هذي آخر يونيو/انتخابات/مصريين/عصف ذهني

قلت لها لو مرسي فاز(تخمينها) ها اعزمك علي اكلة سمك علي حسابي في المكان اللي تحبيه/ بس لو شفيق فاز(تخميني) ها اطلب منك الهدية اللي علي مزاجي بنفس القيمة... رهانات اول يونيو. اهه نقامر علي اي حاجة في المسخرة اللي شغالة :))
السلفيين ها يخونوا مرسي زي ما خانوا ابو الفتوح.... تخمينات اول يونيو
لو مبارك خد براءه ها يدفع قطاعات من الشعب ها تكفر فا تنتخب صلاح حازم ابو اسماعيل او مرسي_اي جن ضد النظام_ فتبقي مؤامرة من العسكري لانجاح مرسي بس بطريقة ملتوية. فيحرقه الاربع سنين الجاية ويفشله في البرلمان لحد ما (اي حاجة بقي) يخرج جمال من السجن او يظهر شخص اخر وتخلص اسطورة الاخوان للابد... مكالمات تليفون اول يونيو
شفيق لو فاز ها يحرق حمدين وابو الفتوح اول حاجة زي ما حرق مبارك ايمن نور قبل كده... استنتاجات اول يونيو.
المجلس العسكري عينه باكسة يقدر يبرئ مبارك ويركب شفيق في شهر واحد.. المجلس العسكري مش غبي ها يؤجل حكم مبارك لحد ما يركب شفيق.. المجلس العسكري ذكي وعارف ان الثورة انتهت وها يعمل الاتنين في نفس واحد... عصف ذهني اول يونيو.
الشاطر دفع لحملة حمدين/موسي دفع لحملة حمدين/ المخابرات دفعت لحملة حمدين / الكي جي بي دفع لحملة حمدين/ حملة حمدين اتمولت من كوكب اورانوس/ من وراء حمدين/ من قتل كينيدي_اسئلة للتاريخ...حيرة اول يونيو.
المقاطعة/الابطال في صالح مرسي ؟في صالح شفيق ؟في صالح سليم/ كل ما سبق/ عصف ذهني اول يوني
الاغنيا بيميلوا لشفيق عشان مصالحهم الاقتصادية/ الاغنيا بيميلو لحمدين عشان متعلمين وفاهمين انه مصلحة للبلد
الفقرا حبوا حمدين لانه مرشح الفقرا/ الفقرا انتخبوا شفيق عشان الفقرا تعبوا من الانفلات الامني
مرشحين / طبقات اجتماعية/ خرف استقرائي اول يونيو.
حمدين اخد اصوات من ابو الفتوح في الاخر/ وابو الفتوح خد اصوات من حمدين في الاول/ حمدين اخد اصوات من خالد علي بعد النتيجة/ فشل ثوري انحيازات/ خيبة اول يونيو
تليفونات / انبوكسات/ تحليلات/ تخمينات/ شكوك/ مخاوف/ فزاعات/ حيرة/ احباط
رغي/ دوشة/ قئ سياسي/ عصف ذهني/ احتضار مايو/تدوين /يوميات.