الأربعاء، يناير 09، 2008

يخرب بيوتهم

اخر ابداعات نظام التعليم المصري
*********************************
من كتاب سنه تانيه ابتدائي المعدل هذا العام

القدم=30سم

اليارده=90سم

هذة مقاييس انجلترا
اما الفلاح المصري يستعمل مقاييس اخري هي

الذراع =58سن

والقصبه=355سم

التمارين

ضع العلامه المناسبه(>=<)
اتنين متر...............تلاته قصبه
تلاته متر..............اتنين ذراع
تلاته متر.......................خمسه قدم
اذا كان الطفل ما تعلمش لسه جدول الضرب فلازم يقعد يعد علي صوابعه
355+355+355 تمن مرات
ويغلط للصبح
انفعلت بعد مذاكرة الدرس يخرب بيوتهم
وحين صاحت الصغيرة مين يامامي دول؟؟
.....التزمت الصمت ورديت ورانا مذاكرة كتير خلصينا.

هناك 21 تعليقًا:

غير معرف يقول...

أول تعليق لى هدية

جميل قووووى البوست

والاجمل العفوية التى احيانا لانستطيع ان نمسك لساننا حيالها

فعلا يخرب بيوتهم

عين فى الجنة يقول...

شوفى
كله كوم والخطوة = 90 سم دى كوم هى دى الكوميديا السوداء على اصولها
مين العبقرى اللى ترجم الياردة وسماها خطوة؟

عدى النهار يقول...

تناولي السؤال على إنه وسيلة للتعلم أكثر منه سؤال مطلوب إجابته

أنا شايف إن السؤال بيساعد الأطفال على تنمية قوة الملاحظة وأيضاً حل مشكلة من أقصر الطرق

يعنى مش مطلوب حساب 3 * 355 و 2 * 100 وبعد ذلك مقارنة النتيجة لمعرفة إن 2 متر أصغر من 3 قصبات. المطلوب هو التدريب على حل مثل هذه المسائل بمجرد النظر يعنى حساب إن 2 متر = 200 أمر سهل وإذا كان 200 أصغر من 355 يعنى 2 متر أصغر من قصبة واحدة يبقى بالتالى 2 متر أصغر من 3 قصبات

وهكذا بالنسبة لبقية المسائل

بس للحق أنا مش متأكد من مدى سهولة أو صعوبة هذا الأسلوب على طفلة فى تانية إبتدائى. طريقة التعليم مهمة جداً هنا مش بس ناس تقعد فى غرف مغلقة وتنقل من هنا ومن هناك وتطلع فى الآخر بشىء ممكن يكون مفيد لكن تتجاهل تماماً البيئة التعليمية

غير معرف يقول...

هههههههههههه
هههههههههههههههه
هههههههههههههههههههه





عاوزة أعيط

الطائر الحزين يقول...

وبعدين بقى فى الكلام اللى يجن ده

العيال دى لازم تعمل تسقط وتعمل اعتصام

علشان محدش يروح 3 ابتدائى

بنوتة يقول...

فعلا يخرب بيوتهم

ربنا يكون في عون بنتك و في عونك
و بعدين ده مش حيستفيدوا منه لكن لما مثلا ياخده الساعة او جدول الضرب حيستفيدوا


و على العموم
************
ربنا يخليلك بنتك و برضه يسهلها المنهج و انا مع الطائر الحزين
***************
الطائر الحزين said...
وبعدين بقى فى الكلام اللى يجن ده

العيال دى لازم تعمل تسقط وتعمل اعتصام

علشان محدش يروح 3 ابتدائى

January 10, 2008 10:15 AM

***************

اسكندراني اوي يقول...

اه ياني
ربنا يكون في عون اولياء الامور قبل الطلبه

عباس العبد يقول...

انتى بتتحججى بالبنت
تلاقيكى انتى الى معرفتيش تحسبى
ههههههههههههههه
....
عارفة الغباوة و النقص و التخلف العقلى
انتى حطيتى ايدك على نقطة الموضوع
الى حط المنهج بيعانى من كم من التخلف و النقص غريب
انا كنت فى مدرسة فرنساوى خاصة اول امتحان تحريرى امتحنته كان فى تالتة ابتدائى
كل الامتحانات قبل كده شفوى و خلصت المدرسة نروح
و عمرى ما اشتكيت لما كبرت لا من جهل و لا من نقص
بالعكس كنت متفوق فى الجامعة
يعنى
فعلا حرام ظلم الالولاد الصغيرة بجد
انا عمرى ما اخدت دروس خصوصية
ربنا يكون فى عونها و يوفقك فى تعليمها و يباركلك فيها
...
و لو عايزة دروس رياضة انا تحت امرك
مهندس بقى و ممكن اقلب عيشى و مش غالى 40 جنيه فى الحصة

karakib يقول...

لتنشئه جيل قادر انه يتعامل مع هذه المسائل
لازم تعلميها تاخد الة حاسبة معاها في الامتحان من غير ما حد ياخد باله

خيرالدين يقول...

المفروض ان اخطر مراحل التعليم هى الاساسى بصفه عامه والابتدائى على وجه الخصوص لكن احنا فى مصر ناسيين الحكايه دى خالص
طلاب كلية التربيه اللى المفروض يدرسوا لتلاميذ ابتدائى عاوزين محو اميه اساسا

انا لاحظت ان اغلب المناهج دلوقتى هى نفس المناهج اللى كنت علينا
بالذمه ده مش تخلف
يعنى جيل بوجى وطمطم هو نفس الجيل ده

Hypatia يقول...

ازيك يا قمر

الله يخرب بيتهم
الله يخرب بيتهم
الله يخرب بيتهم

سلام

Iskanderani يقول...

العزيزة بنت القمر؛

كل سنة وحضرتك طيبة وبخير وعام جديد ملئ بالافراح والسعادة لك. أمني لكم عام دراسي غير مُمل وتحياتي لصاحب مدونة الاستاذ "عدي النهار" نظراً لانه وجد واشار للغرض من تعلم هذه المبائ للمناظرة والمقارنة والتقدير الشخصي للاشياء

تحيات إسكندراني في بلاد الله الواسعة

يا مراكبي يقول...

أنا شفت مناهج تعليمية مختلفة في دول مختلفة

أقدر أطمنك وأقولك بالفم المليان إن مصر ولله الحمد وبسم الله ما شاء الله .. مافيهاش حاجة إسمها تعليم .. حتى في معظم الحاجات الباهظة الثمن كمان

ممكن كمان لو حبيتي تبقي تغيري إسم البوست إلى: غطوني وصوتوا

اسامة يس يقول...

والله معاك حق..
وفي كل مرة اطل على هذه الكتب مصادفة بين يدي اولاد خالتي او خلاني اصاب بغيظ وحنق ... على هذا المستوى العقيم الذي وصل اليه التعليم....

فعلا ربنا ينتقم منهم جميعاً....

دمت بكل ود...
خالص تحياتي

بنت القمر يقول...

شريف
اهلا يخرب بيوتهم كلمه تدل علي اللافهم واللامنطق في مناهج التعليم في مصر اشكر مرورك
***********************
راجي هي الحقيقه مدرستهافرنساوي وانا اللي ترجمتها لها كده
عشان اقرب لها المسافه لكن المصطلح اصلا
le yard
le pied
le kasba
le zeraa
اليارده القدم القصبهه الذراع
بس لنا كان لازم اكتبه في البوست عربي
المصيبه ان طفل التمن سنين ايه لازمه اصلا يعرف المقاييس دي وهو لسه مدرسش الساعه واللا الكيلو والمتر
والامصب ازي يكرر58 تلات مرات من غير ما يكون اخد جدول الضرب المنطق بيقول ان تكرار العدد اكتر من مرة بيكون عن طريق عمليه الضرب مش تكرار الجمع
يبقا بقا مش يخرب بيوتهم

بنت القمر يقول...

عدي النهار
ما شاء الله عليك
ما هو العبقري اللي فكر في كدا بيستخدم نظريه اسمها الحساب العقلي
بمعني انك تتخييل ان
355 تلات مرات لازم ها تعدي الالف
وانمترين لازم يعدو الميتين
قايمه علي التقدير مش الحساب
بس التقدير ده عمرة ما بفلح من غير جدول الضرب ما يكون متشرب في عقليه الطفل
لان العمليات الحسابيه لها حكمه في التسلسل جمع ثم طرح ثم ضرب ثم قسمه
واذا لغيت خطوة او اجلتها مينفعش تطالب الطفل بأنه يتخيل زي ما تقول حضرتك هو واحد صاحب نظريه
وحب يجربها في التلامذه كعاده عباقرة واضعي المناهج في مصر والمنهج دة جديد السنه دي
منور
*************
شهروزة
وانا اصوط
منورة

***************
الطائر الحزين
ولازم الاهالي تعمل اضراب عن الطعام ولازم النظريه الجديده تبوء بالفشل عشان الناس دي تتعلم انها ما تتعلمش في التلامذه
تحياتي

بنت القمر يقول...

بنوته
ربنا يسهل لنا الاحوال جميعا ويسهلهالك ويخليكي لمامتك
*************
اسكندراني
ربنا يعينا جميعا علي افتكاسات واضعي المناهج في مصر وعلي العيشه اصلا تحياتي
وكل سنه وحضرتك طيب

بنت القمر يقول...

عباس العبد
ما هو اصلا مش مطلوب اني انا اللي احسب
المطلوب انها هي اللي تحسب
هي كمان مدرسه فرنساوي بس ده منهج حكومي اقرا ردي علي راجي
وبعدين القضيه مش لغه القضيه ان دي افتكاسه جديده
من واضع المنهج حاجه اسمها
calcule menthale
حساب عقلي قايم علي التقدير مش الحساب
بس الفكرة ان التقدير وموهبه التقدير متشتغلش من غير ما يكون التلميذ اتشرب بالعمليات الحسابيه بتسلسلها المنطقي جمع طرح ضرب قسمه
ولا التخيل والتقدير ها يجيله في المنام مثلا
التعليم مختلف جدا دلوقت انا كمان عمري ما اخدت درس وجبت 87%في ثانوىه رغم اني كنت ادبي
بس دلوقت الدروس شر لابد منه اسعار الابتدائي في مدرستها 25 جنيه مش اربعين!!!اانا مبديش دروس اساسا عشان مش عاوزة الجألها الا لما احس ان الامور ابتدت تفلت من ايدي
ومشكور يا باشمهندس
وميرسي علي دعواتك

بنت القمر يقول...

كراكيب
هو الاله الحاسبه ما لها بس بالقصبه واليارده وايه فايده ان الطفل يعرف الذراع كام سم؟؟
الكالكليتور مش ها يحل الموضوع
الموضوع اصلا ملوش لازمه خالص
اولي انها تعرف الكيلو والنص كيلو والربع
اولي تعرف الساعه
وكل ده في المنهج القديم
بس كعادتنا من ايام الفراعنه كل ما يجي فرعون جديد يمسح اثار القديم ويخفي خبرة وينزل هو بأفتكاسه جديده عشان يبقا العبقري الاوحد
يلا خليهم يجربوا فينا
يخرب بيوتهم
*********************
احنا
اولا حضرتك قفلت المدونه بتاعتك وخليتها للريدرز وما بعلتليش انفيتاشين ينفع كده؟؟
تانيا المنهج ده جديد ولانج ومحطوط طازة السنه دي
بس لو قريت ردي علي راجي وعدي النهار تعرف ان الافتكاسه دي مش وقتها ابتدائي خالص الا الطفل لما يكون اتشرب بالعمليات الحسابيه البسيطه وحفظ جدول الضرب مش وهو لسه بيعد علي صوابعه منور اشكر مرورك

بنت القمر يقول...

نسرين بسيوني
اهلا انا تمام يا جميله
اللهم امين منورة دايما
*************************
اسكندراني في بلاد الله الواسعه
كل سنه وحضرتك طيب
ما هو عدي النهار فعلا لقط الفكرة بس تانيه ابتدائي مش معاد تطبيقها ويا ريت تقرا ردي عليه وعلي راجي وعلي عباس العبد
كل شيئ بأوانه لازم الطفل يقدر يجمع ويطرح ويحفظ جدول الضرب ووبعدين تطالبه يتخيل ويقدر مش العكس
والنظريه دي اسمها الحساب العقلي مش مكانها ابدا صفوف الابتائي الاولي منور واشكر مرورك
*********************
يا مراكبي
ممكن نخلي البوست كمان اسمه جعلوني مجرمااو ليك يوم يا ظالم
التعليم في مصر قايم علي العشوائيه كل من في راسه حاجه سمع عنها من هنا ولا من هناك يجربها في العيال
وان شاء الله متطبقه في بلاد واق الواق
وكل واضع منهج لازم يخفي اثر اللي قبله عشان يكون هو زويل الجديد وصاحب النظريه والتلامذه تدفع التمن ومعاهم الاهل منور
اشكر مرورك

بنت القمر يقول...

اسامه الاديب الكبير
التعليم في مصر قايم علي الغشوائيه والتجربه اللي لازم بتفشل لانها مش متطبقه صح اصلا مجرد حشو دماغ
مفيش ادني سبب انك تطالب طفل تانيه ابتدائي يعرف الذراع كام سم وهو لسه بيعد علي صوابه وما يعرفش الساعه
ا اذا كان ده من باب الشهرة وان صاحب المنهج عاوز يروح التلفزيون باعتبارة العبقري الاوحد واللي جاب الديب من ديله
منور