الخميس، فبراير 19، 2009

ماحدث ويحدث.... الشروق واشياء اخري

تسرقني اه تشخلعني لأ
تشرفت بنزل تدوينتي ما قبل السابقة في جريده الشروق.او بمعني اصح تلت تدوينة .وحيث اني لم اعرف الا بالصدفة البحته من صديقي الاليكتروني هاني بيكي روبابيكيا"الاليكتروني" دي عامله زي الترانزيستور الصغير او تفكر الواحد بالانسان الالي :D
وحيث انهم شافوا ان ابداعي اللوذعي كتير علي القراء فقصقصوا التدوينه وخدوا تلتها الاولاني وقرروا ان التلتين التانيين ممكن يتعمل بيهم مناديل بآوية واهو كله مصلحة
اعلن من موقعي هذا كمواطنة مصرية مسروق كافه حقوقها الدستورية والقانونية والانسانية ان الشكوي لغير الله مذلة وقلة قيمة.لا لي حق اشوف رئيس جديد لبلدي ولا لي بطاقه انتخابية ليها القيمة. ولا لي حق اروح قسم اتعامل معاملة محترمة .ولا لي حق في شارع مش ها اقول آمن لا مجرد عسكري بس ينفعني في وقت زنقة .ولا لي اي دور سياسي و ولا حزبي ولا نقابي .ولا لي دعم من الدوله بيوصلني ولا تأمين صحي او اجتماعي عليه القيمه احصل عليه ويوصلني. ولا لي تعليم محترم ترعاه الدوله ولا خطه تضمن مستقبل بناتي اعلن واتوجه الي جريدة الشروق ومؤسستها العظيمة راعية الثقافة و ناشرة الفكر الحر تسرقني اه تشلخلعني لا خدتوا تدوينه وناويين تاخدواغيرها اوكيه بجملة اللي الواحد بيتسرقه. بس بليز والنبي بلاش تقطعوا التدوينه خليني انا اضغطهالكم واختصرها تسرقني اه تشخلعني لا.... وحسبنا الله ونعم الوكيل - كل النقاشات بين المدونين الفترة اللي اعقبت نشر الشروق لتدوينات من غير اذن اصحابها هنا وهنا وهنا أثبتت علي الاقل بالنسبه لي بس كثير من النفسنه بين الناس وكثير من عدم احترام الحرية الشخصية...
في اتنين تدويناتهم كربونة من بعض الاولاني مخصص مدونته ضد الحجاب والنقاب والسعودية وما يمت ليها باي صله والتاني ضد الكنيسه والمسيحيه والغرب
الاول يجيب تدوينه ان سعودي اغتصب بنته التاني جيب تدوينه ان امريكي اغتصب بنته الاول يجيب تدوينه ان البابا عمل وسوا و ودوله جوةالدوله التاني يجيب تدوينه سخرية من الشيخ فلان والفتوي العلانية.... الاول بيثبت بكل الطرق ان السعودية مصدر مشاكل مصر وانها مليئه بالانحرافات الاخلاقيه والسلوكية والتاني بيثبت ان الغرب الكافر ملئ بنفسسسسسسس الانحرافات ونفسسسس الشذوذ ونفس الانهيار:!!!
سبحان الله رغم اختلاف دوكهمه عن دولا همه كلية ونهائيا في الافكار والميول والوجهات النظر الا انهم بيتصرفوا بنفس الطريقه ونفس التكتيك ونفس الاسلوب!!!...
ايمن نور طلع من السجن بين التخمين انه طلع في صفقة سياسية بين الحكومة وامريكا او بين ضغوطات والمعلومات الغير مؤكده بالنسبة لي علي الاقل يعني ان قانونا ممنوع يمارس سياسة قبل مرور 5 سنين علي الاقل اعلن من موقعي هذا اني محبتش ايمن نور ولا احترمته ومن يوم ظهورة ولا اجده بديل مناسب لحكم مصر واعلن ان لو كانت قضيه التوكيلات المزورة لحزب الغد مفبركة من الحكومة للقضاء عليه فإن قضية تزوير الدكتوراه بتاعه من جامعه في روسياكفيلة علي الاقل بالنسبة لي لتسقيطه من حساباتي وكافيه باعتباره غير كفؤ لاي عمل سياسي وان الملتف حوله كالمستجير من الرمضاء بالنارمع الاعتذار للمستر نور ومريديه
واعتبر الحمله الفيس بوكية لترشيح المستشار زكريا عبد العزيز لرئاسة الجمهوريه بديل جيد جدا الي الان واعلن تأييدي لسيادة المستشار والي حين ظهور بديل افضل ايه تاني .؟.
.... آه اموت وادفع نص عمري واعرف وفد المعارضة اللي رايحين الرئاسة يقولوا لمبارك يتنحي عن الحكم يوم 25 ابريل ها يقولوا ايه ؟وهو ها يقول لهم ايه وهما ها يردوا يقولوا ايه اذا اصلا قابلهم ؟! مش عارفه افتكرت حالا فيلم شادية "زقاق المدق"لما كانت بتقول ليوسف شعبان ها وقالك ايه؟.... وها وانت قولت له ايه؟.....
تعليق صديق اليكتروني اخر علي هذا الحدث انه عامل زي هوجة عرابي وفي انتظار هوجة عرابي الجديدة وما سوف يسفر عنها.... اهم شيئ بيديني امل أنه اكيد اللي فاضل مش قد اللي راح.
يا خوفي يا بدرن يحصل لنا زي ما حصل في كوبا بعد ما كاسترو قعد 50 سنة وفي الاخر استقال جاب اخوه مكانه:(
- قضية النصاب البوشي المتهم بتلقي اموال"وادعاء توظيفها" حوالي 350 مليون جنيه دون ردها وتحويله للجنايات تثبت ان التاريخ بيعيد نفسه وتثبت ان طول ما الفي طماع النصاب بخير. ما ان مصر بلد المضحكات المبكيات....

هناك 27 تعليقًا:

mido يقول...

لا لا دى شائعات عن أيمن نور , الدكتوراة حقيقية

و فى شائعات تانية أسخم

http://dostor.org/ar/index.php?option=com_content&task=view&id=15353&Itemid=59

خمسة فضفضة يقول...

السلام عليكم ورحمة الله وبركاته

ازيك يا مونمون

خلاص يا ستي ما تزعليش الشروق بقالها عددين مش بتنزل تدوينات مبتوره وبتنزل مكانها مشاركات القراء، واول امبارح عمرو عزت كتب موضوع كده كنت عاوزاكي تقريه وتقولي رايك
في العدد بتاع 17 فبراير عندك اكيد لينك النسخه البي دي اف


اما ايمن نور فتقريبا اكاد اجزم انه مش خارج كده لله في لله والموضوع فيه ان وان كبيره اوي اقري اللينك بتاع ميدو وشوفي دا غير كمان ان من كام يوم المحمكة الغت الاعتراف بموسي مصطفي كرئيس للغد بعد اعتراف لجنة الاحزاب بيه ، يعني كانوا بيمهدوا لخروج ايمن نور

شوفي كل الملابسات والظروف بتؤكد وجود صفقة ما ورا الموضوع
وياخبر انهارده بفلوس بكره يبقي ببلاش

وبالنسبه لاحترامه من عدمه مش عارفه ليه عندي حاله من اللامبالاه الفظيعه بالنسبه للموضوع ده مش بتحيز لحد ضد حد ولا بميل لحد علي حساب التاني كلهم زي بعض وحتي اللي كويس دلوقتي ممكن بعد كده الكرسي يغيره واللي بيبان قدامنا حلو ممكن يكون من جواه حاجه تانيه

وربنا يستر علينا واحنا مش عارفين رايحين علي فين


المدونات اياها مش بتعب اعصابي ودماغي واضيع وقتي في متابعتها علي راي هاني الاليكتروني بشد عليها السيفون وخلاص
اصلي ماعنديش مراره كاويتش تستحمل وقلتلك هاتيلي واحده زي بتاعك وانت مطنشاني خالص
هههههههههه



سلام يا قمر

karakib يقول...

هاني الاليكتروني :)) ههههههههههه جديده دي

محمود المصرى يقول...

بسم الله الرحمن الرحيم

بالنسبة لموضوع ايمن نور لا اظن انه يندرج فى اطار اى صفقة سياسية بين مصر وامريكا فمصر لن تقبل من امريكا سياسيا الا تمرير التوريث , وامريكا فى ظل ادراكها لعجزها المطلق عن تصعيد اى قوى عالمانية قادرة على المنافسة الشعبية كبديل للنظام الحاكم فانها ستكتفى بالتعاون التقليدى مع النظام دون التفات كبير لمسألة الليبرالية , وان كان سيصاحب علاقة الطرفين فى الفترة القادمة قليل من الكلام حول الحريات وتعزيز قيم الديمقراطية وغير ذلك من كلام فض المجالس .
لكن الاحمق فقط من يراهن على امكانية نجاح الضغط الامريكى على النظام فى افراز حال مختلف .
بالنسبة لموضوع السرقة الادبية مصر لا تعترف بحقوق الملكية الفكرية بصورة جدية .
تحياتى لحضرتك

بنت القمر يقول...

ميدو
========
يتهيألي موضوع الدكتوراه معلق لكن طبعا اللقب اخده خلاص............. د_ايمن نور
انه مسيحي او اخوان مش اخطر في رأيي من إنه مزور.... تصدق؟؟
تحياتي

بنت القمر يقول...

فضفضه
========
شوفي انا قريت كل التكهنات لكن الواضح ان الرادجل اتقصقصت ضوافرة تماما حتي انه مش ها يتولي رئاسة حزب الغد
والمعلومه الغير اكيده بالنسبة لي هو إنه ممنوع قانونا من تولي اي منصب سياسي لمده 5 سنوات لانه كان محبوس في قضيه جنائية ولا حتي نقابة المأذونين
وادينا بنتفرج
بمناسبه الشروق اعتقد اني نحستهم لاني اخر من نشر لهم
:D
تحياتي

بنت القمر يقول...

هاني
====
هامي كلمه واللاليكتروني بداية جمله تانيه كلنا اليكترونيين يا عزيزي
انا كمان اليكترونية:D

يا مراكبي يقول...

أعجبني النصف الأول من البوست فيما كتبتيه عن "سرقة" در الشروق للتدوينات .. أعجبني لأنه تفرع من الشأن الخاص إلى الشأن العام وهو حقيقي .. فنحن لا نملك أي حق بالفعل في هذا الوطن

رئيس جمهوريه نفسى يقول...

اماني
موضوع السرقة الاليكترونية بتاعت المدونات من قبل الشروق اتقتل بحث مننا ومش حنعيدة تانى والشروق اهي قفلت الصفحة اصلا بدون تنوية
تصحيح لمعلومتك ايمن نور مش قادر على الترشح ولو حتى عضو مجلس ادارة مركز شباب لافتقادة شرط هام من شروط الترشيح الا وهو ان لايكون سبق الحكم عليه فى قضية ماسة بالشرف وقضايا التزوير هي احد انواع قضايا الشرف ولما يقضى له برد الاعتبار فهو خارج الساحة اصلا فكلامه عن عدم رغبته فى الترشيح للرئاسة زى ما صرح كلام للاستهلاك لانه اول واحد عارف انه فاقد شرط الترشيح

موضوع التطرف الفكرى مش بيفرق الغلو والتشدد في التفكير مش حخكر على فكر او دين معين فكلا المجالات فى تطرف فكري

موضوع الهوجة الجديدة دليل على حاجه واحدة بس انى مصر بترجع للخلف بمراحل على عكس العالم اللى بيتقدم تصحيح احنا مش حيحصل فينا زي ما حصل فى كوبا لانه تفرق من ابنه عن اخوة :D

زمان الوصل يقول...

أنا عندى تعليق بخصوص "أيمن نور" و رغبته أو عدم رغبته فى الترشّح ..
مش لازم يكون الزعيم أو القائد فى أى حركه هو الوحيد الذى من حقّه أن يفعل و هو الوحيد الذى يجب أن تسلّط عليه الأضواء .. يكفيه أن يقوم بدور المحفّز أو المحرّك و يكفيه كذلك أن يكون مرحّبا بظهور وجوه جديده غير وجهه ..
إحنا بس اللىّ اتعوّدنا يكون الرئيس هو إله مصغّر على الأرض فى يده مقاليد كل شئ و إليه يرجع الأمر كلّه و ده شئ غير صحّى تماما بل و يشكّك فى صلابة ما يدعو إليه هذا الزعيم من أفكار و مبادئ .. مش لازم كل الزعماء يكونوا نسخه مكرّره من "عبد الناصر" الذى وجد فى نفسه الجرأه كى يقول أنّه من علّمنا معنى الكرامه و الحريّه و كأن المصريين قبله كانوا معدومى الكرامه و الحريّه !! مش لازم يكون هو الواحد الأحد الذى لم و لن يتكرّر و مش لازم يكون بيعمل كل شئ كما هو الوضع الحالى وكما كان الوضع لعشرات السنين منذ قامت الثوره المباركه .. و بس خلاص :)

مهندس مصري يقول...

ممكن تحطي لنك يفهمنا موضوع الدكتوراة دي ايه ؟ لإني اول مرة اسمع شكوك فيها

بالنسبة لإمكانية الترشح فدي مش ممكنة قبل ما يرفع قضية رد إعتبار و دي بتكون بعد 7 سنين من إنتهاء العقوبة

يعني لسه بدري
مش حيقدر يخش انتخابات 2011 للرئاسة
ممكن في 2017 :)

tamer.sala7 يقول...

تصحيح بسيط جداااااا


الحوار بتاع زقاق المدق كان بين
شادية وصلاح قابيل

وقالك ايه ؟.....
وقولت له ايه ؟؟ .... قولت له معلوووم

D: ((:

محمد الكومي يقول...

مسيرة الاحتجاج يوم 25 فبراير

و دي خطو ايجابية

و هنسلمه وثيقة رسمية موقعة باسم الحاضرين بطلب تنحيه عن السلطة سلميا

و ذلك لافقار العباد و البلاد و الاضرار بيها

و تقدري تعرفي اللي انتي عايزاه عن الموضوع من على جروب الفيس بوك

e7na يقول...

ازيك يا استاذه

...
بالنسبه لموضوع ايمن نور
انا مش من مريديه بس على الاقل الرجل حاول
انا افتكرت مقال جلال عامر اول ما شفت البوست ده
شوفى بيقول ايه

..ويقول الحاج مسعود إنه يتفرج علي «النيل كوميدي»، وأكثر ما يضحكه هو أن الدولة الحاصلة علي الأوسكار في التزوير تحبس معارضاً لها بتهمة التزوير، لذلك فإن «أيمن نور» كان معتقلاً سياسياً وليس سجيناً جنائياً، ومن حقه أن نعتذر له ونعيد له حقوقه السياسية ثم استلقي علي قفاه وهو يقول لي (تعرف إن مشكلة الراجل ده إنه أخد نصف مليون جنيه وأخد بهم نصف مليون صوت يعني الصوت كلفه جنيه واحد بينما الدولة بتدفع مائة جنيه وموبايل للصوت الواحد وكمان الآخر يطلع بتاع واحد ميت)

عاشــــــ النقاب ـقــــة"نونو" يقول...

موضوع الشروق قريت عنه كتير بس يعني اشمعنى التدوينات اللي مش هيشخلعوها يعني
ايمن نور اتفق معاكي
هيمارس السياسة بعد ست سنين لانها قضية مخلة بالشرف
الباقي بقى المفترض تكتبي اخره
وعجبي
تحياتي

Marwa Rakha يقول...

http://globalvoicesonline.org/2009/02/23/blog-plagiarism-hits-egyptian-bloggers/

بنت القمر يقول...

محمود المصري
===============
فينك من مده سايب مكانك!!!
والله التخمينات اللي يتداولها الاخرون بتقول ان اطلاق سراح نور صفقه وشرط الاتمام زيارة مبارك لامريكا التي تضنت شرط اطلاق سراح نور وسعد الدين ابراهيم
وغالبا الحكومه خرجته وهي عارفه ان قانونا ما يقدرش يمارس عمل سياسي قبل مرور 5 سنين من خروجه من السجن وده شرط دستوري
او لانه خارج من قضية تمس الشرف
او بسبب الضغط عليه هو شخصيا وده اللي بان من تصريحاته المهاودة اما نقطه التوريث وكونها مطاب الحكومه الاكيد فمش عاوزة نقاش.... وادي مستنيين وبنتفرج
يعني
اشكر مرورك

بنت القمر يقول...

يا مراكبي
=============
يعني بجملة السرقات والحقوق المنهوبة يسرقونا باحترام يدبحونا بشياكة مش كده يعني:(
اشكرك وتحياتي

بنت القمر يقول...

رئيس جمهورية نفسي
===================
لا عندك حق دا حتي ابنه يبقي قرايب درجه اولي وعصب يعني لكن اخوة دي اعوذ بالله اعوذ بالله:D
فعلا علي فكرة اعتقد وبشده ان لو جمال مسك الحكم يبقي احنا نستاهله
لانه ساعتها ها نبقي شعب غير مؤهل للديموقراطيه و نستحق نتباع ونتشري فعلا
تحياتي واشكر مرورك

بنت القمر يقول...

زمزم العزيزة
======
صح كلامك اوي بس معرفتش اربط بين التعليق وموضوع نور:D
ممكن شرح؟؟
تحياتي

بنت القمر يقول...

مهندس مصر
===========
ايام القبض عليه كان فيه اقاويل كتير في الصحف انه زور التوكيلات الخاصه بانشاء الحزب وكمان ان الجامعه الروسيه اللي بيدعي انه حاصل عليها من الدكتوراه جامعه وهميه! وانه مش حاصل للاسف الكلام ده قديم ممكن تجوجول عن الموضوع يعني
وعلي رايك 7 سنين واحنا مستنيين يديك ويدينا طوله العمر والصحه
تحياتي

بنت القمر يقول...

تامر اصلاح
==================
:D
نورت المحكمة يا افندم
تحياتي

بنت القمر يقول...

محمد الكومي
================
ايه ده انت معاهم!!!!!!!!!! يعني نجهز بانرات افرجوا عن المدون محمد الكومي ابن الاسكندريه البار:)))
انا فعلا عرفت من جروب الفيس بوك
تحياتي

بنت القمر يقول...

احنا
--------------
:D:D:D:D
مين دي اللي حاصله علي الاوسكار....:D
تحياتي

بنت القمر يقول...

عاشقه النقاب
===============
وعجبي......عجبي
علي الاخر
تحياتي

بنت القمر يقول...

مروة رخا
---------------
اشكر اهتمامك علي نقل الموضوع
تحياتي

مهندس مصري يقول...

اديكي قلتي
أقاويل و شائعات بدون دليل
أنا لما درست قضية توكيلات الحزب دي تأكدت إنها ملفقة
القانون بيطلب 50 توكيل لإقامة الحزب و هو قدم 5000 توكيل قوم بعد 3 شهور يقولوا له دا فيه منهم 1000 مزورين
طيب حيزورهم ليه ؟
إذا كان اللي معاه معدي اللي القانون طالبه بكتير
و لما تدرسي التفاصيل تلاقي مساخر
يعني بيقولوا ان من ضمن التوكيلات المزورة توكيل مراته و ابوه
بقى ده كلام يعقل
و واحد من اللي كانوا معترفين عليه رجع في كلامه قدام القاضي و إعترف ان البوليس اجبره انه يلفق التهمة لنور تحت التهديد بإغتصاب بنات أخته لو ما نفذش المطلوب
و بعدها الواد اللي رجع في كلامه ده لقوه مشنوق جوه زنزانته

و القاضي اللي حكم عليه هو نفس القاضي اللي حكم على سعد الدين ابراهيم و قبلها هو نفسه اللي حكم على مجدي حسين و صحيفة الشعب
و القاضي ده تدور حوله شبهات قوية بتلقيه رشاوي من يوسف والي للحكم على مجدي حسين و غلق جريدة الشعب
و ده ورد في إعترافات يوسف عبد الرحمن نائب وزير الزراعة في قضيته

و و و و
دا القضية المتلفقة لأيمن نور كان فيها كمية مساخر رهيبة

فإذا كانت الدكتوراة بتاعته عليها إشاعات أثناء الإنتخابات من الحزب الوطني و الحكومة يبقى أكيد كله كذب كعادتهم السوداء

و القاعدة بتقول البينة على من إدعى
:)

صدقيني أيمن نور كشخص ممكن تتفقي او تختلفي معاه في الرأي
و انا مختلف معاه في بعض النقاط
لكن هو شخص شريف و نزيه