السبت، يناير 12، 2008

دبابيس تلفزيونيه

خالد يوسف في لقائه مع مني الشاذلي مبررا ومدافعا عن فيلمه حين ميسره بأن الواقع اكثر قسوة وانه يعتبر فيلمه صرخه لكل مسئول لانقاذ مصر من خطر انفجار العشوائيات وان مشاهد الخطف والاغتصاب والشذوذ في الفيلم هي غيث من قطر فقد تكرم علينا سعادته بعدم مناقشه مواضيع اكتر جرأه مثل زني المحارم!!!ا
اذا كان الفيلم صرخه لحكومه نظيف والحكومات السابقه اقترح علي فخامته توزيع الفيلم سيديهات علي نظيف وحكومته علي هيئه طرد منزلي زي البيتزا هات يسلم يدا بيدو رفعه من دور العرض لان المواطن البسيط مش نااااقص والضرب في الميت حرام
واذا كان هو كمان مش بيتاجر باوجاع الناس والامهم كما اتهمه المسلماني مذيع دريم بتاع الطبعه الاولي
فأنا كمان من موقعي هذا المتخندق خلف الكي بورد المبحلق في الشاشه اسأله بكل براءه هل تعتقد ان جمهور الفيلم وتحديدا الغالبيه الشبابيه منه داخلين يشوفوا اوجاع الفقراء في العشوائيات ويقرفوا روحهم؟؟
ولا داخلين يسرحوا في مساحات مكشوفه من لحم سميه الخشاب لايقدمها لهم التلفزيون ولا بما يفسر اختياره لتلك المشاهد تحديدا في اعلان الفيلم دا طبعا مع احترامي الكامل لحريه الفن والابداع التي كفلها الدستور وحريه اي انسان انه ياكل البدنجان بابا غنوج او يعمله مسقعه بالخل والتوم
سميه الخشاب في نفس الحلقه انفعلت بعد مكالمه من متصله قالت لها انه بنتها بتتكسف لما بتشوف اعلان الفيلم من ملابس سميه
سميه زعلت اوي وقالت لها انا معملتش حاجه غلط انا لبست بدله رقص وقفلتها وهي يعني بنتك مش طول النهار قاعده تشوف فيديو كليبس ناس عاريه خالص
هو انا عملت ايه يعني؟؟
ولا جت علي سميه وقفلت؟؟
كأن الموضوع بقا مسابقه في المبتذل والرخيص والاكثرابتذال
الله يرحم من سبقن اللي كانوا بيقدوا مشاهد مماثله بكل شياكه افتكر سعاد حسني وفاتن حمامه بمجرد اشارة مجرد فازة تنكسر اوورده تقع علي الارض والبطل يدوسها برجله وخلاص والمشاهد برضه كان بيفهم بالايحاءمش بكم الفجاجه الي في الاعلان

بوسي سمير مع ريهام سعيد علي المحورانا مبعملش حاجه غلط انا بلبس عادي!! والكليب بتاعي عادي الناس هي اللي فهمت غلط!! وبعدين انا اسانه طبيعيه ولو بتأااااخر بره عادي زيي زي الطبيبه والممرضه ما بيأااخروا في شغلهم ايه الفرق
ريهام سعيد متقمصه دور القديسه والواعظه الاخلاقيه لا يا بوسي في فرق انتي بترقصي وسط السكرانين..كأااني بوسي سمير مش عارفه طبيعه شغلها ايه بالضبط
فترد عليها بوسي لا انا بأااادي رساله
ويا عيني علي الرساله مش اي رساله انا باكل عيش ولا عاوزاني اقعد في البيت؟؟!!

البيلي دانس كومبيتشين علي ال بي سي مسابقه الرقص الشرقي في لجنه تحكيمها مدرب الرقص الفز حسن ظاظا والراقصه الفنانه نجوي فؤاد الي بتحضر البرنامج ووشها زي البالونه المنفوخه او زي المضروبه بوكسات في كل حته وشها منفوخ ومن اثر السيليكون والكولاجين حتي تخفي عوامل الزمن
نجوي فؤاد لاحدي المتسابقات ياحبيبتي لازم كل حاجه فيكي ترقص مش حته وحته لا البطن والايدين والرجلين والوسط والبطن والراس
الرقص حاله من الخلق!!لازم يوصل رساله زيه زي بقيه الفنون زي الفن التشكيلي!!ا
من ايام قابيل وهابيل لازم الرقص يقدم رساله
طبعا متعرفش ايه علاقه هز الوسط بالخلق والابداع ولاالقصعه والنزله بقابيل وهابيل
وفين الرساله اصلا؟
وليه الرساله مرتبطه بجسد المرأه ولحمها المعروض لاخرين
لكن الحكايه هي كيف تجعل الهلس جد ا؟؟
والتي برعت فيها ال ال بي سي
نجوي فؤاد لراقصه اخري
يا فلانه انتي ما رقصتيش في كل الدياجونال عشان توري هنا وهنا وحين سألت ادم هو دياجونال يعني ايه ؟اجاب وهو فاتحا عينه نص فتحه مبربشا بالاخري الدياجونال الي اخدناه في الهندسه هواطراف الشكل الهندسي تقصد انها تتحرك علي اطراف المسرح زي وسطه اجاب وهو حفظه الله مترفعاعن الهلس تاركا لي اياه
واتزود بجرعه ثقافيه من الست الفاضله نجوي فؤاد التي لاتألو جهدا في استعراض كلمتين انجلش علي اخرتين فرنساوي لزوم الشياكه والبرستيج برضه ادام الاخوة اللبنانيين

هناك 52 تعليقًا:

بنوتة يقول...

البوست رائع اخر موضوع في البوست ده رائع و على فكرة انت بتكلمي في كلام مهم

تحيات
**********
***بنوتة***
**********

Ragi يقول...

والله بدون علام لادم الدياجونال هو قطر الدائرة او قطر المربع من احد رؤوسه الى الراس المقابل له يعنى الرقص موش بس على المحيط ولكن فى الاتجاه المائل
مع اعتذارى لكل المهندسين والمهندسات لاقحام هذه المعلومات على البوست الذى لو كتبت اى تعليق عليه فسوف يدخل فى دائرة الكلام المحظور
تحية لكى ياسيدتى ولادم الخاص بيكى
مين بقى اللى ترجم الياردة خطوة فى البوست اللى فات انتى ولا ادم؟
:)))))))
:)))))

جبهة التهييس الشعبية يقول...

والله يا بنت القمر اصحاب الشأن نفسهم متضايقين من الاعلان
هم قالوا انهم ماعندهمش فلوس يروحوا السينما بس بعتوا واحد منهم يشوف لهم الفيلم وهم متضايقين قوي من الصور دي وبيقولوا احنا ناس زي اي ناس فينا الكويس وفينا الوحش والفلل والعمارات ياما بيطلع منها بلاوي

سيبك من ده كله اهم حاجة الناس هناك قالوها ايييييييييييييه؟

اولا خالد يوسف ما جاش عشان يشوفنا ويعيش معانا كان يجي يشوفنا واحنا كنا ساعدناه في تصوير الفيلم

ثانيا لما هو عامل فيلم عننا مش كان المفروض يجيب لنا دعوات مجانية؟ مش احنا اصحاب الشأن اللي هو عامل عشانهم الفيلم؟

الملحوظتين دول بس مهمين قوي للباشمهندس خالد عشان يعرف ان الفهم والذكاء مش بالعلام مش عشان هو مهندس وهم ما دخلوش مدارس يبقى هو ذكي وهم اغبيا

واللي دعكته الدنيا ذكي وبيفهم وما ينضحكش عليه
الفيلم ده يعجب المثقفين اللي فعلا ما بينزلوش عند الناس ولا يشوفوا الالامهم او على رأيك العيال المكبوتة اللي عايزة تتفرج على لحم المزة

لكن اصحاب الشأن زعلانين

With Myself يقول...

1- بالنسبة لفيلم خالد يوسف ، رغم إعترافي اني لسه ما شوفتوش إلا إني بعتقد انه في إطار أفلام الصدمة.. يعني ده بيحصل فعلاً .. جربي تنزلي منطقة (عشوائية) مش شعبية زي الدويقة أو عزبة الصفيح وهاتشوفي بلاوي أكتر.
المزايدة علي حب مصر وان "خالد" بيفضح مصر أنا شايفها أنها مكشوفة أوي.. انا مصري بس شايف بلاويكتير حواليا وبقول عليها سواء بقي مهندس ولا مخرج ولا دكتور أو أي مهنة تانية ، لكن يجي واحد تاني يقلل من قيمتي أنا باكله بسناني زي ما كنت كتبت في بوست عندي قبل كده.
الحساسية الزيادة من مشاهد سمية الخشاب مثلاً أنا بعتقد إنها بتختلف من شخص لأخر ، وما ظنش ان العيال اللي داخلة تتفرج علي سمية الخشاب ما تقدرش تتصرف في فيلم بورنو في زمن الإنترنت والتورنت و السيديهات المتسربة!

بالنسبة لبوسي سمير بقي ونجوي فؤاد أنا موافقك في الرأي .. يعني أنا بستعجب من حاجة.. إنتي رقاصة قولي إني رقاصة.. مش محتاجة تزوقي الكلام أو تبرريه لكن هي جت علي دي! ما نص البلد عندها إزدواجية!

تحياتي

Ragi يقول...

تصحيح واعتذار
قطر الدائرة اسمه دياميتر
diameter
فى الانجليزى
الدياجونال زى ما قلت هو قطر المربع او المستطيل
ثانيا اعتذر عن تكرار موضوع الياردة فى البوست الماضى لانى قرأت تعليقك على كلامى متأخر
وباقى التعليق زى ماهو
الحمد لله محدش خد باله:)))

e7na يقول...

الله يرحمك يا مصطفى العقاد
لو شفت الرساله بقت ازاى دلوقتى

HafSSa يقول...

ازيك يا بنت القمر
معلش اسمحيلي ازاي يعني منعملش فلم عشان المواطن مبقاش مستحمل؟
ليه بتعممي كل حاجة و كان الشعب كله مش حيقدر يشوف الفلم ولا يستحمل القسوة اللي فيه؟؟
و فيها ايه لما خالد يوسف او غيره يعملوا افلام بالشكل ده
فكرك هو فعلا يقدر يودي نسخة لنظيف و مبعتش
طبيعي هما عندهم علم باللي بيحصل و عارفين ايه اللي بيحصل في العشوائيات و غيرها و مش فارقة معاهم
ما هما بره بيعملوا افلام مثلا بتتكلم عن حرب العراق هل ده معناه ان الحكومة مش عارفة ايه اللي بيجرى هناك؟ظ لا طبعا عارفة لكنها مش ناوية تعمل حاجة
بس دور الفلم هنا هو توعية من لا يعي
و تعريفنا بما لا نعرفه و تحريض من يجب تحريضه و هلم جرا
هو مثلا الشاب اللي ناوي يعمل حاجة بعد ما شاف الفلم لازم يجهر بعلو حسه و يقول انا حعمل و اسوي
مش يمكن الفلم حرض ناس بالفعل انها تعمل حاجة؟؟
مؤكد تلقي الفلم يختلف من مشاهد للتاني فمينفعش نقول مكنش حقه يعمل فلم كسكيلياه كده و يعرضه على الجمهور و مؤكد كمان هو مش قصده يعمل فلم بورنو و يحط فيه سمية خشاب طالعة بترقص عشان يجذب الجمهور الشاب
ما شاء الله شباب اليومين دول مبقاش يستنى لما ينزل فلم في السيما بقت عندهم مليون طريقة و طريقة عشان يشوفوا ما هو افظع من سمية خشاب و جسمها الملبني التفاصيل
مش عارفة احنا ليه مش بنحب اي حاجة تكون ضد توقعاتنا او مجمل افكارنا
لغاية دلوقتي مش شايفة الغلط في فلم زي حين ميسرة من ناحية المواضيع اللي ناشقها او تطرق ليها
ليه كل ما يطلع فلم بالشكل ده لازم نطلع فيه القطط الفاطسة
انا عندي اعتراضات على الفلم بس من نواحي فنية لكن مش من ناحية الفكرة او المضمون
و فعلا في مصر اماكن بيحصل فيها ما هو اشنع من ذلك و شفنا بعنينا ليه منرضاش بفلم ينشر و يفتح باب للمناقشة في موضوه مهم زي ده؟؟

تحياتي

عباس العبد يقول...

ما انتى بتتفرجى على هزى يا نواعم اهه
و شفتى رؤى و خبرات نجوى فؤاد
و تمعنتى فى حكمة الدياجونال
اما الرقص على الدياجونال فهو مصطلح معناه
ان ترقص فى جميع الاتجاهات و الاماكن على المرسح
لازم تشجعوا رانا يوسف و البنت استل
عاملين شغل جامد
و الله الموفق
هههههههه
....
نتكلم جد
الزنا و العرى و كافة اشكال الجنس موجودة فى المجتمع و ان احنا نقول مبيحصلش او منتكلمش عنه يبقى بنكدب على نفسنا
لكن فى فرق انى اناقشه بططريقة موضوعية
زى الترميز الى انتى قلتى عليه
فازة وقعت
وردة دبلت
باب اوضة بيتقفل
او حتى برعونة خفيفة
لأ عيب يا سيدى كده حرام
و فى فرق بأنى اطلع نسوان عريانة مالط
ببدلة رقص و اقول اصل ده فن
و خصوصا نظرية خالد يوسف
انا لى نظرية فى الموضوع ده
حتعمل مشكلة
انا كتبتها فى تدوينة بس لسه منشرتهاش
الى عايز اقوله
لو ان الغرض من عرى سمية الخشاب انها تبين لنا وحشية المغتصب
انا معنديش مشكلة
لكن المشكلة فى نظرى ... تقلع ليه اساسا
حتقوليلى دول عكس بعض
حقولك
هى دى المشكلة
احنا عايزين بوس هادف ... ينفع ؟
....
ملكيش دعوة ببوسى سمير
دى فى كون تانى خالص
دماغها مش معاها
العيب على الى ناقشها و سمعها
مش على الى هى قالته

بنت القمر يقول...

بنوته منورة خااالص تحياتي
********************
راجي وانا اقول لادم كلمته لاممكن تنزل الارض ابدا انا كنت ها اعيد عليه السؤال تاني
بس والله انشغلت
بس اعتذارك مقبول واحنا اخوات مفيش بينا اعتذار اساسا الفكرة هي هو ليه اصلا بتكلم في كلام كبير مجعلص وعمالا تلطش انجلش وفرنسيه والحكايه كلها مش مستحمله
وليه الهبل واكلام عن الرساله وقابيل وهابيل وكلام كبيرلمجرد انه تدي نفسها قيمه وتطرح نفسها كراقصه مثقفه
اشكر مرورك تحياتي

بنت القمر يقول...

جبهه التهييس الشعبيه
بصي يا عزيزتي انا معجبه جدا بالمسلماني عارفه ليه لان قدر يواجه خالد يوسف وسميه الخشاب حطي فوقيهم علي الهاتف مداخلات تليفونيه من ناس تقيله زي سلمي الشماع ويوسف شريف رزق الله
وما اتكسفش انه يقول انه معجبي الفيلم من المرضي النفسيين
وان عالم العشوائيات بيطلع رغم فقرة وقبحه اطباء ومهندسين وناس محترمه وان الطبقه العليا فيها العكس
اما كدبه ان الواحد يروح المول عشان يكع عشرين جنيه تمن التذكرة عشان مش عارف العشوائيات دي فيها ايه؟؟
يبقا دا اسمه محن وكهن
العشوائيات علي اطراف اي مدينه مصريه لكن مساحات من لحم سميه الخشاب مش متوفره
منورة خالص ومتقطعيش الزيارة

Lasto-adri *Blue* يقول...

شفت حلقة بوسى سمير التى تحمل الرسالة
وكان بودى اقوم اكسر التلفزيون عليها وعللى اللى مستضيفاها

وخالد يوسف أثبت انه انسان مغرور.. وخلقه ديق
اما سمية الخشاب فهى بنى آدمة شلق... ومغرورة برضو


وحرام انى اضيق وقتى فى فيلم متخلف زى دا


آسفة يا بنت القمر بس فعلا كل ما بتيجى السيرة دى بنفعل ان فيه ناس بالمناظر دى.. والدولة المبجلة بتاعتنا عملالهم اعتبار

بنت القمر يقول...

With Myself
لو حضرتك كنت شفت الحلقه كاخالد يوسف ها يصعب عليك هو وسحر الجعارة المتشنجه وسميه الخشاب ومعاهم علي التليفون يوسف شريف رزق الله وسلمي الشماع في كفه ومن الجهه المقابله المسلماني ومنكسفش يحرجه ويفحمه ويقوله انه بيتاجر بالالام الناس
وعنده حق اذا كان الفيلم صرخه لانقاذ سكان العشوائيات لاحظ تعليق حفصه بعدك انه مش ها يجيب نتيجه والحكومه عارفه كل حاجه ومصهينه
يبقا الفيلم بلا مردود ولا نتيجه امال يبق ايه يبقا فعلا متاجرة بالناس دي
والحكايه كلها سبوبه واكل عيش
انا كمان مرحتش الفيلم ولا اقدر اروحه ببساطه لاني مقدرش اخد بنتي فيه
لانها هتسأل اسئله معنديش ستعداد اجاوبها
وها اجرح طفولتها بمشاهد متقدرش عليها
واذا كان الاعلان فج كدا يبق الجواب باين من عنوانه
تحياتي واشكر مرورك

Ragi يقول...

يبدو اننى من جيل الديناصورات قد انقرض الا من بقايا هياكل فى المتاحف
اعترف باننى اشعر بعدم الراحة عند تناول الجنس فى الدراما سواء على المسرح او السينما او حتى التلفزيون، بل وقد اشعر احيانا بالخجل والارتباك لو عرض فيلم اجنبى على
otv
وبجوارى ابنتى او حتى احد ابنائى الذكور وامسك الريموت فى يدى فى وضع الاستعداد متقمصا دور الرقيب الذى اشترى ساويرس مقصه الشهير والقاه فى صفيحة الزبالة
واكاد اموت غيظا عندما اسمع حوار فى احد الافلام بين الفتيات بصراحة مذهلة حول عمليات ترقيع غشاء البكارة، ناهيك عن الفتاوى التى تتناول الموضوع جهارا نهارا
ومن الواضح الجلى ان الجنس وما يدور من حوله من الادوات الهامة فى صناعة الترفيه
هذه الصناعة الضرورية لاستمرار التوازن فى المجتمع الرأسمالى الذى يعمل فيه الناس كالتروس فى الاله العملاقة التى تدور بدون توقف ولا تسمح لهم بوقت كاف لالتقاط الانفاس والتفكير والتأمل فى جدوى العمل فى تلك الطاحونة الجهنمية
صناعة الترفيه هى الهدية التى تقدمها اليات السوق لادمغة البشر لتصنع معنى لحياتهم وتبيع لهم المتعة الوهمية على الشاشات
والانسان مخلوق يبحث عن تلبية رغباته وغرائزه ليبقى على قيد الحياة وكفى وصناعة الترفيه ووراءها ماكينة الاعلام الصهيونية العالمية تخلق له حاجات جديدة كل يوم ليسعى الى اقتنائها واستهلاكها
ورؤوس الاموال التى تستثمر فى تلك الصناعة كبيرة بدرجة مذهلة ، وهى ارباح كبيرة وورائها مستفيدين مستعدين لفعل اى شيء فى سبيل الاستمرار فى جنى ارباحها
وهذه الصناعة تغذيها انشطة سرية تحت الارض منها الدعارة وتجارة المخدرات وتجارة السلاح ، كل هذه الانشطة تخدم صناعة الترفيه وتحميها
النساءوالرجال العاملين فى الفن المعلن والسرى والموديلات والبغايا والمدمنين وتجار المخدرات والخمور هم وقود تلك الانشطة
وليس من الغريب اذن ان يتم تهميش الاديان والاخلاق والقيم والاحتفاظ بها فى دور العبادة الخاوية او بين صفحات الكتب المهجورةلا تتعداها الى الحياة
الحقيقة دى بعض الخواطر التى دارت فى رأسى ، انا الديناصور العجوز واستطيع ان استمر فى تسجيل تداعى افكارى الى مالانهاية
متى يولد غاندى اخر يرتدى ملابس الاحرام ويتكىء على عصاه يشرب من لبن معزته ويرفض هذه الصورة الفاسدة للعالم
اين انت ياعلىّ اين انت ياعمر اين انت ياعيسى ابن مريم؟ اين ذهبت الام تيريزا ؟ هل يعرف احد؟

With Myself يقول...

بنت القمر:

مازلت مختلف معك ، يعني لو كان خالد يوسف عمل فيلم عن فساد الحكومة وبرضه طلع فيه سمية الخشاب ببدلة رقص كنتي هاتعترضي؟
ماهو برضه في الحالة دي الحكومة عارفة ومصهينة!

هوليود تنتج أفلام كثيرة تبين سوء الأمريكيين أنفسهم أو الإدارة الامريكية.. هل شاهدتي Forrest Gump مثلاً؟
كمية رهيبة من الإسقاطات علي نمط الحياة الأمريكي وكذلك أفلام مايكل مور و أفلام جورج كلوني الأخيرة ، هل إتهمهم أحد بانهم يتاجروون بالحالة الإجتماعية الأمريكية؟

عزيزتي ربما تكون لنا بعض الملاحظات علي خالد يوسف فهو إنسان في النهاية - وأعدك بعد حضوري الفيلم أني سأكتب عنه بسلبياته وإيجابياته- لكن لا أستطيع أن أقول أن خالد يتاجر بمصائف الناس.

أنا رأيت خالد لمرة واحدة فقط وبصورة عابرة أيضاً ولا أعتقد أنه لا يحب هذه البلد ..

كل التقدير والإحترام

With Myself يقول...

Ragi:

هناك تعميم في كلامك يا عزيزي وإسمح لي أن أختلف معك.
أنا علي سبيل المثال شاب و إلي حد ما أمتلك ثقافة لا بأس بها ووعي بما حولي ولم أنجذب إلي موجة الترفيه التي تنوه عنها ، تستطيع عقولنا بعد فترة أن تستخلص ما تراه مناسباً لها بغض النظر عن البروباجندا أو الشو الإعلامي.

خمسة فضفضة يقول...

السلام عليكم ورحمة الله وبركاته

بوست جميل فعلا ونقد في محله

عارفه انا بقيت اكتفي اني اشوف اسم خالد يوسف او يوسف شاهين علي اي فيلم علشان اعرف ان مشاهد العري والاباحه فيها عاليه جدا ، مش عارفه ليه هما فاكرين علشان يقدموا رساله ويوصلوا هدفهم من ورا الفيلم للجمهور لازم يكون فيه مشاهد من دي
بيعتبروا ان الفن الراقي لازم يكون فيه شوية مشاهد سخنه والا ماينفعش

شفت كمان حلقة القاهره اليوم مع خالد يوسف وسمية الخشاب ، بس صراحه عمرو اديب زنقهم في خانة اليك لدرجة ان خالد يوسف اتنرفز جدا ووشه احمر ومش بقي عارف يرد الا انه قعد يزعق ويقوله طيب مااخوك في عمارة يعقوبيان جاب شواذ

كل ده لان عمرو كان بيطالب ان الفيلم يكتب عليه للكبار فقط كان مزعله اوي انه بيطالب الرقابه بكده

اما بقي حلقة صبايا برضو ريهام كانت موفقه جدا في مقابلتها مع بوسي سمير وبرضو ماخلتهاش تعرف تفلفص منها وكل ماتحاول تهرب من اجابة سؤال تفضل وراها
بجد كانت حلقه حلوه

برنامج الال بي سي ماشفتوش الطبق من اول ما الدنيا بدأت تشتي وهو بايظ و مكسله اجيب حد يصلحه فابكتفي بالوصله

بس اصلا نجوي فؤاد دي مش بتنزلي من زور وبعد التعديلات اللي عملتها في وشها باحس انها طالعه من التربه ، المفروض واحده زي دي تبص بقي لاخراتها
كلامك فكرني بيها لما مصر راحت كاس العالم في ايطاليا وخدوها ترقص هناك عشان تعرف الناس ال ايه علي الحضاره المصريه والكلام والفزلكه اللي قعدت تقولها ..هي مش بتزهق ؟؟

والله يابنتي شر البليه مايضحك

fad-fadat nour يقول...

اللطيف في الموضوع ان كل ما حد يعمل مصيبة يقول ان المصيبة دي فن و رسالة
فبقي عندنا الرقص في النوادي الليلية رسالة و العري و المشاهد الفجة رسالة

يا ريتهم بس يشرحوا لنا الرسالة بتاعتهم كويس و يوضحوا لنا ايه هي بالظبط
.
انا بس خايفة ييجي يوم نلاقي الناس دي بتقول لنا ان التدريس بجاحة و الطب سفالة و البحث العلمي قلة ادب

Hannoda يقول...

بالرغم من اني ما اتفرجتش على الفيلم(حين ميسرة) لإن طبعا عقبال ما ينزل قطر حايكون عدي سنة كاملة

لكن أنا تابعت اللقطات الإعلانية وأصابتني باشمئزاز شديد جدا

أنا مع نقل الواقع المؤسف في مصر
و الظلم اللي واقع على الفقراء في العشوائيات و أطفال الشوارع و الإدمان بين الشباب

قصدي من الآخر اني بجد بجد مع إخراج أفلام بتنقل بوضوح و صراحة شديده كل الفساد و الظلم اللي في البلد.. لإن الناس محتاجة أولا تحس ببعضها و تحس باللي المجتمع وصل له
يمكن ده يغير فيهم طبع السلبية ويفكروا في حلول فرديو و أدوار مفيده
ده غير ان اللي واقع عليهم الظلم يمكن ده يإلمهم لكن برضه حايحسسهم ان الأنظار بدإت تلتفت لهم وانهم مش في وادي و البلد و الناس كلها في وادي تاني و كإن السينما بس لشباب الغردقة و الديسكوهات و ركاب العربيات الملاكي

لكن كل الرغي بتاعي ده مايمنعش ان الفيلم مستز جدا و مثير للإشمئزاز من الناحية الإخلاقية
ومش هو بس

معظم الأفلام و خصوصا خالد يوسف.. بيتعمد فيها التبجح بمشاهد تخض.. وأكيد قصهامن الفيلم مش حايضر السياق في شيء

وش فاهمة ليه لما السينما عندنا بتتطور و تاخد أشكال أرقى لازم نحط يها خازوق يبوظ الإطار الجميل

عارفة؟؟
يمكن ما بتدايقش من حد زي بوسي سمير أو سميو خشاب لما يبالغوا في الا أخلاقي لإنه من غير فكل

لكن لما يكون حد صاحب فكر و ثقافة وفاهم بعقل أبعاد الأمور زي خالد يوسف ساعتها تعديه للحدود حايأثر بقوة و مش حايكون سطحي زي غيره

كان نفسي أتفرج على حلقة منى الشاذلي بس منه لله خالد الغندور اللي احتل التلفزيون طول الأسبوع.. أخد مننا كل البرامج بقى واااااجب يومي

آسفة على الإطالة لكنه موضوع ثري

تحياتي

ذو النون المصري يقول...

دبابيس بتوجع صراحه
المراه الان سلعه لدي الرجال لارضاء شهواتهم و لدي النساء ايضا علي ما اعتقد لانها تريهم ما لا يعرفون فيحدث تبادل للخبرات و انتقالها
يعني اي واحده ترمي نفسها في هذا التيار ان شاء الله ترجع بقدرة قادر
المهم ان الكل يؤدي كما يعتقد رساله
يحسبون انه يحسنون صنعا

بنت القمر يقول...

احنا
كل من لا قيمه له ياعزيزي اصبح يدعي انه صاحب رساله بوسي سمير صاحبه رساله
وخالد يوسف صاحب رساله ونجوي فؤاد بتطالب الرساله توصل لمستحقيها
في زمن الهلس اصبحت الطبيبه = بوسي سمير او سعد الصغير
ونجيب محفوظ =نجوي فؤاد
واختلط كله ببعضه اشكر مروروك
ومبروك فتح المدونه تاني
تحياتي

بنت القمر يقول...

حفصتي المحترمه
بصي يا حفصه الراجل بيقول انا عامل الفيلم ضرخه لحكومه نظيف وبيحملها مسئوليه تدهور اوضاع العشوائيات واتساع رقعتها لنظيف والحكومات السابقه
يعني الراجل واضح وصريح بيكلم الحكومه وانتي اهو بتقولي الحكومه عارفه ومطنشه او مستعبطه وان حتي في امريكا عارفين بلاوي الحرب قبل ما عم مايكل مور يقدم فيلمه فهرنهايت
ورغم اللي الراجل عمله واللي خالد يوسف عمله الاوضاع زي ما هي يبقا مين بقا اللي اتحرض؟؟
مفيش
عارفه يا حفصه مين اللي اتحرض اللي اتحرضوا هما شباب المراهقين والاكبر سنا عشان يشوفوا ازاي مخرج مصري يجيب سميه الخشاب مع غادهعبد الرازق وهما شواذ او سحاقيات وراحوا السينيما او المول وكعوا العشرين جنيه عشان يتفرجوا ولو قلتيلي الافلام الاباحيه ماليه النت وملقحه علي السيديهات بسهوله اى ولد يقدر يجيبهم اقولك لو قدامك فرضا فيلم بورنو لغاده عادل او مني زكي واخر لواحده اجنبيه شفقرا م تفتكري ها تتشدي وتعوزي تشوفي مين اكتر؟؟
طبعا العربي ليه عشان احنا كدا نحب نشوف اكترفضايح بعض او نشوف واحده عربيه او واحد عربي بيكسر المألوف
وبيحطم التابوة
*************تانيا لازم نتفق اولا ان مش كل حاجه حلوة تبقا بطه !!ولا كل بت لابسه كات تبقي مزة!!بمعني مش كل من ادعي حريه يبقا حر او عنده استعداد يحافظ علي حريه الاخرين
فين حريتي ان مشهد غير لائق يقتحم بيتي فين حريتي اني مش مضطره اشرح لبنتي اغتصاب او سحاقيه يعني ايه
يا حفصه انا مع حريه الابداع بس في حدود لاتخدش حيائي اللي عاوز يشوف بورنو براحته والبورنو موجود بس مش معني كده اني ادخله بيتي
او اوريه لبنتي اللي عندها 11 سنه
يمكن ياحفصه انتي معندكيش الاشكاليه دي عشان ولادك اصغر لكن انا عندي بنتين 8 و11 سنه بيبي لكن ابتدت مداركهم تتفتح
ويا دوب ابتديت اشرح لهم الدنيا فيها ايه
انا محتقره خالد يوسف لسبب انه حشد كل المشاهد دي في الاعلان كانه بيعرض محتوي بضاعه سيئه عشان اهو العينه بينه ها اوريكوا اغتصاب وشذوذ وعنف وكل اللي نفسه في حاجه يجي
طبعا فيلمه وبراحته ولكن لما يركز الاعلان في اللقطات دي وتتعاد علي روتانا طول النهار يبقا اختصر فيلمه في مشاهد سميه ببدله الرقص او مع غاده عبد الرازق وضحك علي العيال الصغيرة اللي واخدين مصروفهم الحكايخ تجارة في تجارة وسيره العشوائيات هي من باب ذر الرماد في العيون و المتاجرة بالالام الفقراء
تحياتي

بنت القمر يقول...

عباس العبد
بشوف الال بي سي وبشوف البرنامج وبتعجبني ايستيل وفدوي المغربيه لكن الموضوع يبق هلس في هلس ونوع من تضييع الوقت او الترويح عن النفس ليس الا
____________________________
بعد ما تقرا ردي علي حفصه بالنسبه للترميز او استعمال الرمز طبعا انا مش بحكم من منطلق ديني او اخلاقي او اي منطلق لكن من منطلق انسانه متذوقه للعمل الفني انا ما بحبش الصورة الفجه با عتبرها مش شيك بكرة المباشره زمان كان في فيلم لسعاد حسني كانت بتقوم بدور بنت متحررة ومديرها يوسف شعبان اخدها وحطلها مخدر في البيبس واعتدي عليها
مش فاكرة اسم الفيلم بس اد ايه الصورة كانت راقيه
رحت السنه اللي فاتت فيلم شقه مصر الجديده بتاع محمد خان وكان فيه مشاهد جريئه جدا لخالد يوسف ومروة حسين
رغم كده افيش الفيلم كان لو تفتكر غاده عادل واقفه ورا باب الشقه في الظلام والشراعه بتاعه الباب بتشع نور علي وشها
محمد خان عشان مش رخيص ولا بيدور يسرق ازاي جيوب المراهقين مخلاش لا لاعلان ولا الافيش مشاهد الفيلم الجريئه اللي داخل الفيلم
هي دي الفكرةانت بتناقش ايه وازاي
مش موضوع سينما نظيفه او سينما مبقعه لكن صورة مبتذله وصورة راقيه
منور تحياتي

عباس العبد يقول...

السيد راجى
ان الجنس وما يدور من حوله من الادوات الهامة فى صناعة الترفيه
هذه الصناعة الضرورية لاستمرار التوازن فى المجتمع الرأسمالى الذى يعمل فيه الناس كالتروس فى الاله العملاقة التى تدور بدون توقف ولا تسمح لهم بوقت كاف لالتقاط الانفاس والتفكير والتأمل فى جدوى العمل فى تلك الطاحونة الجهنمية
صناعة الترفيه هى الهدية التى تقدمها اليات السوق لادمغة البشر لتصنع معنى لحياتهم وتبيع لهم المتعة الوهمية على الشاشات
والانسان مخلوق يبحث عن تلبية رغباته وغرائزه ليبقى على قيد الحياة وكفى وصناعة الترفيه ووراءها ماكينة الاعلام الصهيونية العالمية تخلق له حاجات جديدة كل يوم ليسعى الى اقتنائها واستهلاكها
ورؤوس الاموال التى تستثمر فى تلك الصناعة كبيرة بدرجة مذهلة ، وهى ارباح كبيرة وورائها مستفيدين مستعدين لفعل اى شيء فى سبيل الاستمرار فى جنى ارباحها
وهذه الصناعة تغذيها انشطة سرية تحت الارض منها الدعارة وتجارة المخدرات وتجارة السلاح ، كل هذه الانشطة تخدم صناعة الترفيه وتحميها
النساءوالرجال العاملين فى الفن المعلن والسرى والموديلات والبغايا والمدمنين وتجار المخدرات والخمور هم وقود تلك الانشطة
وليس من الغريب اذن ان يتم تهميش الاديان والاخلاق والقيم والاحتفاظ بها فى دور العبادة الخاوية او بين صفحات الكتب المهجورةلا تتعداها الى الحياة
......
انحناءة من قداستى
انا اؤيدك تماما
الترفيه مقابل ميكانيكية الاداء و الحياة
شكرا فعلا لتحليلك
....
بنت القمر فدوى ضحكتها تحفة و زى العسل
بس يا ريت تشجعى رانا يوسف
بتلبس نضارة زى و ضهرها كان واجعها زى
انا بحبها و مش حعرف اعيش من غيرها
بحبه يا بابا
عريس يا اماى
هههههه
....
انا متابع الردود و لما قريت ردك و نقاشك مع حفصة
فهمت قصدك
شكرا لأهتمامك
متنسيش رانا يوسف
روحى روحى روحى

بنت القمر يقول...

لست ادري الاسخف من بوسي سمير المذيعه اللي بتكلم بوسي سمير علي طريقه كدا عيب وكدا كخ بوسي سمير رغم بجاحتها طبعا بتدافع عن نفسها واعتقد انها هزأتها لما قالت لها انها كمذيعه ممكن تكون مرفوضه اجتماعيا برضه باعتبارها عاملا شعرها وملطخه نفسها ميك اب
والحقيقه انا بشوفها اوفر اوي زي العروسه الحلاوة يعني هزأتها بالادب
اتنرفزي براحتك يا لست ادري وشوطي كمان البيت بيتك منورة
تحياتي

بنت القمر يقول...

راجي________(2)ا
حضرتك مش دينا صورات ولا حاجه حضرتك مجرد انسان محافظ ومتوازن وبيحاول يحافظ علي اتزانه في عالم مليئ بالشرور
واب بيحاول يحافظ علي لولاده من عالم فاسد وهو بين نانرين يرميهم في البحر وهما يتعلموا العوم لوحدهم ولا يحاوط عليهم عشان يجميهم
يا استاذي الفاضل يعني انا كمان انسانه عاديه وبسيطه بحاول احمي بناتي من شرور العلم ده بجاول افهمهم كل شيئ بدون ما اخدش طفزلتهم ولا برائتهم زي البيبي ما ينفعش ياكل سمك وهو لسه مطلعلوش سنان
كلامك محترم جدا ولا اختلف معاك فيه بس نصيحه من اخت ليك
لازم تصاحب ولادك لازم في نظريه في التربيه اسمها الدلال الحازم بمعني لازم تعرف بيفكروا في ايه وازاي تقدم لهم خبراتك الحياتيه علي هيئه جرعات متناسبه مع المرحله السنيه اللي هما فيها متخلقش فجوة بينك وبينهم متتكسفش تخرج معاهم او مع اصحابهم تلعب معاهم كورة او بلياردو
واو تتعرف علي اصحابهم لان كل ما قلت المسافه اعتبروك صديق مش رقيب
وفي نفس الوقت تحتفظ بهيبتك ادامهم تحافظ علي الشعرة اللي ما بين الصداقه والهيبه تحياتي ليك

بنت القمر يقول...

وWith Myself
تاني الحكايه مش بدله رقص لا حكومه
انت بتقول انه مزايد وانا بقول انه مدعي يبقا متفقين
انت مش شايف انه في مشكله في المشاهد
انا شايفه ان الصورة مبتذله وفجه دا حاجه ودا حاجه يمكن اختلاف تذوق او وجهات نظر يمكن انت عشان لسه مممممممش مسئول عن اسره واولاد بتتكلم كدا لكن صدقني بعد ما تكون اب وعندك طفل او طفله لازم تحميهم وتقدم لهم العالم والحياة حبه حبه منهجك وتصورك ها يختلف كليه
وها تكون ملكي اكتر من الملك ومش ها تسمح لحد يقرب ولا يخدش براءه اطفالك قبل الاون
انت بتحطهم في بيئه صالحه وشويه شويه يبتدوا يخرجوا خارج نطاق سيطرتك لكن حد يجي عنوة يشدهم منك ويرميهم في الوحل لازم وحتما ستعترض
تحياتي

بنت القمر يقول...

خمسه فضفضه
بصي يا عزيزتي بالنسبه ليوسف شاهين او خالد يوسف لا اخجل الحقيقه اني اقلك ان الخط بتاعهم بعيد اوي عني من منطلق فني حتي اذا حطيتي علي جنب المحاذير الدينيه والاخلاقيه
كلام خالد مع عمرو اديب نوع من الفلفصه او الردح والتلقيح انا جبت سحاقيات واخوك جاب شواذ يبقا خالصين مين بقا اللي بيدفع التمن
طبعا ينحرقوا علي بعض بس المؤذي لما تشوفي كل ده في الاعلان عنوة
وطول النهار الاعلان يتعاد ويتعاد ويقولك انا بكلم الحكومه انا بأطلق صرخه للحكومه
وهو كذاب اشر
مجرد فيلم تجاري حشد ليه المحاذير كلها في الاعلان عنف وشذوذ واغتصاب
*************بالنسبه علي تعليقك علي بوسي سمير اسمحيليل لا دي عجبتني ولا دي ما اسخم من سيدي الا ستي ولو تتكرمي تقري ردي علي لست ادري
*******************
نجوي فؤاد رقاصه ومالو عادي بس بقا تعمل فيها مثقفه دة بقا اللي بفقع
دياجونال وهابيلو قابيل ورساله وكلام مفذلك حاجه تخنق ماشي مسابقه رقص وفي الهلس اوكيه مالم بق ومال الفن التشكيلي والرساله كدا بقا بتعبط وتطرح نفسها كمثقفه
تزعلني اوي
منورة وتحياتي يا صديقتي

بنت القمر يقول...

fad-fadat nour
فعلا يا عزيزتي شكلنا كده بقينا احنا اللي غلط بس العيب علي اللي بيدفع لدول تمن تذاكر سينما او يروح بتعشي ويسكر ادام بوسي سمير زي ما قالت من بقها التذكرة ب600 جنيه
لاحظي انها لازم تخفض عشان الضرايب
يبقا بقا العلم ايه لايكيل بالبدنجان
منورة خالص جدا تحياتبي

mohand يقول...

السلام عليكم

رغم اني شبهه متوقف بس الموضوع استفزني

انا متفق معاكي ميلون الميه
بس طبعا بالنسبة لي عشان النواحي الاخلاقية والدينية والقيم والمبادئ
لانك في تعليق قولتي ان مش هدفهك كده ولا فكرتك كده

بالنسبة لنقطة تفضيل افلام البورنو العربي عن الاجنبي

حضرتك احب اقول بس للي قالوا ان اللي عايز هيلاقي علي النت

حضرتكم الجنس مش بس رؤية
الجنس والاثاره كمان صوت
الاذن بتثير برضه
يعني لما بنت اجنبية بتتكلم في فيلم بورنو
اللي قاعد ولا فاهم حاجه
عشان كده بتكون الاثارة بصرية فقط

انما بقي لما تكون سمعية بالعربي
يبقي يا سلام دا يوم المني بالنسبة له

انا كرجل واعترف
اثار اكتر من كلمة خارجة جنسية من عربيه وبالاخص مصرية
عن اني اثار من ديمي مور حتي

تحياتي

بنت القمر يقول...

هانودا
الفيلم مجاش قطر
احسن ما كفايه عليكي الاعلان
زان كانت فيه افلام بتناقش قضايا المهمشين والفقراء زي سواق الاتوبيس وافواه وارانب والحرام الذي كان يناقش قضيه الفلاحين الرحل عمرك ما تفتكري لفاتن حمامه لقطه اوفر فيه اوفيلم زي الخيط الرفيع رغم انها كانت كانت فيه فتاة ليل ثم عشيقه محمود ياسين مش بتفتكري من الفيلم الا خناقاتهم وعياطها او مشهد وهي بتقص له هدومه بالمقص ورغم كدا كنا فاهمين المضمون مش كل دول مخرجين برضه
عملو ا اعمال عظيمه ولا الابتذال والرخص هو الوسيله الوحيده لتقديم فن راقي
طولي براحتك انا كمان رغايه اوي
منورة تحياتي

بنت القمر يقول...

ذو النون المصري
يا ريتنا بنتبادل الخبرات في حاجه مفيده ويا ريت هما بيقدموا رساله في حاجه هادفه الا كله هلس في هلس
وسرقه لجيوب المراهقين في صورة مبتذله وتمسح في الفقراء والمهمشين عشان ندي صبغه شرعيه للعمل الفني انه جرئ وهادف وبيقدم رساله

بنت القمر يقول...

مهند انا قلت مش بناقش الموضوع من منطلق اخلاقي او ديني عشان محدش يقولك دي بقا متطرفه ولا اخوان
وانا لاكدا ولاكدا
انا واحده عاديه عندي اخطاء مش قديسه ولا رابعه العدويه
انا بناقش الموضوع مجرد انسانه واحده لي ذوق في اي عمل فني بشوفه وممكن اقدر ده ده مبتذل ولا لأ
داليه لازمه ولا للأ
عشان مندخلش في مناقشه فقهيه مش البوست مكانها وهي محسومه اصلا وبما انك فصصت الردود وشفت ردي علي حفظه فمفيش عندي غير ربنا يحفظنا جميعا من الخطأ والزلل
ويعافينا ويعفو عنا
تحياتي

عدى النهار يقول...

دى إسمها رزالة مش رسالة

تعقيبك على التعليقات ممتاز.. واضح إنك كنتِ مبؤئة على الآخر من اللي شاهدتيه فى التلفزيون

mohand يقول...

السلام عليكم

علي غرار فيلم مافيا وكلام الجزار


غريب امركم ايها المسلمون
تؤمنون بالله الها واحده
وانه يغفر الذنوب جميعا ا ان يشرك به
وتؤمنون انه يحرم ويحلل ويأمركم بالشرائع

ولكن عند تطبيق تلك الاوامر والنواهي
تدعون انكم مخطئون وان كل شخص له خطئة

الم يكن خليفتكم الاول عمر يخطأ ويصيب
لماذا لم يكن يقول مثلكم انه يتحدث بناء علي الذوق العام
هل كان خليفتكم اخوانيا او متطرف

هكذا حالكم ايها المسلمون
تقولون ما لا تفعلون

تقرأون في القرآن الايات تحثكم علي الامر بالمعروف والنهي عن المنكر
ولكن حين يكون الامر في الواقع والحقيقة تتخاذلون بدعوي عدم التطرف والاخوانية

فعلا غريب امركم ايها المسلمون


الجزار

mohand يقول...

تصحيح
اميركم الاول عمر
وليس خليفتكم

HafSSa يقول...

يا قمر حرجع تاني اقولك و انتي ايش اكدلك انه مافيش شباب اتحرض و بدى يعمل خطوات عملية و من غير ما يجعجع عليها بصوت عالي؟؟؟
ده شئ
الشئ التاني ان مشهد الشذوذ اللي بتظهر فيه غادة عبدالرازق و سمية خشاب ميتعداش العشر دقايق ان مكنش اقصر عشان مكونش ببالغ
و بعدين فلم عن احداث بتحصل ولا في الخيال متوقعين يكون الاعلان بتاعه ايه؟؟
مؤكد لازم حيجيب المشاهد اللي تشد الجمهور و تبينله نوع الفلم ده ايه و بيتكلم عن ايه و ده حتى مفيد عشان لما هو يجب في افيشات الفلم المشاهد الصارخة و القبيحة الوحشة اياها يبقى كده الجمهور اللي مش عاوز يوري ولاده او حتى يشوف بنفسه الفلم ده بيتكلم عن ايه مش حيروح و يضايق نفسه بنفسه
و خدي بالك انه لو كان عمل اعلانات الفلم طبيعية جدا و مش صارخة زي ما حصل و الناس راحت الفلم و اتفاجت بمستوى المشاهد اللي ضايقت الاغلبية دي كان زمانهم شبشبوه على باب السينما عشان منبهش الجمهور ان الفلم قليل الادب بالمنظر ده
الصراحة انا احترت ننبه من الاول و لا نخلي الناس تيجي على عماها؟؟؟؟؟؟؟؟؟؟
و الظاهر دلوقتي ان مشكلة الفلم ان افيشه كان مش كويس و غير فني و مش نفس مستوى رقي افيش شقة مصر الجديدة
و اذا كان ده المقياس فاولى بينا حفاظا على كل فن نضيف من الفن المش نضيف ان احنا نمنع افلام من الظهور زي كرك و شيكامارا و هلم جرا و كله تحت مسمى الفلم اساء لايه و ماساءش لايه
و خدي بالك انا عندي اشرف لي مليون مرة ان بنتي تسالني عن معنى الشذوذ و احذرها منه و لانيش افرجها على فلم ردء زي كركر مثلا و ابص الاقيها بتتكلم بالطريقة الفجة السوقية الغير لغوية بتاتا زي محمد سعد لاني انا مش النوع اللي بيحب يغمي عيونه في الرمل يا قمر
بنتي و في الزمان ده حتعرف يعني ايه شذوذ يعني حتعرفه
بس لما تعرفه مني و تعرف انه حرام و احصنها منه احسن لي مليون مرة من فلم لمحمد سعد او سعد الصغير الخ الخ الخ

الشئ التالت انك رجعتي تاني افترضتي ايه نوع البورنو اللي الشباب حيفضل يتفرج عليه و كأن ذوق الشباب كله بقى نمط واحد يعني هي المشكلة بقت ان ايهما اكثر جذبا للشباب في افلام البورنو؟ الشرقية ام الغربية ما كله في الهوا سوا
الشئ الرابع انه لو على اقتحام القنوات الفضائية للبيوت و لان قناة زي روتانا حتفضل تعيد في الاعلان فالحل بسيط جدا
افصلي القناة
و لما انتي و الف ست بيت خايفة على بناتها حتلاقي انكوا كونتوا جبهة رفض و حتلاقي ان روتانا يا اما حتمنع عرض اعلانات بالمنظر ده او حتصر على نوع اعلانات معينة مهما كان الفلم
الحاجة الاخيرة اللي احب اقولها ان السينما في الاصل تكونت كتأريخ حي لما يحدث في عصرها و بعدين تطورت الحكاية و اخدت لها اشكال و صنوف كتيرة لغاية ما وصلت لما هي عليه الان
و بناءا عليه تعالي نتخيل انه كمان الف سنة مصر ان شاء الله تقدمت و ازدهرت و تمت ازالة العشوائيات و اصلاح كل ما نشتكي منه
مين حيكون جاب سيرة العشوائيات و الناس اللي فيها الا اذا كتبنا و مثلنا و غنينا و بحثنا عنها بكل ادوات الفن و الصحافة و التسجيل الممكنة؟؟ و متقوليليش انه كفاية نكتب عنها في الصحافة او ان حد يعمل فلم تسجيلي و بس
كل شخص في موقع مسؤولية من حقه و من دوره اصلا انه لازم يعمل تغطيتة للموضوع بالطريقة اللي هو شافها

والسلام ختام

With Myself يقول...

بنت القمر:

أنا ماقلتش علي خالد يوسف أنه مزايد ، يمكن أنتي ما خدتيش بالك شوية من كلامي. :)

من ناحية تربية الأطفال دي بقي بتختلف من شخص لأخر ، أنا لو ابني جه قالي طنط وطنط بيعملوا ايه هاقوله يا حبيبي ربنا خلقنا الراجل بيتجوز الست وعمو خالد جاي بيحذرنا بيقولنا أوعوا تعملوا كده عشان حرام/أخلاقياً مش مضبوط ولو سألني أكتر هاشرحله بطريقة مبسطة علي أد سنه وتفكيره.. كده أنا كسبت ابني أو بنتي في صفي وخليت المعلومة جاية مني أنا..

كل الإحترام

Ragi يقول...

عباس العبد
اشكرك ياباشمهندس رامز جدا والله اخجلنى اطراءك وانت ماشاء الله استاذ كبير فى عالم التدوين فالاطراء يتحسب باتنين
اشكرك وده طبعا بعد اذن بنت القمر

بنت القمر يقول...

عدي النهار
اشكر تواجدك ومتابعتك
تحياتي

بنت القمر يقول...

مهند
مالك يا عم داخل شمال ولا كأنك بتكلم ابو لهب
فيه ايه؟؟
انا قلت مش بناقش من منطلق وخلفيه اسلاميه مش معني كدا اني معنديش مبادئ اسلاميه او دينيه او قيم وانها عندك بس
لو حضرتك ها نتكلم بقال الله وقال الرسول واحلال والحرام يبقا القضيه محسومه من قبل ما نبدأ والحلال بين والجرام بين
وطبعا المشاهد دي لها الف محظور ديني زيها زي الفرجه علي نجوي فؤاد او بوسي سمير ولو دخلنا من النقطه دي يبقا البوست ده ما لوش لازمه اصلا لكن انا بتكلم من منطلق انسانه عاديه ومعتدله مش قديسه ولابتعمل ولا بتدعي انها بتعمل كل شيئ صح ولا عشره من عشرة ولا لازم اقدم نفسي قدوة واكذب علي زواري عشان اعجب يا سيدي انا بشوف الال بي سي واو تي في وبشوف عبله الكحلاوي ومحمد هدايه
في ايه بقا
في مشكله؟؟
بشوف افلام اجنبي زي حضرتك ما بتشوف ديمي مور وبشوف برامج الفتاوي
وما بقولش علي نفسي لا قدوة ولا نموذج عشان كدا بقول بنخطأ وبنصيب
مش عارفه حضرتك معترض تحديدا علي ايه؟؟
عشان بقول انا مش اخوانجيه طيب انا مش اخوان بمعني الاخوان الايجلبي انا مش قدوة ليك ولا لغيرك
بحاول اعرف واشوف المجتمع فيه ايه بشوف بوسي سمير ونجوي فؤاد لكن ما قلتش عليهم واو ولا دول نجوم مجتمع يبقي الامر في حدود الهلس اللي الكل بيشوفه وسميت كل ده دبابيس تلفزيونيه
ولو انت شايف نفسك احسن عند الله مني
اوكيه
عادي انا يا سيدي انسانه بأخطاء وسبت لك الصح كله
منور
وابقا بقا تابع البوست الجاي
تحياتي

بنت القمر يقول...

حفصه العزيزة
انا عارفه انك مش بتحبي كلمه اختي
ورغم اني مش اخوانجيه
بس بعتبرك اختي العزيزة
بصي يا حفصه الموضوع كله مسأله تذوق
انتي شفتي قيلم شقه مصر الجديده؟؟
مين قالك انه يندرج تحت بند السينما النظيفه؟؟
دا فيه مشاهد جريئه جدا لكم محمد خان مستغلهاش في الدعايه التلفزيونيه ولا الافيش
هو مش حضرتك برضه زي ما انتي مناصره للحريات مناصرة برضه لحريه المرأه وكرامتها وعدم استخدام جسدها كسلعه؟؟مش انتي ضد استخدام المرأه كشيئ في اله الاعلام الجهنميه واختصار قيمتها في جسد ملبني زي ما قاتي
ولا انا غلطانه؟؟
لو اجابتك اه اقولك بقا جميل متفقين
اللي عاوز يناقش قضايا المهمشين والفقراء مرحب بيه بس ما يلبش الحق بالباطل عشان يقدم نفسه كثورجي وجرئ وصادم لما فيلم الحرام ناقش قضيه الفلاح المصري المطحون وعمال التراحيله
ونافش قضيه الاغتصاب والبلهارسيا
فيلم يجيب الاكتئاب والهسهس
لاحظي ان فاتن حمامه سقطت في الحرام تحت ضغط الحاجه
المخرج قدم ده ازاي قدمها نزلت مع الراجل اللي قدم لها رشوة جدر البطاطا وطلعت بتعيط هو احنا ما فهمناش
ولا لازم يجيب لحمها ورجليها و عشان نفهم
الفيلم الخالد قدم قضيه الاجهاض في بيئات تحت خط الفقر ومعاناه من حملت بطريقه غير شرعيهللتخلص من الحمل
قدم الزوج العاجز بفعل البلهارسيا مش كل دي قضايا جريئه
ولالأ؟
طيب في هنا بقا رقي في الصورة وغير مباشره
انسي بقا روتانا سينما والاعلان وبنتي والهجص ده كله
احكمي بمنط ق فني
حاجه تانيه
فيلم الخيط الرفيع قدم العشيقه التي تعيش في عالم اخر في شقه مع محمود ياسين وتقدمه للمجتمع وتدفعه للامام وهو يستلغها وينساق لها ويضرب عرض الحائط بالمجتمع وقواعده وحين يصل يتنكر لها ويلفظها
مش دي قضيه جريئه ولالأ
عمرك شفتي في الفيلم
كلمه وسخه ولا مشهد فاضح ولاسرير وقميص نوم
كل اللي تفتكري من الفيلم الحوار الفلسفي بين فاتن حمامه ومحمود يس
حول الاله اللي بيغفر
وهي بتقله بس انا مش اله وهو بيتنصل منها وبيفكرها بالمجتمع وهي بتقله وتفكرة انه عمرة ما فكر قبل كدا بالمجتمع
هنا واحد بيقدم قضيه
بيقدم قصه مش مناظر
ولاحظي ان وقتها كان المجتمع اكثر تحررا والناس اكتر تحرر في ملابسها وافكارها
طب لو خالد يوسف بقا اخرج فيلم الحرام كان ها يعمله تفتكري ازاي ولا فيلم زي الخيط الرفيع
عموما انا احترم وجهه نظرك وتبق المسأهله في حدود اختلاف الاذاق والتذوق
منورة خالص

بنت القمر يقول...

ويذ ماي سيلف
تمام متفقين علي قد سنه يعني كلام 15 سنه ما ينفعش يتقال لبو عشر سنين ولا كلام العشر سنين ينقال للست سنين
السينما للي عاوز يروحها وعنده خط معين بيتابعه
اللي عاوز احمد حلمي يشوفه واللي عاوز محمد سعد يشوفه واللي يحب خالد يوسف براحته
يروح ويقطع له تذكرة
لكن ان الاعلان يقتحم البيت ويحرجك ادام ابنك اوبنتك ويخليك لازم تجاوب
او تضطر تكدب هو دا اللي ضايقني واعترض عليه
العالم كله في امريكا وفرنسا في تصنيفات سنيه للافلام
فوق 16 واو تحت 16
وفي قنوات كتير
بتعرض افلام بعد 12 في التلفزيون او بتعرض ان الفيلم ده لايصلح للاطفال تحت 16
الناس المحترمه كده
لكن احنا بق ركنا ضميرنا علي الرف
وجرينا ورا المكسب وسينما الهيافه والتجارة
منور تحياتي

بنت القمر يقول...

راجي (3
اهلابيك دايما حضرتك وعباس العبد المدونه مدونتكم ومدونه كل الزوار المحترمين
تحياتي

DantY ElMasrY يقول...

احنا مجتمع يدعى الفضيلة ويكره من يكشف عورته ويفضحخ سؤاته
عندنا مشكلة قديمة إننا دايبما بنخلى كلامنا عند ادنى مستوى عقلى ونتكلم
زى حكاية الإمتحان فى مستوى الطالب المتوسط بتاع ىالثانوية العامة
العمشكلة التالتة ان ناس ماشفتش حاجة وزعلانة
أنا شفت الفلم ياستى واتفرجت عليه باهتمام
الفلم كعمل فنى بيكشف بشكل مباشر عورة مجتمع سواء مناطق عشوائية
أو ما اصطلحنا على تسميته أحياء راقية
وأقدر أفسر هجوم يوسف شريف رزق الله وغير على المخرج إنهم راضيين عن الواقع وشايفين مصر بتتقدم
علشان قالوا -دى متاجرة بأوجاع الناس كأن المبدع لازم يطبطب على المشاهد وياخده على قد عقله ويقوله فى كل مشهد : أنت كويس وخليك زى ما أنت
وبالنسبة لدعوتك انه يرسل الفلم الى من يهمه الأمر فقط حتى لا يجرح مشاعر ناس تانية بمشاهده البذيئة
قدا ضد مبدأ الفن أصلا
فالفلم دعوة تحريضية فى موسم سينمائى تحريضى
فمستوى الكلام عن الفساد انتقل من الحديث عن رشوة أو عمولة أو ضربة حظ
كما أفلام سابقة إلى مستوى غير مسبوق من المباشرة والمواجهة
يجب علينا اننا نشجعها ونتقبل رسالة التحريض بشكل ايبجابى
لا أن نغضب ممن كشف سؤاتنا
أنا مستعد أحكيلك حكايات عن مناطق عشوائية وريفية مالا يختلف عما حكاه خالد يوسف
وعشان تكونى عارفة زعل سكان العشوائيات من المخرج وردهم إن سكان الأحياء المنظمة ولا أقول الراقية بيطلع منهم بلاوى بردك
معناه إيه ؟
معناه ببساطة اننا مجتمع يدعى الفضيلة ويكره المواجهه
انا متفق معاهم ان الخير والشر موجودين حتى فى بيفرلى هيلز
نفسى الناس تشوف المنطقة العشوائية على انها مصر كلها كدا
ويشوفو الحكومة بتتصرف معاهم ازاى
علشان مايجيش مدعى فضيلة زى يوسف شريف رزق الله يمارس كهنوت ثقافى ويقول للشعب اصبروا

قلم جاف يقول...

لست من مدمني نظرية المؤامرة لكني أشعر أن تلك الحلقة من "العاشرة" جاءت كلعبة من البرنامج المذكور لتوجيه ضربة لـ"القاهرة اليوم"..

ولإننا بنعيش في ظل نظرية انت معانا ولا مع التانيين ، ورغم إن أديب أخطأ في طريقة هجومه وسمح لخالد يوسف ياخد عليه بنط ، فإن الهجوم على فيلم بيلقى كل التهليل من ميديا المال السياسي ومن ضمنه العاشرة طبعاً كان كافي لوضع القاهرة اليوم في خانة الياك لإن الميديا المذكورة عملت شبورة للفيلم على إنه "فيلم معارض".. وبالتالي من ينتقده فهو حزبوطني.. وبالتالي -معلهش كررتها كتير - كانت فرصة من العاشرة لاستدرار تعاطف من "آلمهم" الهجوم على حين ميسرة.. وياريت العاشرة لعبها صح!

أنا مش بأدافع عن "المسلماني" اللي شايف أن أداؤه "مثير للشفقة" في "الطبعة الأولى" .. لكن الراجل كان لوحده زي ما قلتي في حلقة فيها تمثيل غير متزن للرأي والرأي الآخر تحول فيها إلى "ميش ديش" القعدة.. بل إن بعض هووليجانز العاشرة وصفوا الراجل بإنه حزبوطني .. أضيفي لدة إن تحفظاته وتحفظات أديب وناس كتير على المشاهد كان لها ما يبررها ، إلا إذا نسي أنصار الفيلم إن المشاهد "صادمة" كماً وكيفاً وعليه طبيعي المشاهد بشكلها دة تستفز شريحة كبيرة من "غير" المحافظين .. فما بالك بالشرائح المحافظة..

عذراً للمط والتطويل في هذا التعقيب "المسلسل"! :)

بنت القمر يقول...

دانتي المصري
علي فكرة انا لااعترضت علي مناقشه احوال العشوائيات ولا اعترضت علي فكرة الفيلم ولا التحريض حضرتك افتكرت اني جبت سيرة الفيلم يبقا بهاجم كمان انت استعجلت ومقرتش التعليقات
كانت ها تفهمك ايه تحديدا اللي معجبنيش
يا ريت تقراها تاني
كنت عرفت ان يوسف شريف رزق الله كان بيؤيد الفيلم وعاجبه في مداخلته التليفونيه وانه شافه مرتين ومش معترض خالص عليه من اي ناحيه
وان الراجل ولا عمل كهنوت ثقافي ولا بطيخ اقرا تاني يا دانتي وبالراحه
تحياتي

DantY ElMasrY يقول...

عزيزتى بنت القمر
انا لما قلت اسم يوسف شريف رزق الله كان قصدى اللى قال ان المخرج بيتاجر بأوجاع الناس
مش يوسف تحديدا
تانى حاجة ان انا عشت سنتين فى عين شمس وهى منطقة شبه عشوائية
والمنطقة اللى عشت فيها مالقيتش فيها غير طالب واحد فى ثانوى والباقى اتسربو من التعليم
علشان محدش ييجى يتكلم ويقول ان سكان العشوائيات ميه ميه وبيطلعوا دكاترة
علشان الرد دا مصيبة فى حد ذاته
من ناحية تانية الفلم دا سلعة فى السوق من حقك تشوفيها او ماتشوفيهاش سواء بسبب أو بدون سبب
كمان ناحية
موضوع التعبير السينمائى عن مشاهد عنيفة او عدوانية له اكتر من اسلوب
والأسلوب الرمزى فيه ميزة انه مابيصدمش المشاهد
ومايخليهوش يتسائل
لكن الأسلوب المباشر بردك أسلوب محترم ومناسب فى بعض الأعمال
ليا ملاحظة اخيرة ان مشهد الشذوذ الجنسى بين سمية الخشاب وغادة عبد الرازق المخرج عامله علشان بس يوصل لجملة فى الحوار "انتى حيلتك حاجة غير جسمك"
والرقص تبع سمية مكانش مبتزل ولا حاجة دى حتى كانت بتطلع مكشرة زى اللى بترقص غصب عنها
لكن الفلم نجح فى انه يرفع سقف النقد السينمائى للنظام وللمجتمع
وهيتبعه افلام تانية
احترامى

DantY ElMasrY يقول...

معلش نسيت اقول حاجة
ان كلامى على الفم مش على البرنامجلأنى ماشفتوش
والملاحظتين اللى قلتهم طلعتهم من الكومنتات يعنى لو كنت غلطت فى اسم ولا حاجة سامحينى

بنت القمر يقول...

قلم جاف
معلش بقا اختلف مع حضرتك يصنفوا المسلماني حزب وطني ولا شيوعي ولا حتي عميل موساد يكفيه شرفا انه عبر عن رأي يعتقد صحته وما تكسفش انه يواجه المعجبين بالفيلم بأنهم مجموعه مرضي نفسيين وطس الكلام ده في وش خالد يوسف وسحر الجعارة وسميه الخشاب وعلي التليفون من مؤيديهم
سلمي الشماع ويوسف شريف رزق الله
كفايه كده قلهم في وشهم انت بتاجر بالالام الفقراء ولغتك السينيمائيه ركيكيه
كان اسهله يعمل فيها تحرري وتقدمي وثورجي ويقول فيلم تحفه وابداع محصلش
لكن عبر عن رأيه بلا خوف انتقض سوداويه الفيلم اللي حضرتك كتبت عنها
وانتقدانتقدخط شاهين كله
وقال بلاوي وكان صعبان عليا ومجتش الا مكالمه او اتنين تؤيده وقطعوهم علي طول
انت مش بتصدق في المؤامرة
انا بصدق
واعتقد ان خالد يوسف طلب شخصيا استضافته في العاشره نكايه في عمرو اديب
وتهليلا للفيلم
اللي معجبنيش ادائها كانت مني الشاذلي اللي قال كانت عاوزة تقف علي الحياد
فكان كلامها مسخ مبتور عديم اللون والطعم
اهلا بيك

بنت القمر يقول...

دانتي
ولا يهمك
تحياتي

HafSSa يقول...

يا ستي انا مش بقبل بكلمة اختي دي من الغرب بس
لكن منك انتي مقبولة انتي تقولي اللي انتي عاوزاه
بس عاوزة اقولك على حاجة محمد خان لما جاب المشاهد الصادمة دي في فلم مصر الجديدة و لكن مجبهاش في التترات او الافيش فده لانها مش من صلب الموضوع
هي موضوع فرعي جدا مش من متن القصة الاساسي و ده غير موضوع خالد يوسف و حين ميسرة
يعني هما تقريبا العكس
في الموضوع و التناول و ايه القصد من الفلم و حاجات كتير
مصر الجديدة ماهواش فلم مهيص اصلا زي حين ميسرة
يعني هو عبارة عن فلم رومانسي لطيف بيحكي قصة بنت و ازاي الظروف وصلتها لراجل تحبه و يحبها و هلم جرا
انا شفت الفلم بصحيح و من زمان و عندي دي في دي
لكن حين ميسرة هو قصده يفقع دمامل و يلطشني على وشي يقلي بصي شوفي الناس دي عايشة ازاي
و حقولك مثل تاني لما نوارة من كذا شهر صورت كليبات عن العشوائيات و نشرتهم ده عمل ايه
استفز البعض انهم يسالوا و يعرفوا الناس دي عايشة ازاي و خلت البعض يساعدهم على قد ما يقدر
يعني في استفاده حصلت
طبعا فلم تسجيلي غير فلم سينمائي بس فكرك مش تبقى حلوة لما الفلم ده يكون صدم ناس فوقها و خلاها تفكر ازاي يساعدوا الناس اللي عايشة في ظروف صعبة زي دي
انا شايفة ان يوسف عمل اعلان جماهيري جبار لما صور لنا فلم زي ده و لسه انا مش حابه جملة انه تاجر بالالم الشعب
مش لما الناس دي توصلها ايادي خير من جهات شخصية تانية و ناس تانية تهتم بيهم يبقى كويس؟؟
و على العموم انا خايفة من كتر الكلام نبتدي نخرج عن الفكرة الاساسية بس حبيت اوضح النقطة دي كمان
و قولي لي اختي براحتك بس الدلع احلى
سلام يا قمر

الساحرة الشريرة يقول...

تحياتي تناولت لقاء مني الشاذلي مع خالد يوسف بس من وجهه نظر مختلفه