الاثنين، يونيو 30، 2008

كيف تغيرت حياتي بسبب.......صدام

كل انسان حياته زي لوحه فسيفساء او زي جداريه من الموزاييك بتتشكل من الاف العوامل والمواقف والاشياء والظروف والاشخاص والمحن والاماكن..
ولانه موسم الثانويه العامه اللي بتعتبر من اهم المراحل اللي يتأثر في حياه المصريين
افتكرت ازاي المرحلة دي اثرت في حياتي افتكرت سنه90وكنت لسه واخده ثانويه عامه بمجموع 87 ادبي وكان حلمي ادخل كليه الاداب قسم اللغه الانجليزيه.. كانت امي في ذلك الوقت الحزين من شرقنا التعيس.. قد ذهبت لتعمل طبيبه في السعوديه فانتقلت للعيش عند خالي الذي يعيش في الزقاريق ودخلت كليه الاداب رغم ان مجموعي كان ممكن يوديني اقتصاد وعلوم سياسيه او ألسن لكن المتاح في
الزقازيق كانت الاداب فقط المهم دخلت قسم اللغه الانجليزيه
وبدأت المذاكره بجد حتي اجازة نص السنه سافرت لامي زياره شهر يناير وكانت وقتها حرب الخليج وغزو الكويت وانا دخلت السعوديه من هنا وقفلوا المطارات بعدها قبل بدء الحرب الجويه مباشره واتحبست هناك وتلتها الحرب البريه..ووصلنا لشهر فبراير وانا من غير كتب والدراسه شغاله
!!لحد مارس بدأت المطارات تفتح في الوقت.. ده كان خالي بيحضر اوراقه للهجرة مع اسرته الي كندا!! فتحت المطارات ورجعت وكان كتير من المنهج فاتني وكان في حكم المستحيل اني انجح.. ولقله خبرة ولقرار سيئ قررت انقذ السنه الدراسيه من الضياع وحولت الي قسم تاريخ باعتباره اسهل!! وذاكرت المنهج بتاع العام الدراسي في شهرواحد.. كنت تلميذة ل دكتور قاسم عبده قاسم اللي بقا نجم تلفزيوني بعدها ونجحت ...
وفي العام الدراسي التالي سافر خالي الي كندا.. ونزلت امي مصر واستقرينا في اسكندريه ..وحولت الي جامعتها وتخرجت سنه 94_95 واتجوزت برضه في اسكندريه!! وما زال في القلب غصه كل ثانويه وعامه وبدايه عام دراسي جديد و اقعد اقول لولا.. لكنت!!
لو امي مكنتش خارج مصر.. لو مسافرتش!!واكتشف بدري جدا مساوئ السياسه وتدخلها في مصير الناس وبتر احلامهم_واضيف الي جرائم صدام..{الله يرحمه}تلك الجريمه في تحويل مسار حياتي من دراسه الادب الانجليزي _ الذي كنت اعتقد انه سيفتح لي ابواب العمل الي دراسه التاريخ الذي احببته فعلا ولكن لا يبدو سوق العمل بحاجه الي خريجيه فعلا.. الي ان اكتشفت ان سوق العمل لا يحتاج اليه خريجين اصلا.. ولكن السنه دي تفضل من اهم المراحل في حياة المصريين والعرب عموما وحياتي خصوصا..

هناك 45 تعليقًا:

appy يقول...

طيب صدام وغير مجرى حياتك هو كمان طيب مات اعمل فيه ايه
انما بجد شوفتى انتى ذاكرتى واجتهدتى ازاى علشان تعوضى
طيب اللى بيحصل دلوقتى فى الثانويه العامه والانتحار والحاجات دى بجد رايك فيها ايه

Abdou Basha يقول...

د.قاسم كمان بقى تقريبا ناشر :)
انا ليا قصة شبه دي مع عام تسعين
بس انا دخلت قسم التاريخ في نزوة، لم اندم عليها، لأنه عرفت انه الشغل ملوش علاقة بأي مؤهل، أو أي حاجة وله حسابات تانية

محمود المصرى يقول...

بسم الله الرحمن الرحيم

الانسان لما يسترجع الاوقات المفصلية فى حياته فقط يستشرف ما كان يتوقعه خيرا ولا يستشرف الصورة الكاملة لحياته المختلفة ان سلك طريقا غير الذى سلكه , وبالتالى لما الواحد يقول لو لكنت يتذكر ما هو جميل فى حياته الحاضرة ويتصور فقدانه لها , بس لعلمك يعنى مش صدام اللى غير حياتك لكن قرار حضرتك الشخصى بالسفر لوالدتك فى شهر يناير رغم ان الغزو بدأ قبلها بخمس شهور , وكان لازم تتوقعى الحرب , او ممكن نقول ان السبب فى تغير حياتك هو شوارتز كوبوف على اعتبار انه اللى حدد بداية الحرب الجوية , هما الامريكان سبب كل المصايب اللى بتحصلنا ربنا ينتقم منهم , قولوا امين .

بثينــــــة يقول...

يمكن انتي دخلتي تاريخ علشان حسيتي ان صدام هيغير تاريخ المنطقة فعلا فقلتي تاخدي منهج خفيف قبل ما يتقل من أفعاله
كل شئ نصيب
أنا بأة ثانويتي العامة كان فيها حاجة غريبة برضة
كنت عايزة أدخل 'فنون حلوة' علي رأي علاء ولي الدين ودخلت علمي رياضة ولكني 'للأسف'نجحت فيما كان يسمي وقتها المستوي الخاص في اللغة الإنجليزية وتسببت الدرجات الخمس تلك في دخولي هندسة بقرار قراقوشي من بابا استخسار
وبهذا بدأت قصة حسب الله في المقاومة والكفاح
لولا هدا ما كنتش ولا كنتش
متهيألي حرام الواحد يفكر كدة
نقول الحمد لله
قدر ولطف

اسكندراني اوي يقول...

بوست صغير حلو اوي على فكره
سريع واحداثه تخلي الواحد يجري وراها

ايام الاجنياح البري انا كنت في الجيش اياميها
يا خبرررررررررررررر
رجعتيني سنييييين طويله

أحمد كمال يقول...

على فكرة أنا نفس الدفعة لكن علمي :) و في الوقت اللي بتقولي عليه أنا برضه كنت مشغول ، لكن علشان جامعة القاهرة كانت مليانة مظاهرات ضد الحرب ، و أدي احنا دلوقت عايشين نتيجة اللي حصل .. في الجامعة و في الحرب !

خمسة فضفضة يقول...

السلام عليكم ورحمة الله وبركاته

تصدقي ياقمر ان الثانويه العامه دي فعلا كانت سنه مفصليه في حياة ناس كتير
ناس رفعتهم لسابع سما وناس نزلتهم لسابع ارض

بالنسبه لي كانت من السنين اللي فعلا غيرت حياتي 180 درجه ، تصدقي ان كان نفسي ادخل اوي هندسه واتخصص كمبيوتر بس بوقفه مع مدرس الفيزيا بعد النتيجه اقنعني اني ادخل صيدله(ايامينا كان العلمي مش مقسوم رياضه وعلوم )
تخيلي بقي ازاي حياتي اتغيرت واتقلب راسا علي عقب

بس في الاخر ارجع واقول ان كل واحد بياخد نصيبه واللي ربنا مقدرهوله

سلام يا قمر

فاتيما يقول...

قمورة
أيه دا ؟؟
دحنا زومل بقى
أنا كمان ثانوية عامة 90 أدبى
بس أحم احم
مجموعى كان 69.7 فى المية يعنى أحم احم بجد ...
أنا جالى إكتئاب وقتها
لأن النتيجة ظهرت تقريبا فى معاد غزو الكويت و الواحد إتشائم ...
و بعد كدا زى أحمد كمال ما قال عشت المظاهرات بسبب تحرك القوات المصرية فى الكويت و يوم الضرب الأعظم كنا هنتخنق بسبب الغاز المسيل للدموع و واحد زميل اخويا فى هندسة مات و واحد تانى عينه طارت ...
هييييه
أيام
عندك حق
البلد مش محتاجة خريجين خااالص
الحمدلله اللى لحقنا نتعلم
على الأقل أيامنا منكش فيها الرعب و حوادث الأنتحار اللى حاصلة
قطعت الثانوية العامة
على السياسة
الكل كليلة
تحياتى يا حبيبتى

عدى النهار يقول...

أحياناً يعني مش دايماً "لو علمتم الغيب لاخترتم الواقع!" بتكون صح

أهم حاجة قلتيها هى القرارات اللي الواحد بيتخذها بقلة خبرة وسوء تقدير خاصة فى لحظات مهمة فى حياته. بس برضه الواحد فى السن ده ممكن يركب دماغه وينفذ اللي هو شايف فيه مصلحته بغض النظر عن توفر النصيحة السليمة من عدمه

blackcairorose يقول...

أولا كده

انتى دفعة تسعين ثانوية عامة؟ طيب ليه ادتينى انطباع فى البوست عندى انى اكبر منك سنا بكتير؟؟ لول

أنا داخلة مناغشة من اولها، عارفة

بس نقلب جد

حاجات كتيره قوى بنقولها احيانا لو لو بس برضه منقدرش نعرف لو كانت حصلت كانت هتمشى ازاى

من واقع ما شفته

كل شىء سىء حدث لى فى حياتى اكتشفت لاحقا أنه نتج عنه شىء جيد

ولا اقول لك هذا الكلام من باب الكليشيه او التمنى ولكن فعلا هذا ما حدث فى مواقف واحداث ظننتها فى غاية السوء واحيانا الظلم، لكن بعد سنوات وجدت جانب مضىء نتج عنها

وخذيها من شخص درس لغة فى الجامعة، ثم حاولت تعويض هذا الخطأ لاحقا فى الدراسات العليا

خطأ كبير فى رأيى دراسة لغة فى المرحلة الجامعية لان اللغة سهلة الاكتساب من الخارج فى حين انه من الصعب دراسة التاريخ او ادارة الاعمال او او من خلال القراءات الخارجية

كمان سوق العمل ممكن يساعدك جدا لو معاكى لغة، صحيح ، بس هيساعدك اكتر ان اللغة تكون مكملة وليست هى مجال المعرفة الاساسى

بالمناسبة انا بحب التاريخ جدا جدا وتقريبا مجال قرائاتى الاول المفضل

وبالمناسبة كمان
احنا جيران شوية فى المهندسين

بس انا ناحية بنت السلطان لو لسه فاكرة المنطقة

الطائر الحزين يقول...

دا احنا دفعة ثانوية واحدة بقى (فتحى سرور) وكانت مصر فى كاس العالم وقت الامتحانات- عبقرية عمر

(قصتى مع الثانوية)
علمى رياضة ولم أكن أخذ دروس وكنت فى نصف الدراسة الاول تمام وماشى كويس لما جه النص التانى لا لقيت مدرسين ولا لقيت طلبة ونجحت بمجموع قليل

ايااااااااام

اسكندراني في الغربة يقول...

طب اية ذنب صدام
هو دخل الكويت مش السعودية
هما الي جبناء و قفلوا المطار و استخبوا
حرام عليكي الراجل
حيبقي انت و الامريكان علية
:)
و اديكي استفدتي في الاخر بقصة مؤثرة تكتب في بوست جميل

تحياتي

زمان الوصل يقول...

يااااه ..
لسّه من يومين بس كنت باتكلّم فى موضوع الأحلام التى لم تعد صالحه بعد انتهاء فترة صلاحيتها
سأنقل جزءا ممّا كتبته هنا يمكن يخفف شويه من إحساسك بضياع الحلم و إن كان لازال صالحا و ليس كحلمى انتهت صلاحيته ف
it's never too late :)

======================

أنا كان نفسى أدخل كليّة الإعلام قسم صحافه و والدتى كان لديها تحفّظ على هذا الاختيار لكنّه لم يصل إطلاقا لحد الرفض أو الإجبار على أى اختيار آخر و تركت هذا الاختيار لكليّه أخرى هى كليّة الهندسه .. و رغم تعاستى بهذا الاختيار لبعض الوقت القصير تأقلمت مع دراسة الهندسه و حبّيتها و بعد ما كنت طالعه بمادّه فى إعدادى هندسه بقى تقديرى فى باقى الاربع سنين جيد جدا ..


لوقت طويل كنت اتصوّر ان دخولى كليّة الإعلام كان الاختيار الأنسب و العام الماضى قرّرت اتّخاذ خطوه لتحقيق حلمى القديم و قررت دخول إعلام من خلال الجامعه المفتوحه .. بدأت بالفعل متابعة برامج الكليّه على القناه المخصصه لذلك قبل تقديم الاوراق و حجزت موعد للمقابله الشخصيه .. و شيئا فشيئا وجدتنى غير راغبه فى المواصله .. فالمواد تبدو ثقيله و كلّها رغى و دش لا طائل من ورائه .. و حين كنت اقف وسط الطلبه فى انتظار المقابله الشخصيه وجدت الامر مختلفا تماما عن الصوره التى كانت فى ذهنى .. فهناك فارق كبير جدا بين دخولك الكليه التى تحبها بعد انهائك الثانويه العامه و انت لازلت فى فورة حماسك و تطلّعك لتحقيق الحلم وسط اشخاص من نفس سنّك و لديهم نفس النظره تجاه الاشياء و بين ان تلتحق بالكليه وقد تجاوزت الثلاثين و زملاءك هدفهم من الالتحاق بالكليه الحصول على شهاده جامعيه و السلام او ان يعيشوا قصص الحب المراهقه التى يرونها تحدث فى الجامعه من خلال التليفزيون !! و غادرت المكان بدون التوجه للمقابله و انا اقول لنفسى عجبا !! بعد كل هذه السنين من التصوّر و التخيّل أكتشف أن هناك وقت ما يصلح لتحقيق الأحلام إن فات لا يصبح لهذه الأحلام من بعده اى قيمه او طعم !!

بنت القمر يقول...

appy
====
الله يرحمه يا ابي انا مش هدفي اصب اللعنات علي صدام انا هدفي اقول انه حياتنا بتتأثر بعوامل كتير اوي وبتكون زي لوحه الفسيفساء ومن العوامل اللي اثرت فيها حرب الكويت بس يا قمر امالا حالات الانتحار اللي بتحصل دي مش حاجه جديده طول عمر موسم الثثانويه العامه موسم انتحار ودي للاسف حاله مصريه فريده مفيش زيها في العالم...!
:((
تحياتي

بنت القمر يقول...

Abdou Basha
========
نزوة!! طب ما تحكيهالنا في بوست
كيف تدخل التاريخ في نزوة!!
قاسم عبده رجل دماغ عرف كيف يلمع وينفض عنه ركام قسم التاريخ.. ليكون نجم تلفزيوني
حكايه انه بينشر معرفهاش
!! بس سعيده جدا انك طلعت زومل رغم اني اكبر منك بس سيبك انت لقرا رد بلاك كايرو بتشكر في بتوع تاريخ ازاي:)), ويا ريت تقولي برضه ايه حسابات الشغل اللي اكتشقفتها غير المؤهل نورتني
نورت

بنت القمر يقول...

محمود المصرى
==========
قرار حضرتي الشخصي واتوقع الحرب..!! يا عم حرام عليك ده كان عندي 18 سنه ها اعرف منين ان الحرب ها تقوم؟؟ والكل بيقول لو الامريكان ضربوا صدام ها يولع في ابيار البترول!!
بخصوص الامريكان والدعاء عليهم اكيد وعلي صدام اللي احتل الكويت وعلي العرب اللي حطوا فلوسهم في بنوك سويسرا بدل ما يبنوا جيوش بفلوس النفط..
ها ادعي علي مين ولا مين!؟؟
درس التاريخ الاخير ل محدش بيتعلم من الماضي ولا بيعتبر بالاحداث نفس الاخطاء في تكرار غبي..!!الحمد لله علي كل شيئ
نورتني

بنت القمر يقول...

بثينه
========
مبسوطه ان البوست ده خلاكوا تفتكروا المرحله دي من حياتكم
الحمدلله ان بابا كان قراقوش اعتقد انك الان تعي حكمته القراقوشيه
:)))
اديكي بقيتي مهندسه قد الدنيا سواء حبيتي الهندسه اولا ولكن حصلتي علي وضع اجتماعي مميز وفرصه عمل اللهم لا حسد! وده يحسب لباباكي::)))
وربنا يوفقك يارب
تحياتي

بنت القمر يقول...

اسكندراني اوي
==============
طب اكتب انت كمان عن الفترة دي واهو بنتعرف علي حية بعض تدخل القدر فيها نورتني يا اسكندراني
تحياتي

بنت القمر يقول...

احمد كمال
=========
يبدو اني وقعت في خطأ تاني جوهري هو ذكر السنه وذلك يبدو للمرأه ضربا من الجنون ان تبوح بسرها
:)))
بس يعني ايه كنت مشغول وقتها؟
ما كلنا شفنا المظاهرات اثناء الدراسه
وبعدين انت درست ايه واتخرجت منين ومجموعك كان كام ؟
قول ما يهمكش في قعده الصراحه اللي احنا فيها دي؟!!
:))

بنت القمر يقول...

فضفضه
========= يا واعيه انتي؟؟
لا قلتي سنه ولا سنه التخرج
ماشي يا دكتورة:))
بس دعواتك بقا لمدرس الفيزيا اعتقد انك الان غير نادمه علي استماعك لنصيحته
مش كده؟؟
بس هو امتي كان العلمي مش فرعين !!
لا لازم اعرفها دي بقا
:))
نورتي يا دكتورة

بنت القمر يقول...

فاتيما
=========
الله ده البوست ده لم الدفعه كلها بقا انتي والطائر الحزين واحمد كمال:))
بس احسن حاجه في كلامك الله يقطع الثانويه العامه علي السياسه علي الكل كليله:))
والله صدقتي لو الناس تعيش كده تزرع وتصيد وتربي فراخ مش احسن
يا ما احلا عيشه الفلاح
والله العظيم ما بهزر
نورتيني فطومه

بنت القمر يقول...

عدي النهار
========
في المرحله دي مركبتش دماغي بس ملقيتش حد يوجهني
كان كل القصه اني اتخرج من اي حاجه 4 سنين وخلاص لعوامل كتير جدا كانت تحيط بيا في الوقت ده
عاوزة تدوينات كتير وقدرة كبيرة من الصراحه والشجاعه وكشف الاوراق
:))
قول يا رب
نورتني

بنت القمر يقول...

blackcairorose
==================
ماشي يا مشاغبه
:))
ليه يا بنتي وانا قلت ايه بس؟؟
انا معترفه بالهزيمه يووووه قصدي بسني:)) ومن بوست عيد الميلاد وجيت اعترفت تاني اهه
طب لو شاطره اعترفي انتي كمان؛))
سنك وعنوانك ورقم البطاقه والمجموع والكليه وسنه التخرج وسلفتي صاحبتك كام يمكن اطلب سلفه انا كمان!!
لووووول علي رأيك:))
لا عزيزيتي انا الان لست اندم
ولا اجتر احزاني الحمد لله احزاني زي بير زمزم لا ينضب
انا بس كنت بشرك صحابي معايا في الذكريات بتاعه فتره مهمه من عمري ومن عمر تاي حد واللوحه اللي في البوست فكرتني واوحيتلي اربط العوامل اللي بتأثر في حياتنا بالفسيفساء
منتظرة اعترافك
نورتي يا اكثر اصدقائي غموضا

بنت القمر يقول...

الطائر الحزين
=============
تقريبا البوست ده جمع كل الدفعه
معرفتش برضه اتخرجت منين ولا مجموعك كان ايه.. فاتيما واحمد كمال دفعه برضه واعتقد بثينه يمكن سبقت بسنه
نورتني

بنت القمر يقول...

اسكندراني في الغربه
==============
صدام ذنبه ايه؟؟
لا ملوش ذنب يا سيدي انا الغلطانه!!
الناس دي بتلعب بشعوبها زي ورق الكوتشينه
فكرتني الكويتييين ينظروا بتعالي شديد للسعوديين ويعتقدواانفسهم اعلي واكثر ثقافه واثناء تلك الازمه كانوا ينامون في سياراتهم في السعوديه بعد هروبهم مباشره وتركهم قصورهم وبلادهم
سبحان المعز المذل!!
نورتني

بنت القمر يقول...

زمزم العزيزة
============
فعلا كلامك يحتمل قدر كبير من الصحه
لكن تصدقي والله العظيم انهارده كنت بفكر اعمل حركه مجنونه واقدم اعيد ثانويه عامه؟؟
يمكن بعد بناتي ما دخلوا المدارس تحررت شويه من قيود الامومه وعندي رغبه شديده اعمل حاجه لنفسي
بغض النظر عن جدواها او العائد الذي قد يعود منها
بفكر يشده في الموضوع ده نفسي ادخل فنون جميله
تفتكري انه بقاtoooo late
بجد.. الاحتياج الي تحقيق حلم لا يحتاج البحث عن جداوه يمكن يفقد بريقه مع الزمن.. لكن افضل من تناسه او التظاهر بتناسيه ولا ايه رايك؟؟

أحمد كمال يقول...

عزيزتي بنت القمر

ماتقلقيش من معرفة سنة ثانوية عامة بتاعتك ، إنتي بتعتبري السن هو سرك ؟ للأنثى ميزة كونها سر كبير حتى لو كنا عارفين كل حاجة عنها :)

أما عني ، فبصراحة ماكنتش عارف إنها قعدة صراحة ، لكن أحب أقول لك إنهم بيقولوا لي يا باشمهندس علشان متخرج من هندسة القاهرة و الحمد لله :) و سنة إعدادي هندسة عندي كانت سنة خاصة جدا ، و ساعات باحس إني زي ماكون قررت أعمل كل حاجة في السنة دي ، بداية من تغير نوعي و كمي في القراءة ، و أول كمبيوتر حقيقي ، و كورسات و كتب الكمبيوتر كتير جدا ، و الاشتراك في مظاهرات الطلبة في كل قضية ، و تنظيم الرحلات ، و الحياة شبه وحيد لفترة كبيرة ، و العفرته لطلبة رابعة (عارفة يعني إيه؟) ، و متابعة مسرح تجارة ، و الانتظام في برامج الأوبرا الجديدة وقتها ، و التنس ، و السباحة ، و العربية ..

و باحاول أفتكر دلوقت كنت باعمل إيه قبلها ؟ إيه رأيك بقى في الصراحة دي ؟

blue-wave يقول...

بلاش تبصى ورا
خليكى دايما عارفه ان ربنا دايما كاتبلنا الخير
بس احنا نكون نستاهله
تحياتى

Sherif يقول...

صعب جدا ومؤلم هذا التحول القصرى فى مجرى حياتك بلا اختيار ..ومع كل فان النجاح الحقيقى هو ان يحقق الانسان بعض رغباته ويظل يكدح وراء أخرى حتى يحققها ..

نحن لاندرى تحديدا مالذى كان يسعدنا أو يشقينا .. ربما كان هذا الترتيب سببا فى ارتباط سعيد .. والرزق باطفال اروع والتوفيق فى مكان قد يحسدنا عليه الآخرون .. صحيح اننا لسنا فى الجنة .. لكن هناك الكثير مما نسعد به .. واوله اقرب الناس الينا

يبدو ان صدام يحمل ذنوبا وآثاما كثيرة داخل العراق .. وخارجها أيضا

هناء صابر يقول...

هذا أول مرور لى فى مدونتك الرقيقة شديدة التميز ...
شكرا لتشريفك لى بمدونتى المتواضعة ...
بوست صادق جدا ...
تحياتى لك
هناء صابر
مدونة "تعالوا "....

عصفور المدينة يقول...

على فكرة لقد أثر صدام بشكل أو بآخر في حياة كل شخص ولكن يلمس ذلك بعض الناس وبعضهم لا يلمسه

وبالنسبة لي شخصيا لقد أثر أكثر في موته أكثر من حياته

يا مراكبي يقول...

إمممممم

يوم المظاهرات والأمن المركزي ده كنت في محاضرة في كلية الهندسة .. كنت في تاني سنة .. وكانت الدنيا مولعة عالآخر .. أنا نفدت بإعجوبة من ضربة شومة مركزة وروحت البيت بسرعة

أنا كمان صدام غير حياتي .. لأني بسببه إترزعت في البيت وذاكرت وجيبت جيد جدا .. هههه

ذو النون المصري يقول...

فعلا الانسان عباره عن لوحه من الفسيفساء
شكلتها الاف القطع الملونه بالوان مختلفه

بنت القمر يقول...

احمد كمال
=========
يا بختك يا باش مهندس
جميل ان الانسان يكون عنده شعور بالرضا
ويحس انه قضي مرحله ما من عمره وربما من اهم المراحل زي ما بيحب
اعتقد اني كمان عندي رضا بما مر من ايامي
لكن اعتقد ان الافضل ربما لم يأت بعد
نورتني يا باش مهندس

بنت القمر يقول...

blue-wave
=============
يا عزيزي البوست ده تحليلي لاحد الركاحل اللي مرت في حياتي واعتقد انها بتمر بحياه اي شخص
لكن ما قسمه الله اكيد تمام العقل هو قبوله والرضي عنه
اهلا بيك

بنت القمر يقول...

Sherif
=======
الحمد لله علي كل شيئ يا عزيزي ولكن ربما انا من النوع الذي لا تنتهي احلامه وربما يخترع احلاما جديده ليلهث وراءها
ويشعر ان العمر علي قصره يسع احلاما كثيرة للتحقيق
وطرقا كتير .. لنعيش حياه افضل
نورتني

بنت القمر يقول...

هناء صابر
=========
اهلا بمرورك يا ريت اكون دايما عند حسن ظن الجميع يا صديقتي السكندريه
:))
تحياتي

بنت القمر يقول...

عصفور المدينه
=======
اهلا يا استاذنا المدونه نورت
طبعا حياته وموته مين ينسي يوم اعدامه في العيد مين ينسي الشهاده اللي مكملهاش مين ينسي النهايه المؤلمه بعد العز والعظمه
اكيد موته اثر علي الجميع
وكان عبرة كبيره اوي...
تحياتي

بنت القمر يقول...

يا مراكبي
======== تقصد انهي يوم الايام كلها كانت مظاهرات انا الابع سنين دول من حياتي كانوا مظاهرات
مرة بسبب الحرب ومره بسبب بيت الطلبه اللي خلوة في اخر البلد
الاربع سنين كانوا مظاهرات
والعموم معلومعه انك جبت جيد معلومه طيبه
تستحق كثير من الاعجاب والحسد
:))
نورتني

بنت القمر يقول...

نون المصري
========
ده فعلا هدفي من البوست ده
ان شاء الله حياتك مزينه بالقطع الماونه بازهي الالوان!
تحياتي

alexandrany يقول...

بنت القمر
بنت قمر اسكندرية طبعا مش اي قمر
القمر بتاع المينا الشرقيه بالليل لما بيكون كامل كمان
:)
عموما الحمد لله ما حدش بياخد اكتر من نصيبه
واكيد دراسة الترايخ فعلا جميله واستمتعتي بيها
الحاجه التانيه طبعا
ان السوق لا محتاج ده ولا محتاج دهواديكي شايفه الحال
عايز اقولك اصلا ان السوق كمان ما باقاش محتاج لا هندسة ولا طب ولا الجن الازرق
بقي محتاج جامعه فتح عينيك تاكل ملبن
ويجعله عامر

Desert cat يقول...

انا دلوقتى بقيت من سكان الزقازيق بس مش عارفه فيها حاجه مع انى شرقاوية صميمة بس مدرستش فيها كانت دراستى فى القاهره بالنسبة لصدام انا بحبه جدا فى حرب الخليج كان ابن جيرانا فى الكويت هو ظابط فى الجيش علشان كدا سافر مع الناس اللى سفرتها حكومتنا تحارب معرفش انا احنا مالنا كنت وقتها فى بداية المرحلة الابتدائية بس فاكرة كل حاجه لان مامته كنت تالفه اعصاب الشارع كله ... كل لما تسمع خبر حد مات ولا صواريخ بتنضرب ولا طيارات بتقع تطلع ترقع بالصوت فى البلكونة وفى اى وقت الفجر الصبح الضهر المغرب مش فارقه مكانتش بتنام اصلا لانه ابنها الوحيد المهم الحمد لله ربنا رجعه بالسلامة .... اما الثانوية العامة انا لحد دلوقتى عايشه كل احداثها كان انا اللى بمتحن لان قبل ما اتنقل الزقازيق كان معظم اللى بيجى عندى الكافيه بنات وفيهم اللى فى ثانوية وفى اللى قرايبهم برضه ثانوية كانوا بيجو يدخلوا موقع الوزارة وياخدوا الاسئلة المتوقعه فى الامتحانات من بنك الاسئلة وفى النتيجة حدث ولا حرج ...
تحياتى

وميض ابتسامة يقول...

بصراحة احب ان اهنئك على رشاقة التعبير وانتقالك بنا من فترة قد تكون من أهم فترات حياتنا بصفة عامة الا وهى الثانوية العامة.. لفترة أخرى كان مقدر لنا ان ننكوى بنارها ايضا بصفة عامة .. الا وهى حرب الخليج وما ترتب عليها من مصائب حتى الآن .. ولكنى أعتقد انك قد درست من خلال آداب تاريخ أجمل وأعمق الدراسات على الاطلاق .. واخير الست معى ان اقدارنا تقودنا دائما الى ما تحب هى وترضاه .....!!! تشرفت بالمرور على مدونتك الرقيقة .. والى لقاء

شغف يقول...

عاوزة أأكد بس إن نقص التوجيه ده أساس مصري صميم ، ماحدش فينا حد وجهه ، و لو حد وجه فبيوجه غلط جدااا بناءا على معلومات مغلوطة أو مشوهة أو بناء على خدع تمويهيه عشان تدخلي الحاجة اللي تتفق و اللي في دماغ أهلك ، مش اللي انتي عاوزاه فعلا

و أصلا أصلا
همه نفسهم معلوماتهم غالبا منقوصة
زي ما معلوماتنا و طموحاتنا نفسهم مش مبنيين على أساس واضح
يعني غالبا الطموحات دي بتبقى مبنية على الإنبهار بصورة معينة من غير استجلاء لكل التفاصيل المتعلقة بيها

ده غير إن فيه نقص حاد جدااا في معلومات أي حد فينا / خصوصا لما كنا طلبة / عن مجالات العمل

يعني حافظين بس الكليشيهات العامة :
دكتور
مهندس
مدرس
صحفي

مع إن فيه مجالات عمل تانية كتيييير

------

شغف يقول...

الأهم بقى
عاوزة أعضد جملة زمان الوصل :
It's never too late

أنا شخصيا بأؤمن إن المجال مفتوح دايما في الحاضر عشان الواحد يحقق أمانيه أو طموحاته بتاعة زمان ، و ممكن جداا الواحد يغير مصير حياته من تاني في لحظته الحاضرة
لو فعلا الطموح ده حقيقي فأكيد ممكن يلاقيله مخرج في لحظة من اللحظات

بس المهم اننا ما نتوقعش من طرقنا القديمة اللي كانت تنفع زمان انها هيه هياها اللي ممكن ناخدها دلوقتي عشان نوصل

يعني انتي بالنسبة لك يا قمرة ، ممكن جدا تاخدي دورات ترجمة مثلا في مكان محترم ، الجامعة الأمريكية مثلا ، أو المعهد البريطاني
أو لو كانت لغتك قوية ممكن تبدأي تدوري على مجال تشتغلي فيه بيها

على فكرة حتت كتير مش بتبص للشهادة كأساس زي ما بتبص لقدراتك و اللي ممكن تديه للمكان و شخصيتك و طريقة كتابتك للسي في بتاعتك

و أصلا عادي جدا في بلدنا إن حدد يكون متخصص في حاجة و يشتغل في حاجة تانية

ما أنا أهوه يا بنتي آداب إنجليزي و بأشتغل حاليا أخصائية مكتبة ، عادي يعني

بصي
أهم حاجة انك تسيبي ايدين اللي فات و تبصي للي جاي
و تدوري جواكي كويس ايه اللي انتي فعلا عاوزاه ، و فعلا مستعدة انك تمشي له من أول و جديد من تاني ، و ممكن توصليله ازاي

دايما دايما حاطة قدامي الست اللي اتعلمت السباحة و هيه عندها حاجة و تسعين سنة دي مثل يحتذى
و ناس كتير قوي بدأوا يتعلموا من أول و جديد حاجات همه عاوزنها فعلا بعد ما بلغوا من العمر أرذله زي ما بيقولوا

You can if you think you can