الجمعة، ديسمبر 14، 2007

هلاوس


عارف يارب اكيد عارف ابليس كان معايا امبارح واول امبارح والله

كان رايح حفله وقالي تعالي معايا دي ناس كلها لطيفه وشياطين صحابنا معرفه

قلت له بذوق:سوري مش فاضيه انهارده عندي مشاغل طحن شغل في البيت وكدا يعني طبعا كنت بتهرب

برق عنيه وزغر لي وقال:مفيش اهم مني انا الاول.وبعدين مش هأخرك.دا أنا حبيبك

قلت له:طب أنزل أنت دور العربيه وأنا ها أحصلك كنت عاوزة اوزعه

قالي:انتي بتاعتي ومش ها اسيبك انهارده انتي موصوفالي بقا وضحك

اتخنقت منه وقلت :ياعم حل عني راح متعصبو ضربني بالقلم ولوي دراعي ورا ضهري

وقالي هو انا فاضيلك اتلمي بقاورايا شغل كتير وراجعلك تاني جهزي روحك و متنسيش نفسك
محدش يكلم سيده ابليس كده!!ا

بصراحه خفت جدا لاني حسيت البيت ضاق اوي وبقا خنيق
جريت اقفل باب الشقه كان بيدخل من الحيط اقفل الموبايل فضل يكتب لي علي المرايا والسقف
ويوسوس في ودني

اجي انام الاقيه معايا علي المخده وكمان في الحلم

أعمل ايه يارب؟؟ طب عارف امبارح عمل أيه معايا؟ جالي وانا نايمه وثبت لي امشاط رجليا وكان عاوز يخنقني صحيت من النوم وعيطت جامدو قريت قرآن يارب مش عارفه اخلص منه ازاي

شوف حل فيه بقا يارب

خلقتنا عشان تمتحنا وخلقته عشان يغوينا ويفتنا

طب والنبي يا رب وحياه حبيبك محمد واليوم الكريم اللي احنا فيه تعفيني بقا من الاختبارات دي..انا مش حملها...

انا ضعيفه اوي خليه يبعد عني انا عارفه انك كرمتني اوي بلاش بقا تمتحني وتفتني ما بحبش اسقط
يعني تقريبا لو ينفع طالبه استثناء...

!!!دا انا طول عمري ناجحه ارجوك يا رب اتوسل اليك

انا تعبانه وانت عارف عندي امراض العصر كلها قرحه معدة ومرارة وخفقان قلب وكمان عارف اني خدت مهدأ
وبرضه مرتحتش كنت بقوم ناسيه أسمي وهو قالي كدا ها انسيك اسمك!!!ا

بحاول اعمل كل شئ صح ومظبوط لكن هو بيقولي دلوقت تعالي نهرب سوا انتي مش مؤمنه

انتي كدا كداداخله النار

وتعالي بقا نفرفش ونروق حبه
ولا عاوزة تخسري كل حاجه قاعده مستنيه الجنه يا فالحه
وقعد يضحك عليا جامد وانا برضه بعيط
وانت يارب بتقول يجري الشيطان منكم مجري الدم في الوريد

طب اعمل ايه افضي شراييني واوردتي من الدم الشيطاني عشان اخلص طب اجيب دم تاني منين؟

ما كده ها اموت وتحاسبني وتقولي يا منتحره يا كافره واخش النار برضه

ماما بتقولي ما تفكريش كتير كتر التحليل والفلسفه ها تلحس مخك وتقصف عمرك!!ا

خليكي علي البركه

طب انا عاملا ادور علي البركه بتاعتها اهه

دلني يا رب اعمل ايه؟

ارجوك ارجوك...

....أتوسل اليك بكل كتاب ونبي تنقذني قبل حدوث مكروه

عبدتك المستغيثه

هناك 26 تعليقًا:

زعيم كمورا يقول...

بصى
الدنيا من غير شيطان
زى الاكل من غير ملح ولا ليها طعم ولا لون
لازم يبقى فيه شيطان عشان يبقى فيه خير وشر
وعشان الانسان يقدر يعرف درجه ايمانه يعنى ضعيف قوى متوسط مافيش خالص
وتعالى هنا
قوليلى
انتى عامله كل دة عشان ابليس صاحبك عمل معاكى كدة
امال لو شوفتى اباليسو وخالتى حنوئه الزعيمه بتاعتهم كنت عاملتى ايه
ىاله المم
بنت القمر
بجد كلامك حلو ودخل دماغى وشرخ
وبجد المدونة بتاعتك هايله
تسلم ايديكى

عدى النهار يقول...

هونّي على نفسك.. الحياة مش فخ متربص بنا للوقوع فيه

وسوسة الشيطان بتروح وتيجى المهم الواحد يلتفت بهدؤ للأشياء الصغيرة البسيطة فى حياته ويحاول بقدر المستطاع الإستمتاع بنعمة وجود الجميل منها ويشعر فيها بفضل ربنا عليه ومن جهة أخرى يحاول إصلاح ما يحتاج إصلاحه منها

الطائر الحزين يقول...

وضعتى يدك على اول طريق النجاة والمعرفة
اولا الاعتراف بالخطاوثانياعرفتى عدوك نفسك والشيطان

تصورى الله عزوجل امامك وصلى له وحاولى الا تكونى وحدك اختارى صحبة صالحة تعينك على الحق

بارك الله فيك اللهم اغثنا جميعاواعتق رقابنا

اسكندراني اوي يقول...

اه من ابليس ووسوسته

ربنا يبعد عنك شياطين الانس والجن

حاولي تقربي من ربنا
اقري قران كتير
عليكي بقل هو الله احد والمعوذتين خليهم على لسانك على طول

غير معرف يقول...

مبدئيا
أنا لا اعترف بفكرة ان الشيطان يجرى منا مجرى الدم

والا يبقا وقتها لا معنى لقوة الله

لا معنى لوجود خالق يزرع الشر لمخلوقاته و يهيئ سبله لهم ويمد بساط الشرور تحت أقدامهم
والخلاصة
اننا نقاوم ونقاوم وننجح فى الاختبار


ايمانى بالخالق سبحانه يتعدى تلك النقطة بمرااااااحل شتى

مجرد ايمانى بمثل تلك مقولة يخلق بداخلى شك بقوة الخالق وحكمته ورحمته

فأستبعدها تماما
كل شر هو من داخلنا
من أفكارنا و حديثنا مع انفسنا
وليس من شيطان كابس على مراوحنا بالليل او عاوز يكتم انفاسنا

بالتالى
فأعتقد انك محتاجة لمراجعة لنفسك
او زى ما بنقول عنه... حديث مع النفس ورسم ملامح جديدة لحياتك تتسق معك ومع نفسك

فأنا أرى انك تنسلخين من نفسك
ربما بفعل فاعل
او بفعل قوة تأثير خارجية
تحاول تلك القوة تشكيلك كما تريد هى وليس كما تريدين انتى

اخلعى الشيطان وعائلته الكريمة من الليلة دى
ودورى جواكى وفى نفسك
وتشبثى بكينونتك و حقيقتك

تحياتى

Rain man يقول...

يمكن لأن الزمن بقى صعب اوى
لدرجة انى احيانا بقول لنفسى
انا مش عارف مين بيحمى مين
حتى الملاك
محتاج شيطان علشان يحميه
و ارجع و استغفر ربنا
و ابكى اوى
و اصحى تانى يوم فى موال تانى خالص و انسى

اسامة يس يقول...

محاولة للتوسط بين رأيكم ورأي الأخت الكريمة شهروزة

هناك شيطان يوسوس ويغوي نعم..
مسألة يجري منا مجرى الدم مسألة مجازية بحته كناية عن قدرته على الوسوسه ...
وهذه القدرة قط ليست بالمعنى المادي الذي صورتيه في موضوعكم وان كنت اتفهم انه تصوير للدلالة ايضاً على قوة سيطرته...

لكن كيد الشيطان ذاته ضعيف .. وهو لا يملك الا الوسوسة فقط... ونحن نستجيب او نرفض ...
تأمي قول الله تعالى:
(ان كيد الشيطان كان ضعيفا )
وانظري الى قوله تعالى وهو يصف حال الشيطان واتباعه يوم القيامه :
___________________
وَقَالَ الشَّيْطَانُ لَمَّا قُضِيَ الأَمْرُ إِنَّ اللَّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم مَّا أَنَاْ بِمُصْرِخِكُمْ وَمَا أَنتُمْ بِمُصْرِخِيَّ إِنِّي كَفَرْتُ بِمَا أَشْرَكْتُمُونِ
مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ
_________________________

الخلاصة ان تضخيم الأمر يصنع منه فوبيا وتجعل الحياة جحيماً لا يطاق وقد لا يهدف ربنا جل وعلا ان نحيا بهذه الطريقة وان يتركنا لشيطان يتحكم فينا... بل اعطانا القدره ان نواجه وترك لنا باب التوبه مفتوحاً اذا زلت اقدامنا...

دمت بكل ود..
خالص تحياتي

mohand يقول...

السلام عليكم


طيب ما الحل في ايدك
هو بيقولك كده كده داخله النار
قوليله بامارة ايه

هو مش ربنا وعدنا بالجنه لو عملنا الصالحات
وغلطنا وتوبنا


قوليله اطلع انت من دماغي بس

وانا هدخل الجنه باذن الله
وكوني علي يقين بعمل

ان الله لا يضيع اجر من احسن عملا

تحياتي

بنت القمر يقول...

زعيم كمورا مورا
الدنيا من غير شيطان زي الاكل من غير ملح
طب ازاي ؟؟هو الصراع بين الخير والشر ولو انه حتمي وقدري حاجه سهله او مريحه
لا طبعا مش مريحه
هي شاقه جدا علي النفس
اما حكايه ان الانسان يعرف درجه ايمانه
انا يا سيدي الفاضل لااعرف درجه ايماني الي الان
ممكن احس اني مقصره ودرجه ضعيف رغم اني احسن من ناس كتير
ومصيبه ناس تانيه انهم بيفتكروا انهم ممتاز وربنا يحكم علي ايمانهم يمكن ما يخدوش حتي ضعيف
عموما اشكر مرورك الاول وتحياتي

بنت القمر يقول...

عدي النهار
اهون علي نفسي
يا ريت
احيانا اشعر اني بين عالمين
لا ارضي اي منهما ولا اعرف حتي ما يرضيني
وكل ما اقول اللهم اجعل لي من كل هم فرجا ومن كل ضيق مخرجا
اشكر دوما مرورك واعتز جدا بتعليقك
ونعم الله يحفظها الله بقدرته ويباركها اللهم اجعل ما انا فيه ابتغاء وجهك
واصرف عنيشر نفسي ومكر الشياطين وفتن الدنيا
تحياتي

بنت القمر يقول...

طائر حزين
طريق النجاه مش سهل فعلا يا اخي احاول استحضار رهبه الله
هذه الايام
اسأله وحده بعد ان اعياني سؤال البشر
لجأااااات اليه بعد ان لم اجد غيره
اللهم اغثنا جميعا
اشكر جدا جدا
مرورك وتواصلك
تحياتي

بنت القمر يقول...

اسكندراني اوي
والله الواحد مش عارف يعني ها بلاقيها من ابليس ولا النفس الاماره بالسوء ولا فتن الدنيا ولا ايه
الهم اصرف عني كل ذلك
اشكر نصيحتك يا عزيزي وعيد سعيد وتحياتي لحوائك

بنت القمر يقول...

عزيزتي جدا شهروزة
ماشي الشيطان مش بيجري مجري الدم
طب تفسري بايه صراع الانسان بين الحق والباطل بين الخير والشر
ربنا رحيم جدا
ولكن الدنيا دار ابتلاء
صح؟
يعذبنا بذنوبنا وما جنت ايدينا البعض يعجل له في الدنيا والبعض يؤخره له في الاخره صح
اذا غضب الله علي عبد رزقه من حرام
واذا اشتد عليه غضبه
بارك له فيه
صح
يعني مفيش دليل علي اي حاجه
ولا يقين
الا من حياه قصيره مليئه بالهموم
ما يتسق مع ذاتي طب والنعمه
انا مش لاقيه ذاتي اصلا عشان اعرف ما يتسق معها
دعواتك

بنت القمر يقول...

رين مان
حتي الملاك محتاج شيطان يحميه!!!مفهمتهاش
بجد
طب ازاي الزمن صعب فعلا
والحياه محن
بننسي اه ونقوم عي ابتلاء اخر ومحنه اخري
تحياتي
اشكر مرورك

بنت القمر يقول...

اسامه
اولا تعليقك قيم جدا بجد
وافادني جدا
يمكن مقصدش اني احمل الصراع كله للشيطان وممكن يكون كيده ضعيف
لكن هو مش الشيطان لوحدة منفرد حط عليه اشي النفس الامارة بالسوء علي فتن الدنيا علي القدر ومحنه
والفوبيا موجوده الحمدلله ومتوافره بشده
من الخوف من بكره ومن الخوف من القدر ومن الظلم ظلم الاخرين وظلم النفس
بطش القدر وغفله النفس
غطرسه الانا من داخلي
وغرور الانسان
زله العبد وهوي النفس
والله المستعان وحده
شكرا ليك
شكرا

بنت القمر يقول...

مهند
تعليقك هو السهل الممتنع البساطه بلا تعقيد
اشكر نصيحتك
وان تكرمت اقرا ردودي علي باقي التعليقات
اشكر مرورك

غير معرف يقول...

كلمةدار ابتلاء انا اضعها فقط حين أفقد عزيز بالموت أو الضياع
حين أبتلى فى شح الرزق وضيق العيش

دى حاجة بقا عم ابليس مالوش اى دخل فيها ولا من بعيد ولا من قريب

فلا حيلة فى الموت ولا شفاعة فى الرزق

كلماذكرتيه
من أفعال الانسان ونتاج تفكيره وخطواته هو...اللى طالعه من تلافيف مخه


و هذا ما سيحاسب عليه

ولكن
لو سلمت بمفهوم وبمفهوم غواية الشيطان فى أخطائى وشرورى
وقتها
يحق لى ألا أحاسب فى الآخرة
لأنى فاقدة الأهلية
يعنى فيه حد بيسوقنى
وأى إلة يرضى بعقاب فاقد أهلية
لا يصح أن يكون إلة

والخالق سبحانه أعلا من تلك مسألة جل شأنه


فأنا أعاقب على ما جنت يدارى وما ساقنى اليه عقلى ونفسى
وليش ابليس


طب والنبى ابليس مظلوم معانا ظلم الحسن والحسين
يا بنتى دة فيه بشر تفوقوا على الشياطين بشرورهم
لدرجة جعلت شياطين جهنم بكل ألوانهم يعيدوا نظر فى مسألة رفض السجود
وقرروا التوقيع على عريضة جماعية لاعادة النظر فى مسألة السجود
وقرروا ان عملية السجود لبنى آدم الجدد
تكون علنيــــــــة
وبحضور كافة طوائف الملائكة
اعترافا" منهم بأحقيتنا لها بعدما تفقنا عليهم وسبقناهم بأشوااااط

صلى عالنبى صلى
قال ابليس قال

غير معرف يقول...

آسفة

تعديل

لا حيلة فى الرزق
ولا شفاعة فى الموت

Searcher يقول...

أفتكر إن إبليس مش بيعمل كل المجهود ده عشان يوقعنا
ده بالعكس إحنا اللى ساعات بناديله عشان يوسوس لنا
:)
تحياتى

Desert cat يقول...

تسلحى دائما بذكر الله
ربنا يبعدنا عن وعن نزعاته

بنت القمر يقول...

شهروزة
الدنيا دار ابتلاء بمعني صايمه وعاوزة تاكلي وعطشانه موت
تعبانه موت وسقعانه ومش قادرة تصلي
قريب تكرهيه كراهيه الموت ولازم توديه عشان صله الرحم
ملكيش غرض تتحجبي بس لازم عشان فرض او شبه فرض
مش كل دي امتحانات من ربنا
بلاش ابتلاء مش دي فتن برضه
الميه وانتي عطشانه النوم وانتي مش مصليه
وهلم جرا
لو انتي مش مهتمه اصلا اوكيه ولا في دماغك بس لما تكوني مش مرتاحه اصلا لتقصيرك
ممكن ميكونش شيطان ممكن يكون هوي النفس او النفس الاماره بالسوء او غرور لبني ادم
مش مهم الاسم
المهم الشعور يا عزيزتي
احساسك بالرغبه في شئ ومقاومته او احساسك بالنفور من شئ والانصياع له
دي يا غاده معني الامتحان اليومي الذي نتعرض له جميعا مش انا بس
اخطائي انا مسئوله عنها صح
صح جدا وبس الدنيا فتن ومغريات
والاختيار مش سهلا ابدا
اشكرك جدا مناقشتك دايما بتفيدني
وبتفتح لي افاق جديده للتفكير
ونون النسوة سايبالك تعليق البوست السابق
تحياتي وكل سنه وانتي بخير

بنت القمر يقول...

سيرشر
اشكر اولا مرورك الاول
احنا بناديله
امال هو وظيفته ايه
وقاعد يعمل ايه
ممكن تكون انفسنا الاماره بالسوء اكتر شرا من ابليس
بس للاسف دي كلها عوامل تتكاتف علينا
اشكرك

بنت القمر يقول...

ديزرت كات
ربنا ينصرنا علي انفسنا ويحمينا من فتن الدنيا
كل سنه وانتي بخير

Unknown يقول...

كل سنة انتى طيبة

كل ده فى قلبك يا حبيبتى ؟ صدقينى كلنا كده و الله هونى على نفسك ان الله بغفر الذنوب جميعا ألا ان يشرك به

و اديكى اهوه بتعترفى و بتعيشى لحظة مناجاة صتفية خالصة مع ربنا سبحانه و تعالى اعزمى النية و هو الشيطان الى حيهرب منك صدقينى

بصى انا عاوزة رأيك ضرورى فى القصيدة الجديدة بتاععتى حطاها فى البوست الى قبل الاخير ، عشان انتى بتظهريلى مواطن الضعف بتاعتى
و مستنية بوست حليم

بنت القمر يقول...

عاليا حليم
منورة
اشكرك كل سنه وانتي طيبه
سبت لك تعليق تحت القصيده
عيد مبارك

أبو عمر - الصارم الحاسم يقول...

مع كل وسوسة طلعي صدقة = حسنة يعني


وتكون صدقة صغيرة مش كبيرة - جنيه نص جنيه عشان ماتبقاش صعبة


هيبطل بإذن الله اما يلاقيكي بتاخدي حسنات مع وسوساته