..كارفور..كارولينا هيريرا..اغنر .. باسلر.. بينتون.. كالفن كلاين.... وغيرها من الماركات اللي بنشوفها في المجلات الخليجي واو عند الكوافيرات الاسعار نار ببشاعه النطلون المتواضع يبدأ من 200 درهم يعني 300 جنيه ويصل الي 5 الالاف درهم حوالي7.5الاف جنيه مصري
اسعار الايس كريم بسكوته عاديه عليها اتنين بوله ب 40 درهم حوالي 60جنيه.. والشاي 30 درهم =45جنيه الاسعار عاليه بصورة خرافيه اتصلت بصديقه مصريه هناك وسألتها علي الاسعار المعقوله في دبي فوصفت لي بعض المحلات المتهاوده..محلات اطفال وحريمي في الامارات مول ومول سيتي سنتر وغيرها من المولات.. بعض المصريين في الرحله معانا اتجهوا الي سوق نايف وهو احد الاسواق الشعبيه الرخيصه متواضعه الذوق من الصناعه الصينيه لا يشتريها الا الهنود والباكستانيين
الدعارة في دبي

المولات في دبي مليانه بالروسيات التي يحترفن الدعارة بصورة علنيه وواضحه ومقننه وبشعه.. لا تخطئها العين ولا مجال للنصاحه لاكتشاف حقيقه الروسيات في دبي.. توجد جنسيات اخري لكن الرسيات يتربعن علي عرش تلك المهنه القذرة.. كميه الانحلال والفساد والعري بصورة رهيبه ومقرفه كأني انا الوحيده اللي لابسه بكم في دبي الروسيات يتحرشن بالاجانب والموطنين علانيه في المولات ..

متحف دبي الوطني


متحف دبي هو نكته الرحله وهو عبارة عن قاعات صغيرة مليانه بتماثيل الشمع التي تصور اعمال المواطن الاماراتي القديمه قبل مرحله البترول من صنعه فخار وحلي وصيد لؤلؤ.. المتحف صغير جدا جدا في مساحه متحف الاحياء المائيه بتاع اسكندريه حاجه زي الصالات تذكرته ب3درهم=4.5جنيه وهو لا يستحق الزيارة الا عشان تشوف النقله الحضاريه والمعنويه اللي اتنقلها سكان الامارات من حياه بسيطه بدائيه الي صرع حضاري واستهلاكي

سفاري
كان من ضمن برنامج الرحله سفاري في صحراء دبي بسيارات لاند كروزر يقودها اماراتيين او ايرانيين ومش عارفه اشمعني ايرانيين ??
رحت الرحله مع مجموعه سكندريين في نفس العربيه الرحله شاقه ومرهقه حتي الوصول الي كامب داخل الصحرا.. الكامب يضم عشا و او بن بوفيه مع رقص شرقي سموه ليله مصريه!!
بعض او كتير من زمايل الرحله المصريين من الملتزمين خرجوا بره الكامب واستنوا في الصحرا عشان يرجعوا الاوتيل لانهم مش عاوزين يشوفو الرقلصه وبعضهم اعترض علي عدم وجود مسجد قريب وبعضهم ما فوتش الاوبن بوفيه وقعد وادي ضهرة للرقاصه

مش فاهمه ليه الرقاصه اللي بترقص علي سعد الصغير وعرض الرجاله اللي بيرقصوا بالجييات الملونه اللي بتلف زي بتوع الطريقه الرفاعيه هو ما يعطي طعم انها ليه مصرية كان مفيش حاجه تعبر عن مصر الا الرقاصات وسعد الصغير وشغل الموالد وعدنا بسلام للفندق
المواصلات في دبي

المواصلات العامه منعدمه في دبي مفيش غير الاتاكسيات.. هي مش بتمشي زي تاكسياتنا كده ..لكن لازم تطلبها في التليفون او تاخدها من امام باب المول بعد ما تقف في طابور من ميتين شخص منتظرين دورهم في تاكسي طبعا حاولت استنصح واخد تاكس من باب دخول المول مش معقول قمر بنت الفراعنه تقف في طابور تاخد تاكسي وسط الهنود بتوع نيهي نيهي..ولا وسط الروس والصينيين
طبعا المحاوله باءت بالفشل ورجعت حجزت دور في الطابور ووقفت في محل مجاور لحد ما قرب وقت خروجي من المول اسعار التاكسات هناك نااار التاكس من الامارات مول الي فندق شيراتون فور بوينت حيث نزلناوهي حوالي تلت ساعه بالكتير تمنها 40 درهم يعني 60جنيه البنديرة ديجيتال بتبدأ ب3 درهم فتح كلام يعني الله يرحمك يا تاكسيات اسكندريه الصفرا ملقحين في الشوارع من اول البلد لاخرها ب10جنيه بس وسوق بينا يا اسطا علي الكورنيش ناكل درة ونشرب منجه ونطلع عينه كمان
البحث عن مواطن في دبي
سكان الامارات قليلين جدا نادرا ما تلمح مواطن{ابن البلد}في المولات بيسموا نفسهم جاليه اماراتيه للاسف عايشين وسط طوفان من الهنود والصينيين والروس والملل والثقافات من كل شكل ولون.. مما يجعلهم وسط بزرميط ثقافي ديني لغوي حضاري يهدد وجودهم ويهدد ثقافتهم وروحهم الوطنيه واقفين ادام مغريات فساد وانحلال اخلاقي وادام هوس استهلاكي في الولات يجعل همهم امتلاك الاحدث والاسرع والاكبر والاعلي..عموما البلد خانقه مافيهاش روح ما فيهاش نكهه ولا طعم.. اعان الله اهلها علي احوالهم وما هم فيه
العودة
كانت عودتي علي مطار برج العرب وعمار يا اسكندريه عمار يا مصر والله والله ما في زي مصر ولا تراب مصر ولاهواا اسكندريه ولاناس اسكندريه ومصر
تحديث هام...
لم اري في دبي غير مصنع دبي للمكرونه بجوارة مصنع للمرطبات طوال الرحله وحقيقه مش عارفه يعني ايه مرطبات يعني بيسي ولا ايه
____________________
اعتذر عن التأخير الرد علي كومنت البوست السابق وابدا الرد من اليوم ان شاء الله

هناك 44 تعليقًا:

عباس العبد يقول...

حمد الله على السلامة يا فندم
المهم تكونى انبسطى , عامة مصر ام الدنيا فعلا .

خمسة فضفضة يقول...

السلام عليكم ورحمة الله وبركاته

حمد الله علي السلامه
مصر كانت مضلمه ونورت برجوعك

appy يقول...

حمد لله على السلامه يا قمر مصر ودبى
طيب عارفه كل حاجه قولتيها حلوة بس موضوع الدعارة ده قرف موووووت

الطائر الحزين يقول...

حمدا لله على السلامة

عارفة فعلا فىمصر حاجة تانية

او يمكن كل واحد بيقول على بلدة كدة
عندنا ارتباط بالارض غير عادى


تحياتى

بنت القمر يقول...

عباس العبد
الله يسلمك يا بيه.. مصر ام الدنيا لاجدال
انبسطت وان كنت افتقدت البنات وادم جدا وافتقدت المدونه.. اه والله المدونه وحشتني كل يوم اعمل الشاي واجيب الفطار واجي افطر علي الكمبيوتر وجاتلي فكرة مجنونه اني ادخل علي النت في اي مكان وبعدين عقّلت نفسي وقلت يا بت اذا كان الايس كريم ب 60 جنيه امال ساعه النت بكام؟؟هههههه
يلا عمار يا اسكندريه
ميرسي يا رامز

بنت القمر يقول...

وعليكم السلام يا دكتورة فضفضه
كلك زوق جدا جدا
مصر منورة بناسها وباهلها الطيبين زيك
يارب مصر بخير دايما
اشكرك
علي فكرة انا بجيب الميجافيت للصغيره لانها مش بتستحمل الميديافيت وان كان اغلي بس كده ريحتيني
لاني غيرته بنصيحه من الصيدلي المجاور الذي اتعامل معه
ميرسي يا فضفضه

بنت القمر يقول...

ابي
ربنا يخليكي يا رافعه معنوياتي يا تفاحه جوجل
ايه رأيك بقا
بس الدنيا غاليه طحنننن يا ابي هناك صرفت فلوس تتتتتييييير اوي يا ابي وبرضه مفيش الا اسكندريه
ميرسي يا ابي

اسكندراني اوي يقول...

ههههههههههههههههههههههههههه
موت على نفسي من الضحك لما قريت الانفهاش الحضاري

ادي اخرة اللي ينفهش
هههههههههههههه

بس ايه رايك في التحليق فوق الماريا

طعمه ايه ذهابا
و
طعمه ايه ايابا

لمده خمس ايام وبتقولي غربه
امال اللي بقاله سنيييييين عمر يعمل ايه


نورتي دبي
وحمدا لله على السلامه

محمود المصرى يقول...

بسم الله الرحمن الرحيم

هى دى بقى ال culture shock
بس عاوز اوضح نقطة بسيطة , التطور اللى حصل فى دبى ( ان جاز ان نسميه تطور ) ليس مرده الى البترول , ولا يرتبط بديمومته , بل هو خطوة نحو تحويل الاقتصاد فى الامارة من اقتصاد تعدينى بالاساس الى اقتصاد مفتوح , بدأ بالصناعات الترفيهية ثم التجارية والمالية وأخذ فى الاونة الاخيرة خطوات نحو بناء صناعات القيمة المضافة بدءا بالصناعات الدوائية , والمنطقة الحرة فى منطقة جبل على فى المستقبل القريب هاتكون مركز صناعى ضخم فى المنطقة .
عموما حمدا لله على السلامة وسيبك انتى مافيش احسن من مصر .

بنت القمر يقول...

الطائر الحزين
اشكرك اكيد ركبت مع سواق تاكسي باكستاني كان بيقول في بلده شعر جوها وشجرها وشوارعها ويتذكرها بحسرة بس اكيد برضه مصر مش اي بلد وبجد مفيش زيها اشكرك تحياتي

بنت القمر يقول...

اسكندراني
مش كفايه بقا بوستات الحنين اللي تقطع القلب دي
علي فكرة ده انفهاش لحظي اولي غير مستديم ومخلوط بحقد نوعي طبقي
ماريا؟؟ وهو في زيها ولا زي جرين بلازه ولا القعده في دوران جليم علي البحر ولا التمشيه في الابرهيميه وميامي
سيبك انت مصر وبس
والله ما اقدرش اتحمل البلد دي الا اضطرارا وعشان لقمه العيش لو عزت هنا لكن اختيار لا تطاق دبي بلد بلا قلب ولاروح
ربنا يرد غربتكم بالسلامه ويهون عليكم
اشكرك يا اسكندراني
منور

بنت القمر يقول...

محمود معلش يا عزيزي
ده شوك لحظي مؤقت سببه المقارنه ببرج العرب التعبان
تانيا بعد اذن حضرتك
اختلف معاك جزئيا وكليا خلق صناعات غير تعدينيه ودوائيه وتجارة حرة في رأيي مش منطقي اطلاقا ليه مين ها يسكن الفنادق دي غير الامريكان والاوروبيين مين ها يشتري من المولات غيرهم حتي الاماراتيين ها يشتروا وقت البترول بس والاجانب وجودهم ملاتبط بالبترول
انا مشفتش ولا مصنع يوحد ربنا عملنا بنا عظيم وبعدين الابراج دي هاتبقا خراب بعد رحيل الاجانب اللي ها يخربوها يجيبوا اجلها
بدل ما يفتجوا البلد للبزرميط الثقافي يحاولوا يزودوا عدد السكان او يتهاونوا شويه في قوانين الجنسيه
مش عارفه منبهرتش بالبلد وحسيتها كدبه كبيرة
واتفق معاك اخير في ان مصر ملهاش زي
منور يا محمود

عدى النهار يقول...

حمدالله على السلامة

نفس الإحساس السلبى عن اللي حاصل فى دبى جالي بعد مشاهدة فيلم تسجيلي طويل عنها.. حسيت إنها تحولت إلى مسخ خاصة بعد الإستماع للحوارات التى كانت فى الفيلم

mohand يقول...

وصفتيها كاني فيها

حمدلله علي سلامتك


تحياتي

Nsreen Bsunee يقول...

اخيرا لقيت حد مش بيحب دبي زيي
اخيرا
والله يا قمر مدن الخليج كلها كده الكويت نسخه من دبي بس مع فرق الزحمه وهنا دعاره روسيات وفلبينيات كمان
لما رحت دبي حسيت انى فى مدينه بلاستيك بصراحه معجبنيش غير المطار والمطار فقط وخلاني جاتللى كولكيعه حقد وسواد عليهم حزنا على مطار اسكندريه والعشوائيات والقرف اللى بيستقبلها القادمون الى الاسكندريه فى منطقه مطار النزهه
ملحوظه قله عدد المواطنين فى محلها والكويت نفس الشئ انا ساعات باحس انى حافتح الحنفيه ينزللى هندى منها او بنغالى
قليل اوى لما باشوف حد كويتي
الاسعار غاليه برضه لكن الانيل والادل ان الدينار الكويتي بعشرين جنيه مصري يعني لو الواحد حيحسبها بالمصري زي ما انتى عملتى يبقي حيموت بالجلطه
خمس ايام غربه يا قمر امال انا وحفصه نعمل ايه بس بعد الشر عليكي من الغربه
وياريتك كنتى صرفتى مصاريف الرحله ديه فى اسكندريه كنتى اخدتى صاحبتك الانتيم ونزلتو فى السبا اللى فى اللاجون ومساج وحمامات مغربي وهيصه وبعدين تطلعو على سان ستيفانو تعملو شوبينج برضه ماركات عالميه وتتعشو فى راقوده ومش حتصرفي ربع اللى صرفتيه فى دبي وكفايه جو اسكندريه انا سايباها والجو حلو اوى اليومين دول
حبيبتي انتى بتقوللى حر بتقوللى الجو فى دبي كان حر
احنا لازم نخطفك انا وصفصف ونجيبك الخليج شهر 7 عشان تتوبي الى الله عن اللى قلتيه ده وتحلفي انك مش حتطلعى من اسكندريه تانى ابدا
:)

باقولك صحيح سجليني عندك فى نادى المكتئبات قسم الانهيار العصبي الصامت

بنت القمر يقول...

عدي النهار
مسخ وبزرميط ثقافي علي رأي اسامه انور عكاشه
طوفان من الهنود والصينيين والروس واقليه امارتيه
مفيش الا مولات ثم مولات وابراج حتي الطرز المعماريه منقوله من الطرز الاوروبيه يعني برج مش عارف ايه زي برج كذا في لندن او التوين تاور نسخه من توين تاور نيو يورك
مقتطفات من اشكال الطرز الغربيه النقوله نقل مسطرة
غابه اسمنتيه وزجاجيه بلا روح
تحياتي

بنت القمر يقول...

مهند
حمد الله علي سلامتك انت
العوده للتدوين كل ده عشان الحضري ساب مصر؟؟ يا راجل
قلبك ابيض
مبروك عيد ميلاد مدونتك
تحياتي

بنت القمر يقول...

نسرين بسيونس
هههههههههههههههههههههههه
مدينه بلاستيك
تعبير هايل يا نوسي
اه صرفت فلوس كتيييير كتيير
يا قلبي
ومش مشكله غير انك فاكرة ان الالف تجيب خمس حاجات تلاقيها جابت حاجتين وكله كوم والتكسات كوم لو تاكس هنا قالي 60 جنيه من المول للفندق ها اقوله اطلع بينا علي القسم
ده انا اخدة في اسكندريه من الصبح لبليل وسوق بينا يا سطا علي الكورنيش ناكل دره ونشرب منجه
علي رأي الاغنيه
كمان محدش هناك بيمشي في الشارع
محدش بيمشي علي الرصيف
البلد زي ما تكون ضربتها قنبله مولاتومولات بس
لاجون يا عيني علي لاجون ولا جرين بلازا والقعده بالليل تشربي مانجه في الصيف او شاي بالنعناع وتتفرجي علي الرايح والجاي
احلي سنكحه واحلي فسحه لما تيجي اسكندريه تاني لازم ابقي اشوفك اعزمك في لاجون واغديكي في جرين بلازا
منورة يا نسرين

fad-fadat nour يقول...

اهم حاجة حمد الله علي سلامتك .. و بعودة ;)

يقال ان الاسكندراني "الاصيل" ما يرتاحش و لا يحب اي مكان غير اسكندرية و تفاصيلها.. النظرية دي بيثبت صحتها موضوعك ..و اراء كل الاصدقاء (و رأيي الشخصي طبعا) بعد كل و أي رحلة لأي مكان في العالم

احنا بس غالبا نسافر لاثبات ان اسكندرية هي الاحلي .. و مش لأي غرض تاني :)))

لكن جميل ان الانسان يغير نظامه اليومي و مكان اقامته و لو لأيام حتي يجدد حبه و حماسه لما كان عليه

مرة تانية حمد الله علي سلامتك :)

maii bahaa يقول...

حمدالله عالسلامة يا قمر
الصور حلوة أوي
المطار فعلا يجنن
بس مصر اللي في القلب هانعمل ايه؟
انتي زعلانة على مطار برج العرب .. ماهو مطارالقاهرة برضه أعجوبة
تحياتي
:)

راجى يقول...

سعدنا جدا بسلامة العودة

Cleo يقول...

الفاضلة قمر..

هذا أول مرور لى على مدونتك بترشيح من الفاضل راجى وأود أن أشكره على هذا الترشيح...

زرت دبى لأول مرة (وأرجو أن تكون أخر مرة) العام الماضى وكانت لى نفس ملاحظاتك...

بلد فاقد النكهة يشبه أبراج بابل التى جمعت "عبيد وسبايا" من كل شكل ولون... سائق التاكسى هندى وشيال الشنطة فى الفندق باكستانى والرسيبشنت أندونيسية ونادل المطعم مصرى والباعئين فى المحلات شوام على مغاربة على كل لون يا باتيستة.. لا يكاد عقلك يستوعب أين أنت!!!

أشكال المبانى كما يقال بالإنجليزية Unfriendly فهى على رغم من ارتفاعاتها الشاهقة وأشكالها المبتكرة إلا أنها أشكال غير ودودة ولا تكاد تحتمل النظر إليها كثيرا... كلها أشكال حادة ومرايا وحديد..

لم أر مواطنين إماراتيين اللهم إلا موظفى المطار وأسرة إماراتية فى مطعم إيرانى!!

ولكن رغم كل هذا... فالحق يقال.. البلد نظيف لحد الهوس بالنظافة... واحترام المرور مبهر وقدرة هذه الدولة على التحول من الحرف البدائية إلى قبلة الاقتصاديين فى العالم فى ظرف أثل من 20 عاما لهى تجربى جديرة بالاحترام والتحسر على أبناء النيل وأحفاد الفراعنة بناة الأهرام الذين يتقاتلون على جركن مياه نظيفة أو رغيف عيش بالمسامير..

زمان الوصل يقول...

حمدلله ع السلامه :)

كل ما حد يروح "دبىّ" و يرجع يقول ماعجبتنيش بانشكح من نفسى جدّا إنّها مش عاجبانى -"دبى" يعنى- من غير ما اروحها ..

اقتصاديا أظنّها تمثّل معجزه بكل المقاييس لكنّى لا أحب المدن و البلاد فاقدة الروح و الطعم و الشخصيه ..

أحد الأصدقاء العاملين فى دبّى وصفها كالتالى


دبي مدينه اقرب الى احواض السمك .. كل شئ فيها جميل و لكن خلف اسوار من زجاج .. اشتركت العوامل الجويه و ارتفاع مستوى المعيشه فيها لجعلها مدينه محرمه .. مهما زاد دخل الفرد فيها سيجد ان هناك اماكن مازالت بعيده عن متناول يده ... و هنا ينقسم الى فريقاً من اثنين .. اما زاهد او ضائع في دنيا الملذات .. و كلاهما مديون !!!

بنت القمر يقول...

فضفضه نور
يا دي النور يا دي النور
عزيزة الزيارة المدونه نور
الاسكندريه هي الاجمل بلا اي تحيز
مفيش زي جرين بلازا ولا الهوا بالليبل في دوران جليم ولا المتمشيه في محطه الرمل
اسكندريه ماريا
منورة فضفضه نور

بنت القمر يقول...

ماي بهاء
الله يسلمك مطار برج العرب علبه كبريت بأي مطار تاني
الاعمده بتاعه السقف مصديه والكراسي متهالكه وسير الشنط قد السفرة الصغيرة
حاجه نكته ولو أن الرن واي نفسه يشيل طيارات كبيرة اكبر من مطار النزهه
لكن ده اصغر
خسارة بجد خسارة مصر تتبهدل كده
لكن محدش بياخد كل حاجه
منورة مي

بنت القمر يقول...

راجي
والله انا اللي سعدت بالعودة
وافتقدت البنات وادم والبيت
افتقدت المدونه موت كأنها عيل من عيالي
وطبعا مقدرتش اتهور وادخل سايبر الدنيا غاليه موت
عموما اشكرك تحياتي
وشكرا علي الترشيح

بنت القمر يقول...

cleo
اهلا اهلا
اتفق مع حضرتك كليه وان كنت وصفت حاجات كتير بالمختصر عشان اقدر الم باغلب عناصر الزيارة فعلا المباني هناك منقوشه نقش مسطرة من اوروبا او امريكا بدون اي نكهه محليه ارتفاعات شاهقه ما تجبهاش العين
بالاضافه الي البزرميط الثقافي لغوي ديني حضاري
زي ما حضرتك بتقول
متفقين جدا
اشكر مروروك الاول وان شاء الله مش الاخير
تحياتي

بنت القمر يقول...

زمزم
كده جيتي اخر واحدة يا زمزم وانا قاعدة مستنياكي!!!ههههههه
طب ارفعي السماعه وقوليلي انا جايه في السكه حمدلله علي السلامه
اشكرك زمزم والله بسلمك
لما حد يقولك راح دبي اعرفي انه خد مقلب وصفك صحيح تماما بلد غابات الاسمنت والزجاج وطبعا عشان الجو حر مفيش محلات في الشارع مفيش حد بيمشي علي الرصيف زيينا كده
كله جوة المول الاكل والشربز المسجد والتواليت والسينما
كله كوه الصندق المول
مفيش اي حاجه اوبن اير
تتحسي بخنقه انا مش عارفه انتي من القاهرة مش كده؟ظ
مفيش مكان زي الميريلاند كده
كله زي سيتسي ستارز
مولات ومولات وخلاص
يالله عموما تجربه وعدت
منورة زمزم
لو عاوزة تديني المعلوم ابقي سيبيه هنا انا ها انزل حاجه جديده منورة تاني

أُكتب بالرصاص يقول...

اولا دبي والامارات كلها نورت بالقمر
وياريت كنا قدرنا نعمل حاجة من باب كرم الضيافة واهو نشم برضه فيكي ريحة مصر
ثانيا
مطار دبي فعلا من الفخامة والروعة مثل ما وصفتي بالظبط ، وكأنك في دنيا تانية

الاسعار هنا نار نار نار , وشعللها شعللها

عمري ما فكرت ادخل متحف دبي ولا أي متحف في الامارات..لاني عارف الفولة

برافو عليكي انك عملتي سفاري، جو تاني وانا على فكرة برضه من الناس اللي ادو ضهرهم للترعة ....
علشان العشاء مايتفوتش بتاتا

من الصعب ان تجدي مواطن في دبي

المواصلات ، متوفرة ، وفيه باصات ، وكمان كام شهر ويشغلوا المترو الطائر

المرة الجاية ابقى قولي لي وانا ادلك على اماكن للزيارة ،
وياريت كنتي زرتي مدينة العين او مدينة ابو ظبي
يستاهلوا الزيارة

fad-fadat nour يقول...

انا دائمة الزيارة لمدونتك و الله .. بس اكمني بادخل من الشغل (بعد ما لاغيت النت في البيت) مش دايما باعرف ألحق اعلق .. اقرا يوم و اعلق يوم
:))

Hannoda يقول...

وكإنك بتوصفي قطر برضه بس على أكبر بعض الشيء

بزخ رفاهية.. تنوع جنسيات يخوف.. تسهيلات في كل شيء.. حتى الدعارة..

التدين و الانحلال و الثقافة و الجهل و التمدن و التخلف

كل دول على مسافة سنتيميترات في كل مكان

عيون تتفحص أجساد في كل مكان

جنسيات تتلصص على جنسيات

مستويات من البشر و طبقات

أصحاب البلد أجود الأنواع
يليهم الاوربيون و الامريكان
يليهم العرب
ثم يأتي قطيع الهنود ثم الفلبين
كل طبقة تعرف جيدا كم هي أقل ممن تعلوها

يااااه

ياه أما تلاقي نفسك بتقتلي روحك هنا عشان أما ترجعي للحياه بجد اللي فبلدك تلاقي نفسك راجعة بروح ميتة ممتعضة شايفة الخير قدامها ومش عارفة تبل ريقها بيه

MAKSOFA يقول...

تعرفي أنا مبسوطه قوي من البوست ده لأنك نقلتي الحقيقه وكأنك عايشه في دبي من زمن ، وأجمل حاجه أنك تأكدت أن مافيش أجمل من مصر ، وده اللى دايما بأقوله للمصريين اللى فاهمين أن بلدنا دي وحشه، على فكره أنا عايشه في الأمارات منذ زمن بعيد ، لذلك شعرت بالبوست قوي

بنت القمر يقول...

اكتب بالرصاص ....
اشكر مروروك
وكان معايا مصريين واسكندرانيه كتير فيهمالخير للاسف مزرتش مدن غير دبي وان كنت اعتقد ان كله هيبقا شبه بعضه
اما السفاري فكان فعلا احلي الايام
اشكر واشكر مرورك

بنت القمر يقول...

فضفضه نور
وانا سعيده جدا بمتابعتك
تنوري المدونه اي وقت
ولو حبيتي اديني ايميلك
تحياتي

بنت القمر يقول...

هانوده
والله من بعد اللي الواحد شافه
الواحد مش عارف يقول ربنا يثبت اقدامكم ولا يقصر غربتكم
عموما ربنا معاكم
تحياتي
واشكر
مرورك تحياتي

بنت القمر يقول...

مكسوفه
اهلا بيكي
فعلا مصر مفيش زيها بلا اي تحيز
وزي ما قلت لهانوده ربنا يعينكم علي غربتكم
تحياتي واشكر مرورك

يا مراكبي يقول...

للأسف بأختلف معاكم تماما المرة دي .. الشواهد العامة اللي حكيتوا عنها لا تعبر تماما عما يتم التخطيط له إقتصاديا في تلك البلاد .. وأنا شرحت ده بالتفصيل هنا
http://yamarakby.blogspot.com/2007/05/blog-post_18.html#links

وهنا

http://yamarakby.blogspot.com/2007/06/blog-post_21.html#links

إحنا لسه بدري علينا قوي عقبال ما نفهم حركة الإقتصاد العالمي ماشية إزاي .. وعلى فكرة أنا مش من عشاق دبي رغم إني حافظها صم

بنت القمر يقول...

حسن
عندك حق والف حق متروحش
متستاهلش ولو عاوز تفسح الاسرة بنص الفلوس اطلع تركيا او لبنان
او اصرفهم في مصر
ولا هات للمدام هديه حلوة احسن
لكن دبي لو رحتها مرة اكيد مش ها تفكر تعيد زيارتها
تحياتي

بنت القمر يقول...

يا مراكبي
ها اشوف اللينكات واشوف انت شفتها ازاي
تحياتي

inwowgold يقول...

world of warcraft gold,buy wow gold,wow power leveling,wow gold,cheap wow gold,world of warcraft power leveling,world of warcraft gold,buy wow gold,ffxi gil,buy wow gold,wow power leveling,ffxi gil,world of warcraft power leveling,sell wow gold,wow power level,wow gold for sale,power leveling,,wow power level,power levelingwow power level,wow gold for sale,buy cheap wow gold.

جوريه يقول...

رايك نفس رايي عندما زرت دبي ، ولكن سأضيف تعليقا اضافيا على مدينة دبي وهو انه لا توجد احياء شعبيه او حتى سوق قديم تراثي .
فنحن عندنا مثلا في الكويت العديد من الاماكن الشعبيه والتراثيه القديمه التي تعج بالكويتيين والعرب كسوق المباركيه وسوق الجمعه وسوق الحمام ( سوق يحوي جميع انواع الحيوانات بالاضافة الى الباعة الجواله التي تجلس على الارصفه) وسوق الخضار وسوق السمك والمقاهي الشعبيه .
اما بالنسبة لمتحف دبي فانك لا تستطيعين مقارنة اى متحف في العالم كمتاحف مصر .
ولكن الآن دبي تمر بازمه اقتصاديه مدمره ، واليك هذا الموقع وهو بعنوان / صحيفه بريطانيه : الازمه الاقتصاديه ستعيد دبي الى عصر الصحراء

www.aljazeeratalk.net/forum/showthread.php?p=2178960

غير معرف يقول...

اختلف معك تماماً

أنتم تحسبون هذي العماير حاجه تآفهه

والتطور الحضاري اللي يصير بالامارات ولا الكويت ولا حتى دول الخليج انه حاجه زائفه ...!!

حاجه غريبه تماما .. الحين اذا صار البلد متطور ويحمل بنيه تحتيه متطوره صح ان البلد تكثر فيه العماله بس هذا مايمنع انه وجهه لجميع المستثمرين بالعالم .. هنيئا للأمارات على ماوصلت عليه من حركه منعشه بالاقتصاد .. هنيئا للكويت ايضاً ..

هنيئا للسعوديه البلد القوي بأقتصآده المحافظ على هويته الاسلاميه

... لكن !!!

بالقاهره مافيه دعاره ؟
ودعآره من بنآت البلد نفسه لكن الامارات ماعمري شفت اماراتيه تشتغل بالدعاره !!!

بالاسكندريه مافيه دعآره ؟؟!!!

شي غريب انكم تذكرون الدعاره وبلدكم محتل المرآكز الاولى بالدعاره !!

صلحو اللي ببلدكم اولا بعدين شوفو اغلاط البلاد الاخرى ~

غير معرف يقول...

هههه اذا دبي ما عجبتك شو رح يعجبك لا و المضحك المبكي انك بتقولي مصر احلا منها هههههههه
و مش عارف قصص الدعارة و طوابير التكسي من وين جبتيها
و بتعطي معلومات غلط قال دبي عايشة عل بترول، خليني اصصح معلوماتك الركيكة لعلمك دبي عايشة على الإستثمارات و التجارة مش على البترول
و الدليل انها تأثرت بالأزمة العالمية يعني لو كان عندها بترول ليش حصل الإنهيار الإقتصادي !!
مافيش مواصلات عامة !! و المترو شو قاعد يسوي
اجمل مدينة باعالم بنظري و أنا بتمنى إني ما اطلع منها و بالآخر بتقولك الله يعين اهلها ههههه فعلا ما عندك ثقافة التطور

غير معرف يقول...

اتفق مع غير المعرف فوق تماما