الأربعاء، فبراير 06، 2008

بنت القمر في العين السخنه



تشرفت مدينه العين السخنه يوم الاحد بزيارة بنت القمر واسرتها الكريمه


توجهنا للعين لقضاء اجازة صغيرة وبحثا عن وقت هادئ مع الطبيعه وفي حضن الجبال والعيون


في بالميرا


وصلنا الي قريه بالميرا اللي حجز لنا فيها صديق لآدم القريه هادئه الطريق جيدو مريح


القريه كبيرة لها اربع حمامات سباحه


وتطل علي البحر يعني لها شط بحر وبسينات كبيرة الشمس طالعه منورة السما لكن الجو برد فظيع


واول ما دخلت القريه لقيت الناس قاعده حوالين البيسين اخر شياكه
الرجاله لابسين جزم وشرابات و وقمصان وبنطلونات وبيدخنواوالستات لابسين ايشاربات بترتر ومكياج علي سنجه عشر ة الالاف ونضارات شمس كمان قلت لادم الله مالهم دول ؟؟ دول اناتيخ اوي!!


حد يقعد علي البيسين ببوتات ونضارة شمس


والنبي المصريين دوا انتايخ دخلنا اوضتنا وحضرنا نفسنا ننزل البيسين وعينكوا ما تشوف الا النور تلجججججج اول ما حطينا مشط رجلينا في الميه الا وفقدنا الاحساس بيها نهائيا


آدم قالي: عرفتي بقا المصريين انا تيخ ليه؟؟


ادي اخرة اللي يعيب علي الناس


طبعا اول صدمه مفيش ميه ولا بحر


المهم رحنا اتغدينا في مطعم القريه كبير واوبن بوفيه وانا بكرة الاوبن ده اوي...
بيفكرني بافلام الروسي لما بيحطوا الاكل لسكان الملاجيئ اللي في طوابير كل واحد في طبقه حبه شوربه.. رغم ان البوفيه كبير جدا وحلو المهم

طب يا جماعه احنا مش جايين ناكل

القريه تصميمها بسيط وعادي اشبه بفنادق القوات المسلحه..علب جمب بعض لكن مفيش اي خطه لتسليه الناس غير شاشات عرض تلفزيون في كل مكان تعرض ماتشات الكورة يعني عاملين بس جاز بار وفاضيه خالص مجرد صور اشهر عازفي الجاز والبار فاضي وكمان انترنت كافيه في اربع اجهزة الساعه ب10 جنيه كنت ها اموت وادخل وبعدين استحرمت لما بنتي قالت يا مامي طب ماالنت عندنا ببلاش.

المهم

سألنا بنتاع الريسيبشين فين يا عم العين السخنه قال لنا : العين السخنه دي داخل فندق عين بيه والفندق مقفول من فترة!!!


!!!أن... أن.. أن... طيب يعني مفيش عيون ولا حاجه طبيعيه!!


والجبال كمان لونها رمادي وكئيب !!


طب نعمل ايه بعد ما ضربنا المشوار 300 كيلو لمصر وبعدها 112 كم للعين والاسعار مش رخيصه الليله ب730 جنيه غرفه عاديه خالص ورغم ان الخدمه كويسه بس القريه مثال علي اللافكر واللا تخطيط شويه سخانات ميه وكانت تبقا فله
!!اتاري السياحه ما نضربتش من شويه!!


في قريه ستيلا دي ماريا


حاولنا البحث عن طريقه تانيه للاستمتاع بالوقت ولما عرفنا من الريسيبشن ان اقرب مكان هو السويس 45 كم


ومن الجهه التانيه الزعفرانه 45 كم


والعين نفسها مفيش فيها بلد ولا سوق ولا اي مزار والمزار الوحيد هو العين السخنه المغلقه طبع رحنا القريه التانيه قلنا يمكن مسخنين الميه العيال ننزلهم حتي الميه وما يبقاش المشوار جه علي فاشوش. لقينا البيسينات اشيك ونوافير وحبشتكانات ولكن برضه نفس القصه الناس مترصصه في ريسبيشن الفندق بالبلاطي والمكياج

ونفس المنظر كل الفرق ان الاسعار اعلي اليوم لاسرة ادم وحوا وطفلين تحت 12 سنه اليوم وصل 930 جنيه والناس قاعدين يشربوا شيشه ويتفرجوا علي الماتشات ويختفوا في الاوض وما يظهروش الا ساعه الاكل في المطعم وكل اللي يزيد قريه ستيلا عن بالميرا هو ديجي لللاطفال


وتخت شرقي ورقاصه خميس وجمعه بس


طبعا حسمنا امرنا لو الحكايه ها ترسي علي قعده شرقي وشيشه مفيش حاجه بقا تستاهل تكع الف جنيه في الليله
ول ده اللي بندور عليه


وحزمنا امرنا الي القاهرة


في القاهرة

الجو حار جدا ونسبه التلوث عاليه اوي عن اسكندريه
وزحمه اوي واشارات المرور لا تطاق
للاسف معرفتش مواعيد معرض الكتاب ولا اذا كان مازال شغال ولا لالآ وصديقتي الي معايه تليفونها وممكن تكون عارفه من خارج القاهرة المهم رحنا سيتي ستارز مول والحمدلله لقيت الاسعار نار ومشترتش اي حاجه يدوب اتغدينا وكنا زهقنا جدا وتعبنا وادم ملوش اي خلق يقف علي فتارين ولا يلف علي شراء اي شيئ


ورجعنا اسكندريه


وبجد فرق الحياة في اسكندريه تحس ان عايش بجد


وما احلي الرجوع اليه


هناك 17 تعليقًا:

allfollowsome يقول...

ههههههههههه

حلوة هلا بتعليقاتكم المهذبة

!!!!

فى العين السخنة فى كام فندق جنببعض منهم واحد اسمه بلان ده كان كويس بيديره جماعه طلاينة وبتوع الاورينتيشن طلاينة برضه كانو بيعملو فيه بروجرام حلو

وثانيا انتى سايبة اسكندرية علشان تيجى العين السخنة

!!!!!

مي بهاء الدين يقول...

حمدالله عالسلامة ياجميل
دايما باشوف العين السخنة مملة..بس فيها دلوقتي بورتو سخنة..مارحتيش ليه؟

ياللا اكتبي بأه...وحشتينا
:)

ذو النون المصري يقول...

مرحبا بعد الاجازه
انا تعبت جدا في عمل ريدر جديد
لاني شلت القديم ووصلت لخطوة بوت اكليب و ملقيتش بوت اكليب خالص
و فيه حاجه تانيه
فيه ريدرات عند ناس تانيه بتتحدث بصوره تلقائيه لدرجة اني بنزل البوست و بعد ثواني الاقيه موجود عندهم
ايه الحل

زمان الوصل يقول...

فعلا السياحه التقليديه فى مصر لازم تنضرب لأن كلّها قائم على تقديس نظرية الأنتخه !!

ورغم إنّى باحب أأنتخ فى إجازتى الأسبوعيه بس أمّا الموضوع يتعلّق بسفر فى إجازه تسقط نظرية الأنتخه فورا ومن ثمّ لازم يكون فيه خطّه قبل السفر و تصوّر هنقضّى الوقت فى المكان اللىّ رايحينه إزّاى !! فيه ناس يناسبها جو الأكل و مرعى و قلّة الصنعه الذى ينطبق على ما رأيتيه فى العين و أحيان باقول نفسى أروح أقعد قصاد البحر وماعملش أى شئ غير البحلقه فيه و الاستمتاع إن مفيش حد هيقلقنى بتليفون مثلا .. و مع كتاب لطيف و راديو مثلا يبقى غاية المراد من رب العباد .. بس طبعا مش ده اللىّ يسعد فى كل الأحوال و فيه أجازات بتبقى طالبه نشاط و رؤية أشياء جديده و مختلفه ومن ثمّ مفروض المكان نفسه يكون جديد و مختلف .. إيه رأيك فى الواحات؟ بجد مش هزار دى أجمل رحله ممكن الواحد يروحها .. أو مثلا راس البر دى عمرى ما رحتها بس مؤخّرا كنت باقرا عنها و عن العشش اللىّ فيها و حسّيت إنّها جميله .. يعنى أماكن غير تقليديه نوعا ما ..

^ H@fSS@^ يقول...

شكله كان في حد ناظرلا لك في الخروجة
ابقي صلي عالنبي و كبري قبل ما تسافري
بس على رايك اتاري السيحاة الداخلية مش بايظة من شوية
لكن الوزير نسرين بسيوني الجديد عنده خطط ان شاء الله حتبقى عال العال

تحياتي

بنت القمر يقول...

تام
اهلا اول مرور
والله لا شفت بلان ولا يحزنون
مفيش غير ستيلا دي ماريا ثم
تيوليب ثم بالميرا بعدهم ب7 كيلو
وبعدين رحت العين تغيير جو زهقنا من اسكندريه
عادي
و يا ريتنا ما زهقنا
منور تام

بنت القمر يقول...

مي بهاء
ولا مي عمر
مي بهاء احلي
والله اللي حصل يا مي
ها ارد علي تاج جاني من نون بسرعه
وبعدين ابدأ تلخيص كتاب التدين المنقوص
ها يعجبك اوي
مش ممل بس خليكي متابعه
منورة يا مي

بنت القمر يقول...

نون الله يسلمك
والله مش عارفه اعمل ايه حضرت لك الكود.. وحاولت ابعته لك كومنت بس مربع الكومنت مقبلوش
مش عارفه اعمل ايه؟؟ لو معاك ايميل حفصه انا ها ابعت لها الكود دلوقت وخليها تبعت هولك
وتحطوه في الجافا اتش ام ال عادي وتبدا تضيف فيه التدوينات
وها اشوف النتيجه

بنت القمر يقول...

زمان الوصل
منورة زمزم
بصي نظريه الانتخه خنيقه اوي ليا موتيني من الكسل والنوم انا بفرك زي النحله واعتقد اني كنت نحله في حياتي السابقه
عارفاها طبعا
راس البر دي زباله اوي
من ايام عماد حمدي ازيك يا نييينه
رايحين راس البر!!
وكمان هي وجمصه الشاطيئ بتاعهم طيني مش رملي
وشمسهم بتحرق
اوعي
اوعي
قد اعذر من انذر
خليكي في الساحل الشمالي والعبي في المضمون
منورة زمزم

بنت القمر يقول...

حفصه اه والله كانت منظورة اصلي علطول محسوده وبصين لي في اللقمه من يومي نجمي خفيف اعمل ايه يا صفصف!!
يهدهم يا ختي
وكله كوم والاناتيخ كوم يصرفوا الف جنيه في الليله عشان يترصوا بالبلاطي علي البيسين بوريه منهم بوريه
ازيك يا صفصف
لازم اشوفك الاجازة الجايه
لازم

ملك الكبدة يقول...

يا ستي اجازة سعيدة
على فكرة احنا بلديات

حد يسيب الشتا الساحر في اسكندرية و يروح اي حتة

اول زيارة للبلوج بتاعك و ماقدرتش اقرا كل حاجة بس عجبني جدا خصوصا انك اسكندرانية
تحياتي

mohand يقول...

السلام عليكم

:D:D:D:D

من خرج من داره

بس المهم حسيتي بالتغيير ودا اهم شئ

تحياتي

زمان الوصل يقول...

:)
أصل الواحد بتطلب معاه أنتخه بعد ما يطوّل فى طحنة الشغل ويبقى حاسس إنّه زى ال *** فى الساقيه و إنّه رجع لعصر العبيد بس بصورته المودرن ..

بخصوص راس البر أنا ضحكت جدّا على وصفك ليها :)))) و فعلا اللىّ كانت بيتكلّم عنها كان بيتكلّم عن ماضيها التليد و أمجادها الغابره و يبدو أنّى تفاءلت بزياده و تخيّلت إنّى ممكن ألاقى آثار لهذه الأمجاد .. بقى الشاطئ طينى !! يعععععع

عين فى الجنة يقول...

حمد الله على السلامة
بس اسكندرية مزدحمة جدا خصوصا فى منطقة محطة الرمل وكمان اعمال الرصف بتزود الاحساس بالزحام، انما الجو فى اسكندرية هايل

بنت القمر يقول...

مهند
بس المقام الحمدلله محفوظ
اشكرك
**************
زمان الوصل
كل واحد يعمل اللي بيحبه بس بجد والله شاطئ راس البر ترابي
مش رملي ومفيش فيها الا شويه عشش بس
وسوق طويل كله جلاليب بيت وشباشب بلاستيك وحاجات تعبانه الرمل النظيف الابيض بس في الساحل الشمالي
واسكندريه تنور بيكي يا زمزم
******************
راجي اسكندريه قريه كبيرة نضيفه القاهرة زي بيت الحاوي كل ما تمشي تلاقي فيها مولات وسينيمات ومسارح ومعارض .... بس اعوذ بالله علي التلوث وكركره المرور
اسكندريه اكتر نظافه وتنظيم بس افقر ترفيهيا وثقافيا
يعني مصر ام الدنيا واسكندريه استجمام
اشكرك تحياتي

karakib يقول...

بالميرا و ستلا !! العين السخنة دي منطقتي لأنه القرية اللي لازقة في بالميرا عندي فيها شقة بس غريبة اوي انك كنت بتدوري علي حاجة تعمليها في العين السخنة غير انك تستمتعي بالهدوء و السكينة
شوفي بقي
لما تروحي تاني لازم تجيبي معاكي سنارة لو بتحبي صيد السمك
و من لسان بالميرا اللي قدامه بكيلو بالظبط في شعبة كبيرة اوي اقفي اصطادي هتطلعي اكبر سمك شفتيه في حياتك و ممكن يتصاد من علي الشط كده من غير لنش و لا حاجة
لسان بالميرا ده اصلا ما شفتش زية قبل كده
انما لو مابتعرفيش تصطادي يبقي الهدوووووووووء و الروقان
الجو هناك هدوئة و نضافة جوة و جفافة رغم انه قدام البحر بيغذي الاعصاب
يعني لو قعدتي اسبوع هترجعي حاسة انك مختلفة تماما

دريم السويس يقول...

حضرتك أختارتى كفربالميراوالسويس فيها أماكن كتيرحلوه