الثلاثاء، مايو 27، 2008

علي مذبح الحريه


مقدمه: التطرف الليبرالي هو نتيجه منطقيه للتطرف الديني !!
سمعت هذه الجمله امس من صديقه اليكترونيه..... جلسنا علي شاطئ البحر وشربنا القهوة والشاي وتبادلنا الحديث حتي سمعت تلك الجمله..
تركتني افكريعني ايه التطرف الليبرالي؟... وازاي يكون الليبرالي متطرف؟؟ اذن اين الجهه الوسطي بين تطرفين العن من بعض لابد ان هناك شيئا ما خطا او يصعب علي عقلي استيعابه....لابد ان الجانب الاخر هو مدعي ليبراليه
المدعي: وثلاث قضايا هامه
المرأة- الاقباط - المثليين
مدعي اللييبراليه وهم جهه من خليط من الاطياف والثقافات وتوليفه يمثل اللادينين و الملاحده رافد اساسي فيها
المرأه: يدعي البعض زورا انهم انصار للمرأه ولحريتها في العمل والعلم ويتبنوا دعوات مناهضه للحجاب والجلوس في البيت والختان والزواج المبكر
وعند اول صدام حقيقي بين احد مدعي الليبراليه وامرأه ما يظهر الوجه الاخر فالنظرة ما زالت علي مستوي مخيف جدا للمرأه تسجنها بين دورين لاثالث لهما اما {المزة} او الكائن الخنشور المتهالك ذو النظريات والطنطنات... صديقه اليكترونيه توقفت عن التدوين ودماغها توزن بلد.. تم وصمها من احدهم بالعانس.. التي لاعمل لها سوي انتظار الفرج...!!! مازال التفكير الذكوري يغلف كل شيئ !
طبعا حق الحجاب او اللاحجاب ما زال مرفوعا من الخدمه الي اشعار اخر... غير قريب المدي
*******************************
الاقباط: تحالف مضحك بين مدعي الليبراليه و-بعض الاقباط _باعتبار الطرف الاول هو حائط الصد ضد هجمات التطرف الاسلامي البغيض وعفريت الوهبنه
... عند اول صدام يظهر الطرف الاول الوجه الحقيقي له فمن يرفض قال الله وقال الرسول حتما لن يطيق من قال قال الرب وقال ابونا... فقط اللعب هنا تحت نظريه عدو عدوي صديقي... لكن المطلوب فقط اخفاء اي مظاهر للدين الاسلامي اولا والمسيحي بلا جدال يتبعه مسأله وقت ليس الا وتحالفات مؤقته ,,طلبات عاجلة باخفاء الحجاب وصوت الاذان وبرامج الدعاه الجدد والقدامي واي مظهر اخر في الطريق عده مطالب.. الغاء الاسماء ذات الدلاله الدينيه.. محمد وعلي وفاطمه ثم بطرس وجرجس وجورج الغاء الحجاب كرمز للتمييز الديني يتبعه... الغاء لبس الراهبه والقسيس وعمليات مجانيه لازاله وشم الصليب من علي ايدي نصف الشعب المسيحي في مصرهي طلبات لاحقه.. فقط لا يتم حاليا في مرحله احتواء المسيحيين المناداه بتلك المطالب الاجنده مازالت في الدرج.. حتي نعقد التحالف علي افضل مايرام وحينها لكل حادث حديث
****************************
المثليين: ظاهرة المجتمع المتصاعده يدعي الطرف المدعي لليبرليه .. بطنطنات الاعتراف بالمثليين واعتبارهم بشر لهم حقوق والعالم الحر بيعترف بيهم! ولا احد يهتم بالهويه الجنسيه ابدا في العالم الحر الجديد ينبهر الساده المثليين باصحاب تلك المنابر_لي موقف مضاد للمثليين من منطلق نفسي قبل ان يكون ديني-
ينبهر هؤلاء بهم ويحصلوا وهما علي حائط لحمايه الظهر وعند اول صدام يظهر مدعي الليبراليه علي حقيقته فهو ان سألته ما هي الحقوق التي تري ان تمنح للمثليين حق الزواج اوحق الارث مثلا
لاتحصل علي اجابه سوي صفر.. وعند اول حدادث تصادمي بينهم وبين المثليين.. تظهر مشاعر العداء والكرهيه والاحتقار... احدهم وصفهم بمن لا يجدون ما يصفون به انفسهم سوي بما يفعلونه في غرف النوم!!.. او ان مكانهم الطبيعي هوفقط حمامات محطه مصر!!
*******************
طب الواحد يعمل ايه؟؟

ازاي يكون معتدل؟ بدون ان يفقد هويته.. هل المطلوب هو الغاء الهويه الدينيه.. ام احترام الهويه الدينيه ايا كانت!!.. اقبل ام اخفي هل لعبه الاخفاء في شعب زي مصر لعبه ناجحه اصلا!!

هل المطلوب احترام اختيارات المرأه.. ايا كانت ام الواجب اعطائها اجنده من ذلك الطرف او ذاك ترسم وتحدد لها حياتها ومصيرها؟! حق النقاش حق العلم حق الاختلاف حق الخمار والبكيني ام المطلوب تمشي علي كتالوج دولا ودوكهمه

هل في شخص في مصر او جهه عندها الاستعداد لتبني قضيه المثليين او اعطاؤهم حقوق ام ان الموضوع لا يعدو المباهاه الثقافيه لا اكثر_في بلد لسه بنرفع فيه قضايا علي من خلعن الحجاب وعلي مشاهد سينمائيه توصف بالمخله- مين يمتلك الشجاعه ليطلب بحق زواج المثليين او هي جعجعات ومعارك ودعوات لاتخرج من حدود الشبكه العنكبوتيه فقط!!
الحل: الليبرالي الحقيقي هو من يمارس اعتداله وقبوله للاخر بادئا بنفسه وليس بادئا بشعار
من يحترم المرأه يحول احترامه الي سلوك حقيقي وواقعي في حياته وعلي الشبكه ينظر لها علي انها روح وعقل بعيدا عن كونها مزة جميله فارغه العقل اوخنشورة مطنطنه ضربها السلك
*******************************
اعتذر عن اي تراكيب غير مضبوطه لغويا او جمل تبدو مبهمه.... الالام رهيبه في الاسنان.. تستدعي علاج عصب وعمليات بناء و تكسير في لحم الحي.. متواليه... دعواتكم

هناك 22 تعليقًا:

محمود المصرى يقول...

بسم الله الرحمن الرحيم

هو مصطلح الليبرالية نفسه غير مريح , لانه مصطلح مستورد وبالتالى يحمل دلالات خاصة بالتكوين الثقافى الغربى , ومحاولة تركيبها على ثقافتنا الحضارية الاسلامية هى تشويه لهويتنا , واذا كان قصد حضرتك المعنى دون اللفظ فأنا افضل لفظ وسطى .
ولكن ادعاء البعض انهم ليبراليين هو اعلان صريح بمعاداتهم للحضارة الاسلامية بالكلية , وتبعيتهم الكاملة للغرب فكريا وثقافيا , حتى انهم استخدموا لفظا غربيا فى تسمية انفسهم .
عموما يعنى بعيدا عن كل هذا النزاع انا هاقول لحضرتك حاجة جميلة , احنا الاول نحدد هويتنا , وتحديد الهوية يساعدنا على تحديد مرجعيتنا , فبما ان هويتنا اسلامية فيجب ان تكون مرجعيتنا الاسلام , وعلى هذا نقدر ببساطة نحسم اى خلاف حول اى قضية بسهولة , نشوف الاسلام بيقول فيها ايه ونتفق عليه , وبالتالى ماحدش هايزايد على حد ولا حد هايهاجم حد .
لكن طبعا الجماعة الليبراليين اول ما يسمعوا واحد مش حتى بيتكلم بقال الله وقال الرسول لا دا لو تكلم بالفصحى فقط يبقى رجعى متخلف ويثير اشمئزازهم وكراهيتهم وعداوتهم المطلقة , بينما تستهويهم رطانة الاعاجم كما استهوتهم افكارهم .
وبالنسبة لموضوع المسيحيين الاقباط ( على اعتبار ان القبطية جنسية وليست دين ) فهذا يلام فيه المسيحيون الاقباط وليس الليبراليون , لأنهم هما اللى انساقوا وراء هذه الدعوات بصورة تثير حفيظة جمهور المسلمين , واخر صور هذا الانسياق الساذج ما صرح به الانبا بيشوى مؤخرا بخصوص ما سماه وهابية واعتدال وغير ذلك من المسميات المستفزة .
عموما يعنى الف سلامة على حضرتك وبالشفا ان شاء الله .

Another يقول...

لن نستطيع الولوج داخل الأنفس لمعرفة حقيقة شئ كهذا، لكن من التصرفات والإيماءات ما يدل على صحة افتراضاتك. مشكلتنا ليست في الليبراليين الجدد ولا القدامى، ولا المتأسلمين الأصوليين المتشددين، ليس أي منهم بصفتهم على الأقل.

المشكلة في كل من رضي على نفسه الحبس في حيز كلمة ضيقة؛ كالليبرالية أو العلمانية أو اليسارية أو غيرهم، ليتحول الآدميين من شخصيات لها إرادة حرة إلى مجموعة من المصطلحات تمشي على الأرض دون معنى، كثرة تكرار الكلام يسلخ المعنى منه. متحمسين يفور الزبد من أفواههم يتشدقون بمصطلحات لا يفهمونها ومبادئ براقة من الخارج خاوية غير قابلة للتطبيق العملي من الداخل.

عندما يتخلى الإنسان عن إرادته الحره ليتحوّل إلى عبد، حبة مكسرات داخل قالب؛ فمن الطبيعي أن تجدين من يدعونهم بالمثقفين يتشاجرون بحماس إلهي بالأيام والساعات والشهور والسنين حول كون الليبرالية مفهوم لوجستي أم كوزمبوليتاني!


وألف سلامة عليكِ، وآلام الأسنان "بصرة" بالمناسبة؛ فهي أحد مشاكلي العويصة تلك الأيام. إن شاء الله تنتهي على خير.

:)

Sherif يقول...

ألف سلامة لأهم قمر فى عالم المدونين

أعلم هذه الآلام ولا أريد الحديث فيها حتى لاأقلب المواجع .. ربنا معاكى .. وجع ساعة ولا كل ساعة .. كانت والدتى بتضحك على بالكلمتين دول ..

أختصرت أنت الموضوع بعقل وحكمة .. الحل هو الاعتدال .. حنى دينيا

" وجعلناكم أمة وسطا* ولتكونوا شهداء على الناس"

واضحة ؟ اذن كيف تكون شاهدا وانت متحيز ؟ يجب ا، تقف فى الوسط

لاافراط .. ولاتفريط .. لاضرر ولاضرار والقائمة لاتنتهى

يعجبنى رأى another .. فلقد ولد الانسان حرا .. لاينبغى له أن يحبس نفسه فى قالب أو مصطلح

يعجبنى ايضا اختياراتك لومضوعات تنم عن عقل متوقد وأتون مشتعل وفكر لايتوقف

واحيانا .. اشفق عليك من هذا الحمل الثقيل

دمت بكل ود

أحمد كمال يقول...

أنا أظن أن مصر لا يوجد بها ليبراليين ! هو مصطلح أخذناه و حفظناه و طنطنا به دون استيعاب مثل أشياء كثيرة مستوردة في بلادنا ، ليس أقلها الأفكار . يذكرني هذا بهوجة مصطلح العلمانيين : من هم ، هل هم ضد الدين ، ما مبادئهم ، ما أصل المصطلح ، هل هو فكر أم سياسة ، الخ . و حتى الآن يستخدم هذا المصطلح لتسخين التوك شوز فقط .

مثلما تفضلت حضرتك إذا وزنت أفعال و أقوال أحد "الليبراليين الجدد" في مصر الآن ، سنجده ولا ليبرالي ولا حاجة ، سنجده إما محافظ عادي يطنطن من باب الوجاهة الفكرية ، أو مجرد أنتي-إيسلاميست !

من ناحية أخرى لست أدري لماذا أصبحت مناقشة قضية المثليين تشغل حيزا كبيرا ، لدرجة إعتبارهم القضية رقم 3 بعد المرأة و الأقباط .

ألف سلامة على أسنانك ، أنا أيضا أعتذر عن أي تهييس في التعليق حيث أنني أفتقد النوم بشدة .

عدى النهار يقول...

الموضوع ده مُتشعِّب ومُرهق ذهنياً ونفسياً لأن شواهده موجودة بقوة وفارضة نفسها على الواحد من خلال تدوينات وتعليقات سواء كان فى تدوينات أو مواقع إخبارية

عذراً على عدم التعليق على محتوى البوست لكن حبيت بس أقول ربنا يعافيكي وكل مريض من الآلام وبعدين بطّلي جزّ على سنانك وهى ماتتعبكيش
:)

عاليا حليم يقول...

هى الجملة دى سمعتها من زمان و سرحت قدامها بس ما كانتش على الليبرالييين

بمعنى لما ينتشر العرى و السفور فى البلد اكيد حينتشر على الجنب الاخر التشدد

يعنى لا مغالاة احسن لا فى ده و لا فى ده عشان كده عبقرية دينا الحنيف اهدتنا شئ عبقرى مازلنا لا نعرف قيمته اسمه الوسطية

بس عايزة اقولك مش كل الليبراليين كده و لا كلهم ملاحدة انا اعرف ناس منهم كويسة و متدينة و معتدلة جدا فى ارائها و نظرتهم للمراة محترمة

انا مافهمتش اوى الجزء ده يا ريت تفهميهولى ( اما {المزة} او الكائن الخنشور المتهالك ذو النظريات والطنطنات... صديقه اليكترونيه توقفت عن التدوين ودماغها توزن بلد.. تم وصمها من احدهم بالعانس.. التي لاعمل لها سوي انتظار الفرج...!!! )

.:.-=- ELGaZaLy-=-.:. يقول...

السلام عليكم ورحمة الله وبركاته...

يا سيدتى كلهم انماط تمت دراستها بشكل لا يمكنك ان تصدقية صدقينى كملها انماط نفسية تعانى من الاغتراب ..

انا شايف يا بنت النيل انة لا شئ يهم طالما احترم دينى وافهمة حق المعرفة ..

بس وبحترم فكرى ومن منطلق دة بحترم فكر الاخر اين يكن طالما لم يحول الاخر سلوكة الى سلوك عملى لايذائى بس كدة
والف الف سلامة ربنا يقومك بالسلامة يارب...دعواتى معاكى

عارف انا وجع السنان..

ربنا يعافيكى يارب

بنت القمر يقول...

محمود المصري
==============
معنديش مشكله خالص المصطلح غربي ولا شرقي... واذا كان معناه قبول الاخر واحترام الحريات يبقا ومالو يا ريت نتعلم شيئ يفيدنا بدل ما بنتعلمش منهم الا الهيافات!!
2- البعض يري لا يرغب في مرجعيه اسلاميه او دينيه سواء كان مسلم او غير مسلم
يبقا ازاي اجبرة انه يعترف بالاسلام هويه ومرجعيه؟!
انا اؤمن انه في مجتمع حر{ من شاء فليؤمن ومن شاء فليكفر}من حق اي انسان يعتنق ماشاء من الافكار طالما في حدود لا تتعدي عليا شخصيا
ما ينفعش نلون الناس كلها بلون واحد ما ينفعش نبقا نسخ من بعض
كل انسان من حقه يغير فكرة وقناعاته اي وقت هدف البوست تحديدا ما ذكره احمد كمال
انه في مواجهه التطرف الديني ظهر تطرف اخر ومن يرفع شعار الحريه ويسمي نفسه ليبرالي انه يكون أد الشعار ويمارسه مع الاخرين ...وليس ضد الاخرين!!
اقبل ابو لحيه واقبل اللي داقق صليب
اقبل المحجبه واقبل الاخري
طالما حرياتهم لا تتعدي حريتي وقناعاتهم لا تسخر من قناعاتي
اخفاء الهويه الدينيه مش الحل الحل قبول الهويه المغايره والناس حسابها علي الله ... الليبراليه وادعائها بقا شعار من قبيل الوجاهه فقط لكن عند الممارسه الحقيقيه
انسااااا
اشكرك جدا علي دعوتك ربنا يتقبل
شرفت المدونه
تحياتي

بنت القمر يقول...

Another
=======
حين يسجن الانسان نفسه في هذا القالب او ذاك اتفق معاك في ان الاصل ان يكون الانسان حرا وليس مدعي حريه مؤمن بالمرأه وحقها في اختيار مصيرها
مش من باب رفع الشعار ولكن بتطبيقه علي ارض الواقع ايضا
==========
الف سلامه برضه ربنا يشفي الجميع
شرفني مرورك النادر تحياتي

بنت القمر يقول...

Sherif
الله يكرمك اشكر اطرائك وان كنت اعتقد ان الرمحله الوسطي اختفت تماما
لم يبق الا تطرف وتطرف مضاد
تشفق علي ..
واشفق علي نفسي.. واشفق عليكم مما يدور في رأسي والقيه عليكم وتشاركوني بكرم بالغ فيه..
التدوينه القادمه... في منتهي الهدوء
اشكرك جدا
جدا
تحياتي

بنت القمر يقول...

احمد كمال
لاتعليق علي تعليقك...
فهمت قصدي تماما
رجاءا راجع ردي علي محمود المصري
تحياتي

بنت القمر يقول...

عدي النهار
فعلا موضوع مرهق ومزعج.. عموما احترم عدم مشاركتك واشكر دعواتك
بس احيانا الفكرة بتكون ضاغطه جدا عليا ولازم ادلقها علي الكيبورد عشن متخنقش بيها
معلش استحملوني
((:
وبخصوصو الجز علي الاسنان
تؤمر التدوينه الجايه هاديه جداااا
ما فيهاش وجع دماغ
الا قليلا
(((:
تحياتي
واشكرك علي دعواتك

بنت القمر يقول...

عاليا حليم
مش بتكلم علي الليبراليين
بتكلم علي المدعين
لانه لو في ليبرالي حقيقي بمعني انسان محترم للحريات
يبقا شيئ جميل جدااا
بس فين ده انتي اكيد بتشوفي هنا وهناك وعلي الفيس بوك كميه العداء مثلا للمرأه محجبه بلا حجاب البعض عاوزها علي اجندته الخاصه سواء بحجاب او بلا حجاب... والكلام ده بقا خنييييق وزاد عن حده
كلا التطرفين بيحاولوا شدها الي معسكرهم
الجمله الغير مفهومه
بمعني ان التفكير الذكوري يبينظر الي المرأه علي انها واحد من اتنين
يا جميله وانثي وكتكوته خالص وقطه وبطه وبس!!
يا اما امرأه تطنطن بكلام غير مفهوم وصاحبه نظريات في الحياة اذا هي حتما وحشه وسوده وعانس وخنشورة
يعني مفيش وسط المصيبه ان الست اللي بتفكر مفبش حاجه تشفع لها ولا تبرر جريمتها سوا انها اكيد عانس ومش لاقيه حاجه تعملها او مطلقه يعني في كل الاحوال هي بلا رجل هي منبوذه غير مرغوبه..مرفوضه ومعقده فهمتيني يا لول
نورتي

محمود المصرى يقول...

بسم الله الرحمن الرحيم

بالنسبة لمسألة المصطلح انا قصدت ان المصطلح يحمل معانى لا تناسبنا فلهذا طرحت مصطلحا اخر يوافق مرجعيتنا لفظا ومضمونا .
اما بالنسبة لقبول الاخر فلا اشكال فيه ولا خلاف , لكن هناك فرق بين قبول الاخر على المستوى الشخصى وبين مرجعيتنا كمجتمع وامه , بمعنى اننا مجتمع مسلم وامه مسلمة ومرجعيتنا هى الاسلام , وفى ظل هذه المرجعية وهذا الاطار العام نقبل المسيحى ونقبل اليهودى ونقبل اللى داقق صليب واللى بيصلى فى كنيسة او معبد , لكن ماينفعش ننحى الاسلام عن الحياة ونحصره فى اطار الممارسات الفردية مثل الحجاب واللحية والصلاة وخلاص , حضرتك فهمتى قصدى ؟
تحياتى

سكــر يقول...

الموضوع عن جد رائع جدا

صغتيه من كل الجوانب

دا فعلا بقى واقع احنا عايشينه

ربنا يحفظنا يارب

تحياتى اختى الفاضله

اخيكى احمد سكر

nonoymm يقول...

السلام عليكم حبيبتي
انها المنطقة الوسطى الصعبة التي من الصعب الوقوف فيها
والتطرف من الجانبين اصبح افة ربنا يرحمنا
التطرف الليبرالي دة نفااااااق وليبرالية من جانب واحد الجانب اللي يضمن مصالح الليبرالي المتطرف
التطرف الديني ناتج عن عدم تفهم هذا الدين السمح الوسطي الذي ضمن حرية العقيدة ووصانا باهل الكتاب وترك لنا كيفية التعايش مع الاخر
ربنا يرحمنا برحمته
فانا مثلك احتار
تحياتي والف سلامة عليكي طهور باذن الله

أسير الجراح يقول...

بنت القمر


مدونتك جميلة جدا

سعدت بمرورى عليها

وياريت تزورى مدونتى

تقبلى تحياتى


اسير الجراح

عباس العبد يقول...

الف سلامة يا قمر
متوقع انا من هى الصديقة الألكترونية دى
لأن المصطلح تم صكه فى حضورى , تقدرى تقولى صك مشترك . معهلش مقدرتش أرد بدرى , عندى طرطشة فكرية كده و ربنا يسهل نرممها و نلمها على جنب و كله بثوابه .
فى نقطة مخلتف معاكى فيها أنت و محمود المصرى , مين الى زق التانى للتانى ؟
بمعنى مين الى زق المسيحيين للليبراليين ؟
الأجابة الصح و الى أنا متأكد منها , الليبراليون هم الى زقوا نفسهم على المسيحيين , هم الى بيستغلونا , هم الى بحجة الدفاع عن أقلية , التصقوا بينا إن صح التعبير , و أعتقد أن الفكر الأسلامى فى وضعه الحالى و هو وضع إنكسار و ليس صحوة ,( و الحال بالمثل للمسيحيين ) , إستكان و أستراح للموضوع ده لأنه " ممكن " يبرر شوية نظريات التكفير للاخر , ليه ؟ يقولك أهم متحدين مع الليبراليين و بيتبنوا منهجهم , يبقوا زى بعض , و دى مشكلة لأن المسيحيين فى مصر ضد الليبرالية , لأن بكل بساطة لو البابا شنودة قال بكرة الصبح شمال , حيبقى كلهم شمال , لسه بيؤمنوا بقال الله و قال البابا و قال القسيس , مفيش مسيحى لو كلمتيه بصراحة عن الليبرالية حيقولك لأ تمام أفكاراها كويسة , بالعكس حيقولك دى مش بتاعتنا حسئل أبونا الأول .
و بما ان المسيحيين و المسلميين الغالبية العظمى منهم مرجعيتهم دينية , فمش قادر أحدد بالظبط مين الى غلطان فى عدم وجود أرضية مشتركة , هل المسلمين أم المسيحيين أم الحركات الفكرية الى ضربت المرجعية الدينية سواء الأسلامية أو المسيحية فى مقتل ؟
لابد من إيجاد أرضية مشتركة

بنت القمر يقول...

.:.-=- ELGaZaLy-=-.:.
زي ما قلت مفيش تعارض بين تديني وتمسكي بثوابتي وقبولي للاخر
اشكر مرورك
===============
nonoymm
صديقتي العزيزة
مفيش منطقه وسطي للاسف
تطرفين اسوأمن بعض

اشكرك

بنت القمر يقول...

عباس العبد
============
نقطه بس قبل ما ارد ما عنديش اعتراض ابدا علي الليبراليه اذا كانت تعني احترام الاخر وقبوله
انا اعتراضي علي مدعي الليبراليه
بمعني اللي بيرفع شعار ومش بيطبقه
سواء بقبول المسيحيين او المثليين اويغازل المرأه بحريات متزايده في مقابل انه عنده اجنده جاهزة يقولبها فيها
الادعاء هنا بيقتلني
الليبرالي مفروض يقبل الاخر مش يشكله او يستغله كما هو مع المسيحيين والمثليين مع احترامي طبعا للمسيحيين
ناس ليبراليه جداااا{هكذاتدعي}لامتني لاستقبال منقبه في مدونتي!!
ايه النيله دي؟؟!!
ازاي ارفض واحده عشان مغطيه وشها هي حررررررررررررررة ولو حتي النقاب مش في الدين انا مش مقتنعه بيه يبقا اختيارها
مش احنا في عالم حر
ممكن الصبح افطر مع ماريان اللي داقه صليب وبالليل اخرج مع مني اللي لابسه خمار او نقاب
مش ممكن اعلب الناس واصنفهم علي مزاجي وانفي انسانيتهم لمجرد اختياراتهم!!دي مصيبه
عشان كده بقول مش الغاء الهويه هو الحل لكن احترامه
نيجي بقا لنقطه مين زق مين؟؟
مش دي قضيه الفكرة ان العالمانيه بمعني تنحيه الدين عن السياسه وحصره في الممارسه الشخصيه ممكن يكون افضل الف مرة
من ادعاء الليبراليه المخادع بقبول المسيحيين علي سبيل التحالف الؤقت
اقولك كمان المسيحيين اشد تمسكا بمرجعيتهم الدينيه من المسلمين وده رأيي وناتج عن مشاهداتي
هوية المسيحي الديني عند الغالبيه هي هويته الاولي وقبل كل واي شيئ اخر
{ وده مش غلط}
بس واحد مستنير زيك لازم يكون متأكد ان اللي بيشتم ربنا والرسول وكل مظهر اسلامي.. اللي هو دينه اساسا
ومش ها يقبل بمرجعيه دينينه اسلاميه
يستحيل تقنعه بقال الرب وقال ابونا
وجرب كده وارصد النتيجه
واحتفظ بيها لنفسك
تحياتي
والله يسلمك
نورتني

بنت القمر يقول...

محمود المصري
========
هو انا في حاله يرثي لها بس فهمت والله
:)
مسأله الامه دي مسأله كبيره جدا وبيحكمها ظرف تاريخي وحكومات مستبده
مرحله ضعف
وبلاوي سوده انا اللي لفت نظري وكتبت عشانه البوست ده
هو كميه العداء وعدم القبول بينا كأفراد للاخرين...
انظر ردي علي عباس العبد
وكميه الادعاء في تصرفات من سميتهم مدعي الحريه والليبراليه
ليبراليه علي طريقتهم فقط
نورتني

بنت القمر يقول...

سكر
اشكرك جدا
===========
اسير الجراح
اشكر مرورك وها امر ان شاء الله
تحياتي للجميع
واسفه علي لخبطه الادوارفي الرد