السبت، أبريل 18، 2009

وعلي مصر السلام

لا جديد في اخبار مصر سوي مزيد من الانهيار والانحدار _الجرائد والتدوينات كفيله دوما بضخ المزيد من السوء يوميا
بلا ملل ولا انقطاع
كأنها تتآمر يوميا علي البقيه من الأمل لدي المصريين في اي غد افضل.
لكن بعض السئ هو فائق السوء... والتفوق هنا ان حتي لا نتفق علي سوءه
بل يكون مجالا للنقاش والتفاوض والاخذ والردثم سوء التأويل.
قضيتين الاولي هي: سلسة التنا زلات التي قدمها وزير الثقافه المصري
في مقابل الحصول علي الاصوات اللازمه لترشيحه مديرا عاما لليونسكو
اولا بسماحه للعازف دانيال بارنبويم اللاسرائيلي الفلسطيني الجنسية
ثم سماحه بانشاء معبد يهودي في الجمالية للطائفه اليهودية
حين ناقشت اصدقاء هل يحق للوزير الذي هو موظف عام في الدولة المصرية
يتعيش من راتبه الحكومي الذي تدفعه الخزانه العامة المصرية من ضرائب المصريين
اي ان الوزير هو "شغيل" بالأجرة عند عموم الشعب..
هل يحق له مخالفه القوانين علانية ليضمن له نهايه كريمه في العمل السياسي كمدير لليونسكو
هل يحق له الكيل بمكيالين ومن المعروف
انه تم تجميد عمل المايسترو احمد الصعيدي عقب سفره الي اسرائيل هذا العام
والمطرب ناجي البلتاجي رئيس قسم الغناء في الكونسرفتوار بسبب غنائه للجالية الاسرائيليه في مصر
المؤسف ان الجميع يتفقون علي ان تصرف الوزير هو مخالفه واضحة للقانون الذي يمنع التطبيع مع الكيان الاسرائيلي
لكن الاكثر سوءا ان يكون الاعتراض علي تصرفات الوزير"اللي هو شغيل" جوابه: وايه يعني لما نعمل معبد للجاليه اليهودية يعني اليهود مش بني ادمين؟؟
اليسوا أصحاب دين سماوي ؟ وفي بطانه الكلام اتهام بالطائفية!!
او ان يكون استضافه مايسترو اسرائيلي في ابتزاز صريح للدوله المصرية
ممثله في شخص الوزير للاسف ان تكون الاجابة ان فعلا المايسترو فنان عظيم وان حفله كان خياليا!!
.. سوء التأويل هنا يجعل الامر كارثيا في الحقيقه..
فلا اعترض بشكل شخصي علي انشاء المعبد ولا اي دور عبادة طالما ان الامر
خارج حسابات الصفقات السياسيه!
وغير خاضع للابتزاز.
وارحب بقانون موحد لبناء دور العباده_ ولكن ليس عن طريق الابتزاز والمساومات الخارجية.
الامر هنا مختلف كلية...هل نحن دوله حرة هل نقبل الابتزاز؟
هل نحتاج الي اخذ قرارات في صالحنا ليس عن قناعه ولكن عن طريق الضغوط الدوليه؟
اماالاكثر الاكثر سوءا بتفوق فهو فتوي الازهر بجواز زواج المسيار مع موافقه ولي الامر وحدده هنا"برئيس الجمهورية" ثم تراجعه عن الفتوي في اليوم التالي!
جواز المسيار الذي هو الوجه الاخر لزواج المتعه وهو الوجه الغير بعيد عن الدعارة الذي لا يستطيع الازهر محاربته
فلجأ الي تقنينه واجازته بعد موافقه ولي الامر والذي حدده بأنه رئيس الجمهوريه ثم تراجع عن تلك الفتوي في اليوم التالي
اي دعارة جائزة بين الزوج الليبي او الخليجي الغني والفتاه المصرية الفقيرة اصبح حلالا بلالا
وبموافقه السيد رئيس الجمهوريه وبمباركه المفتي!!
اعترف انه خدت كفايتي من الازهر دام عزة ولن الجأ الي طلب خدمه الفتاوي من علمائه
واني لن اتصل بخدماته المجانية وسوف استفت قلبي مهما افتوني
لكن في قلبي غصه شديده ومرارة اشد علي مصر في ادي هؤلاء
وعلي مستقبل اولادي في بلد هؤلاء هم سياسييها و وذلك هو مفتيها بكل اسف
لينكات....
تزيد السوء سوءا

هل يبكي فاروق حسني امام النصب التذكاري لضحايا للهولوكست
الموسيقار الاسرائيلي يدافع عن التطبيع
وزير الثقافه يغازل اسرائيل من الاوبرا
دار الافتاء تبيح زواج المسيار
الدين والديناميت عن نفس الموضوع

هناك 39 تعليقًا:

رئيس جمهوريه نفسى يقول...

امانى القاعدة بسيطة تمتع بالسيء فالقادم اسوء وعلى مصر السلام

DantY ElMasrY يقول...
أزال المؤلف هذا التعليق.
DantY ElMasrY يقول...

بخصوص موضوع ان الدولة تخضع للضغوط او الابتزاز
المعونة الأمريكية يا فندم مثال حى على طرقة تعامل مصر الرائدة الأبيه مع الضغوط
فنحن _مصر _نرفض الربط بين المعونة وشروط جماعات الضغط الأمريكية لأن كرامة مصر لا تسمح بقبول ضغوط
ولكن بعبقرية مصرية فريدة قامت مصر بقبول الشروط الأمريكية بشكل غير مرتبط بالمعونة
كما أنها قبلت المعونة بشكل غير مرتبط بالشروط

عبقرية مصرية

ذو النون المصري يقول...

انا لم اعد اتوقع ان اسمع خبر جيد عن مصر هذه الايام
و كنت منذ ايام اتساءل لقد مر حوالي شهر بلا حرائق و استغربت و كان مصر المفروض متخلاش من الحرائق حتي انتهي تفاؤلي الكاذب بحريق في اسواق قماش مؤخرا
و هناك اكيد حرائق اخري قادمة
تحياتي

إبراهيم شعبان يقول...

يا ريت الوزير الفنان يلاقي وظيفة للمفتى معاه في اليونسكو و كدة يبقى ربنا كرمنا ع الآخر

غير معرف يقول...

المايسترو اللى اتعزم يعزف فى الاوبرا اساسا اليهود بيعتبروه خاين و حتى معاه جنسية فلسطينية فخرية.

السيناجوج اليهودي فى الجمالية من حق اليهود المصريين غصبا عني و عنك لان ده حقهم اللى يكفله الدستور.

غير معرف يقول...

الحق معك .. ويبدو اننا نعيش زمان اللامنطق فى اى شئ

ومعك فى ان استفت قلبك وان افتوك فالقلب والاحساس لايخدع .. لانه نور البصيرة

اخيرا .. انا اريد ان آخذ رأيك فى شئ عندى

فهلا تفضلتى بالزيارة .. ربما تجدى شيئا يسرك

خمسة فضفضة يقول...

السلام عليكم ورحمة الله وبركاته

اي حاجه تطلع من شيخ الازهر او من وزير الثقافه ماعدتش باستغربها

ربنا يريحنا منهم الاتنين في يوم واحد


سلام

Tamer Nabil Moussa يقول...

السلام عليكم

لااسف عندنا بقى فى انحدار فى كل حاجة والحاجة الحلوة بقت نادرة جداا

الصديق القريب منا بقى عدو

والعدو بقى صديق لينا

ربنا يصلح الحال

تحياتى

يا مراكبي يقول...

برغم أن الخبرين المشار إليهما في هذا البوست بالفعل بهما مفارقات صارخة وصادمة إلا أنني أعتبرهما مجرد أمثلة بسيطة إذا ما قورنت بباقي السلسلة من الأخبار والمفارقات والتي تندرج كلها تحت العنوان الذي إخترتيه هنا: وعلى مصر السلام

فتحت هذا العنوان يوجد ألف دليل ودليل على أن مصر تهوي وبشدة نحو مصير مظلم حالك السواد

بنت القمر يقول...

رئيس جمهورية نفسه
================
اكيد القادم منيل



دانتي
=========
:D:D:D
حلوة

بنت القمر يقول...

نون المصري
========
كلنا هذا الرجل
موضوع الحرائق مرتبط بمافيا العقارات الجديده
لاخلاء العقارات القديمه والاستفاده من الارض والمواقع الهامه
بالاضافه الي سلسلة الاهمال طبعا
اشكر مرورك

بنت القمر يقول...

علي الصبي
=========
او يقعدوا هما ونسيبهالهم احنا
:D:D
اشكر مرورك

بنت القمر يقول...

بسطاويسي بيه
================
يعني ايه غصب عني وعنك؟!!
يعني مش انا قلت بلاش سوء التأويل
!!!
يا عم ما يبنوا ميت كنيسه وجامع ومعبد
ان شا الله بلاش الناس تسكن اصلا
ويعيشوا في دور العبادة لعلهم يهتدوا و يتهدوا...
ده اصلا ما يزعلنيش.
يا رب حتي نقلب البلد ساحات عامه للصلاة كل واحد ودينه..
الفكرة ان اولا مفيش لسه قانون ينظم دور العباده
يعني مفروض يكون في قانون عام للدوله مش تحت سلطه المحافظين او الرئيس او يكون منحه من وزير الثقافه
عشان يقايض عليه بمنصب!
تخيل يا بسطاويسي الناس مش عارفه انه في قانون يمنع التطبيع
انه اتحاد الكتاب والفنانين العرب بيوقع عقوبات علي افراده لو قاموا بالتطبيع مع اسرائيل
ميعرفوش حرب علي سالم بسبب شطبه من اتحاد الكتاب العرب بسبب زيارته لاسرائيل
مسمعوش عن ناجي البلتاجي ومشكله خالد النبوي لتمثيله في فيلم اسرائيلي
طب ده زنبي؟؟!
ولا ذنبهم.
!!!
عجيبه لما النقابات واتحاد الكتاب واتحاد الفنانين يحولوا اعضائهم الي التحقيق وتجميد العضوية
يبقي الوزير بيكيل بعشر مكاييل ولا لا
يا يلغو القانون ده يا يلتزمزا بيه
لكن خيار وفاقوس شيئ غير مقبول ابداً
اشكر مرورك يا سيدي

بنت القمر يقول...

شريف
=====
في الطريق لمدونتك...

بنت القمر يقول...

فضفضه
=========
او يريحهم من الشعب ويخربوها هما لوحدهم وبراحتهم
:(

بنت القمر يقول...

تامر نبيل
=============
اشكر مرورك


يا مراكبي
============
انا عارفه ان الخبرين ليسوا الاسوأ لكن ده تقييمي واحساسي الشخصي
ويمكن الخبرين دول تحديدا اكثر من غيرهم استفزني الفترة القصيرة السابقه
اشكرك يا عزيزي علي المرور

على باب الله يقول...

" زواج المسيار هو اللي ها يحل مشكلة العنوسة في مصر "

كلمة قالها شيخ على قناة تليفزيونية

----

كنت عايز أتصل أسأله ..
" بالمناسبة يا شيخ هو الإنسان مسيار و لا مخيار ؟ "

V.Hayat يقول...
أزال المؤلف هذا التعليق.
V.Hayat يقول...

تناولك لمصر وما يحدث فيها من وزير الثقافة للحصول على منصب مدير لليونسكو والتطبيع واللى بيحصل الناس كلها لا تحس بيه سوء طبقة معينة من المثقفين فى البلد واذا حكمت المحكمة لما يسمى بالبهائيين بشرطة فاليهود لازم يبنون معبد والباقى فى الطريق اما عن المسيار سمعتى عن الزواج الجديد اسمه الايثار ولسه فى الوناسة وربنا يستر عليكى يا مصر
ارجو قراءة ها البوستhttp://cafedeprestige.blogspot.com/2009/04/blog-post_17.html

تحياتى

عين فى الجنة يقول...

امانى : اولا لايوجد قانون يمنع التطبيع مع اسرائيل بل هو موقف شعبى غير رسمى
وفى رأيى فأن فاروق حسنى يمثل مصر الرسمية ولا يمثل الشعب باى حال من الاحوال ولو كان ثمن انه يبعد عننا ويروح اليونسكو هو زيارة المايسترو متعدد الجنسيات فمعلهش نبلعها المرة دى كمان من ضمن
اما جواز المسيار فهو حلال حلال حلال وبلاش تقطعوا علينا حنلاقيها منكوا ولا من مشيرة خطاب ؟
:))))

بنت القمر يقول...

حياة
========
عارفه ان في ازمه المعيشة ربما تبدو هذة المساوؤ والسيئات لا تضايق الا فئه من الناس في مصر ولا ازعم بأي حال اني من الطبقه المثقفه بل علي اقصي تقدير متابعه للاحداث
ولكن هذا لا ينفي سوءها وفداحتها كارثيتها
ولكن ينقلنا الي تذكر قسوة وشظف العيش الذي يعانيه المصريون فينكبوا علي تسيير امور حياتهم فقط
اشكر مرورك الكريم

بنت القمر يقول...

علي باب الله
=========
كلمه حق يراد بها الف باطل
مبروك رجوع مدونتك وظهورها علي ريدري مرة اخري
:))
اشكر مرورك

بنت القمر يقول...

راجي
=======
بخصوص قانون التطبيع معلش تاخد تاكس لحد ردي علي تعليق بسطاويسي كده وتقراه
بخصوص المسيار ومالو يا سيدي
ورينا الهمه!!
كل واحد بيشيل جوازة بتخر علي راسه
p:
نورتني

nael eltoukhy يقول...
أزال المؤلف هذا التعليق.
nael eltoukhy يقول...

سوري يا اماني
على سالم تم شطبه من اتحاد الكتاب، ورفع قضية ضد الاتحاد، وكسبها، وبعد كدا هو استقال،

ثانيا: لو كان فاروق حسني عضو في نقابة (المثقفين) ياخدوا اجراء ضده وهو ساعتها يكسبه، وكذلك الحال بالنسبة لنقابة التشكيليين او لاتحاد الكتاب، وهو طبعا مش عضو في اي منهم، فاروق حسني وزير مصري، وهو بيمثل الدولة المصرية التي لا يوجد اي شيء عندها ضد التطبيع

واقعة غناء جابر (وليس ناجي) البلتاجي برضه مش دقيقة، يعني ايه غنى للجالية الاسرائيلية، طبعا الاساس في الاحتفال كان اليهود المصريين (وليس الجالية الاسرائيلية في مصر)، وكان على راسهم رئيسة الطايفة كارمن ونشتاين وكان هناك اسرائيليون، وداطبعا مايعتبرش تطبيع، الا لو اعتبر السايس اللي بيقول للسفير الاسرائيلي كل يوم صباح الخير هو مطبع، هل لما تسلمي على واحد اسرائيلي دا هيعتبر تطبيع؟ ولو يعتبر تطبيع، فكان لابد من عقد لجنة لاثبات ان جابر بلتاجي لما شاف الاسرائيلي قال له هاي، او ان الاسرائليي لما قاله هاي هو رد وقاله هاي، لانه ممكن اوي يكون شافه ودور وشه، بعد ما يثبتوا انه قال هاي، عليهم انهم يحددوا اذا كان دا تطبيع ام لا، وعلى العموم ف كل الاحوال فاكيد هو مش "غناء امام الجالية الاسرائيلية في مصر"

عين فى الجنة يقول...

بردو يا امانى لا يمكن يكون فى قانون يمنع التطبيع ، ده يبقى تناقض دستورى ، منين فى معاهدة سلام ومنين مجلس الشعب يصدر قانون يلغى المعاهدة وينسفها من الاساس ؟
قد يكون هناك لائحة داخلية فى اتحاد الكتاب تمنع تعامل ادباء مصر مع الكيان الصهيونى وهذه قصة اخرى
ولكن هناك فعلا قانون فى بعض الدول العربية ومنها الكويت صادر فى الستينات يمنع التعامل مع العدو الصهيونى
ولكن فى مصر فأن معاهدة كامب ديفيد الغت حالة الحرب وفرضت على مصر التطبيع مع اسرائيل

محمود المصرى يقول...

بسم الله الرحمن الرحيم

بالنسبة لموضوع قانون موحد لدور العبادة دا يحتاج لكثير من التأنى خصوصا ان بناء الكنائس والمعابد لا يأخذ طابع دينى فقط انما له فى العادة اعتبارات واهداف سياسية كما ان الرجوع الى القواعد الشرعية فيها امر حتمى .
اما بالنسبة لزواج المسيار فهو يختلف عن زواج المتعة , فزواج المتعة ما يميزه هو اجل محدد اما المسيار فاختلافه فى حق المبيت والسكن , أما كل الاركان الشرعية فهى متوافرة , وبالتالى لا يصح ان نحمل بهذا الشكل عليه , اما موضوع انه هايسهل على الخليجى انه يتزوج المصرية فعذرا هذا لا يستقيم لأن الشرع اشترط موافقة الولى , ولو الموضوع الفلوس وبس صدقينى فى ناس بتبيع بناتها من غير زواج لا مسيار ولا متعة حتى .
بالنسبة لفاروق حسنى لا اتذكر له موقفا محترما واحدا طول عمره مستواه ادنى من ان ينتظر منه مثل هذا الموقف , اما التطبيع فلا اعلم ان فى مصر قانونا يمنع التطبيع , امال الكويز تبقى ايه ؟
وفى النهاية لا اجد ادنى مقارنة بين زواج المسيار والتطبيع مع اسرائيل ثقافيا .

بنت القمر يقول...

نائل
=========
اولا نتفق علي نقط محددة.. يعني انت بتقر اهه انه في اجراء عقابي اتخذه اتحاد الكتاب العرب ضد علي سالم ولو انه استطاع انه ياخد حكم لصالحه
وكذلك ما تم من مسائلة
من اتحاد النقابات الفنيه ضد خالد النبوي بسبب مشاركته في فيلم اسرائيلي
وكذلك ده الموقف المعلن من النقابات المصريه
يعني انت عندك هنا موقف مزدوج بين ما يسمي "نبض الشارع" وبين موقف الدوله الرسمي اللي التزم بمعاهده السلام.
يعني اللي انا شايفاه انه في جهة" ما "اتخذت اجراء ضد شخص ما بسبب فعل ما
الجهة دي سواء اتحاد الكتاب او النقابات الفنية بسبب ما يسمي انه فعل تطبيع!!
انت ممكن تختلف بقي وتقول هل تاجير الفنادق تطبيع ام لأ؟؟
هل الخدمات اللي بتقدمها شركات السياحه تطبيع او لأ؟
هل المطاعم اللي بتقدم أكل للاسرائليين تعتبر مَطَبِعةام لأ؟
ممكن كل ده يبقي اسمه تطبيع او لا تطبيع. ونعرف التطبيع ونحدد طبيعته
:)عشان نقدر نقول اللي عمل كيت وكيت يبقي طبّع وكيت وكيت مش تطبيع.
اللي يهمني هنا
ان الوزير اتخذ اجراء"عقابي" وحط خطين تحت كلمة "عقابي" دي ضد البلتاجي والصعيدي بسبب قيامهم بعمل ما هو اعتبره تطبيع!!!!
ودي مفارقه غير مفهومه ابدا بالنسبه لي واهديك الرابط التالي عشان يكون كلامي مفهوم
التطبيع ليه توقيته{لا يمكن للناس أن يغنوا ويرقصوا ويشاهدوا المسرح معا وسط الدماء والأشلاء والاعتداءات الإسرائيلية اليومية على الشعب الفلسطينى الأعزل فى غزة والضفة الغربية".}
{=========
2-ن وزير ثقافة مصر يجب أن يكون دائما مع نبض الشارع المصرى والعربي، ومعبرا عن جموع المثقفين والمبدعين الرافضين للتطبيع مع إسرائيل فى الوقت الحالى.
==========
يعني الوزير عارف كونه انه وزير "ثقافه" مش وزير تموين ملزم علي الاقل ادبيا بعدم التطبيع_انحيازا لنبض الشارع.
لكن ممكن هنا نرد وتقول لي طيب يمكن هو مش عاوز يلتزم بنبض الشارع ويفضل يلتزم بالموقف العلني من الدوله المصريه الملتزمه بمعاهدةالسلام
وبرضه هنا يكون عداه العيب لكن في حدود ان القانون والقواعد تكون علي الجميع وتنتفي شبهة المصلحة!!
لكن لما الوزير "يستوسخ" عفوا يعني...
ويستعمل القانون ضد موظفي الاوبرا علي هواه
وبعدين يطبق القانون في الدرج مرة تانيه برضه علي هواه عشان حابب ينهي مستقبله السياسي بمنصب دولي يبقي شيئ سخيف ومخزي
انه يخضع للاملائات عشان مصلحته شيئ مخزي
كان ممكن احترم الوزير لو اجبر النقابات واتحاد الكتاب والنقابات الفنيه انها تلغي ما يسمي اللاتطبيع عن قناعه بانه مفيش فايده
او ملوش لازمه
او ان عدم التطبيع ليس حلا
لكن الرقص علي الحبال شيئ مخزي جدا
ممكن يقبله كشخص علي نفسه ولكن لا نقبله نحن كأفرادوكمصريين.
نورتني

بنت القمر يقول...

راجي
======
معلش المرة دي التاكس في اتجاه ردي علي نائل الطوخي
معلش التاكس علي حسابي
:))

بنت القمر يقول...

محمود المصري
==============
لا يا محمود المسيار اصلا عملوه الخليجيين عشان يحلوا مشاكلهم بالنسبه للطلبه المغتربين في بلاد"الفرنجه والكفار" يعني الواد الخليجي بدل ما يصاحب بنت خواجايه اثناء بعثته يعيش معاها او تعيش معاه لحين رجوعه
ثم تطور الي زوجه موقته يسير اليها الزوج في غير البلد التي يقيم فيها
يعني الموضوع ابتكر لحل مشكله للرجل وفي نفس الوقت بيمثل حل لمشكله العنوسه في دول الخليج
طبعا انا مش بفتي هنا_لكن مهم اوي اقولك تعال بقي اتخيل الوضع في مصر
الخليجي اللي عاوز يقعد شهرين الصيف مع "ست" وبالحلال ياخد فتاه لطيفه من العشوائيات ويرمي لابوها 5 او 10 الالاف جنيه لمده الشهرين او يسافر ويسيبها معلقة
انت بتقول الناس بتبيع بناتها
وانا اقولك يبيعوهم احسن ما تضحك عليهم وتدي للاب رخصه شرعيه للبيع
يعني يرفع راسه في منطقته وقريته انه بنته متجوزة راجل خليجي
واكيد سمعت انه في ظل الفقر والجهل في بنات بالالاف بيستخدمهم سماسرة الاجساد
يجوزوهم برضه وبحضور ولي اشخاص عرب ولا يتم الطلاق ثم تتزوج اللي بعده واللي بعده"عشان الحرمانيه يعني:D
وقد لا تنتهي عدتها وتكون في الصيف الواحد اتجوزت تلات اربع ازواج
- نقطه تانيه لاحظ لو انت بتتكلم عن الشكل الشرعي وهو التفسير الذي قيل في حرمانيه جواز المسيارانه برضه جواز المحلل سليم شكلا شرعيا ولكن لانه ينتفي فيه غرض ونيه الاستمرايه يعتبر عير صحيح وحرام
نورتني

nael eltoukhy يقول...

قد ايه رسالتك للحب والسلام جميلة

وانا معاكي يا اماني، اتمهنى ان الدولة ماتادش اي موقف ضد علي سالم او احمد الصعيدي، علشان لما تستقدم بارنبويم تبقى متسقة مع ذاتها، وعلشان كل الكلام عن التطبيع والمقاطعة بقى هوس مصري تافه جدا، وفاشل جدا

متشكر اوي يا اماني لانك بتفكري زي ما بافكر بالزبط :)

محمود المصرى يقول...

بسم الله الرحمن الرحيم

زواج المحلل محرم بنص شرعى حضرتك , ولم يقل احد بجوازه مطلقا , وبالتالى لا يجوز قياس زواج المسيار على زواج المحلل , اما كلام حضرتك عن عدم انتهاء العدة فدا فيه مخالفة شرعية سواء فى الزواج العادى او فى زواج المسيار .
واللى بتتكلمى عنه حضرتك ان واحد بيقضى شهرين الصيف وعاوز واحدة يتجوزها دا بقى زواج متعة وليس زواج مسيار , لأنه معلق بفترة زمنية , وبالتالى ماينفعش نقول ان فتوى اباحة زواج المسيار بتسهل الاجازات على الخليجيين وبتشجع السياحة .
وبالنسبة للكلام اللى حضرتك تتخوفى منه دا مش محتاج فتوى بخصوص زواج المسيار لأنه ببساطة الكلام دا بيحصل فعلا ولا علاقة له بزواج المسيار مطلقا .
وحقيقة انا مؤيد جدا لما قاله الشيخ يوسف القرضاوى فى هذا الشأن بأنه لم يدعو ولم يشجع ولم يؤيد زواج المسيار لكنه يرفض ان يخالف ضميره ويبيع دينه ويحرم ما يعتقد انه حلال , وبرضه نذكر ان هناك علماء افتوا بحرمة زواج المسيار لأنه لا يحقق الاهداف الشرعية للزواج من السكن والاستقرار وحسن تربية الاولاد وعلى رأسهم الشيخ ناصر الدين الالبانى .
يعنى بصراحة موقف المفتى او شيخ الازهر فى هذا الصدد ليس مستهجنا ولاهو محل نقد وبرضه اؤكد على ان الامور الشرعية البحتة كهذه يجب ان نرجع الى الاحكام الشرعية واقوال العلماء وليس مجرد التحسين والتقبيح العقلى لأن التحسين والتقبيح العقلى ليسا من مصادر التشريع , مع احترامى طبعا لراى حضرتك .
تحياتى

مـحـمـد مـفـيـد يقول...

السلام عليكم
بخصوص الاكونت اتمني ان يكون أطمأن قلبك
:))
بخصوص الموضوع المثار
فقد فقدنا الاحساس بالدهشه في هذه البلد
فدائماً ما تأتي الاخبار منها بمصائب تلو الاخري

tamer.sala7 يقول...

هييييييييييييه الله يرحمك يا عم مجاهد

علي رأي الشيخ حسني

(عالم وسخة)

عَبْدو المَاسِك يقول...

http://neblarewiew.blogspot.com/

Unknown يقول...

هو فاروق حسنى دا كل شوية يطلعلنا بحاجة جديدة
مش عارف بجد الراجل دا مش هيجيبهاالبر ولا ايه ؟؟
بجد انا زهقت منه ومن كتر كتاباته من ساعة موضوع الحجاب ولحددلوقتى

ربنا يسترهاعلينا وانا اسف للنرفزة بس مش عارف اعمل ايه بجد

تحياتى على البوست الجميل
والمؤثر فى نفس الوقت
والمدونة الجميلة

ديو

غير معرف يقول...

عزيزتى بنت القمر

أرسلت اليك ميل .. ارجو ان يكون قد وصلك

محمود محمد حسن يقول...

من اراد ان ينظر إلى بلد ينهار فلينظر إلى مصر ،

انا كل يوم بشوف البلد دي بتنهار ، كل يوم بشوف الشعب ده بينهار اكتر واكتر ، والبلد بتنهار اكتر واكتر