الثلاثاء، يناير 29، 2008

انظر الحل بالمقلوب


قرأت تدوينه عند العزيزة نوارة تنتقد سلوكيات الستات وبعدها تدوينه تانيه تنتقد الرجاله

وتدوينه عند الصديقه حفصه تنتقدسلوكيات ونماذج من المدونين....تدوينه جميله وخفيفه الدم ولها الف حق فيها

الحكومه كمان بتنتقد الشعب اللي بيخلف كتير وطلباته مش بتخلص وبيزوغ من الشغل وسلوكه مش حضاري

طيب الشعب كمابينتقد عنده قائمه اتهامات للحكومه تخليها تنتحر

المسلمين بينتقدوا المسيحيين وشايفينهم مستقويين وممكن عندهم وجهه نظر والمسيحيين ليهم انتقادات للمسلمين وشايفينهم همج وبربر وبرضه عندهم اسباب..الله طيب مين الغلطان بقة؟؟

طيب !!

الست طوال النهار تنتقد الراجل ووتغني يا ظالمني وانه حابسها وكابسها وظالمها ومستعبدها رغم انها عايشه ومتعابشه وقابله الظلم ده وبتكرسه من خلال تربيه عيالها..بس عندها حق!!

والراجل عمال يرقع بالصوت ان الست زنانه وقرارة مهمله في روحها وغاويه نكد وبرضه ليه الف حق _حاجه تجن!!

طيب امي عماله تشتكي من مرات اخويا وتعد اسباب وجيهه جدا ومرات اخويا برضه بتشتكي من امي وعندها اسباب اكثر وجاهه_عجيبه !!

الجيل الجديد بيشتكي من القديم.. ومش طايقه وبصراحه القديم ما يطاقش والجيل قديم بيلعن في ام التربيه البايظه بتاعه الجيل الجديد رغم انه هو اللي مربيه..عمايل ايده يعني..الله امال زعلان ليه..؟؟

كل الناس بتنتقد الفيديو كليبات وبرضه بيشوفوها ويرددوها ويرقصوا عليها وبتوع الكليبات يقولولك برضه الناس بيحبونا وبيرددوا اغانينا حتي الاطفال برضه طب ما راخريين عندهم حق !!

طيب الحل ايه بقا؟؟

كله عمال يشتكي من كله وينقد كله كله مش طايق بعضه وكله عنده اسباب وجيهه طب نفسي افهم الله لا يسيئكوا هو مين مع مين؟

ولا ليه ؟

ما هو لازم في حد صح والتاني غلط ولو كل واحد شايف نفسه صح وضحيه ومظلوم وعماله يشتكي سلبيه وظلم الاخرين رغم اصلا ان الاخرين مش طايقينه ولا قابلينه !!

كل واحد شايف نفسه صاحب الحق والحقيقه المطلقه وانه المنّظر الاكبر وممكن يكون رغم ان التاني برضه شايف نفسه هو كمان الاعمق والمطلق وصاحب الرؤيه وتيجي تناقش ده ولا دوكهمه تلاقي دماغ اهله ولا الأولد شوز

طيب يا ناس يا هووو لازم يكون في حد غلط لازم يكون في خطأ وصواب لازم يكون في جاني وغلطان عشان نحاسبه ونقفشه .

ونولع فيه بقا كلنا ونرتاح ..

لازم نلاقي حد نفش فيه غلنا ...

لازم نلاقي مجرم نشنقه ونخلص ....!

بجد والله مين هو بس؟

حد يقولي عشان ارتاح ويكتب لي الحل الصحيح ولو حتي انظر الحل بالمقلوب..

********************

قررت انافس ذو النون في لعبه تلخيص الكتب

الله اشمعني هو؟؟وعشان انا ديموقراطيه ها اخيركم نبدأ بالتدين المنقوص فهمي هويدي ولا مواطنون لا ذميون برضه هويدي؟؟ها أعد من هنا ليوم الجمعه والكتاب الاعلي تصويتا ها ابدأبيه


هناك 17 تعليقًا:

Ragi يقول...

ونعم الديموقراطية!!! ماهو كاتب واحد يعنى الانتخابات مزورة من قبل التصويت مايبدأ:)))
ده بالضبط زى الحزب الوطنى لما يدخل الانتخابات لوحده وعنده برنامجين والاتنين من تاليف حسنى مبارك:)))
بالنسبة للجزء العلوى من البوست فانتى عارفه طبعا ان الاجابة مثل حل بعض مسائل الرياضيات
doesn't exist
exist pas

e7na يقول...

فى آخر فيلم الجزيره محمود عبد المغنى -طارق بيه -بيتمنى امنيه هى اجابة السؤال بتاعك

بيقول:نفسى اقابل حد بيغلط ويعترف انه غلطان

فعلا يا استاذتى مفيش حد شايف انه مش صح فى سلوك كذا
ولو قال انه غلطان لازم يجيبلك مبررات لسلوكه
انماالناس التانيه غلطاتها غير مبرره

mohand يقول...

السلام عليكم

اعتقد ان انا السبب

انا اللي جبت دا كله لنفسي


فكره برضه

الطائر الحزين يقول...

الحل

ان نعى جميعا فقه الاولويات

كتاب قرأته زمان

ليوسف القرضاوى

تحياتى

عاليا حليم يقول...

طيب امي عماله تشتكي من مرات اخويا وتعد اسباب وجيهه جدا ومرات اخويا برضه بتشتكي من امي وعندها اسبا اكثر وجاهه_عجيبه

هههههههههههههههههههه

و الله كتير بسرح و افكر فى الكلام ده صحيح مين الى غلطان ؟ فين الوضع الغلط عشان نمسكه نصلحه مهمة صعبة جدا يمكن تكون دى طبيعة الكون و الله اعلم

ذو النون المصري يقول...

انا موافق ان الكل بيحاول يبرا نفسه من الخطا و بيحاول يلصق الخطا بالاخرين
لكن الحل مش هقول طبعا ابدا بنفسك لان مفيش حد هيقتنع بانه يبدا بنفسه علي اعتبار انه اصلا مش هيعترف بانه علي خطا من الاساس
اعتقد ان الحل في الزمن و قدوم جيل اخر غير هذا الجيل علي ان يفني هذا الجيل اولا و الجيل الذي يليه
.................
بالنسبه لمختصرات الكتب
فانا سعيد جدا بهذه الخطوه و ارشح كتاب التدين

ذو النون المصري يقول...

انا موافق ان الكل بيحاول يبرا نفسه من الخطا و بيحاول يلصق الخطا بالاخرين
لكن الحل مش هقول طبعا ابدا بنفسك لان مفيش حد هيقتنع بانه يبدا بنفسه علي اعتبار انه اصلا مش هيعترف بانه علي خطا من الاساس
اعتقد ان الحل في الزمن و قدوم جيل اخر غير هذا الجيل علي ان يفني هذا الجيل اولا و الجيل الذي يليه
.................
بالنسبه لمختصرات الكتب
فانا سعيد جدا بهذه الخطوه و ارشح كتاب التدين

يا مراكبي يقول...

لم نعرف أو نعهد أو نتعلم ثقافة الإختلاف .. أن نستمع للرأي الآخر ثم نفكر فيه ونحلله فلربما يكون هو الصواب .. ثم نعترف بصوابه بعد ذلك

مجتمعاتنا بعيدة كل البعد عن تلك الثقافة

Nsreen Bsunee يقول...

قمره والله يا قمره انا جاوبت التاج بسرعه ونسيت وزارات كتير الصحه والتعليم والدفاع يعنى بوظت الدنيا

بس انتى تمسكى وزاره التعليم تظبطيها ايه رأيك

بصي طول ما الناس فاضيه حتفضل ماسكه فى خناق بعض لو عندنا هدف محدد حننشغل بيه مش حننشغل ببعض يعنى مامتك عشان شاغله نفسها باخوكى بتناكف فى مراته

ارشح كتاب التدين المنقوص اولا
وبالتوفيق فى التلخيص دى حاجه صعبه جدا على فكره انا حاولت اعملها قبل كده واتخنقت اوى ومقدرتش اكمل

coca يقول...

والله المدونه دي عجبتني اوي اوي اوي اوي اوي بجد

يمكن علشان كل واحد دايما شايف نفسه صح مش بيغلط واللي ادامه هو اللي غلطان يمكن كمان علشان روح التسامح قلت اوي

لو الواحد يعترف انه غلطان اوي يعدي شويه وشويه يمكن كان كم الشكوي والنقد اقل كتير

تحياتي

DantY ElMasrY يقول...

لومسكنا موضوع ان الحكومة مش عاجبة الشعب وعندها اسبابها
والشعب مش عاجبه الحكومة وعنده مليون سبب
مين فيهم اللى حاطط التانى فى دماغه ؟؟؟
طيب ....
ويشيله من دماغه ليه؟؟؟
عشان بنت المدونين يستريحوا؟
ياخى النه
سلامات

الصارم الحاسم يقول...

عشان المدونة خفيفة الدم اللي عجبت حضرتك

اتفضلي شوفي اول تعليق في الموضوع الزبالة ده

http://hegab-nekab.blogspot.com/2008/01/blog-post_7908.html

بنت القمر يقول...

راجي لو عندك كتا ب تحب يتلخص وكان متوفر عندي او سهل اجيبه
تحت امرك
الجزء التاني فعلا

n,exist pasتحياتي
*************
احنا
حضرتك اللي استاذ
بس الفكرة نلاقي حد لو خيالي زي خيال الظل يكون مسئول عشان نحاسبه
ونعذبه ومش كله كده مش مسئول
منور
****************
مهند خطوة ايجابيه
انك تعترف
يبقا انت المسئول
بس تفتكر العقوبه المناسبه ايه؟؟
تحياتي
****************
الطائر الحزين
تاني او تالت مرة تقول علي فقه الاولويات
ياتتكرم وتكتب لنا بصورة مبسطه عنه
تحياتي

بنت القمر يقول...

عاليا حليم
الوضع الغلط معروف والغلطان كمان معروف ولا يصح الا الصحيح في الاخر
بس نعرفه ونحاسبه
عشان ميفضلش طايح فينا
************
ذو النون
اعتقد ان الحل في الزمن و قدوم جيل اخر غير هذا الجيل علي ان يفني هذا الجيل اولا و الجيل الذي يليه
_______
كلامك حكم
انا كمان شايفه كدة
ها ارد علي التاج وبعدين كتاب التدين انت تؤمر
*******************
يا مراكبي
لم نتعلم ثقافه الاختلا ف
ولا ثقافه الاعتراف بالغلط
ولا محاسبه لنفسنا قبل محاسبه الاخرين
طب نعمل ايه في روحنا
اشكر مرورك

******************

بنت القمر يقول...

نسرين بسيوني
كمان حفصه ادتني التعليم العالي وشئون صغار الموظفين!!!
بصرة
اه ابدا بعد التاج بكتاب التدين تؤمريني
*
****************
دانتي المصري
ويشيله من دماغه ليه؟؟؟
عشان بنت المدونين يستريحوا؟
ياخى النه
مفهمتش ولا كلمه!!

بنت القمر يقول...

الصارم الحاسم
انا شفت اللينك
وفهمت قصدك
بص يا عزيزي
البوست اياه سيئ جدا بس ده رأيي
ورأيي غير ملزم لغيري
حفصه او عباس العبد واو اي حد تاني لهم ارائهم اللي ممكن ما تعجبنيش خالص واختلف معاهم كليه او جزئيه ولو كنت بتابع هنا كنت شفت ده
ورغم كده بحترمهم
او حتي تعليقاتي هناك بس انا كمان مش قيمه علي حد
انا مش لازم عشان بتابعك واحترم خطك اني موافقاك
ممكن اكون بحترم حماسك او حميتك او او حاجه لكن لا اوافقك الحل والرؤيه
انا مثلا محبيتش فيلم ميسرة ولا بحب خط!! شاهين
حفصه ممكن تحبه!!
انت ممكن متشوفش سينما اصلا!!
لكن!!
انا عجبني عندك اول بوست انا علقت فيه بتاع ساركوزي!!
فاهمني؟؟
دايما في مساحه اختلاف ومساحه اتفاق
لكن في حدود الاحترام
اما لو المساحه زادت اوي يبقا ملوش لازمه
انا استغربت ان العبد بيتابعك وده ذكاء منه
واحترمت انك علقت عنده بمنتهي الادب
وده ذكاء منك
يبقا الاحترام متوفر نختلف براحتنا
طالما الفصد شريف والنيه طيبه
منور جدا
واشكر مرورك

الصارم الحاسم يقول...

تمام....يعني اما يبقى الخلاف محترم


لكن هل الموضوع والمدونة والتعليق تعبر عن اي فكر محترم...هل دي طريقة محترمة للتعبير عن الخلاف...ده قصدي


على فكرة الاستاذ عباس العبد يختلف تماما...لا اعتبره نفس الشئ ابدا...حتى الان هو شخص محترم جدا في الخلاف