الأحد، أغسطس 10، 2008

عالم مجنون

علي اساس ان الضبط المصريين فوق مستوي الشبهات ومتطلعش منهم العيبه
ولا ممكن ابدا نهائيا انهم يرتشوا او يقتلوا او يزوروا
والتحقيق مع ايراهيم عيسي تاني المرة الاولي تجرأ علي تناول اخبار صحه الرئيس والتانيه... طب بقبضوا علي جريده الرأي كمان ويصادروها ...وتدوينه ساخرة
_الحلقه التانيه من مسلسل محمد حجازي هي الاستاذ ماهر الذي تحول الي بيتر اثاناسيوس بعد تحوله السري من الاسلام للمسيحيه من تلاتيييييين سنه رايح جاي للكنيسه يصوم ويصلي ويتناول_ ثم قرر التحول العلني ولما سأله وائل الابراشي عن اهميه اعلان تحوله واثباته ورقيا
قال محاميه :ان الغرض هوالزواج الكنسي كأي مسيحي مؤمن رافضا حل الزواج المدني في قبرص الدوله التي تم فيها تعميده مسيحيا قائلا ان زواجه اسلاميا يعد زني علي الرغم من زواجه خلال الثلاثين سنه من زوجتين مسلمتين وانجابه بنت لاتعلم الي اي دين تنتمي الان_ من احداهما طب ده برضه مكنش زنا!! الجزء التاني من مقابلته السبت القادم دريم 2 طوفان خراب اجتماعي قادم
2_ البلد بتفور من الغلاء والفساد والتحرش والانفلات الامني والاخلاقي والفوضي والاضرابات... ورئيس الوزراء يهتم بالتعليق علي احد المدونات الناقدة للحكومه ذات الطابع اليساري..... ياااة ده المدونات بقت حاجه جامده اوي وانا مش عارفة:)
_حملات ضد التحرش والمتحرشين وحملات مضاده ضد المتحرش بهن برامج توك شو ومقالات وتدوينات1 .2... في النهايه فراغ امني وتخلف اجتماعي.. وفي الشارع.... الغلبه للاقوي.. والشردوحه ست جيرانها.. حين تتعرض الانثي للتحرش لا تجد اصحاب اي من الحملات بجوارها
3_ اخر الاكتشافات اللوذعيه التي اكتشفتها... ان مكتبة الاسكندريه اجهزة الكومبيوتر بها لا يوجد بها في الماوس كليك يمين... والله يعني مفيش ايميل مفيش سيرش ومفيش مسنجر المدونات بتهنج الاجهزة والفيس بوك ايضا وده كله مقبول وممكن فهمه... لكن المستحيل هو عدم وجود كليك يمين لدواعي امنيه هيهيهيهيهي البديل هو استعمال كنترول c للكوبي وكنترول v للبيست.... يعني الواحد يعوز ينقل حاجه من الجهاز ياخد ورقه شفرة الرموز معاه.........
4_اخرسيل الجنون... في احد المحلات الكبري اقف بجوار سيده شيك تشتري حذاء فتدفع للكاشير ب50 جنيه فيخبرها بأن سعره 70 جنيه فتخبره ان البائع قال ان سعرة 50 فيرد بانها غلطه! تصر السيده{ وتستموت} انها تاخدة ب50 لانها عملت !!حسابها علي خمسين ولازم تتحملوا غلطتوا.... ها اخده ب50 يعني ب50 مليش دعوة
اتصرفوا وسط ذهول الكاشير امام احدث طرق الاستعباط والفصال...

هناك 34 تعليقًا:

Empress appy يقول...

هههههههه ومن امتى الناس عاقله كل واحد اتوزع عليه رزقه معجبهوش اتوزع عليه عقله قال مفيش احسن منه

Empress appy يقول...

انا اول تغليق حلو اوي ابقى التانى كمان واهو اقولك وحشتينى ههههههههه

محمود المصرى يقول...

بسم الله الرحمن الرحيم

انا ماسمعتش حلقة وائل الابراشى لكن بصراحة الموضوع دا فعلا تافه جدا وواخد اكتر من حقه ,انا عاوز اسأل ليه مانطبقش حد الردة ونريح دماغنا ؟ وعلى فكرة مالهاش علاقة بالاكراه فى الدين , يعنى واحد مسلم لو زنا مش هايطبق عليه حد الزنا؟ ولو سرق كذلك يطبق عليه حد السرقة , وبرضه لو ارتد يطبق عليه حد الردة , عادى يعنى انما نعملها قضية وحكاية ورواية والبطاقة واشتراك القطار ووصل النور والعيال وما الى ذلك .
بالنسبة للكوبى بيكون بالكنترول والسى والبيست بالكنترول والv .

Ahmed Kamal يقول...

و الله زمان ، حمدا لله على السلامة ، ماتعودناش على الغيبة الطويلة دي :)

على فكرة هي كنترول سي مش ألت سي :) و ده برضه علشان السيكيوريتي

خمسة فضفضة يقول...

السلام عليكم ورحمة الله وبكركاته

العالم طول عمره مجنون مجنون مجنون

وعمره ماهايعقل ابدا

بالنسبة لبرنامج وائل الابراشي باحسه بالظبط زي جريدة الفجر هما الاتنين مايهمهم الا الفرقه الفارغه وخلاص وعلي راي المثل الجنازة بتبقي حاره والميت اعزكم الله كلب
عشان كده بطلت اتفرج عليه من زمان اوي

اما رئيس الوزرا فاعتقد انه حس انه اليومين دول الجرايد اهملته حبتين وركزت علي حاجات تانيه فاقلك اما اعمل فرقعه اطلع بيها يومين تلاته علي الصفحات الاولي وكمان المدونات


رعلي راي ابي كل واحد عقله مريحه


سلام

وجهة نظري يقول...

بصراحه، حكاية التحول دي عدت الحدود أوي .... وموضوع مسلمين ومسيحيين حيقلب لكارثه إجتماعيه معرفش مين مستفيد منها بالظبط. لو الموضوع إتساب من غير ضبط وربط الدنيا في مصر حتبقي بزرميط. غالبا النظام مستفيد من حالة القلق دي.

المفروض قانونا زي العقد شريعة المتعاقدين كده، فالراجل دا بداء حياته مسلم، وإتجوز علي إنه مسلم وخلف علي إنه مسلم .... كده هو عمل عقود مختلفه بصفته الإسلاميه، لو عايز يغير صفته هو حر، بس علي نفسه بس .... موقف بنته نشاء بعد ما كان مسلم، وموقف زوجاته نشاء علي إنه مسلم، وجميع الحقوق إلي نشأت لازم تترتب علي إنه مسلم .... مينفعش يغير في بنود العقد علشان بقي مسيحي. فنظام التوريث لازم يبقي النظام الإسلامي، وبنته دينها الإسلام لغايه ما تقرر عكس كده لما تبلغ سن الرشد، وحقوق زوجاته لازم تكزن علي إنه مسلم.

بالنسبه لرئيس الوزراء، يعني هو علق علي مدونات، دا علق علي مجونه واحده مره واحده، قال عايز يقول أنا متابع معاكم .... طب ما يعلق علي البلاوي إلي بتتقال في المدونات التانيه، والا يناقش الأفكار الإقتصاديه إلي في المدونات، أو ينفي الفساد بالأدله!!!! هجس طبعا.

قصص التحرش دي بقت مصيبه، ومعاكسة البنات خدت طابع رسمي، حتي في الفيديو كليبس بقوا يعلموا العيال طرق جديده للمعاكسه!! بيعلمومهم علي أساس إن دي حاجه كوول ولتيفه خالس!!

مره وأنا في أجازه لمصر، خدت أولادي ورحت مكتبة الأسكندريه، قلت حاشوف حاجه واو بقي .... إيه الهبل دا أساسا، والنبي يتوكسوا علي نفسهم، دا أوسخ بلد في العالم عندها مكتبه قوميه حقيقي بيفتخروا بيها.

الموضوع الأخير مهوش إستعباط وفصال، دي حقاره وإستخفاف من المحل ومن الست. المحل لأنه مش حاطط سعر واضح وصريح مافيهوش فصال للبضاعه، فحط نفسه في موقف المدافع نتيجة غلطه من البياع ... مين قال، مش يمكن هي 50 بس والكاشير كان حيضرب الباقي في جيبه؟؟ مثلا يعني. وطبعا حقاره من الست إنها بتستمتع بإذلال الكاشير والبياع، وأهي يمكن تطلع بحاجه رخيصه في الأخر.

تحياتي.

أبو عمر - الصارم الحاسم يقول...

واما نقول حد الرده فيه ناس بتتنطط وتقف على دماغها


ما هو الحيوان ده ماكانتش مشكلة معاه انه يتجوز مسلمتين....فرصة واهو بيتنطط زي الكرة الجلد من هنا لهنا وقت اللزوم...ووقت اللزوم برضه طلع بفرقعة ويا حرام عايز يثبت ديانته النصرانية


وباذن الله المشكلة دي بالذات هتنتهي زي ما كانت بتنتهي على مر التاريخ...وتكون الغوغائية هي الحل في النهاية...وطبعا الغلبة وقتها تكون للاكثر عددا...ثم بعدها ينقذ العقلاء - المتشددين الوهابيين - ما تبقى منهم من الفناء ومن ايدي العامة

طالما هما عايزينها كده

عباس العبد يقول...

أنا شفت الحلقة و مقدرتش اكملها لأسباب كتير
اولها إن المحامى المسيحى بتاع بيتر راجل علاقته بالحوار و سماع الأخر زى علاقتى باللغة الصينية .
تانيها , انه مش محامى ده نقاّش و هو شغال فى شقة لقى كتب قانون قرا فيها فأفتكر انه محامى
تالتها , إن مختار نوح كانت قوالب هجومه و قلة تفكيره كانت جاهزة و واضحة ( عمالة - شهرة -تمويل من الخارج ) و أسلوب الحوار ده بالقوالب الجاهزة دى بيخنقنى
رابعهم , الراجل الى جابلى العلة بحكاية إن المسيحيية مش عايزة إشهار و تنفع فى السر , امال الزانى و لا السارق يعيش فى العلن و المؤمن يعيش فى السر ؟ , يعنى بقى مسيحى بس مستعرّ من مسيحيته مثلاً ؟ , خايف من حد يموته ؟ و الهى يعنى جزء من الأيمان , موت , و ما بعد الموت , لو موتوك بعد ما تبقى مسيحى و أنت مقتنع بمسيحييتك , يبقى حتموت و انت مقتنع أنك حتبقى شهيد و تخش الملكوت , و لا الجزء ده غامض فى المسيحيية و خايف يكون غلط ؟ فقلك أبقى فى السر , أحسن المسيحيية ميكونش فيها و لا حاجة .
---
اما المصيبة الكبرى حكاية انه مش عايز يتجوز من مسلمة علشان الزنى , لا حول الله صعب علىّ , الدموع حتفر من عينى , دول مش فاهمين أى حاجة
فى حاجة اسمها الأفساح البولسى , بيقول إيه سعادتك
لو أتنين , زوجين يعنى , واحد فيهم بقى مسيحى , لا يجوز ان يحدث طلاق أو ان الراجل بعد ما يبقى مسيحى لا يجوز له أن يطلق مراته الأ طبعاً لو طلبت هى كده , بالعكس الكنيسة بتسمح أنهم يعيشوا مع بعض , يا أما الست تبقى زى جوزها , او الراجل يغير كلامه تانى و يرجع لدينه الاولانى, أو يفضله مع بعض أسرة واحدة متكاملة , لأن الكنيسة بترفض منعاً باتاً تدمير الأسرة , و لو كانوا مخلّفين , لا يجوز للاب أنه يجبر اولاده على أعتناق دينه الجديد الا بعد واحد وعشرين سنة و هم الى يختاروا . يعنى مفيش زنى و بأمر من الكنيسة .
---
انا بقى اول ما سمعت قصة زنى , و الراجل يا عينى متشحتف و مححسنى انى لازم أطلع فلوس من جيبى و ابعتهاله و ادعيله يمكن ربنا يرزقه ببنت الحلال
حاجة الصراحة بجد , فوق المقرفة
--
محمود المصرى
و انت يا عم داخل تموت الراجل كده علطول , خبط لزق
بالراحة

الطائر الحزين يقول...

ان الله غنى
ولو علم الله فيهم خيرا لهداهم

==========
طبعا المدونات حاجة جامدة امال سايب الحملات والجيوش وعمال يمضى على اطباق

===========
الفصال مش بحبه

اسكندراني اوي يقول...

اسمحيلي انا مش حعلق على اول موضوع مع اني قريته بتمعن اوي اوي

موضوع تعليق رئيس الوزرا في مدونه انا شايف انه شيئ كويس
لاننا عارفين ومتأكدين ان في تقارير باستمرار بتترفع له وللقيادات عما يدور في عالم التدوين في مصر
لذلك وجوده على الساحه بشخصه شيئ يبشر بالخير
ادعي معايا وقولي امين

موضوع التحرش موضوع شائك واقل ما يقال فيه انه عدم.....وكمان الاشخاص دول .....ضعي ما شئتي مكان النقط

يا حالولي مافيش كليك يمين
جميل اوي كنترول في كنترول سي
وكنترول اكس عشان تقطعي المخاخ التعبانه اللي بتشرف على شغل الاي تي هناك

موضوع الحذاء
لا تعليق ......ال شيك ال

تحياتي

زمان الوصل يقول...

أنا رأيى مختلف شويه مع بعض الآراء السابقه ..

إذ لو أتيح للمتحوّل للمسيحيه أن يثبت ذلك فى أوراقه الشخصيه ستقل احتمالات زواجه كمسيحى بامرأه مسلمه .. و بصراحه مش قضيّه كبيره أن يطلب أحدهم أن يثبت ديانته الحقيقيه وما يقرّ به قلبه فى أوراقه الشخصيه بالعكس أظن هذا أقرب للمصداقيه ..

بخصوص موقف المحل و كما قال "وجهة نظرى" ربّما تكون المشكله من المحلّ و ليس من المشتريه .. الموقف ده حصل مع أختى بس و هى بتشترى فاكهه بعد ما نقّتها و وزنتها على أساس سعر معيّن للكيلو فوجئت بالبيّاع بيقول لها لأ انتى سمعتى غلط و طلب 3 جنيه زياده فى الكيلو فكان الحل الأكثر احتراما من وجهة نظرى -و وجهة نظرى أنا كمان- هو إرجاع البضاعه و الشراء من مكان آخر رغم محاولة البائع التراجع ..

بنت القمر يقول...

ابي
========
علي رأيك يا ابي بس كل الناس الا انا انا الوحيده اللي مخها مش مريحها
امي دايما بتقولي كده
:))))))))))
منورة اول او اخر تعليق

بنت القمر يقول...

محمود المصري
============
يعني ايه تافه وواخد اكبر من حجمه
لكن ها نطبق عليه حد الرده!!!!!!
يعني ها نموت انسان عشان حاجه تافهة؟؟؟!!
الحدود لما تتطبق تتطبق كلها في وقت واحد في مجتمع يحكمه تشريعات الاسلام
يعني عمر ابن الخطاب وقف حكم قطع يد السارق عشان زمن المجاعه
طب هل دلوقتي احنا في ظل طوابير العيش اللي الناس بتموت فيها مش زمن مجاعه يبقا ازاي نطبق حدود؟؟
فين التكافل الاجتماعي في الاسلام
فين اموال الزكاة اللي كان جباة الزكاة مش بيلاقوا مستحق لها في عهد الامويين؟؟
ازاي ها تتطبق حد علي ناس جعانه وفي مجتمع مافيهوش تكافل الناس بتبيع اعضاءها واولادها عشان الفلوس
بالنسبه للرده هو ده مش كام حد مؤقت لفترة صدر الاسلام لانه كان في خوف علي الدوله الحديثه من انصراف حديثي الاسلام عن الاسلام في بدايته
طب ازاي ها تطبق الحد ده علي المسلمين اللي مش عاوزين يغيروا بطاقاتهم لكن اضمروا في قلوبهم الكفر
او الالحاد
او ارتكبوا مفاسد كبيره او انكروا السنه النبويه او او او
مين ها يفتش في ضماير الناس
يحكم علي ايمانهم ويتحمل دماءهم امام الله؟؟!!
مين؟؟,,,,,,,,,لو علي كده ها نموت الملاحده من باب اولي والمرتدين والبهائيه بعض فرق الشيعه ومنكري السنه ومنكري يوم القيامه ومنكري الثابت من اصول الدين
وها نطبق حد التعزير بحده الاقصي علي ممدوح اسماعيل وهاني سرور ورامي لكح واشرف السعد
وما يفضلش في البلد غيري انا وانت
وها يجي ناس تانيه
يدوروا لنا علي حد يليق بينا
انا عن نفسي مقتوله مقتوله:)
وبعدين فين الاستتابه والهدايه
اللي قال انا مش مع الله انا مع يسوع
ولا اللي قال لا الله ولا يسوع
مفيش الا العدم والفناء الاله خلق العالم ونساه!!!
اعتقد ان تغيير الديانه هو مصيبه اجتماعيه تستلزم وضع ضوابط قوية جدا للتغيير بعدها من شاء فليؤمن ومن شاء فليكفر
نورتني وتحياتي

بنت القمر يقول...

احمد كمال
============
اه والله البوست الاخير كان نحس ومعفرت وسد نفسي عن الكتابه ولكن كنت متابعه الجميع من مخبئي امام الريدر:))
اشكرك علي التصليح وان كانت برضه خيبه يعني ايه الدواعي الامنيه التي تستلزم الغاء الكليك يمين في مكتبه عامه
ايه التخلف ده؟؟
ده انا مصدقتش وقلت يمكن جهازي بس انا اللي عطلان لقيت الاجهزة كلها كده!!
نورتني

بنت القمر يقول...

فضفضه
==========
الفجر اه عادل حموده ماشي
لكن وائل لأ!!
كله الا وائل بجد
انا بحب برنامجه جدا جدا رغم انه احيانا مش بيقدر يداري تحيزة وضيقه بس اختياراته قويه وناجح ووسيم وامور:))))))))
موضوع تغيير الديانه في الظرف اللي احنا فيه وفي حاله الاحتقان مش جنازة وميتها كلب بالعكس دي قنبله اجتماعيه
لازم تتحل وتاخد حقها من اهتمام الدوله او الاعلام
تحياتي

بنت القمر يقول...

وجهة نظري
===============
فعلا بس المصيبه في موضوع التحويل في شخص ماهر او بيتر ده تحديدا
انه بيقول انا مسيحي مؤمن ومن تلاتييييين سنه لكن اتجوزت علي يد مأذون وطلقت مرتين
طب فين ايمانه؟
ليه ما اصرش انه يتجوز كنسي ان شاء الله بلاها مصريات كان سافر اتجوز في قبرص او خد اجنبيه ازاي قبل ده علي ايمانه!!
ده اولا ثانيا بقا طبعا البنت بنته ها تفضل مسلمه لكن تخيل حجم الضبابيه والتشتيت اللي ها تكون فيهم بين ام مسلمه واب مسيحي ها ياخدها في الاجازات الكنيسه وتلاقيه فاطر في رمضان
اعتقد الحل هو تضيييق شروط التحول الي المسيحيه او الاسلام
لو الكنيسه شافت الراجل ده بيصوم مسيحي ولالأ بيصلي بيروح الكنيسه ولا لأ وازاي اجوز مرتين وهومسيحي جواز غير كنسي؟
لازم امتحانات واختبارات طويله جدا عشان تتأكد من ايمان الشخص ده زي امتحانات الرهبنه كده.. وبالعكس لمن اراد التحول الي الاسلام لازم الكنسيه لما تتأكد تمنحه بعدها شهاده عماد وتسمح له الدوله بالتغيير
وكذلك الازهر يشوف اللي ها يسلم ده بيحب الاسلام ولا عاوز يهرب من مراته او جايله عقد عمل في السعوديه
تمتحنه وتسيب له وقت طويل لمراجعه قراره... عشان ميكونش قرار مشوش او مرتبط بمصلحة
عشان مش كل شويه واحد بيلعب يقعد يتنطط بين الدينين ويخلف هنا عيال وهناك عيال
------------
بالنسبه للمكتيه خالي لما زارنا قال برضه ان كندا حيث يقيم بها كتبه مهوله لاتقل عن كتبه اسكندريه
----------------
بالنسبه لموقف المحل
..... السعر كان موجود بس الست عملت نفسها مخدتش بالها ولزقتها للبياع الغلبان... عشان تحرجهم وتنزل سعر الصندل
نورتني

عدى النهار يقول...

الراجل بيقول إنه غش وخدع إمرأتين وتزوجهم بما يتعارض مع دينهم وهو يعلم ذلك تماما يبقي المفروض يتحاسب على هذا الغش

بنت القمر يقول...

الصارم الحاسم
=================
يعني الجزء الاول بتاع حد الرده فهمته
وردي عليه نفس ردي علي محمود المصري تماما
ودي وجهة نظري
----------------
لكن الجزء بتاع
وباذن الله المشكلة دي بالذات هتنتهي زي ما كانت بتنتهي على مر التاريخ...وتكون الغوغائية هي الحل في النهاية...وطبعا الغلبة وقتها تكون للاكثر عددا...ثم بعدها ينقذ العقلاء - المتشددين الوهابيين - ما تبقى منهم من الفناء ومن ايدي العامة
--------------------------
مفهمتوش نهائيا
انهي مشكله اللي انتهت في التاريخ ورجعت تاني؟؟
تقصد تغيير الاديان؟؟وهو تغيير الدين انتهي؟؟
وتقصد ايه بالغوغائيه؟؟ الفوضي الاجتماعيه ولا حاجه تانية؟؟
هو الوهابيين المتشددين هما اللي ها يختفوا علي ايدي العامه ولا العكس؟؟
رأيي في تغيير الديانه كتبته في ردي علي وجهه نظري ممكن تقراه
اهلا بمرورك وتحياتي

بنت القمر يقول...

عباس العبد
=============
اولا اشكرك جدا انك شرحت لي الجزئيه دي
يعني لو واحد تحول الي المسيحيه والطرف التاني لا وعلي الرغم من ان جوازهم مش كنسي بس برضه مش زنا! ونحافظ علي كيان الاسره جميل جدا..
طب الراجل طلق الست الاولي ام بنته وراح اجوز واحده تانيه {خلي بالك الراجل المحامي غلوش علي الجوازة التانيه}واكتشفت تحوله للمسيحيه ورفضت تكمل معاه_غالبا عملهالها مفأجأه:)) واطلقت... طب ما هو برضه الراجل عمال يلعب من واحده لواحده لا بجواز كنسي ولا بطلاق.. يعني ده حلال.؟.. مش الحلال انه طالما مفيش اسره مسيحيه قابلاه زي ما بيقول
فلازم يتجوز كنسي بره مصر ولا المصريات المسلمات بس هما اللي لادين علي مزاجه!!
انا متعاطفتش مع الراجل ولا حسيت بصدقه وهنا للاسف بفتش في النوايا ومن ظاهر القصه... كل الحالات المتحوله من والي الاسلام مصدقتهاش ولا حسيت فيها بايمان حقيقي بالدين ده واو بالتاني الا يمكن الولد الي ابوة حول للاسلام وهو عاش طول عمرة مع امه واخواته مسيحيين.. الباقي كله يا مصالح لا انتقام وخلافات يا زي الاخ ماهر شيزوفرنيا
رأيي هو ردي علي وجهة نظري في موضوع تغيير الديانه ياريت تقراه
---------------------
بالنسبه لنقطه يعيش مسيحي في السر او العلن فاعتقد ان الراجل مش مصدق بيتر او ماهر ده وبيقول ان الايمان في القلب مش الورق ..ولكن يبقا التغيير حق انساني بس بضوابط وشروط عشان ما يبقاش الحكايه تهريج مش موضوع انه مستعر... وعموما هو الراجل مش ناوي يستشهد مسيحيا بيقول في الجزء التاني انه محضر ليه مخبأ:))
تابع الجزء التاني وادينا ها نشوف
تحياتي

بنت القمر يقول...

الطائر الحزين
=============
المشكله ان كل واحد شايف نفسه مهدي بشكل ما!!
-----------
السيد الفاضل احمد نظيف عامل مدونه سريه للريدرز بس علي ما يبدو:))
وال هما الساده زمايله الوزراء

بنت القمر يقول...

اسكندراني
=========
كلنا بنقول يا رب مش مفيش اي تفاؤل
هو بيرمي زوبعه في فنجان مش اكتر انه متواصل مع الشباب
بالنسبه للمكتبه كل حبه باكتشف فيها سقطات مش لطيفه لاني بمضي وقت طويل هناك... وبرضه بيرواقراطيه سواء في نظام العمل او التعامل مع الزوار
تحياتي

بنت القمر يقول...

زمزم العزيزة
=-=-=-=-=-=-=-
لازم تشوفي الجزء التاني يوم السبت والاعاده الحد
انا كمان متفقه معاكي مش استفاده لاي دين نخلي واحد فيه ضد رغبته
بالعكس
لكن لازم برضه نوضع شروط قاسيه ونمهل المتحول فترة طويله قبل ما ياخد ورق رسمي لانه الورق ب يتيح ليه حقوق اجتماعيه حسب دينه زي الزواج
الراجل ده نصاب لانه مصارحش الزوجه الاولي او التانيه بتحوله للمسيحيه وخلف وراه خراب اجتماعي ومشاكل دلوقتي عاوز المجتمع يحلها له وهو لو خد ورق مسيحي دلوقت بسابق جوازتين قايمين علي الغش من مسلمات معتقدش في اسره مسيحيه ها تديله بنتها!
---------------
موقف المحل... الست عارفه السعر والسعر مكتوب امال انا بقول عالم مجنون لية بس هي بتستعبط وقالت خمسين عشان يعاقبوا البياع والبياع دورة يساعدك بس في المقاس مش يخفض السعر
بس يا حبيبتي ده نوع جديد من رمي الجته:))
نورتيني

بنت القمر يقول...

عدي النهار
==========
مين اللي هايحاسبه؟؟
ربنا اللي ها يحاسب الجميع !!
الراجل شكله افاّق جدا لو كنت تعرف حاول تشوف الحلقه انا مش عارفه انت هنا ولا رجعت كندا ؟
قال عاوز يجوز في الحلال دلوقت ومش جواز مدني
طب كنت فين الجوازتين الاولانيين؟ وانت بتغش ايا كان دينك!!
نورتني وتحياتي

محمود المصرى يقول...

بسم الله الرحمن الرحيم

الاستاذة بنت القمر
مسألة ان حد الردة كان فى صدر الاسلام فقط فدا لا يصح ابدا , بدليل ان ابو بكر والصحابة قاتلوا المرتدين فى حروب الردة وهى اشهر من ان تحكى , ولا يمكن ان نقول ان حد الردة قد نسخ او الغى بعد ذلك لأن الوحى انتهى بوفاة الرسول .
بالنسبة لمسألة الاستتابة ايوة موجودة وثابتة , ولها صفتها ولا ننكرها ابدا , اما اللى الحد او انكر السنة او اتى ما يخرجه من الملة هو يطبق عليه حد الردة ايضا وبنفس الضوابط الثابتة فى الشرع , لكن واحد ملحد مع نفسه دا ماحدش يقدر يحاسبه زيه زى المنافقين اللى كانوا على عهد الرسول والصحابة الرسول لم يقيم عليهم حد الردة لأنه لم يقم عليهم الدليل الظاهر على ردتهم , وبالتالى لو واحد الحد ولم يعلن ولم يثبت عليه او تنصر ولم يثبت عليه فدا لا يقام عليه حد الردة , وانا متأكد ان الحدود لو طبقت فى صورة متكاملة هايفضل ناس كتييييييييير جدا جدا جدا وفى نفس الوقت هانحفظ حقوقهم .
بالنسبة لتعطيل حد السرقة فحد السرقة ايضا له ضوابط وشروط وموانع وهى لم تكن متوفرة فى فترة المجاعة وبالتالى لا يمكن تطبيق حد بدون تحقيق شروطه وانتفاء موانعه .
اما اللى قصدته بالتفاهة فهو ليس مسألة الردة فى ذاتها ولكن قضية تغيير خانة الديانة وليه حق ولا مالوش لأن المسألة محسومة اصلا وبالتالى الكلام فى ابعد من هذا هو امر لا يستحق .

عباس العبد
يا باشمهندس انا بس عاوز انقى الاجواء , يعنى مثلا واحد مسيحى مخنوق من مراته ومش قادر يطلق يقوم الواد يقول انا اسلمت تقوم مراته تطلب الانفصال عنه يقوم هو يرجع للمسيحية تانى علشان عاوز يتجوز , وكأن الاسلام ترانزيت او باب خلفى للتحايل على التشريعات المسيحية , فأحنا بنريح الكل اللى يدخل عندنا مش هايطلع قلت ايه ؟ يقوم اللى يدخل يدخل بجد واللى عاوز يروح للمسيحية لازم نتأكد انه مش منافق ولو ماكانش منافق اكيد هايكون مستعد للاستشهاد , دى غلطتى يعنى يا باشمهندس؟

كلام على بلاطة يقول...

بنت القمر تحياتى
بس استعباط الست
طيب الدنيا مليانة عبط واستعباط
تحياتىة

أبو عمر - الصارم الحاسم يقول...

بالنسبة لحد الردة

فأضيف على كلام الاخ محمود اني لا اجد علاقة بين تعطيل بعض الحدود لبعض الاوقات ..وبين ما نتكلم عنه على الاطلاق
!!!!!

عمر بن الخطاب عطل الحد - مش لغاه - عطله ولفترة مدودة لظرف معين

ولم يعطل كل الحدود بالمناسبة....فقط هذه الجزئية


ايه علاقة حد الردة وخاصة مع ما يحدث الآن وان الموضوع ده - الاستعباط واتخاذ الاسلام جسرا - زاد جدا

ده مطلوب الان تطبيق حد الردة اكثر من اي وقت


بالنسبة لبقية التعليق اللي حضرتك فهمتهوش....قأنا اثق في ذكائك اكثر من كده بكثير واعيدي قرائته ان احببتي وستفهميه باذن الله

او طنشيه وماتخديش في بالك
:)

... يقول...

المهم
هي اشترته بكام في الآخر
يارب يكون بخمسين
علشان يكون دة دليل قاطع علي ان الاستعباط هو سلو بلدنا

بنت القمر يقول...

محمود المصري
===========
اوك احترم وجهة نظرك لكن
والمنافقين ها نعمل فيهم ايه؟!
نورتني

بنت القمر يقول...

الصارم
============
انا مقلتش نعطل الحدود
انا بقول انه في تغييرات مجتمعيه تبيح تعطيل الحد
وبما انه المجتمع دلوقت مش مجتمع عدل ولا كفايه والناس بتموت بحثا عن الخبز يبقا يجوز والله اعلم نعطل الحد
رأيي قلته في الموضوع ده في ردي علي وجهة نظري
اعتقد اني يمكن اكون فهمت بس يمكن برضه مفهمتش:)
ويمكن مش عاوزة افهم علي مزاجي
وعموا اشكرك جدا

بنت القمر يقول...

كلام علي بلاطه
=================
ممكن بس ما ينفعش برضه!!
اشكرمرورك

بنت القمر يقول...

بثينه
======
لا مسألوش فيها
وكان شكلها قفا لان الكاشير مش ها يحط لها الفرق من جيبه:))
بس بجد الناس اتجننت
نورتيني

وميض ابتسامة يقول...

حكاية الاخ ماهر أوبيتر أو ايا كان ..انا شايف ان الغرض الواضح منها مجرد فرقعة أعلامية ..وتهييج للرأى العام وهذا هو أخطر ما فى الموضوع ... وياريت الاخ بيتر يفارقنا ويرجع مطرح ما جاء ويبطل التلاكيك بتاعته دى...وياريت يتلغى الجزء التانى الذى لن يقدم أو يؤخر من الامر شىء ..

اما بخصوص اجهزة الحاسب بمكتبة الاسكندرية وعدم وجود كليك يمين ..فيبدو انك برضه عرفتى تتصرفى فى النهاية لخبرتك فى هذا المجال ..المشكلة فى اللى مبيعرفوش يستعملوا الا الماوس ..وفى الحالة دى المطلوب منك شرح موجز للتصرف فى حالة عدم وجود "كليك يمين" فى أى جهاز فى أى مكان ..ولك الثواب..

اما الاخت المفاصلة اياها ..فيجب الاخذ فى الاعتبار انها قد تفتح بابا جديد فى دنيا الفصال والمقاوحة ورمى البلاء .. ولكن الاتتفقى معى ان الموضوع دخل فى مرحلة مصغرة من مراحل النصب !!!

تحياتى والسلام

عباس العبد يقول...

انا مقدرش احكم على النوايا , و كمان زى ما قلتلك ما شفتش الحلقة كلها , لن المحامى بتاع بيتر قليل الأدب و قليل الرباية و متعلمش فى حياته يعنى أيه حوار .
-
اما انه أتجوز تانى و هو مسيحى و من واحدة مسلمة فدى الصراحة مخدتش بالى منها , ممكن أكون طفيت التلفزيون ,
ده أبن كلب واطى أنه يعمل كده لأن بنات الناس مش لعبة , أعتقد ان هو ده السبب الى كان مخوفه من قصة الأشهار
و اما انى اتابع الجزء التانى , فربنا ما يكتبهالى , دول يجيبوا العلل , ده المحامى بامانة كرهنى فى المسيحيين كلهم , كرهنى فى ابويا علشان محامى زيه .
===

عاشــــــ النقاب ـقــــة"نونو" يقول...

السلام عليكم
غارقين في الهبل لرقبينا والله
تدوينة مجنونة
سلامتك يا حبيبتي
هدي نفسك علشان اهدى انا كمان لحسن الواحد دماغه هتفرقع
تحياتي