الاثنين، نوفمبر 19، 2007

حق ايه الي جاي تقول عليه

حين يتحول المجتمع الي كتل قهر وقمع تكون المرأه هي الاطرف الاكتر تضررا حين يكون حقها في العلم والعمل والتفكير والابداع والعبادة بل حقها في الحياة نفسها منحه في يد الاخرين فلا امل في اي مستقبل لاسلام او تقدم يرجيحين تولد البنت يستقبلها الاخرين بروح متذمره وغير راضيه حتي الاوساط الاجتماعيه المتعلمه والغنيه للاسف حتي وقتنا الحاضر في حقها قي الوجود يصبح موضع رفض من اقرب الاقرباء
حين تحرم البنت من فرصه تعليم مماثله لتلك التي يحصل عليها اخوها باعتبارها بنت ومسيرها للجواز في حين ان
الولد ها يكون راجل ومسيره يتحمل مسئوليه بيت
ولقد شهدت بنفسي اسر الابوان جامعيان يختاران للبنت تعليما اقل باعتبار مسيرها للجواز
اويختاران لها كليه اقل رغم ان مجموعها يسمح مثلا بدخول الهندسه
لان التعب ووجع الدماغ للولد اولي وبقتل الاب نفسه من اجل ان يلتحق ابنه بالهندسه مثلا وان اضطر ان يدفع له الالاف في جامعه خاصه ليلحقه بالهندسه ومش دايما النتيجه في هذه الحاله بتكون مضمونه
سعاد صالح:حين تتقدم بفتوي لا ترضي احد الازواج تهاجم هجوما شديداعليه باعتبارها مناصره للحريم!!احدهم طلب فتوي انه يحل انه يهجر زوجته لمده ست شهور كما انه يرغب ان تستمر الاوضاع الي الابد بينهما علي هذا الوضع
وما ان رفضت سعاد صالح موقفه ووقالت له انه يا امساك بمعروف او تسريح باحسان حتي انهال الرجل عليها لوما بانها مناصره للنسوااان!!انهاها تخالف ضميرها
وحن يتهمها في ضميرها مصادرا حقها فيابداء رايها الفقهي طيب بتسألها ليه اصلا؟؟؟ الرجل ببساطه يريد فتوي ترضيه فتوي تفصيل ولا يحترم لاعلمها ولا عقليتهافكيف يحترم زوجته اصلا عبير صبري:حين كانت في بدايتها الفنيه كانت مرفوضه اجتماعيه من فئات كثيرة تنظر اليه باعتبار الفنانه اصلا موضع شك وريبه
وبعد حجابها اصبحت مرفوضه من فئات اجتماعيه اخري مصادره حقها في ارتداء ما يوافق حريتها ومعتقدها باعتبار حجابها مدفوعا تمنه من الوهابيين اللذي يدفعون الي الفنانات المصريات ليجلسن في البيت ويعتزلن حتي يفرغن الفن المصري من مبدعيه
وحين خاعت حجابه ايضاايضا لاقت ما لاترضي واعتبرت مزدريه اديان وطلب بجلدها
حكايه عبير صبري فكرتني بجحا اللي شايل ابنه وجمبه الحمار وشويه راكب علي الحمار هو وابنه اوشايل الحمار وماشي وفي كل الاحوال مش عاجب الناس
ودايما الناس تصادر حريتها وتتدخل في التزامها الديني وحقها في العباده بحريه وراحه كان حسابه اختصاص البشر مش اختصاص الله

استخدام المرأه كسلعه في الاعلان والفيديو كليب ومحدش يقولي انه اختيار منها بل هو فرض من المنتج والمخرج وشركه الانتاج ولو بصينا علي اكثر الفيديوهات عريا وفجرا هنلاقيها من مخرجين رجال
جاد شويري وجاد سوايا من اجل تحصيل الاموال اصبح جسدها سلعه بامتهانه وتعريته وعرضه لمن يدفع
يصادر ذلك حقها في احترام ادميتها وجسدها وروحها مذيعات القناه الخامسه غاده الطويل:والطيارة المصريه اللاتي منعن من مزاوله اعمالهن السابق ولا حظ اخي القارئ اعمال سابقه مش تعيين جديد بسبب الحجاب
حتي غاده الطويل بعد ان صدر لها قرار من المحكمه العليا بعودتها الي عملها منعها التلفزيون من قراءه النشره باعتبار النشره فقره سياسيه والحجاب رمز ديني!!صادر المجتمع حقها في العمل والابداع وحرمها من مصدر دخل من الممكن ان اسرتها تكون معتمده عليه وبعدين يدوروا الارهاب جاي منين؟؟
المرأه المعيله التي تمثل40 في المئه من نسبه النساء العاملات في احصائيات حكوميه تلاقي الهوان وتطالب وحدها بتحمل اعباء اسر كبيره العددتصل الي 6 او سبع افراد بعد ان تخلي عنها الزوج وهجرها الي اخري او ادمن والدوله تركت لها معاش السادات 70 جنيه مشكوره مش دا قهر برضه ومصادره في حقها في حياة كريمه وادميه ومكبله المرأه بقيود تفوق قدرتها ومستغله اياها الي حتي اخر قطره
دي صور صغيره جدا منصور امتهان المراه ومصادره حقوقا البعض يحلو له الكلام بان الستات اخدت كل حقوقها وما سابوش للرجاله حاجه
وساخرين من المدافعات عن المرأه واو ساخرين من مطالبتها بالمساواه في تولي المناصب المختلفه
البوست دا اهداءا ليهم جميعا لعل وعسي

هناك 38 تعليقًا:

FOrty يقول...

الموضوع مش قهر المراة فقط الموضوع ان المجتمع كله قاهر و مقهور بس يمكن المراة بتيجى فى اخر السلسله سلسله طويله من القهر المتبادل بين الناس و كل واحد مستاسد على الاخر صاحب العمل بيقهر العامل و صاحب النفوذ بيقهر الكل و يفوت فى الحديد وهكذا تستمر السلسله و اضعف حلقتها المواطن الغلبان الذى بتالى بيحط غله فى مراته و عياله

عدى النهار يقول...

أتفق معكِ أن المرأة هى الطرف الأكثر تضرراً من إنحطاط المجتمع

الشيخ الغزالى
فى كتابه عن قضايا المرأة بين التقاليد الراكدة والوافدة تسآل فى رفضه لرأى بعض الجهلة الذين رأوا أن النساء ليس لهن الحق فى الذهاب للمساجد (والتعلم عامة) عن الكيفية التى تتمكن بها إمرأة مغلقة بهذا الشكل من أن تكون نافعة لنفسها ولأسرتها ومجتمعها. هو ربط بين بداية تخلف المسلمين وتجهيل المرأة

اسكندراني اوي يقول...

سلبيات كتير في المجتمع لازم تصحح
من اول نظره الاب للمولوده الانثى وحتى صانعي القرار

معاكي ان السيده في مجتمعنا تعاني
مواريث باليه من التحجر يجب تغيرها
بوست قيم كالعاده ولكن ارجو من الله ان ينتهي النقاش فيه على خير لاني اتوقع هجوم شرس من الناس اللي لسه عايشه في عصر الحريم
اظن فاهماني

كان الله في عونك

mohand يقول...

السلام عليكم

اولا هدية مقبوله طبعا

وانا اقدر ارفضلك هدية برضه

مش عارف انتي قريتي الرد علي تعليقك ولا لاء

عموما انا قبلت الهدية وليا عودة

بس ماتش مصر وليبيا الشوط التاني هيبداء عايز احضره
وهرجع

تحياتي

mohand يقول...

السلام عليكم

رجعت تاني بعد ما مصر اتعادلت
نتيجة غير ساره بالمره
يالا ما علينا
--------------
طبعا انا عرضت الموضوع بشكل ساخر
ولو قريتي سلسلة حوار مع امرأة عندي يمكن توصلك وجهه نظري
بس هعلق علي كل اللي قولتية حضرتك
--------------------
بالنسبة لموضوع التعليم
مش عارف ليه بشوف ان نسبة البنات اكثر من نسبة الاولاد في المدارس والجامعات
مع ان الدراسات اللي بتتعمل بتقول غير كده
---------------
بالنسبة للي سأل المفتية
دا لو اعتبرتها مفتيه
هو اللي غلطان ايه اللي يخليه يروح يسألها
ما دام واخد عنها موقف مسبق بانها مناصرة للحريم
دا غير ان الفتوي اللي هوه عايزها دي لا تجوز خالص
اذا فهو لا يدل علي موقف كل الرجال وكل المجتمع
-----------------
عبير صبري بقي
سواء قبل الحجاب او بعد الحجاب او بعد خلعها للحجاب
مش بتنزلي من بلعوم خالص
دا غير اني مش مقتنع ان حجابها دا حجاب من الاساس
وبعدين حضرتك ايه اللي يخليها ترضي الناس
ما ترضي ربنا وضميرها وترتاح
ودا مش علي اساس انها امرأة عملوا معاها كده
-----------------
بالنسبة لموضوع الفيديو كليب
ههههههههههههههه
مضطر اقولك ان ده اختيارها
ومتقنعنيش او تقنعي نفسك ان المخرج اللي هو مفروض رجل يعني اخدها من ايديها وعملها غسيل مخ وفهمها ان اللي بتعمله ده مش بيهين كرمتها وعقلها
وبعدين هي ايناس الدغيدي مخترعة الفن الجميل في العري مش انثي؟
المفروض اني اقول ان اللي بوظوا البلد نساء
مفروض في الحالة دي نتكلم عن فئة تتبع نظام مهني وفكري واحد
------------------
بالنسبة للمذيعات
قوليلي مين اللي منعها وانا اروح اديله كلمتين امسح كرامته بيهم
ودي حرب ضد الاسلام وكل ما هو اسلامي مش ضد المرأة
-----------------
بالنسبة للمرأة المعيلة
انا عندي فكرة واقتراح للموضوع ده وناقشته قبل كده مع ناس كتير
بس عموما انا اقف معهن وادعمهن

--------------
كام تعقيب كده علي السريع

اعترف انني تم استفزازي بصراحة

كل ما ورد في التعليق هو رأي الشخصي
ولا يجوز ان تتهميني انني اتبع الغالبيه في مصادرة كل تلك الحقوق التي ذكرتيها


ما اعنيه بموضوعي الساخر هو خروج من الجو العام لمعظم المدونين الذي يدل علي حالة اكتئاب واضحة
دا اولا
ثانيا هو هجوم مني ضد المستميتات في الدفاع عن حقوق المرأة
وهذا موقفي الشخصي منهن ولي منهن صديقات كثيرات جدا
ربنا يصبرني عليهن


اذا نظرتي للردود في موضوعي ستجدي من يساندني من الرجال ومن يساندني من النساء
هذا بالاضافة لمن يساندني في الواقع بعيدا عن المدونات والشبكة

في النهاية
اشكرك لهذا الموضوع
وتقبلي فائق الاحترام

واحترم رأيك في النهاية

mohand يقول...

السلام عليكم

انا تاني برضه

لاقيت بس موضوع عند شهروزه
ولاقيت ليكي تعليق بما يعني انك هتردي عليها


اعتقدت ان البوست اهداء لي
ربما يكون لي او لشهروزه
فانا علقت في الحالتين
تحياتي

بنت القمر يقول...

OverForty
فعلا سلسله قهر بس للاسف اقوي حلقه بتكون اخر حلقه يعني لان ضغوط الحلقات السابقه تنصب عليها
بمعني المدير المستبد يقع عبئه علي الزوج واحيانا الزوجه يبقي الزوجه وقع عليها عبئين استبداد الزوج والمدير والمجتمع كله من اهل وواقارب وظروف اقتصاديه وثقافيه وموروثات مجحفه
تحياتي

بنت القمر يقول...

عدى النهار
يا اخي الفاضل مش بس حقها في ذهاب المسجد فقط لكن حقها في الحياة اصلا من اول المورورث الاجتماعي الظالم
لما جت بنيه انهدت الحيطه عليا
لما جه ولد اتشد ضهري واتسند
مرورا بما رصدته من حالات
فتكون النتيجه كائن اجتماعي هش هزيل مخوخ غير منتج وكئيب
تحيلتي اشكر مرورك

بنت القمر يقول...

اسكندراني اوي
مش بس نظره الاب لكن كمان نظره الام ونظره الجده وبقيه نساء العيله فالمرأه ترغب في انجاب ولد حتي لاتكون معيره امام الجيران ولا اهل الزوج مش حبا في الولد وللاسف في اوساط اجتماعيه متعلمه وجامعيه ويشهد الله اني شفت دا بعيني وسمعته بودني
اما بخصوص الهجوم بالعكس انا اتوقع تاييد ولكن نظري فقط المهم ساعه التطبيق وممارسه الحياه كل انسان يراعي ربنا في كل بنت وسيده قريبه له
تحياتي

بنت القمر يقول...

مهند
اولا
البوست مش اهداء ليك ولا اشهروزة البوست من عده مشاهدات شفتها في الواقع وضغطت عليا فعلا وخلتني اكتبه
تانيا
بالنسبه للبوست بتاع سعاتك حتي لو كان ساخر بالنسبه ليك فاكيد واقعي لغيرك واكيد برضه اللاشعوور الذكوري كان بيلقن حضرتك عادي
المهم عبير صبري مش بتنزل لك من بلعوم
انت حر وجهه نظر
حجابها فبل واثناء وبعد خلعه ربنا يحاسبها عليه
صح ولا لا
رب اشعث اغبر لا يساوي عندكم جناح بعوضه هو عند الله خير منكم
صح ولا لا
وحديث تاني انه ممكن تقول علي حد ها يخش النار يبدل الله حسناته سيئات فيدخل الجنه وتدخل انت النار بدلا عنه
بتقول بدل ما ترضي دا ولا دا ترضي ربنا
طيب ماهي جت ترضي ربنا واختارت الحجاب برضه الناس مرحمتهاش اوع تفتكر اللي بتتحجب الرض بتتفرش رمله لها
لاحظ طلاق حنان ترك وصابرين بعد الحجاب مباشره
وبعدين يا اخي ما تسيبها تختار وربنا يحاسبنا جميعا في الاخر بلاش احنا نحاسب بعض
___________________
اللي سال الاستاذة سعاد صالح كان في غايه الصفاقه والرزاله وقله الزوج وزعلت انها وصفته بالتجبر رغم انه كان جنبها شيخ اخر لااذكر اسمه من بتوع دريم الا انه اتشطر عليي سعاد صالح بس وهات ياردح والنسوان والحريم وكلام كدا ملوش لازمه كانه عاوز فتوي تفصيل تريح ضميره!!!
_________________
فتيات الاعلان والفيديو وغيرهم الصناعه دي صناعه رجل تهدف الي جذب رجل وارضاء رجل المنتج والمخرج رجاله واللي مش عاجبها تتشرف في بيتها اختيارها ناتج مش عن اختيار لكن عن خضوع لنظان مجتمع يسيطر عليه رجل
حتي ايناس الدغيدي كسبت شهرتها من كونها تعرض بضاعه سيئه وباعتبارها الاجراء
يعني لو اي واحده عاوزة شهره اكتر دا هايكون طريق اسها وان كان لايعفيها المسئوليه
___________________
اخير معرفتش انا حكايه رايك في المرأه المعيله مش دا قهر برضه
طب تتحل ازاي في ظل زوج طفشان او مدمن او مجوز واحده تانيه وحكومه بتديها معاش السادات 70 جنيه
احب افهم
وعموما وعموما يا سيدي اعتبر البوست اهداء
للللما ربنا يكرمك ببنت تكرمها وتفرح بيها وتعدل بينها وبين اخوها في الحب والرعايه والتعليم وغيره
تحياتي

MKSARAT - SAYED SAAD يقول...

عزيزتى بنت القمر كنت مارا بالمدونات فاستقفنى موضوعك الشيق والشائك في نفس الوقت فاسمحي لي بالمداخلة معكي
دعينا الاول نرسي بعض المسلمات
----
للرجل طبيعه وللمرأه طبيعة اخري
اقصد بالطبيعة هو الهدف الذي خلقنا من اجلة
----
الاديان ودين الاسلام والذي قال العزيز الحكيم في كتابة أن الدين عند الله الاسلام
____
الحرية وهي حق لكل من يعيش على وجه الارض فقط ليس الانسان وحدة
____
عزيزتي الخلط بين حرية المرأه والرجل هو من ادي لما تحدثتي عنه للرجل حريات وللمرأه نفس الحريات لكن لكن منهم حدودة التي فرضها علية الدين فاذا لجا البشر لأهوائم وغرائزم تاهوا عن فروض الله الحجاب لا يمكن ان يكون حرام ومن يرفضي في نظري هو اغبي انسان لكن عزيزتي ما رايك في امرأه ترتدي الحجاب واخري قليل من الملاببس يكاد يغطي جسمها وما رايك في في رجل يتحدث بالدين وفي الخفاء هو عبد لشهواته اعتقد الصورتان مرفوضتان
الاغرب من هذا وذاك اننا وكثير منا تشبع بهلوسة الثقافة الاجنبية وعلى التوازي الثقافة الدينية قلت بدانا من تقليل مناهج الدين في المدارس
الفن شئ راقي انا معكي لكن هل كان محلل ايام الرسول والدليل انه لا بان المسلمين برعو في الرسم الزخرفي والاشعار بحكم طبيعتهم ولم يتعرضوا لجوانب اخري من الفن
سيدتى المرأه لها دور في المجتمع من يحاول الغفلة عنة يعتبر انسان لم يصل الي حدود الهمجية بل هو ابعد من ذلك
لكن للمرأه حدودها وللرجل حدودة
اتعلمي نحن دول اسلامية لكن يتخللنا اخوة مسيحيين وديانت اخري للأسف بدأت تظهر مثل البهائيين الذين ظهروا حديثا قاتلهم الله
لكن المحارب للمارد المعرف بالاسلام والمسلمين عنيفة جدا لأنهم يعلمون مدي قوت هذا المارد لذلك يفعلون كل يا يتمكنون منه لضعفنا
هل سألتى نفسك في اقوي عصور الاسلام ايام الرسول علية السلام والصحابة والصالحين من بعدة لماذ لم توجد امرأة واحدة في القضاء الاسلامي لأنة من ضمن المحازير فللمرأه محازيرها وللرجل ايضا وهي حدود الله تعليم المرأ ليس عيب ولا حرام لكن الحال اصبح على شاكلة الخلط والعادات والتقاليد الغبية التى نتوارثها او نتشبع بها من الغرب

الموضوع سوف يأخذ منى الكثير في الكلام
لجماله
لكنى سعيد جدا بزيارة مدونتك الجميلة
تحياتى ودمتى بكل ود

Desert cat يقول...

حبيبتى مشكلتنا ان كل واحد سايب نفسه وعمال يبص على التانى وياريته بيشوف فيه ميزة الا دايما مليان بالعيوب
دى لبست دى ضحكت دى خرجت دى دخلت وكانهم موكلين بالمراقبة
مع ان لو كل واحد بص فى نفسه حينشغل عن عيوب الاخرين حتى لو الاخرين دول من الوسط الفنى ما هم بنى ادمين برضه وعندهم احساس

لكى كل تحياتى

mohand يقول...

السلام عليكم

mohand يقول...

معلش اتبعت غلط

بالنسبة للبوست اهداء ليا او لشهروزه

خلاص انا قبلت الهدية
هترجعيها تاني ازاي مش عيب برضه؟
-------------
وبعدين الموضوع الساخر بتاع سعدتي
تقدري تقولي انه شبة حوار واقعي بس انا عملته بالطريقة دي مع المحافظة علي الفكرة الاصلية
ولو قرتية كويس هتلاقي اني كاتب رد فتحية بالظبط نفس رد اي واحده حقوقية
يعني مكنتش بقول وجهه نظري بس
--------------------
طيب بالنسبة لوجهة نظري انا قولتلك ان البوست وجهه نظري والتعليقات عندي وعندك برضه وجهه نظري

وعبير صبري فعلا خنيقة بالنسبة لي ولا بتعرف تمثل اصلا
دا رأي

نيجي لنقطة الحجاب
يا سيدتي الفاضلة هي لبست الحجاب الشرعي؟
وهل التزمت صح بالتعاليم الاصلية لله؟

طيب بتقولي ان اللي بتلبس حجاب بتتعرض للهجوم
طيب ما دا طيعي في ظل الهجوم الشرس علي الاسلام
كانت تحدت وتمسكت بموقفها
لكن هي استسهلت

وبعدين مين قال تخش النار ولا الجنة ؟
هو انا جبت سيرة عقاب الاخرة اصلا ؟

انا بتكلم ان دا مش دليل علي اضطهاد المرأة
دا رمز اسلامي
هتقوليلي ما الاسلاميين هما اللي هاجموها بعد ما قلعته
هقولك انها قالت كلام العلمانيين
ودا الصراع بين الاسلاميين والعلمانيين
ايه اللي دخل الذكورية في الحوار اصلا؟

----------------
موضوع سعاد صالح
قولت في تعليقي السابق انه مش رمز تتخذية مثال حي لكل الرجال
واحد عايز فتوي علي مزاجة
مال الرجال بالموضوع
يعني فيفي عبده راحت تحج وقالت ان الرقص فن وعمل يبقي عبادة
تبقي فيفي عبده تدل علي كل النساء

دا اللي اقصده
وانا شخصيا مش مقتنع اني اروح اطلب فتوي من حد في التلفزيون
دا رأي برضه
--------------
اسمحيلي بقي يا بنت القمر

موضوع الفيديو كليب دا غريب قوي

يعني حضرتك تقصدي
ان اللي متعملش فيديوكليبات خليعة واعلانات زي دي تقعد في البيت احسن ؟
وهي ايه اللي يجبرها علي العمل دا اساسا

هتقوليلي الشهره؟

يبقي متزعليش مني تستحمل
دا يبقي اختيارها
هي اختارت الشهره واختارت اقصر الطرق

وبعدين موضوع الكليبات دي مصدر لنا من الخارج
يعني كده يبقي امريكا مجتمع ذكوري واوربا ذكورية

يبقي عالم ذكوري بقي مش مجتمع

ولا ايه ؟
--------------------
بالنسبة لموضوع المرأة المعيلة

دا حوار يطول شرحة والكلام فيه
وعموما انا اساند اللي زي دي بمعاش يحقق لها عيشة كريمة

بس خرجي من وسط دول اللي جوزها متجوز عليها
دي يا اما ينفق عليها او تطلق احسن
وتاخد منه نفقتها بالقانون


لما ربنا يكرمني ببنت متقلقيش البنت حبيبة باباها

تحياتي

الموضوع ابسط بكتير مما تتخيلي

goodman يقول...

نعم بعد كل هذة القرون مازلت العنصرية حق طبيعى للانسان

همسات دافئه يقول...

ياسيدتى ما كل هذا الهجوم
انى اوساط اجتماعيه ده الى بيستقبلوها بروح متذمره بالعكس خالص دا انا اعرف عائلات كتيره كانت تتمنى ان ترزق ببنت فكره وأد البنات ده انتهت من زمان قوى
***********
التعليم
انا طول عمرى فى مدارس مختلطه وكان عدد البنات ضعف عدد الولاد ولما دخلت الجامعه العدد بقى تلات أضعاف تقريبا
معاكى ان لسه فى بعض المناطق والعائلات الفقيره الى لو مكانش بامكانها تعلم غير واحد بس بتعلم الولد ولو مش بامكانها مش هاتعلمه بس لو البنت حبت تتعلم بعد كده هتلاقى 100 طريقه وهاتوصل للى هى عايزاه لو عندها اراده وتحدى للظروف يعنى الموضوع ظروف ماديه وليس قهر
**************
الفتوى
دا انسان مريض وفى سيدات برضه بيقولوا الى ألعن من كده مسمعتيش عن المحترمه الى رفضه ان شهاده المرأتان بشهاده الرجل وبتقول دا كان زمان دلوقتى الست بقت متعلمه وشهادتها تكون بشهاده الرجل يعنى بتلغى نص صريح فى القرآن
فرجل وامرأتان
*************

همسات دافئه يقول...

وسيده اخرى ترفض ان يؤمها الرجل فى الصلاه وتطالب ان تؤم هى الرجال وترى نفسها احقق بامامه الصلاه
ده فتنه يقع فيها الرجال والنساء وليست ايضا قهر
***************
عبير صبرى
ربنا يهدينا ويهديها والرد على كلامك هو كلامك نفسه -جحا والحمار- يعنى الناس مش هايرضيها حاجه يبقى ندور على رضا ربنا عشان نستريح
كلامك عام وطالما شايفه عبير مقهوره يبقى جحا كمان كان مقهور وأهو راجل

************
الإعلانات
بجد ده اكتر حاجه صدمتنى ازاى شايفاها ضحيه وان المخرج هو الى جانى انتى لو دفعولك مليارات وخلوكى اشهر واحده فى العالم ممكن تقبلى تعملى ذيهم؟مش ممكن طبعا هى الى سمحت لنفسها بل وسعدت انها تكون مودل او شماعه تعلق عليها ارخص الثياب أستأذنك بس تروحى تسألى عن عدد البات الى بيتقدموا عشان يكونوا ....ضحايا كما سمتيهم وابقى شوفى الحسره الى على وشوشهم لما يترفضوا
وبعدين سبحان الله انا بشوفها بترقص وبقها من هنا لهنا هو القهر بيسعد كده؟
**********
المذيعات
أضم صوتى لصوت الى علق وقال ده حرب ضد الإسلام مش المرأه يعنى انتى عمرك شوفتى مذيع ملتحى؟
**********
المعيلات
بصراحه انا اتخضيت من النسبه ده بس ده ازمه دوله مش اضطهاد للمرأه يعنى فى عائلات كتير وفيها رجاله برضه وليهم نفس الظروف الصعبه ده
***********
لا تقولى مساواه فهذا ظلم لك فانت ما خلقت يوما لتكونى مثله ربنا امره بالجهاد للدفاع عنك وامره بالإنفاق عليكى حتى لو بتشتغلى وامره انه يديكى حقك فى الميراث حتى لو ليك زوج بيصرف عليكى ومع كل ده امره انه يعاملك كويس وفى حجه الوداع الرسول وصاه "واستوصوا بالنساء خيراً"وقال رفقا بالقوارير
أكيد بعد كل ده لازم يكون له القوامه
أسفه لو كانت اول زياره ليا واول تعليق مش لطيف
اتمنى متكنش مناقشتى ضايقتك
شيماء

اسامة يس يقول...

رغم ان الجميع مقهور بشكل ما في المجتمعات السلطوية من الخليج الى المحيط....
الا ان بالفعل للمرأة النصيب الأكبر .. والمشكلة تكمن في العقول الحشوية الذكورية المتسلطة التي ترى في المرأة عاراً...
وقد ذمهم القرآن
قال تعالى:

وَإِذَا بُشِّرَ أَحَدُهُمْ بِالأُنثَى ظَلَّ وَجْهُهُ مُسْوَدًّا وَهُوَ كَظِيمٌ

يَتَوَارَى مِنَ الْقَوْمِ مِن سُوءِ مَا بُشِّرَ بِهِ أَيُمْسِكُهُ عَلَى هُونٍ أَمْ يَدُسُّهُ فِي التُّرَابِ أَلاَ سَاء مَا يَحْكُمُونَ
.............

وهذا بالفعل ما زال واقعاً على درجات متفاوتة .. وما يزال العقل العربي خصوصا عقلاص ذكوريا لا ينفك الا ان يرى في المرأة عارا وعورة ....واستخدموا الدين ونحتوتا نصوصا الدين منها بريء لهذا الغرض

موضوع جميل والمقاطع فيه في محلها ..
دمت بكل ود..
خالص تحياتي

بنت القمر يقول...

MKSARAT
اهلا اول زياره الموضوع مش الحجاب ولا ان الاسلام هو الدين عند الله ولا البهائيين
الموضوع الضاغطه علي المرأه
بس والتعنت ضدها بكافه صورة
محجبه وغير محجبه
حتي المفتيه
والمراه المعيله
تحياتي

بنت القمر يقول...

Desert cat
عندك حق لو كل واحد يتشغل بعيبه عن عيوب الناس الدنيا تنصلح
منورة

بنت القمر يقول...

مهند
يا اخي الفاضل الاسلام بيتعرض لهجوم ماشي
بس الست بتتعرض لضغوط
اكتر بسبب حكم الناس علي مظهرها وتقييمها
انت لو مربي دقنك الناس هتقول يا سني يا ستايل والاتنين مقبولين
لكن انا لو محجبه اوغير محجبه حتي شكل الحجاب ليه تقييمه عند الناس بس
دا يرفض ودا يقبل
تحياتي

بنت القمر يقول...

goodman
اشكر مرورك فعلا العنصريه ضد المرأه
تحياتي

خيرالدين يقول...

المشكله ان اننا بنتكلم عن ثقافة مجتمع لابد أن نعترف بأنها مخربأه
وأنا معك أن أكثر الاطراف تضررا هى المرأه
أولا
افتقادنا لشخصيات نسائيه محركه أو تستحق الاهتمام اللهم الا نماذج قليله لا تكفينا مثل هبه رؤوف عزت او نهى الزينى او بثينه كامل
حتى أكبر كيان سياسى مصرى -الاخوان المسلمين-باعتراف بناته يعانين من عدم وجود نموذج نسائى يحتذين به منذ رحيل زينب الغزالى
ثانيا نحن غير مؤهلين لقبول فكرة ان للمرأه حقوق لابد أن تاخذها ونعتبر ذلك انتقاص من رجولتنا
وانها
لسه عاوزه ايه أكتر من كده
ثالثا
لاننكر ان جزء من المشكله يعود للمرأه نفسها اما لتهاونها فى بعض الحقوق فى بعض الاحيان او سوء استغلال هذه الحقوق

اسف على الرغى

بنت القمر يقول...

همسات دافئه
اممممممممممممممممممممممممممم
انا مش عارفه انتي قريتي كان سطر من البوست ولا قريتي حبه ووقلتي دي واحدة من بتوع حريه المرأه اديها الكلمتين اياهم
اسألك انا انهي يا اختي اوساط دي بتستقبل البنت زي الولد مش عارفه انتي عايشه في مصر ولا تنزانيا؟؟
مازال تفضيل انجاب الاناث عند غالبيه الاوساط ياعزيزتي اوساط الارياف والصعيد وطبعا بحري
اذكر شغاله مره كانت بتجي لنا البيت كانت زعلانه اوي ان مرات ابنها جابت ولد لانها كانت عاوزة تجيب بنت عشان يبقي لها زله تقدر تعايرها بيها
اوساط اعلي تانيه طبقه متوسطه يعتبر انجاب الولد نيشان علي صدر الام امام اهل الزوج واخواته
والعكس صحيح
تانيا يا قلبي الموروث الاجتماعي كدا ولا انتي مش من هنا
لما جبت الولد اتشد ضهري واتسند ولما جبت بنيه وقعت الحيطه عليا
ابقي اسالي مامتك
بالنسبه للتعليم
ايوة في نسب اكتر من البنات متعلمات بس مش بتكون من الاسره زي ما قلتي بيكون اجتهادها الشخصي لكن انا شفت اباء بيطلعوا بناتهم من الهندسه عشان مصاريف ووجع دماغ الولد اولي بيهم
او بيستخسروا يدفعوا مصاريف مدارس اللغات لبناتهم لو مش مقتدرين اوي ويدخلوا البنت حكومي والولد لغات
دا واقع
عبير صبري
بقةل لن الناس كدا كدا اعترضت علي تصرفاتها
مال جحا بقا بالقهر هو جحا كان محجب
غريبه اوي رايك عن المرأه المعيله طب لما انتي عارفه ان الراجل هو القيم علي المرأه بالانفاق امال سايبين الستات ليه يصرفوا ويتحملوا فوق طاقتهم ولا احنا ناخد من الاسلام اللي عاوزينه ونسيب اللي مش علي هوانا
لما يقول حجاب جري نجلد غير المحجبه باسم الدين ولما يقول الراجل مسئول يصرف نقول دي ازمه دوله غريبه اوي غريبه
علي فكره ما سمعتيش مسلسل الشرق الاوسط بتاع رمضان السنه دي الراقصون علي النار
ابقي خلي حد يحكيهولك عشان تعرفي انك مش في مصر
اشكر مرورك

بنت القمر يقول...

osama
يا اخي اسواء من العقول الحشويه الذكوريه العقول العنيده الشمس تبقي منوره ادام عيونهم بس يقولوا هي فين انتوا اخدتوا حقوقكم ما سيبتولناش الاتقميع الباميه حق ايه بس
حق ايه
ولما تستغل من شركات الدعايه والاعلان يبقا دا اختيارها لكن لما تنتهك خصوصيتها وحريتها وحقها في العمل يقولا دي حرب علي الاسلام مش المرأه ولو حرب علي الاسلام طيب مين اللي بيدفع تمنها مش المرأة ولا الرجل
مين اللي في موقع دفاع دايما وشك الست
ومين اللي في موقف هجوم
الاخر
مستغلا اما موروث اجتماعي فاسد او نص ديني
ولما الديني يجي يلزمه هو بقا
يهرب ويقولك وانا مالي مش انا
غريبه اوي
غريبهلم تكون اوائل الثانويه العامه بنات ويجوا يتخفوا بعد كدا في البيوت بسبب رغبه الزوج او الاهل ويمسك المناصب الاقل قدره وذكاء وابداع دا يبق ايه
غريبه ويقولولك مفيش تمييز
اشكر مرورك

بنت القمر يقول...

e7na
ما هو انا مش عارف برضه ثقافه المجتمع المخربأه دي مين ها يصلها ولا يقولك العقل الجمعي
طب هو عم جمعي دا مين يصلحه نستورد له قطع غيار منين يعني
ولا دا مسئوليه كل واحد انه يراجع افكاره وازاي يراجع في ظل الجهل
وانحطاط الاعلام وغياب وجه الدين الحقيقي
وغياب القدوة
لما تبقا نانسي وهيفا ورولا هم حديث المجتمع وحجاب عبير صبري
تروح بقا نهي الزيني تتلهي علي جنب ويطويهيه النسيان وتندفن سيره زينب الغزالي
وراس الامال يشتري عضوات مجلس الشعب
يعني النماذج الفاسده تظهر والجيده تختفي
عليه العوض
اشكر مرورك

sara يقول...

بنت القمر

بوست في الجون وواقعي جدا كالعاده

هو للأسف انا الكومنتات لفتت نظري فقريتها الاول وانا غالبا مش بعمل كدا لأني بحسها بتأثر علي رأيي وبتضيع الكلام اللي كان في دماغي ..وللأسف بردو دا اللي حصل فعلا :(

بعيدا عن التعليقات اللي بعضها مستفز الصراحه ..انا بس عايزة اعلق علي نقطة عبير صبري وان اللي بيطالبوا بجلدها لأنها مستهينه بالاديان ..واللي بيقولوا انها بتردد كلام العلمانيين ..ياسبحان الله..ماتررد كلام العلمانيين ..حتي لو الحدت ..ماتعمل اللي تعمله ..ربنا يا اخونا اللي هيحااااااااااااسب .. والناس اللي داخله تزم فيها ..ياسبحان الله ..من كان منكم بلا خطيئه فليرمها بحجر !!

مش عارفه ليه بحس اصلا ان مفهوم العلمانيه عند الناس بقي مرادف لمفهوم الكفر او الالحاد ..يعني اي واحد يقول رأي مجازة ان هي حرة ..وربنا اللي هيحاسبها بيبقي غالبا علماني !!!

خللي بالك بقي من نفسك ..بدل مايطلبوا بجلدك انتي كمان .. ومش بعيد يهدروا دمك

كل اللي انتي قولتيله بيحصل ..وبيحصل اكتر منه كمان .. وفي ناس كتير ايوة بتررد ان الستات اخدت حقوقها وزياده ..ومن دواعي الشجاعه عدم الانكار ..

تقبلي تحياتي ياقمر

غير معرف يقول...

رغم أن الموضوع ليس جديدا إلا انه لايزال مشتعلا

لكن المرأة نجحت فى الوصول الى مراكز عديدة .. ناجحة جدا .. والنماذج ليست قليلة

المهم الارادة .. ودعك من نظرة الآخرين .. الأهم هو نظرتنا لأنفسنا وماذا نريد لها .. وهكذا نستطيع

لو أخذت قصة كل ناجحة ستجدى دون نعب انها لم تكن سهلة ابدا ..

جديرة بالاحترام وتسميتها قدوة

لاتضيعى وقتك كثيرا .. واصرى على النجاح

آسف لوصولى متأخرا ..

أطيب تحياتى

momken يقول...

معاكى حق فى اغلب النمازج الى انتى جبتيها
بس انتى ماخدتيش بالك انك جردتى المرأه من شخصيتها
انتى صورتيها على انها مجرد اداه
بتعمل الى الراجل عايزة وبس
حتى لما قلعت هدومها وعملت اعلانات وكلبيات قلتى ان الراجل هو الى قلعها
على اساس ان هى مؤدبه مرضيتش تحرجه وتقوله كده عيب

ماشى
موافق
كلامك كله كويس وانا موافق عليه علشان متقوليش دى حتى ممكن بيحجر على رأئى وتعبرى ده صوره من صور اضهاد المرأه

البوست حلو
تحياتى

بنت القمر يقول...

نون النسوه
اهلا بيكي مرورك دايما مصدر فرح ليا
بجد والله
بما انك موفقاني وقريتي التعليقات كلها وشفتي ان الستات حلوين وفل ومفيش تمييز ولا حاجه وبما اننا بنات وامهات بنات وبنات وبنات واللي خلف ما مات وها اقولك حسبنا الله الدنيا فل ومفيش تمييز ولا حاجه واخر تمانم ووبسي ايدك وش وقفا الا بجد سمعتي مسلسل الراقصون علي النار بتاع سميره احمد علي الشرق الاوسط العالم دي مش من هنا اصلها
تحياتي وقبلاتي لك وللبنات

بنت القمر يقول...

شريف
اهلا بك
اول زياره فعلا الاراده والصبر
والصبر امر من العلقم
اهلا
اشكر مرورك

بنت القمر يقول...

ممكن
يا اخي الفاضل ولا حتي تعترض وماله براحتك عادي يعني جت عليك طيب ياريت انت متشاركش في الصناعه الجهنميه صناعه الكليبات مشاهده واعجاب ولو مش عاجبك ومعترض علي العري في الاعلانات تقدر تعمل موقف عملي ومتحضر وما تشتريش سلعه تستخدم المرأة وسيله ترويج ونحرق دمهم كلهم الممثله والمنتج والمعلن
اشكر مرورك

همسات دافئه يقول...

هههههههههه
ههههههههههههههه
نو كومنت
مراسلتكم من تانزانيا

خيرالدين يقول...

http://bosla.org/node/69



ممكن تشوفى المقال ده

قلم جاف يقول...

هوامش متفرقة :

1-الدكتورة سعاد صالح تبقى شخصية جدلية ، أتفق معها في كثير وأختلف معها في كثير..

هي تحاول البحث عن دور للمرأة في مؤسسة الافتاء التي لطالما كانت المرأة خارج حساباتها ، وهذا حق في حد ذاته.. لكن خلافي الحقيقي والكبير معها أنها مثل أكاديميي الأزهر كلهم أجمعين يكتفون بالفرجة ومصمصة الشفاة ونثر العبرات على الحال المهبب الذي وصلت إليه الفتيا دون تقديم حل.. إذا لم يكن الأزهريون هم من يقف في وجه الخزعبلات فمن غيرهم سيقف؟

2-عبير صبري لعبت على وتر امتداح شرائح ما من المجتمع لحجابها واستفادت منه خير استفادة ، والمستفز في حالتها هو المديح المستفز والنفاق على الجانب الآخر وقت أن خلعت الحجاب ، مع إشعار وسائل الإعلام الروز-جازية (باعتبار أن بعض صحفيي روزا اليوسف يعملون في قنوات الجاز) لنا بأنها كانت فنانة ذات أهمية وأطفأ الحجاب نورها وأبعدها عن الساحة الفنية وحرمنا منها ، وهذا كلام فارغ وهلس مركز ويسهل على أي طفل تفنيده..

أختلف معك في مقارنة "عبير صبري" بالذات بجحا ، مَن يشبه جحا هو الإنسان التائه الذي يصطدم بالجميع في محاولة لمعرفة الحقيقة والبحث عن ذاته ، وكثير منا بمن فيهم العبد لله يقبع في تلك المنطقة ، وليس من يجرب اللعب على كل جانب والتربح منه..

وكما يطالب تنظيم روزا اليوسف المحظوظ كل الفنانات المحجبات بإعادة ما كسبن من الفن قبل الحجاب ، من حقي أن أطالب الست عبير بإرجاع كل ما كسبته من العمل كمذيعة محجبة في الفضائيات ، ودول برضه فلوسهم حلوة واحنا مش بنقر ولا بنحسد ولا شغالين في إعلانات محمد شومان بتاع الضرائب!

3-أدعوكِ لقراءة مقال قديم نسبياً في "الدين والديناميت" فيما يخص الموضوع :

http://eldeenweldenameet.blogspot.com/2006/06/blog-post.html

عذراً للإطالة..

بنت القمر يقول...

همسات دافئه
نوكومنت برضه
علي فكرة كنت بحكي مع صديقه وقالت لي ان في تنزانيا الناس بياكلوا الستات صاحيين
تحياتي وخلي بالك من روحك

بنت القمر يقول...

e7na
احنا
شفت المقال والحقيقه معرفتش دي مجله اليكترونيه ولا ايه تحديدا ومعظم من كتبوا لم اتشرف بالقراءه لهم من قبل
تانيا ما ينفعش اللي بيحبي يطلع اخر سلمه مرة احده في السلم الاول لما يصلب حيله تانيا ببمشي ويخطي وبعدين يبتدي يطلع السلالم واعني بهذا مجتمهنا
واخير ياعزيزي يبدو ان حال المجتمع سوف يتجد عند مرحله الحبو علي الاقل في فترة حياتنا الحاليه
تحياتي اشكر مرورك
بشده

بنت القمر يقول...

قلم جاف
يسلم كي بورد حضرتك قريت بوست الدين والديناميت
والحقيقه مفيش كلام ارد بيه غير اني اتفق معاك هاندريت بيرسنت
تحياتي وليك كمان قريت التعليقات
الحقيقه رؤيه عميقه ومتوازنه جدا
فعلا الرجوله ادب مش هز كتاف بس صحيه هو الوعي دا بيشتروة منين
الله يخليك
اشكر مرورك بشده