الأربعاء، ديسمبر 12، 2007

ايوة خدااااامه

نقلا عن جريده الوسيط السكندريه العدد الحالي والسابق
********************************
فورا لمطرب مشهور عامله نظافه لديها خبره برعايه الاطفال والمسنين واعمال المنزل
راتب1500جنيه تليفون 5522453/0104697605
*****************
فورا لشيخ اماراتي عامله نظافه جاده تجيد اعمال المنزل والمطبخ بمرتب2000 جنيه ت0121108560
**********************************
مطلوب لاسره عربيه عمله نظافه للعمل بالقاهرة والغردقه يشترط تفرغ راتب 2000 جنيه ت
0121108560
******************
فورا لنجمه سينمائيه عامله نظافه 1800 جنيه تجيد رعايه الاطفال ت0182603122
********************************
شيخه كويتيه تطلب فتاه تجيد اعمال المنزل بمرتب مغري جدا جدا ت0121122709
مع الاعتذار لصديقتنا تمر حنه
وبدون تعليق!!!ا

هناك 38 تعليقًا:

karakib يقول...

و دي اعلانات تانيه من الوسيط
--------------
فرصة لن تتكرر ... قسط سيارة جاجوار بدون مقدم ب 30 الف جنيه فقط شهريا
---------------
عنها ما اتكررت !!
------------------
ببغاء زنجباري مؤدب ب 3000 جنيه فقط
----------------
امال لو مش مؤدب بكام ؟
----------------
قصر لعظيم بانوراما علي النيل 28 غرفة نوم 10 ريسبشن علي مساحة 2000 متر مربع
----------------
لم يذكر عدد الحمامات في القصر للاسف ما اقدرش اقعد في واحد اقل من 400 حمام و يكون 200 منهم بلدي !
----------------------
كلب جريت دان مشمشي في بحلقي ب 14000 جنيه
-----------------
اساسا الجاموسه الحلوه المربربه كده تسوي من 5 الي 6 الاف جنيه
و الخرفان كتير و رخيصه برضه
--------------------

اخيرا
الدكتور بيتخرج من كلية طب بياخد 150 بونيه في الشهر بس
و المهندس بياخد 120 بونيه في الشهر
تلاقيهم وشهم ورمان كل اخر شهر
-----------

اسكندراني اوي يقول...

اه ياااااني

نوقو بقى على الناس
وماله لما مديره منزل تاخدلها 2000 جنيه
مش مديره
وش بيجز على سنانه
لا وشوفي كراكيب كاتب ايه عشان تبقى ذبحه ونقطه

ذو النون المصري يقول...

انا باشتغل مدرس بالتربيه و التعليم من ثلاث سنوات و دي الرابعه نصها قرب يخلص و لو كنت اعرف ان الشغل في التدريس بالشكل ده مكنتش فكرت فيه
لاني اكتشفت ان شغلتي اتقلبت من مدرس لمرمطون
الواحد بيعدي في الاسبوع علي اكتر من 700 تلميذ و الراتب بعد الكادر يادوب عدي ال300 جنيه بالعافيه

None يقول...

فعلا لا تعليق

واللي هايقول ان الستات متستتين وواخدين حقوقهم تالت ومتلت تاني ..هاخرم عينه والنعمه


علي جمب معلش: تعليق كراكيب خلاني وقعت علي الارض من الضحك

فعلا هم يضحك

تحياتي ياقمر :)

mohand يقول...

السلام عليكم


يا سلام

تصدقي اعلانات مغريه


الواحد ممكن ياخد اجازه بدون مرتب
ويروح يشتغل

ههههههههههههههههههه


معلش بقي هي دي فرص العمل المتاحة

سبحان الله

شـــــهــــروزة يقول...

أنضملصوت ذوالنون

انا مهندسة ترميم ليا سبع سنين

مرتبى لم يتجاوز الـ250جنية لسة

وبأقضى باقى الشهر اعانات من الأسرة

الصيت ولا الغنى يا بنتى


مش طالبين والنبى مهندسين انشاله حتى محارة بربع السعر؟؟؟

نيااهااهااا

بنت القمر يقول...

كراكيب اهلا مرورك الاول يا عزيزي
طب مش لقط يا خساره رزق الهبل علي المجانين وكلنا رزقنا علي الله
بغبغان من زنزبار يا سلام ما لغات بقا_______________ واجاجوار جميله بس ما استغناش عن الماروتي في الزنقه تفوتي
_____________
اما القصر ففكرني بفيلم الاخر انت عايش في شقه 500 متر وغيرك سبعه في اوضه الجمله اللي قالتها حنان ترك
بجد ربنا قسم الناس حظوظ وطبفات
بس يبق التعليم لازمته ليه؟؟
درست التاريخ في كليه الاداب لما ورمت من الحملات الصليبه
والعصر الاوربي الحديث والاسر الفرعونيه لما اتطحن عضمي واخرها مش لاقيه شغل اكتر من 300 جنيه وكان كل دا ليه؟؟ يلا عشانا عليك يارب
اما الخادمات فلاحظ ان اللي بيدفعوا مين؟؟
المطرب والممثله والشيخ العربي
اما الست عيشه عبد الهاددي
فيظهر كان عندها حق وظلمناها
تحياتي

بنت القمر يقول...

اسكندراني
لما المديره المنزل تاخد 2000 جنيه وطبعا دي اكيد بتتعب
طب ما توصي المان بتاعي عليا يديني ربعهم بس
انا راضيه
ما انا برضه بديرله البيت وغسيل ومكوة
والنبي وبيشخط فيا وكمان بصالحه مش والنبي استاهل
تحياتي

بنت القمر يقول...

هاي نون النسوة
اخرمي عينه والنبي واقطعي ودانه وولعي في امه لابلاش امه
ولعي في ابوة
اه ما هو تعليق كراكيب ضحكني كمان
ازيك بجا
تحياتي

بنت القمر يقول...

مهند
وماله الشغل مش عيب
بس لازم تأهل نفسك كورسات بقا
تنظيف الزجاج بالجلانس وغسيل الشيش وتشميس المراتب
مش عيب يا عزيزي دول ألفيييين جنيه
الناس مش ها ترمي فلوسها في الارض
تحياتي

بنت القمر يقول...

نون المصري
اسفه لخبطت
طب يا عم انت بتاع رسم
انا واحده بتاعه تااااريخ
وما ادراك ما التاريخ؟؟
انه صعب جدا
لقد كسر عظمي
وحني ظهري
وبح صوتي
وحول عيني
اربعه سنوات عجاف
من دراسه ام الاسر الفرعونيه
الي دراسه ابو التاريخ الاوربي الوسيط الي الانكفاء علي حضارات العرق
الي التخرج وملقيتش شغل ب300 جنيه من 10 سنين من ساعه تخرج
وآل الحال الي الجلوس في البيت عاله علي المان بتاعي
مد الله في عمرة
ومتعه بالصحه والعافيه
وسدد خطاه وقدره علي تحمل مسئولياته الجسام
ودمتم
تحياتي

بنت القمر يقول...

شهروزة مش مطلوب مهندسين ولا بتوع رسم ولا بتوع تاريخ
عاوزين خدامين يا حاجه
بس
يلا بقا كورسات تنفيض سجاد وغسيل مواعين ومسح بلكونات يا شابه واهو بدل ما بتعملي في بيتكوا ببلاش عند الناس بفلوس اشى الف ونص والفين جنيه يا لهوي يا ما
يارب الهم لاحسد قسمت الحظوظ والارزاق وقلت اتعلموا بس هما اهالينا ضحكوا علينا لما علموناولا مين اللي عمل فينا كدا
تحياتي اش

عدى النهار يقول...

متهيألى عرفت اللخبطة جت منين

الأول حولى الكيبورد لإنجليزى وإتأكدى أنها تحولت (إضغطى ألط اللى على الشمال مع شفت اللى على الشمال) وبعدين كررى الخطوات التالية

بداية السطر بعلامة > (شفت مع واو) ثم حرف
a
أتركى مسافة واحدة وأكملى السطر بالجملة التالية - إعملى كوبى وبست للجملة كلها - ظللى الجملة كلها الأول من البداية إلى كلمة المصريون

href="http://www.almesryoon.com/">المصريون

أكملى السطر بعلامة > (شفت مع واو) ثم / (ظاء) ثم حرف
a
ثم علامة
<
شفت مع زين

بعد كده إعملى كوبى للينك اللي عايزها وحطيها مكان اللينك http://www.almesryoon.com/
الموجودة فى الجملة اللي كونتيها وبعدين غيرى كلمة المصريون (حولى الكيبورد لعربى بضغط ألط على اليمين مع شفت على اليمين) بتظليل كلمة المصريون ثم الكتابة عليه بالعنوان اللي عايزاه

لتسهيل العملية دى ممكن تفتحى ملف وتعملى فيه كل الخطوات السابقة وتحفظى الملف للإستخدام عندما تريدى وضع لينك جديد بدل ما تنفذى كل الخطوات دى تانى

فى الحالة دى تعدلى اللينك فى الملف وبعد كده تعملى كوببى للسطر كله بداية من علامة (شفت مع واو) لنهاية الجملة اللي هى ظاء وحرف إيه وشفت مع زين

جربى وعرفينى لو فيه مشكلة

بنت القمر يقول...

عزيزي عدي النهار برضه منفعش بيقولي المرادي تاج از بروكين
مشيت حسب الخطوات بالظبط بس
لما باجي اظلل كلمه المصريون بتروح ممسوحه اول ما ابدأ اكتب فوقها رغم اني بظلل اللينك وكلمه المصرييون الاتنين سوا
هو في حل
ممكن تكتبلي الاقواس قبل وبعد اللينك وانا اخده اسيفه عندي وابقا احط اللينك في النص بس تفهمني حكايه التظليل دي
اعتقد البروبليم منها
اشكرك جدا
وعلي فكرة في جماهير تانيه بتاخد الدرس معايا ومتابعين وها ندعي لك كلنا تحياتي

شـــــهــــروزة يقول...

بعد اذنك يا بنت القمر

تعقيب على نون النسوة


مش فاهمة سيادتك يعنى مالها حقوق المرأة بالموضوع
وما دخل أخدانها حقوقها وهضم حقوقها؟؟

ماهو زى ما فيه ستات بتشتغل فى الأعمال المنزلية
فيه برضو رجالة بتشتغل فى الأعمال المنزلية

العمل مقاسمة

ومحدش أجبر اى واحدة انها تنتهج عمل محدد
اعتقد انها بتتجه له بمشيئتها الكاملة
وارادتها الحرة بدون ضغط من فلان الراجل ولا علان الراجل برضة

فى حالة موضوع بنت القمر

انقلبت نظرية تعليق حضرتك فى هضم حقوق المرأة

لأن كل المطلوبين للعمل بغض النظر بقا عن الغرض مما وراء اللإعلان والمعلن نه
كلهم بلا استثناء ستات
وبمرتبات مغرية
لم يرد ذكر لرجل ...وبمرتب مغرى
ومحدش بيضرب المتقدمة على ايديها ويقول لها روحى التحقى بالعمل وفى النهاية ترجع تصوّت وتلطم خديها الورديين... نتيجة عملية الاستغلال تلك

لو حصل اهانة او تفريط فى اى حق
بيبقا بتنازل الست عنه ورضاها بأمرها الوزاقع واكتفاءها بالنحيب والولولة والبكاء على راس الميت
اللى هو حقوقها لامؤاخذة

وأعتقد ان شعار خزق عين اللى بيقول اننا أخدنا كل حقوقنا الخاصة بحضرتك
ملهوش اى محل من الاعراب فى الموقف المشار اليه

حقوق اية فى عمل او مهنة معلن عنها؟؟؟؟

مش دة حق الخروج للعمل اللى نادى به المنادين بحقوق المرأة؟؟؟؟؟؟

أليس العمل المنزلى عمل ككل الأعمال والمهن؟؟
لولا نظرتنا المجتمعية الدونية المحقرّة له
ولكنه عمل يلقى كل احترام وتقدير فى الغرب المتحضر الذى ننعته بكل النعوت الغبية ليل نهار
طالما هى يد عاملة ولم تمد يدها للشئون الاجتماعية ولا لصناديق الزكاة فى الجوامع والكنائس
يعنى محدش يكسر عينها

والاختيار بقا و تقدير عواقب اختيارالعمل او ما يستتر خلف الاعلان
متروك لها وللمحيطين بها

واعتقد ان حق اختيار العمل من حقوق المراة برضة
ولا سلبتوه منها خلاص؟؟؟

أعتذر مرة أخرى من بنت القمر على التعقيب

تحياتى

شـــــهــــروزة يقول...

ابقى شوفى الموضـــوع دة
هنـــــــا

هو مالوش صلة مباشرة لكن ممتع جـــدا
وببعض الربط تقدرى تكونى فكرة متكاملة للوضع

Desert cat يقول...

تصدقى فكرة انهم يلغوا التعليم فى المدارس والجماعات والواحد يتعلم له حرفة تنفع والبنات تشتغل خدامات احسن ده الحكومة طلع همها مصلحتنا واحنا اللى عالم فقرية
لسه بنطبق مثل لو فاتك الميرى
ده الخدمة فى البيوت طلعت كلها فلوس ومكاسب
تعلم ايه اللى اهالينا ضحكو علينا بيه ده
لالالالالالالالالا
انا مع اعلان الحكومة
البنات تشتغل خدامات والولاد يتعلموا صنعه
الله يحرق دى بلد

بنت القمر يقول...

انا

عدى النهار يقول...

ماينفعش الحل ده لأن عند العرض العلامات نفسها بتختفى وتأثيرها هو اللي بيظهر

ممكن تسألى شهروزة ترسل لك السطر ده فى إميل

على العموم جربى دى: إعملى كوبى للسطر
التالى فى ملف
** href="link">title****
وبعدين عدلى السطر فى الملف بالصورة التالية
حولى الكيبورد لإنجليزى
أول
*
مكانها شفت واو
تانى
*
a
وتحافظى على المسافة الموجودة قبل كلمة
href

الـ
****
اللي فى آخر السطر تغيرهم بالضغط على المفاتيح التالية بعد تحويل الكيبورد لإنجليزى

شفت واو
ظاء
a
شفت زين

غيرى كلمة
link
باللينك الخاص بموضوعك وكلمة
title
بالعنوان اللي عايزاه يظهر

عدى النهار يقول...

برافوووو

تعليقى السابق جه متأخر شوية.. فرق توقيت
:)

DamnGirl يقول...

بس بصراحة لو ب 50000 الف خدامة ما اشتغلش
مش بس 2000 جنية
شكرا وشيء بيرفع الضغط بجد

e7na يقول...

عصر العبيد رجع تانى
وقريب هنلاقى اللى بيختار واحده ويقول هذه لى

اغلب تلك الوظائف ايضا ستار لاشياء اشنع

sendbad يقول...

مدونة رقيقة وفيها حاجات حلوة اوي
احييكي علي المجهود الرائع
تحياتي
اما عن البوست لسه ياما هانشوف

بنوتة يقول...

احجزيلي عن الممثلة بس زعلانة منك منزلتيش صفحة المفقودات

Rain man يقول...

اضيفى هذا الاعلان
لشاب بائس / عاملة نظافة تصلح كزوجة لهذا الشاب .. لا يشترط التفرغ
الاتصال 09004242

بنت القمر يقول...

شهروزة
تاني
بصي يا قمر وانتي حبيبتي بالنسبه لردك عاي نون النسوة
بصي يا ست الكل الست مش واخده حقوقها اه مش واخده الا صابونه
اقولك ليه طبعا العمل مش عيب بس لكل مقام مقال وكل فوله لها كيالها واديكي بتقولي ليسانس اثار ولا بكالوريوس ومش محصله 300 جنيه تبقي مداسه ولا لا لما طالبه الطب تشتغل خدامه عشان تقدر تصرف علي الطب تبقي مداسه زي ما طالب الهندسه يشتغل في بيتزا هات يمسح ترابيزات
بس انا اقولك الفرق بقا الذي يمكن تقصده نون النسوة
ان الست بيهينها اكتر انها تكون متمرمطه ويبقا نقطه مش ولا بد في رصيدها انها كانت شغاله في يوم تداريها بكل السبل لكن الراجل المجتمع بيغفرله وبيقول راجل عصامي بني نفسه بنفسه
عمرك سمعتي علي ست عصاميه حتي تلاقيها تقيله علي اللسان ست عصاميه
في مدينتك الوادعه تستقبل جده الاولاد فتيات صغيرات للخدمه في البيت ورعايه ضغار العيله ويقول اهاليهم في قراهم المجاورة مبررين غياب بناتهم بانهم بيشتغلوا في مصانع او واقفين في محلات كبائعات عشان البنت ميطلعلهاش سمعه ويعرفوا يجوزوها ولا يذكر ابدا انها كانت خدامه
العمل شرف والعمل عباده اه بس مش في مجتمعنا
تقولي بقا نظره طبقيه اقولك ماشي بس هكذا تجري الامور يا ليلي
وعموما لو انتي شايفه انك واخده حقوقك كاااامله في المجتمع ومتصالحه معاه يبق يا بختك وهنيالك
ولو لا يبق مش مختلفين
باااي يا سكر

بنت القمر يقول...

شهروزة تاني
ميرسي علي اللينك بركاتك يا عم عدي النهار عم ايجي اناتوميست دا دماغ
وان كنت مش متفقه معاه في معظم ارائه بس سرده ممتع وتحليله عميق
وبرضه مع تحفظي علي بعض ارائه وعموما اشكرك

بنت القمر يقول...

ديزرت كات
ما هو دا اللي كنت بقولهولك
ضحكوا علينا انا معرفش انتي خريجه ايه بس لو اقلها دبلوم تجاره او صناعي
واديكي صاحبه سايبر محترمه
الا صحيح الساعه عندكم في النت بكام؟؟
اكيد مش بتصفي الفين جنيه شهري
بعد الغرامات والرشاوي والذي منه
يلا ربنا يسامحهم ويطلعنا منها علي خير
علي راي واحد قريبي
عشان نتزعلوش من الست عيشه عبهادي
يمكن كان عندها حق
منورة

بنت القمر يقول...

عدي النهار
مش عارفه اشكرك ازاي والله انا وشهروزة من امبارح علي الماسنجر بنحاول في البتاع ده مش قلتلك الجماهير متابعه بس بصراحه هي طلعت انبه مني وحلت اللغز الاول وبعدين علمتني
عموما ندين لسيادتكم بالفضل حفظك الله لنا وفي حاجه كمان حبه كدا ونبقا نتطفل علي حضرتك وتشرحهالنه بس مش ورا بعض عشان متتخنقش مننا شكرا
ليك مني ومنها وتحياتي اخي الفاضل جدا

بنت القمر يقول...

DamnGirl
يا عزيزتي يمكن انتي ظروفك ونفسيتك لاتتقبل هذا العمل بس يجب ان تلتمسي العذر للاخرين والاخريات االلواتي اجبرتهم ظروفهم عليه
منوره اول زياره اشكر مرورك

بنت القمر يقول...

احنا
منور المدونه يا عزيزي العبوديه اشكاها كتييير جدا في المجتمع خادمه ومربيه اطفال وترعي مسنين في نفس الوقت لاحظ طب تنام امتي دي؟
تاكد ان الاسره الخليجيه اللتي تدفع الفين جنيه عندها ما لايقل عن 7 اطفال مطالبه هذه الخدامه برعايتهم وكمان غير النظرة الدونيه لها وانظر ردي التاني علي شهروزة واعلم ما تقاسيه هؤلاء البنات
والمصيبه بقا زي ما بتقول يا عزيزي لو الحكايه ما قلبتش علي شئ اخر وستار لحاجه غير اخلاقيه
طبق لي بقا الليسانسات واليكالوريسات في الادراج وسلم لي علي دارسي اللغات اللذين يستعبدوا هم ايضا للعمل 10 ساعات في الشركات ومكاتب القطاع الخاص ب500 جنيه بالاكتر
تحياتي
اشكر مرورك

بنت القمر يقول...

سندباد
اهلا بزيارتك الاولي
شكرا يا عزيزي
فعلا يامااا ها نشوف
تحياتي

بنت القمر يقول...

Rain man
يا عم هي ناقصاك تبقي انت والزمن والظروف عليها بدل ما تنتشلهالا من الوحل عاوزها تصرف عليك ههههههههههههه والله ضحكتني يعني الخادمه دي ممكن كمات يطمع فيها
طب يا سيدي الاعلان اعتبره اتنشر وعموما تقدر توصلهم ارقام التليفونات دي بجد
حقيقفيه
ممكن تتصل وتطلب واحده منهم
نصيحه خليكي في ام الفين طبعا
تحياتي اشكر مرورك

الطائر الحزين يقول...

مطلوب خريج حديث لا يزيد عمرة عن 24 سنة خبرة 10 سنوات فى المحاسبة وهندسة المقاولات والتمريض والسحر والشعوذة والشحاتة وعندة سيارة خاصة والبنزين على حسابة

الاجر مغرى جدا جدا جدا

طبعا عارفاه

تحياتى

بنت القمر يقول...

الطائر الحزين
لا والله مش عارفاه تقصد الاجر ولا الخريج الخريج اللي عنده اربعه وعشرين وخبره 10 سنوات
لا معرفوش مقبلتوش
اما الاجر المغري فعند الله يا عزيزي
منور البلوج

None يقول...

العزيزة شهروزة

طبعا في البدايه انا مستغربه جدا لأسلوبك الهجومي واصدارك احكام عليا وعلي ارائي رغم عدم وجود سابق معرفه مابينا تخلي حكمك موضوعي وواقعي شويه علي الكومنت اللي انا كتبته !!


وانا في البدايه بشكر بنت القمر انها ردت بالنيابه عني وكونها وضحت وجهة نظري


عايزة بس اقول حاجه .... انتي بتقولي الرجاله والستات بيشتغلوا نفس الاعمال المنزليه ..وان العمل مقاسمه و و و وو .. ياعزيزتي البلد يوم مافكرت انها تصدر المرأة كأيدي عامله ..صدرتها كخادمه ..طب مافي بطاله في الشباب ومش لاقيين شغل والمفروض _ طبقا لنظريتك ان دي مقاسمه بين المرأة والرجل _ ..اشمعني يعني اختصت المرأة بالشرف الرفيع دا ..دي ترسبات فكريه وتاريخيه ترسبات ذكوريه لمجتمع ذكوري كانت اقدم مهنتين للمرأه فيه الدعارة والخدمه

انتي بتقولي ان المرأه بتنتهج هذا العمل بدون ضغط من فلان الرجل وعلان الرجل ...اسمحيلي اقولك ان شوفت بعيني اكتر من ميتين حاله ..الرجل بيبقي قاعد مبلطج في البيت وبيجبر مراته انها تنزل تشتغل خادمه_ بما انها الحاجه الوحيده اللي بتعرف تعملها _ عشان تجيب فلوس وتصرف علي البيت .. بل _ والله العظيم _ بتصل بيه الجرأة احيانا انه عشان يعاقبها يحرمها من انها تنزل تشتغل ويسيب ولاده يموتوا من الجوع ..فاذا كانت وجهة نظرك انها بتنزل تشتغل بدون اي ضغط ولها حرية اختيار العمل ..فانا هاقولك لا تعليق !!

بتقولي ان لو في اي تفريط بيحصل في المهنه المشار اليها بيبقي المراة مسؤله.. كأن مافيش حوادث اغتصاب ومعاشرة جنسيه بالاكراه بتحصل للخادمات ..واللي بيبقي فيهم مادون السن القانوني كمان .. كأن مافيش عقليات عبقريه زي اللي كان باعت سؤال للمفتي ..هل يجوز معاشرة الخادمات _وكان المقصود المستقدمات طبقا لبرتوكولات معينه من بلدان اخري زي الفلبين والهند ومصر ان شاء الله_ ومعاملتهم معاملة ملك اليمين ؟؟ّ!!
ياعزيزتي كلامك دا صح 100% لو كنتي بتتكلمي علي طبقه معينه طبقة المثقفات المتعلمات اللي علي اقل تقدير من الطبقه الفوق متوسطه _ رغم ان في حالات منهم بردو بتعاني من المشاكل السابق ذكرها _ لكن ارجوكي فعلا وعشان حكمك يبقي موضوعي شويه ..انزلي الشارع المصري ..انزلي العشوائيات ..شوفي مدي المهانه اللي الست الخادمه بتعاني منها... في بعض البلدان العربيه الميمونه المرأة الخادمه بتتبااااااااااااع مقابل اقامتها ودي حالات كتيره شوفتها بعيني واتحكيتلي عن الخادمات الهنديات مثلا اللي بيشتغلوا في السعوديه

وانتي بعد دا كله جايه تقوليلي حقوق المرأة والمنادين بيها _ واللي صنفتيني معاهم وعاملتيني كأنها تهمه اني بقول حقوق المرأة _ ياعزيزتي انا كلامي مش من فراغ ..

ياريت قبل ما نصدر اي احكام من البرج العاجي اللي احنا قاعدين فيه .. ننزل لأرض الواقع شويه ..ونشوف وندرس علي الاقل الناس اللي بنتكلم عنهم دول عايشين ازاي وبيعانوا من ايه

بس طبعا في النهايه .. ربما اختلف معك في وجهات النظر .. لكن لا يمكنني ان افرض وجهة نظري ...لكي حرية انتهاج ماترينه صحيحا

تقبلي خالص تحياتي ومودتي

وخالص شكري وتقديري لبنت القمر

شـــــهــــروزة يقول...

نون النسوة

زى ما قلتى
مفيش فعلا اى سابق معرفة او حتى زيارة بينى وبينك علشان أهاجمك بسببها

يمكن انتى اللى حسيتى بردى هجومى
لكن انا محسيتش كدة


وللعلم فقط
انا مش عايشة فى برج عاجى

وللعلم فقط
انا ماليش اى مواقف مسبقة من حنجوريات حقوق المرأة
لأنى مش معترفة بالجمعيات دى اساسا وما هى الا للشهرة والمراهقة السياسية


وان كان هناك تفريق فى الحقوق
يبقا من المرأة نفسها
ودة انا مقتنعة به وبشدة
حتى لو سمحت لزوجها انه يتعامل معاها زى ما انتى وصفتى
تبقا هى اللى تستاهل المعاملة دى طالما ارتضتها لنفسها
وطالما تقدر تستغنى ماديا عنه بعملها فى البيوت ولو حتى على عربية بطاطا
يبقا قلته أحسن
مش تمسكوا لى فى مبدأ ضل راجل ولا ضل حيطة؟؟
دلوقتى الحيطة أحسن وأضمن وأكثر احتراما

حتى النصر الزائف اللى حصلت عليه وادعوا كفاحهم للحصول عليه فى اصدار قانون الخلع

كان وبال ومصيبة على رأس المرأة نفسها قبل الرجل
وطلع المستفيد الأول والأخير منه هو الرجل
واللى اخترعوا انتصار خايب على حسه
ودة عن وقائع ومعايشات حقيقة
وليس من برج عاجى

وطبعا لما الدول العربية بتطلب خدم فى البيوت
محدش فيهم بيدّخل على بيته راجل
بخلاف السائق والجناينى لو وجد

لكن بلاش نقووول انهم بيتبعوا عاداتهم وتقاليدهم
ونقول انهم ولاد ستين بتاع
و من مدمنى مضاجعة الخادمات

اعتقد ان مش المصرية بس هى اللى واقعة تحت البند دة
لأن جنسيات كثيرة جدااا تعمل فى تلك المهنة لديهم
ومشاع لهم فى اى وقت

يبقا وقت مناقشةالقانون دة ومناقشة اوضاع المرأة
تناطحوا من وقّع على الاتفاقية
واللى بالمناسبة هى امرأة برضوو

يبقا نحاسبهم ليس على اهدار حقوق المرأة ولا بطيخ
نحاسبهم على امتهان قيمة العمل
واختزاله فقط فى النصف الأسفل للعاملات واكتفينا بتصدير يد عاملة على هيئة خادمات
ولم نعد نصدر كفاءات علمية وأدبية كما كنا

وفى النهاية محدش بيشد المتقدمات للعمل من ايديهم ويجبرهم على التقدم
وهم عارفين كويس مدى الامتهان والتحقير اللى حيلاقوه هناك
لكن المرة دى
برعاية الدولة ووزاراتها

لدرجة أظهرت ان مصر مبقاش فيها اى حاجة حد يجرى وراها الا الخادمات
مع الاعتذار لأصحاب المهنة وأياديهم اللى تستحق التكريم
وبدون أى تحقير

ولا تعليق على اى جزئية أخرى

None يقول...

العزيزة شهروزه تاني


في البدايه بس احب اوضح اني لم اقصد الاهانه مطلقا بتعبير البرج العاجي ..او اقصد بيه الانفصال عن الواقع .. ياعزيزتي كلنا او معظمنا يعيش في برج عاجي ..انا وانت وغيرنا من المتعلمات الحاصلات علي شهادات جامعيه العاملات او غير العاملات حتي .. اللي عندهم نضج فكري كافي يقدر يوصلهم لانتهاج فكر معين والمدافعه عنه...

انا مقتنعه جدا بكل كلمه من كلامك علي فكرة ..بس مقتنعه بيها لمين ..ليا ولكي ولغيرنا اللي زينا ..ممكن يكون تصنيفي طبقي ..بس دا الواقع يا عزيزتي شئنا ام ابينا .. المشكله بقي انتي ازاي توصلي الفكر دا

ازاي توصليه لواحده شايفه ومقتنعه واتربت علي ان ضل راجل ولا ضل حيطه ..وان الست العاقله بتحافظ علي بيتها حتي في اسوء الظروف وحتي لو جه دا علي حساب نفسها وادميتها .. وان الولاد لازم يتربوا وابوهم موجود لأن وجود الاب في البيت لازم حتي لو كان شرابة خرج او ضل حيطه ..ولو اتكلممتي مع واحده منهم ..هاتقولك واربي العيال ازاي كأن مافيش ستات ارامل بتربي ولادها لوحدها .. واصرف عليهم منين ..رغم ان هي اللي بتشتغل وتصرف وبسلامته قاعد مبلط في الخط..وهاتتهمك بانك عايزة تخربي بيتها وتخربي عليها

عشان ماابقاش بعدت عن الموضوع ..مهنة الخدمه عموما _ وانا مش بحتقرها خالص والله _ بتضم بنسبة 90% النوعيه السابق ذكرها دي .. نادرا ما هتلاقي فيها متعلمات _ وحتي موضوع التعليم مابقاش يفرق كتير صدقيني _ او بلاش نقول متعلمات .. نقول اللي بقدروا ياخدوا قرارهم بنفسهم ..ودالسببين ..الاول ان المهنه للأسف بيعتبرها البعض مهنه متدنيه فمش بيلجأ ليها غير للضرورة القصوي ومعظم المتعلمات او انصاف المتعلمات مش هايلجئ ليها لأن في بدائل اخري متاحه زي انهم يشتغلوا بائعات في المحلات التجاريه مثلا ..السبب التاني بيبقي غالبا الحاجه الشديده للعمل مع الجهل التام بالبدائل اللي ممكن تكون متاحه

النقطه التانيه اللي عايزة اعلق عليها انتي بتقولي ان معظم العرب مابيبقلوش يدخلوا علي بيوتهم راجل و و و و ..ياعزيزتي المفروض ان مرجعيات معظم الدول العربيه مرجعيه اسلاميه ..ايام الرسول كان في خادم راجل وخادم ست ..وكان الخادم الراجل بيبقي موجود ومتعايش مع اهل البيت بدون اي حرج!! اشمعني بقي دلوقتي ويوم مانصدر المراة كيد عامله نصدرها كخادمه ونتناسي انها مطلوبه بردو كطبيبه وكمدرسه مثلا ..وبكرر تاني اني شخصيا لا امتهن قيمة هذا العمل ..لكنه الواقع ايضا ونظرة المجتمع الغبيه هي التي تفرض هذا الامتهان


يعني ملخص الكلام ..انا مش ضد رأيك ..بس المرأة الضعيفه الغير متعلمه اللي ورثت ميراث متخم بالافكار الباليه اللي لا ليها مرجعيه دينيه ولا فكريه وانما مرجعيه اجتماعيه باليه فقط ..بحاجه الي من يدافع عنها والي من يعيش واقعها كما هو وليس كما نتمني ان يكون

وعلي فكرة ..انا لا انتمي لأي جمعيه نسائيه ولا انادي بخروج المرأة لميدان العمل واهمالها بيتها واطفالها ..وان قانون الخلع دا نصر وفوز عظيم وسبق ماحصلش في تاريخ الانسانيه .. انا مقتنعه تماما ان الست مكانها بيتها بجانب ابنائها وزوجها مهما بلغت درجة تعليمها لأن مسؤليتها فيه اهم واكبر من اي مسؤليه او اي دور اخر ممكن تؤديه..دا غير انه الصراحه اكرم لها في زمنا الاسود المهبب دا


وتقبلي خالص تحياتي ومودتي
ــــــــــــــــــــــــ
بنت القمر دا ميلي

none_s3mw@hotmail.com

طبعا شهروزة ممكن تضفيني لو حبيتي وهايبقي من دواعي سروري