الجمعة، فبراير 08، 2008

..تاجي..




هل توافق علي حزف خانة الديانه من البطاقه الشخصيه؟


لا اوافق.. و التمييز مش ها يكون بسبب مكتوب ايه في البطاقه التمييز ليه اسباب كتير منها الواسطه والمحسوبيه وغيرة


الدين في البطاقه.. ضمان لحقوق اجتماعيه كتير زي الجواز والطلاق والنسب والميراث
المؤسسات المسيحيه فيها تمييز ضد المسلمين والاسلاميه ضد المسيحيين ودول ودول معروفين من غير ما نشوف البطاقه


نشيله ليه؟؟ ده الواحدة بتجوز واحد بعد تلات اربع سنين تكتشف انه مجوز واحده تانيه ومخلف ناقص كمان يطلع من دين تاني!!


ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟


المخنثين او مرضي التشوهات الخلقيه والاضطرابات الهرمونيه مرضي يجب علاجهم ومساكين اما المثليين اللي بيقولوا عن نفسهم اختلاف في ذوقهم اللي مش عارفه ايه ؟؟ طبعا عندي حساسيه جامده منهم


مقدرش احترم انحرافهم ولا اقبلهم نفسيا ولا اجتماعيا


مقدرش اتعامل معاهم ولا اثق فيهم ولا اقبل ان اخي يكون مثلي ولا بنتي تكون مثليه ولا اثق ان اشارك مثلي او مثلية سكن او طعام او افضي له _لها بسر.. بصراحه موقف حاد اوي منهم ولا اوافق علي الاعتراف بيهم ولا اعطائهم اي نوع من صور الشرعيه والقبول


معلش دقه قديمه بقا!!


هل تعتقد بوجود اضطهاد للمسيحيين في مصر؟


اوافق انه في احتقان طائفي جامدجامد انظر الشارع والنت ..و انه في اضطهاد للمصريين عموما واذا كان كان في اضطهاد اوتمييزيبقا للمرأه اكتر


من هو الشخص الذي تختاره لرئاسة الجمهوريه؟


معنديش الاهليه اني اختار رئيس ولا اقدر اقيم الاصلح لمنصب خطير زي ده بس اعتقد لو نعمل مجلسين انتخاب زي الرومان يختاروا الافضل يكون احسن


اذا قمت بتاسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟


الحكم برضه مناصب كبيرة لازم يكون الاختيار ليه معايير من الافضليه عن طريق الجمع بين الخبرة والكفاءة


بس احب اوي او قلبناها فانتازيا اكون وزيرة ماليه او تعليم وبحث علمي


هل توافق علي مشاركة الاقباط و الاخوان في حكم مصر؟


اوافق للاقباط هما يعني صغيرين ؟بس مش علي طريقه لبنان التمثيل العددي ان مش بحب اننا نقسم البلد زي التورته هما عشرة الميه يبقا عشر الوزرا يكونوامسيحيين مفروض المعيار هو الكفاءه


الاخوان اوافق عليهم لو توفرت فيهم معايير الكفاءه ووصلوا عن طريق صناديق الانتخاب وعن طريق برامج حكم واضحه ومدروسه اهلا بيهم


ما هي افضل مدونه زرتها؟


افضل مفيش بس بحب الكتابه الادبيه لنهي محمود واسامه يس وكراكيب وطيارة ورق وغاده مع نفسي


بحب مشاغبات نوارة وشهروزة.. والاتجاه التنويري لذي النون.. بحب خفه دم حفصه وعمق بلو ستون.. بحب تنوع جدو ويا مراكبي.. ثراء واحترام نقاشات عباس العبد ..ولست ادري مكان ومدونه مريحه ومحببه جدا وبموت في التمبليت بتاعها ولو مش عيب كنت لطشته


مدونه قلم جاف الدين والديناميت ممتازة في تحيلاتها


احنا ولاد انهارده وراجي ومهند عدي النهارودانتي المصري في خانه التنوع كتابتهم جميله


وكل يوم بكتشف ناس جديده


هل توافق علي الزواج من مطلقه؟


اكيد لو مطلق ولازم اٍسال واتأكد جدا ليه وازاي بس الفكرة مش مرفوضه علي المطلق


اذا انجبت ولدين و بنتين ، فاي الاسماء ستختارها لهم؟


العالم ليس مكان مناسب لانجاب 4 اطفال.. كفايه 1 او 2 اما الاسماء فاحب اسم عام لا يدل علي هويه ولا وطن ولا دين زي سارة


هل تعتقد ان توريث الحكم في مصر سيحدث فعلا؟


ابدا مش ها يحصل بس جمال مبارك هايكون ليه منصب سياسي او خط استثماري زي ولاد السادات وعبد الناصر


ما هو افضل انجاز لمبارك ؟ و ما هو اسواء سقطات حكمه؟


اجمل ما عمل انه محاربش تلاتين سنه واسوا ما عمل انه برضه ما حاربش تلاتين سنه لا حارب اسرائيل ولا حارب الفساد والفوضي وكمان تقليص دور مصر الاقليمي علي حساب مشاكل داخليه اللي لا حليناها ولا احتفظنا بدورنا الاقليمي


لمن تمرر هذا التاج؟


اللي عاوزة ياخده بس احب اشوف اجابات..مي عمر وراجي وعباس العبد عدي النهارولست ادري وبلو ستون واحنا ..ولاد انهارده و ودانتي المصري
***********
وصلني من نون المصري مشكورا

هناك 17 تعليقًا:

Ahmed Al-Sabbagh يقول...

صديقتنا العزيزة

الحقيقة دى تقريبا اول مرة ازور مدونتك

وسعدت اوى ان أقرا ردودك الجميلة على التاج

واشكر الصديق العزيز ذو النون انه مررة لك

على فكرة انا اللى حاطط التاج ده لان كان نفسى اسمع اراء فى الموضوعات دى

لانى مش مكون فيها رأى قوى

اجابتك جميلة ومتنوعة

تقبلى تحياتى

أحمد الصباغ

DantY ElMasrY يقول...

انال قريت اجابات كتير للتاج دا
ولقيت ان موضوع الديانة فى البطاقة محسوم عند ناس كتير
ودا اللى زعلنى
طبعا دا مش رأى عام لأن العينة اللى جاوبت التاج انتقائية
لكن الصح عدم اثبات الديانة فى البطاقة
ودا هايحصل فى يوم من الأيام
ولعلمك مصر بس هى اللى بتعمل كدا
مش هاقولك امريكا ولا فرنسا ولا حتى تركيا ولا تونس
السودان والمغرب معندهمش خانة للديانة
انا زعلان اللى محدش مررلى التاج لحد دلوقتى
عاااااااااااااااااااااا

الطائر الحزين يقول...

احييك على اجاباتك
تقبلى تحياتى

يا مراكبي يقول...

أولا حمد الله عالسلامة

ثانيا .. بجد إجابات جريئة .. التاج ده تحديدا بجد ظريف .. يا ترى مين الي وراه؟

عدى النهار يقول...

إجاباتك عبرت عن حد مهموم فعلاً بأحوال البلد. أنا من رأيك فى موضوع التورتة وأحياناً كثيرة أشعر إن "هذا هو المطلوب"

بنت القمر يقول...

احمد الصباغ
عارفه انك صاحب التاج من مدونه شهروزة
اشكر مرورك وسعيده ان اجاباتي لقيت قبولكم جميعا
تحياتي
**************
دانتي المصري
انا مررت لك التاج وعموما التاج ملكيه عامه يلا خده رد عليه وها اشوف اجاباتك
بخصوص الدين النا شرحت وجهه نظري وكمان اريكا وفرنسا مش نموذج كل مجتمع وليه خصوصيته والتمييز عندنا قائم ببطاقه ومن غير
ولا ده حصل وشالو الخانه دي مش هايكون في المستقبل القريب
تحياتي ويلا التاج

بنت القمر يقول...

الطائر الحزين
وانا كمان احييك
واشكر مرورك
**************
مراكبي
جريئه ليه؟؟
عموما انا جاوبت بصدق التاج عمله واحد اسمه احمد الصباغ اول واحد معلق فوق بعته لشهروزة بعتته لنون المصري بعته لحفصه وليا ولنسرين بسيوني
ده تاريخ التاج يلا جاوب عليه
انا بمررهولك
تحياتي

بنت القمر يقول...

عدي النهار
كلنا مهمومين بالبلد مهما رحنا ولا جينا
لانها بشكل او اخر بتعك علي راس الكل
سواء غلاء اواحتقان طائفي
انا مش بحب حكايه التمثيل العددي زي لبنان لانها ادت ان البلد تكون تورته كل واحد عاوز ينهش حتي وبتؤدي بالضرورة الي انك تحط شخص غير مناسب في مكان علي حساب واحد اكفأ لمجرد انه يمثل طائفه او دين
وتخيل بقا لو دخل فيها يهود وبهائيين وشيعه
تبق زاطت
منور
تحياتي

عين فى الجنة يقول...

اجاباتك على هذه الاسئلة تنم عن زينة المرأة الحقيقية فى عقلها
ويابخت ادم بيكى، ربنا بيحبه
اما تمريرك التاج لى شجعنى على الاجابة عليه ولكن انا خايف ان نسرين بسيونى تزعل لانى طنشت عليها عندما مررته لى
وقد فكرت فى حل وسط انى اجاوب عليه فى الحباثة عندك هنا ولا من شاف ولا من درى
واحب اقول لاحمد الصباغ ان الاسئلة دى فى الجون وان من الصعوبة بمكان الاجابة عليها بصدق وبدون تهريج كما فعل بعض الزملاء المدونين
1- هل توافق على حذف خانة الديانةمن البطاقة؟
لا اوافق على الحذف

2- مارأيك فى الشواذ؟
هم شر مستطير ويجب العمل على منع انتشارهم وتغلغلهم فى المجتمع هم وكل المواد الاعلامية التى تعمل على تحسين صورتهم ، وذلك اتقاء لغضب الله الذى قد يصيب البلد كلها بلعنتهم فيأخد الصالح مع الطالح

3-هل تعتقد بوجود اضطهاد للمسيحيين في مصر؟
لا اعتقد ذلك بل اعتقد انه يتم الطبطبة عليهم من الجهات الرسميةوتدليلهم بطريقة مبالغ فيها

4-من هو الشخص الذي تختاره لرئاسة الجمهوريه؟
والله وبدون مبالغة فأن هذا المنصب فى الوقت الحالى هو مصيبة المصائب بكل المقاييس فى مواجهة الفساد والقلق الداخلى والضغوط الخارجية ، فان اى رئيس لمصر تبقى امه داعية عليه

5-اذا قمت بتاسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟
طبعا اذا افترضنا جدلا ان تداول الحكم ممكن فى اطار ديموقراطى فيقوم الخزب بتشكيل وزارة للظل منافسة للوزارة الحالية
وحيث اننى لو شكلت حزب سياسى يجب ان تكون المباديء التى يقوم عليها البرنامج تدور حول اصلاح التعليم والصحة كخدمات والاقتصاد فى انشطة الزراعة والصناعة والتجارة
والاهم من الاشخاص هنا هو المنهج العلمى والبرنامج الزمنى وتوفير الموارد ووضع
job description
للكوادر التى ستقوم بادارة الحكومة
ولو نجح خزبى فى هذا العمل فيمكن ان اختار اى اشخاص ليمسكوا الحقائب الوزارية طالما مؤمنين بما سبق من مباديء
وعلى سبيل اظهار المحبة والتقدير وبشرط ان يتفقوا معى فى المباديء المعلنة، سوف اضم
بنت القمر
حفصة
لمى بهاء
نسرين بسيونى
نورا( همس الليل)
مروة الزارع
سلوى
زينب ( زنوبيا)
روفيدا
نوسة
رحيل(سارة)
عاليا حليم
تمر حنة
appy
mado80
tona
skylight
Sampateek
S H E B A K
MoSaic
Demaghy
ذو النون
اسامة
دمعاتى
البرنسيسة دودو
ابن حجر العسقلانى
ابوشنب
شهروزة
سارة سويدان
deja vu
cleo
carol
frake_ghost

6-هل توافق علي مشاركة الاقباط و الاخوان في حكم مصر؟
فى اطار ديمموقراطى وانتخابات نزيهة مائة فى المائة ، طبعا اوافق

7-ما هي افضل مدونه زرتها؟
من الناحية الفنية مدونة شباك
S H E B A K بس صاحبها هاجرها من مدة
وعموما انا بحب كل الناس اللى حيبقوا وزراء معايا

8-هل توافق علي الزواج من مطلقه؟

طبعا لو كانت متدينة عن حق و حلوة وغنية وعندها شقة فى الكوربة وشاليه فى سيدى كرير وسنها لا يتعدى 30 سنة ولو كان فى واحدة بالمواصفات دى وتقبل الزواج بى فلن اتردد لحظة واحدة بس عشان اغيظ الحمار اللى طلقها

9-اذا انجبت ولدين و بنتين ، فاي الاسماء ستختارها لهم؟
انا فعلا اب ل عمر وعلى وعثمان وراجية وكريم
ولو كان هناك بنت اخرى فلن اجد اجمل من اسم امى : دولت

10-هل تعتقد ان توريث الحكم في مصر سيحدث فعلا؟
ممكن لو حدث تربيط بين الثروة والسلطة

11-ما هو افضل انجاز لمبارك ؟ و ما هو اسواء سقطات حكمه؟
افضل انجاز لمبارك انه تزوج سوزان مبارك

12-لمن تمرر هذا التاج؟
لنوارة نجم

عين فى الجنة يقول...

تصحيح خطأ املائى
كلمة الحباثة وردت خطأ الصح الخباثة، لذلك وجب التنوية

سهر يقول...

بعد السلام
اجاباتك كلها منطقية وجميلة فعلا
عجبتني كتير
تحياتي

Hypatia يقول...

افضل اجابه عن سؤال ما هو افضل انجاز لمبارك ؟ و ما هو اسواء سقطات حكمه؟

هى اجابتك

عاوزه ابارك للعين السخنه كمان
:)

Hypatia يقول...

هى ديه الخباثه طيب انا شفتك اهو يا استاذ راجى عشان تعرف انى مراقباك

:)

:)

Lasto-adri *Blue* يقول...

عزيزتى بنت القمر
فعلا شوفت التاج بتاعك من يومين... وقررت بينى وبين نفسى انى أجاوبه لما قرأت آخر سطر عندك ... وجه التعليق بتاعك... فلا تقلقى.. على النهاردة بليل مثلا ح تلاقيه متجاوب عشان خاطرك انتى بس

:)

بنت القمر يقول...

الاستاذ راجي
آدم محظوظ بيا وانا كمان محظوظه بيه اشكرك
اجاباتك متزنه وراقيه اشكرك وادي نسرين شافتك اهو عشان اللي يبعتلك تاج تجاوبه عدل بعد كدة
منور
************
نسرين منورة ومبسوطه ان الاجابات عجبتك انتي ضمن الاصدقاء الجدد الان
اشكرك
******************
سهر
اشكرك واهلا بيكي
******************
لست ادري ميرسي يا قمر انتي كلك زوق وعارفه انك مش ها تكسفيني
وانت مستنيه التاج واجاباتك اهو
اشكرك

أبو عمر - الصارم الحاسم يقول...

هو تعليق واحد فقط بالنسبة للتمثيل العددي للاقباط-النصارى

انا معك انه الافضل الا تكون كوتة او عدد معين

لكن عشان التلاكيك ووجع الدماغ ودعاوى الاضطهاد اللي هما عايشين فيها مع انهم بيخشوا الانتخابات بكل حرية ويخسروا ويمكن حتى في دوائرهممع ان الحكومة بتحسس عليهم وبتخاف يقال عليها اي حاجة على عكس الاخوان وانصارهم اللي بيتططحنوا طحن


كنت باقول عشان كل ده مفيش مانع من التمثيل العددي ان ارادوا

Eman M يقول...

جدعة :)