الجمعة، أبريل 25، 2008

كسر الاراده والرقبه

الطوفان الاحدث..في اي مكان.. هو شتم اسراء واللي جاب اسراء
واللي عملها بطلة بعد ما طلعت تقول السجن كويس عيشه زي اي عيشه
وكانوا بيعاملوني كويس
اسراء مطلعتش بطله ولا جان دارك زي ما الناس عايزة
اللي لفت نظري في اللي طلعوا باسراء السما وبعدين خسفوا بيها سابع ارض
محدش خد باله من حاجه مهمه في كلامها
محدش لمسني في السجن ..محدش لمس شعرة مني... كفايه ان بنت تطلع من السجن متصانة... الحمد لله
الحمدلله
ام اسراء: الف حمد ليك يا رب..
تقوم ام اسراء بحضن ابنتها بقوة وتغطيه خصلات شعرها الهائش بره حجاب السجن.. الحمد لله بنتها متصانه
الحمد لله.. اسراء تعتقد ان البنت ما ينفعش تطلع من السجن بنت متصانه علي ما يبدو!!
وان محدش يلمس شعره منها!!
...يبدو ان كل ما فكرت فيه اسراء وامها التي ناشدت.. كل الجهات والمسئولين الافراج عن ابنتها_هوشبح الاغتصاب
فاسراء تخيلت نفسها سعاد حسني في الكرنك!!
الذي يبدو انه من الافلام التي تسير في دماء المصريين مجري الدم_ يبدو انها تظن ولها الحق ان فرج ضخم الجثه {في الفيلم } سيفترسها عقابا لها في اي احظه
مسكينه يا اسراء مسكينه امها!!
التعامل مع قضيه الفيس بوكيين علي طريقه اضرب المربوط يخاف السايب يبدو انها ستؤتي ثمارها
اعتقال فتاة ريفيه{بنهاويه} يتيمه.. في السجن والتحفظ عليها رغم قرار النائب العام الافراج عنها
لابد انه يكسر ارادتها ورقبتها كمان زي ما قال المحامي عنها
انتوا بتكسروا اراده شباب مصر!!
الخوف الذي تسلل طبيعيا الي نفسها وتخيل السيناريوهات الاسوأ
والذي لايكون اسوأ منه ان ينتهك جسدها!
..فكرة الشرف الغير متصان في السجن
...لا بد انه قتلها الف مرة وقتل امها
!!لازم تطلع تقول: السجن حلو وعيشه زي اي عيشه!! بس في مكان محدود !!
اسراء تحمد الله ان جسدها متصاان .... لكن اكيدرقبتها اندبحت وروحها كمان !!
يستظرف الاخ الكووول{معتز} حرمتي يا اسراء؟؟
اسراء:اه حرمت !!
!!هي تعلم حتما ان من رماها في السجن رغم القانون يستطيع حتما اعادتها اليه
!!وما تلوموهاش لو عملت جروب جديد تاييد للحكومه وللرئيس
او شالت صورة الرئيس في الفضائيات بعد كده
!!***************************
كلام ذو صله: وسع خيالك......اخر الحارة.... شقير.....بيلا

هناك 33 تعليقًا:

محمود المصرى يقول...

بسم الله الرحمن الرحيم

سئل رسول الله (يا رسول الله ! ما بال المؤمنين يفتنون في قبورهم إلا الشهيد ؟ ! قال : كفى ببارقة السيوف على رأسه فتنة )

فالجهاد ايا كانت وسائله هو فتنة عظيمة ولا يثبت فيها الا اصحاب العقيدة الواضحة والمنهج السليم , واقصد بهذا انه لا يقوم بتحمل مسئولية القيادة الا من لهم رؤية بعيدة ومنهج وعقيدة ثابتة , المشكلة بقى ان الكل اخدتهم الفرحة وعملوا منها بطلة وجان دارك زى ما حضرتك شبهتى من قبل , وللأسف بهذا ظلموا اسراء وظلموا انفسهم , لأنهم حملوها مالا تحتمل وعلقوا آمالهم على من لا تقدر على النهوض بها.
الاسرى فى سجون الاحتلال الاسرائيلى كانوا بيحكوا كثيرا عن اساليب الصهاينة فى الضغط على الاسرى , ومن ضمنها التهديد باغتصاب الزوجات او الاخوات , ودا تهديد خطير وممكن يهز اى واحد ,وناس كتير تنهار امامه , لكن اصحاب العقيدة كانوا يثبتوا امامه , ودا اللى احنا محتاجينه دلوقتى بعيدا عن جان دارك او اسراء عبد الفتاح او جميلة بوحريد .
تحياتى

A.SAMIR يقول...

موقف اسراء وشاتميها بينطبق عليه المثل الشهير
اللي يده في المية مش زي اللي ايده في النار
تحياتي

HafSSa يقول...

يا ريت لو كنتي اخدتي بالك من مغزى كلامي
لاني لا شتمت في اسراء و لا قليت ادبي عليها
لكن كالعادة مبيتخدش من كلامي غير قشوره و كل واحد بيحورها على طريقته

HafSSa يقول...

صحيح انا احب اعرف انتي ايه وجهة نظرك الشخصية في الموضوع لانها مش باينه بوضوح في كلام التدوينة
انتي جايبة كلام اسراء و امها و تفسيرك التخيلي لمعناة الكلام و كلام معتر لكن مش مبينة وجهة نظرك
فيا ريت اعرفها

بنت القمر يقول...

محمود المصري
*************
المشكلة بقى ان الكل اخدتهم الفرحة وعملوا منها بطلة وجان دارك زى ما حضرتك شبهتى من قبل , وللأسف بهذا ظلموا اسراء وظلموا انفسهم , لأنهم حملوها مالا تحتمل وعلقوا آمالهم على من لا تقدر على النهوض بها.
******************
جبت المفيد
اختبار صعب لاي حد وخصوصا زي اسراء
تحياتي

بنت القمر يقول...

سمير
عندك حق

بنت القمر يقول...

حفصه
ولا عبده باشا ولا بيسو شتموها وعموما انا شيلت اللينك
انا كتبت كلام ذوووووووو صللللللله
يعني يخص الموضوع
وعموما رأيي قلته قبل كده
بس انتي اللي مخدتيش بالك يا ست البنات
(((:
ولو تلاحظي رد محمود المصري
*************
المشكلة بقى ان الكل اخدتهم الفرحة وعملوا منها بطلة وجان دارك زى ما حضرتك شبهتى من قبل , وللأسف بهذا ظلموا اسراء وظلموا انفسهم , لأنهم حملوها مالا تحتمل وعلقوا آمالهم على من لا تقدر على النهوض بها.
*****************
هو ده موقفي في الاول
واللي ثبت انه صح
(((:
منورة حفصه

nody_1987 يقول...

هى المهزله الكبرى
انها بتشكر فى السجن لمجرد ان ما فيش حد لمسها
وهو مش سجن ولا اهانه ولا كسر رقبه لاى حد يقول رايه
ولا ذل للبنى ادم الى كرمه
ولا انتهاك للقانون من قبل رجال الشرطه الى معبروش قرار القضاء
هى دى مصر وهما دول المصرين
كلنا اسرء

Nsreen Bsunee يقول...

من حق اى حد انه يسب ويلعن فى اللى عملو اسراء بطله لان ده فعلا شتت التفكير عن معتقلين شباب اهم واحسن من اسراء 100 مره ومواقفهم واضحه وفعلا يستاهلو اننا نعرفهم ونديهم حقهم

لكن انا شخصيا ماعرفش غير اسراء وبعض الاسامى اللى على الطاير كده بس يا ترى مين المعتقلين اللى بجد اللى اتبهدلو بجد اللى روحهم اتدبحت بجد ومحدش سائل فيهم ولا فى اهلهم ولا فى احوالهم

فين الناس ديه من اهتمامنا
مش موجودين ببساطه لان كان فى مصلحه الحكومه ان تسليط الضوء يبقي على اسراء وهى فعلا كانت عند حسن ظن الامن بيها وعملت اللى هما عاوزينه

اسراء روحها مش مدبوحه ولا متبهدله ولا مكسوره اسراء واضح انها مش بتاعه سياسه وواضح انها ملهاش فى اليلله اصلا ومش فاهمه حاجه

لو واحده فعلا فاهمه وواعيه وعندها مبادئ كانت حتطلع تقول كلام موزون ميدينهاش عند الامن وميدينهاش عند الناس وميعارضش مبادئها

صحيح اللى ايده فى الميا مش زى اللى ايده فى النار بس احنا ياما شفنا ناس اتبهدلو فعلا ومغيروش مبادئهم دول بقي اللى يستحقو الاحترام والاهتمام

اسراء بقي تنتهى على كده كفايه عليها اوى اخدت اكتر مما تستحق بكتير
وانا شايفاها طالعه من السجن زى الفل الحمدلله ربنا يهنيها باهلها وخطيبها وتبعد عن السياسه خالص
لاحسن وحياة النبي الغالى لو البت ديه شفتها بتتكلم فى السياسه وشايله صوره مبارك زى ما انت متوقعه يبقي هى اللى جابته لنفسها فعلا وعاوزه تتشتم وتتهاجم

:)

عزيز عيني يقول...

يا جماعة اسراء بنت عادية لا كانت منضاله ولا زعيمة سياسيه العيب مش فيها العيب في اللي عمل منها نجمه وركب عل اكتافها والسجن مش نزهه, وكل واحد فنيا عنده طاقة الاحتمال بس بتختلف من شخص لاخر لو أي حد فينا مكانها كان طلع يقول عاش بتاع الفول
تحياتي

يا مراكبي يقول...

الموضوع ده فيه شقين .. أولهم هو موضوع إنها خرجت متصانة من السجن .. وده أمر يدين النظام أكتر مما يؤيده .. لأنه جه علينا اليوم اللي بقينا بنفرح فيه جدا بتطبيق القانون وعدم الإنتهاك .. بمعنى آخر .. أصبحت الإنتهاكات هي القاعدة وما عدا ذلك هو إستثناء

أما الشق التاني فهو وضع إسراء كبطلة من عدمه .. وده موضوع لازم نكون فيه موضوعيين وعقلانيين .. يعني لا نرفعها لسلبع سما .. ولا نخسف بيها الأرض .. نديها وضعها الطبيعي وحجمها الحقيقي دون زيادة أو نقصان .. ساعتها ما حدش هيتصدم من كلامها لما خرجت من السجن

karakib يقول...

كانوا يبحثون عن قيادة و رمز
زي يوم الاضراب تمام
كل واحد كان بيسأل الباقي
هما عملوا ايه ؟؟ و ما بيسألش نفسه هما مين ؟؟ يقصد بهما المصريين و لا هما مين بالظبط !!! في النهايه اقدر اقول
الافيال تتصارع و العشب يتحطم

Bella يقول...

من ساعة موضوع الاضراب والقبض على اسراء وانا عندي مشاعر كتيرة مختلطة

اندهاش من قدرتنا الغريبة على صنع رموز لنرمي عليها عبء تحريرنا ونكتفي بهذا القدر

كالعادة نحب ان ندخل حروب سهلة ونحن في بيوتنا قعود
لو كل واحد حط نفسه مكانها لايمكن كان ح يتهمها بالعمالة والخيانة

مش هي دي جان دارك المصرية امبارح ؟؟
ومش هي دي جميلة بوحريد من يومين

الغريبة انا نسرف في رمي الالقاب وهذا في حد ذاته مصيبة بكل المعايير حيث اعتبره شخصيا تطرف ومبالغة من جانب من ارتفع بها لعنان السماء

وكل مافعلته انها قامت كغيرها الذين وصلتهم دعوة للاضراب بعمل جروب وكتبت عليه هذا الكلام

يعني البنت لم تدعي انها هي من ستنظم الاضراب

المحزن فعلا من متابعتي لاغلب ماكتب في هذا الموضوع منذ بدايته يعني منذ اعتقالها تخيلات الناس حول السيناريوهات التي يمكن ان تتعرض لها فتاة مثلها رهن الاعتقال حتى اني انزعجت بشدة من كلام المعلقين على احد الاخبار التي تحدثت عن تدهور حالتها الصحية ورفض السماح لمحاميها بمقابلتها على انفراد عندما علق احد القراء وقال انهم اغتصبوها بالسجن

يعني بمنتهي البساطة يمكن ان يصل خيال الناس لاقصى درجة
واعتقد ان هذا قد وصلها ولهذا كانت تكرر انها لم تمس حتى تنفي عن نفسها تهمة التعرض للاغتصاب !!!

الامور كلها مختلطة والكل رد فعله غريب وعنيف حتى في التاييد كان هناك عنف تسبب في اذاها عندما بالغ الناس في رفعها لمكانة لم تحتلها هي اصلا ولم تسع إليها فتسببوا عن غير قصد في استمرار التحفظ عليها كل هذه المدة

ونفس من رفعوها للسماء هم من مزقوها بألسنة حداد

الامر برمته بحاجة لدراسة عميقة ومتانية وبحاجة لاعادة نظر في الكثير من الامور.

كنت اود ان اكتب الكثير عن موضوع الاضراب ولكن خوفا من الاطالة كتبت مااعتقدت انه قد يفي بالغرض ولو اني بحاجة لمناقشة المزيد من النقاط.

تحياتي

monaliza يقول...

تعليقى الوحيد الحمد لله انها خرجت ورجعت لاهلها بالسلامة
==================================

" ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html

الطائر الحزين يقول...

الحكومة مش هابلة ولا النظام بهذه السذاجة حتى يغتصب او يترك اى أثر مادى عليها

اولا لانها لم تفعل شىء

ثانيا لانه لو فعلوا هذا لقلبوا عليهم الناس أكثر وأكثر

ثالثا لكى يعتبر الناس ويقولوا اهى دى اللى معملتش حاجة اتجرجرت فى الاقسام واتحبست فما بالكم لو حد عمل حاجة بقى



يا اخوانا الموضوع مش فتحة صدر الموضوع
وليست العبرة ولا الهدف هو التصادم مع النظام والسلام

تحياتى

mohand يقول...

السلام عليكم

انا متعاطف معاها قوي

وانا بكلم الناس قولتلهم يا جماعه دي بنت

مهما كان بنت

ثقافتها ثقافة شرقية

وريفية زي ما قولتي كده

البنت طالعه من جوه بتحمد ربنا انها خرجت

حياتها كانت منهاره قدامها

حرام نزود عليها ونقول كان مفروض تثبت علي موقفها ونطلب منها دور البطولة واحنا مش متخليين خلفيتها وحياتها قبل السجن وما يترتب عليه من تغيير بعد السجن وتخيلها ان حياتها كلها باظت خلاص


خارج الموضوع :- كده برضه تضحكي عليا وتقوليلي مخطوبة البنت طلعت لسه مظبطتش دبلة

زعلت منك قوي لما عرفت

هههههههههههههههههههه

أحمد كمال يقول...

الحقيقة الموقف كله محزن و مخزي ..

موقف الناس اللي ما صدقت دورت على بطلة مالهاش في حاجة خالص

موقف الشباب اللذيذ اللي بيطالب بتغيير كل شئ من وراء بروكسي الفيس بوك ، و نازل شتيمة حتى في الناس اللي بيناضلوا من سنين

موقف الدولة اللي بتفرد عضلاتها على بنت بكل الصفات اللي اتقالت هنا ، علشان تبقى عبرة و تطلع تقول حقي برقبتي

و في الآخر الناس المحبطة طالعين يشتموا في نفس الضحية المذعورة

في رأيي مافيش أي أبطال في الموضوع كله

خمسة فضفضة يقول...

السلام عليكم ورحمة الله وبركاته

نفس الاحساس اللي جالي وانا باتفرج علي التقرير بتاع اسراء حسيت انهم متاثرين جدا بفيلم الكرنك
وكل اللي هاممها انها خرجت متصانه طيب فين الكرامه اللي راحت فين الذل اللي شافته وكفاية اوي اها مسجونه وسط عنبر الجنائيين


مشكلة الناس في مصر ان نفسها في زعيم ، فحد رمز يمشوا وراه، فابيدوروا علي الحد ده في شخص اي واحد تسوقه مقاديره ولو بالغلط عشان يحمل لواء الزعامه دي
وللاسف المره دي اختارو الزعيم الغلط زعيم من حروف الكترونيه فضلوا يضخموا فيه ويوصفوه باوصاف مش موجوده اصلا ويتخيلوه المنقذ اللي علي ايده هايبقي الخلاص من كل الآلام
بس للاسف لما صحيو علي ان كل ده مجرد كذبه ووهم مابقوش عاوزين يصدقوا وحسو انها اتخلت عنهم زي القبطان ما بيتخلي عن السفينه و يسبها تغرق في وسط البحر

وبالتالي كانت كل الثوره والغضب اللي حصل


سلام

عاليا حليم يقول...

أيوة انا بقول معاها برده الحمد لله انها خرجت متصانة الجسد ، ده مش فيلم الكرنك لوحده انا شفت برنامج حوارى قبل كده فيه صحفية من حركة كفاية بتحكى ان الظابط و المخبرين قطعولها هدومها جوه القسم و خرجت منه كده فى الشارع و شفت صور بنت برده هدومها متقطعة وسط مظاهرة

الناس الى بتزعق و تهلل على الفاضى دى تاكدى انهم اجبن خلق الله و و ما عندهومش حاجة غير الكلام و النقد عن جهل و انهم لو اتعرضوا للى أترضتله أسراء حيخرجوا من السجن يبوسوا رجل المخبرين ،كفاية قفا واحد ياخدوه حتلاقى كلام كلم من عينة ( معلش يا باشا - اخر مرة يا باش )

لا طبعا مش حلومها لما تعمل جروب تناصر فيه الحكومة انا لو مكانها حعمل حفلة و اجيب عب دالحليك من تربته يغنى

بنت القمر يقول...

نودي 1987
الخوف اكبر ذل وكسر رقبه
منورة
.
.
.
نسرين بسيوني
*********
واحده فعلا فاهمه وواعيه وعندها مبادئ كانت حتطلع تقول كلام موزون ميدينهاش عند الامن وميدينهاش عند الناس وميعارضش مبادئها
وهي مش كده هي بنت بسيطه الناس عملتها بطله بالعافيه
جان دارك غصب وحملتها فوق طاقتها
السجن مش حيطان
والخوف اكبر ذل وكسر رقبه
.
منوره

بنت القمر يقول...

عزيز عيني
عندي تدوينه يا ريت تشوفها اسمها البحث عن جان دارك
يا ريت تشوفها
واتفق معاك كليا
تحياتي

أنونيمس يقول...

من كان منا بلا خخطيئة .. فاليقذفها بحجر

بنت القمر يقول...

يامراكبي
تحليلك قيم وقوي
فعلا مؤسف ان تكون صورةاي بنت طالعه من السجن انها اتمرمطتت جوة
ويصبح الحل هو قمع اي عمل شعبي ضد الحكومه من راجل قبل ما يكون من امرأه
تانيا كونها ليست بطله هو ماذكرته اولا وباكرا
البحث عن جان دارك يمكنك قراءه ذلك البوست
تحياتي

بنت القمر يقول...

كراكيب
في النهايه اقدر اقول
الافيال تتصارع و العشب يتحطم

تقطر منك الحكمه والبلاغه هذه الايام تحياتي

بنت القمر يقول...

بيلا
الخوف اكبر ذل يا عزيزتي الخوف هو الموت كل لحظه
حتي من تلفيق اشاعات عن اضرابها عن الطعام او اغتصابها او غيره
الخوف علي السمعه والشرف لفتاه ريفيه هو الموت نفسه
تحياتي

بنت القمر يقول...

مونا ليزا
اهلا بيكي الحمد لله دائما الحمد لله الذي لايحمد علي مكروه سواه
=====================
الطائر الحزين
استأذنك في قراءه تعليق المراكبي هو تحديدا ما ارغب في قوله لك
تحياتي




=======================
مهند
وانا كمان متعاطفه معاها وصعبانه عليا
وكونها غير مخطوبه
ماشي يا عم العريس ورينا الجدعنه اديها بقت اشهر من نار علي علم
وبنها صغيرة
(((((((:
ورينا الجدعنه
بس سؤال بجد لو خطبتها ووافقت عليك ها تمنعها عن الفيس بوك
والتدوين مثلا؟؟ هي او اي عروسه تانيه
احتفظ بالاجابه وماتقولش اجابه متسرعه
منور

بنت القمر يقول...

احمد كمال
كونها ليست بطله هو عين ما قلته باكرا في عز التمجيد في البنت في تدوينه سابقه هي الابحث عن جان دارك وتفضل بقرائتها لو تكرمت
اما نضال الانترنت
ففيه قول عجبني جدااااا
هو ما قاله محامي اسراء ان عمال المحله معندهمش اكاونتات علي الفيس بوك تحديا وربما لايملكون ايميلات اصلا
عبث
وكسر رقبه واراده
تحياتي

بنت القمر يقول...

د/ فضفضه
==========
نفس الاحساس اللي جالي وانا باتفرج علي التقرير بتاع اسراء حسيت انهم متاثرين جدا بفيلم الكرنك
وكل اللي هاممها انها خرجت متصانه طيب فين الكرامه اللي راحت فين الذل اللي شافته وكفاية اوي اها مسجونه وسط عنبر الجنائيين
=============
يا فضفضه
هو توارد افكار وافلام يقي
الحمد لله علي سلامتها
الحمد لله الي لا يحمد علي مكروه سواه
بصي علي تعليق المراكبي
تحياتي يا دكتورة

بنت القمر يقول...

عاليا حليم
ضحكتيني حين لايصح الضحك
الذل يا عاليا ليس فقط هوالانتهاك ولكن ايضا الخوف
منورة زيارتك

بنت القمر يقول...

انونيموس
تقريبا محدش عنده خطيئه خالص
هو شعب من الاطهار
((((:
تحياتي

m5m يقول...

بالرغم من أى خلاف سابق..أحب أحييكى بجد عالبوست ده..وأنا قلت تقريبا نفس رأيك فى ردى على نسرين فى مدونة رامز بس كنت لسه ماقريتش البوست بتاعك
كل سنة وانتى طيبة

nonoymm يقول...

الف حمد الله على سلامتها الاهم
وفعلا حملوا حتة البنوتة الصغنتوتة فوق طاقتها ربنا يعينها وتقدر الايام تنسيها
تحياتي

زمان الوصل يقول...

إذا كنّا من البدايه نقول أن "إسراء" ليست بطله و أن البطوله ألقيت على كاهلها عنوة و اقتدارا يبقى موقف إيه اللىّ احنا عاوزينها تثبت عليه !!

أظن أن موقف "إسراء" وما قالته بعد الإفراج عنها يتّسق تماما مع فكرة إنّها لا بطله ولا زعيمه ولا كانت تطمح لهذا الدور اللىّ لبسته رغما عنها ومن ثمّ مش مفترض خالص نطالبها بالتمسّك بموقف ربّما لم يكن لها من البدايه !!

أمّا عن حديثها عن خروجها متصانه فهو منطقى جدّا .. إذ أى شئ يكسر روح ورقبة و نفس المرأه فى مجتمعنا أكثر من الاغتصاب أو هتك العرض !! أى شئ آخر من حبس أو سجن أو تواجد فى عنبر مع مجرمين لن يكون له أثر مماثل لأثر الاغتصاب الذى ستظل تحمل آثاره النفسيه و الجسديه مدى الحياه ناهيكى عن نظرة الناس لها و نسيانهم كل شئ فيما عدا أنّها فتاه مغتصبه