الاثنين، أبريل 14، 2008

!!تابوهين والتالت

الزمان. تلاته ظهرا والجو حار جدا

المكان في اتجاه اشارة رشدي الاشد ازدحاما

الاشخاص:انا وهي ذات الثماني سنوات في الثانيه ابتدائي

هي:مامي عاوزة اسأل سؤال

انا : خير

هي: هو الرئيس ما بيغيرش ليه؟

انا:يغّير ايه؟

يعني يبقا مش رئيس ويجي رئيس تاني

انا:ذهول.. عشان هو لسه عاوز يقعد مش عاوز يمشي عاوز يفضل رئيس

هي: طب ما نمشيه احناّّ

انا: ماينفعش اي حد يمشي الرئيس.. كمان الوزرا عاوزينه والناس اللي معاه بتحكم بتحبه

هي: طب مين مشي الرئيس السادات؟

انا: محدش مشاه هو مات ناس كانت مش بتحبه موتوه فجا الرئيس مبارك

هي:طب هو مين قال ان الرئيس مبارك يبقا رئيس؟؟

انا:الرئيس السادات كان عامله نائب ليه يعني لما يموت يحكم بعده

هي: اهاا...ا يعني كان كاتب كده في وصيته
أ نا: اه كان موّصي كده!

طب مين ها يجي بعد ما يموت الرئيس مبارك؟

انا: معرفش هو لسه محددش

هي: ليه هو مش هايموت؟!

انا: كل الناس هاتموت بس هويمكن مش لاقي وقت يكتب وصيته لما يفضي ها يكتبها

هي:اهااا فهمت....لما يفضي ويكتب الوصيه ها يقولنا ونعرف

انا :ايوة

...................

تتحرك السيارة ببطء ونقف في فتح الاشاره والجو يزداد حرارة

هي طب عندي كمان سؤال

انا : اتفضلي

هي بس مكسوفه

انا لا اتفضلي ما تتكسفيش

هي:هو ربنا ده ولد ولا بنت؟

انااكثر ذهولا وحيرة مش ولد ومش بنت..عاوزة اقول ربنا شيئ..كائن..مخلوق... لا اجد في رأسي توصيف مناسب

ربنا كده حاجه ملهاش زي مش ولد ومش بنت

هي: يعني نبات؟!!

انا لا يا بنتي افهمي مش احنا بنقول لم يكن له كفوا احد.. يعني ما يشبهش اي حد تاني.. بس نعرف انه علي هيئه الانسان

ليه عين وليه ايد وبيسمع ويشوف ويحكم بين الناس

هي: ازاي مش ولد ولا بنت بس علي هيئه انسان ؟تبدو غير مقتنعه ثم تعاود السؤال.... طب هو عنده شعر؟

انا: لا يا بنتي متخرفيش وبعدين اصلا محدش شاف ربنا

هي مش انتي قولتي شبه الانسان يبقا عنده شعر

ان:ا مش متاكد ه يمكن لما نموت ها نشوف ربنا

هي: طيب انا عاوزة اموت واشوف ربنا بس ارجع اعيش تاني عشان احكيلك
يصل النقاش الي طب ربنا في انهي سما و هو فيه فوق السبع سماوات
والي هو الجنه جنب النار؟
طب ايه ازمه سبع سماوات ما واحده كفايه ثم تعدني برؤيه الله وان تحكي لي اذا عادت للحياه ثانية!!

انا بعد الشر ربنا يخليكي ليا وتكبري وتروحي الجامعه ولما تعجزي وتموتي يبقا تشوفي ربنا

هي :طيب اصل نفسي اعرف شكل ربنا اوي

تنطلق الاشارة ومعها السيارة.. اتنفس الصعداء.. قبل ان ندخل التابوه التالت

هناك 38 تعليقًا:

الطائر الحزين يقول...

الله

الله

الله

هو فيه زعيم بيموت

سيادة الزعيم اطال الله عمرة مات
سيادة الزعيم طيب الله ثراه مات

عارفة حضرتك فيه سؤال ملح جدا فى رأسى

ماذا بعد أن يموت الرئيس؟؟؟

اما السؤال عن ذات الله
فهى من الغيبيات يعنى لما بنتى وحد يسألنى اقول ربنا امرنا ان نؤمن بالغيبيات اللى من ضمنها ان الله موجود وانه لا يعرفه احد وانه ليس كمثله شىء وهذا من الايمان

ربنا يبارك لك فيها ويجعلها قرة عين لك
بارة بك


دعواتك

... يقول...

والله يا بنتي احنا لنا الجنة
ولادنا هيودونا في داهية
الولد المفعوص بيسألني من كام يوم هو إيه الكلية اللي بتطلع رئيس جمهورية
وبعدين ما سمعش الإجابة
قاللي انا غيرت رأيي وهادخل كلية كرة القدم
وابقي زي ابو تريكة احسن علشان الناس تحبني
وبالنسبة للغيبيات يا ستي الولاد عندي ماشيين تبع كتاب الوزارة
جزء من سورة قصيرة كل سنة
وإشارة إلي أحد الأحاديث الشريفة كل سنتين
ومافيش أسئلة خارج المقرر
أنا بجد اكتشفت ان مفيش منهج دين
ولولا اللي احنا بنقوله لهم ماكانوش عرفوا حاجة عن دينهم

أما بأة التابوه التالت فأحب أقوللك إن ابنتي العزيزة لا تسأل
بتفهم وتدكن
المشكلة في أبو لسان فالت اللي ممكن يسأل عن أي حاجة في أي وقت قدام أي حد بأعلي صوت
مافيش فرامل
ربنا يعيننا

خمسة فضفضة يقول...

السلام عليكم ورحمة الله وبركاته

ما شاء الله البنت دي نبيهه ، بس المشكله اننا في زمن اللي فيه نبيه بيتعب اوي ، والناس النبيهه بقت غير مرغوب فيها وممكن نباهتها تجر عليها مشاكل

ربنا يستر
:-)

Empress appy يقول...

صحيح الا هو مش بيسأل نفسه السؤال ده
انتى عارفه انا على قد حبى للسادات على قد ما زعلت منه قوى
بجد يعنى هو كان بيحكم ليه بكده علينا وبعدين يعنى سؤال ليه ايامها محصلش انتخاب واتقدم حد تانى ولا خدها كوسه ما علينا

اما السؤال التانى عن الله سبحانه وتعالى
فانا كنت بسأل نفس السؤال ده وانا صغيرة وزودى عليه طيب هو جه منين لغايه لما جدى ربنا يرحمه خدنى فى حضنه وقال ليه على سورة قول هو الله احد
وكل ما يجى فى بالى السؤال اكتفى بالقرآن وانى ابص على كل حاجه حوليه واقول الحمد لله

عموما هى ماشاء الله عليها ذكيه بجد ربنا يخليها

DantY ElMasrY يقول...

محدش ريحها بردك
ربنا شكله ايه انا عاوز اعرف ؟وقاعد فين ؟وبيعمل ايه دلوقتى ؟وشايفنا ولا لأ؟
ولو شايفنا ساكت على اللى بيحصل ليه ؟
يا ريت والنبى محدش يقوللى شلت يمينك والأسئلة دى من الغيبيات ولا تجوز
علشان مافيش حاجة اسمها لا يجوز
اللى ميعرفش يقول ماعرفش وبلاش يسرح بحد
ويحاول يسأل حد عارف

Ahmed Shokeir يقول...

التابوهات الثلاثة من الأساس يصعب على البالغ الخوض بيها بسهولة .. فمابالك بالأطفال .. أما بالنسبة للتابوه الثالث الغائب فعند الاطفال هو في الغالب التابوه الأول .. نشكر إدارة المرور على فتح الإشارة الخضراء التي أضاءت الضوء الاحمر للحوار البرئ

mohand يقول...

اولا بنتك دي هتوديكي المعتقل برجليكي وبايديها

ههههههههههههههههههه

-----------------
ربنا مش مؤكد له ايد او عين او او

ويقال والله اعلم طبعا ان اليد دليل علي السخاء والبطش

بس نظرا لاننا مش هنقدر نستوعب الشكل فربنا ادانا المدلول علي الصفة بالشئ الموجود لدينا

والعين عشان تري برضه مدلول للرؤية لكن مش معناها انه له عين لو مالوش او مؤكد وكده


بس ان جيتي للحق سؤال صعب جدا جدا

الله يعينك وتعرفي تجاوبي
ومتدخلش في اللي انتي خايفه منه

السؤال الرزل بتاع الاطفال اللي بيتدرج

هو احنا جينا ازاي يا مامااو يابابا ؟

سؤال فعلا بيخنقني

wanna b a physician يقول...

الموت علينا حق

عاشــــــ النقاب ـقــــة"نونو" يقول...

السلام عليكم ورحمة الله
اولا ربنا يبارك لك فيها يارب
بس دة السن اللي هي فيه دة هو اللي لازم تسال فيه السؤال بتاع ربنا موجود فين وشكله ايه ومعلش لازم تجهزي دائما لاي سؤال هي عاوزة تعرفه واذا مش كنت عارفة قوليلها تعالي ندور ونسال سوا او قولي ما اعرفش واستني اما اسال حد اكبر مني الا سؤال ربنا دة مهم جدا
قوليلها ربنا موجود فوووق اوي بعييد بعد السماء دي فيه لحد سبع سموات وربنا سبحانه له بيت ومكان اسمه العرش زي الكرسي بتاعه شكله ايه
اعتذر حضرت مش كنتي قلتي انه شكل انسان دة خطا جدا لان بعدها قالتلك هو له شعر وشوية شوية هتسالك طب له ماما
يبقى هتقولي شكله مش زي اي حد وما ينفعش يبقى شكله زي اي حد تخيليه انتي احلى ما تتخيلي انما قالنا في القران انه ليس كمثله شيء ولم يكن له كفوا احد ازاي كدة وبس
طب سايبنا ليه كدة وخلقنا ليه خلقنا علشان نعبده ونصلي ونقرا قران نطيعه
ونحب بعضنا وعددي مكارم واخلاق كويسة
سايبنا ليه كدة تقولي لاننا لسة عمالين نغلط وما دام لسة عمالين نغلط يبقى مش بنطيعه ومش بنعمل الحاجات الكويسة اللي قالنا عليها ومثلي لها انها في المدرسة الفصل اللي نبهم امتحنوا ونجحوا ومس جابت لهم جوايز ينفع تاخد معاهم جايزة وهي لا امتحنت معاهم ولا جاوبت زيهم
اهو كدة برضه ربنا بيكرم ويفرح اي حد عمل له طاعة وسمع كلام ماما وصلى وكدة اللي بيروح لربنا ويسمع كلامه ربنا بيكرمه
واسفة جدا على الاطالة بس اانا دارسة تنشئة كويس وبحكم عملي اللي كان مريت ودرست حاجات كتييييييير زي كدة واكتر واتمنى اكون فيدتك في الناحية دي وممكن اقولك كمان تقوليلها ايه لو سالتك احنا جينا ازاي ومنين
انما السوياسة ما بحبش اجيب سيرة حد سوياسي
تقبلي تحياتي ومروري

عدى النهار يقول...

واضح إنك فوجئتى بالأسئلة :) كويس جداً إنها تسألك إنتي مش حد تاني بس لازم ردك على أسئلتها يكون مستفيض شوية وصح ومقنع لها علشان يفضل عندها دايماً ثقة فى المعلومات اللي بتأخذها منك. هى دى البنوتة الصغيرة والا الكبيرة؟ ربنا يخليكوا لبعض ويبارك فيكوا

بنت القمر يقول...

الطائر الحزين
هو في زعيم بيموت
ماذا بعد الزعيم ما يموت؟؟
الاسئله دي بره المقرر يا باشا
نمتنع ونتظلم
الشق التاني عن ذات الله اعتقد ان كلم غيبيات صعبه اوي علي الاطفال وعلي بعض الكبار
((((:
اما عن دعواتك اشكرك جدا وربنا يتقبلها
تحياتي

بنت القمر يقول...

بثينه
بصي انا مع بنتي الكبيرة فتحت التابوه الاول لانها كبرت ولازم نتكلم فيه
وبصراحه اتلككت عشان افتحه ورأيي كصديقه مينفعش تسيبيها عارفه ومدكنه
لانك لو اتكلمتي هتلاقي معلوماتها من اصحابها وكلهاعك وعموما الكبيرة عندي لها نقاشات انقّح زي هو انا ليه ما ينفعش امثل
هو التمثيل حرام طب ليه بنروح السينما
طب لو مثلت من غير اغراء ومشاهد من اللي هي يبقا ايه المشكله؟
طب هو التمثيل ملوش علاقه بالجواز وممكن الممثله تعيش مبسوطه زي مني زكي واحمد حلمي
وعموما حلوة كليه كرة القدم دي جديده
(((:
ربنا يخليهم لك ويبارك فيهم

بنت القمر يقول...

خمسه فضفضفه
والله النباهه احيانا تجر مشاكل علي المحيطين كمان
وعلي رأيك النبهاء غير مرغوب فيهم و الاذكياء يمتنعون
تحياتي مودتي

بنت القمر يقول...

ابي
يا سلام عليكي يا ابي لازم تجيبي سيرة المرحوم وتقلقليه في تربته؟؟((((: ليه كده يا ابي
ده كان من زمان
من 25 سنه وبعدين ما احنا حلوين وزي الفل اهو
ناقصنا ايه؟؟
هو بابا مبارك منقص عليكي حاجه يا ابي؟؟
يا ناكرة جميل
اما جدك الفاتحه لروحه يا ابي
تحياتي يا جميله

بنت القمر يقول...

دانتي المصري
ايه يا عم مالك بتشاكل دبان وشك
هو انا قلت شلت يمينك؟؟
ولا شمالك يا عم بعد الشر ربنا يخليك لهم في البيت
((:
بص يا سيدي نيجي للجد
انت متعرفش شكل ربنا ولا هو فين تحديدا
طبعا ولا انا
هو في اجابات فلسفيه معقده ددا زي
الحلول بتاع الصوفيه تسمع عنه يا عم دانتي ؟؟ اللي هو ان روح الله في كل شيئ مخاوقاته جميعا يعني تتجسد روحه في كل شيئ جماد وحي
دي نظريه يا باشا تفتكر لو فبلتها وانا مش قابلاها ممكن اقولها لبنت تشبه اللي في صورة البوست تماما
ممكن
انت بتقول اني سرحت بيها ولكن اعتقد اننا وصلنا في نقاشي معاها اللي اختصرته جدا الي ربنا في انهي سما؟
طب السموات دي لزمتها ايه طب والجنه في انهي سما؟؟
واسئله ملهاش حصر وكل سؤال عاوز قراءات عديده
نرجع مرجوعنا اللي هو انا سرحت بيها
انا مسرحتش انا مجرد قدمت اجابه سهله تقدر تستوعبها واعتقد انه في كتب السنه احاديث علي ان الله علي هيئه الانسان المعلومه دي انا قريتها فعلا وليه عيون وفي ايه عين الله ترعانا
ليه يد.. يد الله فوق ايديهم
...الخ
وعموما دي اسهل صورة ممكن اقدمها لطفله هي اكيد لما تكبر هتدور تاني بمعرفتها وتسأل زيك كده
(((:
اما حكايه هو شايف وساكت
ها اديك اجابه مريحاني انا شخصيا
وهي لو قلت هو موجود وانا اكيد انه موجود وتجاوزنا مرحله السخافه بتاعه ازليه الكون والهطل ده واتفقنا الي انه موجود تفضل نقطه طب موجود وساكت علي الظلم او موجود وسايب المظالم والحروب و...
اقولك انا بقه يا سيدي
انا مفلسفاها انفسي علي اانها فرق توقيت
بمعني
انت شايف ان س ظلم صاد وربنا لازم ينقذ ص او يعاقب سين فورا بتوقيتك انت الزمني البشري
لكن الله ليه توقيت تاني والا تبقي الدنيا جنه وما فيهاش مظالم ولا عذابات
زي الصعيدي اللي بيروح ياخد بتارة وما يستناش الحكومه تعاقب القاتل لانه عندة توقيت اخر مستعجل غير توقيت الحكومه
فاهمني؟؟
يعني انت مطالب تحقق العدل لنفسك وللي حواليك وترد الظلم برضه
طب مقدرتش!!
استني عدله اكيد ها يجي بس التوقيت بتاعنا مش زي توقيت ربنا زي نظريه ان الزمن نسبي
عشان ترتاح يا دانتي
ولو انت عاوز تشوف
ده لو
هتلاقي عدله اتحقق كتير حواليك وفي حياتك
عارف لما حد يقولك العداله الالهيه دي ممكن تشوفها احيانا او كتير لو انت حبيت تشوفها كده
هيييييه يلاااا طولت عليك يا ابني
(((:
تحياتي موضوع بلا نهايه

بنت القمر يقول...

احمد شقير
اولا اهلا بيك نورت المدونه في مرورك الاول
تانيا الحمد لله انه مفيش سوء تفاهم لا سمح الله منعك من تشريفي سابقا
ولا في لي غضاضه في النفوس
(((:
اهلا بيك بالرغم من اني
not on your liste
((:
اما حكايه ادارة المرور فا والله الادارة مضطرة الي تقديم خدماتها وفتح جميع الاشارات اضطراريا
مش بكيفها اصلا
ومضطرة الي مناقشه جميع التابوهات التي تخص سن 8 و12 فئه بنات
(((:
فاهمني يا بيه
والا ها يدروا علي اجابه بره الادارة واللي نعرفه احسن من اللي منعرفوش ومعانا ربنا
((:
وطالما النيه خير ربنا يدينا علي قد نيتنا
تحياتي واحترامي لسعادتك

بنت القمر يقول...

مهند
اعتقد ان الجزء بتاع السؤال عن الله انا حاولت اديها اجابات سهله لكن مسرحتش بيها واعتقد انه في كتب السنه ما بشير والله اعلم الي ان الله علي هيئه الانسان والقران فيه انه ليه يد وعين
يد معنويه اوحقيقيه معرفش بس اعتقد والله اعلم ان كتب السنه فيها انها يد حقيقيه
ممكن انت تبقا تدور وترد عليا
اما سؤال جينا منين
فطبعا مرينا عليه
((:
ومش ها اقولك طبعا قلت ايه بس انصحك تحضر نفسك باجابات من للاسئله زي دي لحد العيال ما تيجي وتكبر
((:
يعني تذاكر من دلوقت
تحياتي
لحضرتك

بنت القمر يقول...

wanna b a physician
اكيد الموت علينا حق!!!
شكرا

بنت القمر يقول...

نونويم
اولا مفيش اطاله خالص انتي شايفه انا رغايه ازاي بكتب تعلبق اكبر من البوست
(((: وفاضيه خالص جدا
اولا شرحك جميل ومفيد من عدة نواحي
انا عندي بنت 12 سنه والتانيه 8 سنين
الكبيره عدينا مراحل كتير في الاسئله دي بتاعه جينا منين وكده
الصغيرة شاغلها السؤال عن ذات الله اكتر
او يمكن مرحله وتفسيري لها بناء علي ما اعتقد اني قريته
وهنا ها استأذنك تقري ردي علي مهند ودانتي
والي اعتقد انه من ما قرئت في السنه
عموما اشكرك جدا وتحياتي
صديقه المدونه

بنت القمر يقول...

عدي النهار
دي الصغيرة الكبيرة 12 سنه
الشرح كان مستفييييض ومفيش اجايه بتعديها الا بكيفها
((: بس لدواعي عدم الاطاله عليكم اختصرت كتير من النقاش
ولو تحب اقولك وصلنا لفين اقولك وصلنا الي ليه هما سبع سموات طب ربنا في انهي سما
طب الجنه فين
والنار فين
وهي الجنه جنب النار طب في ايه فوق اخر سما بتسأل علي الخريطه بشكل رأسي
((: طبعا مش ها اقولك الساعه تلاته الضهر في اشارة مرور وانت عمال تشم عدم عشان تجاوب الاسئله دي
نوع من التعذيب
لانك مش قادر تصدها او تتجاهلها وعاوز تكون مقنع
بس تقنع مين يا ابنيّ؟
كل سؤال عاوز له مجلد وبعد ما تقرا المجلد تعصره وتبسطه للسن ده
وبعدين دانتي يقولي بتسرحي بيها!!
طب هو لو مكاني ها يعمل ايه؟؟
شكرا مرورك يا عزيزي
صحيح انت عندك اولاد؟؟ سؤال بايخ صح؟؟
((:
عموما تحياتي واحترامي
وربنا يتقبل دعواتك

اسكندراني اوي يقول...

ماشاء الله تبارك الله
البنوته دي متفتحه اوي وواضح انها بتعرف حاجات كتيييير

الموضوع الاول دا سؤالنا كلنا فياريت لو عرفتي اجابه ابقي قوليلنا

اما الموضوع التاني فمن الصعب ان تفهمي طفله صغيره تلك المعاني الكبيره اللي احنا نعرفها
لكن يكفي ان تقولي كما قلتي لم يكن له كفؤا احد
مالهوش مثيل

اعانك الله على جيل اقول ايه الفضائيات والانترنت


لكي ولها كل التحيه

Hypatia يقول...

ماشاء الله عليها ربنا يخليهالك يارب هى واختها وباباهم

اسلوبك مع البنت متوازن وصح جدا فى وجهه نظرى واعتقد ان لو ليا نصيب فى الامومه حاتصرف بنفس الاسلوب السهل الممتنع بتاعك لانك لو طولتى واستفضتى فى الشرح معاها حتفتحى عليها وعلى نفسك الف باب والف سؤال مش وقت اجاباتهم دلوقتى ولازم تدور على الاجابات بنفسها لما ييجي الاوان باذن الله

زمان الوصل يقول...

أظن تابو الدين هو الأصعب فى التناول
بشكل ما لم يعد الحديث فى الجنس أو السياسه بالصعوبه التى كان عليها فى الماضى .. السياسه سقط عن الحديث عنها محاذير كثيره .. و شرح الجنس للأطفل أصبح علم له قواعد و تدريجات لكن الدين !! طيب إزّاى نشرح للأطفال حاجه إحنا نفسنا معندناش إجابه لها و ما نعرفه أن أحدا ليس لديه الإجابه أصلا؟ هل هذه ستكون إجابه مقنعه لهم : ماعرفش و مش هتلاقى حد يعرف !! أم الأفضل أن نترك لهم اكتشاف هذا بمفردهم !!

محمود المصرى يقول...

بسم الله الرحمن الرحيم

انا بس عاوز استفسر هو ليه كل اللى علقوا نسيوا التابوه الاول وتكلموا على السؤال عن ذات الله ؟
عموما يعنى بالنسبة لقول حضرتك يا استاذة بنت القمر ان الله على هيئة الانسان هو قول يحتاج الى ايضاح , انا اعتقد ان حضرتك تعتمدى على قول الرسول ( ‏‏إذا قاتل أحدكم أخاه فليجتنب الوجه فإن الله خلق ‏ ‏آدم ‏ ‏على صورته ) , فهذا يحمل على ثلاثة اوجه :
الاول هو ان الهاء فى قوله" على صورته" عائدة على ذلك الاخ الذى يامر النبى باجتناب وجهه

و الثانى هو ان الهاء عائدة على الله و اضافة االصورة الى الله هى اضافة ابداع و تصوير

اى ان الله هو من صور ادم لا غيره

و فى سورة ال عمران

"هو الذى يصوركم فى الارحام كيف يشاء"

فاذا صور احدا صورة ما فان هذا و ان كان خلق الله الا انه ليس تصوير الله

بل تصوير ذلك المصور مثل ما اذا صور نحات تمثالا

فان هذا و ان كان خلق الله الا انه ليس تصويره بل تصوير ذلك النحات

ففعل الخلق مغاير لفعل التصوير

فكونه تعالى خالقا يختلف معناه عن كونه مصور

و من اسماءه تعالى " الخالق" و " المصور"

و من هنا يحمل قول النبى صلى الله عليه و سلم" الله خلق ‏ ‏آدم ‏ ‏على صورته"

ان صورة ادم هى صورة ابدعها الله فان الله هو من صور ادم على الصورة التى كان ادم عليها فصوره بيده

فالله خلقه و فقا لتصويره لا تصوير غيره

و النبى امر باجتناب الوجه لما له من كرامه فهو علامة الانسان

قال تعالى" و لقد خلقنا الانسان فى احسن تقويم"

و قال ايضا" يا ايها الانسان ما غرك بربك الكريم الذى خلقك فسواك فعدلك فى اى صورة ما شاء ركبك"
الثالث هو ان الانسان على صورة الله اى ان الانسان له عين والله له عين والانسان له يد والله له يد والانسان له ساق والله له ساق , كما ان الانسان يسمع والله سميع ويبصر والله بصير ويتكلم والله يتكلم وعاقل والله حكيم , لكن عين الله ليست كعين المخلوقات وكذلك يده وساقه كما انه يسمع ليس كما يسمع المخلوقات ولا كما يبصرون فكما قال عن نفسه ( ليس كمثله شىء وهو السميع البصير ) فنؤمن ان اثبات صفات الله كاثبات ذاته هو اثبات وجود لا اثبات تكييف .
اما اين الله فالله مستو على عرشه والعرش هو سقف المخلوقات جميعا .

نيجى بقى للتابوه الاول , هو صحيح ليه مش عاوز يمشى , ايه ذنبى انا انى لا ارى فى حياتى الا رئيس واحد , بينما من هم اصغر منى سنا فى امريكا وفرنسا بل وروسيا والصين والهند وغيرها مر عليهم عدة رؤساء , سؤال يحتاج لجواب .

nody يقول...

وماقولتيش لها الحقيقه ليه
ولا خفتى عليها
والسؤال التانى
ده سؤال فطرى الاطفال كلهم بيسالوه
وفتره وبيبطلوا يفكروا فى الامور دى
ربنا يخليها لك

Yuki يقول...

ربنا يخليهالك
و يجعلها قرة عين ليكي في الدنيا و الآخرة

قوليلها ابعدي يبنتي عن الأسئلة دي الله يكرمك - بالنسبة للسؤال الأول - متوديناش في داهية هههههه

و بالنسبة للسؤال التاني
غالبا كل الأطفال بيسألوا الاسئلة دي ,
و انتي ريحيها و ردي عليها و اقنعيها بردو :)

ربنا يخليهالك :)

بنت القمر يقول...

اسكندراني
الله يخليك ويتقبل دعواتك
اشكرك جدا

بنت القمر يقول...

نسرين بسيوني
ان شاء الله تبقي ام واحلي ام
ولو ان الموضوع مش سهل وبيزداد صعوبه يوم عن يوم
وانا عموما مش بقول اني تربويه ولا صح ميه الميه لكن ده اللي شفت انه ممكن يكون صح
ميرسي يا نسرين جدا

بنت القمر يقول...

زمان الوصل
شوفي يا زمزم
التابوهات التلاته اصعب من بعض وان كان السياسه اسهلها
الجنس الكلام فيه صعب في مرحله معينه
لكن كل ام بتشوف برضه انه لسه بدري علي الكلام في الحته دي لكن الزمن ده ما فيهوش بدري اما الكلام عن الله فالحكايه بتقلب الغاز وفسر الماء بعد الجهد بالماء
ربنا يعينا وتحياتي

Tamer Nabil Moussa يقول...

ديما الاطفال بيكون كل شىء عندها غريب وغير معروف فبتحب تسال علية وتعرف اية هو

ودة شىء اجابى ومحتاج الى صبر واجابات ممتعة وصحيحة فى نفس الوقت


بوست مميز


نحياتى

بنت القمر يقول...

محمود المصري
شوف يا استاذ محمود اعتقد اني اوافق مع زمان الوصل لما قالت ان الحديث عن الدين اصعب من الحديث عن الجنس واعقد
لان الجنس بقا ليه درجات في الشرح حسب السن والاستيعاب وممكن نضرب لمثله له كتير
اما الطفل لما بيسأل عن ذات الله زي ما قلت كده
بيخش في الغميق علي طول
هو ربنا ولد ولا بنت؟
ده سؤال يبان سهل لكن هو مش سهل ابدا
تانيا انا وصفت لها الله كده اعتقد اني قرأت الكلام ده في احد كتب السنه من زمان ونسيت للاسف لكن زي ما قلت انه بعض العلماء قالوا ان الله علي هيئه الانسان من ادله قرأنيه وسنيه وقياسات
والحديث بتاع ضرب الوجه حقيقه مخطرش في بالي ولا سمعته قبل كده
لكن قالوا والعهده عليهم ...انه يد الله فوق ايديهم يعني ان له يد وعين الله
ممكن تبص هنا ده الي افتكرته
ودورت ولقيت
http://www.aldorr.com/vb/showthread.php?t=13597
ولانك خليتني ابتدي ادور في الموضوع وده حاجه اشكرك عليها جدا
بس و طبعا كده يكون الوصف وتقريب الصورة اسهل
والله اعلم
شكرا ليك مداخلتك الثريه
تحياتي واحترامي

بنت القمر يقول...

نودي 87
شكرا دعواتك ومروروك
وانا جاوبت علي قد ما شفت انه مناسب
اشكرك

بنت القمر يقول...

يوكي
شكرا ليك جدا
المرةور
وربنا يتقبل دعواتك
تحياتي

بنت القمر يقول...

تامر نبيل
اشكرك
واهلا بمرورك الاول

عين فى الجنة يقول...

طيب وليه اصلا يكون فى تابوهات عندنا؟ الاصل فى الاشياء الاباحة وليس التحريم
ولا يوجد ما يسمى تابو الدين مع الاطفال او الكبار بل هو موضوع مفتوح للمناقشة ولا يجب وضع سلاسل وقيود على حرية الفكر بل يلزم التوجيه و وهذه هى الحكمة البينة من طول فترة الطفولة فى الانسان عن غيره من المخلوقات ليمكن نقل التجارب والعلم من الاباء للابناء فى اطار التوجيه والهداية وليس بطريقة حشو الادمغة بمعلومات قد تكون اصلا ملتبسة او يشوبها الخطأ عند الاباء
والتابوهات وتعنى الممنوعات التى لا يصح الانسان ان يخوض فيها والتى شاعت بين القبائل البدائية المفروض ان الانسان فى العصر الحديث قد تجاوز تلك القيود على حرية الفكر
وطبعا برافو على ابنتك انها بتشغل مخها ومحتاجة للمعرفة وهذه الطبيعة تعود فى الاساس الى اسلوب التربية فى بيتكم الذى شجعها على التفكير فالتحية واجبة لكى ولزوجك

اما موضوع صورة الله ففيه كلام كثير وان كنت مقتنع شخصيا بكلام الشيخ بن باز الذى اعرضه كما هو

وقال سماحة الشيخ عبد العزيز بن باز: "الحديث ثابت عن النبي صلى الله عليه وسلم أنه قال: (إذا ضرب أحدكم فليتق الوجه فإن الله خلق آدم على صورته), وفي لفظ آخر: (على صورة الرحمن), وهذا لا يلزم منه التشبيه والتمثيل, والمعنى عند أهل العلم أن الله خلق آدم سميعا بصيرا متكلما إذا شاء، وهذا هو وصف الله، فإنه سميع بصير متكلم إذا شاء. جل وعلا, بل لله صفاته جل وعلا التي تليق بجلاله وعظمته، وللعبد صفاته التي تليق به.. ولهذا قال عز وجل: (لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ), وقال سبحانه: (وَلَمْ يَكُنْ لَهُ كُفُوًا أَحَدٌ)"

تحياتى لابنتك على محاولتها تحصيل المعرفةوارجو هدم كل التابوهات التى تعوق حريه الفكر

mostafa rayan يقول...

انابردة عايز اقول زي الطائرالحزين
انت قولي لهاالله سبحانه هو الخالق ليس كمثله شيء ربنا يوفقك ويوفقها

بنت القمر يقول...

راجي
معلش التأخير في الرد
اولا زي ما قلت لمحمود المصري
اول مرة اسمع الحديث ومش مشكله نفتح التابوه بس نكون قد فتحه
ونحضر اجابات
تالتا اللينك اللي اديته لمحمود المصري يا ريت تبص عليه ومنور

بنت القمر يقول...

مصطفي ريان
اشكرك اديني بحاول اقدم اجابات ومنكم ونستفيد
تحياتي اشكر مرورك