الجمعة، أغسطس 14، 2009

انحسار

باقي اسبوع علي انحسار موجه البديهات الصفرا والخضرا ستختفي المايوهات الشرعية وغير الشرعية سيرتاح الشاطئ الرملي من علب "الكانز وبواقي الاطعمة الحارة للمرتادين"

و اسبوع علي حصاد الكراسي البلاستيك البيضاء المكسورة امام بائعي الايس كريم

وعلي طهارة الشوارع من التين الشوكي والدرة المشوية

تغتسل المدينة من السيارات ملاكي المنوفيه واتوبيسات البحيرة والمنيا

تختفي عوامات البحر والبشاكير ويرحل المقدم والعقيد المسئولين عن عربية الازاله علي ناصية شارعنا القديم

سيعود طريق الحرية اكثر انسيابا وستشرق الشمس علي اسفلت ميامي والعصافرة والمندرة الذي لا يتنفس تحث ثقل السيارات التي تدهسه صاحا ومساءا

ستطفئ كافيهات كيلوباترا وسبورتنج الانوار الخضرا والزرقاء المرتبطة بارضاء زبون السيزون

سيرجع جيلاتي عزة الي حجمه الطبيعي وسيعود صابر الي كامل لياقته

سينفض موسم جرين بلازا وسوف "تنش الميكروباسات"باحثة عن من يملأجوفها المعدني

ربما تختفي الاشاعات عن محلات الكباب التي تخلط لحم الخنزير مع البلدي وربما تقل الاشاعات عن الجثث التي يتم سرقه اعضائها في محلات الملابس الحريمي المشهورة والتي تدفن اسفل غرفه البروفة

ستنعم الاسكندرية بشمس الشتاء البارده وتتنفس تملا رئتيها بالهواء النادي

هناك 29 تعليقًا:

محمود محمد حسن يقول...

انا بكره صيف اسكندرية الرهيب بكل تفاصيله بمية البحر اللي بتبقى بني ما تفهمش ليه ، بزحمته برطوبته ، بأهل الدلتا وهما ماشيين حافيين والمية بتشر منهم وبيحاولوا يعدوا طريق الكورنيش، بحلل الطبيخ بتاعتهم على البحر ، بميكروباصاتهم المتهالكة واللي العوامات عليها عشرة متر فوق،

اسكندراني والبحر في آخر شارعنا ويعدي الصيف كله وما انزلهوش ...مش بالذمة حرام.

Unknown يقول...

بصى....انتى بنت زى الفل

اخيرااااااااا هنتنفس يا ناس

انا موافقة محمود على كل كلمة على فكرة هو دة التعليق اللى فى دماغى بالظبط

منزلتش البحر ولامرة الصيف دة على فكرة

Kiara يقول...

يالهوي نتم مش بتكونوا طايقين المصيفين كدا :(

Crazy Nemo يقول...

للدرجه دى مضايقين من الناس اللى بتصيف عندكوا كده :(

انا بحب اروح اسكندريه ف الشتا اكتر عشان الزحام بيبقى قليل و بحب الجو هناك ف الوقت ده لما يكون الشتاء بسيط
المشكله ف الصيف الرطوبه العاليه جدا و الحر الفظيع والزحمه بس بروح كتير برضه عشان ماما من هناك

عين فى الجنة يقول...

الاسكندرية سوف تعود عروس مرة اخرى مع اول زخة للمطر

مهندس مصري بيحب مصر يقول...

أنا برضه بأحب إسكندرية في الشتاء

Andrew يقول...

زمانفي القرن الثالث الميلادي كان في حملة عسكرية من الرومان على سويسراوعشان مصر كانت تحت حكم الرومان اتاخد منها عساكر ومجموعة من الراهبات يشتغلوا في التمريض ورعاية الجرحى وخلافه
المهم بعد ما خلصت الحملة قعدت واحدة من الراهبات في سويسرا مع سكانها لما لاحظت عليهم انهم ميعرفوش النظافة تماما وعايشين عيشة بدائية زي الحيوانات كانت قاعده معاهم بتعلمهم النظافة تسرح لهم شعرهم وتنضفه تعرفهم ازاي يتخلصوا من الميكروبات وعرفتهم العطور
علمتهم احترام ادميتهم
واحترام الادمية ده اول طريق النهضة
والبنت دي صعيدية من قنا اسمها فيرينا وبيعتبروها قديسة وفي تمثال ليها وهي ماسكة مشط في ايدها في بلد اسمها تسورتساخ وفي عيد باسمها عطلة رسمية.
انتي ضايقتيني بجد يعني انتي بتقرفي منهم وهم بيحقدوا عليكي،ايه المجتمع المنقسم ده حاولوا تحترموا الناس التانية اكتر من كدة تعلموهم حاجة من غير نقد.
على فكرة انا قاعد في اسكندرية واسف للاطالة

Unknown يقول...

والله عندك حق .. حترجع اسكندرية هادية وجميلة كما كانت ان شاء الله

وبعدين ايه اشاعات تجارة الاعضاء فى محلات الملابس ودفنها اسفل البروفة دى؟

خوفتينى اشترى حاجة يابنتى
:(

إيمان قنديل يقول...

أنا بحب أسكندريه في الشتا أكتر من الصيف وفعلا عندك حق ، المصيفيين دول بيبهدلوا أسكندريه،بس بيني وبينك برضه بيعملوا رواج وانتعاش يعني مافيش حلاوه من غير نار



تحياتي

Unknown يقول...

خلاص انا مش حعترض تاني علي المصيفيين انا ححب الصيف وانظر للنص المليان للكوز

من الصبح لحد الضهر المواصلات فاضيه تروح وتيجي زي العروسه
بعد الضهر الخروجات بتقل وبالتالي بوفر فلوس واقعد في البيت
تنزل تتمشي علي البحر ان شالله بفانله داخليه وشورت جينز مشرشب محدش حيستغربك وبالتالي عندك فرصه تجرب وتستهلك كل اللبس اللي مش بيليق عليك او اللي موضته بقت قديمه
علشان تظبط حريم لمده يوم واحد بس عليك بس انك تروح ميامي المجاني وتنزل الميه وتقف في حته مافيهاش طول حتجيلك بنت فلاحه بطه بعوامه سودا مش عارفه تطلع لبرا علي الشط تطلعها وخلاص كده بقت معاك حته لمده 7 ساعات اعمل اللي انت عايزه (اسهل بكتيير من طرق تانيه)
انك تطلع فلوس حلوه من غير تعب الاعمال الصيفيه يدوبك تقف في خالد بن الوليد بفرش عليه اي حاجه من 11 لحد 4 الصبح بس حيطلعلك في اليوم ما لا يقل عن 100 (اشتغل يوم وريح يوم)

بالليل بتبقي مش عايز تنزل فبتقعد علي الفيسبوك تكتب نوتس وتعليقات وبتلاقي ردود كتيير لان صحابك زيك مش بيخرجو برده وبيقعدو علي الفيس وكتر التعليقات بتحسن المعنويات

حكتب بوستات حلوه اوي عن ذم الصيف والمصاروه والفلاحين وحلاقي تعاطف وترحيب من المدونين وممكن اخد البوبس زي أحد او جار القمر او اترشح بس زي عمرو عزت

الصيف حلو زي فاطمه ناعوت بالظبط يا اماني

محمود المصرى يقول...

بسم الله الرحمن الرحيم

انا عمرى ما زرت اسكندرية لكن هاعمل حسابى مش هازورها فى الصيف علشان مابقاش ضيف تقيل .
بس المصيفين بيفيدوكوا يعنى وبيعملوا رواج وبتبيعولهم الشاى بعشرين جنيه رغم انه شاى العروسة مش ليبتون يعنى .
تحياتى

ayman_elgendy يقول...

وله في خلقه شئون

:))

خالد الاسكندرانى يقول...

No place like Alexandria

اسكندراني اوي يقول...

اخيرا ستعود الاسكندريه للاسكندرانيه
اه ياني كم اتمنى ان اكون هناك احتفل بعودتها لاهلها
كل عام وانتي والاسره كلها بخير

ذو النون المصري يقول...

كل عام انتم بخير
اعاد الله ايام الشهر الكريم علينا جميعا بالخير و البركات

يا مراكبي يقول...

حلو البوست ده .. والتعليقات كمان

:-)

الموضوع طبعا بعيد عن العنصرية بالتأكيد .. لأن كل شيء له ميزة وعيب .. الإسكندرية وغيرها من المصايف بتستفيد إقتصاديا بشكل كبير من المصيفين .. ومقابل كده المصايف بتتبهدل طبعا .. مع ملاحظة ان المصايف العالمية مش بتتبهدل كده خالص .. ودي ملاحظة تفسر ليه أهل المصايف الأصليين بيتضايقوا من تصرفات المصيفين

زمان الوصل يقول...

بصراحه شديده هذا المنطق بيضايقنى جدّا
رغم أنّى لا أزور الإسكندريه فى الصيف و لا أنزل بحرها ولا أدخل البلاج بصبحة الحلل ولا أرتدى الجلاليب السودا .. لكنّى بصراحه شديده أشعر باستياء شديد من تناول أصحاب هذه المواقف بهذا الاستهجان خاصة مع تراجع عدد البلاجات و الشواطئ التى يمكن أن تستوعبهم بشكل مخيف و تحوّل معظم الشواطئ لشواطئ غير مجّانيه عليهم دفع مقابل كبير للاستمتاع بها و ده بشكل يومى .. فطبيعى جدّا يكون المتبقّى و المتاح لهم محدود جدّا مقارنة بعددهم الكبير .. و السلوكيات السوقيه و الانحرافات الاخلاقيه ليست حكرا على أبناء المنوفيه و المنيا و البحيره .. هى ممكن تتواجد فى "مارينا" و فى حفلات "تامر حسنى" و الهضبه و رغم هذا لا يلقى مرتادوها نفس النوع من التصنيف بناء على أصولهم الريفيه .. على أى حال لماذا لا يتّحد السكندريون من أجل إصدار تأثيرات تصدر بإذن مسبق لمن يحق له أن يطأ مدينتهم الجميله و يحرمون من هذه التأشيرات كل من لا تنطبق عليه شروط الجوده؟

حزينه يقول...

حلو اوى تجديدك لصورك

حزينه

بنت القمر يقول...

محمود محمد حسن
--------------
حانت ساعه الاستقلال
تحياتي

-------------
انجي
----
ومع ضيق اجازة الصيف بسبب رمضان سيستمر الوضع ويتوغل وينتشر
:)
تحياتي

بنت القمر يقول...

كيارا
--------
:)



نفرتيتي
========
معلش الوضع بيكون مزري يا عزيزتي
:)

بنت القمر يقول...

راجي
==========
رمضان رحمنا... ولو ان البحر بالسلامه كده خلاص

:)


مهندس مصري
---------------
تستحق اكيد

:)

بنت القمر يقول...

اندرو
==========
حاضر .... ها احاول احترم الغرباء يا عزيزي
:)



انسانة
--------
اشاعات لم تثبت صحتها
لكن الحرص مطلوب
:)

بنت القمر يقول...

غرام
=====
نار يا حبيبي نار
:)


شمعون
=========
فعلا الصيف شبه فاطمة ناعوت
:)

بنت القمر يقول...

محمود المصري
==========
مزرتش اسكندريه
!!!!
فاتتك نص الدنيا تنورها اي وقت
:)


ايمن الجندي
=============
اكيد
:)

بنت القمر يقول...

خالد الاسكندراني
============
بالتأكيد.... اشكر مرورك


اسكندراني اوي
====================
كل سنة وانت طيب
:)

بنت القمر يقول...

ذو النون
============
وانت بالصحه والسلامه
:)


يا مراكبي
============
الصيف هنا بيعمه الفوضي وخنقه المرور
وكفايه انك متقدرش تاخد عيلتك وتروح البحر تقوم تعمل هجرة للساحل الشمال
:(

بنت القمر يقول...

زمان الوصل
============
صديقه كانت بتقولي قريب
الواحد للاسف لازم يفكر بشكل طبقي عشان تحترم ادميته ورغم ان الواحد بيرفض ده لكن اكيد كلنا بنرضخ له بشكل او اخر
الساحل الشمالي اصبح يقدم نوع من الخدمة الاعلي سعرا والافضل جود والاكثر احتراما للادمية
اذا كان البحر مش في دماغك يا عزيزتي
فهو في بال اخرين وسيظل
جربي كده تحطي نفسك مكانهم
وها تفهمي الشعور احتياجك للنزول البحر وسط رواد من اتوبيسات رحلات اليوم الواحد وارد دمنهور والمتيا
:)

بنت القمر يقول...

حزينة
--------
اشكر زوقك ومرورك
:))

اميرة بهي الدين يقول...

احب اسكندريه في الشتا ..... وبس خلاص