الاثنين، ديسمبر 10، 2007

ثرثرة فوق النيل


في زياره عائليه الي محافظه الي محافظه مجاورة التقيت صديقتي المدونه حسب اتفاق مسبق رتبناه تليفونيا
التقيتها فن نقطه مشهورة بالبلده تقرب امتار قليله من النيل مشينا سيرا علي الاقدام اليه وجلسنا في كازينويتبعه حديقه كانت الشمس ساطعه والجو دافئا خلافا ليومين ممطرين بشده سبقا المقابله

كانت ترتدي تاييرا من الجينز الازرق وحجابا انيقا ممتلئه قليلا تضع ما قل من الزينه كانت تشبه اي بنت اخري في البلد لاتستطيع تمييزها عن غيرها الاانها كانت مشرقه نشيطه متحمسه لها عينان لامعتان حادتان ونظرات ثاقبه متحديه ذكرتني بنظره شاديه في فيلم عتريس وفؤاده حين فتحت الهويس لتخرج المياه لاهل البلد ومتحديه عتريس وسطوته وحين اخبرت صديقتي بذلك ضحكت طويلا وردت :الله يكرمك شاديه مره واحده..اخبرتها اني لم اقصد الجمال ولكن نظرة التحدي نظره التحدي التي يصعب نسيانها

جلسنا علي كورنيش النيل والشمس تلقي بأشعتها علينا وكأنها بخلت بدفئها علي سكان البيوت

كانت مرحبه ودودة اصرت علي اعارتي نظارتها الشمسيه حين لاحظت اني لااستطيع مواجهه اشعه الشمس

وبقيت النظاره معي الي نهايه اللقاء تحدثنا عن المجتمع واحوال المرأه تكلمنا في الدين والحجاب والقضاء والقدر ناقشنا صلاة الاستخاره واحوال القلب تكلمنا عن الفيس بوك واخبار المدونين وانطباعاتنا الشخصيه ولم يخلو الامر من نميمه طبعا..كانت متحمسه مليئه بالنشاط وحين كنت افضح لها مكنونات نفسي وابثها بعضا من همومي كنت في حاله يأس من كل شئ واي شئ لاطاقه لي للقتال ولا رغبه في الصراع كنت اردد فقط مفيش فايده

كانت متحدثه بارعه ومنصته جيده محاورة ممتازة ومقنعه وان لم يخلو النقاش من كثير من نقاط الاختلاف كالعاده اشعرتني براحه وألفه وان كانت عيونها تدور في كل اتجاه تلاحظ ما يجري حولنا تنظر فيكل ناحيه لم تقطع حديثي الا حين قالت لي شايفه ا لعصفوره نزلت دوغري علي سطح النيل تلتقط سردينه عشان تاكلها ورجعت تطير تاني!!ا
ومره تانيه حين اشارت لي علي مركب صغير تتشارك زوجه وزوج في قيادته..في اشاره واضحه للمساواه البسيطه غير المفتعله ولا المتشنجه بين الست والراجل في قياده دفه حياتهما

وكانها ابت ان تنحصر في نقطه او زمان او مكان واحد كانت معي ومع كل شئ محيط لا تفوتها شارده

اصرت بكرم بالغ علي عزومتي علي مياه غازيه واوصلتني بكرم بالغ ودعتها وانصرفت شاكره لها كرمها وفي الطريق كنت افكر هي العصافير بتاكل سردين مش السردين ده بحر مش نيل؟؟
____________

هناك 16 تعليقًا:

loumi يقول...

العزيزة بنت القمر
جميل أن نلتقي مع أناس
يشاركونا بعض أفكارنا ويساعدونا ونساعدهم على تحمل ذلك المشوار الحياتي
طال أو قصر

تحياتي لك ولغاده
سلام

إعتذار إتأخر شويه
بس ظروف النت معلش
أعتذر لك عن نقل تعليقك
على الرجل والعامود
من تحت الكليب إلي البوست الكلامي
لأن الكليب سبب
مشكله فى التحميل

صور المسجد الاقصى
مؤثرة جداً
تحياتي

اسكندراني اوي يقول...

انا بدات احسد المدونين على لقائاتهم مع بعض بجد
ربنا يديم المعروف بنكم ودايما كده على وفاق ومحبه

على فكره حواء بتسلم عليكي جدا وبتشكرك على تعليقك المؤازر لها في بوست يصل ويسلم
قوليلي مش فاكره بقى
اهه
https://www.blogger.com/comment.g?blogID=6259639369955739143&postID=5902893593342355663


وبتدعي الدعوه اللي كل المكويين بنار الغربه بيدعوها
ربنا يجمعنا دايما على خير

تحياتي
و
تحيات حواء

الطائر الحزين يقول...

ما احوجنا الى نفضفض بين الحين والحين

وما احوجنا اكثر الى نفهم دون ان نتكلم

بارك الله فيك

تحياتى

عدى النهار يقول...

مش واخدة بالك إنتى.. النيل متقسم حتت كل حتة فيها نوع سمك مختلف وإنتى حظك كان فى الحتة اللي فيها سردين لكن فى حتت تانية فيها جمبرى وفى سالمون برضه... فليه كمان
:)

بصراحة عصفورة قادرة علشان تلقط سردينة من النيل.. داهية لاتكون مملحة

غير معرف يقول...

مش عارفة اقولك اية
لكن فعلا اتفاجئت بالكلام اللى انتى كاتباه

ومش عارفة أقول اية
غير ان الوقت مر بسرعة الضوء
وكان نفسى يستمر اللقاء أطول من كدة
أنتى من الشخصيات اللى لا يستطع الانسان ان يشعر معها بالملل او حتى بمرور الوقت

دقايق قليلة لكن ضخت مزيد من الحياة والدماء لحياتى اليومية ولن تتخيلى تأثيرها فى يومى وما تلاه كان شكله ايه

=========

بتستغربى ان فيه سردين فى النيل؟
لا يا ستى
فعلا فيه
ولو انتى من محافظة نيلية كنتى عرفتى انه فيه سردين نيلى معدل جينيا" من قرابة عشرين سنة وبيتم اصطياده من النيل
أكبر حجما من سردين المالح
وأرخص سعرا" كمان
وهو اللى بيتعمل منه السردين المملح اللى عند الفسخانى هنا فى مدينتى وأعلا جودة وقت تمليحه من البحرى

لكن انا عن نفسى
باحب السردين النيلى أكتر من البحرى

-------------

عدى النهار
بعد السخرية المعتادة
انظر ردى على بنت النيل

لكن لسة معدلوش جينيا" لا جمبرى ولا كابوريا ولا استاكوزا
مازلنا نأكلها من المالح

ومكانتش عصفورة بالمعنى المفهوم
لكن طائر من المقتاتين على اسماك النيل
لكن التعبير اللى نط فى عقلى وقتها علشان ألفت انتباهها بسرعة وتشوف المشهد هو عصفورة
لأنى مأعرفش اسم الطائر الحقيقى
لون ابيض وريش اجنحته رصاصى داكن وأكبر بحوالى تلتين حجم العصفورة

mohand يقول...

السلام عليكم

معرفش ليه كنت علي ثقة ان اللي بتتكلمي عنها شهروزه

الله اعلم ليه

بس كان واضح

---------------
الحوار شئ صحي والاختلاف كمان صحي
بس حلوه المساواة بين الرجل وزوجته في اصطياد السمك

ودا علي فكره موجود كتير قوي

تحياتي

يا تري النميمة وصلت لكام كيلو كلمة ؟

ذو النون المصري يقول...

طبعا لازم تكون شخصيه لا تنسي لانها متميزه فعلا و مثقفه جدا و محترمه جدا
اتمني لقاءات اخري قريبه
تحياتي

بنت القمر يقول...

لومي اهلا بيكي
مقابله ناس لم نكن قابلناهم من قبل شئ ممتع عفلا ان الحلم والخيال يبقا حقيقه
اما المشوار الحياتي
ربنا يعنا عليه جميعا منوره دايما لومي
تحياتي

بنت القمر يقول...

اسكندراني اوي
يا عم وتحسد ليه طب ما في لاجازة تقدر تشوف اللي انت عاوزة وماشاء الله عليك محبيك كتار والميل والماسنجر قرب المسافات بين الناس
اما زوجتك الفاضله برضه سلم عليها وانا انكر ليه وجايب الادله ليه انا بعت لها سلام فعلا وبسلم عليها تاني اهو !!ربنا يخليهالك وانا عارفه انها ممكن واكيد متابعه مدونتك
طب ما تخليها تدون معانا وتبقا اسكندرانيه اوي
وكلنا ها نطمن عليها اول باول واهي تسلي وتستفيد
تحياتي

بنت القمر يقول...

الطائر الحزين
اسعد بمرورك اخي دائما فعلا كانت جلسه فضفضه تحياتي ليك

بنت القمر يقول...

عدي النهار
اهلا بيكي يا عزيزي
بجد المنظر كان روعه الشمس مخليه سطح النيل زي الفضه بيلمع والطيور البيضاء تنط تاكل سمك وتمشي تاني فعلا منظر مريح للااعصاب
معلش بقا انا اسكندرانيه مغشوشه وانتمائي نيلي مش بحري
اخي عدي
لو تكرمت تشرح لي ازاي بتضيف رابط داخل مربع الكومنت زي اللي بعت هولي قبل كدا في بوست حق ايه
انا اعرف اعمل رابط في البوست عادي لكن في كومنت مبعرفش
وتبقا مشكور
تحياتي

بنت القمر يقول...

هاي اش
انتي بقا صاحبه الليله
والعروسه وانا امها
ههههههههههههههه
ههههههههه
انا يا جميله اللي سعيده بيكي وبالمقابله وبالقعده الحلوة معاكي وعلي شط النيل
اشكرك بشده النقاش معاكي كان ممتع وثري رغم الاختلاف احيانا
والوقت عدي بسرعه فعلا
والمره الجايه مش كانز يا حاجه المره الجايه برام معمر في ايدك وانتي جايه
تحياتي

بنت القمر يقول...

مهند
مش نميمه اوي لكن حوار ايه رايك في فلان وفلانه واتجاه فلان كذا وفلانه ردودها كذا ومدونه فلان تحفه وفلان معندوش حاجه يقولها رغي يعني اما انك عرفت انا بكلم علي مين
يبقا ما شاء الله عليك نبيه
اما انا معرفتش حل الفزورة
اووووبس
تحياتي يا مهند

بنت القمر يقول...

نووون
اهلا بيك هي فعلا متميزة ومهما اختلفت معاها تلاقيها في الحوار معاها بتفتح سكك جديده للتفكير واعاده النظر في الاشياء
وبعدين ما انتوا بلديات بقا لازم تشكروا في بعض يا عم بينكوا ربع ساعه تقريبا من مدخل البلد
بس بصراحه
عندها النيل تحفه خصوصا في الحديقه اللي في مدخل البلد بالذات الصبح وكمان عريض جدا ما بفرقش عن نيل مصر
تحياتي نون

عدى النهار يقول...

المصريون

بداية السطر بعلامة > ثم حرف
a
أتركى مسافة واحدة وأكملى السطر بالجملة التالية مع تغيير عنوان الموقع والإسم الذى إخترتيه له كما تريدين
href="http://www.almesryoon.com/">المصريون

أكملى السطر بعلامة > ثم / ثم حرف
a
ثم علامة
>

بالتوفيق

^ H@fSS@^ يقول...

الطيور على اشكالها تقع
و في طيور بتقع على سردين
ههههههههههه
والنبي انتي زي العسل انتي و صاحبتك اللي هي صحبتي برضك و صاحبة صحبتي
احنا شلة موفقة باذن الله
بس عارفة نقلتيني لمكانكوا بسرعة جدا و استحضرت روح المكان
يمكن عشان انا خلقة مشتاقة لمصر طول الوقت
و يمكن عشان اي قعدة حلوة روحها بتوصلني
تحياتي