الأربعاء، أغسطس 15، 2007

كوز ذرة ...... لكل سكندرى


ماذا يحصل اذا فوجئت بانك انتتقلت بقدرة قادر من قلب المدينه الى قلب الريف فجاة وعلى باب بيتك تتراقص اعواد الذرة.... ازاى ؟ بعد حمله التغييرات العجيبه على يد محافظ اسكندريه الجديد من شيل الاسفلت وباسفلت اخر لايفرق عن سابقه ونزع الارصفه الرخاميه بالاوانهاالابيض والاسود الجميل الى اخره رماديه باهته وغريبه والواحد يقول يمكن عندهم وجهه نظر نستنى ونشوف يمكن عندهم تصور ولكن!!!ا
فوجئت امام البيت على احد اكبر شوارع الاسكندريه الرئيسيه بكائن اخضر صغير ينمو داخل حوض زرع عملته المحافظه بداخله شجرة صغيرة وبائسه هى كل ما لمحته من تغييير ايجابى بعد كل الملايين اللى اتصرفت بسبب ومين غير سبب

المهم فوجئت بالكائن الذي ينمو بسرعه البرق حتى اصبح حوالى 60سم فقلت فى ذات نفسي ايه البرسيم اللى ادام العمارة دا يارب!!! ومين زرعه فى الحوض بتاع الشجرة وسألت البواب:يا عم فلان ايه اللى جاب البرسيم دا هناقال لى برسيم ايه!!!! دا درة ياهانم!!! !!ا
قلت:ازاى درة ومين زرعه وفوجئت ان كل الاحواض مليانه بنفس الكائن درررة
قال :دا الحكومه حاطاه تزين الشارع
يا ربي درة يزرعوا الشارع درة
ونزل سيل على راسي من الافكار ليه وازاي ومين؟
كوز درة لكل سكندري
يمكن من باب الترفيه عن السكندريين
او اسد الفجوه الغذائيه باعتبار الاسكندريه صنفت من اغلى المحافظات
كوز درة بمناسبه المصيف
مش عاوزين تحشوووة خللوووة على راي" عادل امام
فين الورد؟ فين الياسمين؟ فين النخيل الجميل؟
للدرجه دى اتعدم الزوق ؟؟؟ للدرجه دى وصلنا الى حاله من التبلد؟
نزرع درة على الشوارع الرئيسيه!!ا
يمكن عشان اللى عاوز يلبد فى الدره يلاقيه متوفر فى كل حته
مين المسئول الغير مسئول عن هذا القرار
يا خسارة على الزوق يا خسارة

يا خسارة يا اسكندريه!!!ا

هناك 20 تعليقًا:

mohand يقول...

السلام عليكم

:D:D:d
الذره احسن من الكوسه
يمكن يحصل تغيير في البلد


بس سؤال تساليه للمحافظ

اشمعني الذره
ليه ميكونش قمح مثلا؟

شـــــهــــروزة يقول...

هههههههههههههههه
درة؟؟

ويا ترى المحصول حيطلع مشوى ولا مسلوق ولا فيشار ولا حيوفروا علينا ويطلع دقيق مطحون جاهز؟؟؟؟


انا عندى تصور من المحافظ الجديد ومصمم الحدائق اللى شغال تحت ايده

دول منايفة أو كفاروة يا بنتى

يعنى من المحافظات الزراعية
وبما أنهم زراعيين طحن
يبقا ميعرفوش غير الدرة
والقصب
والبصل



واحمدى ربنا انها جات عالدرة
ومكانتش قصب او بصل

نياااهااهاااااااا

مسخررررررررررة

اسكندراني اوي يقول...

ههههههههههههههههههههههههههههه
ضحكتيني
والله ضحكت اصل احيانا شر البليه ما يضحك
اله يرحم ايام المحبوب
انا مش في اسكندريه عشان كده مش عارف ايه اللي بيحصل
بس برضه فكره ممكن الموسم الجاي يزرعوه سمك بوري
هههههههههههههههههههههه
عجبيييييييييييييييييييي

بنت مصرية يقول...

بنت القمر
بعديا عن موضوع الدرة ،لو انه جوع الواحد بردو :)) انا عايزة اقولك انى مبسوطة بيكي جدا، وياريت نكون اصحاب :)))

بنوتة يقول...

ههههههههههههههههههه
يعني بجد حاجة تموت من الضحك بجد ولاهي
تحياتي

بحرينية يقول...

ههههههههههههههه
ذرة !!!
بس خلينا ننظر الى الجانب المملوء من الكأس
يعني الحكومة زرعت المساحة احسن من ان تخليها فاضية
:p
و اللحين يبتدي دورج الوطني كمواطنة مصرية و هو
انج تتغدين و تتعشين و تتريقين ذرة
شكرا لج يا بنت القمر على البوست
:)

بنت القمر يقول...

مهند
اهلا بيك تانى مرة للدرة سبع فوايد ناكله مشوى وفشار وسلطه ونستخبى فيه كمان لكن القمح لا نشحته من برة احسن بطعم الخنافس مستورد بقى
تحياتى
شهرووووووزة
اهلا ياقمري لامنايفه ولا كفاروة دول ناس طيبه اعتقد انهم من... ولا بلاش على رايك احسن من البصل ماهو مفيش حاجه غريبه دلوقت فبلدنا
اسكندرااااانى
سمك بورى دا انت طيب اوى دا كدا يبقى بيحترمونا بس لقد نما الى علمى ان المحصول الجاى وترشيدا للنفقات ممكن يكون بساريا وزفرة كمان!!!ا طالما البلد هايصه ومفيش محاسبه عجبت لك يا زمن

بنت القمر يقول...

بنت مصريه
اهلااااااا يا ميت مرحبا نورك زاد على الكهرباء
طبعا احنا اصحاب يا زوزو بس تاكلى درةبرضه؟؟؟؟وانا كمان مبسوطه منك وبعزك بس انتى مبسوطه منى ليه؟؟؟

بنت القمر يقول...

بنوته اهلا يا قمر اة والله

بنت القمر يقول...

بحرينيه
لا لو نصف الكاس ها يكون مليان درة انا افضل النصف الفاضى اما عن دوري الوطنى فعندك حق ممكن نستبدل التلات وجبات بالدرة بس هما يكملوا جميلهم ويعملوووة فشار
اهلا بيك نورت المدونه عقبال ما تنوري اسكندريه

momken يقول...

ايه مش عجبك الدره ممكن نقولهم يزرعوا تين شوكى واهى كلها سبوبه ناكل ممنها عيش
ولو عملتى كده تانى انا ممكن اكلم الاستاذ البشمهندز المحافظ يعمل ساقيه قدام بيتكوا علشان تسقى عود الدره
وعلى فكره انى مسئوله عن كوز الدره الى هيطلع فى العود حبايه حبايه

انتى بتتكلمى على عود دره
انا من اربع شهور نزلت اسكندريه اصلها بلدى اصلا معرفتش امشى فى ولا شارع كل الشوارع مفحوته وبايزة
اهو اتحسدنا
تحياتى

عصفور المدينة يقول...

الذرة ده لزوم لو حد عايز يلبد لحد في الدرة

He & She يقول...

Hey Bannoota. This is my first time to visit your wonderful blog.I am so I dont have an arabic keyboard. I am Eskandarani also. I lived all my life in Chatby before I went to USA on 1990. Dont talk about Alexandria, you didnt see it 20 years ago. it was horrible in everything. There was no single one of those new wonderful bridges. The streets were dirty, the cornich was narrow and crowded. it would take us 3 hours to go to Ma3moora and one hour to get from chatby to the national park ( el hadika el dawleya) Last time I visited Alex. was on August 2004 and it was like Italy. everything was Perfect so be a good girl and dont complain

فى القلب يقول...

بجد بجد أنتى بتتكلمى جد دره
هى حصلت دره
دى تبقى كملت

ولا يا أختشى بلاش نظلم الخلايق
يمكن عايزين يحلو أزمه القمح
فهيصنعوا العيش من دقيق الدره
السكندرى
ياندشتى أدينا يا أختشى كنا هنظلم
سياده البيه المحافظ ربنه يعزه هو وأسياده

لعب عيال يقول...

واضح ان التغير وصل الاسكنرية فعلا!!!

اسكندراني في الغربة يقول...

انا كدة عندي مشكلة
انا اصلان عليا تار
بس محدش كان عارف يخدة مني علشان مفيش مزارع درة يلبدولي فيها
بس بالطريقة دي مش حاعرف امشي في اسكندرية
-------------
يا ترا ممكن يزرعولنا جوعضيد؟؟؟
---------------------------
منة لله الي كان السبب

بنت القمر يقول...

ممكن
لو الحكايه حسد يبقى عين الحسود فيها عود....درةههههههه----------------
عصفور المدينه..... اهلا بيك اول زيارة دا على اساس ان البلد كلها ها تلبد لبعض ياوقعه سوخه
في القلب يا مرحبا يا مرحبا واحنا نقدر نقول حلجه غير ربنا يعزة ما احنا بقينا حقل تجارب على راي شهروزة كويس ما زرعوههاش بصل
_____________________
التغيير وصل وباس الغييير...اهلا لعب عيال نورت البلوج
______________________
اسكندرانى فى الغربه
خخخخخ عليك تار يبقى ها تتجاب ها تتجاب الدرة ماليه البلد والمكان محاصر
الا والنبي يعنى ايه عضيد
تحياتىللجميييع

Alexandrian far away يقول...

دره؟!!!!!!!!!!!!
لا يكونوا بعد ما يزرعوه ناويين يلبدوا لنا فيه
يا ليله مش فايته
يعني الحكومه ناويه تلبد لنا في الدره كمان؟
أنا رأيي كل مواطن سكندري يزرع قصب قدام بيته ونلبد لهم أحنا كمان في القصب
ويا أحنا يا هما
دره؟
طيب قمح شكله ظريف
لكن دره دي جامده قوي
هو المحافظ الجديد بيضرب أيه ولامؤاخذه؟

aliwa يقول...

يا ستى كويس انة وصل معاكى لمرحلة الزراعة احنا بقة نفس المحافظ اللى عندكو كان عندنا هد البلد كلها وسابنا منغير اسفلت زى اللى كان موجود ولا حتى لحق يزرع الدرة الا با المناسبة هتلمو المحصول دة امتى نفسى اكل درة زورونى فى مدونتى ربما تجدوا ما يسركم

mohamed يقول...

هو ده الفكر الجديد اللى بيتكلموا عنه