الأربعاء، أبريل 21، 2010

صباحات خاسرة

من الممكن تصحي الصبح رغم ان قلبك حزين وتطل برا الباب ياخدك الحنين, تحط الشاي عالنار تحس قلبك مقبوض تقوم تقول اصلي الصبح عشان يبقي نهار نادي وربنا يصرف الشياطين ويلطف بالمستخبي او تكون في حال اشد تهنيجا فتأجل لحد ما الويندوز يحمل وتن تن تان. هنا بيبدأ طريقان في التفرع قدامك طريق انك تبدأحياتك بسماع الاخبار في الخلفية جزيرة او بي بي سي ارابيا وتبدأتفر الجرايد تعرف اخبارالبلدعفوا "الفر" تعبير بائد يدل علي تتابع التصفح لكن حاليا التصفح الاليكتروني يعفيك من مهمة التخلص من اوراق الجرائد. ماذا يحدث الان اعتصام الحد الادني من الاجور سجالات جميلة اسماعيل ضد اللواء لوقا بباوي .مني الشاذلي تحدث ساويرس بصيغة الجمع خضرتكم سيادتكم....ما فعلتموه..بلابلا بلا

جانيت عبد العليم اصبحت بطلةالكدمات ظاهرة عليها ومستقبلها كناشطة سياسية عظيما ممهورا بخربوشتين وكدمتين فلنركن جانبا موضوع علاقتها باسرائيل او الوشايات الحاقدة حول مكتبها للتنصير لاشي يهم الفتاة بطلة مصرية صعيدة شهمة في قباله رجل مكروه تماما اللواء بباوي..

تشعر بالغثيان بالطبع بعد ان وصلت ربع الطريق. لكن يجب ان تبقي ملما باخبار البلد تتابع حملة مقاطعه اللحوم تلوث المياه حملة ميلودي الجديدة احنا بنعمل فلوس يا حبيبي.. السيد مصطفي الفقي يصف مستر جمال مبارك بالرجل الاكثر شبابا ولمعانا فيرد عليه جمال فهمي بمقال يسخر فيه ن فكرة اللمعان الورنيش لا يلمع المخلوق منطفئا ويعطي السيد مصطفي شلوتا يستحقه فتسأل نفسك كيف ينظر السيد جمال الي وجهه كل صباح

حسنا هذا يكفي جدا اللعنة والسحق علي الجميع..!

الدش الحار جعل راسك يغلي مع غليان براد الشاي الذي تصبه علي عجل ترغب ان تنسحب من تلك البالوعة الكبيرة المسماة بالوطن تبحث عن موسيقاك المفضله تبحر في اليوتيوب العظيم بحثا عن آلتك المفضلة فتكتشف موسيقارا عظيما او تعيد قراءه دواوين شاعرك المفضل للتمنح مفاصلك مساحة للاسترخاء ولتلون لوحتك الصباحية القاتمة

تصعد برجك العاجي وتحكم اغلاقه علي ذاتك انت الان آمن..تعرف ذلك انت بعيد عن الدنس تشرب الشاي باللبن تسمع موسيقي وتقرا شعر ربما ايضا تعثر علي رواية قيمة رشحها قريبك فتجد ها امام في الفضاء السيبري العظيم مهداة اليك من السماء

في الحالتين انت غير راضي عن مكانك ..عن صباحك

هناك 10 تعليقات:

محمد الهنداوى يقول...

السلام عليكم يا امانى
مش ان قلتلك على الحل فى البلاعه دى؟
مالها ليبيا يعنى :)
بالنسبه لجانيت دى وحكاية علاقتها باسرائيل او التنصير فالست اتخربشت, انتى عاوزه ايه اكتر من كده
اللى بيحب مصر اكتر من جانيت يتفضل يتخربش زيها
وبعدين الخربوش يجُّب ما قبله:)
الراجل ابو لمعه بقى اللى قال عن جمال كان مصطفى الفقى مش انس الفقى, هو صحيح كله فقى بس تفرق
الاشكال اللى طفت على السطح اليومين دول باسم مكافحة الديكتاتوريه هما اصلا نتاج الديكتاتوريه والفساد لان الفساد يخرج من الامم اسوا ما فيها
يوم ما يبقى فيه عدل وحريه ويارب يبقى قريب كل واحد هيحفظ مركزه

فاتيما يقول...

وحشتينى يا أمانى


صباحك هذا
كصباحات مشابهة
تنتابنا جميعا

كئيبة و قاسية و فارغة
رغم كل الصخب اللى فيها

و بنهرب منها للى بنحاول
نعدل بيه هذا المزاج المتعكر

اما بالموسيقى
او القراية
او الأنعزال عن اى مظهر حياتى ممكن يرجعنا تانى للدوشة ووجع القلب

كأنك بتوصفى حالنا بالمللى
يا حبيبتى


انا قولتلك انك وحشتينى
صح؟

حسن عثمان يقول...

ترغب ان تنسحب من تلك البالوعة الكبيرة المسماة بالوطن

تعبير قاسي جدا، أعتقد إن كلمة الوطن مظلومة في الجملة دي، انا عارف إن المقصود بيها وضع البلد والحالة الجميلة إللي إحنا فيها، بس كلمة الوطن هنا صادمة شوية.

راجى يقول...

دى ازمة كل المثقفين ، كل واحد عاوز يعمل مسافة بينه وبين الواقع ولكن هذا يدخل تحت بند المستحيل
مرحبا بك بعيدا عن الفيس بووك

Fatma Ali يقول...

جميلة جدا و مؤلمة جدا

ترغب ان تنسحب من تلك البالوعة الكبيرة المسماة بالوطن

محمد عبد الغفار يقول...

هينسحب يروح فين !!! ده فى الدم

يا مراكبي يقول...

ترغب ان تنسحب من تلك البالوعة الكبيرة المسماة بالوطن

من أدق التعبيرات التي سمعتها وهي تصف الحال المصري الراهن .. حقيقة واقعة للأسف

الجــــيرة والعشــــرة يقول...

أعتقد إن كلمة الوطن تدل على أنقى وأصفى شئ يربطك بالمكان، وهي على ما أعتقد لا تمت بصلة بأي ظروف وقتية صعبة تمر بها البلد.

لاتزال كلمة وطن ترتبط أكتر بالمشاعر النقية الصافية والتي تذكرنا بأيام الطفولة، والدراسة، والعلاقات العائلية الجميلة والترابط مع الجيران.
بخروجة جميلة مع الأصدقاء، وارتباطها بالأماكن والأجواء.

لذلك تعبير كلمة بالوعة بعيد تماما عن المعنى الأصلي لمعنى الوطن، على الأقل بالنسبة لي :)

IBN BAHYA - إبــن بهيـــــــــــــة يقول...

السلام عليكم
وحشتوني جيت أشوف إيه أخباركم كلكم بسرعة وراجع ... يا أحلى حاجه في مصر ... أرق تحياتي

فاتيما يقول...

غطستى تانى يا أمانى ؟؟


طب انا بس بسلم و همشى اهو

سلام يا نور القمر