الجمعة، ديسمبر 21، 2007

عيد حسني مبارك!!!ا


اخدتولي بالكوا من صلاة العيدفي شرم الشيخ التي حضرها الرئيس

الرئيس العيد ده واللي قبله بيصلي اخر صف

ومش بيجيبوا عليه الكاميرا لا في الركوع ولا السجود

تقريبا يعني تقريبا عوامل السن منعته

كما ان جنبه شويه ناس اقل انهم يكونوا حتي ناس عاديه هما بودي جارد علي فتوات

الريس في السنين السابقه كان بيصلي اول صف ورا الامام عدل
والصورة بتكون طوليه بتبين رجله وراسه السنه دي الكاميرا علي وشه بس

مجرد ملاحظه
طبعا مفيش مشكله في العجز اطلاقااا
لكن هو مش بوش بيمرض برضه
وجاله سرطان قولون وعمل عمايه وهو في الحكم
عادي
ليه بقا عندنا المرض مش عادي هه
نفسي افهم
ولا الريس دا سوبر مان
غريبه اوي

هناك 9 تعليقات:

سلام سالم يقول...

انا للاسف مشفتش صلاة الريس لاني كنت وقتها بصلي بس انا مصدقك علي كل حال اصل الموضوع مش محتاج الناس كلها عارفة ان بابا حسني مش عايز يبين للناس انه خلاص كبر المهم سيبك من الموضوع دا انا عامل مدونة بس بعد ماكان في دماغي افكار كتيره اكتبها فيها اول ما عملتها بقيت حاسس ان المواضيع اتبخرت مش عارف اعمل ايه انا حسيب ليكم الرابط ياريت تزوروني وتقولوا ليا رايكم
http://rasasah.blogspot.com/

mohand يقول...

السلام عليكم

انا اللي شوفته في الاعاده واخدت باللي منه قوي

انه مبقاش يصلي ورا البتاعه الزجاج اللي كان بيصلي وراها

ودا اللي لاحظته

mohandsmasry يقول...

الصورة دى بتبين اد ايه هو خايف لاحظوا ان ضهره للحيطة وطبعا لازم يكون قاعد فى اول صف يعنى الجماعة اللى بيصلوا معاه قليلين حدا من الوزرا وطبعا الاسماعلية كانت متقفلة ويمكن عملوافيها حظر تجول ههههههه بس الخلاصة الراجل مش بقى خايف على نفسه وبس ده مرعوب وميت فى جلده من شدة الخوف احسن حد ينشه وهو فعز شبابه !!!!وده يمكن يكون السبب الرئيسى اللى مخليه مش بيظهر كتير بالاضافة للكانسر والبلاوى السودا اللى عنده اللى لو كان نصها عند شاب فى العشرينات كان فيص من زمان !!!!!!! تحياتى

Nsreen Bsunee يقول...

بنت القمر
مدونتك جميله تستحق التحيه
الرئيس مش عاوز يدى الناس امل مش عاوزهم يشكو انه تعبان هما شاكين فعلا بس مش عاوزهم يصدقو عشان ميستعدوش عشان يعملهالهم مفاجأه فا يتلخمو حضرتك وعلى بال ما يفوقو يكون الباشا الصغير ركب ع الكرسى
فخمتو يا قمر
سلام عليكم

الطائر الحزين يقول...

سمعت فى الراديو انه كان بيصلى السنة دى فى مسجد مبارك مع الجيش الثانى مش فى شرم الشيخ

السؤال
المفروض انه يصلى امام بالناس

تحياتى

بنت القمر يقول...

سلام سالم
اهلا اول مرور
ما هو الصلاة اتعدت علي التلفزيونات كتير
وبعدين في اي مكان في الالم بيقولوا علي اخبار مرض رئيسهم عادي
لكن احنا عاوزين نأله الريس مش عارفه ليه
*************************
مهند كل سنه وانت طيب تقصد حائط زجاجي للحمايه ضد الطلقات مثلا مشفتوش قبل كدة
**********************8
مهندس مصري
هو كان في شرم علي ما اظن مش الاسماعيليه
مش مشكله انه يمرض بس احنا مش بنحارب عشان نقول ان مرضه مثلا ها يهز الامن القومي تحياتي واشكر مرورك
***************888888888888888
نسرين بسيوني
اهلا اول مرور يا عزيزتي مش الريس هو اللي ها يدي الامل
دا كنيدي مات وهو اد ابنه
الموت والمرض حق علي الجميع ومفيش حد مخلد
كانت دامت لغيره الايام دي ذكري صدام
تلك الدول نداولها بين الناس
الله يرحم الجميع
*****************888888888
الطائر الحزين كل سنه وانت طيب وبالصحه والسلامه فعلا
هو كان في شرم دا اللي انا اعرفه
بس ليه لازم يصلي امام
لا مش لازم هو مش خلفاء راشدين ولا احنا شيعه
الامام رئيس ديني ودنيوي
شروط الامامه قد لاتنطبق عيه
ومنها اجاده التلاوة مثلا
وبعدين ايه يا عم مش كفايه عليه
ناقصه خنقه في الصلاه كمان
تحياتي

Hannoda يقول...

فعلا حاجة غريبة

الراجلده عنده كام سنة اساسا
متخيلاه عجوز مش عارف يشكل تفكيره مع العصر الجديد و الشفافية اللي فرضت نفسها على العالم


كل سنة و انت طيبة
ولو انها متأخرة
وش مكسوف

:)

يا مراكبي يقول...

لزمته إيه الكلام ده بقى؟

كده ممكن يضموكي لقفص الإتهام اللي فيه إبراهيم عيسى وأمثاله من اللي بيشككوا في الصحة الصحة الصحة

خدي بالك

:-D

الصارم الحاسم يقول...

انا عندي اقتراح

بحكم السن ...يطلع معاش ويستريح....وريحنا معاه