الأحد، سبتمبر 14، 2008

تخمه اليكترونية

تتوزع كتبي بين ادارج الملابس والكومود واحيانا في ادراج نيش السفرة وتحت الوسائد... لامكان لظروف المساحه للمزيد او للتخزين ومنعا للملل والتشبع ابتدعت ان ان اتبادل القراءه في كتابين معا
اصبح كل ما اشتريه من زمن هو ما اقرأ عنه علي الشبكه الاليكترونيه او ما يرشحه لي الاصدقاء
.. لا يخلو الامر من ان ابحث عن كتاب بسبب الالحاح والزن فالاصدقاء يتحدثون عن كذا ولم يقع بين يدي فيتسرب الي نفسي شعور بالضيق والضآله والاحساس بالتأخر وعدم المواكبه اني لم اتصفح هذا الكذا
فيأكلني ذلك الشعور البغيض وربما بعد ان احصل علي الكتاب المذكور واقرأه
فلااجد فيه اي متعه او ربما لا ترقي تلك المتعه الي ما وجده الاخرين
بعض الكتب وبعض الكتب ترشيحات ممتازة
بعض الكتب يعوقني علن شرائها ارتفاع السعر فروايه عزازيل الممتازة سعرها مجرد 20 جنيه.. في حين ان ربع جرام سعرها 50 جنيه ومغلفه وذلك الغلاف رغم الضغط والالحاح لشرائها
يمنعني من شراء ما قد اعجز عن تصفح محتواه اضافه الي كبر حجم الكتاب مما يجعل الشراء مغامرة غير محسوبه وقد ينتهي الكتاب مقبورا في درج الشرابات وقد قرئت ربع صفحاته!!
المكتبه الاليكترونيه التي اشتركت بها حديثا اتاحت لي تحميل بعض الكتب بصورة سهله وسريعه
وهي من الكنوز التي اكتشفتها يا_ للعار_ حديثا جدا
ولا تحتاج الا الي وجود برنامج ادوب ريدر علي نسخه الويندوز فقط
من اكتشافي الحديث وانا في حاله شره اليكتروني احمل كل يوم كتب جديده
واكتشفت اني لا احتاج الي الجروب فقط اقوم بكتابه اسم الكتاب او المؤلف في الموقع ثم بحث ويتم تحميل الكتاب مباشره
غيث وقد انهمر في البارتيشين الخاص بي في جهاز الكومبيوتر.. شفرة دافنشي مترجم بالعربيه.. عزازيل للمرة الثانيه لا اعلم سبب اعاده تحميله سوي القول المأثور {ابو بلاش كتر منه} واحه الغروب بهاء طاهر ذات صنع الله ابراهيم ومازلت اقرأها.. وتلصص التي تعتبر من اسوأ ما قرأت مؤخرا واكثرها مللا
... ولكن الالحاح وما ادراكم ما الالحاح وربما هي مشاعر الغيرة البشريه المحموده!!
... احلام مستغانمي... معظم ما كتبت.. مذكرات عابر سرير وفي مواقع اخري عابر سبيل!!
لا اعلم الاسم الحقيقي فالنسخه التي امتلكها اليكترونيه مكررة مرتان باسمين مختلفين!!
كتابات يوسف ادريس وقصص السباعي التي افرضها علي ابنتي فرضا واقايضها عليها بعدد الساعات التي سوف تمضيها علي الفيس بوك.. تتابع اخبار تامر حسني او مهند او البحث عن صور افراح الفنانين:((
المشكله اني اصبت بحاله من التخمه الاليكترونية فورائي الكثير لاقرأه وكذلك متابعه المدونه وكتابات الاصدقاء والمرور عليهم وكذلك جروب ليلي الجديد وقراءه الجرائد والايميل.. والمرور السريع علي الفيس بوك
مما يجعل النهار يحتاج الي نهار اخر ليتسع الوقت الي كل تلك النشاطات الاليكترونيه... مما يصيبني بحاله احباط
ربما ما قد يضطرني الي تخفيض تلك الانشطه بدءأ من الكتابه في المدونه ..
لمتابعه بقية الانشطه

هناك 44 تعليقًا:

Lasto-adri *Blue* يقول...

طب اسم المكتبة ايه؟
وهل فيها روايات لطيفة الزيات؟

أفندينا يقول...

طيب يا ريتك تدلينا على عنوان المكتبة الالكترونية ...

بنت القمر يقول...

لست ادري دوسي اللينك يا قطه
مافيهاش الباب المفتوح بالذات... باينها روايه ابيحه:))

بنت القمر يقول...

افندينا
دوي علي اللينك التاني يا عزيزي وعموما
http://www.4shared.com/file/50355796/5d5e8904/__-_.html?err=no-sess

بنت القمر يقول...

لست ادري
==================
لطيفه الزيات اهه
http://www.4shared.com/network/search.jsp?searchName=%D9%84%D8%B7%D9%8A%D9%81%D8%A9+%D8%A7%D9%84%D8%B2%D9%8A%D8%A7%D8%AA&searchExtention=&submit=Search&searchmode=2

بثينــــــة يقول...

حاليا أنا في مرحلة البحث عن الكتاب المسموع
ههههه
الجروب دة هايل طبعا بس أنا كنت بادور في الفور شيرد والتو شيرد من قبله علي الكتب وبالاقي
علي فكرة فيه أماكن تانية كتير زي موقع اوراق وكدة

الكتاب المسموع دة بأة يا ستي تحفة 'مش زي مطار الأنفاق' .. لأني حملته علي الموبايل اللي هو موبايل وكمبيوتر و ام بي سبعة وسبعين بالنسبة لي ههههه
وعيشي بأة حيث تنعمين بحركة سباعية الأبعاد أثناء الاستماع

بس إية معني كلامك دة
بدءا بالمدونة ليه.. دي اللي قدرتي عليها
ثم هي طنط هالة سودا مش بتزورك تحت عينك زيي أحيانا لما باخلي اليوم تسعتاشر ساعة شغل
لا لا لا اية التراخي دة
:D

blackcairorose يقول...

عارفة يا بنت القمر انك بتتكلمى اساسا على القراءة الادبية بس خلينى اخد الكلام بعد اذنك لاتجاه تانى شوية

انا برضه بشوف ان النت محتاج وقت اكتر من الوقت مش بس لقراية الكتب لكن لنشاطات وحوارات والتعرف على بلوجات والتعليق عليها الخ الخ

بس المضحك انى احيانا بقول لنفسى ان كل الساعات اللى بتتقضى على النت مع اشخاص "وهميين" لا تساوى ربع ساعة فى موقف حقيقى فى الحياة الحقيقية

يعنى ممكن تعجبى مثلا بشخص على النت وتقرى له ما يكتبه لمدة ساعة كل يوم على مدة شهرين تلاته أو اكتر وبمجرد مقابلة الشخص ده لمدة خمس دقايق ممكن تكرهيه وميبقاش عندك استعداد تعرفيه تانى لبقية العمر!!!

التناقض بين قوة النت وهشاشته فى نفس الوقت موضوع بشوفه بجد مثير للاهتمام والتعجب

بنت القمر يقول...

بثينه
==========
كل ما اقول لحد علي الفرو شيرد ده الاقيه عارفه
تقريبا انا الوحيده اللي في مصر مكنتش عارفاه لا هو ولا عم صنع الله ابراهيم وشي منكو في الارض:((
الحمد لله انتقت الي مصاف الكبار اهه
قوليلي بقا المكتبه المسموعه دي لينكها ايه
لانه الجهاز عندي قريب من المطبخ ودي فائده لولبيه.. للسمع... حفظك الله ذخرا.. للغلبانات... اختك بنت القمر

ana ga3an يقول...

بالرغم من سهولة الحصول علي اي كتاب عن طريق الانترنت الان
لكن متعة الكتاب المطبوع والبحث عنة
والاحتفاظ بة ووضع ملاحظات بداخلة
بصراحة هي تقريبا نصف متعة القرأة لي علي الاقل
عارفة من فترة كنت بفكر في وضع من وقت لاخر كتاب مصحوب ملخص وتعقيب مني
علي المدونة طبعا هاتكون كتب قريتها وعجبتني بغض النظر عن مضمونها او مؤلفها

انتي كمان محتاجة شوية تنظيم وقت
وجهد لكي تستمري بعمل كل نشاطاتك المحببة غير كدة في طرق قرأة سريعة ولها تمرينات وقواعد
تساعد عل انهاء كتاب من 100 صفحة من الحجم الكبير في اقل من 40 دقيقة

بنت القمر يقول...

بلاك كايرو
==============
كلامك صحيح تماما.. بخصوص الاشخاص الوهميين... هما مش وهميين لكن العيب عيبنا لما بنبالغ اوي في اضافه هاله من اللطافه عليهم_ مشكلتنا مش مشكلتهم!!
تجربتي بعد لقاء البعض مؤسفه والبعض كان لقائه جيد ومثمر ومفيد الموضوع يخضع للصدف البحته!!
في كل الاحوال لا يمنعك من شهوة متابعه التعرف علي اخرين!!
انتي مثلا من اكثر الاصدقاء غموضا لي ولاخرين... وربما كنتي مثار تساؤل في حواراتنا المسنجريه:))
عن الغامضه التي لا نعرف اين تقيم ولا حتي اسمها الاول... بروفيلك مقتضب جدا
ومع كامل حقك في الاحتفاظ بخصوصياتك وبالمسافه المحدده بينك وبين الاخرين
الا اني استمتع بكتاباتك فور وجودها علي
الريدرفهو_ جهاز عبقري جدا.. ورغم تأخري احيانا في المرور لكن استمتع بكتابات المرأه المجهوله:)))
دمتي بكل ود

زمان الوصل يقول...

يا بنتى كده يجيلك اكتئاب :) هتلحقى تعيشى حياتك برّه النت إمتى !!
أنا من زمان توصّلت لنتيجه ارتحت لها جدّا ..
الكتب التى تستحق القراءه أكثر بكثير ممّا سيتّسع له العمر حتى لو قضيته جالسة لا أفعل شيئا سوى القراءه .. يبقى على إيه الضغط ده كلّه !! اللىّ يتّسع الوقت لقراءته أهلا و سهلا و ما لن يتّسع له يبقى مفيش نصيب و مبروك على اللىّ لحقوا يقروه و هارد لك ليّا أنا ..

رواية "ربع جرام" ما قرأته عنها و انطباعى الشخصى عنها -دون أن أقرأها- أنّها مثل الخضار السوتيه .. مفيده لكن غير ممتعه .. مفيده كمعرفه يحتاجها الآباء خوفا من تعرّض أبنائهم لتجربة الإدمان لا قدّر الله .. لكن أسلوب كتابتها ركيك ومن ثمّ من زمان و هى ليست على قائمة اختياراتى

مؤخّرا أميل أكثر لقراءة الروايات القديمه الشهيره التى لم أحظ بقراءتها حين كان يجب أن أقرأها يعنى "نجيب محفوظ" أكيد .. "توفيق الحكيم" ممكن .. "يوسف إدريس" جايز .. الروايات القديمه تتميّز بعدّة أشياء أهمّها إنّها غالبا هتطلع حلوه فمش هتعتبر قراءتها تضييع وقت و سعرها كمان ممتاز جدّا .. باتغاظ جدّا أمّا أضيّع وقت فى قراءة شئ ما و يطلع مقلب .. بس بانتقم شر انتقام و أفضل أقول لكل الناس إنّه سيئ جدّا بلاش تشتروه :) أصل بصراحه مابحبش كاتب يجرّب فيّا .. الحياه مش مستحمله و الوقت مش متّسع لهذه الدرجه للتجارب الطليعيه .. ده غير إن كل مادخل عليهم البيت بكتب جديده باحسّ إنّى محتاجه أستخبا كأنّى عامله عمله فبقت الكتب الالكترونيه أفضل من عدّة نواحى بس فى الآخر الكتاب الورق ميزته إنّك تاخديه معاكى فى أى مكان و تعلّمى فيه على اللىّ عجبك .. موضوع الكتاب الصوتى ده بالنسبه لى مش لطيف أوى لأنّى غالبا هاسرح و انا باسمعه :) بس الناس فيما يقرئون مذاهبووو

بنت القمر يقول...

انا جعان
==========
اتفق معاك جدا في ان متعه الكتاب الورقي اكبر.. لكن احيانا بتكون المتعه دي نقمه لو دفعت في الكتاب مبلغ وطلع مقلب
او اشتريته وهو مغلف وطلع اي كلام
يعني ميزة وعيب ممكن اتصفح الكتاب اليكترونيا.. ثم اقرر الشراء من عدمه!
حكايه ترشيد الوقت اعتقد ان كلامي عنها نوع من الهجص:))
لاني فقط اشارككم المشكله اللي انا فيها... لكن لو كنت لاقيه حل كنت حليتها... متخافوش اعتقد ان سأظل في الفضاء السيبري صورة المختلفه علي حساب شرايين دماغي واعصاب عيني بقدر ما استطيع... انا الحمد لله سريعه جدا في القراءه... منذ سنوات الدراسه فقد كانت كتبي الجامعيه اقلها من 600 صفحه
لكن يظل الباقي والمطلوب انجازة اكبر!!
دمت بخير واشكر مرورك وتحياتي

مهندس مصري يقول...

اللنك مش راضي يفتح معايا
عموماً حأحاول تاني
شكراً مقدماً

بنت القمر يقول...

زمزم العزيزة
------------------
جميل تصالحك مع الموضوع ومع الدنيا... احسدك عليه:))
طبعا القراءه المسموعه ممكن تبقي حل لطيف زي الراديو بس اعتقد ان ها هاتترك احساس مختلف عن القراءه للورق
يعني الصوت اكيد ها يؤثر علي احساسك بما تسمعيه... مش عارفه مجربتش بس يتهيالي
ربع جرام مش ها اجيبه لانه كبير جدااااا وغالي اعتقد اني لازم اخلص المخزون اللي عندي الاول
ذات_ صنع الله بدايتها شدتني بخلص فيها
الحاجات القديمه متعه بحاول اجبر الصغيره عليها... بمعنيي اصح ببتزها!!
بقايضها علي القراءه بأي شيئ من هواياتها السخيفه
ام رخمه انا... نورتيني

بنت القمر يقول...

مهندس مصري
=================

موقع التحميل

ممكن تعمل سيرش داخل الوقع,, باسم الكتاب او المؤلف بعدين داون لود

وجهة نظري يقول...

بصي ... مش عايز أبقي زي إلي بيضرب كرسي في الكلوب والفرح شغال. بس أسف إني بنبهك إن الكلام دا إسمه إعتداء علي حقوق الملكيه، وميصحش تشتركي فيه علي الأقل بشكل علني.

حابقي كذاب لو قلتلك الهارد ديسك بتاعي مفيهوش 10 كتب من الإنترنت، بس متعرفيش أنا بأنب نفسي أد إيه وحاسس بذنب كبير. أنا مبعملش كده غير لو كان مستحيل ألاقي الكتاب مطبوع ... وخصوصا إني عايش بره مصر ومفيش مكتبه هنا ممكن تلاقي فيها أي كتاب أجنبي .... ومعظم إلي أنا عايزه مش بيتباع أونلاين. وبرضه دا مش مبرر.

الكلام دا بينسحب علي البرامج برضه ... بس أنا معنديش أي برنامج مش مرخص.

عارف إن الحياه صعبه جدا ومش كل حاجه ممكن نشتريها ... وأسعار الكتب والبرامج غاليه .... بس تحبي تألفي حاجه وتلاقي الدنيا كلها بتنزلها من علي النت مجانا؟

أنا أسف جدا... وعارف إن نيتك سليمه ... بس برضه أتمني تعلمي بنتك الحفاظ علي حقوق الأخرين ... ودي حاجه مهمه أوي.

تحياتي.

كوارث يقول...

سلامو عليكم
ما شاء الله ما شاء الله
كل ده
دنتي عقل خارق بقه
واحة غروب بهاء طاهر تستاهل كل خير و صنع الله إبراهيم مقريتلوش الا بيروت وبيروت و كانت مؤثرة نوعًا ما
في حاجه لازم اقولها
بعض الكتب ده = مسروقة - اسكانر واللفظ صريح لان ليها حقوق طبع ونشر وتوزيع لكن اللى نشرها ضرب بكل ده عرض الحائط
مش معنى كده ان كل الكتب مسروقة بس فيه نسبة كبيرة فعلا منها
اي كتاب او رواية تباع في السوق وكاتبها عايش ولها دار نشر اكيد محتفظة بكافة حقوق النشر
والنشر على الانترنت مخل بده
بس كده

عزيز عيني يقول...

تصدقي الكتب الالكترونيه جت نجده نظرا لمعاناتي في وجود كتب مطبوعه تخيلي لو طلبت مثلا من اي حد جاي من مصر كتب كأني بقوله هرب مُخدرات بطه او وزة مدبوحه ممكن لكن كتب نو

MaGn0liA... يقول...

انا اكتشفت الكنز ده من سنه

و بقى عندى مجموعات كامله على سى ديهات

شكرا جدا للمواقع و جروب الفايس بوك

بنت القمر يقول...

وجهة نظري
==============
انت فعلا ضربت كرسي في الكلوب.. انا تسائلت فعلا عن السبب اللي يخلي الناس تنشر الكتب دي رغم ان الموقع ما فيهوش اي شيئ يدل انه ربحي زي الاعلانات
بس الحقيقه انا تسائلت من ناحيه حقوق الملكيه لاصحاب الكتب مش من المعتدين عليها
ورغم اني معنديش وصله للدش.. لاني عارفه انها اعتداء علي الملكيه الفكريه لاصحاب القنوات المشفره
الا ان الموضوع لم يخطر في بالي بالنسبه للكتب... طب قلت لي ليه اعاااااا
:((
تقريبا هو الواحد لما بيكون محتاج الشيئ اوي بيسقط احتماليه الحرمانيه من تفكيره
غالبا انا محتاجه الكتاب اكتر من الفيلم المشفر
ماشي يا سيدي نورت المحكمه
ونورتني

بنت القمر يقول...

كوارث
==========
وعليكو السلام... علم يا فندم نورت المحكمه
والمدونه
تحياتي

وميض ابتسامة يقول...

شئ جميل ان يزدحم يومك .. بأشياء تسعدك ولكن اكيد بيبقى نفسك تلاقى وقت صغير لنفسك فقط.. ده مجرد رأى!!

اما بالنسبة للمكتبة الالكترونية فأكيد انها ح تأخذ المزيد من وقتك الثمين..

وعجبنى جدااهتمام ابنتك بقصص الرومانسى الحالم يوسف السباعى وده طبعا عن طريقك .. وكذلك المذهل يوسف ادريس الذى احتفظ بمؤلفاته الكاملة فى مكتبتى

انت محتاجة اعادة ترتيب للوقت وربنا معاك واتمنى ان يكون اخوك فى احسن حال
وكل عام وانت بخير

Abd-Alrahman يقول...

مشروع جميل
ياريت تكتبي معلومات كتير عن المكتبة عشا ن انا كمان عايز اشترك فيها
وشكرا علي التدوينة الرائعة تحياتي

بنت القمر يقول...

عزيز عيني
============
ليه انت عايش فين؟؟
وبعدين ليه مش بيجيبولك كتب من مصر؟؟
مش فاهمه
لينك موقع التحميل في ردي علي مهندس مصري ادخل عليه وسيرش باسم المؤلف او الكتاب ودوان لود
ده جروب الفيس بوك

المكتبه الاليكترونيه

نورتني

بنت القمر يقول...

ماجنوليا
===========
العفو ... مبسوطه انه في ناس عرفت الفكرة عن طريقي مطلعتش بس انا اللي مش عارفه
نورتيني:)

بنت القمر يقول...

وميض ابتسامه
==============
فعلا اليوم عاوز يوم فوقيه كلامك صحيح تماما
وكلام زمان الوصل برضه صحيح اني لازم الاقي نفسي بره الانترنت
بنتي للاسف بتكره القراءه جدا :((((
انا بجبرها عليها وبفرض عليها القراءه فرض
وبحاول انوع لها... حسب الذوق والسن والقابليه ودي شيئ مضايقني حاسه ان مخها بلاطه... وحجتها دايما انها متشبعه بكتب المدرسه!!
نورتني جدا وانت بالصحه والسلامه

بنت القمر يقول...

عبد الرحمن
=========
لينك المكتبه عي ردي علي عزيز عيني تحت تعليقك مباشره
موقع الفور شاريد للتحميل في ردي علي مهندس مصري
اتمني لك الاستفاده
نورت

.:.-=- ELGaZaLy-=-.:. يقول...

السلام عليكم ورحمة الله وبركاته..

ياه يا بنت القمر

عارفة من فترة يمكن من سنتين اكتشفت الكنوز دى..ومن يوميها ومكتبتى الاليكترونية تضم كتب عدة وبما ان الطابعة متوفرة فيمكن ان اطبع

بس عرافة مش عارف لية برضة بشترى اللكتب..يمكن غواية او يمكن بحس اندة رد حق للمؤلف..

كل عام وانتى بخير واسف على التاخر فى الزيارة

عباس العبد يقول...
أزال المؤلف هذا التعليق.
عباس العبد يقول...

زمان الوصل
انتى عاملة زى بالظبط , انا محبش كاتب يجرب فىّ و لو الكتاب معجبنيش , و سىء تبقى فضيحته و فضيحة الكاتب بجلاجل . يا لهوى أصل انا قلبى أسود قوى فى الكتب و بشيل و أكتم جوايا . كله الا الفلوس ما انا تعبان فيها برضه و لازم حقى يرجعلى . إن مكنش متعة من القراءة يبقى متعة من فضيحة الكاتب و الكتاب .
--
انا بقى يا زمان خلصت أنتاج " مكتبة مصر " من زمان , ادريس و السباعى و
الحكيم و محفوظ و الخ .. الخ
نصيحة من صديق الكترونى
اقرى لمحمد مستجاب لو مكنتيش بتقريله , و ابتدى بكتابه حرق الدم
=======
بنت القمر
انتى قتلتينى
طعنتينى بخنجر مسموم . بقى التلصص من أسوا ما قرأتى !!!! .
انت عايزة تموتينى .. انا عارف انك عايزة تخلصى منى .
هو صنع الله أبراهيم يكتب حاجة وحشة . ده يوم ما يفكر يكتب حاجة وحشة تستحق جوائز الدولة . حرام عليكى , دا أنتى فى رمضان
ليه تقولى كده ؟ .. ليه تشوهى صورة الكاتب العظيم ده ؟
عملك ايه ؟ و انا عملتلك ايه ؟ .. انا لو مت بالسكتة القلبية , يبقى أنتى السبب من اللى أنتى كاتباه ده .
التلصص بتاعة صنع الله دى , شديدة موت .
--
عابر سرير
أسمها الأصلى عابر سرير

بنت القمر يقول...

محمد الغزالي
===========
انا بفا اكتشفت الموضوع قريب جدا.. عشان كده قلت يا للعار بس الحمد لله لقيت ناس غيري في التعليق مش عارفه وكويس انهم عرفوا ده شيئ كويس وارضاني اني افدت الاخرين
انا متابعاك يا محمد من خلال الريدر ولا يهمك وتنور اي وقت
تحياتي

بنت القمر يقول...

عباس العبد
============
طبعا زمان صاحبتي ومن اقرب الشخصيات لي في الفضاء السيبري وعشان كده ها اعتبر نصيحتك لها موجهه لي بشكل غير مباشر وها اجيب مستجاب:))
--------------------
بص بصراحه مكنتش قريت لصنع الله خالص لحد قريب
لكن نتيجه للضغط النفسي الرهيب ومش من الاخرين _هو الكسوف من نفسي بس حسيت اني انا الجاهله الوحيده في مصر اللي مقريتلوش.. واخر مره روحت منشأة المعارف دفعت مبلغ وقدره لحد ما نزلت تلصص وذات اليكترونيا
بصراحه اتخنقت ممله اوي... تفاصيل جوه تفاصيل جوه تفاصيل!!
ميهمنيش جوايز الدوله المهم يوصلني احساس معين... انا بقرا ذات دلوقت الحقيقه شاداني ... بحب اقرا رسم مطول للشخصيه وتفاصيل للمكان بالشكل ده
لكن الحكم النهائي لما اخلصها
بهاء طاهر نفس الشيئ حاجات عجبتني وحاجات لا.. مجموعاته القصصيه القصيره يعععععننننني
لكن واحه الغروب افضل بكتير من ما قرأت له من قصص قصيره
وبعدين يا سيدي بعد الشر عليك ده انت تموت بلد وانت قاعد:))
عابر سرير... انا اول ما قريت عنها كانت عابر سرير بس في اللينك اللي انا حاطاه لو كتبت احلام مكستغانمي ها ينزل لك بعابر سبيل!!!
لدرجه اني اتخضيت وشكيت في روحي يمكن السايت محافظ شويه؟؟!!
فكرتني والله ها اروح ادور علي عباس العبد
أعمل سيرش واداون لودها... ولا اكتب العايدي.. علي الله ما تكونش زي ما بيولوا قصه مليط بيها الورق:)))
نورتني

ذو النون المصري يقول...

انا برضه حملت كتب بالجمله من النت و من كثرتها صنفتها فمنها مثلا كتب عن العقل و كتب عن المراه و كتب ديانات و ادب عربي و ادب مترجم و تراث الخ حتي كتب باسماء مؤلفيها
كتيره هي كتب النت لكن قرات كتاب سر تاخر العرب والمسلمين للشيخ الغزالي من كام يوم علي النت و عيني اتحرقت من البحلقه في الشاشه و ده كان رابع او خامس كتاب احاول اقراه علي الجهاز
ايضا النهار لم يعد مع اللي كافي لانجاز كل ما اطلبه فغالبا ما اترك بعض الامور الهامه لانجاز امورا اخري حتي لا اترك شيء بلا عمل جديد فيه

عايش ولكن يقول...

موضوع الكتب اللى ع النت ده ضر كتير اصحاب الكتب
بس بينى وبينك طريقه سريعه للقرايه والمعرفه برغم ان الواحد نظره بقا بايظ خالص

Mahmoud25x يقول...

الف شكر على ذكرك الجروب وانا برحب بكل الناس وياريت يتفضلوا عندنا
وفعلا زى مبتقولى ممكن تعملى بحث فى الفورشير وغيره ولو دورتى زيى هتكتشفى بلاوى .
ولسة فى بلوة تانية اسمها التورنت ؟
وهيا الكتب اللى مش موجودة بالمعنى المفهوم للتحميل المباشر ولكنها تقني جيدة فى التحميل

وعلى رايك هتحصل تخمة ما بعدها تخمة :)

المهم نقرأ ونقرأ
تحياتى

Sherif يقول...

من فضلك بلاش التهديد بالتوقف عن التدوين .. كل عقلية جميلة لابد ان تدلى بدلوها

من المهم بعد هضم الافكار تدولها ليستفيد الغير بالتجارب الشخصية غير انك تسدين خدمة عظمة بتقديم عرض مبسط لفكرةاو كتاب اعجبك ..

بهذه الطريقة كل واحد يوفر كثيرا من الجهد على اصدقائه .. كفاية ان تقولى .. اقرا ده وبلاش تقرا ده لانه ملخصه بيقول كذا ..

هل ممكن تعطينى اللنك بتاع الكتب الالكترونية؟

لكى جزيل الشكر

عزيز عيني يقول...

انا مُقيم بميلانو المشكله ان معظم الناس الموجوده معانا
بُسطا والطلبات المُعتاده فطير مشلتت بط سجاير غير كده بيقلقوا جايز عشان مواقفي السياسيه المُعلنه
وشكرا علي الجروب

M@RV3L يقول...

احب ارحب بيكي في نادي" الناس اللي بتنزل الحاجات من النت ومش بتعمل بيها حاجة"
:)))

انا منزل فوق ال6 جيجا كتب على امل اني اقراهم في يوم من الايام..ده غير الافلام اللي واحد بيركنها لحد ما يقدموا واشيلهم من غير ما اتفرج عليهم عشان انزل غيرهم

مش عارف الحالة دي بيسموها ايه..طفاسة ممكن!؟

بنت القمر يقول...

ذو النون المصري
==================
الاولويات ... ترتيب الاولويات هو المهم... اعتقد اني ها احتاج فلتر للشاشه... كمان انت ممكن تقلل درجه انارة الشاشه ها تريح عينك
نورتني

بنت القمر يقول...

عايش ولكن
===============
مش اوي برضه لانه الكتاب الورقي ما زال هو السلعه الاولي
ومش كل الناس عندها خبرة وتقنيه تنزل كتب من الانترنت
وسلامه نظرك
تحياتي

بنت القمر يقول...

محمود مندور
===============
نورت يا محمود.... حلو التورنت ده ها اشوف برضه ايه نظامه ولو ممكن يكون علي الجروب يبقا خير وبركه.... ومشكور اوي علي مجهودك
نورت المدونه

بنت القمر يقول...

شريف
============
انا مش ها ابطل تدوين... انا ها اوازن بين النشاطات المختلفه... عشان كل حاجه تاخد حقها


موقع تحميل كتب اليكتروني الفور شاريد
ممكن جوة الموقه تدور علي الكتاب باسم الؤلف او باسم الكتاب نفسه
تحياتي

بنت القمر يقول...

عزيزي عيني
==============
طيب عندك الجروب اهو... وموقع التحميل كمان... يلا حمل وادعيلي
ولا جمايل من صحابك... نورتني

بنت القمر يقول...

مارفيل
==========
اه طفاسه... وبيحصل بعدها تخمه... بس انا مش دماغي الافلام اوي.. وان كان ممكن تقولي برضه بتحمل منين
عن نفسي ها احاول اوازن بين كل دول ازاي مش عارفة؟؟:)
نورتني