الأربعاء، أبريل 09، 2008

البحث عن جان دارك_اسراء عبد الفتاح


الحديث عن اسراء عبد الفتاح صانعه الجروب في الفيس بوك فكرني معلش اعذروني بالطالب الصربي اللي قتل ولي عهد النمسا فقامت علي اثر تلك الحادثه الحرب العالميه الاولي1914م((:

الطالب عمل عمل اعتقد انه وطني ومهم لكن اكيد ابعاده ونتايجه لم تكن علي تصورة بأي حال

البعض عجبهم صناعه جان دارك مصريه لتحترق وهما قاعدين عي بيوتهم بيقزقزوا لب احتياجهم لبطل اعماهم عن انها اصلا مكانتش تتخيل انها ها تكون ولا عاوزة تكون بطله

البعض كتب التدوينات في التغزل باسراء وبعض المواقع كتبت فيها اشعار واستقبلت رسايل من نوعيه: بحبها من قلبي.. او يارب متكونش مرتبطه واقدر اتجوزها و مش عارفه ليه لو واحد شايف انها رمز وقدوة يكون عاوز يتجوزها{يمتلكها} هل كل واحده نعجب بيها حتما
نتجوزها؟؟

!!!او من انهاردة مافيش حكومة انهاردة في الفيس بوك اسراء عبد الفتاح رئيس جمهورية الفيس بوك

!!مش قادرة بصراحه شعور خليط من الضحك والجز علي الاسنان سوا

واعتقد ان مشاعر اهلها لن تخرج عن : ادي اللي خدناه من النت... و شفتي يا حفيظه قولتلك خلي بالك من البنت بنتك عاملا نفسها زعيمه!!؟؟!!لكن اي زعامه دي اللي جت في لعبه

اعتقد ان ما فعلته اسراء لا يخرج عن اللعب بكرة تلج ثم القائها لتزيد وتكبر علي المنحدر لتلتفت فجأة فتسحقها تلك الكرة

انا مش ضد اللي كتبوا لكن مضطرة اختلف مع عبده باشا واكون قليله الذوق ان الجهود الي الان بدون نتيجه الا لو الناس شايفه انها خطوة
.....في طريق الالف ميل

مضطرة اسفه ولو اني رافضه موقف الاخوان لأنه مكنش مع اختيار الشعب وحتي لو الشعب غلطان في تقديرة

مضطرة اتفق مع محمود المصري ان منظومه الفساد اقوي واعمق فساد اداري ومالي وحكومي علي اعلي مستوي وان الحلول مش عن طريق منحه لعمال المحله 15 يوم,, يعني كمان نكته العامل لو كان بياخد 400جنيه ها يزيدوا الي 600 جنيه!! مسخرة فعلا
!!!زي اللي بيعالج المريض بالتسمم بحبايه اسبرين

مضطرة ازعل لست ادري العزيزة اللي كتبت لي علي المسنجر امبارح وهي مخنوقه مني ليه بتقولي مفيش فايده؟؟

!!لا في فايده كفايه ان الجيل الجديد بيطالب بحقه ويخرج من عبايه بابا وماما

مضطرة ازعلها تاني واصدمها تاني واقولها انها مش صحوة للمطالبه بالديموقراطيه لكن دي ثورة جياع فقط

!!مضطرة احدد موقفي خلافا للاستاذ عباس العبد اللي كتب مقال طويل جاب فيه اراء الناس كلها الا رأيه هو!!

مضطرة اقول ان رفع اسعار بعض السلع عن طريق الغاء الجمارك هو نوع من الضرب علي القفا لان الجمارك كمان مصدر دخل قومي

!!!يعني الحكومه جابت من هنا وحطت هنا تطبيقا للمثل المصري الشهير خد من دقنه وافتله

مضطرة للاسف انتظر العواقب الاقتصاديه الوخيمه التاليه لهذا القرار

مضطرة احدد موقفي بعد ان تباري المتبارون في التنبؤ بفشل الاضراب وحجز اسبقيه التحليلات عن الاضراب سواء مع او ضد

تحياتي للجميع

هناك 41 تعليقًا:

محمود المصرى يقول...

بسم الله الرحمن الرحيم

دخلت على التدوينات دى حلوة برضه التدوينات ودمها خفيف .

الف شكر على الاتفاق الاضطرارى المؤسف, لكن عندى تعقيب بسيط ياربت تتقبليه حضرتك بخصوص ان الموقف بتاع الاخوان كان مغاير لموقف الشعب , فأعتقد ان واجب اى انسان شريف ان يصحح ما يراه خطأ , واؤكد ان الاخوان فى بيانهم حاولوا يوضحوا ان فى خطأ منهجى فى الدعوة للاضراب متجنبين ادانته او مهاجمته لانه تصرف شعبى حتى ولو كان غلط , يعنى التوازن اللى حضرتك طلبيته انا شايف انه توفر فى بيان الاخوان.
عموما يعنى حتى لو حضرتك لم تتفقى على هذه النقطة الفرعية يكفينى اننا اتفقنا على الاصل .

تحياتى

خمسة فضفضة يقول...

السلام عليكم ورحمة الله وبركاته

البعض عجبهم صناعه جان دارك مصريه لتحترق وهما قاعدين في بيوتهم بيقزقزوا لب

عجبتني اوي الجمله دي، وهو ده اللي جه في بالي امبارح وانا عماله اقرا كلام الناس في كل حته عنها وعن الجروب وعن نجاح دعوتها
صدقيني صعبت عليا اوي حسيت انها ياحبيبتي ها تتحمل كل حاجه لوحدها

اما القرارات الاقتصادي بالغاء الجمارك فا من وجهة نظري المتواضعه ما هي الا مجرد مسكنات وقتيه للازمه عشان يهدوا الموقف شويه بس مش ها تستمر كتير ، بالضبط زي ال 15 يوم او الشهر اللي ادوه للعمال هما كلهم 200 جنيه هاتتصرف هوا ويرجع كل شئ لاصله

المشكله الموجوده بتتطلب حل جذري مش مجرد مسكنات وقتيه مالهاش لازمه

وجهة نظري يقول...

المشكلة في دا كلة، حد فهم حاجة في الأخر؟

الي كانوا ماليين الفضائيات إختفوا خالص ومبانوش تاني، وكلة نفض إيدة من ثورة جياع المحلة... مش بتاعتنا، دول هما!!! ويقولك في الأخر الإضراب نجح، علي الأقل المصريين طلع لهم صوت لأول مرة.... الحمدللة بقينا ظاهرة صوتية تاني.

موصلهمش إن الإضراب دا أخر حل، محاولوش في حلول تانية حتي، نطوا السلم مرة واحدة.... مفكروش إن كل الشعب المصري مشارك في الفساد بصورة أو بأخري... لأ دا أنا ممكن اقول إن هوا أصل الفساد، بس بيدور علي شماعة يحدف عليها المشاكل.

حسبي اللة ونعم الوكيل.

Telefone VoIP يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Telefone VoIP, I hope you enjoy. The address is http://telefone-voip.blogspot.com. A hug.

عباس العبد يقول...

" البعض عجبهم صناعه جان دارك مصريه لتحترق وهما قاعدين في بيوتهم بيقزقزوا لب "
========
طيب ما انتى تمام أهه مستنية رأى فى أيه ؟
حقولك : عندى مشكلة
فكرة الحكم الى صدر فى حق الناس الى خرجت فى انتفاضة يناير 77 فى عهد السادات ؟ فاكرة أسم القاضى ؟ فاكرة ديانته ؟ فاكرة الحكم ؟ فاكرة سبب الأنتفاضة أصلاً ؟
that's what i'm talkin about
هى دى المشكلة الى أنتى لخصتيها , أنا لا ضد الأضراب و لا معاه عارفة ليه ؟
علشان ...
" البعض عجبهم صناعه جان دارك مصريه لتحترق وهما قاعدين في بيوتهم بيقزقزوا لب "

mohand يقول...

طيب لو مكنتش مخطوبة ممكن اتقدم ؟

ولا ايه رايك هترفضني

هههههههههههههههههههه


لسه مكونتش راي محدد عن الموضوع ده

بس كل اللي اقدر اقوله اني مش شايف ان الاضراب نجح اساسا

لان عمال المحله جاين يقولوا احنا معملناش اضراب اساسا

وتحيه من القلب لنظيف وبتاع

تحياتي

بنت القمر يقول...

محمود المصري
يعني ممكن نتفق او لا نتفق مش دي القضيه لكن حضرتك بتقول الاخوان شاف انه في خطأ منهجي في الدعوة للاضراب
طب يا محمود عامه الشعب ممكن تفهم كلمه خطأ منهجي
ولا ها تفهم علي كيفها ان الاخوان كحركه سياسيه لها اجنده تانيه وحسابات اخري غير ترضيه ومشاركه الشعب للاسف الغوغائيه دي مؤسفه اللي صاحبت الاضراب بس متقدرش كمان تقول ان الاخوان كانوا يتخيلوا الاحداث رايحه علي فين
ولا ان الاضراب بقا عامل زي العيل اللقيط لو اهله اغنيا الكل يتخانق عليه يكفله ولو اهله فقراء الكل يتبرا منه!!
اعتقد ان الكل يساريين واخوان اتبروا من الاضراب ودي مش القضيه بتاعه البوست برضه تفتكر احنا بندور علي اي بطل ولو حتي بنت بتلعب علي الفيس بوك عشان ننصبها رئيس جمهوريه
تفتكر انننا بالهيافه دي؟؟
تحياتي

بنت القمر يقول...

فضفضه
يا عيني البنت بتلعب قلبت غم وشويه ها تتعمل بناظير بوتو والهوس بيها بقا نكته روحي اللينك اللي انا حاطاه شوفي واضحكي عارفه الفكرة بتاعه الكومبارس اللي بيجي مكان الممثل الاساسي ويخطف من الاضواء
اهي كده
بالنسبه للشق التاني صديقه امبارح كانت بتقولي ان الاضراب نجح بدليل ان عمال المحله مرتباتهم زادت نص شهر وحيث ان النص شهر مش ها يزيد عن تلتميه جنيه وده مش حل اكيد لمشاكلهم
فدي تكون نكته مؤلمه او رفع الجمارك يعني قزازة الزيت اللي ب10 جنيه تبقا ب9 يعني برضه مسخرة زي ما قلت كأنك بتعالجي مريض التسمم بحبايه اسبرين
ومتوقعه ان ممكن ينضحك عليه ويسكت لكن مش يخف ابدا
تحياتي

بنت القمر يقول...

وجهه نظري اهلا مرورك الاول
واللهاعتقد ان الايام الجايه مش ها تكون سهله
وبعدين يا عزيزي زي ما قلت لمحمود المصري الاضراب بقا زي العيل اللقيط نجح الكل ها يتخاطف شرف نسبه ليه والمشاركه في صنعه
فشل يبقا مش بتاعنا غوغاء
قله مدسوسه واحدهم قال في فضائيه اعتقد نائب حزبوطني المحله شعب المحله كريم ومضياف ومش كده
كان الناس دي جت بالبراشوتات
تحياتي واشكر مرورك

بنت القمر يقول...

Telefone VoIP
thank you

بنت القمر يقول...

عباس العبد
مفهمتش تقصد تقول اننا اقل واصغر اننا نقيم الحدث؟
ولا تقصد ان كلامنا مجرد لغو فارغ بينما جان دارك المصريه تحترق؟
واحنا بنطق حنك ولا هي افضل منا؟
انت بتقولي ما انتي فاهمه اهو بس يمكن اللي فاهماه غير اللي انت فاهمه او تقصده؟
انا اقصد ان الناس شيلتها الشيله وقاعدين يتفرجوا دلوقت وفرحانيني ان الحمدلله طلع لنا بطل ان شالله بنت قاعدة تطققطق علي الكيبورد في الفيس بوك
وفجأه بقت معبوده الجماهير وفاتنه الشعب وبطل قومي وحاجات في اللينك عجب
عموما تحياتي

بنت القمر يقول...

مهند
مش انت خاطب يا ابني ولا ها تخطب من قنا ولا زياده الخير خيرين
ولا ايه حكايتك
معلش يا مهند مضطرة اصدمك واكئبك واقولك لو بصيت في صورتها هتلاقي في ايدها اليمين دبله!!
معلش خيرها في غيرها
استأذنك تقرا تعليقي علي د -فضفضه
اشكر مرورك

محمود المصرى يقول...

بسم الله الرحمن الرحيم

هو بصراحة سؤال حضرتك صعب وبالتالى هاحاول ارد بطريقة تفكير وليس بطريقة اجابة .
اعتقد ان الناس لما مايكونش عندها فكر بيحكم تصرفاتها بتلجأ للقائد الملهم اللى يسوقها بدون ان يتعبوا انفسهم فى التفكير , ودى حاجة اصيلة فى الشعب المصرى من ايام فرعون الاله ( ما اريكم الا ما ارى وما اهديكم الا سبيل الرشاد ) , فالناس بتحب الراحة الجسمية والراحة الذهنية ايضا .
دا مش رأى لكن ممكن يكون مجرد تفكير .
تحياتى

بنت القمر يقول...

محمود
بمعني؟؟؟
ان الناس عاوزة حد يسوقها ويفكرلها ويحركها؟؟
قام محدش اخد المكان ده
راحوا هما سايقين روحهم بطريقه همجيه
وانفجروا بالشكل ده؟؟
جميل جدا كده متفقين
ولكن تمضي لي وتبصم ان ولا حركه ولا حزب سياسي وقف جنب الشعب ومنهم وليس اولهم الاخوان
يساريين تقدميين ليبراليين وفد تجمع بطيخ كله بقا الكل كان عارف المعاد واستني لابد في الدرة يبقا يا محمود بعد اللي حصل والكل اتبرا ووصفوا الشعب بالهمجي - كانه لقي قياده تنظمه ومتنظمش!!يبقا الشعب ليه ربنا بقا واعذرني اذا الناس فقدت ثقتها في كل الحركات والاحزاب علي الساحه
تحياتي

MERO يقول...

هو انتى فاضية ؟

لازمة الهرتلة واللف على المدونات دى ايه؟

انتى شبه قناة الجزيرة وعمرو اديب

بتهرجوا

محمود المصرى يقول...

بسم الله الرحمن الرحيم

ربنا يسامحك بجد
انا بقولك ان دا مجرد تفكير وليس رأى , تقومى تبنى عليه افتراضات وتحاكمى الكل بالشكل داوتتهميهم بالتقصير؟

لكن عموما يعنى انا عاوز بس اوضح حاجة , مافيش زر المفروض الاخوان والسياسييين يضغطوا عليه يقوم الشعب يتثقف ويتعلم , لكن دا عن طريق توعية الشعب بصورة شاملة , الفكرة مش فى ان مين يلحق يقود الشعب اثناء المظاهرات والاضرابات , وعاوز اقولك ان لو الاخوان هما اللى كانوا بيقودوا المظاهرات بتاعت المحلة ماكانش بعيد يحصل نفس اللى حصل بالظبط , بس ساعتها كل الفرق ان الامن هايلاقى ناس يقبض عليها ويشيلها الليله , والجرايد هاتطلع بمانشتات تقول المحظورة عملوا بلطجة والمحظورة ولعوا فى البلد والمحظورة قتلوا النقراشى , وبعدين ماهو ايام يناير سبعة وسبعين الشيوعيين كانوا فى الساحة وكان لهم دور لكن ماقدروش يسيطروا على الناس والبلد ولعت والجيش تدخل علشان يسيطر على الوضع , يعنى القضية مش فى مين فى القيادة ولا مين يتولى القيادة القضية فى توعية الشعب , ومادام الشعب لم يتم توعيته ماينفعش نقوده فى مظاهرات احتجاجا على الغلاء والاسعار دى مناطق متفجرة , وفىكلمة حلوة قالها الدكتور ايهاب ابراهيم ( لابد من توعية الشعب قبل تثويره ) .
واذا كانت توعية الشعب مسألة امدها يطول يبقى نقوده بصورة واعية لتحقيق مطالب بعيدة المدى , وساعتها الغلط مش على الجموع لكن الغلط على اللى هيجهم بالصورة الغير مسئولة دى ولا ايه رايك ؟
انا عاوز بس اضرب مثال على قلة وعى الناس , الدعوة كانت خليك فى البيت صح ؟ لكن الناس اللى فى الشارع كل ما تسألها هو فى ايه فى البلد ؟ يقولك اصل الجماعات الاسلامية هاتعمل مظاهرات النهاردة ودا حسب ما سمعت شخصيا , ورئيس تحرير العربى الناصرى امبارح قال ان الناس قاعدة تقول هى فين المظاهرات ؟ امال اضراب ايه ؟ يعنى الناس فكرتها ان المظاهرات تطلع ويولعوا فى الاستاد والامن يرش مية وهما يحدفوا طوب وبكده يكونوا عملوا حاجة ريحت نفسيتهم ودمتم .
طبعا هاتقوليلى ان المفروض بناءا على هذا ان الاخوان والاحزاب تحذر من هذه الدعوات المنفلتة الغير مسئولة التى ادت الى هذه الاحداث دون مراعاه وحساب ردود فعل الشعب , هاقولك هو دا بالظبط اللى حصل من الاحزاب , والاخوان وقفوا موقف اقل حدة من الاضراب علشان مايدينوش اى محاولة مستقبلية للاضراب بعد ذلك , يعنى كان فى اتشراف للمستقبل .
قوليلى حضرتك بس ايه اللى كان المفروض يتعمل وماتعملش , والسؤال دا علشان كلنا نتعلم وانا اولهم مش علشان نقول الاخوان صح ولا غلط , لكن علشان نعرف الاصلاح نوصله ازاى .

اسكندراني اوي يقول...

سيدتي
اخبارك ايه
واخبار ادم ايه يارب يكون رجع بالسلامه
لن لخوض في تفاصيل لاني مش على درايه كامله بما حدث وما كان مخطط له ان يحدث

كل اللي اقدر اقوله اننا احيانا بحسن نيه جدا بنحدف الطوب على وش احبابنا
زي الدبه اللي موتت صاحبها

كان فيه دبانه مضايقاه عشان تموتها حدفت صخره على وشه وهو نايم معتقده انها بكده حتموت الدبانه



تحياتي

زمان الوصل يقول...

أنا شخصيا اعتبرتها خطوه ناجحه جدّا
ربّما لأنّى لم أسرف فى الآمال و أتوقّع أن تغيّر هذه الخطوه كل ما نشكو منه فى غمضة عين
لم أتوقّع أن يتوفّر رغيف الخبز بعد طول غياب
ولا أن تتحسّن المواصلات و تصبح آدميه بعد البهدله
ولا أن ترتفع الدخول فجأه و يحقق الحالمون كل أحلامهم

يكفينى جدّا أن نتّخذ موقفا واحدا و نلتزم به .. يكفينى أن نثبت خطأ فكرة أنّنا لا نجتمع على كلمه واحده و أنّه لا أمل فى أن نأخذ موقفا معارضا .. طبعا لا أتحدّث عن الاعتراض من خلال التخريب أو النهب .. أتحدّث عن الاستجابه للفكره فى حد ذاتها ..

لا أتوقّع منّا كشعب عانى كثيرا الحرمان من ممارسة الحقوق السياسيه أن نمارسها صح من المرّه الأولى بعد غياب .. أتوّقع ضبابيه فى الرؤيه و عدم وضوح الأهداف بشكل كامل فى البدايه لكن ربّما لتواضع توقّعاتى من هذه الخطوه و هى مجرّد الالتفاف حول كلمه واحده و تحقّق هذا بشكل ما أسعدتنى جدّا هذه الخطوه

أسعدنى كذلك أن يعلن الإخوان من البدايه عدم رضاهم عن هذه الخطوه حتى لا تنسب لهم فيما بعد
يسعدنى أن يكون هناك تحرّك خارج عباءة الإخوان إذ ليس بالضروره أن يرضى الإخوان عن أى موقف سياسى حتى يكون هو الموقف الصحّ و رأيهم فى موضوع سياسى هو مجرّد رأى قد يصيب أو يخطئ .. و رأيت اعتراضاتهم على الإضراب اعتراضا شكليا محضا لم أهضمه بصراحه و رأيت فيه مجرّد اعتراض على خطوه لم يكونوا هم الداعى الأوّل لها ..

فليعد للدين مجده يقول...

ربنا يفرج عن اسراء ويتقبل اخلاصها لبلدها

لكن هذا هو طريق المتعجلين

الطريق ليس من هنا

الطريق في تربية الشعوب

karakib يقول...

متفق معاكي جدا علي فكرة يا بنت القمر

fad-fadat nour يقول...

اولا احب احييكي علي الموضوع الثري جدا
ثانيا عايزة أعلق علي 3 نقط

بالنسبة لحكاية جان دارك و التعظيم و التفخيم لإسراء فهي - في رأيي- نوع من المزايادات الساذجة التي يستخدمها الناس للتعبير عن اعجابها بالشخصية و لتعويض اي تقصير سواء تجاه الشخصية نفسها او تجاه الموقف ككل

اما بالنسبة لموضوع حجز اسبقية التعليق علي الموقف فالحقيقة ما نقدرش نلوم علي اي مدون حسه الصحفي اللي بيخليه يتعامل مع اي موضوع- بغض النظر عن عمقه و تأثيره- علي انه سبق يجب ان يحصل عليه قبل غيره

و اخيرا ( و بالرغم اني لم اشارك في الاضراب و لم اقتنع به تماما) مش متفقة معاكي ان مفيش فايدة

لأن معني كده انه خلاص نفقد الامل في ان اي عمل او موقف حيؤدي لأي نتيجة

و ان المفروض اننا نستسلم حيث ان كل الافعال سينتج عنها ردود فعل اكثر ضررا من الموقف الحالي
لأ
أول الغيث قطرة ..و لو كانت القطرة دي حمضية و سامة

تحياتي لك

شـــــهــــروزة يقول...

أنا مش ضده كليا" وعلى الاطلاق
ولا ضد فكرته
بالعكس
انا سعيدة بشكل لا يوصف لمجرد استجابة الناس لفكرته
وأن الفكرة سرت زى النار فى الهشيم
لأن احنا فعلا عاوزين كدة ومحتاجين كدة

لكن ضد طريقة تنظيمه وخط سيره

دى بس الفكرة بكل بساطة

تحياتى

MAKSOFA يقول...

قلبي مع أمها

عدى النهار يقول...

قرأت إن البنت تم القبض عليها مش عارف إذا كان ده حقيقى ولا لأ. ياريت من تحمّسوا لها يستطيعوا فعل شىء لمساعدتها قبل أن تصبح عبرة للجميع

المصريون كانت نشرت إن الحكومة جمعت 10 آلاف مليار جنيه ضريبة مبيعات نتيجة موجة زيادة الأسعار الأخيرة. حكومة جباية بكل شكل ولون مش ممكن تضحى بدخل الجمارك ببساطة لازم تسترده من الناس ولو بعد حين وبفايدة البنك كمان

Nsreen Bsunee يقول...

ربنا مع اهلها ومعاها

بس الموضوع بقي اوفر اوى اوى لدرجه انى اتخنقت من اسراء ومن سيرتها بعد ما كنت متعاطفه معاها بجد لكن اللى بيحصل على الفايس بوك والمدونات حاله غير طبيعيه عند "قطه الصحراء"
قريت تعليقات من نوع
"يا اسراء هذا قدر الرُسل والانبياء"

"اسراء هى مصر ومصر هى اسراء"

"كلنا اسراء"

بيفرغو التضامن مع المعتقلين من مضمونه بشويه كلام اهبل ميدخلش ذمتى بمليم اساسا قال يعني لما يقولو كده انا حاقتنع ان اسراء هى مصر خلاص وقال يعني كلهم سهرانين الليل يفكرو يا ترى اسراء عامله ايه وبيتقطعو عليها زى اهلها

تفاهه

البنت جريئه وعملت جروب على الفايس بوك والقبض عليها وعلى غيرها انتهاك وظلم كبير ونقطه ونقفل السطر

طبعا انا متفقه مع كل كلمه قلتيها فى البوست وعندك حق فى انهم باللى بيعملوه بيزودو الطين زفت على دماغ البنت واهلها

ربنا معاها ويشفي المعاتيه يارب

أسير الجراح يقول...

مدونتك جميلة جدا سعدت بمرورى عليها تحياتى (اسير الجراح)

appy يقول...

طبعا متأخرة كالمعتاد معلش
بس عاوزة اقولك على حاجه هى كبش فدا مش اكتر
بس والله انا زعلانه علشانها هى وغيرها بجد
انما عملوهم كبش فدا زى ما قولت لك والمصيبه ان بعض العيال ومش هقول كبار بيلموا لهم تبرعات ليه وامتى وفين وازاى مش عارفه
طيب والاحزاب اللى وراهم بخخخخخخخخخ ضاعوا ومركز هشام مبارك ولا اعرف فبجد بقت مهزله

بنت القمر يقول...

ميرو
يعني انتي وهميه ومدونتك وهميه وشكلك يا ميرو عاملاها اصلا عشان تقوليلي الكلمتين دول
طب وصلا يا ستي
انا فاضيه وبهرتل
اه فاضيه ومدونتي واهرتل فيها براحتي وكل الناس اللي انتي شايفاهم دول عاجبهم هرتلتي!! مالك انتي بقا؟؟
جايه تهرتلي بالتعليق بتاعك ليه؟؟
عموما
عموما تقريبا التعليق ده لا يخرج عن الفئه المندسه التي تبغض بنت القمر
وهم محددين تماما بالنسبه لي
بس الحقيقه مكنتش اتخيل ان كرهه_ا يوصل الا انه _ا يعملوا مدونه مخصوصه عشن يسخفوا
الله شكرا جدا
منحتني شعورا عظيما بالانا
ابقي تعالي تاني متقطعيش الزيارة عشان استمتع بهرتلتك
يا ميرو
قال ميرو قال
اذا لم تستح فاعل ما شئت

بنت القمر يقول...

محمود المصري
انا مش عارفه انت زعلت ليه
يعني انت شايف ان الشعب لازم يتوعي والتوعيه ها تاخد وقت ومش مشكله مين يقود الشعب لانه كده كده ده ها يحصل
طب انا كمان معنديش حل ولا عارفه ممكن يكون ايه؟؟
لسبب بسيط انا مش طارحه نفسي معارضه لا شرعيه ولا محظورة انا انسانه ومواطنه عاديه جدا انا عارفه ان الاخوان موقفهم سيئ ومتلاحقين والامن فعلا كان هيشيلهم الليله
لا خلاف
بس لما اجي اقدم نفسي كفريق سياسي معارض لازم في الازمه يكون عندي تصورايه هو الحل يمكن انا اكون بحملهم ما لا يستطيعوا لكن
انا صعبان عليا الشعب بجد
اما حكايه الاخوان قتلوا النقراشي فدي مصطفي اسماعيل اللي قالها مش انا!!
انا لا بتحاور كده ولا بتناقش كده !!ولا اتمني اتمني زوال الاخوان كليه
اتفق معاهم اذا امتلكوا رؤيه للاصلاح
تعتمد علي الشفافيه والعدل والديموقراطيه
ما امتلكوش يبقا ما يلزموش
بس
تحياتي

بنت القمر يقول...

اسكندراني اوي ادم هنا ومنور سماء الاسكندريه ومعطر هواها
اشكرك تابع التدوين تعرف كل الاخبار احسن من اي ريسيفر ودش
تحياتي

بنت القمر يقول...

زمان الوصل
اتفق معاكي كليه وجزئيه
وهو اننا منتوقعش كتير من ورا الخطوة دي اولا
تانيا لو فريق سياسي خذل الشعب واو فرقاء فالشعب ليه ربنا في الاخر
وتقريبا هو اتساب في المطحنه لوحده تحياتي

بنت القمر يقول...

فليعد للدين مجدة
ربنا يفرج كرب اسراء فعلا بس طريقط طويل جدا مش ها نلحق اخرة في اعمارنا اقصيرة
تحياتي واهلا اول مرور شرفت المدونه

بنت القمر يقول...

كراكيب
وانا كمان متفقه معاك
بصرة
تحياتي

بنت القمر يقول...

فضفضه نور
يعني اتفقنا في واحد من تلاته
كويس جدا
بدايه قويه
عموما يا نور انا مش بلوم علي حد انه اتنبأ بنتيجه الاضراب لكن اللي ضايقني هو ان الكل اتبرا من الشعب سواء مدونين اتهمومهم بالجهل والتخلف او معارضه نفضت ايدها او مدونين حكموا علي التجربه بالفشل
وبالنسبه لتالت نقطه
بتاعه انه في فايده او مفيش ياريت تقري البوست السابق وتع رفي اني حكمت من منظور اقتصادي بحت مش مجرد اننا اتجمعنا هيلا بيلا سوا مع بعضينا وحدفنا طوب في نفس واحد
منورة يا نور
اشكر مرورك

بنت القمر يقول...

شهروزة ولا انا ضده كمان ولا مكعاه ولا بلومك اطلاقا بس النقطه ان انا الناس صعبانه عليا مش مجرد اننا لمينا بعضينا وحدفنا طوب في نفس واحد يبقا نجحنا
ده مش نجاح
النجاح لسه بدري عليه وعلي رأي نور يمكن اول قطرة سامه وحمضيه
منوراة اش

بنت القمر يقول...

مكسوفه
وانا كمان
تجربه مرة بجد لاي حد
اشكر مرورك

بنت القمر يقول...

عدي النهار
اتقبض عليها واخدت15 يوم
طبعا جايزة افضل تعليق لان حضرتك وصلتك الفكرة تماما كما اعنيها
الحكومه بتضحك علينا خد من دقنه وافتله
وعلي رايك هتلم الجمارك من الضرايب
اشكرك جدا
الله ينور

بنت القمر يقول...

نسرين
امال لو شفتي الموقع بتاع راديو تيت
كنتي سخسختي من الضحك البنت كمان جالها عرسان وها يستنوها لما ربنا يفك اسرها
بس حكايه قدر الرسل دي واسعه طحن
منك نستفيد
منورة نوسي

بنت القمر يقول...

اسير الجراح
اهلا زيارتك الاولي
وان شاء الله تجد دوما ما يعجبك
تحياتي

بنت القمر يقول...

ابي
هي وصلت للم الفوس والله محدش قالي
ربنا معاها بجد موقف سخيف جدا ان لهو الواحد علي الفيس بوك يقلب نكد لنشاء جروب=اعتقال 15 يوم
ماساه = غباء بشر
منورة ابي اشكر موروك

Eng.Omar يقول...

انا ليه طلب صغير جدا منك
ياريت تكتبى بعد كده بخط اكبر حبه
وشكرا على المدونه الجميله ديه