مدخل مهمكل ما اروح سينما او ريستوران افضل افرك وادور علي مكان مناسب اقعد فيه افضل منظر وافضل كرسي وافضل زاويه رؤيه وبعيد عن التكييف وسماعات الصوت وهكذا حتي اجد ما يرضيني ولا اقبل اي حاجه ابدا!!!ا
كل ما اقعد مع امي ربنا يديها العمر والصحه توصيني كعاده الناس الكبار لما اموت ادفنوني مع اهلي ووزعوا دهبي وبلاش شادر واعملوا كذا وسووا هكذا
وتطرق الحوار مره الي نفس الوصايا اياها وانها مصره تدفن مع اهلها في الشرقيه وكالعاده قلبت معايا علي تنكيت
بس يا ماما المشوار طويل من اسكندريه للشرقيه ولكنها اصرت وهنا نط الخاطر المخيف في تلافيف مخي وزخانيق دماغي يوووة امال انا كمان ها ادفن فين؟
انا:ماما هو انا ها ادفن فين؟؟
ماما: معايا طبعا
انا ومعاكي طبعا ليه انا ها ادفن مع جوزي
ماما :طب شوفي مين فينا ها يبقا يزورك ويترحم عليكي براحتك يا ندله
الحقيقه خفت بس بيني وبين امي ربنا يخليها خلافات عقائديه وفكريه رهيبه وصراع اجيال وحاجات كدة من اول الافكار الرئيسيه والمبادئ الي اختلافنا علي طريقه طشه الملوخيه وفكره الدفن معاها مش مريحه....
بعد ايام
حوار مع جوزي هو انا ها ادفن فين يا حبي
هو: براحتك
انا: عاوزة اكون معاك بنبره حب وصدق وفي لحظه مؤثره طحن الطحن
عشان اكون معاك واونسك
هو: مفيش مانع تنوري الترب هاهاها ومن غير بعد الشر ولا حاجه
ولكن بلد زوجي في شمال مصر بعيد عن اسكندريه مقابر اسرته خارج البلد يربطها بها طريق مخيف وموحش لا يتواجد فيه امن وينتشر به اللصوص والشمامين مما يمنع الاهل من زياره موتاهم.يعني ها اروح اتنفي هناك من غير زياره وكمان كفايه عليه خدمتي في الدنيا كمان ها اكملها اخره كمان وابنتاي مش ها يقدروا يزوروني
اما مقابر والدي في القاهرة وكان بينه وبين اخوته ما صنع الحداد ومحدش يسالني يعني ايه ما صنع الحداد ؟؟لاني معرفش ومش طالبه ادفن مع ناس مش طايقين بعض انا عاوزة جو رايق
اخيرا هداني التفكير الي شراء تربه في اسكندريه جنب بناتي عشان يزوروني وقلت لوالدتي قالت لي اسعار الترب ما بين 5 الي20 الف وبعدين يزوروكي ايه انتي ها تقلبيها كازينوما تموتي وانتي ساكته
وقعدت احسبها وبما اني في التلاتينات يعني في المتوسط والاعمار بيد الله ممكن اموت بعد تلاتين سنه وساعتها بناتي ها يكونوا لسه تلاتينات وربنا يديهم العمر ويحفظهم علي ما يحصلوني ها اقعد بتاع عشرين تلا تين سنه لوحدي
ان ان ان لا ام ولا اب ولا زوج دا انا اموت فيها تاني!!!ا
اعمل ايه؟ اعمل ايه؟
الخلاصه
اكتشفت اني بستعبط وبحمرق ومش عاوزة اموت اصلا
وان فكره الموت والدفن قتلتني رعبا بالحياة
وان كل دا تلاكيك
ان ما فعله الفراعنه من جلب الحبوب والعطور مع المتوفي لا يمنعه من افتقاد الونس ولا يغنيه ابد في وحدته
وحجه البليد البحث عن تربه
متعكم الله بالصحه وطول العمر
تحياتي
البوست دا اهداء الي صديقتي حلم ملهمه البوست
هناك 10 تعليقات:
السلام عليكم
كل عام وانتم بخير وإعاد الله عليكم الشهر الكريم بالخير واليمن والبركات
وجعل ايامكم كلها اعياد وافراح اللهم أمين
تحياتي
سلام عليكم
ربنا يبارك فى عمرك يارب ويسعدك ويجعل ايامك كلها اعياد
اما بالنسبة لموضوع التربة فانا كتير بسال بابا انا هدفن فين بيقولى معايا ولما اقوله انا هدفن مع ماما يقولى لا لان ماما هتدفن مع اهلها ..كل واحدة مع اهلها الا لو انتى وصيتى بغير كده بس عشان المشاكل خليها مع اهلك وخلاص
وانا مبحبش المشاكل هههههههه
كل سنة وانتى طيبة يا قمر
بصى ياستى
أنا وصيت بابا الله يرحمه
أنى لما أموت يبقا يحطنى على جنب وخلاص
محيرش نفسه معايا وكمان بابا الله يرحمه
بيزهق بسرعه عشان كده قلتله
وصيتى ليك يابا الله يرحمك أنك تركنى على جنب لما أموت عشان محدش يدوس عليا
المشكله الواحد لو مات فى حادثه ساعتها يتصرف أزاى
يعنى أنا لو مت فى حادثة سياره
سياره بيجو مثلآ
الناس طيبين ممكن يحطونى على جنب ويغطونى بجرايد بس هنا المشكله
أنهم يغطونى بجرايد الحكومه وأنا نفسى أتغطى بورق ملون أو حتى جرايد معارضه
وكمان يومها مفترض أكون لابسه بنطلون مش جيب طبعآ فاهمه ليه
لكن فى حالة الموت فى حادث قطار
أتفرمت يعنى
أدفن فين وأزاى
وبما أنك فتحتى الموضوع الشاعرى ده
ياريت أنتى أو أى واحد من زوار مدونتك
يقولى أعمل أيه
وحدوووووووووووووه
كل من عليها فان
============
بالمناسبه الظريفه دى أقدر أقولك
عيد سعيد
و على ايه بقى عيد سعيد الى فى الاخر دى
قولى شكر الله سعيكم
منجيلكوش فى حاجة وحشة
كده يعنى
........
على العموم
كل سنة و انت طيبة
...
انا عايز الكحك قبل ما يحصلك حاجة
اى مصلحة قبل ما الورثة يخلصوا على كل حاجة
مهند
وعليكم السلام
عيد مبارك عليك وعلي الاسره
اشكرك
البنت الشلبيه
وليه يا بنتي ما تدفني في الحته اللي انتى عاوزاها ربنا يديكي العمر والصحه مفيش قانون بيقول ندفن مع ابهاتنا
طب افرض واحد مش طايق ابوة مثلا
عادي هو احنا لازم نقرف في حياتنا دنيا واخره
عيد سعيد عليكي يا قمر
فكرتيني بجوزي لما يقولي موتي انتى بس وما تقلقيش ها نعملك كل حاجه تمام واخر شياكه
هههههههههههههه
اقوم اقوله انا مش عاوزة اتعبك يا حبي انا اللي ها استني موتك عشان اعملك الواجب احلي عزا واحلي صوان خخخخخخخ
وبالنسبه بقا الي حكايه الورق طب تصدقي دي مجتش ابدا في اخر شطحات خيالي
لو كدا افضل انا المناديل المعطره عشان النفس طبعا مش بتاعه هاندي المعفنه لا عاوزة من المستورده بتاعه البيبيهات
اما حكايه ان الواحد يتفرم او يموت محروق فدي ها تتدي الواحد فرصه ان جتته تفضل في الهوا والتراوة حبه قبل كتمه نفس التراب
هاهاها
لاحظي اني بكتب الكلام دا الساعه 8 الصبح وبيني هنجت وخرفت
بس بجد لو جرالي حاجه شهروزة ها تعرف بدري وصيتك الفاتحه عليا والمدونه تبقي تشقري عليها هههههههه
وتفتحيها وتهويها وتشمسي الفرش انتي وشهروزة
واللي يجي يزورني تقدموله الواجب
اربعين ليله وليله وتقولوا كانت بت طيبه اتخطفت بدري بدري
وطبعا من غير صويط ابقوا شغلولي فيروز لا حليم
عيد سعيد يا قلبي شفتي اخر شاعريه اهو
امووووة
عباس العبد
وبما ان بينا برضه خلافات عقائديه وفكريه رهيبه طحن برضه بس ما يمنعش اقولك كل سنه وانت والاسره بالصحه والسلامه اما عن الكحك قبل ما اموت
ما تقلقش ان شاء الله يومك قبل يومي
هههههههههههههه
علي الاقل انتو بتتحطوا في صندوق خشب مش زينا
بنتدلق في التراب تحياتي
وعيد سعيد
ربنا يديكي الصحه وطوله العمر يارب
وتكون حياتك مليانه بحب الله لان هو ده اللي حينفع
لا تقوليلي مين يزورني ولا مين يجيلي
وبعدين ليه 25000
روحي ترب الناصريه الحكومه بتبيع مدفنين جمال يردو الروح ب 3000
ههههههههههههههههههههه
حرام عليكي يا شيخه انتي داخله على ايام مفترجه
ابقاكي الله لزوجك واولادك
ما جتيش شيلتي البتاع اللي عندي ليه
متقلي البلوج
http://eskndria.blogspot.com/2007/10/blog-post_10.html
كل عام وانتي بخير
تحياتي
هههههههههه
اة يااانى
جيت افكر انا كمان حاندفن فين
لقيتنى باضحك على كلامك
نسيت الدفنة
لكن انا لو عن نفسى
احب اندفن مع المان بتاعى يا بنتى
اهو يونسنى وياخد بحسى فى الآخرة
بابا وماما بقا طريقهم اخضر مع بعض
إرسال تعليق