الثلاثاء، أبريل 08، 2008

بكل بساطه... مفيش فايده


بكل سهوله وبساطه

وبدون توصيفات مكلكعه وشروحات اقتصاديه عميقه

هدف الاضراب الاعتراض علي الاسعار

نتيجه الاضراب تخفيض اسعار بعض السلع عن طريق خفض الجمارك

نتيجه اوليه

انخفاض اسعار السلع مثل الرز السكر والزيت

تانيا نتيجه الانخفاض مؤقت لانه علي مدي المرحله المقبله يقل السعر نتيجه لكثرة العرض

كثرة العرض= حتميا المنتج يغير نشاطه لانه مش ها يشتغل من غيرما يكسب

فيكون ادامه حل من اتنين يا اما يغير نشاط غير مربح او يقلل انتاجه

نتيجه تالته نرجع للمربع الاول يقل العرض= يزيد السعر تاني

لكن بعد ما صغار المنتجين يفلسوا وتفشل مشاريعهم

تعليل نتيجه حتميه لروشته اقتصاديه فاشله

نتيجه اخيرة مفيش اي فااايده!!

هناك 11 تعليقًا:

محمود المصرى يقول...

بسم الله الرحمن الرحيم

انا بصراحةكنت مستغرب انك مادخلتيش معمعة الجدل الدائر حول الاضراب لكن اخيرا دخلتى .

هى القضية مش مجرد عرض وطلب انما ببساطة ان فى مخصصات مالية تذهب لغير محلها , سواء فى الانفاق الحكومى او الانفاق الشخصى , وبالتالى تلاقى الناس مش لاقية تاكل وشايلة محمول , وتلاقى حكومة مش عارفة توفر رغيف الخبز للناس والريس يطلع يقول هانجيلكم فلوس منين بينما الوزاء وكبار المسئولية بيصرفوا 17 مليار جنيه العام الماضى على سفرياتهم ورحلاتهم .
المشكلة ان فى فساد وسوء ادارة , بقاله سنين ونتيجته بتبان كل شوية على شكل ازمات , نقص الخبز وغلاء الاسعار ووو , ماينفعش نيجى نقول اضراب حتى توفير الخبز او رفع الاجور , لكن نضرب مثلا علشان نغير الواقع اللى احنا عايشين فيه ونغير الفساد ويبقى فى امكانية للشعب انه يراقب حكومته ويحاسبها ويعرف الفلوس رايحة فين وجاية منين , ساعتها بس هانلاقى الاسعار بتنزل لوحدها والبضاعة متوفرة .
لكن مش معنى ان الاسعار تنزل ان المنتجين بيخسروا او ربحهم بيقل , لأن الاسعار لما تنزل بصفة عامة يبقى هامش الربح قيمته هاتزيد , وكمان المواد الاولية اللى بينتج منها منتجه سعره هايقل هو كمان ومع زيادة القوة الشرائية للناس فهايبيع اكتر ومكسبه يبقى اكتر .
يبقى الحل كالاتى

اصلاح ادارى وسياسى يؤدى بالتبعية لى شفافية ومحاسبة وبالتالى حسن تصرف فى الموارد وحسن اتخاذ للقرارات الاقتصادية ينتج عنهما تحسن فى الوضع الاقتصادى وانخفاض الاسعار وزيادة القوة الشرائية ولما القوة الشرائية تزيد يبقى المنتجين اللى كانوا بينتجوا كمية معينة مش هاتكفى فينتجوا اكتر ويكسبوا اكتر وهكذا .
يبقى لما نيجى نعمل اضراب ناخد السلسلة من اولها ونطالب بالمطلب الرئيسى مش نيجى من الاخر ونقول دى مطالبنا .
تحياتى

عاشــــــ النقاب ـقــــة"نونو" يقول...

السلام عليكم
موضوع خفض الجمارك دة كان قبل الاضراب ب 3 ايام والسلع هي الزبدة والزيت والرز والاسمنت والحديد
والنسبة هي عشرة في المية
يعني برضه كلام فارغ يعني مش هنحس بيهم
ومعاكي الظاهر انهم ممكن بعد اللي حصل يرجعوا في كلامهم حتى في العشرة في المية دول والظاهر انه بالعل مفيش فايدة
ربنا يستر
تحياتي

la3lahakhier يقول...

السلام عليكم
احنا اللى بنساعد على الغلاء مازلت اصر امتنعوا عن الشراء
تحياتى

mohand يقول...

جبتي من الاخر



بعيد عن الموضوع

الملف هيوصلك بكره ان شاء الله

غير معرف يقول...

الأضراب نجح بلا شك
الرسالة وصلت بوضوح و بمنتهى الجلاء
الديموقراطية الديجيتال دخلت مصر و استوطنت

الصراع بين الحكومة و الأخوان من جانب .... و انهيار الأحزاب و موتها و انعدام الحياة السياسية من جانب أخر ... أفسحوا الطريق " للخيار الثالث " ... الطبقة الوسطى القديمة و المجتمع المدنى أعيد تشكيلها تكنولوجيا و تم الربط بينها رقميا ...

حالة القلق و الرعب اللى انتابت الحكومة بكافة اجهزتها يوم السبت و التهديدات التى ارسلتها للموظفين و التلاميذ و كافة العاملين لديها تتوعد من يتغيب عن العمل يوم 6 ابريل تصلح كدليل اثبات على نجاح " حالة الأضراب " التى انتابت الشارع المصرى بقيادة تكنولوجيا الموبيل و الأنترنت و الفضائيات .

6 ابريل بالتأكيد سيظل علامة فارقة فى مسيرة الأصلاح ...

اما الغلاء و ارتفاع الأسعار و تدنى الأجور و طوابير رغيف الخبز و غيرها من أزمات المواطنين ... فهى عارض لحالة ترهل ادارى و فساد ضارب فى كافة الأركان و منظومة فى حاجة الى من يفيقها من سباتها ...

بنت القمر يقول...

محمود المصري
للاسف فعلا افتنعت بوجهة نظرك
:(
بجد تحياتي

بنت القمر يقول...

نونو
فعلا حكايه العشرة الميه نكته يعني قزازة الزيت الل بعشره ها تبقي بتسعه
والعمال ها ياخدوا 15 يوم يعني اللي بياخد 400 جنيه ها ياخد 600 حته واحده
نكته شر البليه تحياتي

بنت القمر يقول...

لعله خير
حاضر احنا ممتنعين طبيعي
تحياتي

بنت القمر يقول...

مهند
شكرا
تحياتي

بنت القمر يقول...

حسن
**********
الامور تقاس بنتايجها وادينا كلنا هنشوف وانا مقلتش ان الاضراب فشل
*اما الغلاء و ارتفاع الأسعار و تدنى الأجور و طوابير رغيف الخبز و غيرها من أزمات المواطنين ... فهى عارض لحالة ترهل ادارى و فساد ضارب فى كافة الأركان و منظومة فى حاجة الى من يفيقها **********
اتفق معاك بشده
تحياتي

Cleo يقول...

حتى لو مفيش فايدة.. لازم نفضل نحاول لحد ما نوصل لحل فيه الفايدة فعلا..