تحديثهل ما يعتقده الانسان حقا هو شأن خاص بينه وبين الله؟؟
الاتؤثر علاقه الانسان بربه ومعتقده علي علاقته بالاخرين وتؤثر لامحاله علي نظرتهم له وتعاملهم معه؟
هل ينظر الغرب المتقدم المسيحي الينا كبشر وافراد ام كمسلمين وعرب؟؟
الا يجب ان ندرس ونفهم ونصحح ما نعتقده كمسلمين ومسيحين كل منا عن الاخر؟
في مصر تحديدا هل يفهم المسلم حقيقه ما يعتقده المسيحي؟ام تغلف افكاره كثير من عدم الفهم والشك؟
الايؤثرعدم فهمنا لموضوع مثل ماهيه طبيعه المسيح واخر مثل قصه الصلب علي علاقتنا بابناء الوطن المسيحين؟ ام وقفنا عند حاجز عدم الفهم والتغاضي التجاهل!!!ا
اليس ما نعتقده عن قدسيه وتبجيل المسيح وامه من خلال نصوص القران مع الرفض التام لفكره الوهيته وبنوته لله من خلال نصوص اخري علي علاقتنا بالاخر المسيحي؟ اليس ما يعتقده المسلم عن بشريه المسيح ونبوته لا يعدو من وجهه النظر المسيحي عن بدعه وهرطقه كالاريوسيه مثلا؟؟
هل المسيحي مطالب بازاله اللبس الي الاخر المسلم؟وهل ان فعل سوف يقبل المسلم ويقر ما يعتقده ام سنبقي عند حدود الحوار فقط؟
الا يكون الحوار خطوه مهمه للتقارب بين الطرفين؟
هل المسلم مطالب بشرح ما بقره ويعتقده الي المسيحي من ايمان؟ وهل المسلم مطالب بتفنيد ما يعتقد بانه افتراءات علي الاسلام كانتشاره بحد السيف الي الاخر المسيحي؟
هل هو المسلم مطالب بتفنيد الافكار الخاطئه حول الرسول الي شريكه في الوطن المسيحي قبل ان يتوجه بذلك الي الغرب؟الا يزيدذلك من التقارب بينهما؟؟
هل يقبل المسيحي مراجعه افكاره حول الاسلام بحياديه وامانه؟
اليس حوار الاديان اولي داخل الوطن الواحد اولي من الحوار خارجه؟
الا تؤثر فكره حوار المسلم والمسيحي المصريين علي فكره التاخي والمشاركه بينهما في هذا الوطن اليس الحوار افضل من علاقه يسودها التربص والشك والرفض احيانا؟؟
الا تجتمع الاديان علي الحث علي فضائل الاخلاق واجتناب الخطايا والمحرمات واحترام قيمه الانسانيه وتشجيع العلم والعمل والسعي في الارض اكتر من ما تختلف ؟
حتي لا يصبح الوطن كعكه نتصارع عليها ونسعي الي تقسيم الامتيازات فيه بدلا من التكاتف لنهضته هل هناك طريق افضل من الحوار الهادئ بين المثقفين والرموز من الجانبين؟
هناك 30 تعليقًا:
أعتقد فيما يرى المعتقد
أن الكل تعود على ارتداء قناع التسامح والمحبة فقط
ممكن كل جانب يتظاهر بدراسة الآخر بحيادية وموضوعية
لكن تفتكرى انهم حيوصلوا لنقطة تنقية العقول والقلوب بينهم وبين بعض؟؟
أنا مأعتقدش
يمكن فى الزمن دة
لسة محتاجين جيل جديد من المتفتحين عقليا على الاخرين
من الجانبين
وجيل يتربى بعيدا تماماااااا عن حظائر والديه وأقرانه المتشددين متحجرى العقول والعقيدة
يطلع حلو كدة ومنفتح على الاخر
وموقن ان الله ليس محصورا بدين بذاته
وانما الله موجود فى كينونة الانسان
ولكن تختلف طريقة عبادة كل واحد ونظرته له
وابقى قابلينى
أدينا بنحاول
وربنا يوفق
تحياتى يا بنوتة
البوست رائع والاسئله فى الصميم
فى راى الشخصى انى دى مش مشكله الغرب بس للاسف داخل مصر كل واحد بيتعامل مع صاحب الديانه الاخرى وهو يحمل خنجرا وراء ظهره يستعد به لذبح الاخر
والحكومه المصريه عاجبه ده لانى التنازع والتصارع الدينى بين المسلمين والمسيحين اسهل طريه لتمرير قوانين مشبوه زى الارهاب والطؤارى
للاسف المنظومه كلها غلط مش بس علاقه المسلم بالمسيحى
أنا مع ان الانسان المسلم الى قلبه متعلق بربه حقا بيكون فخور بهذه العلاقة و تعاليم الدين المفروض انها تتنقل من شخص لاخر لتستمر عبر الحياة
لكن انا مش مع الى بيتكلموا فى الدين من باب المنظرة و الى بيسالوا غيرهم اسالة فى الدين بس عشان يحرجوهم و يحسسوهم انهم مقصرين دينيا كأنهم هما الى حيحسبوهم
Hello..those Questions should only B presented in the level at scientists Normal believeres from each side have Certain Idias and Ideals and have fears against the other...
so the question is: can we accept each other with Our Differences ..on the base that we R equal creatures and each have choosen his way....
we can rise the value of humanity....if that came true ..then we can Discuss all issues...freely..
and another Point..
2 discuss those Issues we need 2 B in a free Society,,,only free Societies achieve free mindes...but we R 4 sorrow.in the Era Of Darkness..
thx , hoping 2 Communicate.
landofy@yahoo.com
1- ان كان الأمر يتعلق بالعقيدة الديانه فهذا بينه وبين الله
اما ان كانت افكار هدامة ويروج لها مثلا يتأثر بها الناس لا تخصة بمفردة
2- المفروض
3- هم ينظروا بمرآة اعلامهم ونحن نساعدهم بتصرفاتنا وعلاقتنا نحن المسلمين ببعضنا
4- ما فرطنا فى الكتاب من شىء
في مصر تحديدا هل يفهم المسلم حقيقه ما يعتقده المسيحي؟ام تغلف افكاره كثير من عدم الفهم والشك؟
5- ليس الجميع يفهم
ما مغزى سؤالك يوجد كلام كثير ؟؟
6- ما فرطنا فى الكتاب من شىء فى معاملة اهل الذمة من اهل الكتاب
اعتقد انه ليس عندنا عداء طائفى بدليل التعايش كل هذه السنون
اليس ما نعتقده عن قدسيه وتبجيل المسيح وامه من خلال نصوص القران مع الرفض التام لفكره الوهيته وبنوته لله من خلال نصوص اخري علي علاقتنا بالاخر المسيحي؟ اليس ما يعتقده المسلم عن بشريه المسيح ونبوته لا يعدو من وجهه النظر المسيحي عن بدعه وهرطقه كالاريوسيه مثلا؟
7- الأمر له علاقة أكثر بتقديس الرهبان والقساوسة نحن نقول ان سيدنا محمد بشر رسول كما نقول أن سيدنا عيسى بشر رسول
فكرة التثليث و الألوهية وما خلفة التحريف القديم هو سبب المشاكل
8- المفترض الا يوجد لبس لان الدين عند الله الاسلام محور الديانات هو التوحيد
9- المهم الاخلاص فى المتحاورين و الرجوع الى الحق ايا كان
10- هذه مهمة اهل العلم وليس العامة لان الامر يحتاج الى دراية وفهم ولا يتحدث فى الدين و فتواه الا من هم اهل له - المطلوب منا ان يظهر الدين فى سلوكنا
11- الأهم ان نصلح من أنفسنا ونقويها ونكون ذو شأن ولن يجرؤ أحد بعدها أن يتكلم بأى كلمة
انا كفيناك المستهزئين
12- هذه يعتمد على الاستعداد و تنقية النفس من أى مؤثرات وما المانع
13- بلى حوار الأديان مهم لكن ليس على سبيل التناظر الكل يعرض وجهة النظر بهدوء
الا تؤثر فكره حوار المسلم والمسيحي المصريين علي فكره التاخي والمشاركه بينهما في هذا الوطن اليس الحوار افضل من علاقه يسودها التربص والشك والرفض احيانا؟
14- لا والا كنا رأينا صراع طائفى من زمن لكن هناك مناطق محرمة لا يقربها كلاهما
15- نعم
16- المهم الاخلاص وليس السعى وراء الصيت والسمعه
بارك الله فيك
يمكن اللي بتتكلمى عنه هو التفاهم على طريقة حياة تحفظ لكلٍ حقه. لكن ده ناتج عن غياب قانون ينظم علاقات الناس وده حاصل فى كل شىء فى حياتنا وليس بين المسلمين والمسحيين فقط. حقيقى أنا لاأعتقد أن الأمر فى أغلبه له أسباب دينية لأنه هناك إحتقان فى كل شىء ومثال لذلك ما قرأته من يومين فى "المصريون" من أن
هيئة قضايا الدولة تولت الدفاع في 750 ألف دعوى ضد الوزراء خلال العام الحالي
أما عن الحوار الدينى فهو فى تصورى بيكون للوصول للحقيقة وبالتالى لازم يكون بين ناس على علم كامل بما يتحاورون فيه وطبعاً لايمكن إشتراط حسن النية لكن ممكن إشتراط أداب للحوار وأيضاً لايجب إستبعاد أى شىء من هذا الحوار. يعنى أنا أذكر مثلاً إنى قرأت من فترة إن أمور العقيدة لايتم التباحث فيها فيما كان يعقد من لقاءات بين بعض الشيوخ المسلمين والفاتيكان
السلام عليكم
طبعا عجبني الاسلوب الهادي والجميل في عرض الفكرة او الموضوع
وردود الاعضاء وخاصة الطائر الحزين
اما بخصوص ردي بقي
هقولك ان علاقتنا بالنصاري وتعاملتنا معاهم محدودة بين آيتين كريمتين من كتاب الله عز وجل
الاولي هي
لا تَجِدُ قَوْمًا يُؤْمِنُونَ بِاللَّهِ وَالْيَوْمِ الآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الإِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلا إِنَّ حِزْبَ اللَّهِ هُمُ الْمُفْلِحُونَ
الاية واضحة وصريحة ومش محتاجة اي جدل او نقاش
طيب الاية التانية هي ايه؟؟
يقول الله عز وجل فيها
لا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ
ازاي بقي اعرف اتحرك في علاقتي مع النصاري في حدود اوامر الله عز وكل واوامر نبيه صلي الله عليه وسلم
اما بقي موضوع الاخاء والواحدة الوطنية وأبناء الوطن الواحد دا مش موضوعنا ..لأنه بكش وأونطه زي ما بيقولوا
جزاكي الله خيرا علي الموضوع والمناقشة الجميلة
تحياتي
ليا بس تعقيب بسيط علي اول رد
يعني ايه متحجري العقيدة ويعني ايه ان الله ليس محصورا بدين بذاته
إن الدين عند الله الاسلام
مش انا اللي بقول
دا ربنا
موضوع أن يتعرف كل طرف على معتقدات غيره أو أنهم يتقابلوا فى نقطه توافق
ده من المستحيلات وكمان هدر للوقت
الأفضل أننا نرجع زى زمان
بلد فيها طائفتين ومتعايشين مع بعض
وكل طائفه تحاول أنها تتعرف على دينها
بدل ماتشغل دماغها بغيرها
أحترام أنسانية البشر ومعتقداتهم الفكريه والدينيه أهم بكتير من
موضوع حوار الأديان
مش مهم الغرب يعرف عن دينا بقدر ماهو مهم أنه يتعرف على حضارتنا
وأنسانيتنا وحاضرنا ودورنا أيه فى التقدم البشرى
لكن نناقش الغير فى الدين
ده يبقا ترف مابعده ترف
ده أحنا فشلنا كمسلمين نتناقش مع بعض
والدليل البوست بتاع شهروزه
الناس تفرغت للسباب بدل النقاش
أحنا لسه بدرى علينا لما نعرف نتناقش أو نتحاور مع بعض فما بالك مع الغير
أحنا عنصريين بطبيعتنا وأنا أول الناس
وبعترف بده
نحن شعوب متخلفه
والله أعلم
تحياتشى
شهروزتي
تنقيه العقول لا لسه شويتين انا بس بقصد مجرد الحوار الداخلي بينا بدل الزعيق برا ومن الطرفين
ما نسلمش علي بعض والقلب مش رايق ما نعيدش علي بعض اداء واجب
المطلوب نصحح فكرتنا عند بعض بدل ما نصلحها للاخر البعيد
اما الدين فالله يحكم بيننا جميعا
تحيلاتي
رئيس جمهوريه نفسي
حضرتك قلت وفهمن بالظبط اللي عاوزة اقوله
تحياتي
عاليا حليم
دايما بتشرفيني الناس اللي بتحاسب بعضها وكل واحد عنده يقين هلامي انه الصح ووحتي بين ابناء العقيده الواحده دول مصيبه
لا احد يملك الحقيقه المطلقه ولا احد يملك حق ازدراء الاخر بس ارجع واقول انا اقصد نحاول نفهم بعض ونقبل بعض
تحياتي يا لولو
a Dreamer with feet on the Floor
__________________________
معلش ها ارد بالعربي طالما حضرتك فهمتني بالعربي عشان اعبر عن افكاري افضل
انا مش شايفه ان النقاش وتقبل الاخر محصور علي ليفل العلماء
ليه الناس البسيطه لازم تحاول تتقبل بعض وتفهم بعض ممكن لو العلماء ساعدوا العامه والناس البسيطه الناس تقدر تعمل كدا بسهوله
وبعدين حكايه المجتمع الحر دي زى البيضه ولا الفرخه نحرر المجتمع الاول ولا الافراد مفبش مجتمع حر من غير افراد احرار ولا احرار في مجتمع سجين المهم نبدا المجتمع مش شئ ملموس نقدر ناخده نعلمه ونوجهه لكن نبدا بنفسنا عشان نوصل لشئ تحياتي تعليق حضرتك دسم ومتميز
الطائر الحزين
علاقتنا كمسلمين باخوتنا المسيحيين يغلفها هواجس وشكوك ورفض احيانا مستتر
انت بتقل تثليث هما بيقولوا لا دا مش تثليث دا اختلاف طبيعه واحلال واقانيم وكلام كتير احنا بنقول الرسول رجل دين ودوله وقائد عظيم وهما ممكن يقولوا كلام كتيروالاسلام انتشر بالسيف ودي ارضنا واحنا صحاب البلد
الفكره هي مش الحوار افضل اللي مش علي طريقه التنظير ولا التبشير ولا الهدف منه تخطيئ الاخر ولكن ايجاد ارضيه فهم ونقاط اشتراك واحترام وموده
عشان البلد دي تتقدم عشان نعيش في سلام
تحياتي
عدي النهار
فعلا في حاله عامه من الاحتقان سياسيا ودينيا وحتي انسانيا
اة والله
الناس مش طايقه بعض بجد ها تطيق الوزراء ازاي؟؟
الناس مش طايقه اللي من دينها ها يطيقوا اللي من دين تاني ازاي؟؟
الاخ مش طايق اخوة ها يطيق جاره ازاي وازاي نفضل كدا؟؟
مينفعش نعمل حوار عشان نحل مشاكلنا ولا ها يفضل تحت الرماد نار دايما
تحياتي
الراقص مع الذئاب
اهلا بمرورك فعلا الاسلام حدد كتير من القواعد اللي بتحدد علاقتك بالاخر بس القواعد دي كان اسمها دار الحري ودار الاسلام وبالنسبه لشريكك في الوطن اللي حضرتك جبت ايه ممكن الشريك يندمج تحتها تقول الايه لا ينهاكم الله
صح
طيب الله لا ينهانا طب نتعامل ازاي مش مهم ندور علي ارضيه قبول واحترام طالما احنا في مركب واحد الا ان يشاء الله احنا عاملين زى اللي في مسرحيه سكه السلامه لما تاهوا في الصحراء يا يتفاهموا ويحاولوا يقبلوا بعض بامانه وصدق ويحترموا بعض يا يكملوا توهان ويضيعوا جميعا
هاي اسئوس
بصي يا حبي ماهو حوار الاديان الداخلي دا مش هدفه الثقافه العامه ولا تحصيل معلومات كاننا في معهد احصاء
لا الهدف اننا ندور علي ارضيه احترام للانسان واحترام لمعتقده يعني نركز علي نقط الاتفاق وتجنب نقط الخلاف وازاله سوء الفهم واللبس
وبعدين ايه حكايه متخلفين وعنصريين دي يا اس
وهو احنا مين؟؟
وبعدين ليه؟
يعني العنصريه دي مثلا مرض عضال زي المرض البطال مش ها نخف منها دا مستحيل مثلا
طب ما نحاول بس نحاول نبدا بنفسنا واهلنا وبيوتنا
اما عن شهروزة انا ناقشتها علي الماسنجر في بوستها الاخير واكيد هي فاهمه ومتوقعه رد الفعل دا تحياتي يا اسئوس
بصي يا قمر يا بنت القمر
الناس واضح انها مش مستعدة للحوار المعلن دلوقت لان مشاعرها ملتهبة
لما انا ومينا ابتدينا الحوار ده وفتحنا المجال للتعليقات
المسألة بهوقت مننا ولقينا الموضوع ح يخش في عك وشكلنا كان اننا بنزود الاحتقان مع ان هدفنا انا ومينا اننا نعالجه
مش عارفة ايه الحل
متهيالي البتش بلو ستون عندها حل
ما تقولي يا بلو
:))
هاي جبهه التهييس
نورت المكان اهلا بيكي
بتقولي الموضوع قلب عك طيب الحل ايه؟؟سيبك من بلو ستون اللي علي علي وشغاله انجلش دلوقت
وبعدين هما بيحملونا سبب المشاكل باعتبارنا الاغلبيه والطرف الاكتر عدوانيه
عارفه الفكره ايه
ان الناس مبقتش طايقه بعض لا المسلمين والمسيحيين ولا المسلمين مع بعض ولا حتي الاخ واخوة
في حاله احتقان انساني غريبه
وبعدين يقولو نعمل حمله لتصحيح صورتنا عند الغرب
غرب مين يا عم مش لما نبقي يد واحده ونفهم بعض الاول ونحاول نحترم بعض
نبقا نكلم الغرب
تصدقي اول مره اعرف ولو اني بتابعك من زمان ان لكي مدونه تانيه بتاعه الحوار اوعدك اني ها اتابعها
تحياتي لك
وللولد
واشكر مرورك
العزيزة بنت القمر
أنا جيت أرد الزياره
لقيت أسئله تستحق الوقوف عندها
حرية العقيده مكفوله لكل البشر بلا إستثناء
فليس لطرف الحق في التشكيك في عقيدة الأخر
يجب أن أقبل الاخر كما هو ويقبلني كما أنا
ولو حد عايز يعمل غير كده
يبقا بيحارب طواحين الهوا زي ما بيقولوا
التعامل يجب ان يكون على اساس من الاحترام والحب والقبول
تحياتي لك
لا اعتقد في جدوي هذه الحوارات في تصحيح صورتنا في اعين الغرب
لاننا لو نظرنا اليا لغرب لن نجد انهم ذوي صوره حسنه بسبب استحساننا لعقيدتهم او بسبب انهم يعرضون دينهم علينا عرضا مشرقا بل السبب الذي يجعلنا ننبهر بهم هو تفوقهم الحضاري لا تفوقهم العقائدي مثلا لذلك اعتقد انه يجب ان ننكفيء علي انفسنا كي ننهض ببلادنا و نتفوق عليهم حضاريا حينها سوف يحترموننا و لو امامنا فقط و من وراء قلوبهم
التفوق الحضاري هو الحل
اما عن حوار الاديان فانا اري الراي الذي يقول هو مجرد تضييع وقت و بدلا من قراءة دين غيرنا كي نتعرف عليه اعتقد اننا يجب ان نتعرف علي ديننا فهذا افضل
و من المهم ان نركز في تعليمنا امور العقيده علي جوهرها لا شعائرها فقط و لو حدث و فهمنا جوهر عقيدتنا و كيف ان الله اراد لنا ان نحيا بين مخلوقاته في جو من الوئام و السلام الداخلي و الخارجي..لو حدث ذلك حينها لن نشعر بخلاف بين اصحاب الديانات لان جوهر العقائد ثابت
الامر الاخر فالاخلاق ايضا في كل الاديان ثابته مع استثناء الدين اليهودي لاسباب اعتقد ان الكل يعرفها
صرااع الأديان والحضارات مشتعل منذ سنين طويله
سواء في جلبه أو في صمت
وللأسف سيستمر الى يوم الدين
خصوصا من الجانب الآخر اللي دايما بيستفزنا ويقلبنا ساعات عليهم
وبعدين مش لما المسلمين بكل أحزابهم وجماعاتهم يتفقو ويتحاورو نبقى نتفق مع الآخر
أما الأفتراءات على الاسلام فالاسلام برئ منها ونحن المسلمين بتصرفاتنا المتهمين الأوائل والأواخر في اللي بيجرالنا..
بس أدينا بنحاول كل واحد على أد ما يقدر على الأقل يغير من نفسه
فالخير في الأمه باقي الى أن تقوم الساعه
الموضوع كبير ومش سهل ومحتاج نقله فكريه كبيره من جميع الأطراف
موضوعك حلو قوي وأسلوب الطرح أحلى وأرقى والكلام فيه يطول
أنتى عارفه يا قمر لو كل و احد ألتزم بالايه الكريمه
لكم دينكم و لى دينى
و شال الموضوع اساسا من عقله و تعامل على المستوى الانسانى فقط هنرتاح
و كل و احد فينا يقعد يفكر فى حاله هو مع الله بدل ما يفكر فى حال الاخرين مع الله
السلام عليكم
اعتقد ان العصر اللي احنا فيه مطالبين اننا نسمع اكتر ما نتكلم
المشكلة ان محدش فاضي يسمع لحد تاني
هو اللي يتكلم وعلي الباقي الصمت والاستماع
عموما انا موافقك في الغالب
تحياتي
لومي
اهلا بيكي
مش نقبل الاخر لا بس نحترم بعض ونقرب من بعض ونرمي من ايدينا ومن ورا ظهرنا الخنجر واحنا بنعيد علي بعض
تحياتي واشكر مرورك
ذو النون المصري
لا اعتقد في جدوي هذه الحوارات في تصحيح صورتنا في اعين الغرب
لاننا لو نظرنا اليا لغرب لن نجد انهم ذوي صوره حسنه بسبب استحساننا لعقيدتهم او بسبب انهم يعرضون دينهم علينا عرضا مشرقا بل السبب الذي يجعلنا ننبهر بهم هو تفوقهم الحضاري لا تفوقهم العقائدي مثلا لذلك
_________________________
كلام صح تماما عشان كدا قلت ان الحوار لازم يكون داخلي مش خارجي وليس هدفه الناظره او الافحام لكن التقرب في نقاط مشتركه
ومحاوله نزع فتيل الانفجار
بلا عنوان
وبعدين مش لما المسلمين بكل أحزابهم وجماعاتهم يتفقو ويتحاورو نبقى نتفق مع الآخر
___________________________
صح كلامك تماما لا المسلمين يتفقوا مع بعض ولا المسيحيي ولا الاخ واخوة في حاله رفض من الجميع للجميع
كله بياكل في بعضه
المتدين والملحد
الغني والفقير
المسلم والمسيحي
الراجل والست
وضع غريب
حاله عجب لازم نحاول نخرج منها لازم
الحياه كدا جحيم
في القلب
في قلبي
كل و احد فينا يقعد يفكر فى حاله هو مع الله بدل ما يفكر فى حال الاخرين مع الله
____________________________
لو
دي امنيه ربنا يحققه حتي نقبل بعض علي مستوي الاسره الواحده في البيت الواحد نقبل اختلافنا نقبل عيب بعض قبل من نطالب غيرنا باحترامنا
حب اكتر ونفاق اقل
تحياتي
مهند
اشكر مرورك انا حاولت موعظش بس ادعو الناس تفكر من خلال صيغه الاستفهام وياريت اكون قدرت
معلش يا بنت القمر شفت البوست متأخر لكن الاجابات زي الاسئلة
مهمة جدا ..
انا هرد عليكي بالتفصيل شوية
لان الاسئلة تهمني جدا .. وهجاوبك عن خبرة في مضمار الحوار .. وهابقى بعدين اقولك الخبرة دي جت منين :)
-===
ما يعتقده الانسان حقا هو شأن خاص بينه وبين الله؟؟
في عالم مثالي .. أو على الاقل حر
هو ده المفروض ان يكون معتقد الانسان شأن خاص به .. ويكون عيب جدا التحدث عن المعتقدات أو الممارسات لفرد في الاماكن العامة
=================
الاتؤثر علاقه الانسان بربه ومعتقده علي علاقته بالاخرين وتؤثر لامحاله علي نظرتهم له وتعاملهم معه؟
المفروض انه لا يؤثر. بمعنى انه إذا كان عندي القدرة على اني أتعامل مع الاخرين على انهم افراد وليس بصفتهم منتمين لدين معين مثلا ..
يعني يا بنت القمر انا اعتقد مثلا أن (س) كافر أو غير مؤمن أو ملحد أو اي حاجة تانية .. و(س) هذا صديقي أو زميلي في العمل مثلا فعلي ان اتعامل معه في حدود العلاقة التي تربطني به .. وليس على أساس انتماءه إلى اتجاه معين .. فهو في النهاية حر في الايمان والكفر
الانسان هيتحاسب لوحده أمام وجه الله
وليس للآخرين علي سوى حد النصح والكلمة الطيبة وخلاص
----------------
هل ينظر الغرب المتقدم المسيحي الينا كبشر وافراد ام كمسلمين وعرب؟؟
هو الغرب المتقدم ليس مسيحي .. الفكرة دي مغلوطةوالناس فاهماها غلط
أوروبا دلوقتي علمانية تماما وأمريكا علمانية هي الاخرى ماعدا الادارة الامريكية التي تتصنع التدين بحكم انتماءها لليمين المتشدد
فرنسا رفضت ان يتم الاشارة إلى أن الله خلق العالم في دستور الاتحاد الاوروبي .. يعني فرنسا مش عايزة تشير لربنا جل جلاله مش تشير للمسيحية
ثانيا: نظرة الغرب للعرب والمسلمين فيها قصور شديد من الجانبين .. وبعد 11 سبتمبر العالم كله اتغير تماما
قبلها مكانش فيه موقف عدائي حاد للدرجة دي من الاسلام
========================
الا يجب ان ندرس ونفهم ونصحح ما نعتقده كمسلمين ومسيحين كل منا عن الاخر؟
هو يجب فعلا.. لكن الحوار المفتوح الجاد خطير جدا دلوقتي في مجتمع زي مجتمعنا
لانه ينقصنا الوعي وحتما المرونة وقبول الآخر وحسن النوايا وكلها أمور أساسية للحوار
من خبرتي المتواضعة في المسألة اهم شروطها هي ان الطرفين المتحاورين لازم يكونوا على قدر عالي من الثقافة واحترام الاخر وقبوله ولازم يكون عندهم قدر كبير جدا من المرونة والنوايا الحسنة وان يكونوا على علاقة ودية بالاخر أو على الاقل على استعداد لذلك
لايمكن ان تتخيلي يا بنت القمر صعوبة اجراء حوار غرضه الاساسي شرح العقائد
اراه ضروريا ولكنه غير مناسب في ظل حالة الاحتقان وسوء النوايا المتوفر في مجتمعنا .. لكن على الاقل يمكن إقامة حوار قوامه الارضية المشتركة
يعني التركيز على النقاط المشتركة بدلا من الخلاف .. ويتناول الحوار الجوانب الاساسية النافعة للطرفين او المجتمع ككل
يعني الاسلام يحث على الامانة
والمسيحية تشجعها
المسيحية تحض على المحبة والتقارب بين الناس
والاسلام كذلك
ارى جوهر الحوار كذلك في ظل الظروف الراهنة
أما الحوار العقائدي (والذي لا يهدف إلى الاقناع بين اطرافها) مجرد التوضيح وإزالة اللبس والمعتقدات الخاطئة فهو ضروري كما قلت ولكن يكفي ان يقتصر على الصفوة القادرة على إقامته ولو مؤقتا
===============================
في مصر تحديدا هل يفهم المسلم حقيقه ما يعتقده المسيحي؟ام تغلف افكاره كثير من عدم الفهم والشك؟
لأ إطلاقا
غالبية المسلمين لديهم معلومات مبتورة ومشوهة للغاية عن المسيحيين والمسيحية وللأسف سببها قلة المعلومات وثقافة الرصيف ..
سمعت قبل ايام مجموعة شرائط لرجل يدعى محمد حسان
واقل ما اصفه ان هذا الرجل كاذب كبير أو جاهل لانه اصلا استخدم معلومات مغلوطة واستغل جهل المستمع بها
وللأسف تلك المعلومات تؤثر بشدة على العلاقة بين المسلمين والمسيحيين في مجتمع مهووس بالمظاهر الدينية مثل المجتمع المصري
================================
اليس ما نعتقده عن قدسيه وتبجيل المسيح وامه من خلال نصوص القران مع الرفض التام لفكره الوهيته وبنوته لله من خلال نصوص اخري علي علاقتنا بالاخر المسيحي؟ اليس ما يعتقده المسلم عن بشريه المسيح ونبوته لا يعدو من وجهه النظر المسيحي عن بدعه وهرطقه كالاريوسيه مثلا؟؟
صحيح .. المسيحي يؤمن ان السيد المسيح هو ابن الله ومسألة البنوة تلك تحتاج مضمار آخر للشرح .. ولكن في النهاية المسيحي يعرف جيدا ان معلومات المسلم عنه ليست صحيحة وان ايمان المسلم بان السيد المسيح كان مجرد نبي هي معتقدات غير صحيحة
----------------------------
هل المسيحي مطالب بازاله اللبس الي الاخر المسلم؟وهل ان فعل سوف يقبل المسلم ويقر ما يعتقده ام سنبقي عند حدود الحوار فقط؟
هل المسيحي ملزم .. المفروض
والمسلم ملزم بالاستماع
ودي حالة الحوار اللي بنتكلم عنها
اما هل سيقبل المسلم او يقتنع
لأ .. مش المفروض .. ولا ده الهدف
الحوار لا يهدف إلى اقناع طرف بعقيدة الاخر والا انقلب إلى دعوة او تبشير
لأ الحوار لابد أن يهدف إلى البحث عن أرضية مشتركة للتعايش السلمي
وإزالة اللبس
وتوضيح المعلومات
وقبول الاخر
===================
الا يكون الحوار خطوه مهمه للتقارب بين الطرفين؟
اكيد
====================
هل المسلم مطالب بشرح ما بقره ويعتقده الي المسيحي من ايمان؟ وهل المسلم مطالب بتفنيد ما يعتقد بانه افتراءات علي الاسلام كانتشاره بحد السيف الي الاخر المسيحي؟
اكيد .. رغم اننا نشبع تعليما ودراسة للاسلام في المدرسة ووسائل الاعلام وغيرها
ولكن اعتقد ان من الطيب إزالة اللبس والمعلومات الخاطئة اللي بتسيب انطباعات او مشاعر سلبية
-===========================
هل هو المسلم مطالب بتفنيد الافكار الخاطئه حول الرسول الي شريكه في الوطن المسيحي قبل ان يتوجه بذلك الي الغرب؟الا يزيدذلك من التقارب بينهما؟؟
بالتأكيد ..
====================
هل يقبل المسيحي مراجعه افكاره حول الاسلام بحياديه وامانه؟
اكيد مش كل مسيحي ولا كل مسلم
وده دور المتنورين
ولكن علينا ان نركز أولا على اي المعتقدات التي نرغب من كل طرف تغييرها عن الآخر
يعني لا يمكن أن أطلب من المسلم ان يعترف بألوهية السيد المسيح وإلا فليصير مسيحيا
ولا يمكن أن أطلب من المسيحي أن يعترف بالاسلام دينا سماويا وإلا فلماذا لا يسلم بقى .؟؟
علينا ان نحدد أولا ما هي الحقائق التي نسعى لتغييرها او ترسيخها لدى الطرفين
===========================
اليس حوار الاديان اولي داخل الوطن الواحد اولي من الحوار خارجه؟
بالتأكيد
===============================
الا تجتمع الاديان علي الحث علي فضائل الاخلاق واجتناب الخطايا والمحرمات واحترام قيمه الانسانيه وتشجيع العلم والعمل والسعي في الارض اكتر من ما تختلف ؟
هو ده اللي انا بقول عليه
==============================
إرسال تعليق