الأربعاء، أغسطس 29، 2007

رابطه المود الكحلي.......شعبه المكتئبات



اتشرف اليوم بدعوة سيادتكم الى حضور الاجتماع التاسيسي الاول لرابطه المود الكحلي والتى تهدف الى في تاسيسها الي تقديم خدماتها للاخوات المكتئبات

ارهاصات.......

لاحظت العضو المؤسس اللى هو انا زياده الضغوط الرهيبه علي المراة فى مصر من قهر
ازواج وتعنت اباء ونكد امهات وقرف عيال وارتفاع اسعار وغلاء معيشه وما يلىانحدار فنى وغنائى, وفيديو كليبات, وتردى سينمائي ,وما تعانيه من تحرش جنسي
ومعاكسات, وانتهاك كرامه, ومضايقات مروريه, وجميع اصناف الضغوط والتى تلقي بظلالها عليها من احداث يمر بها الوطن من فساد حكومىومالى واداري وانهيار تعليمى
وعلاجى ودروس خصوصيه وثانويه عامه ورداءه مواصلات,وزواج وطلاق وعنوسه وسن يأس وتسلط مجتمع ذكوري ووطن منكمش وحكم متهالك

خدمات الرابطه
تقدم الرابطه لعضواتها جميع اصناف حبوب الموتيفال ومشتقاته
واصناف جديده من القهوه عاليه التركيز والكابتشينو لزوم ضبط الدماغ كما توفر مكابح نفسيه جديده لكبح الغضب وارد المانيا باسعار زهيدة وتقدم الرابطه ايضا مصدات واكصدامات صلب لزوم الحمايه والدفاع عن النفس من الانهيار والانفجار فى الاخرين وتوفر ادويه الضغط والقولون العصبي وقرحه المعده..

كماتقوم الرابطه بتقديم كورسات تعليميه فى كيفيه التبلد وتتخين الجلد محاضرات قيمه فى فنون ضبط الانفعال وما بقي منه محاضرات فى مواجهة الاستفزازوالاستهبال والاستعباط بوجه بشوش وما يجد من خدمات تقدمها الرابطه لبنات مصر المحروسه وعلى من تجد نفسها تنطبق عليها الشروط وترغب في الاشتراك مجانا التقدم باوراقها للعضو المؤسس اللي هو انا والرد ها يكون في اقرب وقت


وشكرا


تصفيق حاد حاد

هناك 32 تعليقًا:

الطائر الحزين يقول...

قرأت وسأمر أعلق فى وقت تانى علشان انتى كدة عاوزة قاعدة وكلام كثير دخلتى عش الدبابير برجلك
تحياتى لحين العودة للتعليق

sara يقول...

بلوجك يجنن

ارجو قبولي صديقه ومعلقه دائمه:)

بالنسبه للرابطه

كنتي فين ياشيخه من زمااااااااان

والله فكرة عبقريه ..مش عارفه ليه مش عاجبه الطائر الحزين:(

سجليني عضوة اولي ..لحين عودة الطائر الحزين ومناقشته في رأيه

تحياتي لكم انتو الاتنين

sara يقول...

ملحوظه معلش نسيت اقولها

ذوقك حلو في الاغاني ..انا كمان بحب داليدا جدا

تحياتي

momken يقول...

مافيش اى مانع من الجمعيه
وموافقين جدا على خدمتها
بس هل ياترى بعد كل الخدمات دى والادويه المستورده دى
والكروسات الجامده دى
برضه هيفغضل بنى ادم؟؟؟
معتقدش
هل البنت والست هتفضل انسانه ؟
معنديش فكره

اعملى اى جمعبه فى الدنيا
بس خالى احد بندوها التاسيسيه الحفاظ على الكائن البشرى
وعلبى الطبيعه الانسانيه

البوسط ظريف تحياتى

غير معرف يقول...

يا ست الحجة

كل نون النسوة فى ج م ع
حيبقوا اعضاء عندك وقاطعين أبونية كمان

لأن مفيش واحدة فى الشرق عامة الا وتعانى من اتنين او تلات جلطات من اللى ناتى حكيتى عنهم دول

قطشيعة يختى
الواحدة ماشية على التايلينول ليا سنة وشوية

ولا جاب نتيجة
حتى تعالى وشوفى عندى
البلؤ كله شد فى الشعر وخبط راس فى الحيط

نياااهااهااااا

بعدك على بالى يقول...

بس بنت القمر ازاى تبقى مكتئبة وتؤسس جمعيه كده؟؟؟

فى القلب يقول...

أختى
لوسمحتى أكتبى اسمى أبوس رجل سعاتك

ولو سمحتى احجزيلى من البتاع ده
بتاع عالى التركيز
حوالى الف طن
والبتاع التانى ده
أيون ده
بتاع ألمنيا ده أيوووووووووان ده
بتاع عشره الاف فرده

والبتاع ده ألى هون
أنتى طبعاً فهمانى
ألى بتاع
الضغط والقولون ده

واكتبى أسمى فى البتاع الكورس ده
بتاع الاستهبال والأستفزاز
بوجه بشوش

واسفه ايدى طالع فيها البتاع ده ألى اسمه
أه حساسيه
فمشعرفه أصقف
اعتبرينى طقفت

وربنا يخليكى ليه يا قمر وتعلجينا
من المواد المسرطنه

بنت القمر يقول...

الطائر الحزين اهلا بمرورك الا هو ايه عش الدبابير حاسه ان فيه تهديد مبطن بس ما تحاولش الرابطه ومؤسستها هتناضل ومش ها نخضع لاي ضغط او تهديد الى الكفاح يا نساء مصر

بنت القمر يقول...

نون النسوة اهلا بيكى اخت وصديقه كلنا سائرون هلى الدرب قصدي سائرات ولا يهمنامن تهديد تشربي كابتشينو؟؟؟
تحياتى وما تقطعيش الزياره

بنت القمر يقول...

ممكن
الادويه والعلاجات دى لزوم الحفاظ على الكائن اللى ها ينقرض المرأة طبعا تبقي بعدها ست تبقي بوتجاز مش مهم تحياتي على فكره كنت مضايقه حبه البوست فرقع هراسي

بنت القمر يقول...

شهروزتى الحلوة الاايه هو التايلينول دا لو مهم الرابطه تستورده برضه الرابطه بتاعتنا متطورة وتكون سعيده بالاقتراحات الجديده وبعدين ورقك سليم ها تستلمى مكتب الرابطه فره قناة السويس ها فى انى بربليم؟؟؟؟
خخخخخخخخ
تحياتى

بنت القمر يقول...

بعدك على بالي ليه هو حد ضحك عليكى وقالك ان بنت القمر مرفهه ولا حاجه لاسمح الله
دا انا اعانى من كل ما سبق وما سيجد من اماض العصر ورق العضويه فين يا فندم؟؟؟؟؟؟؟؟

بنت القمر يقول...

في القلب تمت حجز كميه مناسبه لكى وبعدين من سياسه الجمعيه مواجهه السوق السوداء شكلك كدا عاوزة الكميات دى تاخديها مدهمه وترجعي تشيليها تانى ولا استخدام شخصي؟؟؟؟ طب احلفي
تحياتى وانتى مديرة مكتب الرابطه فرع حلايب الى الكفاح يا بنات مصر المحرووووسه ها فى اعتراض ولا تستفاددوا من الرابطه بس

He and She يقول...

Yaaaaaah
ya ekhwannaaaaaa
yahoooooooo
Da e3lan geh fel wa2t el monaseb. I was just recently posting about that and they kept bombarding me with their reasons and excuses.
Listen I have at least 30 female cutomers that I met last week. They all need your help. I can't snitch or rat on them but I am sure you know them one by one. Just encourage them with some discount. They are professor in the Nakad. Chronic in the Walwala. I am sure they will benefits from you and you know what? I will benefit too if you could cure them

He and She يقول...

I advertised in my blog about the help you offer. You should expect a lot of customers this week. Be ready. I will take a commission hah!

Gid-Do - جدو يقول...

اقترح على الرابطة التعاقد مع مكتب حانوتى لتقديم خدمات الدفن باقل التكاليف لخدمة المتوفيات بالسكتة الغيظية والمنتحرات بالزواج من رجالة كانوا فى الاول ولهانين بيهم وبعد الجواز اصابهم الخرس الزوجى والطفشان من وش الزوجة

مكتب الحانوتى سوف يقبل التقسيط المريح ويقوم بالخدمة كاملة بمجرد توقيع العقد ونظير تامين قدرة بريزة كبيرة ـ عشرة جنية ـ عندبدء التعاقد

وهناك خدمات دفن مجانية للمتبرعات بالمخ لااعادة تركيبة لاى من الاعضاء اللى مخهم لسع

للاستعلام اطلبى الرقم المجانى من اى تليفون ارضى او محمول
2010-2-888-8888 Ext 2222

كما اقترح تعديل اسم الرابطة الى رابطة اللون الاسود المنيل بنيلة اسود من الهباب

بنت القمر يقول...

جدو المحترم اهلا بيك نورت المدونه فكرة الحانوتى كويسه مش بطاله تكشف عن فكر واستراتيجيه بعيده المدى يعنى احنا مقضي علينا كدا كدا لاحول الله
وكمان ها نسلخ وتفرغوا دماغنا زي الفراعنه خخخخخخخخ
ناقص نتعاقد مع مكتب تحنيط!!!!!ا
وبعدين بالنسبه لاسم الرابطه فالكحلى اخى الفاضل هو الاسود بعد ما يجرب من الغسيل
ههههه شفت سواد اكتر من كدا؟؟ تحياتى وسلامى لياسمين وشريف ربنا يحفظهم لك

weswes يقول...

البوست رائع
وانا معاكى واعتبرى كل نون السوه معاكى
لاننا اتخنقنا على الاخر
وتصفيق حـــــــــــاد ليكى
لك تحياتى

mohand يقول...

السلام عليكم

رغم اني معترض علي كم الاضطهاد اللي انتي كتبتيه ده
وحسستيني ان الرجاله كل يوم بشترب دم الستات وبتاكل ربع كيلو لحمة
وانا الراجل مبيهداش الا لما يقتله اتنين ويتحرش باربعه وكده


بس انا مستعد اني ادي كورسات في الاستفزاز والاستفزاز المضاد
والكورسات مجانيه

بس لميتي كل ده ازاي هموت واعرف
هههههههههههههههه
هو احنا اكيد اكيد يعني في مصر؟

تحياتي

mohand يقول...

لو لا تقبلوا اعضاء من النادي المعادي
يبقي حظي بقي واروح اديهم كورسات في الاستفزاز من العيار التقيل
:P:P:P:P:P:p

دينا فهمي يقول...

(:

تصفيق حاد فعلا

bluestone يقول...

بنت القمر ::
شوفي يا ستي
انا كنت عاوزة ابعت لك ميل عشان اقولك شوية حاجات ونكمل كلامنا وكمان عشان عايزة اسألك حاجات تانية مهمة

بس معرفتش اوصل لايميلك ..

غازى يقول...

واحد لمون بعد إذنك

The Z. يقول...

يعني للمكتئبات فقط، حرام عليكِ و معاشر المكتئبين فين يروحو

هذه أول زيارة لي لمدونتك الجميلة و إن شاء الله يدوم التواصل

تحياتي
زكرياء

اسكندراني اوي يقول...

مبروك النيو لوووووووووووك
معلش متاخره بس انتي عارفه بقى اجازه
وش بيغمز

اما البوست بقى

فاعتقد ان نساء كثيرات جدا سيكن عضوات في هذا التجمع

وياريت تعملي ركن رجالي

تحياتي

Esmat يقول...

قمرنا
انا اول المشتركين
اقبلينى ارجوكى
وعندى معارف كتير عايزين يلتحقوا
اممكن

بنت القمر يقول...

غازى واحد لمون دا على القهوة__________
وسوس اهلا بك تستلمى فرع الجمعيه فى الوادى الجديد؟؟؟ اهلا بيكى
____________________
مهند اهلا بيك بس الرجاله اخواتنا برضه واباهاتنا نعمل ايه؟؟؟ بس الضغوط علينا اكتر تحياتى ممكن تدخل الرابطه كاستاذ منتدب
_____________

بنت القمر يقول...

امرأة تقول الذي لايقال
اهلا بيكى
ممكن تستلمى فرع الرابطه فى دمنهور وبعدين الطلب بتاعك ناقصه ورقه بوسطه!!!ا

بنت القمر يقول...

اسكندرانى اهلا بيك من غير غمز اللوك دا بحر اسكندرانى ومركب سلامى الي اسرتك الفاضله

بنت القمر يقول...

اسمت تحياتى ياقمر اسكندرانى انتى بقا اجيب لك العضويه لحد عندك كوسه بقا
ههههههههه
اصلي حاسه انك بت جدعه تحياتى

Bella يقول...
أزال المؤلف هذا التعليق.
Bella يقول...

كل سنة وانت طيبة
رمضان كريم

ممكن ابقى عضوة معاكم

كانت فين الرابطة دي من زمااااااااان

محتاجين شوية جلد سميك علشان نعرف نعيش في البلد دي ووسط العالم اللى تهد جبال