السبت، أغسطس 30، 2008

عن عم بشرى احدثكم!


عم بشري يمتلك كشك لتصليح الاحذية احتاج له احيانا عم بشري سألني اليوم عن اسباب الغياب فترة طويله ودعي لي يعطيكي ويراضيكي وتخاوي البنات بولد ويبقا كده تمام
انا يا عم بشري ولد ايه وبتاع هو الزمن ده بتاع كتر عيال؟!
عم بشري: انا عندي اربع بنات وفي ليله قلت يااااااا رب اسيبهم لوحدهم لمين؟؟! واداني بيتر الحمد لله عبال ما تجيبي في دبلون صنايع دلوقت! عارفه يا بنتي انتي عندك حق الدنيا بقت غاليه نار ده شندوتش الفول بجنيه جبت اتنين بإتنين جنيه ولقيتني جعان بعت جبت عيش بلدي وجبنه عشان هفت
والشباب مش لاقيين اللاضا ولا عارفيين يتجوزوا!! طب تصدقي بإيه؟ انا في بنات محترمين بيجوا يسألوني علي عرسان اه والله يقولولي متعرفش حد كويس يا عم بشري
انا :{يا لهوي أحيه} ليه يا عم بشري.؟ ده انتوا بتروحوا كنيسه سبورتنج اللي عاوزين يتجوزوا يلاقوا بعض هناك
عم بشري: لا كنيسه ايه وبتاع ايه هو انا اروح اجيب واحدة تطلع بت كلب منعرفلهاش اصل ولا فصل!
احنا بنجوز عائلي كده انا جوزت تلات بنات وفاضل واحده الاخرانيه جوزتها في منيا القمح من شهرين جوازة زي الفل بس جميله البت دي بت كلب احلي اخواتها وجايه قاعده عندي هي وجوزها بقالها اسبوع...
انا: يعني العريس مش معرفتها؟؟
عم بشري منتفضا: لا معرفتها ايه؟؟ انا معنديش بنات تتصرمح البت لما تاخد علي الصرمحه وهي بت لما تجوز تفضل برضه تتصرمح وجوزها ما يملاش عينها!! الدنيا يا بنتي ما بقاش فيها خير خلاص والغلا موت الناس
انا كنت بشتغل في شركه واتخصخصت وخدت معاش 320 جنيه ومكافأه 50 الف جوزت بيهم البنات وخدت من الجيش معاش 360 جنيه
انا: يا عم بشري هو انت كنت مجند..
هو : امال ايه؟؟ حاربت في تلاته وسبعين ست ايام تلا قيكي مكنتيش جيتي دنيا يا بنتي{ مخدوعا في نحافتي} الارض كانت بتطلع نار والسما بتحدف علينا وفي اليوم ال13 اتصبت ده احنا شفنا فرنساويين وطلاينه في سينا بيساعدوا اليهود ... اصل بوش خايف العرب يخفوا اسرائيل{ الفارق الزمني سقط هنا}عاوزين اليهود يمسكوا العرب من رقبتهم
اصل اليهود دول ولو انهم ولاد كلب بس كل واحد في حاله وفي شغله الصايع صايع والشر...شر... لامؤاخذة يعني والباحث باحث برضه
يعني لو احنا في اسرائيل محدش ها يقول مرات الباشمهندس بتتكلم مع عم بشري الجزمجي ليه؟؟! كله في حاله محدش له دعوة بحد!
بالك انتي البلد خربت من ساعه الخواجات ماسابوها؟ انا كنت بشتغل عند خواجه جريجي كان بيديني 80 قرش في الاسبوع واخر الاسبوع يديني حق السيما ويقولي يا بشري روح سنما الهمبره... {معرفش فين مكانها ولا عمري سمعت عنها} معامله تمام يعني
دلوقت ازاي الحال ؟؟ الناس بقت كافره بيسرقوا في بعض عيني عينك فين فلوس كانال السويس؟ هه فين؟ ده انا بروح لواحده مزيعه في المنتزة بعملها شغل الاقي العربيات قد كده قدام الشاليهات منين كل ده؟ من ساعه المسلمين ما مسكوا البلد والدنيا باظت؟ طب بالك انتي لا بقا في محبه ولا رحمه طب احنا عندنا اللي عاوز يجوز يروح المرقسيه ياخد 5000 جني انتوا مش بتساعدوا حد ولا الجامع بيديكوا حاجه!!
مفيش رحمه ويجي واحد يقولك انتوا كفار كمان... دي مسخرة مكنش زمان في الكلام ده ولا كفار ولا الكلام الفارغ ده كانت الناس طيبه وفي حالها طبعا مش كله الناس الطيبين المثقفين اللي زي حضرتك لأ
لكن الصيع بتوع الترام دول لأ _دول اوساخ !
انا: كل بتوع الترام اوساخ:))
هو اه التبكه{ الطبقه} الواطيه دول هما اللي بيقولوا علينا كفار
ولا اقولك بلاش عيال تاني يا بتي علي رأيك الدنيا بقت وحشه!!قومي روحي بقا تلاقيني اخرتك.. الف سلامه.. الف سلامه يا بابا

هناك 44 تعليقًا:

وجهة نظري يقول...

دا إيه كتاب التاريخ إلي كنتي قاعده معاه دا ههههه

حلو شكل المدونه الجديد.

تحياتي.

أبو عمر - الصارم الحاسم يقول...

من ساعة المسلمين اما مسكوها باظت
!!!!


أحيه
:)))


هما المسلمين مسكوها اصلا


********************

وسيادتك مش تعرفيه غلطه بالذوق
؟
:)

الطائر الحزين يقول...

هذا نقل بحت وكل منا يهم ما يشاء وليس دور لتصحيح كلام رجل فى هذا السن
=========
لكن نأخذ ما فى الكلام من مزايا --- الالفة والدفء المفقود

والخوف من غدر الزمن والسعى وراء لقمة العيش والاعتماد على النفس النفس فقط ولا امان لاحد

الله المستعان

كل عام انت بخير

اسكندراني اوي يقول...

فعلا الدنيا بقت وحشه اوي
كل واحد بقى بيفكر في نفسه بس
دا غير ان الناس ما عدش عندها حاجه اسمها الاخر

مع بعض التحفظات على ما جاء في البوست
دي حقيقتنا دلوقتي

عدى النهار يقول...

كده بشرى دخل الفضاء الإلكتروني على غير معاد
:)

كل رمضان وإنتي بخير

محمود المصرى يقول...

بسم الله الرحمن الرحيم

هو الراجل كان ماشى كويس كويس كويس لغاية ما وصل للآخر وخرف وعك فى الكلام , وبعدين الظاهر مش الفاصل الزمنى بس هو اللى سقط فى موضوع الحرب دا كمان بيخرف , موضوع الطلاينة والفرنساويين ايه دخلهم بالحرب اساسا؟ ماحدش قال حاجة زى كده , اما موضوع ان المسلمين هما اللى بوظوها والخواجات كانوا مخليينها جنة فدا فكرنى بسواق بيجو كنت راكب معاه مرة , قاعد طول السكة يترحم على السادات , ليه يا عم الاسطى ؟ كان ايامه الحشيش حشيش مش زى حشيش اليومين دول مضروب , الله يرحمه كان راجل منهم لله اللى ضربوه .
انما صحيح جريجى دا يعنى من جورجيا ولا اليونان ولا من جرجا؟
من حق كل شنة وحضرتك طيبة رغم ما قلتيه فى البوست السابق

وميض ابتسامة يقول...

ظريف الحوار .. وحكايات عم بشرى التلقائية

فى التاريخ والسياسة " من وجهة نظره طبعا"

هذا بالاضافة لنصائحه الحياتية ..وبرضه من

وجهة نظره ...!!

وهكذا التاريخ كما يجب ان يكون!!!!

غير معرف يقول...

كل سنة وانت طيبة ..

الحوار مع بشائر رمضان مع قراءتى لك التى تتسم بمحاولة رؤية ما وراء السطور واستشفاف معانى أخرى

اجدنى اسأل سؤالا غريبا .. كيف هو حال الأرض لو ان هناك دينا واحدا لجميع الخلق؟

هل سيكونون اكثر تراحما وانسانية ؟
الاجابة .. لا .. فهناك بون شاسع بين المتدينين .. والانسانيين

اتمنى ان اقرأ تعليقا لك كما كنت زمان

بنت القمر يقول...

وجهة نظري
===========
كل سنه وانت طيب... ده تاريخ وجغرافيا وعلم لجتماع كمان:))
رمضان كريم

بنت القمر يقول...

الصارم الحاسم
============
اه طبعا مسكوها... ان بتشكك في ملة حسني!! ياللهول:))
هو يقصد المصريين.... بس ما ينفعش تتناقش مع اي حد يا صارم... مش اي حد في ناس لازم تسمعهم وتحترم وجهة نظرهم وتقدر البوينت اللي جايه منه
السن الدين الجنس الخبرات الحياتيه ما ينعفش اقول وافهم الا في حدود قبول اللي قدامي وحدود فهمه
و صدقني السمع ده متعه في حدذاته ولعلمك الحديث كان طويل جدا وانا اختصرته
كل سنه وانت طيب

بنت القمر يقول...

الطائر الحزين
===============
اتفق معك تماما
الاستماع للاخر متعه وفن
وهو في الاخر رجل بسيط ابن بلد برضه ليه افكارة من اول ايام الجريج لحد حسني مبارك صحيح بعض الخطوط فوتت ودخلت علي بعض لكن برضه في الاخر يحمل شهادته الخاصه علي العصر
رمضان كريم

بنت القمر يقول...

اسكندراني
===============
اوي اوي يا اسكندراني وحشه اوي
ولعلمك كلامه يحمل كثير من الوجاهة والمعقوليه
رمضان كريم

بنت القمر يقول...

عدي النهار
=========== انا بحب اسمع كلام التبكه الواطيه...:)) كلامهم يحمل كثير من الحكمه والخبرة
رمضان كريم....كل سنه وانت بصحه وسعاده

بنت القمر يقول...

محمود المصري
=============
اولا كل سنه وانت \طيب
ثانيا: ها اموت واتخنق معاك علي البوست بتاع العلمانيين وحقوق المرأه بس الوقت اه من الوقت لكن بأمر الله جاية
بالنسبه لعم بشري هو يمكن يقصد انه كان في قوة متعدده الجنسيات او يهود من اصول اروبيه وهو افتكرهم طلاينه
اما عن نقطه... المسلمين بوظوها اللي مزعلاك حاجه من اتنين يا انت بتشككك في ملة حسني مبارك
يا اما انت مش شايف انها باظت:))
نقي انت بقا... هو طبعا يقصد المصريين ويمكن هنا يحمل كلامه قدرا من المعقوليه والمنطقيه
لما نزلت القاهرة اخر مرة قال لي ادم ان للاسف اشيك مناطق القاهرة هي التي بناها اللانجليز
وكذك الامر في الاسكندرية.. طبعا متخدش كلاامي انه دعوة لعودتهم لكن اشارة اللي بعد اخر هما بيشتغلوا ازاي واحنا ازاي
كل سنه وانت بالصحه والسلامه ورمضان كريم بس برضه ها اتخانق
تحياتي

بنت القمر يقول...

وميض ابتسامه
===============
عم بشري ده عسل ... يحمل نكهة الجيل الماضي ويحمل نكهة خبرات زمنه ويحمل نكهة فكرة الخاص
كتاب تاريخ وفلسفه وحكمه شأنه شأن كل العجائز اللذين لا تخلو جراباتهم من القصص والحكم
كل سنه وانت بالصحه والسلامه

بنت القمر يقول...

شريف
=========
وانت بالصحه والسلامه
لو كان العالم دين واحد كان ها يكون في صراعات بين الغني والفقير الرجل والمرأة الحاكم والمحكوم
الصراع هو طبيعه الحياه والبقاء للاقوي
كل سنه وانت بالصحه والسلامه

محمود المصرى يقول...

بسم الله الرحمن الرحيم

هى المشكلة ان الجملة فيها مغالطة لفظية ومضامينية كبيرة تتمثل فى معايير الصلاح والفساد اللى بيحكم بيها على الدول , يعنى هو شايف ان البلد لما تكون تابعة اقتصاديا وسياسيا وعسكريا لدولة اجنبية وفاقدة للتوجه النهضوى الحضارى وغير قادرة على بناء ذاتها وغارقة فى الفقر والتخلف والجهل كويسة وزى الفل لمجرد ان الراجل الجريجى اللى مشغله كان بيديه ربع جنيه علشان يروح السيما بالظبط زيه زى اللى شايف السادات كويس علشان الحشيش ايامه كان اصلى وماكانش بيخلى الواحد يتسطل مش زى حشيش اليومين دول المضروب .
فالقصد ان مصر خربانة سواء ايام الانجليز او ايام المصريين وسواء كانوا اللى ماسكينها مسلمين او مش مسلمين , حالها دلوقتى مايختلفش عن حالها ايام الانجليز كتير بصراحة .
بالنسبة لشياكة احياء القاهرة فدا خلط بين مظاهر المدنية ومظاهر الحضارة , وبالتالى خلط فى تقييم الفترتين الزمنيتين .
يعنى لم نحكم ونقارن لازم نرى الصورة الكلية ونشوف الحاجات اللى كانت كويسة ايام الانجليز كانت بتصب فى اى اتجاه وبتخدم مصلحة مين وبالتالى نحكم صح .
وبالنسبة للخناق اهلا وسهلا بحضرتك فى اى وقت وان كنت مش عارف ايه بس اللى مضايقك من الموضوع.
وبرضه ماقلتليش جريجى دا يطلع منين .
تحياتى

someone in life يقول...

بنت القمر

كل سنه و انت طيبة
كل سنه و روحك عاليه و متواضعه
كل سنه و انت متسامحة و مش واخده على الواحده
كل سنه و احنا كلنا قادرين نقبل الاخر علشان نعرف نعيش و نبطل حروب

تحياتي

عباس العبد يقول...
أزال المؤلف هذا التعليق.
عباس العبد يقول...

مع احترامى لانها مدونتك يا بنت القمر فانا داخل أرد على محمود المصرى
--
يأ أخى اتقى الله , ده بكرة رمضان و مهنش عليك تعزمنى على الفطار فى يوم واحد من أيام الشهر الكريم , يعنى الشهر يبقى كريم و أنت لأ .
المهم
انت أستفزتنى جداً بتعليقك الغريب ده لدرجة انى قلت انك اكيد بتهزر
كلامك بيقول :
" مغالطة لفظية ومضامينية كبيرة تتمثل فى معايير الصلاح والفساد اللى بيحكم بيها على الدول , يعنى هو شايف ان البلد لما تكون تابعة اقتصاديا وسياسيا وعسكريا لدولة اجنبية وفاقدة للتوجه النهضوى الحضارى وغير قادرة على بناء ذاتها وغارقة فى الفقر والتخلف والجهل كويسة "
ده كلامك و لا لأ , كلامك
انت عايز تموتنى صح ؟ انا عارف انت من جواك عايز تموتنى , قلت تخلص مننا فحتبتدى بى , تشلنى الأول و بعدين أموت من الحسرة
فاقدة للتوجه الحضارى النهضوى يا مفترى
الراجل ده جزمجى , يعنى لو قلته فاقدة التوجه النهضوى , حيفتكرك بتشتم حد من اهل بيته علشان كلمة فاقدة دى , طبعاً لو قله مضامينية دى ممكن لامؤاخذة يعنى تبقى خناقة للركب , الراجل و لا فكر و لا جه فى دماغه واحد على ألف من الى انت بتقوله , الراجل لا فاهم يعنى أيه دول و لا فاهم فى تقدم و لا فى الأقتصاد و لا السياسية و لا له فى الطور و لا فى الطحين .. الراجل كان عايش مبسوط أيام الأحتلال و بياكل و بيشرب و بيروح السينما تبقى طبيعى الأيام دى احلى , مجرد أرتباط شرطى لأنه فى الأخر جزمجى يعنى .. معرفة مفيش , فكر مفيش , حتى طريقة كلام مفيش .
ارتباط شرطى بين زمن السعادة و مسبباتها , الزمن : قبل الثورة , المسببات : الراجل الجريجى , يبقى حلوين و يا ريتهم فضلوا قاعدين , مفهاش أى نوع من أنواع التورية او الفكر المستتر , انت الى أفرطت فى تأويل النص , و حملته ما لا يحتمل . هو شاف إيه عدل من أيام الثورة , بلاش هو
انت شفت إيه عدل من ساعة ما أتولدت ؟ , على الأقل هو كان مبسوط فى زمن ما و بيترحم عليه , زى ما فى ناس كانت مبسوطة ايام عبد الناصر و بحستتر عليها لحد دلوقتى , و ناس كانت مبسوطة أيام السادات و بتتحسر عليها لحد دلوقتى .
الى تحمل كلامه رؤية و فكر و مضمون و تحلل كلامه , لو الكلام ده صدر منى انا , قول أه ده واعى و اكيد يقصد حاجة , و ساعتها تقدر تهاجم فكرتى بكامل حرية لأنى أكيد على درجة من الوعى أقصد بيها اهداف معينة .
--
اوضحلك قصدى
بنت القمر محجبة , الراجل قال : من ساعة ما المسلمين مسكوها و هى باظت
يعنى تفتكر مخدش باله من حجابها و من انها مسلمة , و مع ذلك هاجم المسلمين , لانه ما يقصدش المسلمين بمعنى دينى , أكيد يقصد عرب و أجانب .
يا راجل ده حتى لو قليل الأدب و شاف مسلمة قدامه اكيد حيراعى كلامه , بالتالى اكيد هو مش قاصد الدين فى ذاته .
--
مين بقى الى تحمله رؤية و تفند كلامه فى الموقف ده ؟
فى الموقف ده , بنت القمر , هى الى نشره البوست و على درجة من الوعى أنها تقصد حاجة , فشوف و حلل و أعرف هى تقصد أيه من نشر الكلام ده , مش تحلل كلام الراجل .
يا سيدى الفاضل , فاتك نقطة مهمة , الطبقات الشعبية المحرومة من التعليم و لا تملك أى درجة من درجات الوعى بتكون حياتها كلها مبنية على الأرتباط الشرطى , مسبب و زمن .. مسبب و حدث .. و هى نتيجة حرمانها من التعليم بتستعمل لغة خاصة غير واعية و كلماتها مفهومه بينهم هم بس .
الى يتحلل هدفه من البوست هنا بنت القمر مش الجزمجى . شوف هى عايزة تقول إيه ,و توصل إيه من نشر البوست , مش الراجل بيقول إيه !.
---
ملحوظة :
لو انت مهندس ميكانيكا او فى شغلك بتتعامل مع طبقة الصنايعية و العمال , حتحس انك فى مصر تانية غير الى أحنا بنتكلم فيها حتى فى الدين سواء مسيحى أو أسلامى .

يا مراكبي يقول...

بوست جميل جدا يا بنت القمر

أنا بعشق الكلام مع البسطاء اللي زي دول اللي أحيانا تلاقي في كلامهم حاجات صح والباقي حاجات غلط وبتلاقي كمان تناقض غريب في اللي بيقولوه نتيجة تنوع الظروف اللي بيتكلموا عنها

لكن مش المهم إيه الصح وإيه الغلط في اللي بيقولوه ده .. المهم هو الإنطباعات الإنفعالية اللي بتصدر عنهم وبتدل على قد إيه إن النظام العام للدولة ممكن يؤثر تأثير كبير على حال البسطاء بشكل مفجع

كل عام وأنتم بخير

أبو عمر - الصارم الحاسم يقول...

ماشي ما احتلفناش وما ثلتش امسكي في خناقه زي ما باعمل انا مثلا مع ناس تانية على المدونات
:))


بس مفيش مانع نناقش الناس على قدر عقولهم


مش نسيبهم كده..وبعدين هيتعلقوا في رقابنا يوم القيامة لماذا لم نبصرهم

لكن بجد كثيرا الجانب الاجتماعي بيطغى على واجبنا في الحياة

أبو عمر - الصارم الحاسم يقول...

نسيت اقول بالنسبة لعوسني وناصر برضه

طب اعمل ايه في الآية دي

وَمَن لَّمْ يَحْكُم بِمَا أَنزَلَ اللّهُ فَأُوْلَـئِكَ هُمُ الْكَافِرُونَ
؟؟؟

عين فى الجنة يقول...

wow
ايه الجمال ده كله التمبليت هايل وزوقك راقى

عاشــــــ النقاب ـقــــة"نونو" يقول...

هههههههههههههههههههههه
خربيت مطنك يا عم بشرى
هتعمل فتنة طائفية
انما بجد يا ولاد الايه بياخدوا 5000جنيه عند الجواز بحالهم
رااااااااااائع
مسلمين مين اللي مسكوها؟؟؟؟
يا خبر
تدوينة توضح كتير من واقعنا المخزي للاسف
كل عام وانتم الى الرحمن اقرب

bluestone يقول...

بنت القمر
كل سنة وانتي طيبة يا ستي ولو ماوصلنيش طرد فيه قطايف وكنافة بالمكسرات والقشطة يبقى مش هيحصل كويس

بس اهم حاجة يكونوا لايت :)))

افتكر ان الراجل عم بشرى بيفتقد ايام احنا معشنهاش
ايام ماكانت جدتي وجدتك بيقولوا محدش بينام من غير عشا :)
والناس كانت طيبة وعلى نياتها
ومكانتش فكرة الهوية الدينية واردة
رغم ان الدين كان في القلب دايما

الدنيا زمان كانت ابسط اكيد

لكن برضه ماننكرش ان كلامه عن الاسرائيليين صح على فكرة
نمط الحياة الغربي اللي كله التزام واحترام للخصوصية بقى مفقود في مصر

وبعدين ماتنسيش كل واحد ايام شبابه كانت دايما اجمل
حياتك وانتي 30 سنة اجمل بكتير من حياتك وانتي 70

لان استيعابك لكل اللي حواليكي بيكون صعب جدا
لكن في النهاية برضه اكيد مصر كانت احلى

حالة التشدد اللي مالية المجتمع والريح التقيلة اللي خانقة الكل جديدة اكيد

جيلنا المسكين شربها سادة خالص

بنت القمر يقول...

someone in life
====================
جميله اوي يا ايناس دعواتك... ها تزيدني انتكه فوق انتكة:))
ربنا يخليكي يا رب شكرا

بنت القمر يقول...

عباس العبد
=============
يعني التعليقات اكيد مفتوحة عشان الناس تناقشني او تناقش بعضها يبقا اكيد اهلا وسهلا
والا اذا كنت عاوز تناقش محمود وانا لا:))
عموما انا ها اسيبكوا تتناقشوا لكن عاوزة برضه استعمل حقي القانوني واعلق علي تعليقك:))
مش عارفه ليه في احساس بالتعالي علي طبقه عم بشري او صناعته او شخصه
لا يحمل فكر لا يحمل لغه...
شوف يا رامز كل انسان في الحياة دي حتي شيال الزباله عنده فكر وعم بشري عنده وجهة نظر في الحياه والدين والحب والتربيه والاقتصاد مهما كانت بسيطه!
ولو فنطت كلامه وانا اعتقد انه كلامه _ بعكسك_ يصلح للتفنيط والتأمل_ وهو ده سبب كتابتي ونشري البوست ده
احيانا البعض من مصابي التخمه الفكريه بيحصل لهم نوع من الخلل اللي بيخليهم عاجزين عن تحديد ما يرغبوا في قوله وقد لايحملوا اي شيئ ليقولوه
لكن عم بشري قد يحمل في حكاياته كثير من الحكمة من الايمان ومن المنطق
طب اغيظك؟؟
الحديث تطرق الي الكلام في الايمانيات والرزق و القضاءوالقدر والله والله كلامه يحمل منطق وحكمه مركزة ومحددة وواضحه زي السهم المصوب قد لا تحمله كلمات اتخن تخين في البلوجر{ ده لو اعتبرناهم صفوة يعني}
انا بحب عم بشري ورغم ان كلامه بعضه المني جدا الا اني استطيع ان اتفهم وجهة النظر خلفة.. زي حكايه المسلمين اللي بوظوها
استطيع ان اركن البق ده علي جنب واتجنب الخوض فيه
واستمتع بكلامه عن الحريات الشخصيه المفقودة او كلامه عن مؤسسه الزواج اوالاقتصاد او المال العام المنهوب او او او وكثير مما بترته من الحديث للاسف خوفا من الملل والاطاله واكيد هو كمان بحس فطري عارف انه اللي قدامه تحمل من سعة الافق والتواضع ان تسمعه وتتفهم قصده
بس انت ايه عرفك اني محجبه تكونش شفتني لا سمح الله؟؟:))
وكمان مفيش كل سنه وانتي طيبه ماشي يا سيدي ماشي كتر خيرك

بنت القمر يقول...

يا مراكبي
============
الله يكرمك يا احمد فعلا الحديث كان طويل وشيق ومش لازم يكون مرجعي وموثق احيانا طبعا الخطوط بتفوت علي بعض
يعني الواحد مش لازم يدقق علي كل كلمه لكن في الاخر يحمل وجهة نظر الانسان ده من الطبقه دي طموحاته ومعاناته وذكرياته
نورت وكل سنه وانت بالصحة والسلامه

بنت القمر يقول...

محمود المصري
==============
شوف هو انا اتفق مع رامز علي نقطه الارتباط الشرطي دي
يعني فعلا الراجل شايف ان الايام دي بتاعة وجود الاجانب في اسكندريه كانت افضل
اكيد لانه كان عايش افضل
وفعلا نقطه الدوله التابعه والمتبوعه مش في دماغه ويمكن كان الجريجي اللي بيشتغل عنده ومعناها طبعا يوناني من بقايا الجاليه الاجنبيه في الاسكندريه التي رحلت بعد الثورة تدريجيا
يعني الراجل بيتكلم عن حاله بس عن طريق مصر يمكن مكانش شايف احتقان طائفي في ايامه او حزازيات كما تحمل هذة الايام اما حكايه اللي بوظوها
هو لو قال المسلمين ويقصد المسلمين او يقصد المصريين مش الخواجات
فاعتقد انه ربماقد يعكس في عقله الباطن ان المسلمين ماسكينها لان الاخرين مهمشين!!... يبقو اللي مسكينها هما اللي خاربينها... والاخرين ضحايا هذا الخراب... والاحساس ده بستحق الرصد والتأمل ان في ناس بتفكر وبتشعر كده
تحياتي

بنت القمر يقول...

الصارم الحاسم(2)
==============
شوف انا ممكن اتناقش حسب شروط كثير اولها الاحترام ورغبه الطرف التاني في الاستماع والحوار لكن الاهم من ده وده اني مش بيكون عندي قناعات مطلقه ان مخي افضل من الاخرين واني مرسله لتصحيح افكارهم وتصويب مسارهم:))
لان طبيعة الحياه هي التباين هكذا خلقها الله
مش ها اروح ادردش شويه مع صنايعي ولا سباك اخليه يعدل وجهة نظره السياسيه او ادعوه للاسلام
ولا حتي يغير فريق الكورة اللي بيشجعه!!
دي ميشين امبيسبول يا صارم!
انا فقط استمتع بالحديث واتأمله لا عرف كيف تسير الحياة
حكايه ان متعلق في رقبه حد مش مقتعه نهائيا بيها كل انسان حر بالغ عاقل مسئل عن نفسه وعن خياراته في الحياة
------------------------
بالنسبه للايه الجميلة
يا عم صارم ان عاوزني احل إشكالية من ايام الخوارج والرافضه لحد حسن البنا والتكفير والجهاد في تعليق علي بوست حرام عليك!! ده انا غلبانه:))
رمضان كريم

أبو عمر - الصارم الحاسم يقول...

بنت القمر (3)
:))

الموضوع مش اني اروح للسباك او الصنايعي او الميكانيكي واقوله تعال اهديك في خمس دقائق
:)

لم اقل هذا مطلقا

لكن بما ان النقاش تطور امامي لنقطة ما وفيه كلام - عشم - بيني وبين اللي قدامي - يبقى من واجبي اني اتكلم وابين الحق

مش من باب اني املك الحقيقة المطلقة واني مرسله لتصحيح افكارهم وتصويب مسارهم - وان كنت المفروض اني ابقى مقتنع باللي انا مؤمن به !!! - ولكن اللي بيتقال ادامي به مغالطات ومن حد ممكن ماتجيلوش فرصة تانية في حياته انه يسمع رأي مختلف - طبقا لسنه وثقافته

ووقتها ربنا هيحاسبني - زي ما هيحاسبه بالضبط - هل خجلت - ترددت - في ذكر كلمة الحق بما اننا مأمورين بتوصيلها ام لا

بث
:))

عباس العبد يقول...

بنت القمر
كل سنة و انت طيبة .. و بعدين انا معرفتش انك محجبة علشان شفتك و لا حاجة , انا عارف من زمان من ساعة بوست كنتى كتبتيه من فترة .
--
شوفى حضرتك
فى تعالى على طبقة عم بشرى ؟؟؟ !!!! مممم
انتى بتتعاملى معاهم من نظام صباح الخير يا جارى انت فى حالك و انا فى حالك
لكن مسفرتيش معاهم و رحتى و جيتى معاهم و اكلتى و شربتى و بيتى فى نفس الشقة معاهم فى سفرية برا البيت 15 يوم مثلاً , انا جربتها , لو حصل و صدر منك أى تصرف ينم عن انك بتتعاملى معاهم على ان البساط احمدى و انك زيك زيه و كلنا بشر و حبايب و مفيش فرق بين مواطن و مواطن , يبقى نهارك اسود و مفيش شغل حيتعمل , و حتتهزء و تبقا مسخة , انتى بتبصى له بمنظور انسانى و ان له حقوق و انه مظلوم و مهضوم و محروم .. و هو ولا فى دماغه أى انسانية .ده لو طال يسرق و يضرب و يقل أدبه و ما يشتغلش و ياخد فلوس , حايعملها ... و أسئلى بتوع المحلة و عمال محلة ..
انا لما كتبت بوست " عن ولاد الكلب " , كنت بدافع عن الطبقة المتوسطة لكن الطبقة دى , سامحينى
أسئلى اى مهندس معمارى او مدنى او كهربا أو ميكانيكا , او صاحب محل , و انتى حتعرفى و تفهمى .
--
بالنسبة للحكمة و الأيمان و المنطق الى فى كلامهم , فده مش كلهم فى ناس منهم بيقولوا أى كلام , لكن القلة الى تحسى انها بتفكر و بتقول كلام كويس زى عم بشرى و زى عم علام الى ساعات بنشرله زى حضرتك , فده لأن " ارتباطه الشرطى " نتيجة " الحظ " أو "التوفيق " صادف انه كان صح , يعنى موقف معين نتيجة مسبب معين ركب مع حدث معين فى زمن و توقيت ما , فتكوّن عنده فكرة صح .. فاهمه قصدى .. علشان كده كان فى فكلام عم بشرى كلام عجبك و كلام تانى لعم بشرى زى " المسلمين بوظوها " معجبكيش , اوعى تحللى كلامهم على أنه نتيجة وعى مباشر .
لأن فى أرتباطات شرطية عند الطبقة دى - أغلبيتها - بتكون اخر غلط, و بيبقى فى أفكار متكونة عندهم زى مثلاً حاجة مشهورة " ان كل الأغنيا حرامية " و كل البنات " عاهرات " و لازم يتلموا فى البيوت و .. و .. و .. !!!
فاهمة قصدى .
--
اللى يتحلل كلامه و نسأل عن المغزى , هو بوست حضرتك
حشرحلك
لو انا سمعت واحد صنايعى او عامل بيقول " المسيحيين دول ولاد كلب " .. تمام , و اللفظ أتكون نتيجة أرتباط معين فى ذهنية العامل , و الحدث بالنسبة له انتهى مع خروج اللفظ . يعنى الحدث و اللفظ أنتهت قضيتهم بالنسبة له بعد الشتيمة و خلصت خلاص , لو انا اخدت اللفظ و الجملة و رحت ناشرهم .
تحللى هنا إيه :
لفظ العامل و شتيمته ؟ و لا قصدى من نشر الشتيمة ؟
انا مسيحى و بنشر شتيمة مسيحيين ..
مين الى عنده وعى و يقصد شىء من الأثارة ؟ الى شتم و خلّص .. و لا اللى أخد الشتيمة و كبرها و عمل عليها بوست ؟
فهمتى قصدى ؟
--
الوعى .. الوعى هو المشكلة فى البلد دى , الناس للأسف و خصوصاً المثقفين بيستمتعوا بتحليل حاجات خارج اطار الوعى , زى ما عمل محمود المصرى قبل كده و طالب بنشر مصطلح " كافر " سواء للمسيحى او للمسلم , تخيلى انت بتقولى لفظ أنت عارفه معناه , لكن لو وصل للطبقة دى حتبقى مذبحة , مفيش وعى لمعناه الى كان يقصده محمود , و حيعمل مشاكل , لانه فى الأخر لفظ " تكفيرى " فى الأرتباط الشرطى عند الطبقة دى , مش مصطلح دينى له مفهوم زى عندنا .
--
كل سنة و انت طيبة
و أعتذر للأطالة , و متفهميش كلامى غلط .. انا مش قصدى أنتى فى البوست . انا قصدى ان فى ناس بتمارس خدع معينة بحجة " نشر الفكر و الوعى " ..

ذو النون المصري يقول...

كل عام انتم بخير
تقبل الله منا و منكم طيب القول و صالح العمل

youssef يقول...

شيق الحديث و طريفة تلقائيته و بساطته و نقده الفطري غير المميز و المفنط للأشياء .. السمات التي تصبغ حوارات كثير من الكبار مثل عم بشري و بالذات من الاسكندرية .. حيث لا هوية واضحة و لا عصبية خانقة .. أشعر و أنا أسير في شوارع هذه المدينة بروقان البال و غياب الوعي و اطمئنان لذيذ من نوع خاص .. باحس ان الناس رايقة ما عندهاش مشاكل كبيرة و لا افكار كبيرة و لا حتي احلام كبيرة عايشين لحظاتهم و عارفين يستمتعوا بيها من غير قلق و لا خوف و لا تعصب من غير شخصية واضحة صريحة .. فتح البحر البلد علي الدنيا فخلاها حتة من الكون كله مش من مصر بتحضن الكل و تخدرهم بريح البحر مش زي القاهرة .. اللي بيقف علي متر فيها لازم يكون طاحن رقبة واحد تاني تحت رجله .. حاجة تنزع الانسان من تعصبه و انانيته و تخليه ينفذ بتلقائية شديدة لقلب الانسان و حقيقته مش الوانه ( مثلا معاملة الاجانب الجميلة اللي فضلها علي اخلاق الايام دي ) .. حاجة صحيح يمكن تشد الانسان من هويته و لون ارضه لكن برده يمكن تخليه دايما مشتاق لوطن قريب بعيد

ليس لي أصدقاء هناك لكنها انطباعات كائن زائر غير سكندري .. كما لا يمنع هذا ان حتي اسكندرية اليوم غير اسكندرية الامس ..

دمتي بالخير و كل سنة وانتي طيبة و عذرا للتطويل

ana ga3an يقول...

لسة عارف مدونتك من صديقة غالية اوي
فا حبيت اخد نظرة كدة
وكل سنة وانتي طيبة

محمود المصرى يقول...

بسم الله الرحمن الرحيم

عباس العبد
بالنسبة لما اخذته عليا من انى قلت الفاظ مش متسقة مع الوضع , فالالفاظ دى وجهتها لناس اكيد فاهماها زيك وزى بنت القمر , اما انتقاد اقوال او افكار اى شخص مهما كانت طبقته فدا وارد , لأن ماينفعش نقول ان الناس اللى مش متعلمة ناخدها على اد عقلها ومانبينش ما نراه خطأ او نقر بما نراه صحيح من كلامهم , والكلام اللى نقلته بنت القمر عنه كان فيه من المغالطات ما بينتها من وجهة نظرى واتفق مع بنت القمر فى امكانية الحكم على كلام اى شخص مهما كانت فئته , واؤمن ان الطبقات حتى الغير متعلمة المفروض تتمتع بالنباهة ولو بصورتها الفطرية دا لو عاوزين نتحسن .
بالنسبة لكلام الاستاذة بلو ستون لى ملاحظة على كلامها ان نمط الحياة الغربى بالتزامه واحترامه للخصوصية اصبح مفقود فى مصر .
اقول ان نمط الحياة الغربى طول عمره مفقود فى مصر لأن مصر لم تكن يوما ما غربية , وكل محاولات التغريب الى جرت كانت قشرية ولم تنفذ للب المجتمع , ونحن فى هويتنا الاسلامية ( بشقيها الحضارى والدينى ) نستطيع ان نجد قيم الالتزام والخصوصية والاحترام بصور ارقى بكثير مما هو متصور فى النمط الغربى .

بنت القمر يقول...

راجي
==========
زورونا تجدوا ما يسركم
:
:
:
نونو...
===========
عم بشري حكايه فيها الحقيقي وفيها المبالغه.. واكيد في شعور بالاضطهاد بيزيد جواه ... كل سنه وانتي طيبه

بنت القمر يقول...

بلوستون
==========
منافه لايت؟؟!
طب تيجي ازاي ده
ها نجيب سكر سكارين طب والسمنه والمكسرات ازاي يبقوا لايت!!
لو انتي ساكنه في دور عالي زيي وبتطلعي وتنزلي السلم 36 مرة في النهار ها تحرقي 30 صينيه كنافه في نفس واحد:))
بالنسبه لعم بشرري طبعا هو بيفتقد زمن مضي وبيتكلم من خلفيه ثقافيه واجتماعيه محددة
كلامك عن النمط الغربي اللي بيفتقده بشري ناتج عن وجود الجاليه الاجنبيه بثقافتها وتقاليدها في الاسكندريه بكثافه زمن ما
انتهي هذا الزمن وجاء زمن المعايرة والطبقيه اللي يخلي ان الهانم تحكي مع الجزمجي وتجعله شيئأمستهجنا ومدعاه للقيل والقال!! مع كل الحدسيث عن المساواه وحقوق الانسان ومع كل التدين من الطرفين الذي بالمنطق يحرم التعالي علي البسطاء واحتقارهم
نورتي

بنت القمر يقول...

عباس العبد(2)
=================
وانت طيب وبالصحه والسلامه والسنة الجاية تكون احسن من اللي قبلها
شوف بقا هو انا ها اتفق معاك في حاجه واختلف في حاجه تانيه
ها اتفق معاك عن التبكة الواطيه علي رأي عم بشري فيها كل العيوب اللي اوردتها في كلامك يعني انا لما بتعامل مع صنايعي او شغاله او بواب مش بشيل التكلبف ابدا لو انا عاوزة اعمل شغل
لكن لو انا فاضيه وعندي فراغ وواقفه ارغي بسيب نفسي اسمع واسمع لان اكيد الاستماع هنا يحمل نكهة مختلفه جدا عن سماع الطبقه بتاعتي
انت بتحكم بالشكل ده عشان انت مهندس ولازم تتحكم في عمالك عشان شغلك يخلص من من نفس الزوايه اللي بكون فيها لو بتعامل مؤقتا وهنا كلامك بجد وحقيقي
لكن نقطه الوعي ده ها اختلف معاك فيها شويه لانه مفيش حدود فاصله واضحه بين الطبقات عشان ندي ده صك وعي وده نص وعي وده بدون وعي وخصوصا انه في الطبقات الدي الناس بعضهم بتستموت عشان تعلم اولادها تعليم عالي
يعني عم بشري بناته جامعيات والبواب عندي نفس الوضع وهنا الوعي نسبي جدا
وفي طبقات اقل واقل الي ما لانهايه
نقطه انه منخدش كلامه بوغي وبالنظر الي الارتباط الشرطي
ومثل كل الاغنياء حراميه _ لكن يا عزيزي شأنا او رفضنا بشري بوجهة نظره عايش ما بينا واكيد اولاده الخمسة تأثروا بمفاهيمه وانتقلت منه اليهم يعني الناس دي مش جزر منعزله يسهل بترها وتهميشها أو تجاهل نظرتها ونفهومها للاشياءلكنها بتنقل افكارها الي الاجيال الاحدث
انا كتبت البوست لان الحديث شيق جدا ومليئ بالنقاط التي تستحق التأمل والتفكير منها نقطه المسلمين بوظوها لكن البوست مليئ بالنقاط الاخري زي ما قلت لك في الحياه والحب والتربيه والدين وغيره
مذكرتش انه قال المسلمين بوظوها وسكت
دي فقره من ضمن فقرات كتير
لو شيلتها هتلاقي برضه الراجل كلامه مثير وهام
لو اخدت نظرته في تربيه بناته
او رأيه في النعره الطبقيه الموجوده أو رأيه في الحريات الشخصيه او الاضطهاد الديني تلاقيه اتكلم في كل شيئ وبدون ما يعنون{ يضع عنواين لكل فقره}
انا مش منزله البوست عشان كلمه بوظوها لكن جمله لفتت النظر في سياق طويل من الحديث ومش مسئوله انها لفتت نظركم اكتر من غيرها
يمكنم انا لفت نظري كلام تاني عن الايمان بالرزق ما كتبتهاش في البوست
او طريقه الرجل في تربيه بناته وغيره
حتي الراجل لو لاحظت ومع انه جزمجي الا انه شايف انه في تبكه واطيه اخري يترفع هو عن الانتساب اليها{ راكبي الترام} الذين يصمونه بالكفر
يبقا الراجل كلامه مثير ويستحق التوقف عنه ولا انا غلطانه
انا كمان بفترض ان زواري ها يتفهموا وجهة نظري ومش طلبا للاثارة او اعمل صدمه للاخرين ابدا_ وعمرده ما كان اسلوبي_ لكن مجرد تشارك في الافكار
ونورتني وكل سنه وانت بألف خير

بنت القمر يقول...

نون المصري
==============
وانت طيب وبالصحة والسلامه

بنت القمر يقول...

يوسف
===========
اهلا بيك مرورك الاول
ومبروك مدونتك الجديده..
وتشرف اي وقت.. تحياتي

بنت القمر يقول...

انا جعان
===============
اشكرك مرورك واشكر صديقتك الغالية بس معرفش مين هي؟؟
اهلا ان شاء الله اكون عند حسن ظن الجميع

عباس العبد يقول...

بنت القمر
هو صحيح مفيش حدود بين الطبقات و هم ليسوا جزر منعزلة , لكن المستمع بيبقى على درجة من الوعى أنه يستقبل من الى قدامه و يقدر يقول ده " له خبرة " معينة نتيجة أرتباطات معينة و انه بيقول كلام على عواهنه .. انتى قريتى القبطان الى انا كاتبها ؟ فاهمه قصدى .
انتى كتبتى البوست لأنه شيق و أنا كتبت لعم علام قبل كده و انت علقتى عندى و كان قصدى حاجة معينة من النشر , لكن مكنش قصدى أن عم علام رجل ذو مرجعية يمكن تحليلها و القياس عليها . عم بشرى محمل بارتباطات و أفكار و خبرات و حوادث و تاريخ و " علم اجتماع طبقى " ينتمى لطبقته و حتى " رؤية دينية خاصة " مبنية على علاقته الشخصية بالكنيسة و بالاخر \ المسلم \ ركاب الترام .. بس ده مش معناه انه بيتكلم عنهم نتيجة " تحليله الشخصى , و وعيه الخاص " .
--
و بعدين انا قلت بالنص :
" علشان كده كان فى فكلام عم بشرى كلام عجبك و كلام تانى لعم بشرى زى " المسلمين بوظوها " معجبكيش , اوعى تحللى كلامهم على أنه نتيجة وعى مباشر "
و أنت بتقولى ان فى حاجات كويسة فى كلامه و حاجات مش كويسة , يعنى انا مغلطش فى كلامى و و متفقين , كلامك بالنص :
" انا كتبت البوست لان الحديث شيق جدا ومليئ بالنقاط التي تستحق التأمل والتفكير منها نقطه المسلمين بوظوها لكن البوست مليئ بالنقاط الاخري زي ما قلت لك في الحياه والحب والتربيه والدين وغيره "
و أنا مقلتش غير كده
--
" انا مش منزله البوست عشان كلمه بوظوها لكن جمله لفتت النظر في سياق طويل من الحديث ومش مسئوله انها لفتت نظركم اكتر من غيرها "
الجملة دى اللى هى "المسلمين بوظوها " الى أنت قلتى عليها ملفتتش أنتباهى و لا علقت عليها و معلقتش على البوست حتى لأنى فاهمه و فاهم عايزة تقولى , انا قريت البوست و علقت على تعليق " محمود المصرى " , لانه هو اللى لفت أنتباهى بتحليله اللى أنا شايف انه كان " أفراط زيادة فى التحليل " مش اكتر .
--
انا مقلتش ان أسلوبك الأثارة و لا متعمداه .. و لا قاصده تعملى صادمه
انا قلت :
" متفهميش كلامى غلط .. انا مش قصدى أنتى فى البوست . انا قصدى ان فى ناس بتمارس خدع معينة بحجة " نشر الفكر و الوعى " .
--
بس كده
و لازم أمشى دلوقتى علشان مسافر مع عم علام و راجع كمان يومين , و أنا جيلكم ضيف على فكرة
جى أسكندرية , و يجعله عامر مبدئياً ..