الخميس، سبتمبر 25، 2008

يهود مصر_الجروب والجاليه!

جروب علي الفايس بوك ليهود مصر!!... ورغم اعتقادي ان الدهشه اثناء تصفح الجديد من جروبات الفيس بوك باتت تقل بل تنعدم كل يوم
ولكن اعتقادي يخيب احيانا بوجود قدر مكن الدهشه لم اختبره بعد
بعد محاوله جاده لتنحيه جميع مشاعر الدهشه ومع ردع جميع المشاعر السلبيه التي تستدعيها الذاكره علي عجاله
حاولت ان ابحث بجديه خلف موضوع اليهود المصريين... ومع اعتقادي الذي ترسخه وسائل الاعلام وتغذيه ان اعداد اليهود لا يزيد عن 50 شخص فان عدد اعضاء الجروب 250 شخص!! يعني الجروب اكتر من عدد اليهود المصريين انفسهم!
وبغض النظر من الصورة السلبيه التي سوف تستدعيها ذاكرة البعض عن اليهودي ذو الانف المعقوف المرابي الذي يعمل في نشاط سري!
او الصورة الرومانسيه التي تستدعيها ذاكرة البعض عن اليهود ذو الدم الخفيف وسريع القفشه الممزوج بطيبه المصريين الذي يرحل عن مصر بدموع عنينه بسبب ثورة ناصر ابن الفلاحين بينما يودعه ابناء حارته من المصريين قائلين ترجع بالسلامه يا خواجه!! غمه وتنزاح!
تاركا شقته لخادمه او دكانه لجارة المسلم...تجد ان هؤلاء اليهود مش شويه عواجيز مهكعين رجلهم والقبر بل موقع علي الانترنت.... و لهم جمعيه مقرها نيويورك تهتم بأخبارهم وبتجميع افراد تلك الجاليه التي حسب الوقع زارها 790 عائله تهتم بجمع تراثهم وخطاباتهم وانتاجهم الحضاري والفكري باعتبارهم جزء من الدوله الصهيونيه ...ولكن في الشتات !!كما تقترح الجمعية جمع الوثائق المتناثرة في البلدة القديمة Geniza وذلك لتصنيفها وفصلها وأرشفتها وترجمتها كي يستخدمها الباحثون بمساعدة "الأرشيف المركزي لتاريخ الشعب اليهودي في إسرائيل"، كما وعد كل من بيت هاتيفوتسوت ومتحف يهود الشتات في تل أبيب بالتعاون مع الجمعية في هذا المشروع !
لهم موقف سياسي واضح ومعلن:نحن، اليهود المصريون، يجب ألا ننسى أن إسرائيل هي الدولة الوحيدة في الشرق الأوسط التي رحبت بنا بعد الشتات، وزودتنا بالجنسية والإقامة والعمل واستعادة الكرامة والحرية..
نسأل مصر أن تعترف بأن أفعال إسرائيل ضد الإرهاب ستصب في صالح الشعب اللبناني على المدى البعيد للتخلص من قبضة حزب الله الإرهابي."كما نشكر الرئيس جورج بوش على دعمه الثابت للدولة العبرية، وهو الثناء على الوضوح الأخلاقي..وتختتم الجمعية بيانها قائلة : "أننا نؤيد الشعب الإسرائيلي في هذه الحرب، ونوجه تعازينا إلى اسر الضحايا في إسرائيل والولايات المتحدة، ونعرب عن تمانينا بالشفاء العاجل لأولئك الذين جرحوا، ونأمل في نهاية سريعة لهذه الحرب وتحقيق الكلمات القدسية (الإلهية) : السلام على الولايات المتحدة وإسرائيل
ييمكن زيارة الموقع ومتبعه اخبار ومواقف مؤسسيه السياسيه
احد اقسام الموقع وضع هذا الرابط:Story of Egypt's Jews: Rich, complex, not yet over
يمكن تصفحه لنعرف ما هو الذي نوت اوفر ييت!!.... قصص الراحلين وعذاباتهم... واذا كان المنطق ان لا يحكم احد علي الاخرين في اهواءهم وانتمائاتهم ومشاعرهم وعلاقتهم بالله ولكن اذا كان الاخر قد اوضح موقفه بما لا يدع مجالا للشك... فيكون التعامي عن ذلك الموقف الصريح للجمعيه والمعلن هو دفن للرأس في الرمال!
الجروب الفيس بوكي نقل عن الموقع بل يكاد يكون هو لسان الموقع والجمعيه نفسها حتي صور الراحلين وقصصهم من نفس الجمعيه التي تسمي نفسها الجمعيه التاريخيه للطائفه الاسرائيليه في مصر... رغم ان قيام اسرائيل هو منذ60 سنه فقط!!
فهل كان تنبأ بقيام الدوله.. ام دعوة لها
تذكرت تعليق احد المتشنجين في احدي المعارك الفيس بوكيه... مخاطبا الاقباط المصريين بأن استكانتهم امام المد الاسلامي الوهابي العرعري... سينتهي بهم نفس نهايه اليهود المصريين خارج الوطن.... فتسائلت اذا كانت الجمعيه في نيويورك... فهل الجروب يهدف الي تأليب البعض علي البعض!!

هناك 35 تعليقًا:

زمان الوصل يقول...

دخلت الموقع :) و وجدته يتحدّث عن "ناديه هارون" ابنة المحامى "شحاته هارون" و تذكّرت أن "ناديه" كتبت كتابا عن والدها الراحل و عشقه لمصر

رحت دوّرت على اسم "ناديه هارون" و وجدت صفحه تتحدّث عن "شحاته هارون" على موقع "إسلام أون لاين" الذى يقول -وياللعجب- أن "هارون" كان معارض لاتفاقية "كامب ديفيد"

طبعا البعض قد يدفع بأن هذا كلّه تهجيص و محدّش يعرف ما تخفى الصدور لكن هذا نفسه هو ما يمنح الرجل ميزة الشك
ما كان مفاجئا -بالنسبة لى على الاقل- ما يذكره موقع اسلام اون لاين ان الجامعه العربيه هى التى قررت عام 1950 طرد اليهود العرب من الدول العربيه ممّا شكّل رافدا مهمّا من روافد المواطنين الذى غذّى الدوله الوليده "آنذاك" لكن ما كنت أفهمه دائما من المسلسلات أن اليهود هم من قرّروا الرحيل و ليس أن الجامعه العربيه طردتهم

بصوره شخصيه أرى أن دراسة تراث اليهود العرب فى هذه الفتره يشكّل مادّه بالغة الثراء .. ولا ألمّح طبعا إلى أن "شحاته هارون" هو الاستثناء الذى يمكن أن يمثّل القاعده .. لكن الفكره أن كثير من التشنّج -وربّما المغالطات- شابت تناول هذه الفتره من تاريخنا ممّا يجعل إلقاء نظرات جديده عليها شئ مستحب :)

مهندس مصري بيحب مصر يقول...

اول مرة اعرف الجروب ده

bluestone يقول...

طيب هو فيه كام نقطة كده

اولا يا ستي ايه علاقة الاقباط بالموضوع ؟
وبعدين احنا مش جالية اصلا ووضعنا مختلف

ثانيا: مصر كلها متخاف عليها من المد الوهابي المتطرف العرعري وهو غير الاسلام المعتدل حسبما اعرف يعني
كلنا خايفين او قلقانيين من المد المتطرف اللي جايلنا من حتت كتير

ثالثا: احنا حكينا في القصة دي قبل كده .. الله اعلم بالنوايا
بس انا قلت انه اجيال كتير ممكن تكون اتربت من اهلها على ان ليها مكان في مصر .. او ليها حق او ملك ما
اليهود لما خرجوا من المصر خوفا من الالمان كلهم سابوا املاكهم وحالهم وطفشوا ..

اكيد فيه ناس نقلت لاولادها عشقهم لمصر .. مصر اللي كانوا يعرفوها مش مصر دلوقتي اكيد

blackcairorose يقول...

لن اتكلم عن مدى مصداقية ان تعكس جماعة علىالانترنت او حتى جمعية مقرها نيويورك على المواقف والاراءالفعلية لجميع ابناء الطائفة اليهودية التى كانت فى مصر

ولن اتكلم ايضا عن لبس قائم حول هل هم اليهود الذين تركوا مصر ام انهم طردوا واجبروا على الخروج، ام انه فى فترات كان النزوح اختيارى وفى فترات اخرى كان اجبارى

ولن اتكلم عن منطقية ان تختلف المواقف السياسية لليهود المصريين عن بقية الشعب المصرى، مثلما هو منطقى بل ومحبذ ان نرى ان الامريكيين من اصول عربية اكثر تعاطفا مع القضية الفلسطينية اكثر بكثير من الامريكى العادى من اصل غير عربى، او مثلا ادانتنا الخفية حين نرى اوروبى مصرى يتبنى وجهة نظر أوروبية صرفة من قضايا نراها حساسة كالعمليات الانتحارية/الاستشهادية اوالموقف من الارهاب او او انطلاقا من اننا نرى انه نوع من الخيانة الا تنعكس جزء من هويتنا العربية او الاسلامية على مواقفنا

ولن اتكلم عن الرأى الشائك الخاص بهل ان الحقوق المنقوصة للمواطنين تؤدى منطقيا الى ضعف الانتماء ام لا


اقول لن اتكلم لان هذه الموضوعات تختلف فيها الاراء وانا شخصيا لم اصل لرأى حاسم فيها تماما

ولكن فقط سأذكر موقفا اقول انه فردى ولا يعكس حكما، وهو انى قابلت سيدة بيضاء من جنوب افريقيا لها محل لبيع الانتيكات فى جنوب افريقيا وحين تحادثنا اخبرتنى انها مصرية يهودية تركت مصر بعد العدوان وقالت انهم تلقوا امرا بالخروج فى خلال ايام من مصر وان الجو العام كان عدائى جدا ضد الاجانب بشكل عام واليهود بوجه خاص وان حتى اغلب المصريين اليونانيين تركوا مصر ايضا خلال نفس الفترة التى ترك فيها اليهود مصر

Hypatia يقول...

انا معنديش مشكله مع اليهود المصريين ولا عندي موقف محدد ناحيتهم
بالسلب ولا بالايجاب ولا باشكك فى حبهم لمصر ولا باعتب عليهم ولائهم لاسرائيل بالعكس هو ده المنطقي زي ما ولاء الشيعه لايران رغم انهم اكيد بيحبو ارضهم الام وده مش بيتعارض مع حبهم لايران وزي وحب واخلاص الفلسطينيين اللى فى الشتات لارضهم الام واللى مش بيتعارض مع حبهم للبلد اللى احتضنتهم هما واولادهم سواء كانت امريكا ولا الامارات ولا الكويت ولا مصر

الغريب فى الموضوع بس هو ان موضوع يهود مصر ده مظهرش على السطح غير اليومين دول بس

"شكل المدونه ده تحححححححفه يا بت يا مووون"

بنت القمر يقول...

زمان الوصل
==============
شوفي هنا

---------------------------
شوفي انا وانا بكتب البوست ده اخشي ما اخشاه ان اللي يقرا يفهم انه معادي لليهود
وده مش حقيقي ابدا
اللي طرد اليهود جامعه الدول او عبد الناصر او هما حسوا الجو عدائي
مش ده الفكرة
الفكرة في نقطتين
اولا ان الجمعيه المذكورة بتعتبر نفسها اكبر ممثل لليهود المصريين في الخارج وموقفها السياسي مؤيد لاسرائيل بشكل سافر!!
وده بيخلي الانسان ميقدرش يتعاطف مع الصورة النمطيه للشخص المحروم من بلده المهجر قصريا
وبيضرب انتماءهم للبلد في مقتل
لانه مش منطقي يكون الانتماء لبلدين متواجهين في ذات الوقت
يعني لو قامت حرب جديده الناس دي موقفها محدد ومع اسرائيل ككيانوالموقع بيؤكد كده
تانيا
بعض اليهود المصريين بيقولوا انهم ضد الجمعيه ومش بيعتبروا انها بتمثلهم
تالتا
دايما في المعارك الفيس بوكيه التي لا تقل ضرواه عن معارك الميدان بيحلو للبعض تاليب الاقباط علي المسلمين بأنهم مضطهدين محاربين والمد الوهابي ها يفضل وراهم لما يهجرهم زيهم زي اليهود تماما
بالاضافه الي انه طبعا في نسبه من الاقباط بتؤمن انه الاحتقان الحاصل طائفيا او سوء احوال البلد اقتصاديا هو معادله تعني تطفيشهم من البلد في الاخر
بمعني في ناس بتصطاد في الماء العكر
الموضوع ثري جدا دوري فيه

بنت القمر يقول...

مهندس مصري
-----------------
انا ضيفت لينك الجروب
وشوف هنا
وممكن تكتب جويس وتعمل سيرش في الفيس بوك هتلاقيهم متواجدين تماما كطوائف من كافه الدول العربية

بنت القمر يقول...

بلو العزيزة
===============
انا انقطع لساني وقال الاقباط جاليه؟!
الاقباط مواطنين = الموطنين المسلمين تماما
تانيا
مصر متخاف عليها من المد المتطرف اسلامي ومسيحي تماما وفيها حاله احتقان وتربص بيغذيه عوامل لقتصاديه وفقدان مشروع وطني وعوامل خارجيه و انهيار سياسي و..و..و
تالتا
انا مش بحكم علي النوايا اطلاقا
ومعنديش اي اعتراض انهم يكون البعض منهم ليه عشق او حنين لمصر
انا بقول من العنوان الجروب.. بتكلم عن الجمعيه تحديدا مش عن جمع اليهود المصريين عموما
وان كانت بتعتبر نفسها الواجهة اكبر ممثل لليهود المصريين في الخارج
لكن اسمحي لي انقل ردي علي زمان الوصل يوضح لك الصورة
-----------------------
شوفي انا وانا بكتب البوست ده اخشي ما اخشاه ان اللي يقرا يفهم انه معادي لليهود
وده مش حقيقي ابدا
اللي طرد اليهود جامعه الدول او عبد الناصر او هما حسوا الجو عدائي
مش ده الفكرة
الفكرة في نقطتين
اولا ان الجمعيه المذكورة بتعتبر نفسها اكبر ممثل لليهود المصريين في الخارج وموقفها السياسي مؤيد لاسرائيل بشكل سافر وواضح ولا يقبل االمواربه!!
وده بيخلي الانسان ميقدرش يتعاطف مع الصورة النمطيه للشخص المحروم من بلده المهجر قصريا
وبيضرب انتماءهم للبلد في مقتل
لانه مش منطقي يكون الانتماء لبلدين متواجهين في ذات الوقت
يعني لو قامت حرب جديده الناس دي موقفها محدد ومع اسرائيل ككيانوالموقع بيؤكد كده
تانيا
بعض اليهود المصريين بيقولوا انهم ضد الجمعيه ومش بيعتبروا انها بتمثلهم
تالتا
دايما في المعارك الفيس بوكيه التي لا تقل ضرواه عن معارك الميدان بيحلو للبعض تاليب الاقباط علي المسلمين بأنهم مضطهدين محاربين والمد الوهابي ها يفضل وراهم لما يهجرهم زيهم زي اليهود تماما
بالاضافه الي انه طبعا في نسبه من الاقباط بتؤمن انه الاحتقان الحاصل طائفيا مع سوء احوال البلد اقتصاديا هو معادله تعني تطفيشهم من البلد في الاخر!:(
بمعني في ناس بتصطاد في الماء العكرمتربصين بالجميع
تحياتي
تحياتي

بنت القمر يقول...

بلاك كايرو
==============
كل ده مش هنكلم فيه!!!!!!!!!
طيب:))
طبيعي الامريكي من اصل عربي يكون ليه موقف مختلف نظرا لجذورة العربيه
لكن لو في 11_9 امريكي عربي ايد بن لادن يبقا انتماءه الامريكي هنا في تلاتين داهيه
لانه بيؤيد قوة معاديه بتضرب وطنه ولو تفتكري في الفتره دي كان مجرد الشكل العربي تهمه في حد ذاتها مش التأييد الواضح لدوله معاديه زي الجمعيه دي
طبعا مع تأكيدي انها قد لا تكون بالضرورة معبره ومتحدثه باسم جمع اليهود المصريين الفصل هنا واضح ويا ريت تشوفي اللينك ده
----------------------
هنا
تحياتي.. وممكن نستكمل النقاش

بنت القمر يقول...

نسرين
==========
بت يا مون!!
ولا حيا ولا خشي كده... رافعه الكلفه خالص:))
----------------
انا كمان معنديش موقف من اليهود
لكن وها امشي مع المثل اللي ذكرتيه لو شيعي كويتي قامت حرب بين الكويت وايران وايد ايران يبقا توصيفه ايه؟؟
كويتي وطني ولا خاين؟!!
لو امريكي من اصل عربي ايد بن لادن مثلا يبقا توصيفه ايه والنظرة لي تكون ازاي.. مواطن امريكي صالح ولا عربي حقير وارهابي!!
ما ينفعش يكون في انتماء لبلدين متحاربين او متواجهين زي مصر واسرائيل
اقري اللينك اللي سيبته في ردي علي بلاك كايرو وها تشوفي ان الجمعيه{مش عموم اليهود} بتؤيد اسرائيل وانتماءها لها بشكل واضح وطبعا نصر الله ارهابي وبيشكروا اسرائيل التي منحتهم العزة والكرامه!!
نورتي

زمان الوصل يقول...

عزيزتى بنت القمر

أنا أعلم تماما أنّه لم يكن المقصود من البوست معاداة أحد و بالفعل لم يتسلّل إلىّ هذا الشعور إطلاقا .. كل ما هنالك أنّه كما قالت "زهرة القاهره" كنت أفكّر أنّا لا نعرف على وجه التحديد من تمثل المجموعه التى أطلقت الموقع على الإنترنت و من منحها تفوضيا بالحديث عن اليهود من أصول مصريه ..

ما قصدته من الإشاره لموضوع طرد اليهود كان مقصودا به أن بعض الأمور عنهم ربّما تكون قد وصلت إلينا بشكل مغلوط أو مخالف للحقيقه ممّا يجعل عملية جمع التراث هذه عمليه مفيده و منيره لبعض المناطق المعتمه فى تاريخنا بالطبع مع أخذ قدر من الاحتياط و التمحصي تجاه ما سوف نقرأه بهذا الشأن

أنا بالمناسبه باناقش الموضوع من وجهة نظر التاريخ لا الحاضر ولا المستقبل .. يعنى أحب أعرف عن تاريخ اليهود المصريين دون أن يعنى هذا ترحيبى بعودتهم إلى "مصر" لأنّى أظن أن أفكارهم الآن بشأن "مصر" و العرب بشكل عام مختلفه عن أفكار أجدادهم الذين كانوا يعيشون بمصر ..

طبعا سأستغرب كثيرا لو تقبّل الأقباط فكرة وضعهم و اليهود فى مقارنه أو مشابهه .. "إسرائيل" دوله قامت على أساس دينى و من ثمّ كان طبيعى تجتذب إليها المواطنين على أساس ديانتهم بينما الأقباط المصريين ليس لديهم نفس الحاله فمصر هى بلدهم .. بالعكس فيه منهم من يرى أن الفتح العربى ل "مصر" هو مجرّد غزو و من ثمّ هم أصحاب البلد الأصليين و مش همّا اللىّ مفروض يسيبوها ;) ف على رأى "أحمد زكى" فى "مدرسة المشاغبين" : أصل أنا وضعى مختلف :) قصدى الأقباط المصريين يعنى وضعهم مختلف عن اليهود :)

تحيّاتى على الموضوع الذى أتوقّع أن يحظى بمشاركات مثيره :)

Alkomi يقول...

انا هاقولك حاجة دلوقتي عالسريع و راجع

اليهود في مصر 50 بس ؟

اذا كان في اسكندرية حاليا بس 23 يهودي 3 رجال و 20 سيدات و انسات من مختلف الاعمار

و في مدينة طنطا يوجد حوالي 4 يهود

دول اللي اعرفهم على وجه الدقة

يعني اكيد هما اكتر في مصر كلها من 50

حاجة كمان الجروب مليان مسلمين و مسيحيين

nael eltoukhy يقول...

طبعا الجروب، وهو مش جديد بالمناسبة، مش معمول لليهود المصريين زي ما اسمه بيقول، وانما لليهود ذوي الاصول المصرية، وكلمة ايجبشن جوز دي للتبسيط على ما اعتقد. بيتهيالي انه بيقدم مادة ارشيفية اكتر من ممتازة لموضوع اليهود المصريين ومصيرهم بعد الخروج من مصر، ودا لسبب بسيط جدا، انه مهتم باليهودي المصري العادي، اللي لا هو رجل اعمال ولا كاتب ولا صحفي ولا فنان ولا سياسي، مش زي مثلا ما عمل جوئيل بنين، وهو يهودي لكن مش مصري، في كتابه "شتات اليهود المصريين" أو محمد أبو الغار في كتابه "يهود مصر من الازدهار إلى الشتات". أو حتى جاك حسون في كتابه "تايخ يهود وادي النيل"، وهو مصري يهودي اقام في فرنسا.

وطبعا كون ان عدد المشاركين في الجروب هو اكتر من عدد اليهود المصريين دا مش مفارقة اطلاقا، أولا: لان الجروب بيجمع الناس اللي هما الموضوع اللي بيتكلم عنه، والناس اللي مهتمين بالموضوع دا، ممكن واحد يعمل مثلا جروب للمحافظة على حيوان الباندا، هل ضروري يكون كل المشاركين من حيوانات الباندا؟ بيتهيالي لا، ممكن يكونوا بني ادمين كمان مهتمين بحيوان الباندا. وثانيا: لان المقصود مش اليهود المصريين –يعني اليودي اللي ف بطاقته الجنسية مصري – وانما لليهود ذوي الاصول المصرية، اللي هاجروا، على اسرائيل او فرنسا او البرازيل او غيرها.

ثانيا: حتة ان الواحد يبقى ولائه لبلدين متحاربين وكونك مش شايفاها منطقية فدا تفكير مبسط شوية، الواحد ممكن ولائه يبقى لعشر حاجات كلها بتحارب بعضها، وكل ولاء من دول شكل معين، لان الانسان، زي ما حضرتك عارفة اكيد، مش هو خانة الهوية اللي مكتوبة على البطاقة واللي مكتوب فيها بشكل واضح: مصري، أو إسرائيلي، أو أمريكي. ممكن انا مثلا اكون بحب والدي، وف نفس الوقت بحب عمي اللي عامل مشاكل مع والدي، لان مشاكلهم حاجة تخصهم، وانا ليا اللي يخصني، ممكن اكون شخص غير مبالي، وممكن اكون مش مقتنع بالمشكلة اساسا، وممكن اكون مقتنع بوجهة نظر كل واحد منهم لكن بحبهم هما الاتنين، القلب ومايريد بقى. هنعمل ايه!؟

لو انتي عايشة ومتجوزة في السعودية نقول مثلا من تلاتين سنة، وفجأة لقيتي السعودية قررت تضرب مصر، وانتي فجأة هف عليكي بيت العيلة القديم، والوالد والوالدة والشارع اللي كنتي بتمشي فيه تروحي المدرسة، وف لحظة من لحظات الحنين قمتي طلعتي الصور القديمة بتاعك ونزلتيلك دمعتين، لكن شوية وافتكرتي ان السعودية دي هي المكان الوحيد اللي انتي قدرتي تعيشي فيه مستريحة مع جوزك وولادك وقمتي سمعتي تهديدات مسئول مصري باننا سندمر الرياض ولن نبقي لها اثرا، وافتكرتي ولادك ومدرستهم وبيتك وجوزك والاماكن اللي حبيتيها في الرياض. هيبقى ولائك مع مين؟ البني ادم اكثر تعقيدا بكتير من بطاقته الشخصية

دي حالة كتير من اليهود المصريين، خصوصا طبعا الأقدم سنا اللي عاشوا ف مصر واللي كانوا بيسمعوا ام كلثوم سرا لما راحوا على اسرائيل، لانها ممنوعة هناك بسبب غنائها للثورة، زي ما بيتضح مثلا من فيلم "سلطة بلدي" للمخرجة المصرية نادية كامل" او فيلم تاني - مش فاكر اسمه - للمخرجة الاسرائيلية سيجاليت بناي، والاتنين بيتكلموا عن اليهود المصريين اللي هاجروا على اسرائيل، وهو تصرف ، اقصد الهجرة على اسرائيل، كان طبيعي جدا وقتها بالنسبة لهم، وماحدش قدر يمنع نفسه عنه الا اليساريين الكبار، يوسف درويش مثلا الله يرحمه اللي مات من سنتين تقريبا – هو جد الفنانة بسمة بالمناسبة دي – هنري كورييل وجاك حسون صاحب عبارة "أنا مصري لأنني يهودي وأنا يهودي لأنني مصري"، هاجرت على اماكن تانية غير اسرائيل لان كان ليها مصالح وقرايب هناك، واللي مالوش، هاجر على اسرائيل.

طبعا اليهود المصريين ماكانوش جزء واحد، كان فيه قرائين، اللي كانوا مقيمين ف حارة اليهود وكانوا غلابة وبيتكلموا عربي وماتفرقيهمش عن المسلمين، وفيه الربانين، اللي كانوا بيتكلموا فرنساوي وكان تعليمهم غربي وبيتقال عليهم خواجات وكانوا بيبصوا لولاد البلد، المسلمين يعني، باستغراب. وبالمناسبة الظريفة دي، حالة الاستغراب اليهودي (الرباني) لولاد البلد ممكن تلقيها عند كاتبتين يهوديتين مصرييتين هاجرتا الى اسرائيل، الاول هي جاكلين كهنوف في كتاب بعنوان "ممزراح هاشيميش"، والثانية هي عادا أهاروني في رسالة نشرتها بصحيفة هارتس بعنوان دال جدا بتخاطب فيه صديقة طفولتها: "خطاب إلى قدرية: من حيفا إلى القاهرة بكل الحب"، دا بينما كان اليهود القرائين متكربسين فوق بعضهم ف حارة اليهود من الغلب، زيهم زي المسلمين بالزبط، زي ما قلت. وبيتهيالي ان الطايفة دي، طايفة القرائين، هي اللي خرج منها اليهود الاكثر مشاركة في الاحداث العامة وف تاريخ الوطن، لان لغتهم العربية ماكانتش بتمنعهم عن دا، ممكن نفتكر مثلا عيلة زكي ومنير وليلى مراد، ويعقوب صنوع وغيرهم.


اخيرا، بلو ستون قالت: ايه علاقة الاقباط بالموضوع. الاقباط مش جالية وعمرهم ماكانوا جالية ووضعهم مختلف، اكيد، ف نبرتها حسيت بحاجة بتقول: اليهود طايفة لكن الاقباط لا، الاقباط مش زي اليهود. رايي مختلف شوية، بما اني بنزعج جدا من اي حديث عن الدين بوصفه هوية، فانا مش مستعد اتقبل ابدا فكرة ان الاقباط (وهنا بستعمل الكلمة بمعنى مسيحيي مصر مش بمعنى المصريين) هم اهل البلد الاصليين والمسلمين جم بعد كدا مع عمرو بن العاص وف الاخر خالص جم اليهود بعد طردهم من الاندلس. مش شايف ان دي وجهة نظر سليمة لانها بتستثني اليهود من تاريخ البلد اللي احنا عايشين فيه، بتخليهم مش مصريين ومجرد "طايفة"، ودا بناء على فكرة مش ظريفة: مين اللي جا على التاني. وان العساكر المستجدين برة الحسابات والعساكر الاقدم هما دول الوطن. من ناحية البطاقة الشخصية، فيه يهود كتير كانوا مصريين، وفيه يهود كتير كانوا بلا جنسية، لسببين، اما لتجاهل السلطة المصرية برغم مطالبات عنيدة من رؤساء الطايفة بتحديد وضعهم وجنسيتهم، او احيانا بسبب رفض بعض اليهود الحصول على الجنسية المصرية علشان يفضلوا يتمتعوا بالامتيازات الاجنبية. بمعنى تاني، كان فيه يهود (مصريين) كتير، وكان فيه يهود يتمنو يبقوا مصريين، قانونا، زي ما هما مصريين ثقافة، وكان فيه استثناءات كتيرة، زي كل حاجة ف الدنيا،
سوري بلو ستون: اتدخلت ف نواياكي شوية، عموما يارب اكون فهمت غلط

سوري بنت القمر، رغيت شوية، شوية كتير. وعلشان يبقى كلامي واضح، انا مباقولش هنا خالص انك ضد دين بعينه او معادية لليهود، انا ركزت بس على فكرة ان الانسان مش ممكن يبقى له ولائين لبلدين بيحاربوابعض، الرد على الفكرة دي هي اساس التعليق بتاعي

mido يقول...

استكانتهم امام المد الاسلامي الوهابي العرعري
:) :)

يعنى ايه عرعرى؟

على حد علمى ده نوع من أنواع الشجر , بس أنا أول مرة اسمع الوصف ده :)

بنت القمر يقول...

زمان الوصل
==============
كنت أفكّر أنّا لا نعرف على وجه التحديد من تمثل المجموعه التى أطلقت الموقع على الإنترنت و من منحها تفوضيا بالحديث عن اليهود من أصول مصرية
----------
This organization shall be known as HISTORICAL SOCIETY OF JEWS FROM EGYPT, and not of Egypt or of Egyptian Jews, but FROM EGYPT for the purpose will be to include all our co-religionists whose lineage have sojourned in the Jewish Communities of Egypt.
------------------------
ده من الصفحة الرئيسه... جميع اليهود من اصول مصريه... مش اليهود المصريين اللذين ما يزالون يقيمون في مصر
-----
مسأله التراث الذي يبنغي ان نعرفه ففي الموقع كلام لطيف خالص عن اختراع شبيه لميكي ماوس في القاهرة كشخصيه كرتونيه سنه 1930اخترعها السيدفرينكل
الشخصيه اسمها مشمش افندي.. وترتدي طربوش عاده البهوات تلك الفترة
لالالا دا موقع دماغ ولطيف خالص.:)).. وده مش معناه نفي صفه الابداع عن اليهود المصريين لكن يبقي الامر في حيز الكلام المرسل الغيرمعروف او مؤكد
مشمش اليهودي
--------
كذلك وجودهم في مجمع اللغه العربيه وغيرها من المؤسسات المصريه
مسأله انا وضعي مختلف واعتبار الاقباط انفسهم زي اليهود
لا طبعا هما مش بيعتبروا نفسهم زي اليهود ... ولا زي المسلمين حتي:))))
مسأله الاقدميه التاريخيه.. ومن له الحق قبل مين حديث طويل لا نهايه له
واذا كام دخول الاسلام مرتبط بالغزو العربي فدخول المسيحيه وتحول المصريين لها بكثافه بعدعصر الاستشهاد المسيحي وبعد تحول قسطنطين الي المسيحيه صاحبها ايضا احداث دمويه عنيفه ضد ابناء الديانه القديمه ديانه رع وسيرابيس(مذابح) وان كان الاحداث عن تلك الفترة خافتا او معدوما لان المتضرر مني اصبح في ذمه الله والتاريخ
لو حبيتي اكتبي مقتل هيباتيا في حجر السيد جوجل ستجدي المزيد:))
نورتي

بنت القمر يقول...

محمد الكومي
==============
انا كمان ها ارد علي السريع عشان الوقت أزف وكده يعني..
---------
اليهود في مصر 50 بس ؟
اذا كان في اسكندرية حاليا بس 23 يهودي 3 رجال و 20 سيدات و انسات من مختلف الاعمار
و في مدينة طنطا يوجد حوالي 4 يهود
دول اللي اعرفهم على وجه الدقة
_-----------
علي الوجه الدقه هما حوالي 50 بس انا علي وجه الدقه معرفهمش ولا عديتهم ودي اصلا مش نقطه خلافيه!!
الجروب في مسلمين ومسيحين
_ عارفه...
ما انا شفت الميمبرز اكيد:))
وعارفه انهم مسلمين ومسيحيين وانا قلت حاجه ولا قلت دول سيرينا اهاروني ووشارل سمحون
----------
الفكرة في العدد لما قلت 250 وطبعا لاني معرفش الاعضاء كلهم علي وجه الدقه!! برضه فامعنديش اي تصنيف ولا توصيف ليهم اطلاقا مجرد ناس مهتمه مش اكتر واكيد كل واحد ليه سبب مختلف عشان ينضم ويهتم..هو الللي يتسأل عنه
مش انا
اشكرك

بنت القمر يقول...

nael
========
حلوة حكايه الباندا دي:))
انا لما اتكلمت عن عدد اعضاء الجروب كنت اقصد ان اليهود المتبقيين في مصر في حكم المنقرضين بسبب المرحله العمريه اللي هما فيها وقله العدد وغيره
اما الجزء الاخر من اليهود من اصول مصريه المهاجرين فالحقيقه انا ماعنديش اي حصر ليهم لا من ناحيه العدد ولا الدول التي استقروا فيها ولا اي بيانات محددة
وطبعا مش كلهم مهتمين بنفس الدرجه بوطنهم الاصلي ولا بتاريخ اباءهم او اجداهم بدرجه واحده
--------
قضيه الانتماء وهنا ممكن ترغي براحتك خالص
لو تسمحي ممكن اوضح لك وجهة نظري فيها... وطبعا هي خاصه وغير ملزمه لغيري
الهويه والتي تحدد الانتماء بصورة تلقائيه هي مجموعه العوامل المحدده لشخصيه اي فرد منها اللغه والدين والجنس والدين والوطن و.. و..
هذه العوامل{في رأيي} ليس ما اولد عليه فقط ولكن ما ارغب ان اكونه ايضا!! بل هي ما ارغبه بالدرجة الاولي!!
بمعني انا مثلا هويتي اللغويه هي العربيه تعليمي هو الفرنسي وطول الوقت بتكلم بالفرنسيه مع اسرتي وبقرا الادب الفرنسي اكتر من العربي ورغم ان لغتي الام هي العربيه لكن هويتي اللغويه والتي تحدد هويتي الثقافيه تباعا هي الفرنسيه اذن انا فرنسيه الثقافه واللغه
متال تاني انا انسان في جسد انثي اذن هويتي الجنسيه هي انثي لكن انا اكره هذا الجسد ليل ونهار واتصرف كرجل ارغب بكل الطرق ان احيا كرجل اذن هويتي هي ليست في الجسد ولكن ما ارغبه وما اريده
مثال تالت انا مسلمه ولكن خلايا دماغي ترفض الاسلام وتكره مفرداته ولا تطيق صوت الاذان مثلا او القران او.. او... اذن لا يمكن ان تكون هويتي سوي ما ارغب ان اكون
موضوع اليهود. اذا كان اليهودي من اصل مصري يرغب ويتوق الي ان يكون مواطن اسرائيلي اذن ولائه وانتماءه الي اسرائيل مشاعره وعواطفه معها... شفا علي قلبه!
حكايه الولاء المزدوج اللي انت دللت عليها بالخلاف بين الاب والعم... طبعا انا عارفه ومتأكده ان المشاعر الانسانيه اكثر تعقيدا من ما نتخيل لكن لو كان ولائك منقسما بين الاب والعم مع حبك لكل منهما ففي لحظه معينه تستطيع حسم هذا الصراع الداخلي
في اللحظه التي يتقاتل فيها الاب والعم علي الميراث ويرفعان السلاح حينها فقط سوف تختار احدهما وستضطر الي حسم تلك الحيرة وترجيح كفه علي اخري
تعقيبك علي كلام بلو.. طبعا مش ها اتكلم عن لسانها.. فاعتقد انه في بلد زي مصر شديدة التداخل اللغوي والحضاري والثقافي متنوعه التراكمات الحضاريه فمفيش حد يقدر يحدد مين الاصلي ومين الدخيل.. ومش شايفه اهميه لكده
طالما الاخر يعتبر نفسه مصري حتي النخاع فمن له الحق ان ينزع عنه تلك الهويه!! والا ندخل بقا في تطهير عرقي وتبقا حاجه لطيفه بقا
الجمله العبقريه والتي تلخص رأييفي موضوع الهويه والانتماء لو لم اكن مصريا لوددت... لوددت ان اكون مصريا!
بمعني هويتي ليست ما ولدت عليه ولكن ما ارغبه
وحين يعلن اليهودي من اصل مصري ولائه وهويته الي اسرائيل التي منحته العزة والكرامه فهو يحدد خياره بشكل واضح لا لبس فيه ولا مجال للحديث عن المشاعر المعقده... فالامر بين كالشمس
ان قامت الحرب الكل يعرف في اي خندق سيكون وبالنسبه للموقع بتاع الجمعيه فهو قد حدد توجهه وولائه تماما
يقول د_ ابراهيم بحراوي
--------
أن هذا الاتجاه يعبر عن موقف أيدولوجي صهيوني يعتبر أن أي يهودي في أي مكان في العالم ليس منتميا للوطن الذي عاش فيه أعمالا للفكرة القائلة "شعب يهودي واحد في إطار الحركة الصهيونية". فهم يقومون بنزع اليهودي من سياقه الوطني، علما بأن اليهودي المصري مثله مثل المسيحي المصري مثل المسلم المصري مثل أي طائفة مصرية أخرى، وبالتالي فكل إنتاجهم الفكري والثقافي هو ملكية مصرية خالصة.
ومن ثم لا يمكن أن يأتي أي عنصر خارجي ويزعم أن له حق في هذه الآثار ويطالب بنقلها خارج مصر. فهي جزء من التاريخ المصر وجزء من حقوق المواطنة المصرية. ومثلما لا يجوز أن تأتى ايطاليا على سبيل المثال وتطالب بأي آثار تم إنتاجها على الأراضي المصرية في العصر الروماني.
تحياتي... اشكرك

بنت القمر يقول...

ميدو
==========
التوصيف مش لياده توصيف ساخر لمن برفضون هذا المد التوصيف الديني مالي الفيس بوك وبعض المدونات الرافضه او المتخوفه من المد الديني والتي تربطه بالسعوديه.... العهده علي اصحابه مش عليا
تحياتي

عدى النهار يقول...

متابع التعليقات والتعقيبات والذى منه.. ليه بطلتي نفخ فى الزبادي؟

blackcairorose يقول...

بنت القمر

اعتقد ان مثال 11 سبتمبر مختلف كتير، والمقابل له أن تقوم اسرائيل بانشاء دولتها على ارض مصرية او تقوم بضرب القاهرة فى حرب 48

وربما أيضا الامثلة التى طرحتها فى تعليقى السابق ليست دقيقة تماما، ولكن ما وودت قوله أننا نرحب ونشجع ونؤيد ان تكون للجاليات العربية فى الغرب مواقف مختلفة عن حكومات بلادها وأكثر تاييدا وتعاطفا مع القضايا العربية، لكن فى نفس الوقت ندين نفس الموقف اذا اتخذه اليهود المصريين مثلا ازاء اسرائيل وجودا وسياسة

لدى ايضا ملاحظة انه من غير الصواب ان نحكم على مواقف حالية لابناء الجالية اليهودية المصرية باثر رجعى عمره خمسين او ستين سنة، لانه ببساطة خلال هذه الفترة حتى العرب اصبحوا اقل عداءا لاسرائيل، فمن المنطقى اذا ان المواقف الحالية لليهود من اصل مصرى هى اكثر تأييدا لاسرائيل عن مواقفهم من خمسين او ستين سنه

ففى غياب وثائق وتأريخ موضوعى ومحايد ودقيق، استطيع ان اقول انه ربما كان هناك العديد من اليهود الذين لا يؤيدون تماما وجود اسرائيل، او لا يؤيدون سياساتها فى المنطقة أو أو ولكن بمرور الزمن وتركهم مصر وسواء هجرتهم لاسرائيل او لدول اخرى اخذت مواقفهم تتغير بشكل تدريجة وطبيعى، ومن ثم لا يمكن ان نقيم صحة او عدم صحة مواقفهم الا لو علمنا ماذا كانت هذه المواقف بالتحديد فى 1948 او فى 1956 ، وليس مواقفهم فى 2008

واطيب تحية

غير معرف يقول...

200 يهودى فى مصر .. و790 عائلة فى الشتات .. فى الواقع هى ارقام ليست خطيرة وان كانت فاعلة ..

يلفت نظرى فى عصرنا الحديث موضوع الهوية والانتماء.. فهى ان كانت فى القديم محددة نظرا للملامح الحادة التى توضح وتميز كل ثقافة على حدة وبالتالى كل هوية ..

الا ان هذا لم يعد له وجود خطير الآن .. لان الولاء الان اصبح يتحكم فيه عوامل متعددة بحيث اضحى اقرب لفكرة العولمة ..

ومن هنا لاتجدىن تصنيفا شافيا او نهائياعلى اساس عرقى او دينى او جنسى .. ربما كان ذلك فى مسلسل roots بمعنى انك لن تجدى انسان جاد فى البحث عن جده الرابع الا اذا كان من وراء ذلك مصلحة مباشرة ..

السؤال بسيط .. لماذا لايذهب كل اليهود الى اسرائيل؟ لان هناك انتماءات اخرى الى الاماكن التى فيها المصالح والمعايش وهكذا .. هناك ايضا اولاد من اسرائيليات وآباء مصريين .. فكيف نفسر الانتماء موضوعيا وليس عاطفيا ..

عمر الشريف له ابنان الاول مصرى والثانى يهودى .. هم اخوات .. وهكذا نحن واقعون فى مطب كويتى شيعى او سنى .. واميركى من اصل عربى او غربى وهكذا ..

فى اعتقادى ان كل هذه المنتديات بعد فترة لااظن انها بعيدة ستذوب لان تعقيدات الواقع ومتطلبات كل انسان على وجه الارض تقتضى ان يعيش العالم فى أمان أكثر ويتلاحم .. مهما كانت التعصبات والتشنجات التى نلاحظها اليوم .. لانها ببساطة لاتحل شيئا .. وكل شئ لايؤدى الى ماتعلمناه من السياسة وغيرها
a win - win situation
مآله الى زوال حتى لو حاول االطرف الاقوى فرض رأيه .. ستظل أى قرادة تؤرق نوم الكلب وهو الذى ان طالها سينهشها بانيابه .. الحل .. ان تدعه فى حاله..

ذهبت بعيدا .. واعتذر لذلك

بنت القمر يقول...

عدي انهار
=============
اللابد خلف عيدان الذرة!!...جت لك شكاوي مني ولا ايه؟
والله ما عملت حاجه لحد اهه... وانا كل ما افتح بقي ازعل حد ولا ايه:))
طب ما تدلو معانا بدلوك اهو تنورنا برضك

بنت القمر يقول...

بلاك كايرو
-------------
اعتقد ان مثال 11 سبتمبر مختلف كتير، والمقابل له أن تقوم اسرائيل بانشاء دولتها على ارض مصرية او تقوم بضرب القاهرة فى حرب 48
-------------------------
اعتقد ان اسرائيل قد قامت علي اجزاء من ارض مصر... سيناءفي البدايه
وقد ضربت في سنوات الصراع مدن مصريه مش لازم تكون القاهرة +ضربت مدن القناه مثلا وضربت الاسماعليه تحديدا
ومش لازم 48 لكن في 56 و67
يعني الحرب مستمرة وممتده... وده اللي قدروا عليه
======================
أننا نرحب ونشجع ونؤيد ان تكون للجاليات العربية فى الغرب مواقف مختلفة عن حكومات بلادها وأكثر تاييدا وتعاطفا مع القضايا العربية، لكن فى نفس الوقت ندين نفس الموقف اذا اتخذه اليهود المصريين مثلا ازاء اسرائيل وجودا وسياسة
لدى ايضا ملاحظة انه من غير الصواب ان نحكم على مواقف حالية لابناء الجالية اليهودية المصرية باثر رجعى عمره خمسين او ستين سنة، لانه ببساطة خلال هذه الفترة حتى العرب اصبحوا اقل عداءا لاسرائيل، فمن المنطقى اذا ان المواقف الحالية لليهود من اصل مصرى هى اكثر تأييدا لاسرائيل عن مواقفهم من خمسين او ستين سنه
====================
ومين قال اني طلبت من اليهود ذوي الاصول المصريه انهم ياخدوا موقف قومي ثوري او يتبنوا مشروع مقاوم ضد الصهيونيه
انا مقلتش كده اطلاقااااااا
انا بقول ان الناس دي في مهجرها قاعدة ومبسوطه ومرتاحه ومستقره ومحدده ولائها غالبا للدول التي فيها ولاسرائيل حسب كل حاله
وانه لو كانت الجمعيه تنطق بكل اليهود ذوي الاصول المصريه اذن فقد حددوا موقفهم وولائهم بكل وضوح
حكايه اللعب بالشوارع اللي وحشاهم ومشافوهاش من 50 سنه تثير القلق والتشكك كثيرا!
وكذلك اللعب بالخمسين تيته وجدو الفاضلين هنا... موضع مش مريح
الموضوع من رسائل الجمعيه لا يبدو اطلاقا شوق بعض المهاجرين اوحنينهم للبلد الللي مشافوهاش من 50 سنه ولكن في ابعاد واضحه ومحدده لعمل الجمعيه
------------
وده تفسير مطالبهم وطريقه عمل الجمعيه من احداساتذة الاسرائيليات
----------------
أن هذا الاتجاه يعبر عن موقف أيدولوجي صهيوني يعتبر أن أي يهودي في أي مكان في العالم ليس منتميا للوطن الذي عاش فيه أعمالا للفكرة القائلة "شعب يهودي واحد في إطار الحركة الصهيونية". فهم يقومون بنزع اليهودي من سياقه الوطني، علما بأن اليهودي المصري مثله مثل المسيحي المصري مثل المسلم المصري مثل أي طائفة مصرية أخرى، وبالتالي فكل إنتاجهم الفكري والثقافي هو ملكية مصرية خالصة.
ومن ثم لا يمكن أن يأتي أي عنصر خارجي ويزعم أن له حق في هذه الآثار ويطالب بنقلها خارج مصر. فهي جزء من التاريخ المصر وجزء من حقوق المواطنة المصرية. ومثلما لا يجوز أن تأتى ايطاليا على سبيل المثال وتطالب بأي آثار تم إنتاجها على الأراضي المصرية في العصر الروماني
يا ريت اكون واضحه يا روز
نورتيني

بنت القمر يقول...

شريف
=========
طبعا محدش بيدور علي بيت جده الرابع الا اذا كان تحته كنز!
او عشان يقرف جيران جده مثلا
اتفق معاك انه في مصلحه من نبش موضوع اليهود المصريين الذي يعلو الحديث عنه او يخفت بين الحين والاخر
مرة بطلب تعويضات ومرة اخري بالحفاظ علي اثارهم وتراثهم.. وحكايه التراث دي عليها تحفظات وعلامات استفهام لان المطلوب من الجمعيه وهدفها هو خلق تراث له كيان منفصل يسهل نزعه ولحمه مه تراثات اخري تجتمع فقط في انها تراثات ليهود وليس لمصريين يهودي
الموقع مليان ... خد وقتك فيه واتفرج
كمان الجمعيه وده احساس بتقدم بصورة مباشره ان اليهود كانوا من الالمعيين اصحاب الرياده والتفوق في الفن والموسيقي و..و...
وده بيفتح المجال انك تقول بقا الموسيقي اليهوديه والفن اليهودي وتبقا بقا هيصه... مش كرافد من روافد الفن المصري... اشكرك

blackcairorose يقول...

بالمناسبة يا بنت القمر

موضوع التعويضات لليهود الذين اجبروا فى الماضى على ترك الدول العربية او تم تأميم ممتلكاتهم وبالتالى رحلوا من هذه الدول سيتم فتحه آجلا ام عاجلا

يمكن الان يتم ذكره على استحياء نظرا لان التركيز الاكبر على تعويضات الفلسطنيين الذين اجبروا على المغادرة، ولكن الدور فى مرحلة ما سيأتى على ممتلكات اليهود أيضا الذين غادروا

هذا ما اعتقده، دون ان اعنى بهذا أن أية مشاعر حنين لليهود الذين غادروا هى بالضرورة تمهيد لهذا الموضوع

nael eltoukhy يقول...

طبعا محدش بيدور علي بيت جده الرابع الا اذا كان تحته كنز!
او عشان يقرف جيران جده مثلا



ودا بينطبق على الفلسطينيين ومناداتهم بحق العودة، هم الذين تم تهجيرهم من قراهم ومدنهم في الأعوام من47-49؟؟

_______________

ذو الوجه المبتسم يقول...

كل سنة وانتى طيبة
عيد مبارك عليك

عدى النهار يقول...

بالا جروب بالا جالية بأه :) كل سنة وإنتي طيبة وعيد سعيد على الجميع إنشاء الله

ياريت يكون البيتي فور والكحك والغريبة والبسكويت طلعوا كويسين.. بالهنا والشفا
:)

بنت القمر يقول...

بلاك كايرو
===============
عندك حق تماما الموضوعين نرتبطين ببعض جدا
ومفيش مشكله ان الحديث عن الحنين يعني المطالبه بالتعويض ده مش غلط ابدا
كل مضار لازم يحصل علي تعويض
الحديث بعلو ويخفت عن حقوق اليهود المصريين
مش بالمقارنه ابدا بحقوق الفلسطينين لكن يمكن بسبب القله العدديه لليهود بالمقارنة بالمصريين
لكن في هنا فارق مهم ومش لازم ننساه ان من طرد اليهود المصريين هم مصريين اخرين اما من طرد الفلسطينين فهم غرباء مش اصحاب نفس الارض ولا شركاء وطن بأي صورة ولا اقاموا دوله عنصريه علي انقاض دولتهم
نورتي وكل سنه وانت طيبه

بنت القمر يقول...

nael
======
لا بجد بجد يعني خليتني افكر في تلك المقاربه من باب احقاق الحق
بس ممكن انا اسألك طالما انت بتسم في بدني وتفكرني بانهم اصحاب حق زي الفلسطينين 47_49
هل حضرتك شايف ان المصريين لما خرجوا اليهود المصريين بعد الثورة معززين مكرمين في طائرات تقلهم الي حيث ارادوا = كيفيه خروج الفلسطينين من اراضيهم بمذابح تملا الكتب
هل ممكن نقدر نقارن دوله قديمه وعريقه زي مصر بتخسر حرب 48امام دوله زي اسرائيل وبعدين بتقوم فيها ثورة جديده وحكم لازم يستقر وبتواجه كيان حديث ومزروع ومضطره تطرد اليهود المصريين
بنساويها بعصابات مستجلبه من انحاء اوروبا بتطرد اصحاب الارض الاصليين وبتقيم كيان جديد ودوله جديده علي اساس عنصري وهويه دينيه
هل الطرد ده يساوي ده
الحقيقه كنت ناويه اعتذر واشوف تعليقي شابته بعض العنصريه
لكن راجعت نفسي
وحتي في حاله حصولهم علي تعويض وده حق اساسي لهم
هل ممكن يطالبوا بحق عودة لمصر
المنطق بيقول من حقهم والعقل والانصاف
لكن ها ارجع تاني لنقطه الهويه والانتماء
يعني انت تخيل كده جماعه يهود مصريين راجعين من اي مكان من العالم ورجعوا بيوتهم في مصر وحصلوا علي تعويضات
وبعدين قعدوا يبعتوا للبيت الابيض عن معاملتهم باضطهاد او عن عدم دخولهم البرلمان المصري والوزرات وعدم احقيتهم في بناء بيوت عباده
وبقيه مطالبات اي اقليه
هل شايف انه هنا ونظرا للظروف الدوليه والمواجهة المستمرة بين دول العربيه واسرائيل في مجال لتقبلهم؟؟!!
ها يكون وضعهم طبيعي
في فرق بين الصحيح والممكن
مش كل يهودي خائن ومتهم بالعماله ولكن اكيدة مش كل يهودي ها يرجع من دوله استقرفيها 56 سنه بقي له فيها كيان وارتباط اقتصادي واسره ها يرجع لبلد جده الرابع لمجرد الحنين وحديث الذكريات
تحياتي

بنت القمر يقول...

عدي النهار
================
وانت بالصحه والسلامه
الكحك جاهز والبسكوتات بيتي
:))
ما تتخمش اوي فيا
عيد سعيد

Unknown يقول...

بصى هو ممكن يكون فيه يهود مسالمين كل الى بيفكروا فيه انهم يرجعوا البلد الى اتولدوا فيها و خلاص
وممكن يكون اعضاء الجروب ال280 دول فيه ناس مش يهود اشتركوا فيه بس من باب الفضول عشان يشوفوا الجروب ده فيه ايه

و ارجع اقولك اى خطر بيهدد البلد دى مش جاى من برة جاى من جوة بجهله اهله و سلبيتهم و عنطزتهم فى المشاكل الى حتودينا فى داهية باذن بالله

Unknown يقول...

نسيت اقولك كل سنة و انتى طيبة عيد سعيد

الازهرى يقول...

العزيزة بنت القمر

موضوع جميل وشائق وشائك
تحياتى الى كل من شارك فى المناقشة الراقية التى قرأتها هنا
فقد اضافت لى الكثير سواء من ناحية المعلومات او المعانى

وكل سنة والجميع بخير

Alkomi يقول...

بصي يا بنت القمر

انا جمعتلك شوية معلومات تانية عن اليهود المصريين بس ربك و الحق مش كلها اكيدة

بعد قيام الثورة لم يهاجر كل اليهود و بقى بعضهم و لكن بعيد عن القاهرة و اسكندرية

و بعضهم تخفي و انتقل للصعيد تحت ستار مسيحي

و يقال ان بع العائلات الثرية في مصر الان هي نسل اليهود اللي ماعاجروش

و مسالة العوة دي مش جديدة

هما من بعد كامب ديفيد مصدعين دماغ مصربحكاية حق العوة

و المسمار الجاي لو حد من اللياتاممت املاكه خد حكم باسردادها ساعتها الورثة و من بينهم اليهود طبعا هيرجعوا عالحكومة المصرية بالتعويض

يعني هي مش مسالة عودة اد ما هي مسالة خراب مستعجل ناويين يجيبوه للبلد