الأحد، سبتمبر 07، 2008

عن مسجد النساء احدثكم_ ثورة التصحيح

في شقة متوسطه داخل برج سكني عباره عن صالتان متداخلتان اذهب احيانا لصلاه التراويح الجميع مهندمات روائحهن نظيفه يرتدين تشكيله ما بين الملابس الكاجوال والاسبور والعبائات السوداء وكرنفال من الاسدالات{لباس للصلاه مستحدث}
في الصاله {المسجد }مروحه واحده احتكرت الامهات الكبيرات{سنا} الصلاه تحتها علي كراسي بلاستيكيه متلاحمه تعوق الجيل الاصغر مثلي تلاتينيات او عشرينيات من المرور لاكمال الصفوف الخلفيه كان الامر كهنوتيا لا نقاش فيه.. ومين يقدر علي الاعتراض علي قسوة المرض او تقدم السن! هكذا كان في العام الماضي
كما كانت الجدران الرخاميه مملوئه بلوحات كرتونيه عباره عن عرائض شكوي ودعاء الي الله تبدأ باستحلفك يا اختي ان تدعي لفلانه بنت فلانه بالشفاء العاجل او تدعي لقضاء ما في نفسها في, العام الماضي علقت احداهن عريضه تستحلف الاخريات بالدعاء لسميرة بنت زينب ان يرزقها بالزوج الصالح:)
لم اتخيل ان تستجدي احداهن بالاخريات الدعاء لها للحصول علي زوج فتكتب دعوة اشبه بشكاوي الفلاح الفصيح ولكنها الي الله وليس الي مدير
البيت العظيم لا اعرف لماذا تستحلف الواحده الاخريات باسم امها وليس اسم ابيها... وخصوصا ان كانت لا تجهل ابيها! ام هي نزعه ثوريه حداثيه؟؟
في هذا العام زيارتي الاولي للمسجد دخلت متأخره علي غرفه صغيره مجاورة سيده من الكبيرات ذات النزعة(المتمريسه) صاحت قائله: عندك اسدال اهه كده ما ينفعش! لم اعرف ما هو الماينفعش كنت ارتدي جيب طويل واسع وبادي غير لصيق طويل الاكمام لكنه موشي برسومات الجليتر يبدو انه لم يرقها وايشارب لم يرقها ربطته ايضا او ربما انا شخصيا لم ارقها:( في الفاصل بين الركعات الاربع الاولي قال الامام خطبه صغيره عن احكام الطهارة في الصيام باراه فيها الحضور في الافتاء وتقديم الاسئله كان المدهش ان معظم الاحكام خاص بالنساء ومعظم الحديث كان للرجال ركعتين تلو ركعتين امام هذا العام ذو صوت ساحر محبب للنفس من هؤلاء الذين يصعب علي المصلي ان يشرد بفكره بعيدا عن التلاوة وهو يصلي خلفه لكن المتمريسه فضلت ان تناديني للمرة الثانيه مصممه ان تخرجني من مود السلطنه بسماع التلاوة والتدبر في_ ما الدنيا الا لعب ولهو_ قائله: في هنا اسدالات نضيفه!
فضلت ان امنحها نظرة باهته لا تعني شيئا فلا رفث ولا فسوق ولا جدال في المسجد!! بعض الكبيرات ايضا يرمقن الصغيرات في بحث دؤوب عن عروسه طيوبه وبتعرف ربنا من مرتادات المسجد{بدلا من جلبها من النادي مثلا}
تلمح تلك النظرة المتفرسه في العيون يليها بعض الهمس والوشوشه بين بعض الكبيرات
.الكبيرات تراجعن هذا العام بكراسيهن البلاستيكه للخلف وتقدمت الشابات الصفوف الاماميه اختفت صاحبات الاطفال والرضع وبقيت من لا تزعج الاخرين نزعت عرائض الشكوي من علي الجدران وبقيت الجدران رخاميه نظيفه ومغسوله لا اعرف هل تزوجت صاحبه العريضه ام ان الوقت ما زال باكرا لتظهر اخريات من طالبات الزواج!!

هناك 43 تعليقًا:

اسكندراني اوي يقول...

حدثي ولا حرج
تقبل الله منا ومنكم صالح الاعمال
فكرتيني مره كنت رايح اصلي الجمعه في اسكندريه بتي شرت احمر على بنطلون جينز عادي يعني
وعاديكي لقيت واحد من اخونا مسكني بعد الصلاه وهات يا .....نصايح

سالته سؤال الجمه
يا سيدي يعني تفتكر ان الجمعه دي ما اتقبلتش

سابني ومشي
ومن يومها بطلت اروح الجامع بتي شيرت احمر

تحياتي

اسكندراني اوي يقول...

ايه ده اول تعليق
مش معقول
الربع جنيه لو سمحتي
هههههههههههههههههههه

زمان الوصل يقول...

:)
سبحان الله .. كنت بافكّر أكتب بوست بس عن صلاة التهجّد و مش عارفه أبدأ منين و موضوع الزواج و الباحثات عن عروس لأبنائهن و الباحثات عن عريس لبناتهن جه ع الوجيعه :) طيب أحضّر السحور و أرجع إن شاء الله :)

someone in life يقول...

بنت القمر

تقبل الله منك .. ارجوا ان يكز هذا سبب اختفائك المفاجئ .. حلوة فكرة الواحدة تروح الجامع تدور علي عروسه لابنها ... طيب ممكن أدور علي عريس و احط اسمي علي الحيطة
كان زمان الجامع للتعبد الان اصبح لاشياء اخري و لفرض سيطرة تافهة .. وحشتيني
تحياتي

... يقول...

ربنا يتقبل منك .. مجتمع النساء في المساجد طالما كان يجبرني علي الصلاة في البيت
في بلدنا .. وقبل مجيئي لبلد الألف مئذنة .. كنت أصلي الجمعة مع زوجي وأولادي في مسجد رائع علي البحر .. كان كل ما في الأمر جميلا فقط لو يختفين جميعا .. فهن كما وصفتيهن .. في كل الأماكن
أجمل المرات التي استمتعت فيها بالصلاة كانت في المدينة الجامعية .. رمضان هناك كان مختلف ا.. مئات من البنات فيما يشبه الشارع الذي تحيطه الأشجار .. وتأمنا فتاة ذات صوت ملائكي
كانت حالة

Lasto-adri *Blue* يقول...

بالظبط زى اللى بتلبسنى شئ عجيب الشأن عشان لابسة بنطالون! خصوصا وإنى من الجاهلين اللى مش فاهمة إن البنطالون بدعة أوروبية، لإقاع المسلمات فى مستنقع الشبهات والتشبه بالرجال!

مادام إنتى لابسة شئ لا يصف ولا يشف ولا يكشف عورة، فمالكيش دعوة باللى بيتكلموا...
بجد بستحى ألبس وأنا بصلى قدام ربنا شئ مستحيل ألبسه وأنا ماشية فى الشارع قدام الناس!


وأعتقد بيكون إدراج إسم الأم فى الدعاء، تيمننا بحال العباد يوم القيامة.. لإن الناس ح يتنادى عليها بإسم أمهم مش أبوهم
:)

بس جامدة بحد فكرة الجواز من المساجد!
فى البلاد الأوربية بيكون فى مجتمعات عشان يتقابل الشباب والشابات المسلمين والمسلمات للتعارف.. وبصراحة مش شايفة فى دا عيب.. بالعكس.. ليه مايكنش فيه تجمعات للشباب فى إطار دينى، وأمام مرئى ومسمع المجتمع للقضاء على العنوسة
وحتى يكون فى صناديق للتبرع للشباب اللى مش عارف يكون نفسه!
ودروس الدين تكون عن وجوب تغيير مفاهيم المجتمع والقضاء على الشبكة والمهر.. الخ الخ
بجد، بتمنى يكون المسجد فى يوم من الايام مكان إجتماعى دينى.. يحببوا الناس فيه.. بدل ما الشباب متلطع فى الشوارع أو صايع فى النوادى... لا شغلة ولا مشغلة
:)

abderrahman يقول...

دايما فيه ضيوف ثقلاء على بيوت الله، مع الوقت بيتعاملوا مع الجامع على انه بيتهم وان الزائر ضيف عليهم مش زائر لبيت الله
هو الموضوع ده ممكن يحصل في أي مكان، في شغل، في نشاط عام، في عيلة، في أي مكان، إنما بيبقى موحش جدا لما يحصل في جامع
ان الواحد يحس بالغربة في المسجد ده احساس صعب
المهم.. مبروك الثورة واتمنى تستمر ومتجيش قيادة جديدة ترسي قواعد جديدة

Alkomi يقول...

شوفي

كل دي حوارات فطشة

الاخت رايحة تصلي

الاخت جاية من الصلاة

و مع الاعتياد يصبح الجديد غير سديد

يعني المصلي بحسب رواية امي و اختي بيتحوةل لقعدة حريم عادية جدا فيها نم و رغي و كل حاجة بس بيبقى الجو روحاني شويتين

عدى النهار يقول...

بغض النظر عن صحة أو خطأ تصرف معين.. الذوق أصبح مفتقد بشدة فى تصرفات كثيرة جداً ومن أشخاص وفى أماكن لا يصح أبداً أن تفتقده

محمود المصرى يقول...

بسم الله الرحمن الرحيم

هو جلباب المرأة المسلمة له مواصفات شرعية ودى مش من عنديات العلماء لكن مستمد من كتاب الله وسنة الرسول , ولازم الالتزام بهذه المواصفات لو خلصت النوايا , انا بس مستغرب من الصورة اللى فيها واحدة سافرة فى الصف الاول الصورة دى حقيقية ؟ يعنى لو الاخت دى لا تعرف انه لا يجوز كشف العورة فى الصلاة وان كشف العورة يفسد الصلاة ياريت حد يقولها , لأن دى مما يذهب بمسمى الصلاة يا جماعة .
بالنسبة لموضوع البنطلون مش عارف ليه البنات بيحبوا يلبسوه ماله الجلباب او الاسدال وحش؟ طبعا هاتقولوا البنطلون واسع وياخد واحدة تانية وتالتة ورابعة ماختلفناش بس برضه ايه لازمته؟ بصراحة مابيركبش فى ذهنى على النساء ولا اعرف حكمه الشرعى علشان ماحدش يقول انت بتفتى انا بس بعرض انطباع على حاجة بشوفها .
وفى النهاية كل عام وانتم جميعا بخير وصحة وسعادة تقبل الله طاعاتنا وطاعاتكم .

blackcairorose يقول...

اكتر حاجة لفتت انتباهى فى البوست ده يا بنت القمر الشخصية اللى وصفتيها بانها متمريسة، لانها بتفكرنى بنوعية أعرفها جيدا، وهى برضه نوعية الشخصيات التى لا احبها ومن الصعب أن تتأقلم شخصيتى معاها


انا كنت مرة حابة اكتب عن صفاتنا كمصريين وعايزة اذكر مثال ان اخويا فى الحج مرتين حد يكلمه من غير معرفة ويقول له انه حرام يلبس الدبلة الدهب، واكيد فى رأيى انه مش صدفة ان المرتين دول يكون واحد مصرى هو اللى بينصح، رغم ان اخويا شكله يدى هندى يعنى مش مسالة انه شكله مصرى عشان كده حجاج مصريين تطوعوا وابتدوا ينصحوا ويوعظوا ولكن فى رأيى هى ليها دعوة اكتر بصفاتنا كمصريين وتدخلنا اللى لينا فيه واللى مالناش

حاجة كده قريبة من الاخت المتمريسة اياها

كل رمضان وانتى بخير

بنت القمر يقول...

اسكندراني اوي
===============
احمر!! تيشرت احمر!! يا للهول!!
نورت

بنت القمر يقول...

زمان الوصل
===============
جالك عريس من الجامع ولا ايه؟:))
وبعدين بقالك يومين بتحضري السحور؟
ممكن تكتبي برضه تجربتك في المسجدبرضه اكيد ها تكون مختلفه... ها انتظرها

بنت القمر يقول...

سام ون ان لايف
==================
الجامع بقا لاغراض كتيييير اوي بسبب قله العلاقات الاجتماعيه والاسريه
البعض ابتكر الطريقه دي
رغم اني اعرف بنات ملهاش اي علاقه بأي حاجه وبتتحجب وتروح تصلي في رمضنان كأنه نادي اجتماعي
ربنا يرزقك اللي يستاهلك يا رب
وانتي كمان وحشتيني

بنت القمر يقول...

بثينه
=============
مش عارفه فعلا مجتمع نساء المسجد بقا زي النادي تعارف وفشخرة بالعبايات والموبايلات
وكل واحده عاوزة تعمل استاذه علي الباقيين
نورتي

بنت القمر يقول...

لست ادري
===============
بالضبط اللي لابسه بنطلون واسع او جيب طويل او فستان مش لازم الاسدال المجرجر ده والاصرار عليه
انا مثلا مستحيل البس هدوم مكان حد تاني وكل واحد لابس حاجه مقتنع بيها وشايف انه لا غبار عليها شرعيا يبقا مش طالبه استذه من الاخرين
حكايه بقا اسم الام الحقيقه بايخه وبعدين مالنا بيوم القيامه يعني حاسه انها كده متقاله لسبب غامض مش فاهماه؟؟
موضوع الزواج
طبعا ممكن تكون فككرة كويسه
وممكن تبقا برضه مقلب لانن في بنات بتتحجب بس في رمضان ومش كل المحجبات كويسين مش مشكله لو بدور لاخويا علي عروسه شفتها فين المشكله اني اعرفها شخصيا واخلاقيا وخصوصا ان الحوار ما بقاش خافي علي البنات وبقوا بيروحوا للجامع علي سنجه 5 الالاف احيانا وعارفين انهم ها يتشافوا وممكن برضه يتخطبوا يعني الملعوب بقا مكشوف
فرق ايه بقا عن النادي؟؟!! بس هي الناس بتحب تشتغل بعض!!
نورتي

بنت القمر يقول...

عبدو باشا
===============
الضيوف الثقلاء في مسجد النساء بيستمدوا سطوتهم من كبر السن واحيانا من لاشي
وتفضل تنصح الاخت فلانه ان البنطلون حرام وان الحواجب حرام وان البارفان ما ينفعش ورغم ان كل واحده عندها يقين ايه هو الحرام والحلال
يعني لو البادي الجليتر حرام مثلا او الايشارب الاسبانش
حاجه من اتين يا اما انا مش مقتنعه انه حرام او عارفه ووبرضه بصلي بيه وفي الحالتين الالحاح علي النصح بيخنق
وبيكون في نتيجه من اتنين يا ارد وويبقا لغط في بيت الله وجدال يا اكظم الغيظ واسكت
يا مروحش خالص وكل الحلول سيئه وخصوصا لو يعني مش بصلي بشوت مثلا او شيئ لا جدال في حرمانيته يبقا المفروض كل واحد يركز احسن في العباده.. البوست ده علي فكرة ردا علي كرادله المساجد:)) بس من الجهة الاخري
نورت

بنت القمر يقول...

محمد الكومي
=================
رغم اني عارفه انه كلام مامتك صحيح احيانا لكن تبقا النوايا محلها القلب والحكم عليها لله
نورتني

بنت القمر يقول...

عدي النهار
=============
مش عاوزة احكيليك علي قله الزوق
وبقيه احداث اليوم ده.. ناس تخلي الواحد يزهق في عيشته ويصلي وهو مشتت خالص
اخبار المساجد عنكم ايه صحيح؟؟
ممكن تحكيلنا؟؟
نورت

بنت القمر يقول...

محمود المصري
==============
الصورة مش حقيقه الصورة من علي الجوجل سيرش... وطبعا دي لو بتصلي في الجامع بتاعي كانوا علقوها علي المدنه:))
بالنسبه للبس الشرعي
اعتقد ان كل واحد عنده تصور عن اللبس الشرعي.. انت ممكن تشوفه الاسدال ولست ادري تشوفه بنطلون واسع لا يشف ولا يصف
وانا ممكن اشوفه حاجه تالته ممكن يكون البادي الجليتر في رأيي لا غبار عليه
مش دي القضيه.. شفت اول تعليق والتيشرت الاحمر
المشكله ان البعض يسدي النصح ويصر عليه بشده!! وبطريقه ممكن تجيب نتيجه عكسيه انظر ردي علي عبدو باشا
وفي زمن الفضائيات وسيل الفتاوي احنا مش في بلد ناميه في افريقيا والناس مش عارفه الاسلام بالعكس كل واحد دلوقت بقا شيخ ومفتي لوحده!! يبق الاولي بدل ما اقعد انصح الاخت اللي عاملا حواجبها والي حاطه مونيكير واللي لابسه جليتير من غير اسدال اركز في صلاتي واسيب الاخرين والاخريات برضه يركزوا في صلاتهم والاعمال في الاخر في رب بيقبلها
مش انسان بيحاسب غيره عليها.. وبرضه كل سنه وانت بألف خير وصحه وسعاده وربنا يتقبل منك صالح الاعمال
تحياتي

بنت القمر يقول...

blackcairorose
=====================
اسمحي لي يا عزيزتي اقتبس لك من ردي السابق
المشكله ان البعض يسدي النصح ويصر عليه بشده!! وبطريقه ممكن تجيب نتيجه عكسيه انظر ردي علي عبدو باشا
وفي زمن الفضائيات وسيل الفتاوي احنا مش في بلد ناميه في افريقيا والناس مش عارفه الاسلام بالعكس كل واحد دلوقت بقا شيخ ومفتي لوحده!! يبق الاولي بدل ما اقعد انصح الاخت اللي عاملا حواجبها والي حاطه مونيكير واللي لابسه جليتير من غير اسدال اركز في صلاتي واسيب الاخرين والاخريات برضه يركزوا في صلاتهم والاعمال في الاخر في رب بيقبلها
مش انسان بيحاسب غيره عليها
تحياتي وكل سنه وانتي بألف خير وصحه وسعاده

زمان الوصل يقول...

بصّى تقدرى تقولى حاجه زى كده :) تقوليها على أى فقره فى التعليق بقى سأتركها لذكاء المشاهد ..

الحقيقه أنا متردّده فى كتابة البوست عن يوميات التهجّد أحسن أسيئ للبعض من زميلات المسجد بدون قصد .. أينعم فيه مواقف كده بتبقى غريبه و مزعجه بس محتمله و يمكن تجربة الحج جعلتنى أكثر توقّعا لهذه الأمور و تقبّلا لها خصوصا موضوع سطوة كبر السن ده .. و إن شاء الله لو كتبت البوست سأحاول جعله بوست تأمّلى من غير تريقه عشان أنا ما باصدّق أى مجال للتهريج :))

غير معرف يقول...

مع كل قدسية المكان وروحانيته ننسى احيانا اننا بشر ..
ولو فتحتى قلب كل واحد حتى اثناء تعبده تجديه يشطح بخواطره كثيرا فى همومه .. لأنه تشده غصبا عنه

لابأس من ذلك مع محاولتنا الدائمة فى التركيز .. يقول المولى سحانه وتعالى
فاتقوا الله ما استطعتم

فى النهاية ربك رب قلوب ومن من البشر يستطيع ان يقيّم كل قلب؟ لا أحد مهما أوتى من علم .. واتعجب كثيرا ممن ولوا انفسهم اوصياءا

وميض ابتسامة يقول...

قد لانعرف الكثير من امور ديننا ..
بل ونحكم النية والضمير فيما نفعل
ولكن حين نعرف ومن مصادر موثوقة
اكيد سوف نلتزم فنحن نسعى الى ثواب الدنيا والآخرة

بوست رائع

... amr يقول...

على كة ممكن الواح يلاقي عروسة من المسجد ..... اسمة اية المسجد دة :))

كل سنة و انتي طيبة
و ربنا يهينا جميعا انشاء الله

NODY يقول...

فعلا عندك حق كل دا بيحصل واكتر
انا بحييكى على اسلوبك الرائع فى الكتابه

ذو النون المصري يقول...

كل عام انتم بخير
تقبل الله منا و منكم طيب القول و صالح العمل

مهندس مصري بيحب مصر يقول...

كل سنة و انتي طيبة
و لو انها متأخرة
أول مرة آجيي هنا بس مش حتبقى آخر مرة
:)
بالنسبة لصلاة النساء في المسجد
أرشح لك البوست ده
http://lamadaa.blogspot.com/2008/09/2.html
أنا أخدت لفة في المدونة بس مش كتيرة بس ان شاء الله حأكمل قرايه لها لأنها شدتني

Hypatia يقول...

مووون يا حبيبتشي
هنا فى الكويت المسجد اللى انا باصلي فيه تقريبا فاضي يادوب كام ست كبيره فى السن محنيه صوابع ايديها على الطريقه الخليجي وكام واحده مصريه مكشره وفى حالها والستات الكوايته العواجيز معاهم خدماتهم وبس والمسجد واااااسع ومهوي وحشني اوى زحمه المسجد فى مصر والخطبه اللى بتبقي بعد الاربع ركعات الاولانيين
والصلاه بجزء كامل كل يوم والشوارع المنوره هنا الشوارع ساكته كأننا فى منتصف ليله من ليالي امشير ولا كأننا فى رمضان ولا اى حاجه ولا فوانيس فى الشوارع ولا بياعين عصير ولا حلويات وكنافه ولا اى حاجه
:(
الجو الحميمي اللى فى مصر حلو جدا باستثناء التطفل اللى حكيتي عليه وده موجود فى كل حته لو مش بالكلام بالنظرات اللى بتدخل المسجد مش لابسه عبايه ولا اسدال الكل بيبصلها نظرات شك وريبه

كـــيــــــــارا يقول...

والله صح وكلامك واسلوبك رائع بس برده الستات الكبار مش بيقدرو يقفوا كتير عشان كدا بياخدو كرسي

كل سنه وانتي طيبيه:)

Alkomi يقول...

يااااااااااااااااه اتفاجئتي اني اسكندراني

عموما تحيتك وصلت يا بنت الجيهة

ربنا يسهل يمكن قريب يكون في تجمع مدونين اليكس

لازم تشاركينا رفيه بقى

بنت القمر يقول...

زمان الوصل
==================
انتظر كتابتك

بنت القمر يقول...

شريف
=========
اهلا بيك الوصايه ملمح اساسي في مسجد النساء للاسف
اتقي الله... حسب الاستطاعه ... بحاول
نورتني

بنت القمر يقول...

وميض ابتسامه
================
المشكله انه كل واحد معاه كتالوج فتوي ماشي بيه ومش عاوز يقتنع انه برضه الاخرين عندهم عقولهم الخاصه.. تحياتي

بنت القمر يقول...

عمر
========
يا سيدي البنات زي الهم علي القلب في الجامع وبره الجامع.... تقل جيبك انت بس.... نورتني

بنت القمر يقول...

نودي
=========
اشكرك
:
:
:
ذو النون المصري
==============
وانت بالصحه والسلامه

بنت القمر يقول...

مهندس مصري
=============
اهلا بيك
ان شاء الله تجد مايسرك.. ها اشوف البوست برضه

بنت القمر يقول...

نسرين بسيوني
============
انا عارفه كويس رمضان في الخليج:((
ملوش معني و طعم
لما تيجي شهر اتناشر نروح نصلي التراويح في الجامع سوا:)))))
نورتي

بنت القمر يقول...

كيارا
=========
انا معنديش اعتراض علي صلاتهم علي الكرسي
لكن يكون الكرسي في الصف الاخير عشان حريه الحركه بس
تحياتي

بنت القمر يقول...

محمد الكومي
=========
ان شاء الله يامحمد
اتشرف بمعرفتك
ونورت الريدر الخاص بي
تحياتي

كـــيــــــــارا يقول...

لكن يكون الكرسي في الصف الاخير عشان حريه الحركه بس

-----

ايوه الجامع اللي جنبنا بيقفوا في اخر صف لكن هما بيقفوا في النص ولا ايه لالالالالالا ده كدا مش هيبقي صلاه

لاحول ولا قوه الا بالله

mido g يقول...

المتمريسه فضلت ان تناديني للمرة الثانيه مصممه ان تخرجني من مود السلطنه بسماع التلاوة والتدبر في_ ما الدنيا الا لعب ولهو_ قائله: في هنا اسدالات نضيفه!

ههههههههههه
دى مصممة, هى فاتحة محل و لا ايه؟

على فكرة انا كمان من اسكندرية

غير معرف يقول...

Thanks for the marvelous posting! I definitely enjoyed reading it, you're a great author.I will be sure to bookmark your blog and may come back at some point. I want to encourage yourself to continue your great writing, have a nice afternoon!