الجمعة، نوفمبر 26، 2010

عن الشخص المؤذي

الشخص المؤذي مش كريه الشكل ولا متعجرف بالعكس ممكن يكون شيك وجميل ولبق جدا، واكيد ها يكون ناعم ومجامل ودحلاب، الشخص المؤذي احدي علاماته الاساسية انه بيظهر في حياتك يقتحمك بالود والمجاملة بيسمعك بود حقيقي واهتمام، يشاركك ويقعدك علي حجره وبعدين هوب يلف حوالين رقبتك في ثانية يلدغك، الشخص المؤذي ها يكون غالبا أذي اخرين قبلك بس لسه معرفتش ضحاياه او في الطريق لذلك او كان بارع جدا في التبرير لحد ما تقف في الدور معاهم، الشخص المؤذي لازم يكون خدوم ومتفاني ومهتم بالتفاصيل، يسالك في اول مقابلة عن تاريخ ميلادك او اكلاتك المفضلة او زوقك في اللبس وممكن جدا يسالك مباشرة عن مشاعرك او مشاكلك، الشخص المؤذي لازم تعرفه انه دايما بيحب المقارنات، وكل قصه تحكيها عن نفسك يرد عليها بقصة عن نفسه، حالتك العاطفية او المادية لازم يرد عليها بحالته وظروفه، مستقبلك المهني والوظيفي يرد في نفس الاتجاه ، غالبا بيقتحمك بسرعه عشان يجيب اخرك ويشوف كفة مين فيكم ها ترجح لانه مهتم انه يطحنك و يفرمك لصالحه في الاخر هي مجرد مساله وقت،وكل مقارنة بتكون في غير صالحه بتزيده حسد ومرارة، الشخص المؤذي عنده قدرة هائلة علي التلويع و اللعب باللالفاظ وتغيير الحقايق في مجاولة لتجنيدك في صفه، الشخص المؤذي مهتم دايما يورطك معاه في مشروع او علاقة او ارتباط مادي او معنوي بسرعه بشرط تخرج منه انت بس محمل بالخسارة وبيكون ماهر جدا في حسابات التخارج اللي في النوع ده من العلاقات،الشخص المؤذي كذاب لما تلاقي واحد طول الوقت بيكدب علي الاخرين اعرف انه بيتكدب عليك انت كمان بس انت مش قادر لسه تصدق او تكتشف ده الشخص المؤذي هيستيري مهما ظهر عليه انه ودود وهادي وجميل لكن بيكون هيستيري ومضطرب في ردود افعاله، غير قادر علي كبح جماح غضبه وفاجر في الخصومة،لما تلاقي شخص بالصفات دي اتاكد انه شخص مؤذي،الشخص المؤذي علاقاته قصيرة بالاخرين،معندوش صداقات طويلة ولا علاقات مستقرة يا فاشل اجتماعيا او نموذج متسلق ومكروه وفي الحالة دي بيكون مكشوف جدا، في شخص مؤذي اكتئابي وشخص موذي هيستيري استعراضي غالبا بيكون الهيستيري اكثر اذية من الاكتئابي والانسحابي، الشخص المؤذي بيسمع اكتر من ما بيتكلم في حالة وقعت في ايد شخص مؤذي، الافضل دايما الانسحاب اللطيف التدريجي دون المواجهه لان قدرته علي الاذية ممكن تكون فوق تصوراتك ، التخلص سريعا من جميع الروابط المادية والشراكات والمصالح قبل الانسحاب احرق سفنك واخلع في صمت..


هناك 10 تعليقات:

اميرة بهي الدين يقول...

نعم ... كثيرا ماادرك ان الانسحاب هو احسن الاشياء ، فالمواجهات مع شخص مؤذي غالبا بتجيب دمك من وشك ومشاعرك !!!

غير معرف يقول...

ولاد الحلال مخلوش من ولاد الحرام حاجة

وحسبى الله ونعم الوكيل فى الاشكال دية

اللهم خذهم اخذ عزيز مقتدر

ana ga3an يقول...

بدون اي مبالغة وصفك دقيق الي درجة عجيبة
فقد وضعتي ما عجز الكثيرين عن وصفة في مقال واحد

Empress appy يقول...

وانتى يعنى مش منتبهه لاى شخص مؤذى ما انتى شايفه حواليكى كتير
وتجارب كتير

موناليزا يقول...

للأسف قرأت هذا الموضوع متأخراً

غير معرف يقول...

Your post describes the most common personality disorder of the 9 personality disorders, known as "Borderline Personality Disorder". You can google it to find that all criteria of that untreatable psychological disease are surprisingly well described in your article

إيمان قنديل يقول...

طبعا ما هو ده شيطان العصر الحديث، وما أكثرهم حولنا ربنا يحمينا منهم
البوست جميل ودقيق في وصف شخصية هذا النموذج المؤذي من البشر

ذو النون المصري يقول...

فعلا
الانسحاب اعتقد انه افضل ردود الفعل معهم
ربما تعطيهم احساس بالتطنيش
او بقلة القيمة
يبقي عاقبتهم من غير مشاكل

يا مراكبي يقول...

:-)

دول بقوا كتير قوي في أيامنا دي لدرجة إني افتكرت إنها موضة وألا حاجة

وفعلا زي ما قلتي كده .. البُعد عنهم بسرعة غنيمة في حد ذاتها .. ربنا يحفظنا جميعا

بنت القمر يقول...

سعيدة جدا بمرور اصدقائي خصوصا غير معرف رقم 2 لكم كل تحية ومودة ومحبة
:)