الثلاثاء، سبتمبر 02، 2008

عن اصحاب الاعاقات العقليه احدثكم

ان تستشهد براقصه علي حسن سلوك راقصه اخري فتحلف الثانيه بالعظيم ان الاولي كانت بتروح مع الزباين مشاوير لشققهم لكن ايدها كانت طاهرة وعمرها ما فتحت لهم قزايز الخمره فهو العته نفسه
ان تستشهد الام بي سي ليله رمضان في برنامج الملك والمنفي بالصديقه السابقة للملك فاروق في المنفي الايطاليه ايرما كابتشي بأن الحاج فاروق كان طاهر وملتزم بالاسلام جدا وعمره ما شرب خمر وانها مرة شربت شامبانيا في معيته فنهرها بشده وقال انه لن يسمح لها بتقبيله وفي فمها بقايا الخمر الا بعد ان تشرب الماء فهو المسخره ذاتها!!
فقيده الشباب ايرما تستعرض حياتها مع الملك التي امتدت عشر سنوات كامله بوصفها صديقه مقربه!! وتحلف انه لم ينسي الاسكندريه يوما ما وكان ابأممتازا ورائعا وملكا مخلصا لدينه ووطنه... بغض النظر عن الرغبه اللامنتهيه في نهش سيرة فاروق وقلقلته في تربته... لكن هل يبلغ الغباء ان تكون الصديقه المقربه هي من يشهد علي طهارة فاروق والتزامه بالاسلام!!... حرام الاستخفاف بعقولنا وسيبوا الراجل يرقد في قبره بسلامّ!
==============================
سقطت في يدي مجله الاوذاعه والتلفزيون اثناء افطار عائلي اول ايام رمضان... تلهيت بها عن توزيع الابتسامات اللانهائيه او الانخراط في الحديث عن مقالب الشغالات والكوسه ام 5 جنيه والباديهات الليكرا اللي بتجيب امراض وحشه!!
كببت وجهي في الجريده ليعاقبني الله بأسواء من تلك الاحاديث! حوار صحفي مع درة الزمان وتحفه الفن المصري المستر تامر حسني :افضل اتجوز محجبه زميلاتي صديقات لي واخوة... احب مراتي متشتغلش ومتخطلتش برجال غيري... مراتي لازم تكون ليا لوحدي!!
اووووووووووووووف يا الشخص ده معتوه بجدوالزمن لم يتحرك من اول سي السيد اللي كلفت الست امينه وراح يتصرمح علي
مزاجه
يا اما انا اللي غاويه انكد علي روحي يا حاجه تانيه مش فاهماها؟
يعني هو الرغبه الذكوريه الطبيعيه ان يحتفظ كل دكر بإنثاه ليه لوحده مغطاه قدر الامكان نظيفه طاهرة وان لا يرغب في اختلاطها بذكور اخرين خلابيص{ كما يعرف هو} فهو حق طبيعي ومشروع وميئوس من مناقشته وتغييره.. رغبه هيستريه لا علاقه لها بالوهابيه ولا الدروشه ولا الدعاة الجدد الكاجوال او القدامي بالجلاليب قديمه قدم ثلاثيه نجيب محفوظ وقدم افلام شكوكو وربما اقدم
لكن ان يمنح هذا الذكر لنفسه حق التنطيط بين احضان هذه وتلك وحين تحين رغبة جنابه في الزواج فيختار انثي علي طريقه البونبونايه التي يمتلكها وحيدا دون الاخرين... الاخرين والاخريات الذين يدفعون له لمشاهده افلامه عارضا نفسه الدنجوان الخلبوص المقطع السمكه وديلها يبقا الانفصام والذهان العقلي وصل اقصي واعلي درجاته!! اخر جمل فلتة زمانه عمر خالد هو النور في حياتي!!
لا عزاء لاصحاب العقول

هناك 21 تعليقًا:

اسكندراني اوي يقول...

كل سنه وانتي طيبه
اضحكني جدا جدا ما كتبتيه عن استشهاد المتعوس بخايب الرجا
اما الاخ المجاهد سالف الذكر فايدك منه والارض
حقولك على حاجه كويسه

صومي عن قراءه المجلات والجرايد عشان الضغط والاعصاب مش مستحمله

كل عام وانت واسرتك بكل خير

محمود المصرى يقول...

بسم الله الرحمن الرحيم

والله اللى اعرفه ان زى ما اى راجل بيتشرط فى اللى يتجوزها الكلام دا كله تقدر برضه البنت تتشرط فى اللى تتجوزه الكلام دا كله , وبعدين حد قال للى بيتنطط معاهم اتنططوا معاه احسن لكم ولا هما بيتنططوا بمزاجهم ؟ ما هما كلهم قطعية واحدة واللى مش عاجبها النوعية دى ترفضها واللى مش عاجبه برضه يتجنبها وخلاص من غير حرقة دم ولا غيظ .

أبو عمر - الصارم الحاسم يقول...

ههههههههههههههه


ههههههههههههههههههه


ههههههههههههههههههههههههه



قول الله اصدق من قول تامر حسني

وَالْحُرُمَاتُ قِصَاصٌ


جانب ليس قليل من البنات يردن "مقطع السمكة وديلها" على ان يستقيم بعد الزواج


احتمال برضه هي هتكون عايزة جوزها لها لوحدها بعد الجواز...مش زي "صحابها" - صحوبية بريئة اعني
:))

Empress appy يقول...

ما طول عمرهم بيستخفوا بعقولنا وفيه ناس بتصدق عادى احنا عندنا اعلام رايح فى شجرة برضه وضايع وهى دى وظيفته خلط الامور زى المحشى
تامر حسنى زيه زى اى راجل فى مصر هو ده تفكيرة مش هو لوحده
الا قوليلى البادى الليكرا بيجيب امراض ايه ها

زمان الوصل يقول...

على فكرة حلقة الملك "فاروق" أذاعتها "إم بى سى" مرّات عديده لدرجة بدأت أشك فى نواياهم من الترويج لعصر الملكيه و أصدّق وساوس الناصريين إزاء مسلسل الملك "فاروق"!! ما أثار غضبى أكثر هو الإصرار على وصف بنات الملك بوصف "صاحبة السموّ الملكى" !! و كان نفسى أفهم لماذا تتّصف إنسانه زيّها زيّنا بيجرى فى عروقها نفس الدم الذى يجرى فى عروقنا بصاحبة سموّ أو جلاله !! أو أن توصف بأن دماءها زرقاء !! إيه القرف ده ..

و إذا كان هذا مقبولا أيّام ما كانت الأسره المالكه فى الحكم لماذا الإصرار على خلع هذه الألقاب عليهم حتى الآن بعد زوال الملك !! دول حتى رغم ادّعائهم -بنات الملك و ابنه- إنّهم بيحبّوا "مصر" مش بيعرفوا يتكلّموا عربى !!

لأ و الأدهى الفقره التى امتنعت القناه عن ترجمتها اعتمادا على إننا مش بنفهم إيطالى !! اللىّ كانت فيها "إيرما" -صديقة الملك على حد وصف القناه- بتتكلّم عن سلوكيّاته فى شهر "رمضان" .. أوّل مرّه أشوف الحلقه حاولت عبثا استنتاج ما تقوله السيده الفاضله الفاضله عن خلق "فاروق" فى شهر الصوم و فشلت فشلا ذريعا .. المرّه التاليه كانت المشاهده بحضور إحدى خالاتى و أبديت ملاحظتى حول عدم ترجمة هذا الجزء فهى قالت يمكن بتتكلّم عن امتناعه عن معاشرتها احتراما للشهر الكريم و لقيته استنتاج منطقى بردو ينطبق عليه وصف "شر البليّه ما يضحك" !! و تلاقى الست متخيّله إنّها بتقول لنا أمور تستدعى الإعجاب و الاندهاش و هى لا تفهم حقيقة الوضع !! وبعدين أمّا "إم بى سى" تخجل من وصف الموقف على حقيقته و وصف السيده "إيرما" بأنّها عشيقة الملك بيستدعوها ليه !! بيحطّوا نفسهم فى مواقف بايخاااااا ..

هاتكلّم عن موضوع "تامر" فى تعليق تالى

زمان الوصل يقول...

فى أحد البرامج استضافوا الممثله التونسيه "درّه" التى اشتهرت بالقيام بأدوار إغراء فى الأفلام الجديده .. و كانت بتقول إن الوسط الفنّى وسط صعب و قاسى لأن الرجال فيه -زملاء العمل يعنى- لا ينظرون فيه لها و لباقى الزميلات بشكل فيه أى قدر من الاحترام !! و معندهمش استعداد يحبّوا أو يتزوّجوا نساء من هذا الوسط !! و بصراحه أعجبتنى صراحتها و مواجهتها لزملائها بنفاقهم و كذبهم على أنفسهم و إزّاى إنّهم فى قرارة أنفسهم لا يحترمون ما يدعون الآخرين له ليل نهار !!

أنا شخصيا أتمنّى أن يتلقّى "تامر حسنى" كبسة عمره و لا تقبل بالزواج به أى فتاه محترمه سواء كانت محجّبه أو غير !! بصراحه موقف سمج جدّا أن يمارس شاب أو رجل كل أنواع الانحطاط و الصرمحه و يتخيّل إنّه فى آخر المطاف سيجد بنت محترمه ترضى بالزواج منه !!

على فكره "تامر" فى كلامه بيغازل أفكار موجوده عند بنات و ستّات كتير .. بيعزف على نغمة بعض الزوجات حين تعرف بصياعة الزوج فتقول المهم إنّه فى النهايه زوجى لوحدى و يعود لى فى نهاية المطاف و باقى الستّات اللىّ بيعرفهم يظلّوا خارج دائرة الشرعيه فى حياته !! هوّ هوّ نفس المنطق .. يكفى أن ينعم "تامر" على البنت المحظوظه باختيارها زوجه و يكفيها هذا الشرف و يعمل هو ما بدا له ..

الموقف ده بقدر ما يذكّرنى بموقف بعض الكتّاب و التنويريين اللىّ بيتكلّموا كتير عن حقوق المرأه ثمّ تجديهم فى بيوتهم و مع زوجاتهم يمارسوا أسوأ ممّا ينتقدونه !! افتكرت و انا باكتب الرد ده -مع الفارق طبعا- أحد موضوعات "العقّاد" فى أحد كتابيه "أنا" أو "حياة قلم" أمّا كتب مقال مفروض كان يتكلّم فيه عن أمّه و لقيته مش قايل عنها أى شئ و بيتكلّم عن "أسوان" فى أغلب المقال .. فأمّا قلت الملاحظه دى لأحد الأصدقاء قال لى ما يمكن عشان "أسوان" هى أمّه على غرار "مصر هى أمّى" كده :)

غير معرف يقول...

موضوع الملك فاروق ده بجد مسخره

ايه الكلام ده !!!!!

و تامر عادى

معظم الرجال فى مصر كده للاسف

رمضان كريم

سلامات :)

زمان الوصل يقول...

معلش فيه حاجه نسيت أقولها بخصوص موضوع "تامر" او عاوزه أعمل فوكس عليها تانى

كثيرون حين يحبّون الحديث عن ظاهرة النفاق لا يجدون سوى اصطمبة البنت المحجّبه اللىّ واقفه مع صاحبها على الكورنيش أو الراجل الملتحى اللىّ بيغش فى الميزان أو ذلك الذى يحج لبيت الله كل سنه بفلوس حرام .. كلّ الحاجات اللىّ مرتبطه بطقس أو مظهر دينى يعنى .. لكن قليلا جدّا ما فكّر أحدهم فى مناقشة باقى مظاهر النفاق كتلك التى يمثلها موقف "تامر حسنى" مثلا أو موقف الممثلين الذين تحدّثت عنهم "درّه" أو النقّاد الذين يهاجمون ممثلات السينما النظيفه بعنف و ينتقدوهم بينما لا يتصوّر أحدهم أن يرى أحدهم زوجته ناهيكم عن تمثيل المشاهد الساخنه معها كما يطلبون ممّن يهاجموهن من الممثلات .. ما ده بردو نفاق

مثله مثل نفاق من يدعون لحريّة الرأى و التعبير ثمّ لا يطيقون أن يستمعوا لرأى يخالف آراءهم و يحجروا عليه بكل قوّه كما يمكنك مثلا أن تشاهدى فى حوارات "منى حلمى" ابنة الدكتوره "نوال السعداوى" فى كثير من الحوارات التى تستضيفها .. مثله مثل نفاق راقصه هابطه أو ممثله درجه تالته تظهر فى أعمالها الفنيّه أو حواراتها التليفزيونيه كى توعظنا و تنصحنا بما يصلح حالنا وهى أولى من الجميع بالنصح !!

مثله مثل نفاق بعض الكتّاب الذين يعيبون على شعوبنا هوسهم بالجنس ثم تجدى رائحته تفوح بقوّه من كل كتاباتهم الضحله لا لشئ سوى لترويجها و إيجاد زبون لها !!

مثله مثل نفاق من يرون الهجمه الوهّابيه بوضوح مبهر فى كل مظهر من مظاهر حياتنا ثمّ لا تفقأ أعينهم الهجمات الأمريكيه الثقافيه التى طالت لسنوات طويله أو نظيرتها الصينيه الاقتصاديه التى بدأت منذ ما يقرب من عقد من الزمان !!

لكل هذا أنا -على العكس منك- باتحمّس جدّا لقراءة تصريحات كتصريحات "تامر حسنى" هذه .. نفس حماسى حين علمت أن سيّده مجهوله اعتدت باللسب على "عادل إمام" و "ممدوح الليثى" فى أحد المهرجانات كى أعرف هل ستتعامل وسائل الإعلام مع الموقف بنفس الفجاجه التى تعاملت بها مع الموقف المماثل الذى حدث مع الشيخ "خالد الجندى" أم ستمارس سيرتها المعهوده !!

بنت القمر يقول...

اسكندراني
=========
هي المجلة وقعت في ايدي صدفه بحته هو حد لسه بيجيب الاوذاعة والتلفزيون ديّ!! كل سنه وانت وحواء بالف خير

بنت القمر يقول...

محمود المصري
================
عارف المشكله فين يا محمود ؟
انه بيقدم قدوة ونموذج لشريحه عريضة
بيقدم صورة الواد الخلبوص الصايع اللي بعد ما ها يلف لفته ها ياخد بنت قايمه من علي السجادة
وبيقول للبنت عشان احبك وتعجبيني لازم تتنططي وتكوني زي بطلات افلامي لازم تكوني فاني وكووول وتركبي عربيتي الاسبور و...
ده النموذج للاسف اللي بيتقدم واللي الشريحه العمريه الصغيره 12_16 بتتهبل بيه
ستايل الحياه الفري ده مش مشكلتي تحديدا لكن الكذب وتلازدواجيه والنفاق هو اكبر مشكله!
من حقك تعيش زي ما تحب وتعمل اللي تعمله
لكن مش من حقك بعد ما تخلص صرمحه تقول انا عاوز واحده ملتزمه! بأمارة ايه يعني.... هي دي المشكله
منور

بنت القمر يقول...

الصارم الحاسم
===============
المصيبه في الازدواجيه والنفاق .... يلف لفته وبعدين يطلب واحده ملتزمه!! بأمارة ايه يعني... عجايب

بنت القمر يقول...

ابي
============
اه والله المخاخ كلها تعبانه !
بيجيب اورام يا ابي بيعلي نسبه الاصابه بالاورام اي بادي او مشد صدر ليكرا بيزود نسبه الاصابه بالاورام الخبيثه
لازم الجزء الملاصق للجلد يكون قطن... طبعا الكلام علي الكارينا وبقيه العيله الليكركيه:))
نورتي

خيرالدين يقول...

فكرة بتاعتى وملكى هى اللى بتدفع ناس كتير لالزام زوجاتهم بالنقاب والحجاب بعيدا عن الناحيه الدينيه
.....
بقى يا بنت القمر بدل ما تتكلمى مع الناس تقرأى الاذاعه والتلفزيون
وكمان حوار مع تامر حسنى
ده انذار من ربنا
اوعى تكرريها
.....
انا فرحت جدا علشان موضوع الكارينا
خليه يختفى بقى ملعون ابوه يوم ما طلع

hussein يقول...

انا مختلف معاكى لما بتقولى عن الشباب الصايع واللى واخد الدنيافرى انو صاحب اعاقة فكريه لمجرد انو عايز يتجوز بنت كويسه و متدينة
انا معاكى ان اللعب ببنات الناس او الترويج للافكار السيئه اللى بتبوظ الشباب و البنات اللى تامر حسنى دا بيقدمها فعلا دى اعاقه ذهنيه
لكن اى انسان على فطرته بيكون عايز شريك حياته يكون انسان نضيف و نقى حتى لو هو شخصيا مش كده
وياما بنشوف بنات بايظة تقولك انا عايزه واحد متدين يلمنى و يظبطنى
هى دى فطره الانسان السليمه لكن عمر مفى انسان سوى هيكون عايز شريك حياته يكون انسان صايع او قليل الادب
تامر على فطرته رغم انه مش ماشى فى طريق مظبوط واتوسم فيه خير لكن هو الدنيا واخده
ملحوظة : انا عمرى مسمعت اغنيه لتامر حسنى ولا باتبع اخباره لكن بظن ان فيه خير

بنت القمر يقول...

زمزم العزيزة
=============
اشاركك تماما واتفق معك في كل ما ذهبتي اليه واعلم عن الغضب المكتوم.. اذي دفعك الي كتابه تلات تعليقات مطوله لتؤكد هذا الزيف والنفاق الذي نحياه ونستطيع رصده كل لحظه
ولكن اعتقد انك كتبتيه بأفضل من ما كتبته انا وان كنت اضيف عليه مثل تامر ودره جميل العنينن هاني سلامه الذي اكد ان مش ها تجوز فنانه لنفس الاسباب اياها لانه في {مشاهد البوس}
فهو بيبوس ست مش ورقه!!
وهو ما يربأ به عن زوجته المستقبليه{ قبل جوازة}
ايييييييييييه علي رأي شعبولا
وان كنت الان اعتقد اني ربما اعطي كلامك ما يستحقه واعيد نشره كبوست مستقل...:))) بعد اذنك

بنت القمر يقول...

MaGn0liA...
==================
اه مسخرة فحت.... اشكرك ورمضان كريم والله اكرم

بنت القمر يقول...

حسين
======
لا تفق معاك يا عزيزي في حكايه الفطرة السليمه دي:)
الفطرة السليمه تحرك سلوك صاحبها اولا
اعتقد انها فقط نوع من الانانيه المفرطه
التي تدفع صاحبها الي الاستئثار بكلا الحسنييين الاولي والاخرة
المهيصه وزوجه نقيه طاهرة من علي السجاده
لا اعتقد انه يصح ان نقول علي افلام تامر تحمل رساله ام لكن فيلمه عمر وسلمي _الاستاذ بعد مهيصه طويله يتزوج البنوته المؤدبه وبعد زواجه منها يبقي علي حاله الردئ!!
دي بقا فطرة سليمه ولا نموذج بيخاطب رغبه الرجل في الانفلات؟
مع الاستئثار بحقه في زوجه صالحه في نهايه المطاف
ومش فاهمه بأمارة ايه
ده ربنا حتي بيقول الطيبين للطيبات!!
تحياتي

hussein يقول...

لم اقل ابدا يا عزيزتى ان افلام تامر حسنى بها رسالة لانى اصلا لم ارى له اى فيلم من قبل و اعتقد اننى لن اشاهد له اى افلام مستقبلا
انا اتكلم عن الشخص نفسه و اعتقد ان فيه الخير رغم انه الان لا يفعله
بالنسبه لعامة الناس فكلنا نخطىء ومنا من هو اخطاءه كالجبال ولكن الكثير منا على الفطره وسياتى له يوم ويصلح الله له حاله ان اراد الله ذلك
ولكن يظل صاحب الفطره السليمه لا يحب الا الشىء الطاهر النقى لانه عنده فطره سليمة و يستطيع ان يميز بين الخبيث و الطيب
ولكنى اعرف شعورك و اقدره تماما
تحياتى :)

قبل الطوفان يقول...

ملاحظة عابرة استوقفتني

الملك فاروق لم يكن بالفعل ممن يشربون الخمر

وهو أيضاً كان يعاني عقدة غرفةالنوم، ولذا حرص على تعويضها بالتباهي بمصاحبة الحسناوات علناً

أما باقي التفاصيل وتحليلك للمسألة، فلا يوجد بيننا خلاف عليه

مودتي

بنت القمر يقول...

يا سر_ بيست
===============
مفاجأة مرورك وان كنت اتابع مدونتك من فترة
شرفتني
الحقيقه لا يهمني ابدا مناقشه سلوك فاروق ان كان علي علاقه بأيرما ام لا ان كان يشرب الخمر ام لا
انا فقط استغرب من استشهاد المخرج بصديقه الملك التي لا تعني لثقافتنا سوي كلمه عشيقه ان الملك لا يشرب الخمر
بصراحه نكته فاقعه اوي
مش كده:))
لا احد كان يعرف تماما ماذا فعل فاروق مع الحسناوات لكن الصور ترصد تلاحم بين ايرما وفاروق بالمايوه مثلا يبقا لا داعي اذن ان نتحدث عن اخلاق الاسلام_ الا اذا كان استسهال من المخرج او استغباء للجمهور
اشكر مروك

Iskanderani يقول...

مساء الفل ؛
كلام جميل وكلام معقول ما قدرش أقول حاجة عنه ... الي آخر الاغنية.... نظراً لإنعدام التواصل مع الموضوعات لأنني أعيش المهجر بما في من الكثير من الحلو والقلل من المُر فلا يمكنني التعليق المباشر عل التفاهات المذكورة من فتي تافه أو مُخرج لبرنامج مُستخف بعقلية المُشاهد . فقط ترك بصمة التواصل والمُتابعة مع المدونة بإلقاء التحية والسلام

تحيات إسكندراني في بلاد الله الواسعة