تقول رويتر:يسود الوئام علاقات المسلمين والاقليةالمسيحية لكن نزاعات تنشب بسبب بناءالكنائس أوتجديدها والعلاقات النسائية وتغيير الديانه
بإمكانك ان تقول
يسود الوئام بين المسلمين والمسيحيين لكن خلافات تنشب بسبب بناء الكنائس وتجديدها والعلاقات النسائيه وتغيير الديانه
بإمكانك ان تقول:
يسود الوئام بين المسلمين والمسيحيين بسبب بعض الاحتكاكات حول بناء اماكن العباده والنزاع علي الاراضي الخاصه بها.. والزواج المختلط وتغيير الديانه
بإمكانك ان تقول
يسود الوئام بين المسلمين والمسيحيين لكن نزاعات ذات بعد طائفي تنشأ بين الطرفين لاسباب متعدده منها الزواج المختلط بين مختلفي الديانه!!
ممكن تقول المسلمين يحاصرون مبني حوله المسيحيين الي كنيسة..
او تقول الوف المسلمون يحاصرون مبني وكأنك بتوصف حرب اهلية!
ممكن تقول كلام كتير جدا داخل صيغه واحده محدده ذات بعد تحريضي!! ان تؤكد لاي طرف انه في حاله تهميش لانه اقليه مجرد اقليه!!
سواء عدديه او دينيه او عرقيه ان تخاطب طرف باسمه(المسلمون) والاخر مسبوقا بكلمه اقليه!!
فأنته تحرضه وتدفعه نفسيا الي زوايه الحائط!
ان تحشد كل صعوبات التعايش المشترك في جمله واحده من طرف في مقابله الطرف الاخر فانت تحرضه!
عزيزتي الاقليه المسيحية>>
ولان المتفق عليه في تلك المناسبات الطائفية ان ينبري بعض المسلمون الطيبون الي التاكيد علي حبهم الجارف لاصدقائهم المسيحيين وامتنانهم لاستاذتهم من اول الحضانه وما قبل الحضانه وطنط ميرو وعمو بطرس ومسيو مينا!
مؤكدين اسفهم واعتذارهم عن اي سوء يلحق بشركاء الوطن مدفوعين بمشاعر جارفه من الاحساس بالذنب والرغبه في التبرير
وكعاده بعض المسلمين(المش طيبين) اللذين سوف يؤكدون انكم كأقلية ضربني وبكي وسبقني واشتكي
وانكم خنقتونا شكاوي كل شويه مش عارفين نراضيكم!!
وكعاده بعض المصابين بالاخوان فوبيا الذين ما صدقوا يعلقوا الاحتكاك الطائفي علي شماعة الاخوان
رغم انها خناقه علي بيت اتحول مصنع ثم جري تحويله الي مسجد(شبه قصه دير قانا)
وحيث اننا شعب مؤمن مصلي ويعرف ربنافالحل ليس ان اكون مسلم طيب او مش طيب!!
ولكن اذا كانت كل الخناقه ان المسيحيين قفلوا المصنع وحبوا يصلوا فيه لانهم شعب مؤمن وملوش في الشغل
ولا ن المسلمين مش اقل ايمان من المسيحيين... وبرضه مش بتوع شغل وقالوا الله اشمعني القبط يصلوا واحنا لا؟!!
طب والله لا نصلي و اكتر من صلاتهم !!
وحيث ان الخروج من مصر اصبح محفوفا بالمخاطر فاما ان تغرق علي حدود ليبيا او تأكلك الاسماك في البحر الاحمر او تروح تتجلد في السعوديه وتقول احد أحد!!
وبما اننا لسه قاعدين في وش بعضينا والوشوش بتتقابل لحد ما نقابل وجه كريم!
ادعو جميع المصريين الاقليه وغير الاقليه كل واحد يفسّح لاخوه عشان يصلي.!!
.. لازم نصلي كلنا واللي ما يصلي ما يبقي مننا !!
وكل من له نبي يصلي عليه..
نقلب البلد ساحات عامه للصلاة.. ان شاالله نخرج الصحرا كلنا نصلي بس ما نتخانقش
. ما هو لازم كلنا نصلي عشان ربنا يبارك لنا
بلا مصانع ولامحو أميه ولا ورش..
. فسّحوا لبعض وصلّوا!!
هناك 36 تعليقًا:
منذ عدة أعوام وعندما استلمت عملى فى شركة مملوكة لمسيحين وتعمل بها أغلبية مسيحية ..حاولت استكشاف وفهم العلاقة الحقيقة بين المسلمين والمسحيين فى مصر ، والاسباب التى تؤدى لحدوث الخلافات والمشادات وتخيلت انى سأراها واضحة واننى بمجرد ان استلم عملى سيبدأ تراشق المصاعب لكننى لم اجد اثرا لذلك ومرت سنوات ولم ارى ما يحدث فى الشارع المصرى فى منظومة صغيرة ممثلة للشارع المصرى
ربما الان اتبين ان كل الخلافات الكبرى تأتى نتيجة لظاهرة " الصوت العالى " والعنجهية والقبلية .. ولا أساس مطلقا لما يزعمه بعض المتدينين تدين ظاهرى والمتعصبين بأن المسيحين "يسعون للسيطرة على البلد" ،أو نظرية المؤامرة التى تظهر فى كثير من الاحيان فى سلوك بعض المسيحين المتعصبين
وتظل مصر هى الضحية فى طوال الوقت
للاسف مازال هناك بعض المغرضين والمتشددين الذين يسعون سعيا للخراب بين المسلمين والمسيحيين .. المصريين!!!
وسأقول زى ما قالوا زمان .. الدين لله والوطن للجميع
مصريون .. هذه هى الهوية
والديانة .. لله وحده
موضوعك جميل ومناسب لاحداث الفتنه الى بتحصل حاليا .. انا بس عاوز اقول ان من واقع عملى كصحفى بيكون نقل الخبر من الامور الحساسه جدا .. يعنى احنا اتعلمنا ان الصحفى لازم يكون علمانى فى شغله حتى لو كان مش علمانى فى حياته الخاصه .. مثلا فى المؤسسات الصحفية العملاقه ممنوع تستعملى الفاظ ليها دلالات تعبر عن رايك الشخصى كصحفى او كمؤسسه صحفيه زى كلمه شهيد لوصف القتلى الفلسطينيين او كلمه المحتل فى وصف جنود اسرائيل... الخ لكن العزاء فى استعمال رويتر لكلمة اقليه مسيحيه هى كون المسيحيين فعلا اقليه يعنى كاتب الموضوع بيعتبرها حقيقه رقميه اكتر منها انحياز لاتجاه معين
اما عن رايى فى القضيه بالكامل فا انا متفق معاكى فى عدم القاء اللوم على الاخوان .. بصراحه اللوم يقع على جهل وتعصب وتشدد مجتمع بالكامل مش مجرد فئه او حتى دين معين
وربنا يستر
تحياتى ليكى
السبب فى كل ده النظام
لانه نظام فاشل بدل ما يحل المواضيع بيقعد يهديها ويعقدها اكتر
بمجالس عرفيه
زى مثلا الازمه اللى كانت بين النصارى و لعرب فى دير ابوفانا عمله مجلس عرفى
ومطلعوش حد غلطان طب ازاى اكيد حد من الطرفين لازم يتعاقب
مش عارفة ليه حاسة إن الضلع المسمي الجهل في مثلث التخلف إياه هو السبب
أصل مافيش سبب تاني
وكمان الميديا بتهويلاتها .. طيب التاريخ ليه مانقلش أحداث مشابهة زمان
وبعدين إية حمي الإعلان عن التدين بالصلاة دي .. ما أرض الله واسعة صحيح .. والغريب انه مثلا رغم عدم وجود يهود تقريبا هنا بس احنا محافظين علي كذا معبد يهودي لغاية دلوقت .. بكرة ينتبهوا لهم ويروحوا يحتلوهم
صدقيني هو الجهل اللي بيخلي الناس تروح ورا أي حاجة وأي حد
لا ينهاكم اللهُ عن الذين لم يقاتلوكم في الدين ولم يخرجوكم من دياركم أن تبرُّوهم وتُقْسطوا إِليهم إنَّ اللهَ يحبُ المقسطين
======
اما عن تلقى المعلومات أو حتى الوعظ وتنفيذة والتصديق عليه دون وعى هذه هى الخطورة
طول ما فى جعجعه وجهل
انسي
طب اتفضلى هى ناقصهم هما كمان
اقبط المهجر باوروبا نخعوا بيان متين ربنا يقويهم
انا من منبرى هذا بقدم اقتراج ستنبثق عنة لجنة وينبتق عنها عدة لجان فرعية
اننا نقفل دور العبادة ونصلى كلنا فى الساحات والشوارع والارض كلها مسجد لله
النهايه في موضوع العلاقه بين المسيحيين و المسلمين في مصر انه يجب ان نتناسي الدين تماما في علاقاتنا مع بعضنا البعض و ان نترك الدين لله و ان نعترف بان الوطن للجميع و علي من لا يريد ان يوافق علي هذا الميثاق التاريخي ان يغادر البلاد
يا ريت كنتي كتبتي البوست بشكل تهكمي اكتر من كدا شوية عشان نعرف انه هزار وكوميديا سوداء
بجد انتي شايفة الحل اننا نخرج كلنا نصلي في الشارع؟؟
ده حلك للموضوع يعني؟؟
انتي شايفة ان الحل يكون بتسخيف الموضوع بالشكل ده؟؟
و يا ترى انتي من انهي نوع من المسلمين؟؟
لاني شايفة انه مش عاجبك ولا حد فيهم
و اعتقد ان المسيحيين مش مستنيين وكالة انباء تقلهم انهم اقلية او مش اقلية
ده لقب بيطلق كنتيجة لحدوث تعداد سكاني جيوغرافي و بناء عليه بيشوفوا الكمية الاقل
فبتسمى اقلية
فالعراق مثلا بيطلع على الاكراد اقليه مع انها مش ديانة
و مش المقصود دفعهم لحالة انزواء
ده فقط تقرير واقع
لانهم اقل بالفعل
و في اي مكان حيكون فيه اقليات حتكون مضطهده اي نعم بس مش باذن من وكالة انباء حيادية و نيجي احنا نطلع في رويترز العبر
احنا نطلع في السي ان ان
العربية
سي بي اس
بس مش وكالة انباء
احمد الصباغ
============
صحيح ان العلاقات جيده بين الطرفين علي المستوي الفردي ومفيش مسلم الا وليه صديق مسيحي او العكس يقدرة بشده ويحترمه او جار او مدرس يمتن ليه بحق
لكن منقدرش ننكر انه علي المستوي العام في حاله احتقان وتربص
نورتني
ابتسامه
===========
ان شاء الله يكون القادم احسن
تحياتي
محمد حمدي
===========
الاقباط اقليه عدديه
ده حقيقي لو بنتكلم عن احصاء فا نقول الا غلبيه مسلمين والا قليه مسيحيين لكن لما نتكلم عن حدث معين زي عين شمس كلمه الا قليه في مواجهة المسلمين بتدي شعور سيئ
لو انا مسيحيه مش ها احب حد يقول عني اقليه..!! قبل كل كلمه لانها بتكثف الشعور النفسي بالمعاناه وبتكرس للانزواء
لما اقول المسلمين يحاصرون مبني
تختلف عن اني اقول الالاف المسلمين يحاصرون مبني وخصوصا يعني تن محدش عد:(
لما احشد النقاط الحساساه والمطالب الخاصه بالمسيحيين وارفقها بالخبر و يبقي انا بضرب علي وتر مضطرب ومحتقن
_ الاخوان ورا الاضطرابات اولا معنديش فكره ومقصدش ابرأهم او ادينهم اصلا
انا كنت برصد ردود افعال التدوينات اللي كتبت عن الخبر
لانه في ناس فعلا عندهم اخوان فوبيا بطريقه مضحكه جدا كل مشكله يقولوا الاخوان بصورة هيستيريه اصلا
تحياتي لك
اوعي تفكر
============ اتفق معاك تماما
في غياب تام للدوله سواء في قضايا اللي بتهم الناس بشكل عام او ذات البعد الطائفي الدير او غيره
وده بيزود المشكله حاله التراخي الحكومي المريع دي تحياتي
بثينه
========
الجهل والازمه الاقتصاديه والتراخي الحكومي المريع في حل اي مشكله وعدم ثقه الناس اصلا ان الحكومه عاوزة تحل اي حاجه
اسباب كتير
مستحيل ومش قادرة اصدق ان اي حد عاوز يصلي ممكن يضرب او يرفع سلاح
الصلاه حاله روحانيه متنافيه بشده مع اي عنف
مش قادرة اصدق ان في واحد مسلم بيروح جامع او مسيحي بيروح كنيسه مش بيلاقي حته يصلي فيها وبيلاقي المكان كومبليه فلا بيروح بيتهم يعمل شغب او يعتدي علي مكان عباده تاني
ابدا
تحياتي
الطائر الحزين
==============
المتدين الحقيقي او الباحث عن براح يصلي مستحيل يكون عنيف او يشيل سلاح المنطق بيقول كده
نورتني
اسامه عبد العال
==================
فعلا ناسيه جدا في الوقت الحالي
ميدو
========
انا شفت كذا فيديو للاحداث يا ميدو
اقولك النكته المضحكه جدا
ان الفيديو كل واحد بيعتبره تعدي من المسلمين علي الاقباط في نفس الوقت اللي بيعتبره تعدي الاقباط علي المسلمين
:)))
بصراحه انا معرفتش افرق دول عن دول في الفيديو مش عارفه ازاي حد ياخد صورة واحد انها مسلم او مسيحي وخصوصا الا حداث كانت بالليل
اقباط الهجر ربنا يديهم الصحه برضه
سيب كل واحد ورزقه
العبادة لها حٌرمتها لكن الحٌرمة دي بتٌنتَهك أول ما تٌنتَهك من أهل الدين نفسه عندما يوظفوها فى غير غرضها
طبعاً وسائل الإعلام سواء كانت محلية أو عالمية لها أغراضها المختلفة وأسلوب نشر الخبر مش بيجي إعتباطاً. حتى المواضيع التى يتم عرضها للناس للتعليق يتم إنتقائها بصورة مٌغرضة وده واضح جداً فى البي بي سي بصورة فجّة
ملاحظة:إخوان/سلفية/وهابية فوبيا دي كلمة مهذبة جداً
أتفق تماما معك في أن الصياغة الخبرية هي درجة من درجات "مقال الرأي" ويؤسفني أن هناك من يعتقد أن الخبر الصحفي ينقل "وقائع" بينما مقال الرأي محمل بالعواطف والتوجهات والتوصيفات المتحيزة بالضرورة.
وانا بالفعل أحضر لبحث في هذا الموضوع من خلال عملي في التحرير الصحفي والترجمة.
هناك وكالات أنباء ساذجة جدا مثل الفرنسية وفعلا الخبر الصحفي لديها محمل بكثير من التوجهات والعواطف.
أرشح لحضرتك كتاب السياسة وسلطة اللغة للدكتور عبد السلام المسدي. أنا شخصيا أقرأه الآن القراءة الثانية في أقل من شهر.
في أمان الله
مش عارف حاجه
============
اكيد ربنا ما يرضاش انه عشان نبني ليه بيت باسم الدين او الصلاه الناس تقتل بعض او تموت بعض
ذو النون المصري
===============
مش مطلوب ننسي الدين لكن نتعايش مع سنه الاختلاف في الدين او الفكر والشكل واللون
محدش ها يسيب مصر ومش مفروض الناس تسيب بلادها المفروض ان الدين وسيله للمحبه والتسامح مش للعنف تحت اي سبب
تحياتي
انا رأيى ببساطة
منحطش البنزين جنب النار
ونرجع نقول مين السبب الاول فى الحريقة
يعنى لو فى كنيسة محبكش نعمل جنبها زاوية صلاة
ولو فى جامع محبكش يعملوا جنبها كنيسة بمسمى مصنع او غيره
الحكومة المفروض متطلعش تصريحات الا لو اتوفرت شروط المسافة..زى الصيدليات كده وتريح دماغها ودماغنا
بسم الله الرحمن الرحيم
المشكلة فى رأيى ان العقد الاجتماعى اللى المفروض يربط المسلمين والمسيحيين فى مصر لابد ان يكون عقد دائم مش عقد قابل للتفاوض بتغير مراكز اطرافه , يعنى المسيحيين لما دخل الاسلام مصر رضوا بكل احكام اهل الذمة فى الاسلام , واستمر هذا الوضح قرابة الف ومائتى عام لكن مع الحملة الفرنسية وبعد ذلك تدهور الوضع السياسى والعسكرى للعالم الاسلامى بدأت هناك توجهات لتعديل بنود هذا العقد وكأنه صفقة تجارية قابلة للتعديل , وطبيعى اثناء اعادة التفاوض هذه ان يحدث تشبث من قبل كل طرف بموقفه واستعراض للقوة الذاتية حتى يدفع الطرف الاخر لتقديم مزيد من التنازلات وتليين تصلبه , لكن الطرفين دول مش مجرد متفاوضين قاعدين فى قاعة مكيفة او عشاء عمل , دول ملايين من الناس بيتفاوضوا بالصورة اللى احنا بنشوفها كتير فى مصر , اعتقد هى دى المشكلة الرئيسية .
^ H@fSS@^
=============
شوفي يا حفصه لو انتي معترضه علي كميه السخريه اللي في كلامي انا شايفه انها مناسبه جدا مش محتاجه تزيد ولا تقل
يعني انا عياري مظبوط
ووعاجب الناس في السخريه وكويس انك قلتي انها كوميديه سوداء يعني فاهمه
لو انتي شايفه اني بسخف الموضوع اوك دي وجهة نظرك!!!
بس محدش قال كده غيرك.. واعتقد ما ينفعش تقوليلي اني سخيفه في وشي يا حفصه... مش لطيف منك:))
وخصوصا عمري ما غلطت فيكي!!
اقليه او مش اقليه واقليه ونقول لهم انتم اقليه او لا... وجهة نظري وضحتها
واقري تعليق مختار العزيزي عن معالجات وسائل الاعلام
انتي راضيه عن رويترز اوكيه
انا كمان مش عاجبني المعالجه
-----------------------
نقطه بقي انا انهي مسلمين الحقيقه هي اللي عاوزة اوضحهالك
انا يا ستي شايفه نفسي واحدة معتدله لي علاقات كويسه احيانا وسيئه احيانا بالمسيحيين لاني بتعامل معاهم كبشر دون النظر للخلفيه الدينيه بتاعتهم
الكويس بحبه والوحش لا
عادي يعني
لكن معنديش اي احساس شخصي بالذنب ان اعمل ابراء ذمه لانتيمتي المسيحيه او جارتي واقولها والله انا بحبك. وبموت فيكي. وانتم افضالكم علينا ..و..و
زي اللينك اللي حطيته!!
وفي نفس الوقت انظر باحترام وتعاطف كبير لبعض المطالب العادله للاخوة المسيحين
معنديش اخوان فوبيا ومعنديش هيستريا منهم بحيث لو جت انفلونزا طيور تاني اقول الاخوان السبب:D:D
-----
منورة يا حفصه....
ما تنسيش ما بحبش حد يقول اني سخيفه في مدونتي!
اشكرك
اولا
المظاهرات اللي حصلت فعلا كانت بقيادة اخواني اسمه محمد يوسف أبو حسين فهي فعلا من افعالهم مش بنتبلى على الناس يعني و لا تحبي اجيبلك رقم بطاقته الشخصية؟؟
ثانيا
انا مقلتش انتي سخيفة، انا قلت اني سخفتي الموضوع و فيه فرق كبير بين الكلمتين.انتي حابة توجهيها لموضوع شخصي فده شئ يرجعلك و على العموم انتي يا اما بتغلطي و الواحد بيسكت
ثالثا
مافيش حد بيقول نعمل ابراء ذمة بس انا ببص للموضوع اني زي ما احب اتعامل كوني اقليه لو سافرت بلاد برة
فاحب اني ادافع عن الحق ده سواء و انا عايشة كاكثرية او اقلية ، دي مبادئ اخلاقيه لا تتجزاء ، انا مش متضامنة مع المسيحيين عشان ليا صحاب منهم،لا، انا متضامنة مع الموقف كله عشان متحطش فيه لاي سبب
ارجو ان ده يكون مفهوم، صحابي المسيحين دول لا واعدني بجايزة و لا بفلوس عشان اروح استسمحهم او احب انول منهم الرضا
رابعا
عاوزة اعرف انهي لينك حطيته ؟؟
و فين؟
في مدونتي؟؟
مش حاطة حاجة
لينك ايه بقى اللي بتحكي عنه؟؟؟
يا ريت توضحيلي
خامسا
مش معنى ان اغلب اللي علقوا متفقين معاكي يبقى انا كمان لازم اخش و اوافقك الراي زيهم او اني استنى لما اشوف الكل قال ايه و اقول زيهم، دي تبقى مشكلتك انتي انك مش عاوزة حد يختلف معاكي مش مشكلتي انا اللي صعقت من حلك للازمة اللي بيموت فيها ناس كل سنة
سادسا
"
ما تنسيش ما بحبش حد يقول اني سخيفه في مدونتي!
اشكرك
"
انا اللي اشكرك والله لاني الظاهر اني غلطت لما واجهتك برايي و يبدو ان الحل الامثل كان اني اروح احكي عنك من وراكي او الافضل، اكتب بوست في المستخبي و ابث فيه سمومي فقط كوني معترضة لكن لا املك شجاعة المواجهة و اشاور على الناس لكن من بعيد و امثل دور المدونة الجامدة اللي فاقسة الكل
شكرا
حفصه
=====
-متجبيلسش رقم بطاقه حد لانه كون انه الاحداث وراها اخوان او سلفيين او صيّع
ده شيئ ميخصنيش..
.. التدوينه مالهاش علاقه بالدفاع او الاعتراض علي الاخوان!!!
- التدوينه لها شقين
رويترز ومعالجه الخبر الصراع علي اماكن العباده
- اللينكات عندي يا حفصه امشي علي السطور بالماوس هتلاقي تحتها خط
وها تفهمي ايه بابراء الذمه اللي اقصده وحطيت له لينك وقلت الطيبين
واللينك التاني لرد الفعل المضاد واللي قلت عليهم الغير طيبين
- سخيفه او بسخف واحد مش ها احوله شخصي لانه اصلا ما فيش بيني وبينك اي حاجه علي الاقل من ناحيتي!!
- رد فعلك تجاهه المسيحيين او علاقتك بيهم او نظرتك ليهم وتعاملك معاهم(شيئ يرجعلك) انا لا قلت حد بيديكي ولا حد بياخد منك!
كون انك ما شفتيش اللينكات ده مش ذنبي ..الناس المستديمه هنا عارفه انا بحط اللينكات بلون مختلف وبتظهر بالمرور عليهابالماوس
وكده ابقي واضحه جدا
ومش بشاور من بعيد لبعيد علي حد
ومش ببث سموم
واكون فعلا مدونه جامده جدا
و استحق عن جدارة اهتمام القراء:))
تتكلمي ورايا او قدامي براحتك..
انتي سالتي توضيح علي حاجات وانا رديت بمنتهي الوضوح
يبقي اهلا بالمناقشه... من غير بتسخفي ومن غير سموم والكلام ده
تحياتي يا حفصة
عدي النهار
===========
ايام مقتل دايانا البيبير سي باموامر مباشره من القصر الباكنجهامي و مكنتش بتفتح بقها علي سيره ديانا بس هي عقده الخواجه اللي بتخلينا ننظر بازبهلال لاي كلام خواجاتي
صحيح اله الاعلام هناك جبارة جدا لكنها في نفس الوقت موظفه جدا جدا في خدمه مصالح حكومه او حزب او توجه
نقطه الخبر المحايد لسه مقريتهاش ولا قابلتها في اي صياغه عربيه او اجنبيه الي الان
مفيش خبر محايد ولا حتي في صفحه الوفيات
هيهيهيهي
فوبيا الاخوان
دلوقت البعض يحاول يلكزق لي تهمه اني وهابيه او بدافع عنها رغم اني لا انتمي الي اي تيار ديني او سياسي او حزبي او تدويني
طبعا انا مهذبه جدا.... جداا
مفيهاش خلاف
تحياتي
مختار العزيزي
===============
متفقين انتظر مقالك
شرفت المدونه وشرفتني المتابعه
جانا
=======
اول مرة اسمع حكايه شروط المسافه دي
بما انك سكندريه فاكيد انتي فاهمه وعارفه ان مسجد دوران جيهان في حضنه كنيسه!!!!
الحكومه مطلعتش تصريحات ولا بيانات كل واحد بيتكلم كأنه حضر التحقيقات
والبعض عرض فيديوهات عن نفسي مش شليفه من فيها مسلم ومين مسيحي
وكل طرف بياخدها علي انها حجه علي الطرف الاخر
تحياتي
محمود المصري
==============
كلامك خطير جدا
يعني ازاي الاسلام لما دخل مصر كأنك بتكرس لفكرة الغزو العربي؟!
ناس بتفاوض ناس
مش ارضيه شعبيه مشتركه ناس بقيت علي دينها وناس انتقلت للدين الجديد
مطالب المسيحيين العادله او المبالغ فيها موضوع
لا علاقه له بموضوع الاحتقان الطائفي الناتج عن الغياب الحكومي والترهل والفساد الاداري وبيوزدة عوامل ابطاله والجهل وغياب المشروع الحكومي الوطني الحر
تحياتي
طبعا مافيش قوانين تحدد اى مسافات بين المساجد والكنائس ..ده انا باحلم او باقترح اقتداء بالصيدليات يعنى
وباتكلم طبعا عن اللى لسه ماتبناش او اتحول بالفعل لدار عبادة
مثلا فى مسجد التوحيد بكليوباترا يوم الجمعة وقت الصلاة بيكون تجمع المسيحين فى نفس الوقت فى الكنيسة ..وبيمروا بجانب الحصر المفروشة للتوجه لكنيستهم
بيحصل انك تسمعى احيانا كلمات تحمل بعض التأفف من الجانبين
المار اعتراضا على الجالس فى الطريق
والجالس على الحصيرة اعتراضا على الصوت العالى للمارة
فعلى الاقل ياخدو بالهم قبل انشاء دور عبادة جديدة فى المستقبل بحيث تنتفى نقطة القرب المكانى بالشكل ده
ده كان مقصدى
تحياتى امانى
يعني بلاش خلط ورق بين الصلاة كعبادة كلية الصحة(بتكلم عن الاسلام) وافعال الناس نسبية الصحة لا المشكلة في الفتنة -ان جاز التعبير- هيا الصلاة ولا السبب هو قلة المصانع والكلام الجميل اللي قلتيه المشكلة ليها ابعاد تانية لازم كلنا نقعد مع بعض علشان ندور عليها بدل السفسطة اللي بنقراها في كل مدونة والتانية
هما اقلية بالفعل
ورويترز بتهيألي بتنقل بموضوعية الاخبار لانها وكالة انباء زيها زي الاسوشيتد بريس
فهي في كل الاحوال افضل مليون مرة من المانشتات في الجرايد المصرية بتاعة الحكومة او المعارضة او المستقلة
ساعات هناك " حيرة " في وصف العلاقة بين المسلمين والمسييحين
ما يحدث بينهما من حين لاخر يقع تحت اسم ايه؟
مش عارف
لكنه مصيبة من المصائب
انا فهمت اصدك ايه او بيتهيالي انا فهمت اصدك ايه بقولك
تعالوا نصلي مع بعض او نسيب بعض كل واحد يصلي في حاله
لو ياللا نصلي
ودي دعوة جيدة
دعوة توحيد علي الله رب الجميع
المشكلة بس يا بنت القمر
ان هذه ستكون نتيجة
وليس وسيلة من وجهة نظري
لو فشا العدل حل السلام
ولو تصارح الناس بما فيهم بدون مواربة
وقبلوا - اي كل الاطراف - ان يناقشوا ما فيهم من عيوب اولا قبل ان يصرخوا في الاخر بان لديهم مزايا
ستكون مصالحة بشكل افضل
الاقلية المسيحية تقع تحت عدة اشكال من التمييز في المعاملة
بعضها مقصود وبعضها غير مقصود
بعضها شعبي عفوي الناس بتعمله
وبعضها حكومي
وفيه كوسة طبعا
فيه مسيحيين واصلين ولهم سلطات زي ما فيه مسلمين كدة
وفيه ان الدولة بتلعب بالملف ده حسب هواها
وفيه ان الشعب المصر تدينه - حسب رايي - فسد منذ زمن بعيد واصبح تدينهم عبئا علي حياتهم وعارا علي الدين ذاته وهو بعيد عن الله
تخيلي لما يكون التدين نفسه اللي هوا المفروض عودة الي الله يكون في اصل نفسه بعد عن الله
يعني شئ بشع
هذا التدين القبيح المنتشر
وهو موجود في طبقات عدة من المجتمع
حتى المتعلمين
بل هو في فئة المثقفين
بل هو في بيتي وبيتك وبيت الناس كلهم
هذا التدين خرب كل شئ
فهو تدين الكسالي
والعابثين
والمقصرين
واللائمين غيرهم قبل انفسهم
تدين لا قيمة له
ولا معنى له
ولا يبني شيئا
هذا التدين كيف يساهم في افساد العلاقة بين المسلمين والمسيحيين؟
ليه دور رهيب قوي
بصي يا بنت القمر
انا بقول ولسة مصمم
ما فيش في مصر دين
في شوية ايات مقطوعة واحاديث مبتورة واقوال مبعثرة واراء مخلوطة بالعرف والتقليد
ودي معمول منها دين جديد اسمه اي حاجة
وطبعا فيه شوية طقوس زي الصلاة والعمرة والصوم
وكل ده علي بعضه توليفة رائعة للعودة الي الوراء وضياع الحقوق ..اي حقوق وكل الحقوق
وهو غطاء لعجز أمة بكاملها عن فعل اي شئ
المسيحيون اقلية بالفعل
رويترز ما بالغتشي في المانشت اراه قريب من الحقيقة جدا
والله اعلم
جزاكم الله خيرا
لما نربي اولادنا على ان الدين لله
ستختفي هكذا مشاكل
إرسال تعليق