الثلاثاء، نوفمبر 18، 2008

كيف تكون مدون جامد جدا

أن تكون مدون(جامد جدا)ليس بالسهوله ان تكون مدون غير جامد جدا!!
المدون الجامد جدا هو المدون الذي يقدم السهل الممتنع والسهل
الممتنع ان تقول تدوينتك وتسيب الفرصه للقارئ ان يفهمها ويستخلص منها ما يشاء
لكن احذر ان توافق قارئك الرأي_لانك مش لازم تصقف له!!
_ فانت مع السلام والتطبيع ولكنك لا تنسي جرائم اسرائيل ضد العرب!
انت بتتجرأ علي ربنا وبتسخر من الاديان لكن قارئك لازم يفترض أنك متدين جدا!!
انت مع سوبر موديل نهي.. لكنك تقرأن اي بت في اي حارة شعبيه بتعمل اللي عملته نهي كل يوم وبترقع المتحرش بالشبشب.
انت لك موقف مضاد من المحجبات... لكن تلعن الباحثات عن حريه الملبس والاعتقاد وتتشفي فيهن في مواجهتهن مع المجتمع!
.. انت متشاءم من اوباما وتلعن المتفائلين.. ولكنك تري انه افضل من غيره فتتفاءل في نفس اللحظه وتلعن المتشائمين!!
اياك ان تقدم لقارئك موقف واضح ومحدد
الله وانت فاضي لأم القارئ عشان تريحه... القارئ ده اصلا انسان مرفه ومرتاح!
عشان كده انت لازم تعلمه ان الحياه مش سهله !!
وإنه لازم يتعب ويشقي عشان يفهم ويقرروياخد موقف.... ولما ياخد موقف اياك توافقه
خد انت الموقف التاني علطول عشان تفّهم القارئ ان الاختلاف سنه الحياة!
وتديله درس بدري في الديموئراطيه!!!
انت رجل اللاموقف... لانك اكبر من اي موقف وابعد عن اي تصنيف او فكر!!
عشان تكون مدون جامد جدا لازم تسيب وراك سؤال في دماغ القارئ... تخيله يتعب يفكر الراجل ده او الست دي عاوزين يقولوا ايه؟؟
لو سألك طبعا في التعليق وطبعا ها يكون سؤال غبي جدا_ وقال انت عاوز تقول ايه.؟؟
..لازم تحط مسافه نفسيه بينك وبين القارئ!!
لانك لو رديت علي سؤال ها يسألك التاني وتبقي زي استاذ النحو في فصل ابتدائي!
كل سؤال وراه سؤال ومش ها تخلص في ام ليله التدوين دي!!
ترد عليه وتقوله انا قلت اللي عندي خلاص وكلامي واضح وعلاقتي بالبوست انتهت اول ما عملت بابليش!
سيبه يتعب ويقاسي ويخمن...ده من حبك فيه طبعا ويا بخت من بكي القارئ وبكي عليه ولا ضحّكه وضحك الناس عليه!!
كي تكون مدون جامد جدا اختار اسلوب قوي جدا يجمع بين بعض التوابل الفنيه كلمتين قباح علي مصطلحين شداد!!
ان تكون مدون جامد جدا... لازم تتطعم تدوينتك بصور مميزة جدا وتعلق علي الصور
لكن مش لازم تكون تقليدي !!
راعي ان الصورة تكون عكس موضوعك تماما عشان الصورة تضيف بعد بؤري للبوست!!
وتعدل الطريقه النمطيه الزباله للقراء ( ولا يعني ها تحطلهم صور مراكب وعصافير؟؟)
ومش ها اوصيك الصورة ثم الصورة!
التوصيه الاخيره عشان تكون مدون جامد جدا احذر الحريم
..وجود قارئات ليك طبعا هايمنحك شعور متنامي بالقوة والزهو:)
وجود متابعات ها يشبع غرورك الذكوري وخلي بالك اللي متابعينك دول معناه انهن_عاشقينك في الضلمه!!
الله امال بيتابعوك ليه؟؟عشان كده لازم يتأكدن انهن بيتابعن مدون جامد جدا!
احذر ان تعتقد احداهن انها تزيد ايد ولا رجل عن الاخريات
يعني تختار فتاه اليوم وتمنحها كثير من المدح والثناء بقدرتها علي فهم البنيه اللغويه للنص
وعلي ذكائها في استنباط الهدف النهائي للتدوينه
وبراعتها ي استنباط وتحليل الفعل التراكمي للحدث المقصود في النص
ولكن التدوينه التاليه. لازم توقفها عند حدها برضك لانه في رجالة قاعدة في الليله وبرضك الحريم مش ها تفهم عن الرجاله!!!
عيب انت راجل ومدون جامد جدا!! وانت طبعا عارف ان الستات عقلها صغير!!
انت مع حق المرأة في ان تبحث عن حريتها بس لوحدها
وبراحتها لانه شيئ اكيد ميخصكش!!
انت ااشتراكي الاعتقاد راسمالي التوجه! انت ليبرالي لكن محافظ جدا! انت علماني ولا ينفي ذلك انك متدين!!!
انت يا عزيزي رجل المستحيل:(
انت مدون جامد جدا !!

هناك 66 تعليقًا:

Ahmed يقول...

خذوا حكمة التدوين من بنت القمر

mido يقول...

السؤال الغبى
:))
انت قصدك ايه؟

انا مشفتش مدون جامد و بيعمل زى مبتقولى

انت شغت؟

وميض ابتسامة يقول...

فى ايه ؟؟؟؟؟؟؟؟؟؟؟

وايه البوست التعليمى ده ؟

عموما بعد الاطلاع على البوست قررت اننى لن اكون مدون جامد ابدا !!!

مع خالص تحياتى

انا حره يقول...

امممممممممم

هوا مين المقصود بقى بالظبط من التدوينه دى

لازم نعرف

misha و lado يقول...

وضع لوجو الحزب الشيوعي الاحمر ذو المطرقة والسندان
وتحتة لوجو ماكدونالدز
I'm Lovin' It
**********
وضع لوجو اليوم العالمي للايدز
مع رفع الشعارات المناهضة للمثلية الجنسية

فاتيما يقول...

تعرفى يا امانى و أنا بجرى بعينى بين السطور
لمحت كام حد كدا دخلتله زمان
و لقيت عنده كام حاجة من اللى بتقوليهم فبطلت ازوره تانى
صعب قوى أقراله حاجة كدا و أصدقه
فقدت أهتمامى بعد إحترامى كمان
بس كل الصفات دى مجتمعة أظن صعب تتواجد فى مدون او مدونة واحدة
البوست دا فكرنى ببوست بيكا روبيكيا المدون القفا و رغم اختلافى مع شخصية كاتبه لكن إحترمت فكره لأنى شوفت ناس كدا
بس يمكن تكونى شوفتى حد كدا
إنتى بتملكى عين ناقدة
و حادة البصيرة فى مواضيع كتير و أتصور إنك صادفتى دا من خلال إبحارك فى عالم التدوين
أتمنى البوست يكون بيفضح حد
و يخليه يعرف حجمه
تحياتى و حبى

karakib يقول...

:)))))))) انا هاموت من الضحك
لأنه تقريبا كده انا فاهم انت بتتكلمي عن مين :)) ههههههههه ما تسألنيش مين علشان معرفش

karakib يقول...

فاتيما انت مختلفة معايا بصفة شخصية !!؟ صفة شخصية !؟ ليه و ازاي ؟

خمسة فضفضة يقول...

السلام عليكم ورحمة الله وبركاته

هههههههههه

وانا كمان زي هاني تقريبا حصرت الموضوع علي اتنين مدونين اكيد هو واحد منهم مالوش تالت

Bella يقول...

اهلا اماني

والله يااماني الخطوات اللى كتبتيها بتنطبق على بعض الناس

بس مش عارفة يعني هل ممكن حد تتجمع فيه كل الحاجات دي مرة واحدة

هههههههههههههههههه

غير معرف يقول...

اذن هذا هو رأيك فى المدون الجامد جدا ؟؟ !!

جواب نهائى .. ؟

رئـــــيسـة حزب الأحلام يقول...

المدون الجامد جدا هو اللى يكون صادق فيما يكتب
تحياتى

Hypatia يقول...

لوووول
على رأي تامر حسني
"يا بنت الاييييييه ايه ايه"
تقريبا انا زي هانى وفضفضه وقافشه الموضوع بس عامه كلامك ده ينطبق على فئه من المدونين ياريت يحسو بنفسهم ويكون البوست صفعه على وشهم زي ما بوست هانى بتاع القفا كان صفعه على وش ناس كتير
:)

Cleo يقول...

ههههههههه... ايه التدوينة المسخرة دى!!

جامدة جدااااا...

أنا فعلا شوفت اللى انتى بتقولى عليه ده كله بس فى المنتديات مش المدونات.. عشان كدة قاطعت المنتديات كلها.. وربنا يستر..

مهندس مصري بيحب مصر يقول...

انا شاكك في واحد ملوش تاني
:)

... يقول...

:D
والله يابنتي ماتوجعيش دماغك من راقب الناس مات غما وانت لسة صغنونة
بس هي التناقضات بتخلي الواحد فعلا يتساءل غصب عنه..امسكي نفسك وارجعي .. فيه ألف أيقونة ينقلوكي لأي صفحة تانية
عامة اجمل حاجة ان الضمير في البوست دة مذكر هيهيهي

عدى النهار يقول...

لسعة الشوربة برضه كويسة فى الشتا و الزبادي كفاية عليه الصيف
:)

Islam Attia يقول...

لا والله مدونة جامدة جداً

Geddo Iskandar يقول...

هع هع ... ملعوبة :))

غير معرف يقول...

انا مافهمتش حاجة و لا مؤاخذة

قوس قزح يقول...

هى نفسيات

و الكام كلمة مش بحبهم بهرب منهم


و المرفقات اساسى للتوضيح و ان كانت مش موضوح اهى لون على الاقل و تغيير


و سيبك من العقل الصغير المهم اللى فى القلب


ايه رايك ؟
انا شايفة انه اسهل اكون معلق جامد :)

عباس العبد يقول...

طبعاً انت مش حتقولى انتى بتتكلمى عن مين , لأنك متقصديش شخص معين بعينه لكن تقصديه ببقه . و ده يوصلنا انك حتسيبى سؤال عالق فى ذهن القارىء لأنك مش فاضية لأمه علشان تقوليله بتتكلمى عن مين .. صح ؟
معنى كده على حسب وصفك انك مدونة جامدة جداً !!! و احنا مش عارفين ؟
هههههههه

عين فى الجنة يقول...

انت رجل اللاموقف... لانك اكبر من اي موقف وابعد عن اي تصنيف او فكر!!

" الايجو لما يبقى عالى ومتضخم يسبب جنون العظمة ، ويبدو ان تضخم الايجو له اسباب من داخل النفس وايضا من خارجها"

بوست جامد

فاتيما يقول...

بعد إذنك يا بنت القمر
أرد على هانى
بص يا سيدى
بداية أعتذر لو كان لفظ صفة شخصية كان غير دقيق حبتين لأنى لم أقابلك بصفة شخصية حتى الآن عشان أقول كدا
بس كنت أقصد شىء تانى خالص
أقصدأن رأيك بيعجبنى فى معظم الاحيان لكن ساعات إنطباعاتك بتبقى قاسية بعض الشىء و مطلقة ...
يعنى مثلاً تدوينة المدون القفا
رغم إنطباقها على شخصيات ما ف التدوين لكن النوعية دى بيبان زيفها و بتنقرض بسرعة بعد فترة
و كمان متنكرش إن مش كل مدون حواليه احباء و مريدين بيجبوله ورد و له وضعه يبقى مدون قفا ؟؟!...
ليه متقولش إنه يستحق الإحتفاء بيه
و إنه بالفعل شخص مميز لدرجة إن من يجبونه لله فى لله كدا ... حبهم جارف لدرجة الورد و ما شابه ...
كمان إنطباعك عن يوم حفل العدد الأول من مدونات مصرية للجيب
لما قريتلك لقيت إنك سبت كل حاجة تقربياً و بصيت للسلبيات فقط و كانت آخر عبارة
عمرى ماشفت حفل توقيع بالشكل دا
حسيت أن الجملة دى قاسية جداً
لأن اليوم كان جميل فى نواحى آخرى ربما لم تسعدك إنت
و لأنها لم تسعدك ربما حطيت عنك إنطباع شخصى بأنك من نوعية الناس الصعب إرضاءهم و الصعب أنهم يفوتوا شىء سىء مقابل حاجة تانية لطيفة
بصراحة انا أوقات بشيل همك و احس انك بتشقى بمقاييسك فى الحياة و صعب تلاقى حاجة بتسعدك كأغلب الناس
أرجو إلا يغضبك كلامى
و إحترامى ليك فى محله لم يخدش
و بتأسف لو كلمة شخصية أزعجتك
تحياتى الخالصة ليك

مـحـمـد مـفـيـد يقول...

اولا احييكي
ثانيا
بعد موضوع والتاني تقدري تحكمي علي المدون وطريقه تناوله للموضوع
لان هناك اقنعه كثيره جداً

karakib يقول...

فاتيما

جزيل الشكر يا فندم لأهتمامك بالرد عليا ... طبعا اوافقك انه الوقوع في فخ المطلقات امر سييء للغاية .. لو قريتي اخر تدوينة عندي باتكلم فيها عن الرمز و المطلق و الذي لا يجب انتقاده و علي النقيض في رموز سيئة لا يجب مدحها ... و باقول انه ده غلط جدا و اكيد كلنا علي المستوي الشخصي بنقع في اخطاء زي دي علشان احنا بني ادمين
-----
اما عن قسوة انطباعاتي .. فده يا سيدتي لا يظهر الا في الكتابات اللي يعرفني علي المستوي الشخصي يعرف انه انطباعاتي ليست بهذة القسوة ابدا الكتابة احيانا بتحتاج شوية سخرية لاذعة علي شوية كلام غريب ممكن يكون غلط و ممكن يكون صح احنا اتفقنا انه مفيش شيء مطلق و كله يخضع للنسبية
-----
يعني ايه مدون له محبينه و مريدينه !؟ و يجيبوا له ورد كمان !؟ لأ ما افتكرش انه ده بيحصل بصراحة
انا عن نفسي باستمتع بقراءة عمرو عزت و شريف عبد العزيز -العداله للجميع- و ناس تانيه كتير و اعرف انه لهم معجبين كتير بكتاباتهم ... لكن عمري ما هاجيب بوكيه ورد و اروح اديه لأي حد منهم الا لو كان في فرحه مثلا ... لكن بوكيه ورد لمدون ... مابتحصلش علي حد علمي حتي الأن و اتمني ما تحصلش علشان هاتبقي شكلها ماسخ اوي لأنه مش تامر حسني في حفلة و لا حتي نانسي عجرم او هيفاء وهبي
-------
شوفي .. حفل مدونات مصرية للجيب انا رحته الاول و التاني و في المرتين كان ليا ملاحظات عليه ... انا لا اقاسي في حياتي بسبب محاولة رصد الاشياء الجديدة عليا
بالعكس انا باستمتع بده
حفل مدونات مصرية للجيب كل اللي كتب عنه باستثناء اربعة... الكل قالوا كان يوم جميل و لطيف و قابلنا بعض و حبينا بعض و نجاح باهر الي اخره ... محدش جاب سيرة خناقة حصلت و كلام كبير و شد و جذب ... المفروض بقي اقول كل اللي الناس قالته و اتجاهل و اسقط عمدا هذا الحدث الغريب ؟ المفروض اقول اني ماشفتش غير ناس بتحب بعضيها و بلالين و بوكيهات ورد و الكتاب جميل لدرجة اني باخده في حضني و انا نايم ؟ لازم ابقي مع الناس كلها في رأيها !؟ و لو خالفتهم الناس تزعل مني ... حتي انا ما اتكلمتش عن رأيي في الكتاب .. كل اللي قلته انه حصل كذا كذا كذا و دي اول مرة اشوف حفل توقيع بيقلب خناقة !! غلطان في ايه !؟ يعني لا ذميت و لا مدحت كل ما فعلته هو انني ذكرت جزء من الاحداث تعمد الجميع اسقاطه و عدم الحديث عنه و كأنه لم يحدث مع انه خد اكتر من تلت الوقت بتاع حفل التوقيع و بعدها فضلوا يتكلموا بتاع ساعة الا ربع
اسكت انا و ما احكيش اللي كل الناس مش عايزة تحكيه علشان ما ابقاش قاسي في الكتابة !؟ اكيد مينفعش اعمل كده
الموقف الطبيعي انه طالما كل الناس لم تعط هذا الحدث اهتمام يبقي انا هاديه اهتمام و اقول انه حصل كذا و كذا علشان اللي بيلف في المدونات ما يلاقيش صورة طبق الاصل من نفس الكلام في كل مكان .. لأ يكون صورة كاملة و اكرر كاملة عن ما حدث هناك ... في ناس زعلت مني و ناس قالت لي انت يعني ماشفتش الا كده هناك ... بس نفس الناس اللي دخلت قالت لي الكلام ده تغافلت تماما عن اللي حصل ده و ما كتبتش أي حاجة ... و زعلوا مني علي المستوي الشخصي ... في الحالة دي هما احرار ... لأني كان لازم اكمل الصورة بتاعة اللي حصل و ما اسكتش و اعلق بلالين و ورد في مدونتي احتفالا بالكتاب
خصوصا اني اساسا قلت زي ما ناس كتيرة قالت اخر كلام في ده كان مع نوارة نجم انه مادام في حاجة ببلاش عالنت ممكن نقراها ليه نقلبها بفلوس !؟ ده رأيي و ان كنت لم اذكره في التدوينة اللي زعلت الناس دي
---------
صعب تلاقى حاجة بتسعدك كأغلب الناس
أرجو إلا يغضبك كلامى
----------
انت بتقولي الجملة دي ليا اظن اني وضحتها ليكي بالكلام اللي فوق اما كلمة شخصية فهي لم تغضبني ... كل الحكاية اني حبيت استوضح معناها يا فاتيما
النقطة الاخيرة انا ماقصدتش شخص بعينه في المدون القفا هما اربع او خمس شخصيات بيعملوا نفس الكلام علشان انا عارف معظم الناس قالوا لي انت تقصد فلان
و انا لا اقصد فلان نهائي ... واللهي ما اقصده بالعكس بقي لي فترة شايف انه تدويناته مفيدة ليا علي المستوي الشخصي
-----
يا فاتيما الاحترام متبادل حتي و لو كنا مختلفين

bluestone يقول...

:)))) هيهيهيهي
اكاد أجزم معرفتي بهذه النماذج والمقصود من وراها

شوفي هو افتكر ده راجع بالاساس للهدف من التدوين
يعني فيه ناس بتدون عشان عندها وقت فاضي

وناس بتدون عشان معندهاش مساحة تعبر فيها عن رأيها في الحياة سواء لان مجال عملهم لا يسمح بذلك او لان ارائهم قد تسبب مشكلة

وناس بتدون عشان عندها نقص ما او خلل ما في حياتهم بيحاولوا يعملوله توازن
يعني بيبقوا باحثين عن تقدير او اعجاب او حتى انبهار غير موجود في الحياة الفعلية

وفيه ناس بتدون بحثا عن اثبات الذات او اخفاء لشخصياتهم .. يعني لو واحد فاشل في حياته الاجتماعية هتلاقيه بيدون كأنه متخصص في العلاقات العامة

لو فاشل في العلاقات مع الجنس الاخر هتلاقيه بيدون كدون جوان
لو فاشل في كسب احترام الناس لشخصيته هتلاقيه بيدون كعبقري علامة

وفيه ناس بتدون لمجرد اثارة اعجاب الجنس الاخر

وطبعا فيه ناس بتدون سبوبة

وعلى حسب التصنيفات السابقة وغيرها طبعا
هتلاقي عندك تصنيفات المدون القفا والمدون الجامد جدا والمدون الكداب والمدون صاحب الشخصيتين والمدون الجامد جدا ..إلخ
===================================
كنت عايزة اقول كلمتين لفاطيما
بصراحة انا عمري ما شفت مدون ليه احباء ومريدين !!! ولا ورد ولا بتاع

يعني مع احترامي للكل
اعرف انه يكون لكاتب او مفكر او مبدع او مطرب او ممثل احباء ومريدين
لكن مدون ؟؟؟؟؟!!!!!
ازاي يعني؟؟

المفروض التدوين ده مجرد صفحة على الانترنت الواحد بيقول فيها اللي عايز يقوله .. زي الايميل بالظبط
ماشفتش واحد عنده ايميل ليه احباء ولا مريدين
ولا حد جابلي ورد عشان عندي ايميل على ياهو مثلا !!

سيبك انتي
بس انتي ذوق خالص فعلا
احييكي :)

Alkomi يقول...

ههههههههههههه

بصي انا مرة كتبت بوست اسمه الاديب الالكتروني

http://egyptian-liberal.blogspot.com/2008/07/blog-post_16.html

بس واضح ان دي مش ظاهرة دبية بس دي كمان ظاهرة دوينية تفقيعية

عموما الموقف ده انا بقول فيه للمدون الجامد جدا ايا يكن مين هو

ربنا يوفقك و تعمل شوية شغل حلوين على راي عادل امام في مسرحية الزعيم وهو بيكلم مصطفى متولي

و عموما برضه عادي جدا

كبري دمغك ا اديله على دماغه

Jana يقول...

عجبتنى اوى الجملة دى
انا علاقتى انتهت بالبوست اول ما عملتله بابليش
هههههههههه
ناقص يقوله انا موعدتكش بحاجة
يعنى البوست ده لقيط بقى
هههههههههه

الطائر الحزين يقول...

اللهم اجعلنا خيرا مما يظنون

فاتيما يقول...

يا هانى
يا bluestone
ليكم كل الود
و الاحترام
و التقدير

بنت القمر يقول...

ابو العلا
========
اشكرك
::
:
:
ميدو
=========
اسأل براحتك... انا مدونه عاديه.. اه شفت

بنت القمر يقول...

وميض ابتسامه

========
وانا كمان قررت اني اكون مدونه غير جامده جدا:)
نورت
:
:
:
اناحرة
========
دي حاله عامه منتشره... لو ما شفتيهاش اكيد ها تشفيها مع الوقت
تحياتي

بنت القمر يقول...

ميشا ولادو
===============
اولا انا زرت مدونتكم والحقيقه هي مختلفه جدا
في تناقضات كتير يا ميشا ولادو انا معنديش اي اعتراض علي اي موقف بيعلنه اي مدون بوضوح
حتي الالحاد ..المثليه ... الطائفيه
لكن مش بحب التناقض
بيقتلني انك تقول الكلمه وعكسها عشان ترضي طرفين متناقضين او عشان تسجل موقف وسطي ما يوقعكش في تصنيف محدد
سعدت بالزيارة

بنت القمر يقول...

فاتيما
========= شوفي يا فاتيما انا بتابع ناس كتير جدا
مدونات الحاديه او عنصريه طائفيه مدونات بذيئه الخ
مش لازم اشارك بالتعليق
لكن اكيد كل مدونه لها ما يميزها حتي لو كان السوء
لكن بتقدم شكل معين من التفكير مختلف
لاننا هنا مش اصحاب في النادي!!
لازم ننقي اللي بيليق علينا
نقطه المدون اللي الاخرين بيجيبوله ورد
اعتقد اني شخصيا جالي ورد
لكن كنع من المجامله
واعتقد ان البعض ليه اسلوب وشخصيه كاريزميه بتبان من خلف السطور
يمكن ده اللي تقصديه
في كمان ناس بعشق كتاباتهم وبغير منهم لانهم اقدر علي التعبير عن مكنوناتهم اكتر مني..او..او
انصحك..
تابعي الجميع
لانه اكيد ها تستفيدي بشكل عام
الحمد لله انتب وبيكيا الامور واضحه بالمناسبه هاني من اقرب الناس في اسلوب كتاباتهم الي نفسي
وتحياتي

بنت القمر يقول...

هاني بيكيا
==============
مبسوطه انك مبسوط... ربنا يسعدك
بس للاسف يا صديقي انت مدون غير جامد جدا:D:D

بنت القمر يقول...

فضفضة
========
مجرد احساسد وتخمينك بخصوص شخص معين يبقي اكيد احساس وانطباعاتي مشتركه مع الاخرين
الحقيقه انا كان في خيالي تلات اسماء
كتبت الاسبوعين اللي فاتوا علي نفس النمط والشكل ممكن يكون اللي بتابعهم غير اللي انت بتابعيهم بس ما يمنعش ان الحاله موجوده
:
:
:
بيلا
======
لا هما مش شخص واحد دول تلاته يا عزيزتي
وبعدين يا بيلا انتي بتعلقي بعد ما اتناقشنا علي المزنجر
هيهيهي
ما انت عارفه وانا عارف ومتفقين
نورت

Bella يقول...

اهلا بنت القمر

لا ياعزيزتي

التعليق كان قبل مانتكلم اصلا

ههههههههههههههههههههه

بنت القمر يقول...

شريف
----------
YES I DO
:
:
:
حزب الاحلام
----------
عند حق جدا
ومتفقه معاكي جداجدا
تحياتي

بنت القمر يقول...

نسرين
=============
لا مش صففعه بس كل واحد يقف عوج ويتكلم عدل
:
:
:
كليو
=========
وفي المدونات كمان ومسخرة ليه بس
دي تدوينه مستحميه وعلي وضو ومستقبله القبله اهو:))

بنت القمر يقول...

مهندس مصري
===============
يبقي اكيد هو:)
:
:
:
بثينه
============
اعمل ايه في الفضول قتل القطه!!

بنت القمر يقول...

عدي النهار
================
مش كده برضه.... طمنتني:)
:
:
:
جدو اسكندر
============
نورتني.. اشكرك
:
:
:
اسلام عطيه
==================
اشكرك

بنت القمر يقول...

An Egyptian
===============
لامؤاخذه ايه بالضبط اللي مش فاهمه
؟؟
:
:
:
قوس قزح
===========
جايزة احسن تعليق
منورة

Empress appy يقول...

وفتحت النار من تانى
انا هروح اقرر رينا انتى تقصدى مين ههههههههه
لا بجد الكام سطر الاولنين جامدين انتى يا بنتى بتقعدى فى البلكونه عندنا كتير بتجيبى الكلام ده منين بس

Ahmed Kamal يقول...

بصراحة أنا مش عارف إنتي تقصدي مين ، لكن و لا بتفرق معانا الأسامي :) و عجتني حتة وضع مسافة بين القارئ و المدون

لكن أظن إني مدون مش جامد على الإطلاق و الحمد لله ، و مش لاقي حد من اللي باتابعهم كده .. مش كده يا أماني ؟

prince4ever يقول...

نصايح جامده بجد
انا عجبني اوي حته انك مش شرط تقدم للقارئ الفكره و الحل بالمعلقه في بقه..سيبه هو يتعب و يوصلها
انا بكتب قصص قصيره... بيطلع عين اهلي عشان احط كل مره حكمه او عظه من القصه لان فيه ناس بمتحبش الادب للادب او للمتعه..لازم يكون في مغزى و لازم اوضحه عشان لما خليته مستتر محدش بيجيب الفكره اللي بحاول اوصلها..فاضطر اشرح..فالقصه تفقد رونقها الادبي... كان تقدم لحد اكله... وتقوله دي بتكون من كذا وكذا طب ما هو يستطعمها لوحده
بس بجد نصايح جامده احييكي
رامي..قصاصة ورق

بنت القمر يقول...

عباس العبد
==============
اعتقد اني مش جامده ولاحاجه
ولو سالتني هارد ومش ها اسيب عندك اي سؤال نهائيا لانك صديق عزيز ومميز!
اعتقد اني حين كتبت هذا البوست كان في ثلاثه اسامي في تفكيري يستحقون هذا اللقب وحضرتك منهم
اعتقد مجموعه تدوينات الحمل الكاذب تنطبق عليها المواصفات المذكورة بشده من حيث عدم وضوح الفكرة.. والعنجهيه في الرد علي التعليقات
والابتعاد عن تتخذ موقف واضح
والصور اللي ضد الكلام تماما
كانها لبلبه القارئ وتشتيته
و...و..و
شفن وضوح اكتر من كده
وعن رايي لو تسمح لي اعتقد انها تستحق لقب الاسوا كمان في مجمل ما كتبت
نورت يا عزيزي

بنت القمر يقول...

راجي
========
الهرب من اتخاذ موقف محدد ليه اسباب كتير اهمها ارضاء غالبيه الزوار يعني ميصحش تكون متدين قدام ناس ليبراليه
اوعلمانيه ولا علماني قدام ناس متدينه
وهكذا....
لازم تكون بتاع الناس كلها
!!
:تحياتي

بنت القمر يقول...

محمد مفيد
===========
انا بالي طويل شويتيت والريدر عندي مليان جدا
واعتقد ان في ناس بتكتب كويس بس برضه بيكون لها هفوات
اشكرك وخطوة عزيزة

بنت القمر يقول...

بلو ستون
============
طبعا انت هارشه يا لئيمه لاننا متكلمين:)
شوفي بالنسبه للتدوين
اعتقد في الاخر التدوين علاقه بين طرفين
كاتب وقارئ
لان لو كل واحد بيكتب لنفسه ممكن يكتب في اجنده وخلاص
لكن طالما بنكتب في صفحات مفتوحه ومقروءه وبنحط صور ولينكات يبقي اكيد القارئ في دماغنا
يبقي لازم نقون واضحين ومنطقيين وغير متناقضين
يظهر ان الشروط دول بقوا صعبين علي البعض ودي وجهة نظري من التدوينه دي
نورتي

بنت القمر يقول...

محمد الكومي
=============
ها ابص عندك حالا
نورت
:
:
:
جانا
====
حلوة.... دمك شربات
طب والله اتقالت لي مرة
واحده قالت لي مليش علاقه بالبوست بعد نشره
!!!!!!
نورتي

بنت القمر يقول...

الطائر الحزين
========
امين
:
:
انت تسال والكومبيوتر
=================
اتفضلوا بس بلغونا بالموعد

بنت القمر يقول...

ابي
==========
:)
ماشي اسالي رينا
مشكورة يا ابي
:
:
:
:
احمد كمال
========
ممكن تخرج بره دايرة الناس اللي انت بتابعهم... لديره فيها ناس ممكن تختلف معاهم
ودي فايده الريدر هتلاقي اكيد نماذج مختلفه زي اللي بحكي عنهم
بالنسبه ليك
اعتقد ان كتابتك واضحه ومباشره ومليانه بأفعال الامر::D:D
تحياتي

بنت القمر يقول...

رامي... قصاصه ورق
============
اعتقد ان الكتابه الادبيه لها وضع خاص
بعض الغموض بيضفي عليها سحر اضفت مدونتك الي الريدر وان شاء الله اتابع جديدك نورتني

Ahmed Al-Sabbagh يقول...

رائع

هناك من يصف مدوّن بإنه " مدوّن جامد" لمجرد إن تصميم مدونتة جميل .. او لانه يدوّن بمعدل عالى .. أو لانه يضع الكثير من الصور فى مدونتة .. او لانه يستخدم الفاظ بذيئة أو جريئة ويرحب بالبذاءات .. أو لانه متعصب لفكر معين .. أو لإنه مدوّن و"عمل كتاب" فى نفس ذات الوقت .. أو مدون وف نفس الوقت ممثل او شاعر مشهور ... وكلها تفسيرات غارقة فى السطحية .. تفتقد الاحساس العميق بمفهوم التدوين .. وربما يكون الموصوف بهذة الصفة ليس له ذنب فيها .. وأن صفة السطحية ترجع إلى الاشخاص الذين تفرغوا لوصف هذا بالجيد ووصف ذاك بالردئ

وهناك خيط رفيع بين رجل اللاموقف .. وبين والرجل المحايد أو الرجل الغير متعصب .. او الرجل الذى يبنى اراءة بهدوء .. و"الحيادية" تجوز احيانا فى بناء الاراء فهناك اليمينى الحاد وهناك اليسارى الحاد .. وهناك الوسطى الذى يرى لكل شئ مميزاتة وسلبياتة ويرى لكل عملة وجهان يهاجم بلطف ويمدح بلطف

مثلا : موضوع نهى رشدى .. هناك ما أيدها وتضامن معها واقحم أشياء لا علاقة لها بالقضية مثل ان الحجاب والمتدين هم سبب البلاوى والمصيب.. ثم انقلب عليها بمجرد ظهور اشاعة مغرضة بانها اسرائيلية وانها ملفقة .. وهناك من اسرع باطلاق اقوال هلامية فى الهواء بأننا مجتمع ذكورى .. وهناك من افتى بانها تستحق هذا التحرش لانها "متبرجة " وهكذا
وعندما كانت وجة نظرى بتجريم التحرش وبطولة نهى رشدى الواضحة من موقفها .. ثم ان المتحرش نفسة ضحية غير مباشرة لمجتمع مشوه اقتصادياً واجتماعياً واخلاقياً .. افتى بعض اصدقائى بأننى مدون بلا موقف وارضى جميع الاطراف

"ماشفتش واحد عنده ايميل ليه احباء ولا مريدين "
عندما قرأت هذة الجملة شعرت أننى كائن فضائى ذو حراشيف وخوذة فى رأسى و"بنوّر فى الضلمة" ..اتحدث مع كائن أرضى وكلانا يتحدث لغة مختلفة .. فهى جملة صحيحة تماماً ..لكنها فى غير موضعها..ما وجه المقارنة بين واحد جالة ورد عشان عنده ايميل .. وبين واحد عنده مدونة شارك بموضوع فى كتاب .. وعملوا حفل توقيع عام.. وعزم شوية من صحابة او جيرانة الغير مدونين .. وجاءوا الى حفل التوقيع وجايبين معاهم بوكية ورد بجوز جنيهات ... يرميه ؟؟ ويقولهم ما يصحش مدون يجيلوا ورد ؟؟ ولا يواريه وراء اى حائط خجلاً ؟؟.. بالمناسبة - عشان واضح ان فى اصدقاء اعزاء شاغلين دماغهم اوى بموضوع الورد ده وبيضيعوا وقت كبير فيه - ناس كتير أعرفهم فى مناسبات مماثلة جالهم ورد .. أصدقاء افتتحوا موقع كبير على الانترنت وعملوا حفلة وجه لبعضهم ورد .. صديق مدوّن نشر كتاب وفى حفل التوقيع جالة ورد .. صديق اخر فى لقاء مدونين جالة ورد عشان عيد ميلادة
والموضوع ليس كما توهم البعض ووضع خيالات كبرى تنامت إلى أن أصبحت تدوينات كاملة

أتفق معكى تماما فى الإزدواجية التى تبدو واضحة فى كثير من الاحيان فى بعض من ما اعشق كتاباتهم ومدوناتهم .. فمثلا تجدى بعض الاشخاص يدافعون أحياناً بقوة عن حقوق الانسان وعن حرية الراى والكلمة ويهاجمون أى قيود تقيد من حركة الاقلام .. ثم بعد برهة قصيرة تجدينهم قد تفرغوا لإنتقاد شخص لإنه كتب بالإسلوب الفولانى .. او قال الجملة الفولانية .. أو وضع صورة لم يُـفهم بسهولة العلاقة المباشرة بينها وبين موضوع البوست .. أولانه أسهب فى الكتابة عن موضوع معين ، وربما مستقبلا ينتقدونة لانه وضع همزة فوق السطر بدون مبرر ..أو كتب بفونت لونة أحمر مع إن الموضوع "كان يمشى اجمل بفونت ازرق" ..هكذا

أسف جداً لللإطالة لكن الموضوع لذيذ .. واسلوبك دائما جميل وراقى
تحياتى

بنت القمر يقول...

صباغ لان تعليقك طويل اوعدك برد مفصل بكرة ان شاء الله

هشام علاء يقول...

:)

عزيزتى بنت القمر

التدوينة طبعا مالهاش حل و بترصد ظاهرة متمثلة فى الكثير من المدونين و رصدها اخرين

و المدون الذى يبحث دائما عن ان يكون مدون جامد باتباعه كل هذه الخطوات و النصائح التى طرحتيها فى هذا البوست يجعلنا نسال بمنتهى الحيرة

هو بيعمل كده ليه اساسا؟

المدون الذى يسعى انه يبقى جامد او مشهور باتباعه كل الخلطات و التوابل و الحركات و التناقضات يفرغ التدوين من غرضه و هدفه اساسا و يصبح يدون للتدوين ..يدون للشهرة و المصلحة الشخصية بصرف النظر عن الموضوعات التى يتناولها و قناعته الشخصية بها فهى كلها بالنسبة له مجرد و سائل و درجات سلم يخطو عليها لكى يصل لهدفه و لهذا لا نستغرب ان يتخذ هذا المدون موقف و يتناقض معه ربما فى نفس التدوينة و ان يسير مع الرياح دائما و لا يسبح عكس التيار طالما ستوصله الرياح الى هدفه

التدوين هدفه الاساسى من وجة نظرى هو التعبير بالكتابة عن الراى و التواصل مع الاخرين و ليس التدوين من اجل التدوين و خلاص و بالتالى لا يوجد معنى لكلمة المدون الجامد الا من ينجح ان يحقق اكبر قدر من التعبير عن نفسه و ارائه بصدق من خلال الكتابة و تحقيق اكبر قدر من التواصل الايجابى مع الاخرين بنفس الطريقة

التدوين و سيلة..و ليس غاية فى حد ذاته


تحياتى
هش

عباس العبد يقول...

" عن رايي لو تسمح لي اعتقد انها تستحق لقب الاسوا كمان في مجمل ما كتبت "
--
بدل ده رأى حضرتك فىّ , فده شيىء يشرفنى أن مدونة متواضعة زى حضرتك و بتطلع فى الجرايد , يكون ليها رأى أصلاً فى مدون زيى , ده معناه انك على الأقل عديتى عندى , و ده يشرف و ينور المدونة الأسوأ .
-
شكراً مرة اخرى

بنت القمر يقول...

احمد الصباغ
============
وهناك خيط رفيع بين رجل اللاموقف .. وبين والرجل المحايد أو الرجل الغير متعصب .. او الرجل الذى يبنى اراءة بهدوء .. و"الحيادية" تجوز احيانا فى بناء الاراء فهناك اليمينى الحاد وهناك اليسارى الحاد .. وهناك الوسطى الذى يرى لكل شئ مميزاتة وسلبياتة ويرى لكل عملة وجهان يهاجم بلطف ويمدح بلطف
---------------------
في فرق بين انك تمدح بلطف واو تذم بلطف او انك علي الحياد وملكش موقف
لانك لما بتدون لازم بتكون واهخد موقف ما من الموضوع اللي بتكتب فيه
لاننا مش وكاله انباء بنكتب خبر
المفروض انك بتتاثر بشكل معين بموضوع وبتعبر عنه الللطف هنا ومراعاه الخواطر مش مقبول
يعني ممكن اكون مع الا خوان او ضد الا خوان
ده موقف ما ينفعش اكون الاتنين في نفس الوقت عشان الاخوان و اعداء الا خوان ما يزعلوش
ده قصدي
نقطه تانيه بالنسبه للورد والبوكيهات اتفق معاك
تحياتي

بنت القمر يقول...

هشام
=====
طبعا التدوين تعبير عن موقف او راي
صاحب الموقف المتضارب او المتناقض بيعكس اما جبن في اعلان موقف محدد او انه ملوش موقف محدد اصلا ودا ناتج عن ازدواج في الشخصيه اصلا
!!
تحياتي

بنت القمر يقول...

عباس العبد
============
طبعا بعدي عندك
وطبعا متابعاك زي غيرك علي الريدر مش باخد تاكسي واجي يعني:p
انا مقلتش انت الاسوأ
انا حددت تدوينات محدددة وقلت انها الاسوأ لانك لو الا سواء اكيد مش بتابع اسوأ
ليك كتابات ممتازة وبستمتع بيها جداا
لكن لما تكتب حاجه وحشه ها اقولك ويا بخت من بكاني وبكي عليا
:))
مش ها اسقف في حاجه وحشه واقول روعه ممتاز
انت بتكتب حلو جدا
بس التدوينات دي كانت متناقضه وغير واضحه وعداونيه كمان\
بس
نو هارد فيلينج يعني
نورت

عماد يقول...

أن تكون مدون جامد جدا بان تكون انثى
لا يهم ما تكتب المهم أن تكون أنثى وسط المسلمين
هذا ما كتبته فى هذا الموضوع

التحرش يصدر فقط من المسلمين
لماذا
ما هى الأسباب و ما هو العلاج
تعرف على رأى الام تريزا لو سألنها فى هذا الموضوع و قارن مع الحل الذى يطرحه الاخوان المسلمين

http://somethingforthesoul.blogspot.com/2008/11/blog-post_26.html

عماد يقول...

و أيضا لو ممكن أعمل الإعلان دا كمان لو تسمحى

هل تعرف إنه يمكنك ان تحتفظ بديانتك و أن تكون يونتاريان فى نفس الوقت ؟

هل تعرف إنه من الممكن أن تكون مسلم و يونتاريان فى نفس الوقت ؟

ثلاثه من رؤساء امريكا و ثلاثه من الأباء المؤسسين للولايات المتحده الامريكيه و نيوتن و داروين و جراهام بل و مكتشف مذنب هالى و لينوس بولج الحائز على جائزة نوبل مرتين و صاحب الكرسى الى جلس عليه احمد زويل
كل هؤلاء كانوا يونتاريان

http://somethingforthesoul.blogspot.com/2008/10/blog-post.html

هل تريد أن تصبح مثلهم على عقيدة العلماء و القاده الذين خدموا البشريه

محمد حويحي يقول...

انت عاوز تقول ايه.؟؟ :D
جامد الموضوع

غير معرف يقول...

بصراحة يعني، معنديش مانع ألعب اللعبة دي خصوصاً إني اكتشفت من حوالي السنة إن معظم اللي بيدخلوا عندي ربات بيوت، بالتالي الموضوع مخليني مستنفر و منتشي للغاية :)

غير معرف يقول...

:)