الاثنين، مايو 19، 2008

{النتيجه............60 سنه نكبه{2


عملت الاستطلاع السابق وحصرت الاصوات وظهرت النتيجه الاتيه قبل النتيجه أشكر كل المشاركين كل من كلف نفسه دقائق للنقر علي الكيبورد الخاص به ومشاركتي افكارة من دعوته للمشاركه ومن شارك من نفسه من خالف رأيه قناعتي الخاصه ومن وافقها
اشكر كل من عبر برأيه بصراحه ولم يترك تعليقا عنتريا
بعض الاراء كانت مفاجئه جدا لي وبعضها توقعته تماما.. اما المفاجئه فهي أن يكون هذا التعليق من ذلك الشخص تحديدا.. ماعلينا
استفدت من تعليقات كتير وفتحت لي ابواب للتفكير في نقاط أخري وأن كنت باقيه علي قناعتي الاولي!
الحيرة انتابتني لان المطلوب كان الاجابه بنعم او لا لكن كان في اجابات تحمل وجهات نظر واشتراطات وتصلح ان تصنف تصنيف منفرد المهم 17صوت بموافق.. مع الاخذ باعتبارات نزاهه الحزب والهدف النهائي هو التحرير وعدم السعي للسلطه وعدم ارتباط مصالحه بأي كيان سياسي اخر الخ
21صوت غير موافق!!!
الواحد وعشرين الغير موافقين كانت اجاباتهم متنوعه جدا المهم أنها جمعت اجابات ناس من النقيض للنقيض
بمعني ناس رافضه نهائيا الانضواء تحت تيار ديني او اصولي
واخرين برفضون الا الانضمام لحزب ديني سني اسلامي التوجه حتي يحصلوا علي الشهاده التي هي هدفهم النهائي
يعني الرافضين جبهه جمعت النقيضين ليبراليين جدا وعلمانيين مع اسلاميين الغريب هنا انهم كل منهم بقي علي قناعته مهما كان الهدف النهائي عظيما ولا خلاف عليه ولكن استحال جمعهم علي هذا الهدف
في اربعه اصوات كانت لاتري اي بارقه امل ولا جدوي أو نظرت بعين تشكك لاي حزب سياسي او جماعه انا اعتبرت اجابتهم النهائيه هي رفض اذن النتيجه 7:6 لا اوافق الي اوافق
اما جبهه الأوافق والتي من الممكن تصنيفها انها جبهه براجماتيه عمليه نظرت الي الممكن والمتاح بدلا عن الصحيح والاصح

*****************
في تعليقات مهمه جدا استفدت منها
ما قاله ابو فارس:أدرك مدى المهانه اليوميه التى نتعرض لها كأمه وشعب..ولكن الحل ليس الهروب للأمام واﻷنتحار..الحل يتم بعقل بارد وحساب واضح للمكسب والخساره!
ماقاله انو نيمس:موافق بس بصراحه مش عشان المقدسات رأيي إن المقدسات مهمة لكن الأهم البشر!
صباح الخير:الصراع اصلاهو بين فريقين متصارعين الاول هو اسرائيل ومن يدعمها والثاني هو نحن بجميع توجهاتنا واختلافاتنا
بلوستون:فلن اقاتل ولا انضم لحزب لتحرير الاراضي العراقية ولا الفلسطينية ولا اللبنانية .. طالما بلدي في أزمة ومحتاجة اللي يحررها
الغزالي:بحارب لربى وفى سجودى وركوعى ,,,هابقى واثق انة معايا وهادعية لانى بحارب من اجل دينى..حتى لو اللواء او الراية الى بحارب تحتيها مش راية دينية
يا مراكبي:فلون القطة ليس مهما .. المهم أن تأكل الفئران ولنتعلم أن نحقق أهدافا مرحلية .. فذلك أفضل من أن ننشغل بأمور جانبية لنجد أنفسنا لم نتحرك قيد أنملة عبر السنين الطويلة
مختار العزيزي:فإقامة العدل وإرساء الحرية ورد فرضا اني انتمي لليسار وماحدش اتحرك من اليسار مش معقول افضل منتظر طالما اني اؤمن بتحرير الأرض والأرض تعني بالتالي البشرالحقوق لأهلها هدف أعتقد أن الإسلام يسمو به فوق الفروق العقدية.
طارق مؤمن:فرضا اني انتمي لليسار وماحدش اتحرك من اليسار مش معقول افضل منتظر طالما اني اؤمن بتحرير الأرض والأرض تعني بالتالي البشر
كل دي اضاءات منكم مهمه وفتحت لي افاق جديده من الرؤيه
اشكركم جميعا
**********************
تحديث تم تعديل النتيجه بزياده صوتين الي اوافق.كما في السطور الاعلي.. ارحب بمزيد من افكاركم

هناك 38 تعليقًا:

Rainbow يقول...

استطلاع جيد بنت القمر و ان كان احلى شىء فيه ان الناس شاركت بدون فرض رايها على الاخرين او الاعتراض على راى شخص اخر
و ده شىء جميل لا يحدث كثيرا

تحياتى لكى

nonoymm يقول...

السلام عليكم بنت القمر
فعلا الاستطلاع دة والنتائج خلى الواحد يفكر من جديد
ودة حصل معايا بالفعل
ربنا يوحد كلمتنا وصفنا يارب
تحياتي وتقديري

Sherif يقول...

عزيزتى بنت القمر

جميل هذا الاستطلاع فى موضوع حساس يحتج لحوار أوسع .. ولى بعض الانطباعات التى أرجو أن يتسع صدرك لها تعليقا على النتيجة ..

================================
أشكر كل المشاركين كل من كلف نفسه دقائق للنقر علي الكيبورد الخاص به ومشاركتي افكارة من دعوته للمشاركه ومن شارك من نفسه من خالف رأيه قناعتي الخاصه ومن وافقها

( 38 تعليق بالتحديد مع حذف التكرار وردك على بعض الاصدقاء .. أرى أن هذه عينة صغيرة نوعا ما وكان ينبغى ان تكون كبيرة حتى تمثل اتجاهات واضحة كما حاولت نوران (بت خيخة وأى كلام) فى استطلاع الستات عايزة ايه حوالى 80 للسيدات وأكثر من 132 للرجال حتى تكون موضوعية وربما كان من الأفضل أن تنتظرى حتى يزيدوا قليلا .. من هنا كانت الحيرة فى التصنيف )

==================================
بعض الاراء كانت مفاجئه جدا لي وبعضها توقعته تماما اما المفاجئه فهي أن يكون هذا التعليق من ذلك الشخص تحديدا.. ما علينا

(لماذا كان تعليقه مفاجئة لك ؟.. ماذا توقعتى وماذا وجدت .. بدا الموضوع وكأنك تتحدثين الى نفسك )

==================================
استفدت من تعليقات كتير وفتحت لي ابواب للتفكير في نقاط أخري وأن كنت باقيه علي قناعتي الاولي

( الموافقة أم عدم الموافقة ؟)

==================================
الحيرة انتابتني لان المطلوب كان الاجابه بنعم او لا لكن كان في اجابات تحمل وجهات نظر واشتراطات وتصلح ان تصنف تصنيف

(الشروط هى بالضبط أسباب رفض الآخر .. بمعنى أنه لو تحققت الشروط لكانت اجابات غير الموافقين بالموافقة)

==================================
اما جبهه الأوافق والتي من الممكن تصنيفها انها جبهه براجماتيه عمليه نظرت الي الممكن والمتاح بدلا عن الصحيح والاصح ( لاأظن أن تكون برجماتية لأنها لم تأخذ بأسباب واقعية على طريقة نرضى بأى شئ .. وهذا مانفعله على مدى ستين عاما دون جدوى)

عموما كانت محاولة جميلة لحوار مفتوح وتعليقات معظمها كان شيقا لأنها توضح رؤية حديثة للمفكرين .. فى قضية لازالت قائمة .. وإن كانت قديمة ..

تحياتى لاستطلاع الجميل ..

appy يقول...

هههههههه
عارفه بضحك ليه خايفه لفعلا مصر نحتفل بنكبتها اللى ماشيين فيها من دلوقتى وبايدينا
اعذرينى بس كل حاجه عندى ملخبطه فى بعضها وبقيت شايه الدنيا مع كعب كوبايه قهوة

بنت القمر يقول...

Rainbow
اشكرك علي المشاركه واشكرك علي المرور
الحمدلله مرت علي خير
(:
وإن كان ده المفروض ان محدش يحجر ولا يسفه رأي حد والحمد لله الاراء والاتجاهات كانت مختلفه ومتنوعه جدا
تحياتي

بنت القمر يقول...

nonoymm
هو ده المطلوب ان الناس تفكر من جديد وما تاخدش اي شيئ مسلم بيه وتبحث دوما عن الصحيح والاصح
تحياتي

أبوفارس يقول...

ممكن أضافه بعد أذنك سيدتى..أظن تنوع اﻷراء بهذا الشكل دليل صحى وليس العكس..أظن أننا بدأنا ندرك مدى أختلافنا وبدأنا نخرج من تحت عباءه الرأى الواحد والحزب الواحد والزعيم اﻷوحد الخالد أبدا الذى لايخطئ..المهم اﻷن أداره اﻷختلاف والخلاف ودى أعتقد محتاجه تدريب ووقت...نقطه فى قلب الموضوع..هل صراعنا مع أسرائيل هو قلب المشكله..؟؟بمعنى أن القضيه الفلسطينيه هل هى الحلقه اﻷساسيه فى أشكاليات المنطقه..أم أن حاله التخلف المذريه هى اﻷهم..هل أنهاء وجود أسرائيل -فرضا- سينهى مشاكلنا ونعيش بعدها ف تبات ونخلف صبيان وبنات..أم أنها تفصيله أخذت أكبر من حجمها فى مجمل أشكاليات التحديث..؟؟؟

بنت القمر يقول...

شريف
اولا اهلا بيك انت صديق وصديقك من صدقك.. طبعا معنديش مشاكل اسمع وجهات نظر في ما يعتبر عيوب في الاستبيان
واسمح لي ارد
*********
اولا هما 39 21لا اوافق و17 اوافق
وبعدين يا استاذي
مفيش مقارن بين سؤالي وبين سؤال الستات عاوزة ايه؟؟ صح؟!
مع احترامي القيمه مش بعدد المشاركات..لكن نوعها.. ولو لاحظت شخصيات المشاركين ناس اجلهم جميعا منهم مدونين ملء السمع والبصر من ناحيه القيمه العقليه و قوة الشخصيه وتنوع التوجهات
مش ها اعد اسامي عشان مقللش من قيمه الاخرين
اربعين صوت بعد حذف المتكرر وردين لي عينه مناسبه.. وخلي بالك الموضوع اصلا تقيل!!
انا ممكن اعمل استبيان بكرة هل يفضل الرجل المصري الشقراء ام السمراء ولماذا وهتلاقي الاجابات وصلت 120
لكن موضوع النكبه مش سهل.. والبعض عبر انه مؤلم.. الحديث عن هزائمنا.. ارجع لتعليق محمد مفيد وشقير.
عموما انا سعيده باللي شاركوا وبعضهم دعيتهم شخصيا
اللي يدي مصداقيه للنتيجه اقول لحضرتك
اولا تنوع عقليات وثقافات وسن واتجاهات المشاركين
وهتلاقي كل مشارك ليه بصمه وفكر مختلف تماما
2_حكايه أني اتفاجئت بتعليق شخص فعلا حصل.. مش ها اقدر اقول مين احتراما ليه لكن ربما هي نوع من الصراحه المؤلمه
أو انه ما ادعاش ما ليس فيه.. اعذرني ان بدوت اتحدث الي نفسي احتراما لكل من كتب رأيه
3_ قناعتي الاولي:ما كتبتهاش عشان كل واحد يعبر براحته.. ومن غير ما يحس بحرج انه لازم يحسس علي كلامه مراعاه لصاحبة البيت فضلت ان ابقي في دور المتفرجه فقط وكان كل ما اتمناه عدم حدوث اشتباك بين اصحاب الاراء المتعارضه والحمد لله محصلش.. وده في حد ذاته كمان اسعدني.. نرجع تاني لموقفي
أوافق
(:
وهو خليط من رأي نوارة والغزالي اراؤهم عجبتني جدا
وتحديدا ما قاله يا مراكبي بالاختصار.
زعلت؟!!
4_ الاشتراطات اللي كانت في التعليقات كانت من جبهه اوافق.. مش من لا اوافق
يعني وافقوا مع بعض التحفظات
5_( لاأظن أن تكون برجماتية لأنها لم تأخذ بأسباب واقعية على طريقة نرضى بأى شئ .. وهذا مانفعله على مدى ستين عاما دون جدوى)
وجهه نظر!!
لكن برضه اقرا تعليق يا مراكبي
((:
اشكر مرورك جدا واشكر مشاركتك
تحياتي ويارب اكون دايما عند حسن ظنكم
تحياتي

arsenalwy يقول...

السؤال جميل وفكرة الاستطلاع اجمل لكن للاسف اتاخرت شوية

بس برضة هقول رايي

نعم لو هنحرر القدس انا مستعد اتخلى عن افكارى فى سبيل ان احنا نحررها بس نحررها



مستنى اقتراحك على البوست الجديد

وادعوكى لوضع لوجو حملة وقف تصدير الغاز الى اسرائيل

ودة اللينك بتاعه
http://www.zshare.net/image/12105759293805bb/

Nsreen Bsunee يقول...

اشاركك اعجابك بردود كل من
العزيز\احمد القاضي
الاستاذ\ابوفارس

الصارم الحاسم يقول...

للاسف كنت باكتب تعليق طويل وطار

:(

سؤال جدير بان يتم طرحه على علماء ثقات ...ولكم تنيت ان يكون الوصول لشيخ مثل وجدي غنيم سهلا لاخذ رأيه في هكذا مسألة


باختصار


السؤال لا يمكن الاجابة عليه ابيض او اسود..السؤال يقع في المنطقة الرمادية..يعتمد على الحال والظروف الميدانية


ادعم نعم...انضم غالبا لا

لان الانضمام معناه الاتباع ووجوب الطاعة والتي ستنهار مثلا في مثال حزب الله مع اول صحابي يتم سبه امامي.....وقد تصل للدماء هاهنا


لكن ادعم ايضا لا تعني الوقوف بعيدا وراء الساتر واسميه دعما


قد يكون دعما ماديا...روحيا بالدعاء بالهداية والنصر معا وليس احدهما فقط.....لوجيستيا يتضمن السلاح حتى ...معلوماتيا....سياسيا واستخباراتيا لو قلنا على مستوى الدول


لكن الاولى هو راية الاسلام الحقة التي اؤمن بها..فان وجدت فهي اولى بالاتباع مع المناصحة للقائد او ان كنت في موقع القيادة بالتعاون مع هؤلاء بما ان الهدف واحد وهناك ارضية مشتركة مع التنبيه على الطرف الآخر بعدم ملامسة مناطق الخلاف اثناء هذا التعاون ولو حتى لفظيا


فان لم توجد هذه الراية وحتمت الظروف الميدانية الانضمام لهذه الراية - مثال حرب يوليو 2006 لم يكن يدافع الا حزب الله - فوالله اعلم وما تستريح له نفسي اكيد هو الانضمام ولكن بشكل مؤقت مرتبط بالظرف مع وجود الشرط السابق بعدم التطرق واحترام مناطق الاختلاف


ده باختصار مخل جدا للاسف
):

.:.-=- ELGaZaLy-=-.:. يقول...

وانا كمان استفدت جداا من الاراء الى قريتها ولو انك منبهه بعدم الرد على الردود كانت قامت مذبحة ولا مذبحة المماليك فى القلعة...

تحياتى

بنت القمر يقول...

ابي
لما حصل موضوع لبنان مع كل اسفي ليه منستش اخبار مصر لا من ناحيه الغلا ولا الفساد اقري موضوع مصرنا ام لبنانهم
نكبتنا نكبه اي دوله في العالم التالت خلطه من الجهل والتخلف والاستبداد والفساد
حاجه تحزن
ابي نورتي

بنت القمر يقول...

ابوفارس
يا استاذي انا سعيده جدا بتنوع الاراء وده هدفي في ناس شاركت وشرفتني بنفسها وفي ناس حبيت اسمع وجهه نظرها ودعيتها بنفسي زي حضرتك
عشان أنا قصدت اوسع العينه وكل واحد لو لاحظت من المعلقين بصمه وفكر خاص ومحدش فيهم شبه حد خالص
كان مهم نسمع بعض ونعرف وجهات نظر تانيه
انا عن نفسي ممكن جدا اغير رأيي لو شفت الامور من وجهه نظر جديده أو مغايره.. مينفعش الواحد يقعد يسمع صوت نفسه بس.. والا التدوين بقا لزمته ايه..؟ مش برضه التعرف والتشارك في الافكار
حكايه اسرائيل وأنها سبب البلاوي اللي احنا فيها ولو ازلناها ها نعيش في تبات ونبات ونخلف صبيان وبنات
اعتقد طبعا انها مش سبب للبلاوي اللي احنا فيها
لكنها نتيجه منطقيه لها!
):
وجودها نتيجه لحلقه ممتده من الاستبداد.. والفساد الحكومي.. وغياب التعليم الحقيقي.. والانغلاق ..وسنوات من الاستعمار.. وحاجات تانيه كتير
لما نقوي ونصح من كلل العلل دي الكيان العنصري الدخيل ده ها يدوب لوحده...لان زي ما حضرتك اشرت انه عوامل فنائه تكمن بداخله
اشكر جدا مشاركتك
نورت المدونه تحياتي

بنت القمر يقول...

ارسنلاوي
اهلا بمشركتك وممكن تقول رأيك اي وقت مررت علي مدونتك وبخصوصو حمله تصدير الغاز
قبل ما اعمل اي شيئ ها ابتدي اجمع معلومات عن الموضوع كفايه
في بعض المعلقين عندك حطوا رابط الحمله بتاعه اعضاء مجلس الشعب ضد تصدير الغاز
keep our gas
هابتدي اتابعه اشكر مرورك

بنت القمر يقول...

Nsreen Bsunee
وانا كمان اشاركك الاعجاب
(:
وان كان ابو فارس قال لا اوافق ويا مراكبي وافق
:)
بس وجهات النظر اللي ورا الاجابه هي اللي افادتني
وان كنت اميل الي تبرير المراكبي بجد اوجز ما اريد قوله تحياتي

جبهة التهييس الشعبية يقول...

امممممم
طب كويس
النتيجة دي كويسة
انا مبسوطة، لحاجة في دماغي كده، ارجوكي ما تضغطيش عليا، الله، طيب طيب ح اقول لك بس ما تقوليش لحد
انا لا اثق في الايديولوجيين المنظمين
وباحس انهم بينتهي بهم الامر انهم فعلا ما بيعملوش حاجة ولا ينجزوا بسبب تمسكهم الدوجماطيقي بالايديولجية اللي هم متنظمين تحت عنوانها
ايه ده؟ ايه الكلام المجعلص ده؟
الظاهر دي بقايا البيان اليساري اللي نشرته عندي
المهم اديني قلت لك اهو
بس لو سمحتي ما تبقيش تزني وتضغطي عليا تاني مفهوم؟

خبيب يقول...

استطلاع جميل

وشكرا جزيلا على حصر الإجابات بهذه الطريقة الجميلة

نتيجة لها مدلول قوي

عدى النهار يقول...

ياترى تعاملتي إزاى مع الإجابات المشروطة؟

يعنى مثلاً إجابتى كانت "لا" فى حالتين و"نعم" فى ماعداهما. ذلك بالإضافة للدعم الغير مشروط للفلسطينيين أنفسهم

أتصوّر إن كثيراً من الإجابات إستحضر أصحابها فى ذهنهم نموذج سىء للتوجه الذى رفضوه. بمعنى إن من كان ضد أى توجه دينى إستحضر نموذج طالبان وهكذا. عن نفسى كان فى ذهنى الأنظمة المتطرفة سواء كانت دينية أو غير دينية

فى إجابتى تعمدت إستخدام كلمة دينية ولم أقل إسلامية لأن المسيحيين لهم مقدسات أيضاً واقعة تحت الإحتلال علاوة على إن الأرض المحتلة تخصهم أيضاً. يعنى المشاركة فى محاربة المحتل مش حكر أو واجب على المسلمين فقط

الإجابات كلها آراء نظرية ممكن تصمد أو لا تصمد وقت الجد. المهم والعملى هو إن كل واحد يقدم اللي يقدر عليه ولو كان بسيط جداً لنصرة مظلوم أو محتاج أياً كان مكانه أو جنسه

بنت القمر يقول...

الصارم الحاسم
يا عم مخولتني!! مفهمتش يعني ايه ادعم اه اشارك لا بس مش ها اقف من وراء الستر برضه
طب والنبي دي تتفهم بقا ازاي
وتتصرف من انهي بنك؟!
ما هو انا مش بقول انه في حزب او جماعه اسلاميه سنيه عشان تقولي الحق رايه الاسلام
لان كده احنا بنتكلم في الوضع الطبيعي وده مش سؤااااالي
سؤالي لو مفيش الرايه دي ياعم صارم
زي لبنان كده
وحزب الله بس هو اللي بيحارب
وانت سني وهما شيعة ها تعمل ايه؟ هو ده المقصود بيخالفك فكريا وايدلوجيا
ما هو يا انت معاه يا لا!!
مش اذهب يا موسي انت وربك فقاتلااإنا ها هنا قاعدون!!
لو حزب من الشيوعيين ومصر فيها حرب
بيدافعوا عن البلد جماعه أو تنظيم مسيحي تنضم لهم لان مفيش غيرهم علي الساحه
ولا تخاف الا لو الشيعة او المسيحيين دول
انتصروا يتقلبوا علينا زي تعليق البعض
هل تقبل التعاون المرحلي ده ولا لا
معلش يا صارم اقرا السؤال والتعليقات تاني بتأني
وبعدين الموضوع مش فتوي عشان اسأل وجدي غنيم انا عاوزة اجابتك كمواطن مصري وعربي ومسلم
وعشان كده انا طلبت المشاركه من الناس عينه كبيرة تضم اتجاهات كتير وشرايح سن متفاوته وسيدات ورجال
زي ما تقول الواحد يعرف برضه نبض الشارع
فهمت قصدي؟
نورتني

بنت القمر يقول...

.:.-=- ELGaZaLy-=-.:.
شوف هو ده كان المطلوب
ان الناس تسمع بعض
وبعدين الحمدلله مفيش مذابح ولا حاجه وزواري عارفين كده اني مليش في الصوت العالي يا نتكلم بعقل يلا بلاش
احسن ولانه محدش بيغير قناعه حد بالخناق لكن الهدوء والتحاور احسن وسيله
نورت المدونه ورأيك كان هام جدا ومتوافق مع وجهة نظري تماما في نقطه الشهاده بالذات
تحياتي

بنت القمر يقول...

جبهه التهييس الشعبيه
ليه بس العكننه دي يا بنتي؟
ده النتيجه دي صدمتني وبعدين الايدلو جيين المنظمين زي حزب الله اللي انتي بتأييديه ازاي بقا ها ترجعي في كلامك انتي ها تمخوليني يا بنتي؟؟!!
ولا انا فاهمه غلط
وبعدين لو جه حرب علي مصر مثلا وفي حزب شيوعي تولي النضال او تنظيم مسيحي مثلا ها تعملي ايه مع ولا ضد ما هو ده كان السؤال وانتي قلتي كلام عسل المرة اللي فاتت ها ترجعي في كلامك تاني؟؟
نورتي يا ست نواره

بنت القمر يقول...

خبيب
اشكرك
مدلولها قوي فعلا
بس معجبنيش بصراحه مع احترامي للاراء الكل
اشكر مرورك

بنت القمر يقول...

عدي النهار
بالنسبه لاجابات المشروطه انا وضميري بقا
:(
حسبتك طبعا من جبهه لا اوافق من جمله انت قلتها لا اوافق علي حزب يقصي الدين
بس خلاص
اركن بقا الاشتراطات علي جنب
يعني لو حزب شيوعي مش ممكن تشارك معاه مثلا
او تنظيم مسيحي ملكش دعوة
صح ولا انا غلطانه
او ع تقول غلطانه وكل واحد يغير رايه دلوقت عشان متجننونيش
(:
اجابتك كان تحمل رفض اكتر منها موافقه انا اصلا مشوفتش فيها اي موافقه
مع احترامي لرأيك طبعا
نورتني

عدى النهار يقول...

تغيير رأى إيه! مافيناش من الكلام ده
:)
أنا فعلاً كنت مستغرب حاتتعاملى إزاى مع الإجابات اللي فيها موافقة ورفض.. حاجة تجنن زى ماقلتى بس إنتى اللي جبتيه لنفسك :) أعتقد إن تعليقي إتفهم بصورة غير كاملة غالباً لأنه كان مختصر. يعنى أنا لا أتوقع إن حزب شيوعي (لو كان لسه فى حاجة بالوصف ده) حايكون فى مكان للدين فى صفوفه. الإقصاء أو منع الدين من شغل مكانه الطبيعى مقصود به الوقوف فى وجه حركة الدين فى المجتمع بمنع أصحاب التوجهات الدينية من المشاركة فى تحرير الأرض
وبعدين أنا قلت الدين ماقلتش الإسلام عمداً لأني فعلاً أحب أشوف وجود لتنظيم مسيحى إلى جانب التنظيمات الموجودة لأن الكل واقع تحت الإحتلال. الفكرة هى إن الناس يكونوا مع بعض إيد واحدة واللي يستحق الإقصاء منهم هو الخائن فقط

Sherif يقول...

عزيزتى بنت القمر

أشكرك جدا على مواساتك ..

وأعتذر إن كنت سببت لك أى ضيق .. و فأناأرغب بأى حال أن يكون المقام سجالا للمناقشة بينى وبينك .. ماأردت فقط أن نكون موضوعيين .. فكما قلتى انت الموضوع بالفعل تقيل وحرج تتباين فيه الآراء وكلها يسعها هذا المقام ..

أردت فقط أن اوضح بعض الاشياء .. طبعا اذا سمحتى لى
أولا : حينما سقت مثلا بما فعلت العزيزة خوخة كان من حيث الشكل ..لاالمضمون .. اقصد الطريقة .. كلما افسحت مجالا اوسع .. ربما كانت الرؤية أوضح فى بيان الاتجاهات العامة والاسباب الحقيقية وراء تلك الآراء .. فانت فى استطلاعك لم تكتفى بنعم أو لا فقط .. بل طلبت الاسباب .. وطبيعى أن هذه هى المعلومة التى ننتظرها ..
والتحليل العلمى لايتجاهل أى رأى مهما بدا بسيطا والا كانت الدعوة غير مفتوحة وحكرا على فئة معينة .. فكل الآراء مرحب بها لأنها تشكل فى نظرى شرائح مختلفة من الرأى والرأى الآخر .. والمؤكد أن كلها مهمة ..

ثانيا: لايهم أحد أن يعرف من هو من تفاجأت بتعليقه .. فهذا لايقبله أحد .. لكننا كنا نود أن نفهم ماذا توقعتى .. وماذا وجدت .. طبعا دون أسماء ..

ثالثا: أصبت فى عدم الافصاح عن موقفك .. فهذا بالتأكيد رفع الحرج عن الكثيرين قبل ذكر رأيهم ..

رابعا : سؤالك دمه خفيف جدا .. والاجابة عليه .. لأ مازعلتش .. لأنى أحب المناقشات الموضوعية .. وكأنها ندوة .. والناس لم يجتمعوا حتى على ألله نفسه .. فهناك غير المتدينين على وجه الأرض .. أقصد أن الاختلاف صفة البشر .. وليس معنى ذلك أننا متخاصمين .. طبعا فيما عدا الأهلى والزمالك .. ((:

خامسا : تلك الاشتراطات لو تحققت .. لتحولت جبهة لاأوافق الى أوافق .. وما قصدته أن تلك الاشتراطات هى السبب فى أنها قالت لاأوافق ..

أشكرك .. وأوعى تزعلى من الحوار
تحياتى والى لقاء فى بوست ساخن آخر .. وأعدك ألا أعلق ..

محمود المصرى يقول...

بسم الله الرحمن الرحيم

بغض النظر عن رأى الجميع لكن احب ان اوضح اساس الاجابة بلا اوافق , لان فى المرة السابقة اكتفيت بعرض الرأى دون التأصيل له
البداية هى اننا مسلمون , وبما اننا مسلمون فنحن نؤمن ان جهاد الاعداء وتحرير الارض هى عمل عبادى , والعبادة فى اصلها توقيفية , بمعنى اننا نعبد الله كما امرنا وليس كما نهوى , وبما ان الجهاد تحت راية لا اله الا الله ركن اساسى من الجهاد كما امرنا الله به فلا يمكن ان نتخلى عنها تحت اى ظرف او اى مسمى .
اما لو اعترض البعض بالقول ان الفرد يقاتل فى سبيل الله ولا شان له براية الحزب التى يقاتل تحتها سواء شيوعى او ليبرالى او غيره - رغم قناعتى ان الكائنات دى كلها جهادها الحقيقى كان فى كباريهات شارع الحمرا وبارات قبرص - لكن هذا فيه مغالطة , لأن النصر هو من عند الله قبل كل شىء , فكيف نتصور ان ينصرنا الله ونحن نقاتل تحت راية ماركسية او عالمانية ؟ ان الله وضع شرطا لنصرته وهو ( ان تنصروا الله ينصركم ويثبت اقدامكم ) وطبعا واحد سخيف هايطلع يقول امال ليه الفيتناميين الشيوعيين انتصروا من غير ما يكونوا مسلمين , هاقول ان الاخذ بالاسباب المادية اللازمة للحرب تحقق النصر , لكن نحن لم ننتصر يوما كأمة مسلمة ونحن نمتلك الاسباب المادية المتفوقة على العدو , ولا ننسى ان فيتنام كانت مدعومة بالصين والسوفيت .
احب اوضح فى النهاية انه لا فرق بين حاكم كافر شرقى وحاكم كافر غربى , كلاهما سواء , فخرج الاحتلال الانجليزى وجاء القمع الناصرى الذى حارب الدين وشرد الدعاة , وحتى فلسطين خرج اليهود من غزة وانبرى دحلان ورئيسه البهائى للقضاء على المجاهدين لولا ان ثبتهم الله , والامثلة كثيرة , وبصراحة تجربة الامة المسلمة مريرة مع الحكام الذين ناضلوا تحت رايات فضفاضة وفى النهاية استغلوها وقمعوها واذلوها , فأتمنى ان نتعلم من دروس الماضى .

الصارم الحاسم يقول...
أزال المؤلف هذا التعليق.
الصارم الحاسم يقول...

؟؟؟؟؟

طب ومال سيادتك متنرفزة عليا اوي كده ليه
:))


قلت بوضوح ان السؤال ما ينفعش يتجاوب عليه بشكل قاطع ابيض واسود..وده معناه مش معنى الاحجابة في موقف محدود بمعطيات معينة يبقى ينفع انه يتعمم زي ما هيتفهم

اجابتي على سؤالك كتانت في آخر تعليقي واضيف عليها انضم قد يكون مرحليا لكن الافضل وما قد افعله ان شاء الله اني اكون فصيل مقاوم مستقل حتى وان بدأ بامكانات قليلة وعدد قليل - عشرة مثلا او اكثر بامر الله ...واتعاون معهم كفصيل ...يعني ادعمهم بمقاومة حقيقية ومسلحة كفصيل موازي يعمل على نفس الهدف قصير المدى وبتعاون مرحلي ووقتي....لكن لا آخذ اوامري ولا اضع استراتيجيتي البعيدة عليهم

لكن لا اكتفي باذن الله بالفرجة عليهم من منزلي والمباني يتم ضربها من حولي


فخمتو
؟
:)

أحمد كمال يقول...

عزيزتي بنت القمر

للأسف فاتتني المشاركة في الاستطلاع المهم ده . شكرا لك عليه فالنتيجة مفيدة جدا لفهم كيف نفكر ، و واضح إننا نفتقد وجود مرجعية واحدة لاتخاذ القرار و التنفيذ ، و ده طبيعي جدا ، لكن الخوف من إن مجموع ردود أفعالنا دي هو صفر . الصفر اللي خلى وضع فلسطين يوصل للشكل اللي هو عليه النهارده ، و الصفر اللي عمال يضيع مصر من إيدينا يوم بعد يوم .

أعتقد إن اختلاف المرجعيات مش لازم يكون عائق عن تحقيق آمالنا ، و لكن بالعكس لازم يكون سبب قوة يخلينا نختار الطريق الصح ..

و في النهاية أنا متفق مع الملاحظة اللي بتقول إن الموضوع أعقد من إنه يلخص في نعم أو لا .

تحياتي

رئيس جمهوريه نفسى يقول...

هى الفكره حلوه بتاعت استطلاعات الراى وخصوصا فى الافكار دى والموضوعات الهامه
تحياتى

مروة الزارع يقول...

أستطلاع جميل بجد

تحيااااااتى ليكى يا قمرة

بنت القمر يقول...

عدي النهار
مليش دعوة برضه انت من جبهه لا اوافق
انا فهمت وجهه نظرك من الاول
(:
فعلا المطلوب الناس تتكاتف مرحليا علي عدوها وبعدين نقعد نحارب بعض وننظّر براحتنا
نورتني جدا
تحياتي

بنت القمر يقول...

شريف
1- انا والله وسعت الشريحه وفي ناس افاضل زيك كده طلبت تعليقهم بنفسي !
طب كنت اوسع الشريحه ازاي بمد الوقت مثلا.. اوكيه يمكن انا استعجلت..
2_اللي توقعته من شخص معين هو موقف اكثر بطوله فدائيه حماسا.. مش عارفه اقولك ايه لكن لقيته رد برضه مش لاقيه توصيف رد منكفئ انسحابي .. فيه نوع من الانانيه شويه.. مش اكتر من كده طبعا مع احترامي
وخصوصا اني بقيس من خلال وجهه نظري الخاصه
3_اشكرك جدا
4_اشكرك برضه كلك زوق
5_مش اكيد في ناس رافضه بدون اشتراطات رافضه علي المطلق
اخيرا اشكرك انك بتشكرني علي مواساتك
(:
وانا مش ممكن ازعل منك انت شخص فاضل ورأيك دايما يهمني ووجودك بيشرف المدونه
وانا اصلا اللي طلبت رأيك
وانتظر مرورك دوما
تحياتي

بنت القمر يقول...

محمود المصري
أنا فهمت ومحترمه قناعه حضرتك ووجهه نظرك من الاول
لكن وممكن تعتبره تساؤل بسيط لما المصريين حاربوا في تلاته وسبعين وانتصروا
كانوا بيناضلوا من أجل تحرير الارض ولا كانوا بيجاهدوا في سبيل الله؟؟
لو تسمح لي ارد انا مش فارقه لسبب
ان النضال والكفاح لتحرير الوطن برضه نوع من انواع الجهاد وخلي بالك حكومه السادات مكنتش رافعه رايه اسلاميه!!
يبقوا دول شهدا ولا لا؟؟ مين يقدر يقول ان القتلي في حرب 73 مش شهداء!!
فهمت قصدي؟
من مات دون نفسه فهو شهيد.. من مات دون ماله فهو شهيد.. من مات دون عرضه فهو شهيد..
الشهاده مش بس مكانها تحت رايه جهاد
خلي بالك_ المسلمون اراقوا بحور من دماؤهم في عهد الامويين مثلا تحت حكم فرق مختلفه ورايات متقاتله كل واحد منهم معتقد انه بيحارب من اجل الله
قتلوا الحسين والحجاج دخل الكعبه وكان معتقد انه من اجله الخلافه
اذن العبرة بالنتيجه وليس الطريق فقط
اذا كانت النتيجه لا شيئ او سفك دماء لا ذنب يبقا مش جهاد
اذا كانت العبرة في النهايه الحريه وارساء العدل علي رأي مختار العزيزي يبقا واجب ديني بشكل او اخر
علي رأي المراكبي ليس المهم لون القطه المهم ان تاكل الفيران.. مفيش الا حزب الله شيعي وانت سني يبقا تعارضه ولا تقبله؟ وخصوصوا اذا كان البديل هو الصهاينه
دي كمان قناعتي
واهلا بيك يا استاذنا
وخلافنا لا يقلل ابدا من احترامي وتفهمي لوجهه نظرك
واشكر مرورك
تحياتي

بنت القمر يقول...

الصارم الحاسم
ايوه كده يا فندم لما تقول كلام مفهوم ومش متناقض انا كده افهم
!!
واحييك علي رأيك ده _ لاني متفقه معاه..
اما انك ممكن تعمل بنفسك فصيل ولو قليل العدد!!
عارفه انك قادر وتعملها!!
((:
اشكرك
تحياتي

بنت القمر يقول...

احمد كمال
اهلا بيك مجموع افعالنا = صفر
تصدق ممكن!!
احيانا الخلاف بيكون منفعه
واحيانا بيؤدي الي لا نتيجه ولا موقف
بس الفكرة برضه لما طرحت الاستفتاء ان الناس تفكر مع بعض
وتحترم بعض وتحترم اختلافاتهم مع الاخرين
وده في حد ذاته نقطه مضيئه
يا ريت حضرتك كنت شاركتنا وإن كانت ملحوقه اترك رأيك في البوست السابق لو تحبي
و اهلا بمرورك اي وقت شرفتني

بنت القمر يقول...

مروة الزارع
اشكرك يا رب يكون في استفاده
تحياتي ليكي
:
:
:
رئيس جمهوريه نفسي
اشكر رمرورك ويا رب دايما عند حسن ظن زواري