الأحد، نوفمبر 30، 2008

كلام كبير

ان تكون نصابا محترفا تسرق الاخرين شيئ عادي لكن ان لا تكون ماهرا في نصبك فأنت تثير ضيقي وقرفي وغثياني !!
المهارة في كل شيئ مطلوبه وممتعة ولطيفه...
حتي لو كان النصب او العبث بعقول الاخرين باسم الجرأة واقتحام الممنوع
!!
وكسر التابوه !!"كلام كبير"...
ان تتحدث عن الجنس كاحتياج بشري طبيعي له معوقاته ومشاكله وخصوصيته لشعب محافظ فانت تقترب من الحمي!!.
وحين لا تكون د: هبه قطب المتخصصه في الصحه الجنسية قدّ الحمي اللي بتحوم حوله... إذن هي بتضيع وقت الناس وبتنصب عليهم!!
هبة خليط متنافر ومزعج بوجه مربع وبتاييرات التمانينات المقتبسه من مجلة حواء ثم باستضافتها للشيخ الجندي في اوئل حلقاتها و وبسردالاحاديث في سياق الحديث خلال الحديث غشاء البكارة والشذوذ و مقاييس الاعضاء التناسلية!
أحترم الجرأة و ريادة السبق في الحديث عن الجنس بشكل علمي و لطيف وغير فج... وهو ما يستحيل علي هبة فعله.. ولا ترغب فيه ايضا لزوم تسويق العياده:)
د هبه لا تقدم اي نصيحه حقيقيه لاي مشكلة في الاتصالات هي تحوم حول الحمي ولا تقع فيه تختبـأ خلف دور الداعيه الطبيبه فلا تنجح في اي منهما!
السؤال من احدي المتصلات عن غشاء البكارة يتبعة تحقيق من جانبها عن ملابسات الواقعه المعنيه بالسؤال !!!!
وامتي وازاي وفين وعمرك كان قد ايه و..و..و
فتيجبها: يا عزيزتي مفيش داعي للبحث عن حلول خارج منظومه الجواز!!
اللي هيّ إعفاف وطهارة!
وسؤال متصل عشريني عن امكانيه شفاءه من الشذوذ منذ عشر سنوات!!
يتبعه حديث مستفيض من طرفها عن اهميه مراقبه الاهل "للولاد" نصيح للاهل وانهم ما ينجرفوش ورا جمع المال!!
اما السؤال متصله اخري:عن الجفاء الزوجي وانصراف الرجل للعبث خارج البيت"؟؟
فنصيحتها كالسابقين التوجه لطبيب متخصص في الصحه الجنسية لاخد النصيحة المناسبه!! والصبر في تنفيذها!
بعد ان تلتف نص دايرة لتغيير البوزيشين امام الكاميرا وبعيون" ملحوسة" كحل!!
تعلق امي علي احدي الحلقات وهي تستقبل القبلة لتصلي العشا قبل النوم: وليّة سافلة صحيح!! ثم تستغفر الله وتقول: هيّ الناس ناقصه علام؟؟ دي القطط بتعرف والعيال بتنزل من بطن امها بتعرف!
ترعي حلقاتها شركات ادوية الذكورة صاحبة الاعلان السخيف الحبه السداسيه
اللي ها تخلي حامد ما يروحش القهوة وبقعد في البيت وخليك جامد يا حامد!
اسوا الحلقات التي تعبر عن أظلم افكارهبة هو تعقيبها علي قضيه تبادل الازواج التي تكشف فيها عن حضوهاعن حضورها التحقيقات مع المتهمين!!
وتصف هبه المتهمه بأنها: ست بجحة وتندّب في عينيها رصاصة _انطباع شخصي1_
وان زوجها شخص مسكين وعاجزعن تلبيه متطلبات الزوجه الصغيرة فابيضطر الي طلب مساعده خارجيه لارضاء الزوجه الوحشه المتطلبه _انطباع 2_
ثم تدعو للمتصلين ان ربنا يرزقهم بزوجه صالحه مش زي زوجه المتهم البجحه الوحشه لان الزوجه الصالحه خير متاع الدنيا!!
وربنا يا رب ما يكتب عليهم يبقي زي عمو المتهم في حظه الوحش..!!
كده د:هبه شايفة ان الموضوع مجرد ست بجحة ورجل ضعيف اما سطوتها!!
افتكرت التعليق علي الخبر في الصحف الذي كان الهجوم علي الزوج الديوث الذي يفرط عي عرض زوجته
ولم اجد تعليقات تتهم الزوجه بالمثل وغالبا لان طبيعه المجتمع ما زالت تعتبر المراة كيان تابع للرجل
هو المسئول عن حراسته والحفاظ عليه !!
وليس طرفان متساويان في الاهليةو الخطأ والعقوبة!!
تذكرت ايضا صديقه مدونه تصف احد انماط النساء:العقليه بعقليه المرأة
الزومبي (عقليه ذكوريه متجبرة ورجعية) داخل جسد انثوي!!
لكني اجد أن هبة تتفوق عليها وتكون اكثر زومبية من اي زومبيه اخري!!
عزيزتي هبة: روحي بيعي الحبة السداسيه في عيادتك وارحمينا!
من العجائب المصريه الخالصه ان ريهام سعيد تتحدث عن الحشمه والاخلاق وهبة قطب تتحدث عن الصحه الجنسيه!!
كلام ذوصله وكلام اخر..

هناك 35 تعليقًا:

زمان الوصل يقول...

"هبه قطب" كانت تشبه البدعه أو الاختراع الجديد فى بداية ظهوره يلتف الناس حوله و يثيرهم الجديد الذى يقوله خاصة لو كان موضوع من التابوهات المحظور الاقتراب منها مثل موضوع الجنس !! ثمّ يبدو أنّها وجدت أن الموضوع "مطلوب" -رغم إنّى شخصيا فقدت اهتمامى بها من وقت طويل- فاستمرّت فى هذا الاتّجاه و بعد أن كانت تظهر كضيفه فى البرامج أصبح لها برنامج و اتنين و تلاته !! و كلّها لا تتحدّث سوى عن الجنس و العلاقات الجنسيه !! و بصرف النظر عن فحوى ما تتحدّث عنه بديهى أن يكون هناك ملل من أن كل الموضوعات التى تتحدّث عنها -حتى لو كانت ذات طبيعه إنسانيه لا علاقة لها بموضوع الجنس- تنتهى عند نفس النقطه !! بجد حاجه تخنق و كان مفروض و هى تناقش الملل فى العلاقات أن تلاحظ أن نفس الملل يمكن أن يصيب علاقتها بجمهورها ..

أتذكّر صديق لى كان يتحدّث عن أزمة الثقافه الجنسيه فى مجتمعاتنا و وقتها قلت له ليه ما فيه "هبه قطب" قال لى لا من فضلك هى تروّج بشدّه للنموذج الأمريكى فى رؤية الموضوع وهى ليست بهذه الروعه التى تتخيّليها !! وقتها استغربت فعلا فقد كانت "هبه" هى أوّل من يطرح مناقشة هذه الأمور بانفتاح و بشكل علمى لكنّى فعلا مع الوقت أصبحت أستغرب أن كل المواضيع باتت تصب فى نفس الخانه لدرجة تصوّرى إن لو حد اشتكى لها من طابور العيش ستجد للأمر علاقه ما بالجنس !!

على فكره الطبعه الأحدث من "هبه قطب" طبيب نفسى -هكذا يقدّمونه- اسمه "خليل فاضل" .. تلاقيه ضيف دائم على صفحات جريدة "الفجر" و عرضوا له كتاب من قبل اسمه "وجع المصريين" !! من عناوين الفقرات ستكتشفى أن كل الأوجاع التى يتحدّث عنها بردو ذات صله وثيقه بالجنس ولا شئ غيره !! لدرجة أنّه بعد موضوع تبادل الأزواج نشر له بالجريده مقال اسمه "التحليل الجنسى لجريمة تبادل الزوجات" !! تحليل جنسى لجريمه جنسيه !! طيب مش كان الأولى يكون تحليل نفسى أو اجتماعى أو حتى عقلى !! يبدو أن الموضوع بالنسبه لوسائل الإعلام يشبه الموضات .. يختاروا شخص لكل مرحله يلمّعوه و يفرضوه علينا حتى يصير وجوده فى حياتنا أمر واقع بصرف النظر عن غثاثة ما يقول و انعدام قيمته و تأثيره الحقيقى فى حياتنا أو جديّة أو عبثية الحلول التى يطرحها .. مابقتش باستغرب ..

الطائر الحزين يقول...

لست متابعا لها ولحلقاتها
لكنى أرى ان موضوع الجنس من اهم الاسباب لتواصل الازواج وان رأت الزوجة فى زوجها قصورا او رأى فيها قصورا فعليه أو عليها أن يتفقا على الاستمرار أو أن ينهيا العلاقه (وليس للأمر علاقة بالتبجح ) فهذا اولى بالعفة وليس شرطا أن يكون أحدهما معيوبا ولكن لا يصلح كل منهما للأخر

Empress appy يقول...

بهرش فى دماغى
هو انا معرفهاش الست دى بس انا ليه تعقيب على موضوع الاتنين المقرفين الزوج والزوجه
انا قولت هى معندهاش كرامه ومش كويسه ومحملتهاش للراجل بس انا عارفه واحده اطلقت من واحد فى وقت قريب بعد الفرح علشان طلب منها طلب مخلل بالاداب واهو اكن جوزها حاجه شبه الاتنين دول كده يعنى
انما هبه دى بجد باللى بتقوله تروح تبيع حبه البركه حتى ههههههههه
بقولك لما تيجى تانى ابقى صفرى علشان اتفرج عليها

زمان الوصل يقول...

فيه كام نقطه فرعيه عاوزه أقولهم فى التعليق ده :)

أوّلا فكرة الاستعانه أحيانا بالشيوخ و التدليل على استفاضة الدين فى الحديث عن الموضوع الجنسى كانت من النقاط المثيره للغيظ بصراحه .. لأنّى أظن تعامل الدين مع الموضوع الجنسى كان فيه قدر أكبر من الاحتشام فى التناول مايخلّيش حد يحتاج لتغيير القناه حرجا ممّا يقال ..

ثانيا أعتقد أن الناس ناقصه علام :) لكنّى لا أظنّها بحاجه للعلام على طريقة "هبه قطب" .. يبدو أن موضوع تناول الجنس بشكل علمى حقيقى لا يعتمد على الإثاره معضله حقيقيه لكن أكيد وصلوا لحل لها فى "أوربا" و الدول المتقدّمه .. ما أعنيه بالعلام ليس طبعا ما يضعه الله كغريزه فى نفوس البشر لكن إحنا عندنا مفاهيم خطأ كتيره محتاجه تتعدّل و ثقافه شعبيه منها حاجات كتيره غلط ..

لعدم متابعتى لم أشاهد حلقة تبادل الزوجات بس المذهل فعلا أن يكون هذا خطاب صاحبة الكلام الكبير !! هذا الخطاب الذى يلقى باللوم على الزوج وحده تاره أو على الزوجه وحدها تاره كان له وجود واضح فى الإعلام لكن كيف يكون له نفس الوجود على لسان الدكتوره التى تدافع عن حق الناس فى الاستمتاع بالجنس !! طبعا لن يكون هناك من يدافع عن انحراف زوجه لكن كثرة الضغط على وتر المتعه و كيفية تحقيقها و الحديث عن مآسى من يحرمون منها قد يكون له دور هو الآخر فى دفع البعض للبحث عنها بطرقه الخاصه ..

أخيرا .. أنا انزعجت شويّه من الحديث عن تاييرات "هبه" و شكل وجهها و طريقة لبسها :)

غير معرف يقول...

ست تعبانة ملة و فرحانة بالتلفزيون و فلوس التلفزيون و شهادتها واخداها من جامعة مجهولة الهوية فى امريكا

مرة واحدة بعتت تقولها عن موضوع الجنس الشرجي فما كان منها الا انها قعدت تقولها ان الجنس الشرجي حرام....هي الست بتسأل دكتورة ولا شيخة؟

مـحـمـد مـفـيـد يقول...

ده كله ومش عارفه تبتدي ازاي
:))
من الاخر في بدايه ظهور هذه الدكتوره في برنامج اعتقد البيت بيتك ثم الي اليوم السابع في الmbc
وتفردها ببرنامج مستقل لها
وتابعت حلقات منها ولكن
وجدتها تعالج المشكله بأسفاف وبذائه
وهناك اباحيه في عرض اي مشكله
ولم تقدم لها اي حل مفدي لصاحب المشكله
ما هو الا استثمار لنوعيه ما تقدمه

محمد حمدي يقول...

البوست بتاعك جميل اوى ومهم .. يعنى منغير مبالغه انا ممكن ارد على كل نقطه فيه ببوست منفصل .. انتى نفسك كان ممكن تقولى كل نقطه فيه فى بوست منفصل ... هبه قطب من وجهه نظرى مش ملاك ومش شيطان .. هى مش بتبيع الدين عيانا جهارا كقناة الناس , والى حد ما مش بتروج للسلفية .. لكن برضو كونها بتخلط بين الدين والطب بيخلى الواحد مش عارف يبصلها كطبيبه ولا كداعيه , كمان الى بحسه فى هبه انها بتقدم لك كلام قديم جدا كل الناس قرته من ايام اعداد الصحه الجنسيه لسلسلة طبيبك الخاص وحتى منتديات الصحه الزوجيه على الانترنت .. المختلف المره دى ان ده برنامج تليفزيونى وان الى بتقدمه سيده محجبه

ده باختصار رايى فى الى جه فى البوست الجميل بتاعك
تحياتى .. ومستنى زيارتك

خمسة فضفضة يقول...

السلام عليكم ورحمة الله وبركاته

مش باتفرج عليها{هو انا تقريبا مش متابعه تليفيزيون خالص :))} ، كنت باشفها زمان لما كانت بتيجي كضيفه في برامج تانيه او في البرومو بتاع البرنامج

شفت اخر جزء من حلقه الاسبوع اللي فات بالصدفه
مش عارفه ليه ماستريحتش لكلامها وحسيتها متكلفه وبتحاول انها تلتزم بالمناقشه المؤدبه بس مش عارفه

اللي عاوزه اقوله ان موضة مناقشة الثقافه الجنسية علي العلن كده دي واحده من تبعات مؤتمر الصحه والسكان اللي اتعمل في القاهره منتصف التسعينات والي خلي الناس من يومها تنادي حتي بتدريس الثقافه الجنسيه في المدارس
المشاركين في المؤتمر ده ماعجبهمش ان يكون في مجتمع مسلم محافظ له خصوصيته و تقاليده وعاداته ، حبو يفرنجونوا ولقوا اللي يتبني افكارهم بحماس ويحاول يطبقها ، وزاد الموضوع مع انتشار الفضائيات اللي يهمها اعلي نسبة مشاهده- طبعا عشان الاعلانات -عن طريق الفرقعه الاعلاميه ومناقشة موضوعات المفروض ما تتناقش الا خلف الابواب المغلقه
وبالتالي لقت هبه قطب وامثالها مناخ خصب انهم ينتشروا ويوصلوا لقلب البيوت ومش مهم مين اللي قاعد قدام التليفيزيون بيتفرج ، مراهق ولا طفل ولا راجل ولا ست

والبقاء لله في الحياء اللي المفروض انه شعبه من شعب الايمان


----

انا كمان زعلت من انتقادك ليها في شكلها ولبسها حسيتها كراهيه شخصيه اكتر من انه استياء من اسلوبها في مناقشة الموضوعات


سلام

bluestone يقول...

اتفرجت عليها شوية في كام حلقة
شايفة انها مش بتقدم اي معلومة مفيدة
مش اكتر من كلام أبيح مخلوط بشوية كلام ديني
يعني تابوهات خلاط زي زبادي خلاط كده :)

انا فعلا مش فاهمة هي دكتورة ولا شيخة؟؟
ولا الاتنين مع بعض ؟ يعني اللي بيتصل يسأل عايز يعرف حكم الدين ولا حكم الطب ولا عايز يحرج نفسه وخلاص

كتير من نصايحها بحس انها مش منطقية او بطريقة عيب والنبي يا اختي

لكن انا عامة لسه شايفة ضرورة وجود شكل من اشكال الاستشارات الجنسية للازواج والمقبلين على الزواج مش لازم تكون علني وعلى التلفزيون
لكن ممكن تكون عن طريق مستشاري الازواج
مثلا

مش متفقة مع والدتك خالص في مسألة اننا مش ناقصين وبنتولد عارفين والكلام ده لان فعلا المجتمع جاهل جنسيا ويجهل ابسط المعلومات

Ahmed يقول...

يادي النيله
هو كل شوية حد يطلعلنا يكلمنا عن المسائل ديه تحت ستار الحريه والجرأه

انا مبسميهاش حريه. انا بسميها...(تيييت-الرقابه حذفت التسمية)

وميض ابتسامة يقول...

من الاخر الست هبة وبرنامجها المتوغل فى قضيانا الدينية المثيرة للجدل والغثيان بتؤكد ان البرامح الفضائية محتاجة وقفة اعلامية يعاد فيها النظر
فيما تبثه وتدخل به بيوتنا بلا استأذان.. اما عن ضيوفها فالشيخ الجندى من الشيوخ الذين يطاوعنى فيهم الريموت بالرفض .. وتحويل القناه بلا ادنى تردد...
هونى عليك ياعزيزتى .. فهم اكثر من الهم على القلب ... وربنا يصبرنا

تحياتى

عين فى الجنة يقول...

والله يا افندم انا كان عندى 6 سنوات واتعلمت حقائق الحياة من العصافير والارانب اللى كان ابويا بيربيهم فى البيت
الغريزة والفطرة خير دليل للانسان لتنبيهه الى ميله الى الجنس الاخر
ثم التربية السليمة التى تقتضى بالدين فى اوامره ونواهيه ونصائحه التى تشكل الوعى لدى الانسان ، والوعى امر مهم جدا
والدين لم يترك امرا مهما فى العلاقات الجنسية الا طرقه باسلوب جميل لا يخدش الحياء
وخدى عندك التفريق بين الابناء فى الفراش
وعدم الدخول على الاباء الا بعد الاستئذان وفى اوقات محددة
والتقديم للنفس قبل الاتيان
وكيف ان المحيض نجس
الى اخره من تعليمات بمجرد توجيه الابناء لحفظ القرآن الكريم سوف تحل المسألة تلقائيا فى جو القدسية الذى يستلزمه قراءة الكتاب المطهر
يبقى بعض التفاصيل التشريحية التى تشبع الفضول الى الجنس الاخر وبعض المعلومات البيولوجية عن كيفية حدوث الحمل و الولادة
والباقى تحصيل حاصل
وعن هل هبة قطب شيخة ولا طبيبة فأنا ارى انه يلزم للداعية علمه العميق بالجنس كما يلزم للطبيب علمه العميق بالدين

عدى النهار يقول...

أن ماشفتش البرنامج ده لكن قرأت إستنكار له قبل كده

إحنا مجتمع بيعشق التقليد فى كل شىء إلا ما قد يكون فيه فائدة له. وعادة نقلّد مالا يتماشى مع عاداتنا وتقاليدنا وثقافتنا

أعتقد إن التربية السويّة على مستوى المجتمع ككل هى اللي المفروض يكون التركيز عليها لأنها هى ما يساعد الناس على إقامة علاقات سليمة أياً كان مجالها

المشاكل دائماً لها وجود فى حياة الناس والحلول السليمة بتكون من ناس عندها ما تستطيع تقديمه لكن واضح من كلامك والتعليقات إن البرنامج ده ومن وراءه ليس لهم لا فى تثقيف مطلوب وناس كثيرة فى حاجة له ولا فى تقديم مساعدة لمن عنده مشكلة

علا يقول...

بوست في الجون
خصوصا موضوع تاييرات التمانينات و الكحل الملحوس ههه.. أتفق و بشدة مع الست الوالدة .. و هي الناس ناقصة علام يعني؟! والله في سؤال نفسي أسأله و هو بجد و حق و حقيق يعني مش سخرية و لا استنكار .. و منتظرة إجابة بجد
هي إيه الثقافة الجنسية اللي إحنا محتاجينها ؟؟ حد يفهمني الله يخليكوا

مستنية منك بوست بقى عن المذيع أحمد عبدون .. أصلو مش أقل استفزاز من هبة قطب بمياصته و طريقته في الكلام كأنو مكسوف و بيوشوشنا بكلام مايصحش يقولوا بصوت عالي

بنت القمر يقول...

زمان الوصل
---------
ها اقولك الملل بيجي منين
الملل انها بتحوم حول الحمي زي ما قلت بتتكلم علي انها ها تتكلم عن الجنس لكن في الحقيقه مش بتتكلم عن اي حاجه خالص
كل الاسئله في الاتصالات اللي بتتحول لها بتحيل اصحابها بعد تلقينهم دروس في الاخلاق هما واللي بيشاهدوا في البيت
يعني لما بنت تغلط ووتقول اتماديت في علاقه ومش متاكده انا عذراء او لا
مش الحل اني اقعد اوعظ فيها ومش مجالها
والبديهي واي انسان عارف ان العذريه لا يتم التاكد منها الا بالكشف الطبي
ومفيش تاكيد عن طريق التليفون يبقي هي فاتحه البرنامج ليه بقي؟؟؟
موضوع الشذوذ : المتصل اللي بيمارس الشذوذ من عشر سنوات مش ها يتهدي برضه في مكالمه مذاعه دا عاوز علاج نفسي وسلوكي واجتماعي اذا كان عاوز يبقي شخص غيري او طبيعي
كل الفكرة هي تسخين المشاهدين انها ها تقول كلام مهم لتسويق العياده وخصوصا ان المجال"الجنس" يقتصر التداوي فيه علي عيادات امراض النساء او امراض الذكورة فقط
ومن المفهوم ان العلاقه الجنسيه شق منها نفسي وشق فسيولوجي الفسيولوجي مجاله الطب"نساء وذكورة والنفسي" مجهود ومحبه ورحمه وراحه نفسيه ..و..و
انا بتابع برنامجا بالصدف لكن لاحظت انه من شسيئ الي اسوا
قضيه تبادل الازواج في الاخر وحتي من منظور ديني هي انحراف سلوكي وزنا
مسؤل عنه الطرفين
مش ممكن اقول ان الزوجه صايعه ومنحله وعينها بجحه والزوج عاجز ومسكين وعاوز يرضيها
حتي في الدين ال والقانون المراة والرجل كاملان الاهليه وبيستحقوا نفس العقوبه علي اي جريمه
مجيش انا بقي احمل الموضوع اكتر من ما يحتمل
وازايد علي العقل المجتمعي اللي بيعتبر الرجل مسئول عن انحراف زوجته واقول لا اصل هي المسئوله لوحدها
حاجه تفقع صراحه
= نقطه التاييرات بما انها طالبه معاها اعلام فبصراحه لبسها وحش جدا زيها زي اي وجه اعلامي ممكن نقيم ادائه وفي مذيعات محجبات اشيك بكتير وابسط
- شوفي بقي الفيديو كده وانتي ها تشوفي العته المنغولي علي اصوله وهي بتقول لشوبير انها بتحب جوزها اكتر من ولادها؟؟!!!
ودي في رأيي قمه انحراف الفطرة او النفاق او الخلل النفسي لان محدش بيحب حد اكتر من اولاده
اعقل بيقول كده ولو عاوزة تنافق الدكتور جوزها يبقي في بيتهم مش علي التليفزيون لان بصراحه الكلمتين دول موتوني

بنت القمر يقول...

الطائر الحزين
================
تمام وممكن يلجأوا لمساعده طبيه بس اكيد من متخصص يقدر يفيدهم مش يستغل مشكلتهم

بنت القمر يقول...

ابي
=========
هي بتيجي في قناه الحياه بعد اتناشر اعتقد يا الابع يا الخميس خلاص ها اصفر لك
بس صدقيني مش ها تستفيدي حاجه
:))

بنت القمر يقول...

ايجيبشيان
==============
الضوابط الشرعيه معروفه وموجوده
واي داعيه وشيخ ممكن يقولها واللي بيسأل طبيب يجاوبه علميا واللي بيسأل شيخ يجاوبه طبيا
!!
الموضوع كله تسويق للعياده وللادويه اللي في الاعلانات

بنت القمر يقول...

محمد مفيد
============
بالضبط هي مش بتقدم حل لانه المعروف ان اي دكتور لازم يكشف كشف سريري
طب ما يمكن المتصلين عنهدم تشوهات او غيره
وهي مش ها تقدر تستفيض في الشرح مجرد شد نظر للناس لكن لما في الاخر تقول لازم نستعين بمتخصصين
الله
امال انتي لازمتك ايه؟؟؟
طب ما نروح لهم وخلاص
دكتور النسا او الذكورة وخلاص
مجرد تسويق للعياده والادويه في الاعلانات:(
وضحك علي الناس

بنت القمر يقول...

محمد حمدي
=========
انا مش شا يفه برضه انها بتقدم دين
لان بديهيا الدين بيقول ان الزنا جريمه مشتركه مش جريمه واحد والتاني اصله غلبان ومضحوك عليه!!
اشكر اطرائك وانا متابعاك علي الريدر عندي وان شاء الله ازورك قريب

بنت القمر يقول...

فضفضه
========
طبعا مش ها تقدر تستفيض لطبيعه الموضوع اولا
ولمكان عرضه تانيا
والاهم انها عارفه ده وكويس وده نقطه عشان تعالجي موضوع زي ده هو الكشف الطبي واحيانا النفسي وطبعا ده مستحيل في مكالمات تليقونيه علي الهوا:((
تحياتي

بنت القمر يقول...

بلو ستون
=============
انا كمان بؤيدك جدا في الاستشارات الطبيه للمقبلين علي الزواج ومش كده بس
اؤيد بشده الاختبارت الطبيه للمقبلين علي الجواز
شفتي انا متطرفه ازاي:((
لانها بتمنع بلاوي
وها اعمل كده مع بنتي لازم كشف طبي اقل ما فيها الامراض الوراثيه وفيروسات الدم
-----
هبه قطب مش بتقدم اي حاجه طبعا ولا ينفع تقدم لحساسيه الموضوع من ناحيه ولان ربنا عرفوه بالعقل المشاكل من النوع ده عاوزة كشف طبي مش بالتليفون
يعني واحده بتقول انها شاكه انها فقدت عذريتها اساعدها ازاي وانا دكتورة من غير كشف ايه ام الهبل ده؟؟!
واحد شاذ من 10 سنين عاوز كشف نفسي وطبي وغيره
المخ بيقول كده
-----
بالنسبه لماما هيهيهي ومين قالك انني متفقه معاها؟!!
اصلا عمرنا ما تفقنا من اول طريقه عما الشاي لحد الحقائق الكونيه الكبري
انا بس برصد وجهة نظرها مش اكتر كتيار محافظ ممكن يستاء بشده من مناقشه زي دي اصلا
---------
الحلال والحرام في الموضوع ده مش معضله واقري تعليق راجي
بس خلاص خلصنا ومش دورها الطبيب حاجه والشيخ حاجه تانيه!!
الشاذ اواللي بيعانوا من الفتور عاوزين مساعده طبيه لانه ببساطه كل الناس عارفه ايه الحلال والحرام
تحياتي

بنت القمر يقول...

احمد ابو العلا
===============
:))

بنت القمر يقول...

وميض ابتسامه
===============
اكيد تقصد قضايانا الاجتماعيه!!
عموما.... هي مش بتقدم اي شيئ مفيد مجرد واحده بتسوق لعيادتها وللادويه الاعلانات مش اكتر
تحياتي

بنت القمر يقول...

راجي
===========
ست سنين بدري اوي:D:D
متفقه معاك الي حد كبير
بس انا رايي ان الشيخ شيخ والدكتور دكتور لانه ببساطه الشيخ مش ها يقدر يلم بكل المسائل الحياتيه والاجتماعيه كل دوره ينحصر في انه يقول راي الدين في اي موضوع اذا كان للدين راي وراي الطبيب انه يقدم نصيحه واستشلرة طبيه مش فتوي
لكن اخلط ده بده!!
في الاخر ما اقولش اي حاجه خالص
عشان اسوق عيادتي!! او الادويه اللي في الاعلانات يبقي النصب بعينه
تحياتي

بنت القمر يقول...

عدي النهار
=================
مش مهم تشوفه لانه في الاخر مفيش اي فايده لو تسمح لي ها انقل جزء من رد سابق لي
هبه قطب مش بتقدم اي حاجه طبعا ولا ينفع تقدم لحساسيه الموضوع من ناحيه ولان ربنا عرفوه بالعقل المشاكل من النوع ده عاوزة كشف طبي مش بالتليفون
يعني واحده بتقول انها شاكه انها فقدت عذريتها اساعدها ازاي وانا دكتورة من غير كشف ايه ام الهبل ده؟؟!
واحد شاذ من 10 سنين عاوز كشف نفسي وطبي وغيره
المخ بيقول كده
تحياتي

بنت القمر يقول...

علا
========
:))
هو بما انها وجه اعلامي يبقي تحت طائله النقد هدومها وحشه جدا وكئيبه
دي وجهة نظري
- المشاكل من النوع ده محتاجه بوح وثقه بين الطبيب والمريض وطبعا كشف طبي سريري
ولكن الثقه ولا الكشف متوفرين في التلفزيون اكيد!!
يبقا هي بتعمل ايه بقي غير تسويق عيادتها!؟
نورتيني ... واشكرك

غير معرف يقول...

هو بالضبط كما قلتى ..

هى اصبحت شيئا يقف بين الداعية والطبيبة.. فلا صارت داعية ولا اصبحت طبيبة .. تاهت بين الاثنين

وانا لست من انصار من يقول ان الغرائز لاتحتاج الى تعليم .. بالعكس .. هى دائما تحتاج الى تهذيب مستمر .. بل ان كل شئ يتطور الى الاجمل والا كنا لازلنا نأكل اللحم نيئا كأهل الكهف والجزر من الأرض دون غسيل ..

اذن حتى الجنس يتطور .. ويتجمل لأن الله خلق الانسان جميلا يتحرى بعقله الجمال فى كل شئ .. كذلك فإننا لانتطرق الى الجنس الا عندما نشكو .. يعنى عندما لانتحمل الألم وعند الطبيب .. يعنى ونحن لسنا اصحاء .. بالتالى لم نتعلم الثقافة الجنسية ولا اظننا فاعلين ..

أكثر مايسيئنى هو التناول المتدنى دائما لهذا الأمر .. وكأن الحديث فيه جرم فى حد ذاته .. رغم اننى ارى ان كل شئ فى الدنيا يمكن تناوله بشكل راقى جدا .. وهو نفسه بشكل مقزز ردئ ..

وفى اوروبا واليابان .. يعنى فى الشرق والغرب .. يتناولون كل شئ بطبيعية من كل الجوانب ويناقشون أوفق الظروف والوسائل ليكون كل شئ جميلا ويحقق السعادة للجميع

القصة باختصار ان تناول هذا الموضوع ولو من ناحية دينية يجذب الانتباه والمال معا .. وستجدى ان 70 بالمائة من قضايانا الدينية لاتخرج عن هذا .. لكن لاشئ عن اختراع او دواء او فكرة تعتمد على سواعدنا لنؤكل انفسنا .. او لنعبر عن انفسنا بحرية ..

اعتذر عن الاطالة وتقبلى تحياتى

قلم جاف يقول...

يصعب ذكر "هبة قطب" بدون ذكر السيد "خالد منتصر".. وهو ألعن في رأيي.. والمقرف أكثر أن هالة "الاستنارة" صارت تحوط بكل آرائه مثلما كل سعال من "مفكر إسلامي" هو سعال إسلامي..

ذو النون المصري يقول...

بقي عادي جدا
طالما اصبح هناك حالة كبت فمن السهل استنفار حالة التساؤل و البحث عن الاجابات من خلال مثل برامجها و اظنها فهمت الموقف المجتمعي جيدا فقدمت للمجتمع ما يريده بطريقتها بهدف الشهره طبعا

يا مراكبي يقول...

ده كلام كبير جدا

:-D

كمبدأ عام .. أغلب البرامج اللي بتناقش الأمور الجنسية والطبية وتفسير الأحلام .. كلها عبارة عن إستهلاك للوقت وجذب لأكثر عدد من المشاهدين لإستقطاب إعلانات أكثر

لا يمكن لأي من تلك البرامج أن تحل أية مشكلة من أي متصل كان .. فالتشخيص لابد أن يأخذ وقتا كافيا ودراسة مستفيضة وربما إستدعى الأمر فحوصات وتحاليل وأشعه

وكما ذكرت أنت .. فالدكتورة منذ أن ظهرت على شاشات الفضائيات لم أسمعها تصف حلا لأي مشكلة أبدا .. فقط هي تستقطب الإهتمام وتترك المشاهد متعطشا للمعلومة دون أن يرتوي

وهنا الفائدة مشتركة للقناة الفضائية التي تحقق أكبر جذب .. وللدكتورة التي تسوق لعيادتها الخاصة أيضا

كله بيزنيس يا هانم .. وأهو الناس بتضيع وقت قدام التليفزيون وخلاص .. وليذهب أصحاب المشاكل الحقيقية إلى الجحيم

أي كلام في أي كلام

بنت القمر يقول...

شريف
========
زي ما قلت برضه حضرتك.... نورتني:))

بنت القمر يقول...

قلم جاف"شريف"
================
هو من ناحيه ان خالد منتصر العن فالاتنين ما يتخيروش عن بعض:((
لانه عنده "الشيوخ فوبيا" في نقطه تجارة الاعضاء تحديد او الثقافه الجنسيه وغيره!!
في لقاء لسه شايفاه الاسبوع اللي فات كان بيحمل المشايخ مسئوليه وقوفهم عقبه في وجه التقدم العلمي!!
بسببب معارضتهم لقانون نقل بين الاحياء بشكل هيستيري!!
ومن المعروف ان الفتاوي بتاعته لطيفه جدا في السايت الخاص بيه يمكنك الفرجه عليها!!
تحياتي

بنت القمر يقول...

نون المصري
================
الشهرة وتسويق العياده وغيره من خلال التمسح بالحلال والحرام والجمل المبتذله في غير محلها
تحياتي

بنت القمر يقول...

مراكبي
=========
اي كلام وتهجيص وسبوبه!!
واهو كله بيرزق:))