الأربعاء، نوفمبر 12، 2008

ضرب الازواج.... وكله بالشرع!!

افتي الشيخ العبيكان المفتي السعودي للزوجه ان تضرب زوجها للدفاع عن نفسها بعد حادثتين ماتت فيهم شابتين سعوديتين نتيجه للضرب المبرح من ازواجهن
ومن المعروف ان الراجل السعودي زي العربي عموما راجل زوق زوق ..لكن الامر لا يخلو من انه يقل عقله ويتهف ويضرب مراته تحت ضغط النرفزة او الاستهبال
الضرب المتبادل معروف في الاوساط الاجتماعيه السفلي
يعني الراجل ومراته يضربوا بعض ويكسروا البيت علي بعض ويناموا في حضن بعض اخر الليل عادي
المفتي السعودي حشد الايات الداله علي وجوب حفظ النفس والدفاع عن الحياة
وبعدهاسجلت مدينة جدة شمال المملكة أول حالة ضرب من قبل سيدة ضد زوجها ردا على اعتدائه عليها.
وقالت الزوجة إنها تعرضت لعنف من زوجها ما دعاها للرد عليه دفاعا عن نفسها كما يجيز لها الشرع ذلك. بحسب جريدة "شمس اليوم" .وبدأت القصة بمناقشة حادة بين الزوجين في منزلهما، فقام الرجل بضرب زوجته بشكل عنيف بيده، إلا أنها ردت عليه بالعصى بضربه في رأسه وظهره عدة ضربات أدت إلى سقوطه على الأرض
. وعقب ذلك ، أوقفت الزوجة سيارة أجرة ونقلت زوجها إلى المستشفى، حيث تبين أنه يحتاج إلى راحة علاجية 3 أسابيع بسبب وجود كسر في اليد اليمني وكسر متوسط وجروح في الرأس إضافة إلى جروح في الظهر. وحضرت الشرطة التي حققت مع الزوجة ، فقالت إنها تعرضت لعنف من زوجها ما دعاها للرد عليه دفاعا عن نفسها كما يجيز لها الشرع ذلك. وتم الإفراج عن السيدة بكفالة حضورية إلى حين خروج الزوج من المستشفى ويحدد ما إذا كان سيوجه إليها تهمة الاعتداء عليه أو يتنازل عن القضية.
وعلي سيره الحياه استضافت المذيعه دعاء علي قناه الحياة شيخ ازهري للتعليق علي الفتوي التي اثارت استهجان ونقد الشيخ الازهري
الذي لا يبدو انه يحمل نفس العقليه الصادمه بل فضل ان يكون اكثر محافظه من السعودي!!
الشيخ الازهري قرر ان الضرب حرام اصلا لكلا الزوجين وان الاسلام اباح للزوج ان يضرب زوجته في حاله النشوز فقط وفسر النشوز بالامتناع عن العلاقه الحميميه!!
لان الزواج هدفه الاعفاف واذا امتنعت الزوجه عن زوجها فلا معني للزواج
وذلك بعد استنفاذ النصح والهجر في الفراش وان يكون الضرب بمقدار ان يرميها بنواة التمر فقط( يعني ما يقومش يسفخ لها)
الحقيقه طول عمري بسمع اية النشوز وعمري ما فكرت ان الناشز هي الممتنعه عن العلاقه الحميميه !!
وبعدين لما هي ممتنعه من غير ما يمد ايده عليها ها ترضي بعد الضرب
جزئيه تانيه الشيخ طالب الزوجه المضروبه{الشيخ المصري} انها تثبت حقها قانونا وتعمل لأمه محضر وتتطلق اه كله الا الكرامه !!
لكن ضرب لا _لان ضار بالصحه النفسيه للاطفال ومدعاه لعدم الاحترام وبقيه الكلام علي ان الاسلام ليس دين عنف بل دين رحمه ووموده واذا كنا بننهي الرجل عن ضرب مراته وبالعكس هو مأمور بالانفاق عليها بينما هي غير مأمورة شرعا بخدمته يبقي مينفعش نجيز الضرب تحت اي سبب!!
الحقيقه انا معجبه جدا بالفتوي السعودي
اه اصلها فتوي جديده وجريئه وبتفخخ ثقافه المجتمع...هيهيهيهي وانا احب اللي يفخخ!! اصل مش معقوله الرجاله تدي نفسها عذر وحق انها متنرفزة وتمد ايديها لما الست ترد تبقي مش متربيه ومن هذا المعترك
يا نساء العالم اتحدوا
جوزك علي ما تعوديه.. وبالعصايا لسوعيه. وبالمنفضه انفضيه .ولومقدرتيش عليه اصبري بكرة تاخده الشوطه وتورثيه
متقمصه رانيا فريد شوقي في مسلسل رخم (عائلة مجنونة) ما علينا!!
يا نساء مصر اخرجن من الكهوف الست المصريه مش اقل كرامة من السعوديه حاشا وماشا!
ما نقولش ايه اديتنا مصر نقول ها ناخد ايه تاني من مصر؟؟
وضل الحيطه اضمن لك يا شابه من ضل راجل لا يشفع ولا ينفع ولا يحترمك... اديله يا شابه ما ترحميهوش يقولك بم وتقوليله طفحت الدم!!المهم الضرب يكون بيوجع ما يعلمش اه
عشان بقي المحاضر والنيابه والقواضي
بقي حقك ها تاخديه وبالخلع زحوليه وفي شقته تقعدي و تستربعي وتكيديه وتفرسيه
الي الجهاد يا بنات وكله شرعي بالقانون

هناك 39 تعليقًا:

mido يقول...

يا رب جوزك يشوف البوست

علشان نعرف رأيه ايه؟

هيهيهيهيه

عين فى الجنة يقول...

ضرب ضرب زى بعضه المهم الليلة تخلص وكل واحدة فى حضن جوزها
ويبدو ان هذا تفسير جديد للاية الكريمة
" وقدموا لانفسكم "
فبعضهن يقدمن عشاءَ وبعضهن يقدمن رقصا واخريات يقدمن ضربا ، المهم النتيجة فى الاخر بعد المقدمة

خمسة فضفضة يقول...

السلام عليكم ورحمة الله وبركاته

المسلسل اسمه عائلة مجنونه
والموضوع ده شكله موضة الفتوي اليومين دول
لسه امبارح علي قناة الناس ولا الرحمه مش فاكره كانت واحده بتكلم دكتور صفوت حجازي وبتشتكيله من زوجها اللي بيضربها علي الفاضيه والمليانه واي نقاش بينهم لازم ينتهي بالضرب لدرجة انه بيزرقلها وشها ومناطق في جسمها وهي مهندسه وهو معاه بكالوريوس علوم
قام قلها حاولي تخلي اهلك ياخدولك حقك واغضبي لحد ما يتصلح حاله وان ماتصلحش اطلبي الطلاق
ويوم الجمعه في عم يتسائلون برضو بفس الكلام،
مع ان علي رايك ناس كتير اوي بيضربو بعض وبيتراشقوا بافظع الالفاظ وبعد كدا خلاص ولا اكن حاجه حصلت

اغرب مثل سمعته امبارح :
نار الراجل ولا جنة العيال ؟؟!!!!!!

سلام

Empress appy يقول...

لما تجوز هقولك هبقى اعمل ايه
ههههههههههههه

بس فى راى يعنى بجد ان مينفعش الامور توصل للضرب يبقى قلتها العيشه دى احسن
انما ضرب وشتيمه واهانات لا طبعا بصرف النظر عن الفتوى

انا حره يقول...

ايه دا فى واحده فمصر لامتعرفش النصيحه الجهنميه لفرس الازواج يابنتى بتقول

تنحى لجوزك وافرسيه اوعى تضحى عشانه وطنشيه وان جيتى يوم واتنازلتى تمرعييييه اتدلعى واتبغدىى واتمططططعى تكسبيه وان جيتى فيوم ومقدرتيش عليه اصبرى شويه تورثيه وتورثى اللى بعديه

ههههههههههههههه والله كلام جامد هيا دى بقى سياسه النفس الطويل وان كيدهن عظيم

الضرب دا خليه لقلالاه الحيله بس

Alkomi يقول...

في غلطة مطبعية لوذعية شمبعليظية

يا نساء العالم اتحدوا

اتحدوا دي للرجالة

الا لو قصدك ان النساء انقرضضضضضضضضنننننننننننننننننن

عباس العبد يقول...

التدوينة فكرتنى بيوسف وهبى
اهيه رقعت بالبلدى بنت سلطح بابا
هههههههه
---
يعنى انا كلامى اللى طلع صح فى الأخر
عنف مقابل عنف !! . مش كده ؟ و لا أنا غلطان ؟
كلمينى عن العدالة و بعدين قوليلى الحق فين ؟
و بعدين " تفخيخ و كهوف " و هذه الأشياء و الكلمات مش غريبة علىّ .. انت بتسخرى منى بقى ؟ .. الله يسامحك .. انا مش حتنرفز احسن تضربينى
هههههههه

Cleo يقول...

أنا رأيى إن كل أم وهى بتجهز بنتها لازم تكون حريصة وهى بتنقى نوع الساطور... طبعا ده هيبقى جزء مهم جدا من جهاز أى واحدة مقبلة على الجواز... أمال... قبل ما يتغدى بيها لازم هى تتعشا بيه... يا شيخة بلا مودة بلا رحمة بلا بتاع...

وما نيل المطالب بالتمنى.. ولكن.. تؤخذ الجوازة غلابا

Ahmed Kamal يقول...

بسم الله الرحمن الرحيم ، اللهم احفظنا ، أنا كنت فاكر نفسي داخل مدونة حريمي أهدي أعصابي ، أقوم ألاقي كل الدموية دي ؟

ده الرجل يبقى عنده حق بعد كده بقى يخاف على نفسه من جنس المتوحشات ده :)

لكن أنا برضه نفسي الباشمهندس جوز سعادتك يقرأ البوست ده ، و ابقي قولي لنا خلصت على إيه ، ولا على إيه إبقي قفلي على الموضوع أحسن :)

غير معرف يقول...

لااصدق ان القمر بهذه القسوة ..

ليه هو الراجل بيعمل ايه يعنى ؟ روح طيب .. تعالى .. حاضر .. ماتبصش .. هو انا شايف لحد هناك ..

وآخرتها ضرب وبالعصاية .. بدأت احس فعلا ان الستات مفتريات ..

وهل تحتاج البنات الى اتحاد بعدما ما قرأت وما اوصيتى به نساء الارض ؟

أومن ياسيدتى بقاعدة win - win
كل أوامرك على راسى من فوق .. بس بلاش حكاية الضرب دى ..

بنت القمر يقول...

ميدو
=========
طبعا شافه وشاف الحلقه وايه اللي يزعله ولا يزعلك الفتوي في حاله الدفاع عن النفس
معترض راسل الراجل علي موقعه
نورت

بنت القمر يقول...

راجي
========
ونعم التفسيرات............ يا رايق
تحياتي:)

بنت القمر يقول...

فضفه
========
الفتوي من ناحية المنطق سليمه تماما
ها يموتني= دافعي عن نفسك
بس هل يا تري اللي جوزها ها يقتلها مثلا ها تستني فتوي!!
اللي متعود يضربها من غير مبرر لما تضربه ها يعمل ايه؟؟
الشيخ الازهري كلامه كمان منطقي الاعتداء علي الاخرين حرام فما بالنا بالزوجين!!
بس حته العلاقه الحميمه دي معجبتنيش
ازاي يضربها عشان ممتنعه وازاي يهجرها وهي اصلا اللي ممتنعه؟!
بصي فاكرة الاغنيه بتاعه يا اهل المغني دماغنا وجعنا
اهو نفس المثل شكله علي الفتوي
نورتي

بنت القمر يقول...

ابي
=======
ربنا يجعل نصيبك في الطيب

بنت القمر يقول...

انا حرة
=========
ايوة هي دي سنتنتنضنوا
علي رايك في وسائل ايذاء لقوي ميت مرة من الضرب!:)
نورتي

بنت القمر يقول...

محمد الكومي
===========
رجعت قلت اخرجن
الاول ها يسترجلوا شويه ساعه الضرب بعد كده ها يرجعوا لحاله الانوثه يا سلام علي دقتك!!

بنت القمر يقول...

كليو
=========
ولو ان الفتوي شكلها تقدمي وتحمل قدر من المعقوليه لكن قلتها احسن
لان اللي بتضرب لحد الموت مش ها تستني فتوي تدافع عن نفسها
بس انا ملقتس اسلوب اطرح بيه الموضوع غير الهزار
لانه يخنق:(

بنت القمر يقول...

عباس العبد
=============
كلامك صح....اللي هو ايه اصلا؟!!
انا مفهمتش في الاخر انت عاوز تقول ايه؟؟
معجب بنهي ولا بتقول ان اللي عملته معروف من زمان ؟وايه علاقه الصور بالموضوع ومين بتوع الكهف والبلطجيه والباحثات عن القدوة وقالب علي الكل ليه؟ اقطع دراعي لو فهمت:(
وعموما
=======
انا مش مبسوطه من الفتوي رغم منطقيتها!!
طبعا واحدة بتنضرب لحد الموت لازم تدافع عن نفسها
المنطق بيقول كده
لكن المنطق برضه بيقول مش لازم ندي للعنف شرعيه اللي علي شفا الموت مش مستنيه فتوي
- الشيخ المصري كلامه منطقي بيضربك اطلقي... لان الدين( الاسلام) لا يقبل العنف وايذاء الاخرين فما بالنا الزوجين
لكن تفسيره للنشوز... اممممممم مش هاضماه
لان برضه المنطق بيقول اللي ممتنعه عن جوزها بدون ما يمد ايده عليها مش ممكن ها ترضخ له بالايذاء والهجر في الفراش اصلا واللي هو عقاب قبل الضرب ها يكون حاصل من طرفها!!!!!!!!!
مش بؤيد العنف ابدا
حكايه بقي تفخيخ ثقافه المجتمع الكهوف
ملهاش علاقه بيك!
دي سمعتها من مدونات ومنتديات كتير!!!
ولو كنت اقصدك كنت حطيت لنك لمدونتك
مش كل كلمه ها اكتبها حد ها بقولي اصل دي من كلامي
P:
نورتني

بنت القمر يقول...

احمد
========
طبعا قرا البوست وشفنا الحلقه سوا
الموضوع جاد جدا ومؤلم وثقيل علي النفس
اسمح لي
----------
انا مش مبسوطه من الفتوي رغم منطقيتها!!
طبعا واحدة بتنضرب لحد الموت لازم تدافع عن نفسها
المنطق بيقول كده
لكن المنطق برضه بيقول مش لازم ندي للعنف شرعيه اللي علي شفا الموت مش مستنيه فتوي
- الشيخ المصري كلامه منطقي بيضربك اطلقي... لان الدين( الاسلام) لا يقبل العنف وايذاء الاخرين فما بالنا الزوجين
لكن تفسيره للنشوز... اممممممم مش هاضماه
لان برضه المنطق بيقول اللي ممتنعه عن جوزها بدون ما يمد ايده عليها مش ممكن ها ترضخ له بالايذاء والهجر في الفراش اصلا واللي هو عقاب قبل الضرب ها يكون حاصل من طرفها!!!!!!!!!
مش بؤيد العنف ابدا
-----------------------
دي وجهة نظري
وعموما اسفه علي الازعاج
المرة الجايه ها احط شعر ولايت ميوزيك في المدونه:D
تحياتي

بنت القمر يقول...

شريف
--------
البوست ساخر لفتاوي مؤلمه
انا عمري ما اؤيد العنف
انا عمري ما ضربت بناتي ابدا
ها افكر اضرب ابوهم انا او غيري!!!!!!
لا طبعا
بلاها عيشه احسن... بص بس علي ردي علي التعليقين اللي قبل حضرتك
تحياتي

bluestone يقول...

انا قريت الكلام في منتديات كتير :))

بالنوسبة لفتوى الضرب
اول امبارح كنت بقلب بملل في التلفزيون وبعدين على محطة فضائية مصرية لقيت شيخ شاب بيتكلم.. وكان الموضوع برضه عن الضرب .. بما ان الفتوى طازة

المهم الراجل قال كلام كويس جدا
قال ان الضرب ممنوع في كل الاحوال وغير مستحب على الاطلاق بين الطرفين .. لكن ان لو الزوجة فعلا تعرضت لضرب مبرح من الزوج او هجوم منه .. فطبيعي انها تدفع الاذى عن نفسها وتدافع .. يعني مش حرام انه تدفعه او تمسك ايديه او تشوف اي وسيلة تدافع بيها عن نفسها او حتى تهدده ..إلخ
لكن الضرب ممنوع

ولما المذيعة قالت له بس ضرب الزوجة محلل او في نص بيبحيه فقالها انه رأيه الشخصي ان الضرب حرام إلا في حالات طارئة جدا.. وده اللي احنا اختلفت معاه شخصيا .. لانه الضرب بالنسبة لي نهاية اي علاقة لانه بيقضي على الاحترام تماما بين الطرفين

المهم انه في النهاية ختم كلامه بان الطلاق احسن من الضرب

الطائر الحزين يقول...

فتاوى تضيع الحقوق

الاولى اصدار فتوى بمنع الضرب

kochia يقول...

والله الرجوعىالي الدين في الحاجات دي هو الملجأ

يعني هنخترع بقي ونضرب بعض كمان رايح جاي

بس برده الضرب من طرف واحد مش عدل

المهم ربنا يستر علي دول ودول
بس الدعوة بتاعتك شجاعة وقوية .. بس ممكن تبقي حل اخير ..
افتكر لسة في حلول تانية للموضوع

مش كدة ؟؟

Cleo يقول...

يا عزيزتى صدقينى أنا كمان زيك.. مش لاقية حاجة غير انى أتريق... تحسى انهم مش بينصحوا الأزواج بالتراحم.. دول بيعملوا تعبئة عامة من أجل الجهاد الأكبر...

lastknight يقول...

و عاوزيننى أتجوز تانى ؟؟ هأو

التريقه أعلاه من غلبى .. فقبل أن يفتى الشيخ بتبادل الضرب بالضرب .. كأن أحرى به أن يمثل صورة الأنسان و لو قليلا و يحرم الضرب من اساسه .,.. و الآيه القرآنيه تبيحه فى حاله محدده جدا .. هى ألا يفسد الزواج , فبالفعل فى بعض البيئات البدويه يكون لطم المرأه أحد الأساليب المقبوله جدا للتعامل .. حتى أن فى حضارات البدو تستخدم كلمة التأديب بديلا عن كلمة الترويض و تنطبق على كلا من الفرسه و الزوجه .. لكن لا أتخيل أبدا أن امرأه تعلمت و عملت و خرجت من خباء الداوه ألى حضارة العالم و تستقبل الأيذاء البدنى باعتباره تأديبا أو ترويضا
أشكرك لمرورك بمدونتى

محمود محمد حسن يقول...

الحمد لله على نعمة العذوبية

محلاها عيشة الحرية

لاتضرب ولا تنضرب

محمود المصرى يقول...

بسم الله الرحمن الرحيم

هو فتوى الشيخ السعودى تتكلم عن حالة محددة استثنائية , مش معناها ابدا ان الزوج والزوجة نازلين فى بعض ضرب كل يوم ولا حاجة , لكن بالنسبة لموضوع الزوجة الناشز فهى الزوجة التى لا تطيع زوجها , وطبعا فيما لا يقترن بمعصية لله .
لكن انا ليه بحس من كلام ناس كتير ان الناس وهى بتتكلم عن علاقات الزوجين وحق الزوج فى ضرب زوجته واحتفاظ الزوجة بحق الرد كأنهم داخلين على حرب وبيتفقوا على معاهدة دولية تنظيم الاعمال العسكرية على غرار معاهدات جينيف الاربعة , يا جماعة الاصل فى الزواج السكن والود والرحمة والله العظيم هو دا الطبيعى , مش الطبيعى ان الزوج يعمل دكر وياخد حق ضرب مراته ولا ان الزوجة ليها حق الضرب دفاعا عن النفس اللى ممكن يتطور بعد كده لحق الضربة الاستباقية كنوع من التوسع فى فهم حق الدفاع عن النفس , اتمنى ان الناس تاخد بالها من النقطة دى واللى مش فاهمها وواعيها يبقى مايتجوزش احسن .
تحياتى للجميع

بنت القمر يقول...

بلو
==========
المثل العربي بيقول البينه علي من ادعي والدليل علي من انكر:(
اللي عنده لينك ان اي كلمه بكتبها منقوله من مكان يحطه في عيني
بس هو الكبر او زي ما تقولي العقليه الذكوريه اللي تستكبر تقول انا بتكلم عن بلو اللي تم التحرش بيها او بنت القمر اللي قالت مش كلنا نهي
رغم ان اللينكات التانيه لعبد الرحمن وهاني يسدوا عين الشمس
عجيبه:(
-----------------
بالنسبه لقصه الضرب
اعتقد ان الامر لم يكن يحتاج لفتوي اصلا
لان مفهوم ان الزواج مبني علي الموده والرحمه
طب الواقع بيقول انه في ضرب
رايي انا الخاص
مش لازم ندي للضرب شرعيه لو بعد الشر جوزك بيضربك وبيخنقك وها يقتلك طبيعي تدافعي عن نفسك مش مستنيه عمو العبيكان عشان يقولك رايه
لكن ان واحده تفش غلها في جوزها وتكسر له ايده وتفتح راسه بحجه ان حلال يبقي مش منطق ده بجاحه منها!!
كان الافضل لو سكت
بالنسبه للشيخ الازهري
فضل طبعا الطلاق
لكن الحقيقه انا معنديش خلفيه بقصه النشوز ولازم ادور عليها واشوف وفي كل الاحوال هو ضرب يماثل حدف نواه التمر!! مش المساخر اللي بتحصل
ده علي اعتبار ان الراجل اصلا راجل وبيصرف علي زوجته وبيحترمها
بس المسخرة اننا بناخد من الدين اللي احنا عاوزينه بس
يعني اجمع الفقهاء الاربعه الكبار ان الزوجه غيرمأمورة بخدمه زوجها!!
تعالي بقي قولي لراجل كده يقولك الله
امال انا كنت بجوز ليه؟؟؟؟؟؟
علي اساس انه عاوز شغاله:((
نورتي

إيمان قنديل يقول...

والله الست السعوديه دي أصيله ضربته وودته المستشفي يتعالج


لما بيضرب الراجل مراته بيسبها هي تعالج نفسها بنفسها، شوية تلج علشان الكدمات، ومافيش مانع شوية سبيرتوا علشان الجروح وحبتين أسبرين علشان الوجع


كتهم وجع في بطونهم

قولي آمين

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
ارسل ميلك اذا كنت ترغب في وضع البنر نرسل لك كود البنر

بنت القمر يقول...

الطائر الحزين
===============
100 ال100 صح

بنت القمر يقول...

kochia
=========
طبعا ان مش شايفه سبب اننا نقنن الضرب
ويكون بالشرع كمان
انا استعملت الاسلوب الساخر لانه مينفعش غيره:) نورتي

بنت القمر يقول...

lastknight
=============
اتفق معاك في نقطه ان الشيخ مكنش مفروض يقنن الضرب لسبب بسيط ان اللي بتتأذي بدنيا مش مستنيه شيخ يفتي لها عشان تدافع عن نفسها
بخصوص التأديب...باعتبار الست مش مؤدبه فالاختلافات مذهله جدا في التفاسير الخاصه بالنقطه دي
ولذلك لا اجد غير اني التزم الصمت الحزين
تحياتي

بنت القمر يقول...

محمود المصري
============
بس الحاله المذكورة في اللينك علي راجل متعود يضرب مراته
فكان الحل تدافع عن نفسها
لكن اللي حصل انها اتربصت بيه وخدته علي خوانهة:))
-------
هو فتوى الشيخ السعودى تتكلم عن حالة محددة استثنائية , مش معناها ابدا ان الزوج والزوجة نازلين فى بعض ضرب كل يوم ولا حاجة , لكن بالنسبة لموضوع الزوجة الناشز فهى الزوجة التى لا تطيع زوجها , وطبعا فيما لا يقترن بمعصية لله .
-------------
يا تري ده تفسيرك الخاص
يعني ايه فيما لا يقترن بمعصيه= يعني ما بتصليش مثلا او بتلعب قمار او حراميه
تقصد ده بالمعاصي
طب والرجل اللي بيعمل نفس المعاصي بيسكر بيسرق....؟؟؟
وليه الشيخ الازهري فسره بالامتناع عن العلاقه الجسديه
لان هدف الزواج الاعفاف
الموضوع عاوز بحث وتدوير اكتر من كده
تحياتي

بنت القمر يقول...

كباريه
----
اعتقد لو شفتي من القصه انها مبقوقه منه... وكانت مترصده له
السعوديه زي مصر فيها حالات ضرب عنيفه جدا ولو تفتكري من فترهكان في مذيه جوزها ضربها الي انه كسر وشها وقابلوها في السي ان ان وهي زوجه اخو المطربه وعد
وطبعا قعدت شهور تتعالج في المستشفي
تحياتي

محمود المصرى يقول...

بسم الله الرحمن الرحيم

قصدى فيما لا يتصل بمعصية يعنى ان يأمر الزوج زوجته بمعصية هنا لا تطيعه لأن طاعة الله مقدمة على طاعة الزوج , لكن لو امرها بما هو من الحلال لا يجوز لها ان تعصاه , اما فى مسألة العلاقة الجسدية فليس هو الحالة الوحيدة للنشوز لكن احد حالاته , والا فلا معنى اصلا للقوامة ان اقتصرت على العلاقة الجسدية فقط دون سواها .

غير معرف يقول...

النشوز لغة هو الارتفاع، أي الاستعلاء والتكبر..
ومن أشكاله (ومش كل أشكاله) رفض العلاقة الزوجية من باب الاستعلاء والاستكبار، مش يعني نوع من الدلع أو انها تعبانة مثلا..

عشان كدة النشوز لا يترجم بمجرد الامتناع عن العلاقة الزوجية يعني يمكن هو بس حب يبسط الموضوع..والضرب أيوة مشروط بأنه يكون بطرف الثوب أو طرف الأصابع أو رمي نواة التمر، لأن الضرب هنا معنوي مش بهدف العقوبة أو التسبب في الألم مثلا، يعني هي بتستعلي عليه فهو بيظهر لها الضيق منها يعني وانها ليست أهل لهذا الاستعلاء..

رشا عبد الرازق يقول...

يضربك
اطلقي

باختصار شديد في نظري ده الحل والصح
الضرب مرفوض
ورده مرفوض
عشان وقتها ده مش هيكون زواج
فين الزواج بكل معانيه العميقة جدا بعد ما اتنين يضربوا بعض
أما الدفاع عن النفس أمام واحد بيضرب لحد الموت
فهو في الحالة دي مش بيتشاف على إنه زوج
بيتشاف على انه معتدي
وهنا
معاني واحاسيس كتير بتسقط ولو تحت بند يا روح ما بعدك روح !!!
والسؤال اللي غايظني

هو المشكلة ساعتها في شرعية رد الضرب بالضرب ؟ يعني لو كان رد الضرب حلال يبقا خلاص المشكلة اتحلت !
يعني هيه الزوجة اللي انضربت حد الموت وردت الضرب بالضرب كل مشكلتها ومشكلته يطمنو على شرعية اللي حصل ؟
والله دي امراض في كيانات مشروخة لعلاقات مش قايمة أساسا على دين !


والمشكلة يا عزيزتي
ان محدش بياخد الدين كله
في الدين فيه هجر وضرب ( بنواة تمر او طرف الثوب على حد علمي ) وفيه حقوق وواجبات وفيه نشوز بمعنى شامل
بس مين قال ان الاحكام دي بتطبق من طرف واحد ؟
يعني هل الزوجة الهاجرة لرجل سكير مثلا لا يراعي الله تلعنها الملائكة حال الهجران ويجوز عليه الضرب للنشوز ؟

العلاقة تكاملية
والعقاب _ ان جاز التعبير _ في التفريط في حق الغير واجب بعد تمام اتيان الحق للمعاقب


ممممممممم الفتاوي المشطورة دي بتصيبني بالغثيان

بس خفة دمك لها تأثير عكسي


تحياتي :)

dr. Ahmed Sakr يقول...

ههههههههههه

طيب وأخرة الضرب ده أيه بقى