الخميس، يونيو 26، 2008

الارنب الحيران

ماذا تفعل لو كنت مكان الارنب الطيب... هل تبقي مشدودا بين النخلتين. بالحبال..؟؟!
ام تفضل قطع الحبل لتعصرك الحبال اترك اجابتك من فضلك اخر البوست؟؟!:))
ملائكه العذاب
************
صديقتي الانتيم تحضرللولاده في مصر حيث تعيش في بلد عربي تعاني من ضغط عالي مشاكل في الحمل رحله الولاده وما بعدها يشيب لها الشعر مش مشكله في مصر مستوي الاطباء اتعليمي بقدر مستواهم الاخلاقي اللي راح في خبر كان!! كل طبيب يحجم عن النصيحه باعتبار المريضه لم تبدأ العلاج معه كأنه بينتقم منها..ويحمل سابقه النتيجه و النتيجه طفل في الحضانه حياته مهدده وام مصابه بالتهاب اعصاب واكتئاب عقب الولاده.. !
**********
حاله من التربنه في الحياه الزوجيه تهدد باحراق الاخضر واليابس احاول فيها التزام الهدوء والمحافظه علي الجدران لاخر طاقتي ولا يبقي في يدي سوي اعلان العصيان المدني علي طريقه غاندي متبنيه سياسه اللاعنف.... لا سلام ولا حرب... حتي يأذن الله بالفرج
دوله مركزيه حتي النخاع.. والطحال!!
***********************
بعض التوترات المحيطه تجعلني انسي الموبايل سامسونج d900iعلي دولاب المطبخ تسقط الماء فوقه بعد شراءه بشهر واحد.. رحله من البحث عن شركه صيانه مختصه... اصل الي الاجابه{ شركه تيليكوم اكسيوم}... يأخذ فني الصيانه الموبايل مني ويخبرني بعد ان ترك نظارته تنزلق علي انفه المدهن بعيدا عن عيناه اللئيمتان بأسي ان الامل 40في الميه في استعاده الموبايل_ بعد فقد ما عليه من صور وفيديوهات !!... الجواب النهائي اعرفه بعد اسبوع بعد عودة الموبايل من القاهرة كأن الاسكندريه محافظه نائيه تعجز الشركه عن توفير متخصصين فنيين صيانه للعمل بها كل شيئ لا يتم ولا ينجز الا في القاهرة في النهايه
ادفع... وبعدين... خلاص كده!
***********
كلبشه العربيه المنشيه هي اخر عنقود الاسبوع ده ... حيث ركنت لا يوجد اي علامه ممنوع الركن علي مسافه تلاتين متر قبل او بعدالحديث مع العسكري لا يفيد اطلاقا...الحل دفع غرامه25 جنيه لفك الكلبشة مقابل شراء طلبات ب5 جنيه .!
.الحل البديل هو الذهاب الي مكتب المرور اكلم الباشا... الحل مرفوض جدا لضيق الوقت.. اضطر لاصطحاب ابنتي سريعا.... لا طاقه نهائيا للجدال لا مع العسكري ولا الباشا
ملحوظه جانبيه: لا يوجدايصال باستلام المبلغ ولا دليل الي اين ذهبت النقود تحديدا ولا في اي جيب؟؟!!
واحه الغروب
**************
اقرأ هذة الايام روايه واحه الغروب لبهاء طاهر بناءا علي نصيحه العزيز راجي.... اجلس في النادي انتظر ابنتي في احد الانشطه ساعات توفر لي الوقت اللازم لقراءه الروايه الشيقه... الروايه تحكي عن محمود مأمور البوليس الشاب العابث اللاهي الذي يتزوج كاترين الايرلنديه الكاتوليكيه القرن الماضي اثناء احتلال اللانجليز لمصر والذي يتخلص منه رئيسه بانتدابه للعمل في الواحات وما يحدث له هناك
ها الخصها لكم قريب بس ربنا يفك الكرب المتلاحق والارنب يعرف ها يعمل ايه؟
... اتابع الرد اليوم علي البوست السابق.. واعتذاري للجميع

هناك 30 تعليقًا:

خمسة فضفضة يقول...

السلام عليكم ورحمة الله وبركاته

ايه يا بنوتة القمر البوست ماله حزايني وماليان زعل

اذا كان علي الموبايل ولا يهمك يا ستي خيره في غيره

و حالة التربنه ارمي تكالك علي الله وان شاء الله تعدي علي خير



بالنسبة للارنب هو ماينفعش يقطع حاجه الا الحبل اللي تحت ،ما ممكن يا ستي يقطع حبل من الاتنين اللي شادينه للنخلتين وبكده يحرر نفسه ويخلص بقي

appy يقول...

ههههههههههههه عارفه بضحك ليه
بجد من غير زعل حساكى يا عينى انتى الارنب ده يعنى مشدوده بين كل الحاجات دى
معلش يا قمر اهدى شويه وخدى نفس عميق قوى من جواكى

اما حل المسأله يقطع الحبل من عليه بامنشار وخلاص بس انا خايفه النخل يخبط فيه هبقى ابص تانى عليها

فاتيما يقول...

انا لازم اجيب الرواية دى أقراها عشان عيب عليا كدا
ربنا يفكها عليكى يا بنت القمر
قادر يا كريم

نونو يقول...

عجبا لامر المؤمن
فامره كلعه خير
اذا اصابته سراء شكر فكان خيرا له
واذا اصابته ضراء صبر فكان خيرا له
الصابرين بخير يا قمراية
ربنا يفك كرب وكربنا كلنا
تحياتي

كاميليا يقول...

كله ده؟؟

أعان الله الارنب

وفك وثاقه

تعرفى؟

جميل اوى ان الواحد يكتب عن اللى بيدور جواه وحوله

ربنا يسعد ايامك

تحياتى

بثينــــــة يقول...

عايزة أطبطب عليكي
ممكن
‏?‏
معلش كله بيعدي
عارفة ساعات لما بتاخدي موقف بتستريحي لكن فيه مواقف لما تسيبيها للزمن بيكون أرحم
زي حالة الأرنب دة
يمكن الحبل يدوب
يمكن النخلة تقع
يمكن يحصل زلزال
يمكن يتعود علي شعلقته كدة

ربنا معاكي

أحمــــد يقول...

بسم الله الرحمن الرحيم أدعوك لزيارة مدونتىhttp://ommee.blogspot.comوشكرا

راجى يقول...

عن الاطباء فليسوا ملائكة ولا فى قلوبهم رحمة الا ما رحم ربى
ولكن توجد مسألة يجب اخذها فى الاعتبار وهى انهم وفى بعض الحالات يندمجون فى العمل خصوصا فى اقسام العناية المركزة والطواريء حيث لا يأخذ احد منهم نفسه من الحمل الوقع عليهم وهنا يجب عليهم الانفصال تماما عن طبيعتهم البشرية ويتحولون الى الات اتوماتيكية وما ينفعش غير كده
انما العيب بقى عليهم فى عياداتهم الخاصة لما الطب يتحول على ايديهم الى بزنس

العصيان المدنى السلبى طريقة وسطية لحل المشاكل وربنا ما يجبش سوء بين الاهل
واذا كنا عاملين غاندى فماتنسيش شعرة معاوية

صيانة الموبيلات كارثة بكل المقاييس فالضمان عبارة عن عقد اذعان من طرف واحد واللى موش عاجبه يروح مطرح ما هو عايز والظاهرة ان تقريبا كل الموبيلات الحديثة الغالية التى تحتوى على كارت ذاكرة عالى بيحصل فيه كوربشن ولازم يتفرمط
وعوضك على الله وبعد راية العصيان ما تطير فى الهواء ممكن التعويض:)))

اما الكلابش فحصلت لى على كورنيش المعادى فتركت السيارة وعبرت الى الفا ماركت لمدة عشر دقائق وعدت لاجد الحشرة الحمراء ماسكة بايديها واسنانها فى العجلة الامامية وامين الشرطة طلع نزيه وامين وايضا دفعت تلاتين جنيه فى المرور بالوصل وعشرة جنيه تاكسى رايح جاى لكن كنت سعيد لانى غلطان ولان الامين رفض طلب شقيق احد المتكلبشين وهو ضابط شرطه استثناء شقيقه فرفض بكب حسم
وعلينا تحمل تبعات اخطائنا

واحة الغروب اختيار جيد جدا لن تندمى عليه وسوف تشترين كل روايات بهاء طاهر وانتى مغمضةواشكرك على قبول النصيحة
على فكرة ابقى شوفى كمان روايات صنع الله ابراهيم
تحياتى ودمتى فى سلام مع النفس

راجى يقول...

نسيت الارنوب الحيران اللى باين عليه شاطر وذكى ومعاه منشار فالافضل تركه يحل مشاكله بنفسة علشان حياته كلها تفضل سليمة
تحية مرة اخرى

الطائر الحزين يقول...

ادفع وبعدين اتظلم
ادفع وبعدين يتصلح
ادفع وبعدين نفكر نفك الارنب

شكلك عاوزة تعملى استفتاء علشان الارنب هل يتحمل الالم وينطلق للحرية او يبقى الوضع كما هو عليه مستسلم

هو الذى يستطيع ان يحدد ولا أحد غيرة حتى لو مال على اذنه الوف الارانب مثله وايضا فى نفس موقفة

وفقك الله

وجهة نظري يقول...

الأرنب عنده أرانب تانيه في رقبته، فقرار قطع أي حبل مش سهل ولازم يكون أخر حل. الصبر مفتاح الفرج ... حييجي الفرج إنشاءالله.

بالنسبه لملائكة العذاب فأنا شخصيا إتكويت منهم، ربنا يخلصنا بقي من التخلف.

أما حالة التربنه، فكل البيوت في مصر متربنه وفيها حالة فوضي لسبب أو لأخر .... لازم المحافظه علي حاله الا حرب حتي أخر نفس علشان وي ما قلتي "تهدد بإحراق الأخضر واليابس" ... بلاش علشان الأخضر مش حيستحمل. اليابس خلاص بقي يابس.

بالنسبه لسامسونج، تقدري ترسلي إيميل للمركز الرئيسي في كوريا بالواقعه، وثقي تماما إنهم حيتصرفوا بسرعه جدا. واحد قريبي عمل كده مع وكيل إريكسون ومتتخيليش كانوا بيعملوا إيه معاه بعد كده.

بالنسبه للمرور، هما عارفين أصحاب العربيات وخصوصا لو ست معاها طفل بيبقوا مستعجلين أد غيه ومش ناقصين غلاسة الباشا .... الفلوس راحت في جيب الباشا طبعا من غير سؤال.

ماليش أنا في الروايات :)

تحياتي ليكي. والصبر.

صباح الخير يا مصر يقول...

بنت القمر
**********
كلنا هذا القمر الذى له جانبه المظلم
وكلنا هذا الارنب الحيران المشدود من كل الاتجاهات

هونى على نفسك ..واعلمى انه: يوجد دائما من هو اشقى منكى..فابتسمى

تحياتى

بنت القمر يقول...

د_ فضفضه
========
معلش يا فضفوضتي
بعض تقلبات الدهر
حلوة تقلبات الضهر دي
:))
تكالي علي الله اكيد... اما الارنوب ربنا معاه ويلهمه الصح
نورتي

بنت القمر يقول...

appy
=====
منورة يا ابي
من ناحيه اني انا الارنب... فامافيهاش حاجه تزعل ابدا اكيد كلنا ارانب بشكل او اخر وكلنا مشدودين بالحبال بشكل او باخر
نورتيني

بنت القمر يقول...

فاتيما
======
ها تيها بس هي عاوزة وقت وتركيز
وتقري فيها لمدد طويله عشان ما تتوهيش
:)
بخصوص دعواتك لي ربنا يتقبل
واشكرك يا صديقتي العزيزة
نورتي

بنت القمر يقول...

نونو العزيزة
===============
كلماتك بلسم اشكرك بشده
تحياتي

بنت القمر يقول...

كاميليا
=======
اشكرك يا عزيزتي لتعاطفك مع الارنوب
اشكر مرورك

بنت القمر يقول...

بثينه
======
تعليقك يا صديقتي طبطبه في حد ذاته
يا صديقتي طيبه القلب
:))
الزمن...
تفتكري...
لامتي؟؟..
دعواتك للارنوب... نورتيني

بنت القمر يقول...

راجي
======
الدكتور او الاتنين اللي حكيت عنهم... تخاذلوا عن علاج الصديقه او ابداء النصح لانها تتابع حالتها مع اخر منافس.. منتهي السلبيه ان اتصل بطبيب اشكو له حاله هذيان وتوهان وتنميل وزغلله في العيون بعد ولاده في الشهر السابع.. فلا يقدم لي النصيحه رغم ان التشخيص المبدئي الطبيعي هو حاله جلطه ولاده تستلزم نقل فوري للمستشفي بغض النظر عن مين طبيب الولاده!!!!!!!
العصيان المدني طبيعي هو تعبير عن الغضب والضيق وليس مفتعل ابدا ولا مخطط ولااجيد تلك الخطط ولا احبذها في اطار العلاقات الانسانيه.. اترك فقط الامور لاحساسي...
قد ابرع فيه في اي مجال بعيد عن علاقاتي بالمقربين...
اما شعرة معاويه فهي الاحترام والالتزام بالمسؤليات الاسريه والانسانيه .. مهما كان الامر
بالنسبه بقا للموبايل ففي كلامك تلميح مش حاباه اني اترك رايه العصيان لتطير في الهواء من اجل موبايل اخر
حاشا وكلا وهيهات:))
مش انا!..
ترشيحك للروايه هديه وان كانت عاوزة تركيز.. كما ان طريقه السرد مختلفه جدا فكل فصل يرويه بطل عن لسانه اجلس في النادي 2_3 ساعات اقرا فيها عشان متوهش واستمتع بالحكي غير المفصول ما لا يتيحه لي البيت حيث المسؤليات والانشغالات
صنع الله مؤجل حاليا.. في القائمه بهاء طاهر.. اشتريت مجموعه_ بالامس حلمت بك
مجموعه قصص قصيرة وروايتان
سابدأفيها بعد عزازيل ترشيح صديقتي زمان الوصل.. بس الحق يا رب
اخيرا
اشكر ثقتك في الارنوب واشادتك بذكائه وحسن تصرفه في النهايه
اشكرك بشده يا عزيزي

بنت القمر يقول...

الطائر الحزين
=========
ضحكتني يا عزيزي
لا مش ها اعمل استفتاء دماغي مش رايقه دلوقت
ولن استفتي بقيه الارانب
:) فقط التمس منهم بعض الدعاء والطبطبه والمؤازرة
حاليا استفي قلبي ولو افتوني
تحياتي واشكرك ودعواتك للارنب

بنت القمر يقول...

وجهه نظري
=========
طبعا القرار مش سهل والارنب بيفكر بعمق وبيحسب وفي مقدمته حساباته المؤسسه التي بناها وتعب فيها والارانب الاخري.. وكرامته وكبرياؤه.. واحلامه.. ومستقبله.. مقدار ما يتحمله من تنازلات وحدود هذه التنتازلات
الارنب بيفكر كتير اوي... دعواتك ربنا يلهمه الصواب
اماكلامك
وي ما قلتي "تهدد بإحراق الأخضر واليابس" ... بلاش علشان الأخضر مش حيستحمل. اليابس خلاص بقي يابس.
تفتكر ممكن حد يقدر يقولب نفسه انه بقي يابس؟!
قاسيه اوي الكلمه دي سواء كان المقصود بيها يابس من ناحيه السن او من ناحيه الاحلام.. يا عزيزي اليابس لا يمنح
الاخضر فقط من يمنح
سواء نفسه او صغارة
حكايه الايميل دي فكرة!! مستنيه بس جوابهم بكرة السبت.. واكيد لو كان سلبي مش ها يهمني وها ابعته
بالنسبه للروايات علي ما اعتقد حضرتك في رومانيا علي ما اظن يبقا الموضوع صعب واديك متابع مصر من الانترنت كوبس الي حين نزولك بالسلامه
اشكر مرورك يا عزيزي
تحياتي

بنت القمر يقول...

صباح الخير
==========
كلنا هذا الارنب واحيانا نكون من يشد ارانب اخرين علي الحبال لنري ما قد يفعلوا!!
مدي احتمالهم
ومقدار صبرهم
قد لا نفعل شيئا لمساعده الاخرين واسعادهم فقط نتمني لهم الخير وندعوهم للابتسام وهم موثوقون بتلك الحبال
فيبدو ما نطلبه منهم ضربا من المستحيل
اشكرك

أحمد كمال يقول...

بصي يا ستي الأرنب ده ماخدش المنشار إلا من اللي بيعذبه ، و لو فضل يفكر يقطع الحبل اللي تحت يإما الدم كله حاينزل في راسه من الوضع ده ، يإما حاتبقى أخرته وحشه . و لذلك لو كان عندك طريقة توصلي بيها الكلام ده للأرنب ، قولي له يعقل ، يإما يعمل براين ستورمينج كويس و يقدر يقطع الحبل اللي رابطه هو ، يإما يدور على حل خارج الصندوق مثل أن يبدأ في عمل مباحثات مع من يعذبه ..

المشكلة لو كان الطرف الآخر نفسه يعمل عليه ملوخية :)

عدى النهار يقول...

حبال مشدودة ومنشار فى اليد منظر لا يبشِّر بخير.. أتمنى لكى أن تكون صورة بعيدة عن الواقع

blackcairorose يقول...

العصيان المدنى هو أحسن حل، انا معاكى

واحة الغروب، معلش لى تحفظات عليها او ربما حين سمعت عن الجائزة العربية التى حازتها ظننتها افضل كثيرا مما قرأت، رأيى الشخصى ليس أكثر، لما تخليصها ابقى قوليلنا رأيك

دولة مركزية
شوفى بقى انا بخباثة كده مبسوطة بالموضوع ده وهبعتها لصديق قديم اسمه ياسر اسكندرانى كان كل ما تيجى سيرة القاهرة والاسكندرية يقعد يقول لنا ان كل حاجة موجوده فى القاهرة موجوده واحسن فى الاسكندرية
طيب هدور على ايميله وابعتله لينك للى قلتيه لول

معلش يا اسكندرانية شوية غلاسة كده منى

بنت القمر يقول...

احمد كمال
===========
بالنسبه لحل خارج الصندوق
فتقريبا الارنب دماغه مقلوبه زي ما انت شايف
بس هوا ها يركز ويركز ويحاول يلاقي حل خارج الصندوق!!
كون من يعذبه يرغب في اكله علي ملوخيه... مش للدرجه دي
:))
فقط هي سعيد ومطمئن بأن ارنبه مربوط جيدا وقد لا يجد شيئأيفعل ليحسن وضعه... او ليهرب بعيدا
وعموما الحكم علي النوايا صعب
دعواتك

بنت القمر يقول...

عدي النهار
==============
لا قريبه من الواقع!!
:))

بنت القمر يقول...

blackcairorose
==============
العصيان المدني اسهل حل واصعب حل!! لانه يتطلب وقتا طويلا للحصول علي نتيجه بس مش مهم
مش انتي معايا ولا يهمني!
:))
ضحكتيني
بالنسبه للمركزيه يا حبيبه قلبي احب اصدمك بأني سكندريه مغشوشه عشت في الاسكندريه فترة الجامعه فقط وما بعدها
لكن الميلاد والنشأه ش الزهراء متفرع من ش جده الدقي امام نادي الصيد بالاضافه الي فتره خارج مصر
القاهرة ام الدنيا لكنها تبقي قاهرة
وعموما بعد ما تبعتي ليلسر السكندري ممكن تبعتي لبنت القمر السكندريه كمان الايميل الخاص بيها في البروفيل
:))
هي ها تكون سعيده
اشكرك

غير معرف يقول...

حفضل علي حالي

وأضحك وألالي

وآقول للناس أنا آحسن منكم

أنتم تحت

وأنا ف العالي


وأبكي وحدتي ف سري

وأنده يا بويا تعالالي

ولاء النعماني

بنت القمر يقول...

ولاء النعماني
================
فينك يا ولاء مش باين من مده؟!!
:))))
عموما اعتقد الكل يشكو من وحدته ولا مجال للانكار!
الكل الكل يملك عذاباته ولا عيب في ذلك؟! وكاذب من قال العكس...
كونك تري اني اري اني افضل من الاخرين فذلك ما تري انت وربما ما تشعر
:)))))))))
انفض عنك الاوهام ياعزيزي
شرفنا مرة تانيه
تحياتي