الخميس، أغسطس 28، 2008

ليالي الصفا..... في نظريه ضرب القفا!

في احد الشوارع الجانبيه المجاورة لاحد الاسواق المجاور لاحد الكنائس كنت ابحث عن ركنة للعربيه لشراء بعض الطماطم والمنجه اعزكم الله وإذا بشاب اسمر طويل جدا يخرج من الكنيسه يخرج من الكنيسه جريا قميصا ممزقاومرتديا شبشب زنوبه{ ولا اعرف ما علاقه زنوبه بهذا الموديل من الشباشب} وما الجرم الذي اقترفته ليظل اسمها لصيقا بالشبشب؟!
خرج صاحب الزنوبه ينزف الدم من رقيته واذنه خابطا لي السيارة ومكملا الجري بدون ولا كلمه و قد خرج خلفه احد امناء الشرطه المكلفين بحراسه الكنيسه

كان الامين قصيرا جدا يضرب الشاب الطويل بالقفا مرددا بعض العبارات مثل .... امك.... ياابن .... مما يعف اللسان عن ذكره

تجمع المارة لانقاذ الشاب من امين الشرطه ولكن لاجدوي كان الشاب مزنوقا بين فكي الليث الغضنفر... قال حضرة الامين ان الشاب البائس قد سرق البوك الخاص بأحد السيدات والبوك في اللهجه السكندريه هوحافظه النقود في اللغه العربيه!!
حين سأله المارة لماذا لم يصحبه للقسم لعمل محضر بدلا من ضربه ثم اطلاق سراحه قال حضرة الامين ان هذا الشاب مسجل خطر وانه يعرفه جدا كان لازم اربية وقد اعيا الحاضرون السبل في اقناع حضرة الامين بخطأ ما يفعله وفي اهميه تطبيق القانون وقد اعيا حضرة الامين السبل في اقناع المارة... بأهميه تطبيق قانونه الخاص علي المتهم مستعملا اسلوبه العقابي في رزع المتهم علي قفاه

ومع الجدل الدائر حول انتشار البلطجه في شوراع المحروسه بين مستنكر... او مدافع.... او مبررعلي استحياء فإنه لاامل يرجي مطلقا حيث رجل القانون لايثق نفسه في القانون ولا يري له اي لازمه فقانون البلطجه{ضرب القفا} هوالاقوي
غالبا المتهم بعد ان يهدأقفاه سوف يتجه الي السوق لسرقه سيدي اخري تحمل بوكا ممتلئا لزوم طلبات رمضان وسيجلس حضرة الامين منتشيا شاعرا بنصره البطولي علي الشاب البائس ولا عن المارة المثرثرين حول اهميه عمل محضر وتحويل المتهم للنيابه
كيف لهم ان يفهموا؟ ومتسائلا هل يقل هو عن حضرة الظابط في حاجه؟؟! حتي لايقوم بالواجب العقابي نحو المتهم في رزعه قفايين !
وإذا كان رجل القانون نفسه غير معتقدا باهميته ولا جدوي تفعيله إذن نحن نقف محلك سر من ايام دوار العمده وضرب الفلكه.. واوضه الحبوس
مكتفيين بنظريه التجريس العام التي تطبق علي مخالفي القانون من ايام العثمانيين حفظكم الله والي ماشاء الله

هناك 24 تعليقًا:

(احمد سكر ) يقول...

ولا عمر الحال هيتغير

حتى لو بقينا فى سنة 3000

دا وراااثه زى حضرتك ماقلتى

حتى ف القسم

حدث ولا حرج

على الناس اللى بيقلعوهم زى مااتولدو

وهاتك يا ......؟؟

ولا العصيان واستدخامها الخاطىء

تحياتى

احمد سكر

محمد عبد الغفار يقول...

ليست عدم ثقه فى القانون انما عدم قدره

فالأمين لا يستطيع أقتياد المسجل للقسم لأنه ببساطه يستفيد منه

وميض ابتسامة يقول...

اسلوب البلطجة سواء من جانب المجرمين أو افراد الشرطة ..لا يأتى الا بنتيجة عكسية تماما .. وبيزود المسافات مابين الشرطة وافراد الشعب .. صحيح ان مفيش أى اعتراض من ان يقوم الشرطى بواجبه وهو القبض على المجرمين واصطحابهم للقسم لعمل الاجراءات اللازمة ..لكن حكاية الضرب دى وعينى عينك كدة وامام الناس ..أصبحت نوع من الاستفزاز!!!.. انها نماذج اتمنى ان تكون محدودة ....

عزيز عيني يقول...

القضية هيه مين اللي سمح بأنتشار البلطجه وفرضها علينا كالغة حوار ؟

هشام علاء يقول...

عزيزتى

لايوجد لدينا حاليا - و اعتقد لم يوجد من قبل- مفهوم استخدام القوة لتنفيذ القانون

بل نحن و بلا شك نعيش مرحلة استخدام القانون و التلاعب به لتبرير استخدام القوة

او على بلاطة كده القوة الان لاتخدم القانون بل ان القانون هو اداة فى ايد القوة

و حتى القوانين نفسها كسيحة و مهلهلة و احيانا سيئة السمعة

و بالتالى القوة هى الاعب الاكثر تاثيرا على الساحة

عاشــــــ النقاب ـقــــة"نونو" يقول...

يووووووووه
عن هذا واكثر حدث ولا حرج
هو ممكن يكون ما نصصش معاه فطحنه
المهم يا ترى الكيس رجع للست وادت الامين حلاوته ولا ايه
تحياتي

ahmedamin يقول...

مفيش اساسا ثقافة

م يقول...

الأستاذه بنت القمر

عن زنوبه وخدوجه على حد علمى وللأسف الشديد أن الكلمتين من ميراث الفاطميين فى مصر فى اشاره ال ىالسيدتين زينب وخديجه رضى الله عنهما
بالاضافه لغير ذلك مثل يا عمر التى تستخدم فى (الشرشحه) فى اشاره للفاروق رضى الله عنه
عن القانون يا سيدتى فلا قانون
وأمين الشرطه ليس رجل قانون
هو رجل السلطه وفقط
ساكتب عن الموضوع نفسه من واقع تجربه شخصيه كنت هلبس فيها قضيه بسبب القانون ده
الحق عمره ما يرجع بالدراع الا فى الدول المتخلفه
لو تفتكرى تحفة عاطف الطيب سواق الاتوبيس فى مشهد النهايه لما نور الشريف نزل ضرب فى الحرامى وهو بيصرخ يا ولاد الكلب
كان شايف ان الحرامى ده هو صوره لكل الحراميه اللى واكلين البلد ومحدش قادر عليهم

م يقول...

للأمانه فقط
معلومة خدوجه وزنوبه هى معلومه سماعيه
ليس لدى دليل عليها وان كنت اعتقد انها صحيحه

غير معرف يقول...

هذه الأمور احيانا تضعنى امام انفصام نفسى منذ كنت صبيا اراقب والدى بالصعيد والريف وغيرها .. فهم كانوا يضربون المتهمين حتى يعترفوا .. ومع قناعتى التامة بأن هذا الاسلوب متخلف وغير حضارى .. هكذا بعواطفى صغيرا ..الا اننى بعد ان كبرت .. للأسف فهمت ان هذا فى بعض الاحيان مجدى ..طبعا ليس مع كل الناس .. ولكن مع الكثير بالاخص من الطبقة غير المثقفة والسوقيين وغيرهم..

المشكلة الحقيقية ان ضباط الشرطة والأمناء اصبحت هذه هى الثقافة السائدة لديهم .. فاصبح الأمر يتساوى فيه الحابل بالنابل .. ويختلط فيه الأمر لاسباب متعددة وعلى رأسها فساد أمور كثيرة ..

الأمر بالفعل محير .. ولابد ان نجلس فى كرسى هؤلاء حتى نتفهم لماذا .. ربما اتضح شيئا .. وربما اتضح انه لامبرر على الاطلاق ..

اسكندراني اوي يقول...

وايه الجديدفي كده
وهو لما هو مسجل خطر سايبينه ليه يرازي في الناس ما يعتقلوه ويخلصونا
ولا هو الاعتقال لناس ناس
اه ياااني
ملحوسه:النيولووك حلو بس .....ولا انتي ايه رايك

Jana يقول...

لغة الحوار بالأيدى أثبتت نجاحات قديما فى تربية البعض ..
حيث كانت علقة ساخنة كفيلة بإمتناعهم باقى عمرهم عن فعل هذا الشىء
مما ادى الى تشجيع الفكرة وتعميمها
دون التفرقة بين مبتدىء ومجرب وهاوى ومتمرس ومحترف
أما المحترفين " فجتتهم نحست " ... كما نحست أيدى بعض الأمناء فأصبحت "شغالة عمال على بطال"

ولا عزاء للغة الحوار الهادىء العقلانى

ارسلت لك ايميل للاستفسار عن شىء
دى كنت انا ..فى حال تعرفين جنى ثانية
:))

أخبار أخوكى ايه!!!؟؟

HANY YASSIN يقول...

كل عام وانت بخير اولا
رمضان كريم
الجزاء من جنس العمل
لا يحق لهذا الرجل فعل هذا
الشرطي لا يتعلم شيئاً الا القذارة فكيف يثق بالقانون
كما قال الاخ احمد سكر لا يتغير الحال
دمتي بكل خير
رمضان كريم
هاني يس

خمسة فضفضة يقول...

السلام عليكم ورحمة الله وبركاته

عادي جدا ما قانون البلطجه وأخد الحق بالدراع هو اللي ماشي اليومين دول
حتي رجال الشرطه بقوا بيخدوا حق الدوله بدراعهم وكأنهم بيستمتعوا بضرب واهانة الناس

حسبنا الله ونعم الوكيل

خيرالدين يقول...

علاقة المصريين بالقانون غريبه جدا
وهى ثقافه عامه وظاهره استخدام القوه للعقاب او اخد الحقه منتشره وبتتزايد بشكل كبير
.....
الشكل الجديد للمدونه جميل وأحييك على مجهودك مع حالة غزاله اللى تستحق الاهتمام

يا مراكبي يقول...

كلام متماشي جدا مع حال البلد العام .. الناس العادية بتاخد حقها بدراعها والبلطجة هي الأعلى صوتا وبالتالي أمين الشرطة شخصيا ما خرجش عن القاعدة دي هو كمان

سيبك إنتي .. المهم العربية كويسة؟

بنت القمر يقول...

احمد سكر
============
يظهر كلامك صح.... للاسف!!
تحياتي
:
:
:
محمد عبد الغفار
==============
تصدق ان كذا حد قال لي كده!! مصيبه حاميها حراميها!!
:
:
:
وميض ابتسامه
============
بينها نماذج غير محدوده للاسف

بنت القمر يقول...

عزيز عيني
============
محدش سمح.... تراخي قبضه الحكومه وفسادها واهتمامها بحمايه نفسها اكتر من شعبها هو الللي سمح نتيجه منطقيه
:
:
:
هشام
========
المشكله كمان ان القوة يقابلها قوة مضاده... شرعيه او غير شرعيه
راجل بلطجي تقابله ست بلطجيه حرامي بلطجي يقابله ظابط بلطجي وهكذا
دوامه عنف لا تنتهي:((

بنت القمر يقول...

نونو
========
يمكن.... بس معرفش الكيس راح فين انا كنت في الشارع مش في الكنيسه يا سكر:))
:
:
احمد امين
==========
اكيد... اهلا بيك
:
:
:
:
محمد الهنداوي
=========
معقوله نظريتك دي.... ميراث فاطمي يا للهول!! انتظر ما سوف تكتبه
تحياتي

بنت القمر يقول...

شريف
==========
ما هو المصيبه حكاية الثقافه السائده دي ان يصبح الصول او الامين ظابط وحكم وجلاد في نفس الوقت وان يقوم بجميع الاعباء نيابه عن الجميع ناهيك ان يكون شريك اللص وناهيك ان يكون له خصومه معه وناهيك ان يكون بريئا!!

بنت القمر يقول...

اسكندراني
=============
اه ... اه ياني انا كمان
رأيي في النيولوك اكيد عاجبني ولا مكنتش عملته... ايه مش عاجبك؟؟!!
تحياتي
:
:
:
جانا
=========
اشكر سؤالك هو مثلنا جميعا تحت رحمة ربنا لا يحتاج الا للدعاء
رديت عليكي في الميل علي موضوع غزاله
تحياتي

بنت القمر يقول...

هاني يس
=========
ادرك تماما ان الحال مع الاسف لا يتغير
وكل سنه وانت بالصحة والسلامة
:
:
:
فضفضه
========
يا دكتورة حسبنا الله_ في البلطجه كأن الامم اللي خلقها ربنا كلها بتطلع للامام الا احنا بنرجع للخلف مكانا محلك سر
تحياتي

بنت القمر يقول...

احنا
========
اشكرك اولا للمرور
بالنسبه لغزاله انا متابعاها لو في اي استفسار تحت امرك
نورتني
:
:
:
يا مراكبي
==========
انا عارفه انها ثقافه سائده بس المشكله ان الزمن لا بيروح علينا ولا بيجي محلك سر
العربيه بخير... انا بس اللي فضولي بيخليني اقف اتفرج وشكلي ها اروح في داهية مرة:))
نورتني

maxbeta3zaman يقول...

العنوان شدنى والموضوع ذو قيمه والواحد ليه قصة فى الاتجاه المعاكس ربما أصح عنوان لها يمكن ان يكون عاوز حقوقك تروح وتتبعتر .... روح اعمل للخصم محضر ... والله انت فكرتنى اكتب موضوع المحاضر اللى عملتها للنصابين والحراميه دون طائل سوى البهدلة فى س و ج أعجبنى أسلوبك ويشرفنى زيارتك لدكانى المتواضع والحديث _بدل فاقد_ وأنا صديق شريف الحميم جدا الذى حكى كل حكاوينا فى بلوجه وآخرها القنبلة الفوليه ...أنا بطل هذه القصة