الخميس، مارس 12، 2009

عن النشطاء والناشطون...آه يا بلد

مقدمة
عندما تكون علي متن سفينه تغرق وانت تعلم يقينا او لا شعوريا انها تغرق.
فأنك تتجه سطح السفينه التماسا لمزيد من الدقائق في الحياة

وعندما تكون السفينة الغارقة هي الوطن ذاته_ فأنت تحتاج اللي الكثير لتنجو تحتاج للصعود
ولكن علي اكتاف وجثث الاخرين !
تحتاج للصراخ حتي لا يكون غير صوتك وصدي صوتك وفقط.
------------
منظومه بايظة وحكومه خنشرت وعجزت واتهرت...اعلام مبتذل, صحافه حقيرة!
النتيجة ظهور الناشطين والنشطاء باحثين عن دور وعن نور وعن شهرة وعن السبوبة
فيروس النشاط يبدو انه اصاب الكثيرين
منهم من هم اصحاب القضايا حقيقيين اللذين يعملون في صمت في قضايا الوطن
ومنهم من اختار الناشطية كوظيفة وسبوبة
ليثبت انه باق علي سطح السفينة الغارقة الي اطول فترة ممكنه

يتكلم عن حقوق المرأة"يتكلم عن التحرش ,الحجاب ,الختان يخربش في الدين, يلعب في المنطقه الطائفيه الحرجة
ويتفتح الطريق بمعرفة مؤسسه اجنبيه مهتمه بالبحث والتقصي
وعندها استعداد لتمويل وفجأة يبقي ناشط دولي!

يتعرف علي صحفي حقير في صحيفه احقر
عاوز يعمل فرقعه وسبق يتشهرويروج لجريدته المغمورة

ويبدا التحالف المريض بين الناشط الموهوم الباحث عن الشهرة والسبوبة!
وبين وسيلة اعلاميه تروج وتاخد التمن!!
لما تبقي "فلانة" نااااشطه فجأه !!
وهي المحامية التي دافعت عن نهي رشدي صاحبة قصه التحرش الشهيرة

والتي انقلبت عليها واتهمتها بانها اسرائيلية
ورغم اني عندي تحفظات كتير جدا عن مستثمرات قضايا التحرش عبر الميديا لتحقيق شهرة !
في ذات الوقت الا ان رأيت ان تصريحات "فلانة" غايه في الحقارة!
بدعوتها الشباب العربي للتحرش بالاسرائيليات واعتبرته نوع من المقاومة والنضال
اليوم وصلتني دعوة للتضامن مع المحامية اياها ضد من اسموهم مشايخ التكفير!!
تحالف جديد بين"فلانة المحامية والتي ذكرت تصريحات ضد تعدد الزوجات واعتبرته مخالف للدين
وتعجبت من قبول زوجات الرسول بالتعدد الذي لا تقبله علي نفسها!!
وعدة تصريحات اخري ناريه عبر جريده عجيبه اسمها" الديار
"!
وبدأت عجلة الشيطان في الدوران انبري احد المشايخ بالتعقيب علي كلامها
باعتباره خروج عن صحيح الدين"ممكن نقول اتسحب من لسانه هنا بضمير مستريح"
واكملت العجلة دورتها

بان اصبحت "فلانة ناشطه وصاحبة راي ومضطهدة بسبب افكارها التقدمية المستنيرة!!!
وممكن ان تستضاف في ندوات ومؤتمرات وجمعيات اوتسافر علي جناح
اي جمعية لدوله غربيه_ باعتبارها "ست فيمينيست بقي وليبرال" وصاحبة فكر وراي
فيديوهات بقي علي يوتيوب وتسجيلات ولقاءات صحفيه وسبوبه
بل ان المطلوب هو التوقيع علي عريضه للنائب العام ضد مشايخ الكفير ومساندتها
ولا عزاء للاغبياء ولا عزاء لبقيه ركاب السفينه الغارقه
-------------------------------
انقر..حمله فيس بوك من اجل التضامن مع المحاميه الفاشلة
انقر...فيديو نفس الناشطه النسائيه تدعو للتحرش بالاسرائليات كنوع من المقاومة!!

هناك 34 تعليقًا:

خمسة فضفضة يقول...
أزال المؤلف هذا التعليق.
خمسة فضفضة يقول...

السلام عليكم ورحمة الله وبركاته

مش عارفه بالظبط اقولك ايه يا اماني

ماهو فعلا كل واحداو واحده اليومين دول مش لاقيله شغله يقولك انا ناشط او انا ناشطه
وبقت سبوبه لكل من هب ودب

وكل واحد يطلعلك بحمله علي الفيس بوك لمساندة الناشط فلان ولا الناشطه فلان والفضائيات تسجل وتذيع

واهه كله بيكسب وكله بيسترزق

وعلي راي المثل رزق الهبل علي المجانين


سلام

عدى النهار يقول...

تعرفي إن كل مجال فى البلد أصبح شبيه جداً بشوارعها.. لا يخلو من إنتشار الزبالة

مهندس مصري بيحب مصر يقول...

ما هي مخالفة لصحيح الدين فعلاً و ده اقل ما يقال عنها
و هي متعمدة ده علشان تشتهر و تعيش دور الناشطة التحررية المضطهدة

هي شخصية قذرة و ربنا حيحاسبها على كل اللي بتعمله ده

Unknown يقول...

يعني نتحرش ولا لأ ارسولكو علي بر

عبدالله يقول...

اتفق في كثير مما جاء في كلامك عن الناشطاء المتسكعون وان كنت اختلف في جزئيات بسيطه عن باقي النقاط
بالنسبه للناشطه ايها فده كلامها
http://www.alarabiya.net/articles/2009/03/13/68331.html
وهي بتكذب كل الي اتقال عنها اصلا بعد كده يا جماعه كل واحد يكلم لازم نسجله بقي علشان نعرف الحقيقيه :))

تحياتي

bluestone يقول...

المشكلة مش في هي قالت الكلام ده ولا لأ .. المشكلة الحقيقي في مصداقيتها هي شخصيا

هو احنا نسينا نهي رجدي واللي عملته نجلاء أيامها .. ودعوتها للشباب المصري بالتحرش بالاسرائيليات كنوع من المقاومة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

دي واحدة غاوية شهرة وخلاص ومش من المفروض ننجرف ورا التهريج ده

بنت القمر يقول...

فضفضة وعليكم السلام.........
كله بيحالول يهرب لسطح السفينه
وللاسف الكل غارقون...
تحياتي

بنت القمر يقول...

عدي النهار
===========
من اول النشطاء اللي الصحفيين الي دكاكين الصحافه حتي الشيوخ نفسهم بيسعوا الي سبوبة الفضائيات او الكثير منهم
الفتاوي الشاذه برضه بقت طريق شهرة
للاسف البلد بتنهار
للاسف.....مستنقع كبير

وميض ابتسامة يقول...

وما هو الجديد .. فأمثالها كثيرون !!
وما هو المنتظر من اناس باعوا ضمائرهم وداسوا على كل القيم والمبادىء من اجل الصعود الى دائرة الشهرة ..

ومن الجائز ان المثل العامى "خالف تعرف" قد اصبح دستور كل من يسعى الى النجومية الزائفة فى هذا الزمن ولكن الى متى هذا هو السؤال؟؟؟

فالنجم الزائف لن يصمد وطريقه دوما هو الصعود الى الهاوية .

بنت القمر يقول...

مهندس مصري
============
مخالفه صحيح الدين اسهل ما يكون بس العيب علي الشيخ اللي اتسحب من لسانه وعقب علي كلامها
مش كل من يتكلم مفروض الناس ترد عليه وتديله الاهميه
لان النتيجه ايه يا مهندس
النتيجه تشهير وتلميع للشخص ايا كان الهرتله اللي بيهرتلها
طالما محدش طلب راي الشيخ مش لازم يعلق
الناس بتسب الدين في الشوارع والصحافة والكتب والادب والاعلام
لو كل واحد عملناله فتوي مش ها نخلص
وهتلاقي علي الجانب الاخر اللي يهلل له ويشجع ويتضامن طب وليه من اول
الاولي بالمؤسسه الدينيه تتجه اللي المدارس الجامعات
تتجه اللي الاصلاح الاجتماعي بدل ما ترد علي كل واحدة فاشله عاوزة كلمتين تفرقع بيهم حتي لو كانوا مخالفه لصحيح الدين
تحياتي

بنت القمر يقول...

شمعون
========
ما براحتك يا عم وانا مالي انت ها تاخد اذن مني؟؟
وبعدين التدوينه مالهاش علاقه بالتحرش
اصلا
ركز يا عم واقراها تاني!

بنت القمر يقول...

عبدالله
===========
ما هو فكرة انها تقول وتنكر وترجع تنكر وتقول
دي مسخرة في حد ذاتها اصلا
زي ما عملت القضيه اللي فاتت
انا مش ها ادور علي كلامها لانها مالهاش مصداقيه
ابسط حاجه تقول كلام وتنكره
ومابين الاثبات والانكار
شهرة وانترفيوهات وسبوبة
تحياتي

بنت القمر يقول...

بلو ستون
=====بالضبط
هي دي فكرتي الناس كل يوم بتشتم وبتسب الدين
مش ها اقعد احاسب الناس
لكن وبغض النظر عن حقيقه نهي رشدي
يهودية ولا بتعبد رجل كنبه الثابت والاكيد انها قالت في حديث مصور دعوة للجهاد عن طريق التحرش
يبقي بذمة النبي دي بني ادمه حد يقول عليها ناشطه
واي نوع من النشاط الا اذا كان نشاط في خلايا الهطل في دماغها
ازاي تستحق تقود جمعية نسائيه
ازي تحمي المرأه وتدافع عنها
ازاي الناس تكون ذاكرتها قصيرة اوي كده للدرجه دي وتتضامن معاها الي حد التوقيع علي عريضه للنائب العام
ازااااي
؟؟؟
:(((
ايه الشعب ده
نورتي ولو ان الحال حالك القتامة
تحياتي

الخنساء يقول...

نفس المشكلة موجودة عندنا رغم أنه يفترض أن يكون الناس أوعى لمثل هذه القضايا ومثل هذه الطرق
محاولة ابتزاز رخيصة وتافهة والتعرض للتابوهات ليس بغرض إيجاد حلول أو بطريقة راقية إنما حديث عبثي ولمجرد الاستعراض وتهدف للشهرة أيضا

بعدها يتفاعل بعض أفراد المجتمع وتساهم الصحافة لدينا للأسف في تغذية وإثارة مثل هذه الحوادث وبعض المشايخ لازال يقع في نفس الفخ ويبلع الطعم ومن ثم يبدأ المرء في شق طريقه للشهرة بتمثيل دور المضطهد والمظلوم صاحب الرسالة والقضية وشهيد الرأي

تباً لهم!!

عين فى الجنة يقول...

مقدمة الموضوع جميلة وشاعرية بالرغم من التشاؤم الواضح
ملحوظة : شمعون ده دمه شربات

قلم جاف يقول...

ما يحدث في الحقيقة هو فيلم رامي الاعتصامي .. الحقيقي!

بنت القمر يقول...

وميض ابتسامة
==============
الجديد مزيد من السوء والتردي .......بس!:(

بنت القمر يقول...

الخنساء
==========
مش عارفه عندك حساب علي فيس بوك ولالأ
التعرض للتابوه في اي حين بيعمل صدمة
بس مش ده العيب العيب ان الناس ذاكرتها قصيرة جدا وعاوزة تنسي
لمجرد عداء البعض للمشايخ ان المذكورة شخصية افّقة وغاوية شهرة او مجنونه شهرة بكل المقاييس يعني...عاوزة تلعب دور المستنيرة مضطهدة بسبب فكرها التقدمي
تبا لهم وتبا للاغبياء
اشكر مرورك

بنت القمر يقول...

راجي
==========
هو في حاجه في البلد دي ما تدعوش للتشائم
:((
شمعون شربات انا عارفه بس انا برخم عليه
:))

بنت القمر يقول...

قلم جاف
==========
مشوفتش الفيلم
ممكن تحكيهولي:D:D

سارة درويش يقول...

اولاً الجزء الأولاني م البوست فوووووق فوق الرائع

ثانياً بالنسبة للمحامية فطبعاً دي ما تستحقش ان حد يرد عليها في التخلف اللي هي بتقوله دا لأن الرد ربنا قايله في ديننا من قرووووون والرسول عليه الصلاة والسلام قاله في أحاديثه الشريفة ، بالنسبة بقى للناشطين والصحفيين ياااااااريت تحطي جنبهم اصحاب موضات الاضراب ع الهايفة .. اصل هي دي مشكلة المصريين لما يشوفوا كشك بقال شغال حلو في شارع الشارع كله يقلب بقالة

غير معرف يقول...

عجبتني المقدمه جدا جدا جدا

صافي الود

كلام على بلاطة يقول...

عيد ميلادك عيدنا
عيد ميلادك عيـــــــــدنا والكل بيه فرحان
يا اغلى الغاليين يا احلا بشر وانســـــان
وجودك بيسعدنا يا من جاد به الزمـــــان
ويعطى لحياتنا طعم وريحة الفل والريحان
وصرت الاهم لنا ولا رمانه المــــــيزان
وبوكية ورد يغمر حياتنا بالحب والحنان
====================
عيد جوازك
====================
عيد جوازنا يا حبــــــــيبى عيد الاعياد
عشنا الحب حبة حبة وحـــــــبينا الولاد
اللى هيكملوا المسيرة ويصنعوا الامجاد
ونشوف نفسنا فيهم هدية رب العباد
وعيد سعيد يا حب عيد سعيد يا اولاد
نسعد فيه انفسنا واسرتنا والبلاد
وده طريق هنمشيه دون ارتداد
طريق الحب والخير
طريق الحب والاسعاد
فحافظ معايا على العطا والرضا والوداد

كلام على بلاطة يقول...

عيد ميلادك عيدنا
عيد ميلادك عيـــــــــدنا والكل بيه فرحان
يا اغلى الغاليين يا احلا بشر وانســـــان
وجودك بيسعدنا يا من جاد به الزمـــــان
ويعطى لحياتنا طعم وريحة الفل والريحان
وصرت الاهم لنا ولا رمانه المــــــيزان
وبوكية ورد يغمر حياتنا بالحب والحنان
====================
عيد جوازك
====================
عيد جوازنا يا حبــــــــيبى عيد الاعياد
عشنا الحب حبة حبة وحـــــــبينا الولاد
اللى هيكملوا المسيرة ويصنعوا الامجاد
ونشوف نفسنا فيهم هدية رب العباد
وعيد سعيد يا حب عيد سعيد يا اولاد
نسعد فيه انفسنا واسرتنا والبلاد
وده طريق هنمشيه دون ارتداد
طريق الحب والخير
طريق الحب والاسعاد
فحافظ معايا على العطا والرضا والوداد

قلم جاف يقول...

أنا ما شفتش الفيلم ، لكنه أثار حالة من الهياج لدى الاعتصاميين بسبب سخريته في أجزاء منه على الأقل من المظاهرات والاعتصامات ، وفكرة الفيلم عن شاب تافه يقرر العيش في دور المناضل السياسي حتى يكسب عدداً من الفتيات في صفه ، مطالباً بتغيير النشيد الوطني لأنه "ما بيسنجش معاه"..

ديمقراطية الاعتصاميين لذيذة مثل ديمقراطية الحزبوطني ، وكلاهما لا يرحب بأي نقد أو اختلاف .. وسلامات يا حرية سلامات يا ديمقراطية وسلامتها أم حسن..

أحمد سعيد بسيوني يقول...

انت قولتيها

فاشلة وبتدور لها على اهمية ودور

يا مراكبي يقول...

موضوع قيم يا بنت القمر

كلامك حقيقي ومؤلم في نفس لوقت

فبرغم أن أي مجتمع يعج بالغث والسمين .. إلا أن الغثاء أصبح الغالب والأعلى صوتا والأكثر حضورا وكما يقولون يركب أي موجة ترفعه لأعلى

وأصبحنا لا نجد السمين ولا نثق فيه أصلا إذا وجدناه وذلك لكثرة الغث

كله بيدور على أي سبوبة وخلاص

promise is promise يقول...

السلام عليكم
هذه اول زياره لى لعالمك الخاص تقبلى مرورى واتمنا لو نكون اصدقاء
بالنسبه للبوست فعلا كما تفضلتى
الفاضى يعمل ايه يعمل نفسه ناشط وصاحب قضيه حتى لو كانت القضيه دى تتنافا مع العقل او مع الفطره الربانيه
وده طبعا اللى جايبنا وراء فى ذيل الامم
تقبلى مرورى ولك خالص تحياتى
والسلام ختام

على باب الله يقول...

و الله معاكي في كل كلمة , و كتبت عن الموضوع قبل كده و قلت ها يقولوا علينا عواجيز الفرح ...

اللي عايز ينشط ينشط و اللي عايز يكتب كتاب فقيع يكتب اللي عنده إسهال شعري مش لاقي باكتة محلول الجفاف ينشر شعره في أي حتة

ده شيء مفروغ منه ...

بس المشكلة أن في نشطاء بيستغلوا المواقف و الأحداث لتحقيق مصلحة شخصية - مش مصلحة عامة - و هي الأساس في العمل ده أصلاً ... يعني الواحد من دول يشوف إضراب هناك يروح يقف قدام الكاميرات و يوزع على الغلابة إستيكرات و ممكن كمان يقول أن هو اللي منظم الإضراب

Mahmoud Ibrahim يقول...

هيا فعلا بتعمل فرقعة علشان تعيشها ثانيتين علي سطح المية بس أكيد هتغرق بسرعة
مفيش وقاحة تتغير بفعل أوقح منها
مرسي ع المعلومة وآه يا بلد

Knowledge Seeker يقول...

بنت القمر
تحيةعلى المدونة المتميزة، أول زيارة وكان هناك أحتمال أن تكون الاخيرة نظراً للاصابة بجلطات فى المخ مع شلل رباعى عقب قرأة هذا البوست ومشاهدة السيدة الناشطة
فقد أحتجت لعدة ساعات من الهذيان قبل أن أستطيع أن أتمالك نفسى
وصف السيدة الناشطة بما تستحق لن يسفر عن شئ، ولكن تقديم بلاغ للنائب العام حيث أنها تدعو بشكل علنى لجريمة وتحض على الفسق قد يكون حل مناسب
فالقانون لا يميز فى جنسية المجنى علية او عليها وانا واثق من وجود وسيلة قانونية لمعاقبة مثل هذه النوعية
@%^&$###@#%$!@&
السطر السابق بعض البخار المكتوم

Knowledge Seeker يقول...
أزال المؤلف هذا التعليق.
غير معرف يقول...

في 30 اكتوبر 2008 كتبت مقال غير حقيقي مفبرك تخيلي ردًا على ما فعلته نجلاء الإمام بنهى رشدي. وعنونت المقال بـ "محامية مصرية تشجع الشباب على التحرش بالاسرائيليات" ثم اليوم فقط تفاجأت انها ظهرت على شاشة العربية يوم 31 اكتوبر متبنية نفس وجهة النظر التخيلية هذه. لا أعرف إن كان ذلك مصادفة أو ماذا، لم أكن أعرف نجلاء الإمام وقتها ولم أكن أعرف عن نيتها تبني التحرش كطريقة للمقاومة، ولكن تبقى الفرضية ان دعوتها ليست دعوة أصيلة. توخوا الحذر أن كنتم ستكتبون شيئًا يخيليًا مثل ما فعلت انا، فمن المرجح أن يصبح حقيقي.

Here