الاثنين، يناير 07، 2008

!!!بيتزا وسباجيتي وسكالوب بانيه


خرجت مع صديقتان في فسحه حريمي كنا مخنوقين طحن

رحنا فندق المحروسه المواجه للبحر قعدنا نتبادل اطراف الحديث ونلك لكا حريميا
يترواح بين الشكوي من الرجاله مرورا بأسعار ملابس الشتا المنيله
انتهاءا باحدث طرق عمل كفته الرز وعروجا علي عم ساركوزي والست الفاضله صديقته بروني

المهم جلست ووجهي مقابل لباقي الترابيزات في عاده مقيته وهي الفرجه علي الرايح والجاي

لم يقطع صفو القعده لا صراخ بعض الرجال المتحلقين حول شاشه التلفزيون وقد اصريت بحده ان صوت التلفزيون يوطي طبعا عم الجرسون وقع في عرضي انه ميرضاش يقلهم يوطوة لان اغلبهم رتب

وانا اصريت انه لازم يوطي لاننا مش في قهوة بلدي اخيرا وطوا صوت التلفزيون ويبدو اني قدرت اضحك عليهم واعتقدوا ان الاعتراض بهذا الاصرار لابد انه من رتبه اعلي منهم
المهم
جلست امامي بنت في حوالي 25سنه ومعاهاولد في نفس العمر تقريبا لابس تيشرت حفيف وكاسكيت وشكله مطحون وطالع بوزة من الشغل ورايح يفسح الغندورة ما علينا

طلبوا بيتزا عادي خالص

اكلوا البيتزا عادي خالص

همست في ودنه بكل حنان

معرفش وسوست له بأيه حبه وجه الجرسون جايب لها طبق سباجيتي وسكالوب بانيه عادي خالص

ضربت كله

مش قر والله

شويه واتنين كانز

بعدهم نسكافيه لها

حبه وقاموا يمشوا تخيلوا بقا بيتزا ميديم وبعدها طبق لايقدر عليه الا الاشاوس من الاسباجيتي ةالاسكالوب

وجه وقت الحساب الواد الغلبان دفع ووشه كأنه لف في قفاه
والكاسكيت اللي لابسها كأنها علي زعزوعه قصب

حكيت لاصحابي اللي ضهرهم لكابل الغرام اللي حصل فطسوا من الضحك علي ملاحظتي والتفتوا يبصوا علي شكل الغندورة البجحه !!ازاي واحده طالعه مع حبيبيها ولا صاحبها ولا جوزها وتطلب كل ده ؟؟فين الدم

المفروض انها متنيله خارجه من بيت اهلها واكله مش تاكل علي قفا الغلبان

افتكرت و شيطاني شاطر طحن

اني طوال فترة جوازي الممتده12 سنه ومحدش يعد عشان اتجوزت اصلا 22سنه

عمري ما طلبت اروح اتغدي

ما زلت اخجل من طلب اكل لو جلست مع ادم في اي مكان

ما زلت اخجل لو روحنا نتغدي اطلب طبق سعرة اكتر من سعر الطبق اللي اختارة

لو طلب ب50 مش ممكن ومستحيل اطلب ب50 وافضل الطبق ابو تلاتين
ما زلت اخجل لو عندي بواقي اكل واخر جديد من تقديم البايت ليه وللولاد واخليه لنفسي واقدم الطازة ليهم
ما زلت اخجل من طلب مصروف البيت مازلت اخجل من طلب فلوس ملابس لي ودايما مستورة بفضل الله وبعض الموراد الخاصه

طبعا ادم مش مقصر بس دايما اسيب ليه انه يفتكر لوحده

ما زلت اخجل من طلب بعض المجاملات لاسرتي

مازلت اخجل من طلب فلوس علاج اوتصليح عربيه

مازلت اخجل لو خيرني نسهرفين اختار مكان سهرة اغلي

ما زلت اتعفف ما زال فيه جدار عالي بينا من الخجل و من الكرامه
ما زلت وسأبقي
مش عارفه بقا الناس بقت بجحه ليه
اتذكر
خروجاتنا الاولي وفسحنا حين كنت ارفض تفويت متعه الحديث وافسادها بكركبه الاكل ولا الوقت ده وقت اللااحساس واللادم واللاحاجه خالص
والبنت عاوزة حقها من بق الاسد ومن جيب الغلبان

مين صح ولا ومين غلط؟؟
ولا الواحد اللي اهبل ولادي بقت طبيعه الوقت و الاشياء
عجبي
************************
تحديث ضرورري
الفكرة مش في الاكل نهائيا الفكرة في الانانيه والانشغال المقيت بالذات واقتناص كل فرصه متاحه لاثبات انا ولو علي حساب ايا كان
ان انسان يقيم نفسه وشطارته بمقدار ما استطاع ان يسلبه من الاخر تحت اي مسمي
الفكرة في العين المليانه والاخري التي لايملئها الاالتراب

هناك 27 تعليقًا:

^ H@fSS@^ يقول...

يعني انت كده شكلك من فصيلة اخر الرجال المحترمين
و انا كمان كتير ببقى زيك كده و الى الان
عارفة انا مش فاكرة في اي يوم اني قلت لامي هاتي مصروف او عاوزة فلوس
يا اما هي فيها الخير كانت تقول ننزل نشتري او خلاص
بس اني اقولها عاوزة
ممممممممممممم
كبيرة دي شويتين
فكرتيني ايام لما كنت في الجامعة
و بدت تظهر بوادر الاجيال الجديدة و احنا بنتخرج
تصدقي انه رئيسة القسم طلعت مرة تعيط منهم و قالت لي فين ايامكم
كنا بنستقوى عليكم و فاكرينكم مش متربيين تعالوا شوفوا دول لسانهم طويل ازاي و عينهم بجحة قد ايه
ربنا يرحم ايامكم انتوا كنتوا اخر الرجال المحترمين
ايييييييييييييه
دنيا فونيا يا اختاه

SaSo يقول...

ومازلتى لاتخجلين من البحلقه ف الناس وتشوفيهم بياكلو ايه وبكام؟

دينا فهمي يقول...

ماما زيك كده.. وأنا طالعة نسخة ((:
بس أنا بجد مش عارفة ده صح وللا غلط
بيتهيألي ان المفروض الدم الزايد اللي عندنا ده يبأى مع كل الناس
لكن الزوج لا
يعني المفروض وبكررها المفروض ان انا وجوزي نبأى حاجة واحدة
لو عايزة أتغدى برة هتغدى مع مين غيره؟؟ يبأى لازم أتشجع وأقول له

بس في النهاية
أنا برتاح في الخروجات مع صحباتي جدااا أكتر من أي فسحة رجالي
وبما إن مابآش عندي حاليا صحبات
فبأيت لما أعوز أتفسح وأتغدى والحركات دي
بنزل لوحدي

With Myself يقول...

القصة مش في الطلبات المتتالية ..الناس طباع ، بس أنا اللي بيغيظني (البرشتة) ، يعني تلاقي واحدة من دول (مبرشتة) عليه من غير لا إحم ولا دستور لمجرد سماع الكلمتين الحلوين الحنينين اللي هو عاوزهم.

نقدر نقول الموضوع له علاقة با_ (حساسة) ، يعني انا لو بابا شايفه العملية مبهدلة معاه شوية اليومين دول بحط بقي في لساني وبأخرس خالص ، العملية مريحة.. بطلب اللي أنا عايزه ، نفس الحكاية مع البنت تقدر تحس الغلبان اللي إدامها إيه نظامه اليومين دول لأني ما ظنش راجل محترم يأخر حاجة عن حبيبته/شريكته فمبالك بحاجة تافه زي الأكل؟

الطائر الحزين يقول...

هذا هو الفرق بين شخص مسئول و أخر غير مسئول

امى ربنا يديها الصحة لها كلمة مشهورة

يا بنى من حف غموسة مات(عاش) جعان

تحياتى

الطائر الحزين يقول...

طبعا تعليقى بعيدا عن البحلقة

To a friend يقول...

سمعت مرة من احدي زميلات العمل و هي تنصح ان الخطيب / الزوج لازم يصرف كل ما معه ارضاءا لفتاته و الا فهو لا يستحقها

و حكت لنا (ناصحة)ازاي انها و حتي و ان لم تكن جائعة او تريد شيئا وجب عليها تغريم زوجها في كل خطوة يخطوها معها

و طبعا كل من تجرأت وقتها علي الاعتراض نالها اسما من عينة عبيطة و ساذجة و ما الي ذلك

أظنها رؤية (مادية) و مفهوم مختلف للـ "حب" او اي علاقة

بعض الناس يري ان افضل اثبات لقوة العلاقة هو مقدار ما يتغرم الطرف الاخر ماديا و معنويا لابقاء الطرف الاخر سعيدا

بينما يري الاخرون - مثلنا - ان اسعاد الطرف الاخر و مراعاته هو الافضل

اعتذر عن الاطالة
و تحياتي لك

بنت القمر يقول...

حفصه
البت يا اختي ولا اللي هيعدموها ولا كأانها جايه من الصومال
كأنها مستحلفه له لا تروحه بأقل قدر ممكن من الفلوس ويا ريت يروح حافي
حاجه عجيبه
امال فين الدم فين عش العصفورة يتنيل يكفينا؟؟
فين الرسم اللي بيقولوا البنات بترسمه
بحسبه بسيطه الولد دفع ش اقل من 100 جنيه
وشكله غلبان وبردان واخر قبضه 400 جنيه يعني الفسحه والتاكس شفطوا ربع الشهر
يلا باين كدا انا اللي من فصيله طائر الدودو المنقرض من سيبيريا
تحياتي

بنت القمر يقول...

ساسو
لا يا ساسو ما زلت لا اخجل
اذا كان ما امامي يسترعي الانتباه يبقا لازم انتبه ولا ابقا عميا
الاتنين شكلهم غلابه اوي مش قد المكان كان ممكن ترحمه وتطاب عصير او جاتوة
ولو متفقين علي العشا تطلب طلب واحد لكن نقول ايه يبدو ان الغندورة كانت بتشوف غلاوتها
!!!!!!!!!!!!!!!!!!

بنت القمر يقول...

امرأة تقول الذي لايقال
دينا
اولا انا بحب كتابتك القصيره جدا ودايما بحطها علي الريدر بتاعي وبزعل اني بلاقيكي شايله الكومنت
***************
اما اني شبه مامتك الله يكرمك وانا بعتبرك زي بنتي لان بنتي الكبيره دينا برضه
اما بقا ان انتي وجوزك حاجه واحده فضحكوا عليكي يا شابه
خاااالص
انتي وجوزك اتنين
ولازم تبقوا اتنين
دي كلمه تحطيها حلقه في ودنك ورقابتك كمان
وفعلا الخروجه الحريمي لها طعم مختلف المهم تنتقي الصحبه
منورة وابقي تعالي تاني

عروس البحر يقول...

انت فعلا قمرة و اسلوبك جميل
و رقيقة جدا و طيبة و علي رأي حفصة
HafSSa said...
يعني انت كده شكلك من فصيلة اخر الرجال المحترمين

تحياتي و حبي لكي......

بنت القمر يقول...

With Myself
اهلا اول مرور
الحكايه في الدم والوش المكشوف
في الكرامه وعزة النفس
في حاجات كتير
فقدنناها
وده مش بيروح ابدا بعد الجواز
ؤبنا يخلي باباكي
منورة

بنت القمر يقول...

الطائر الحزين
ربنا يخلي الحاجه بس مفهمتش المثل هو خف ولا حف
ومات ولا عاش ويعني ايه؟؟
اما بخصوص البحلقه انظر ردي علي ساسو
منور دايما وابدا

بنت القمر يقول...

فضفضه نور
كلامك لا يرد عليه
اهديه لكل المعلقين لان ده بالظبط اللي كنت عاوزة اقوله منورة واهلا اول ومش اخر مرور

اسكندراني في الغربة يقول...

عادي بتحصل زي ما لسة فية ناس عندها دم أكيد تلاقي ناس عنها نقص دم
-------
بس مقلتليش لو حد وقع مع النوعية دي من البنات
يدفع علشان يثبت انة بيحبها
ولا الاحسن يتقال عنة بخيل
-------
اخر مرة روحت المحروسة كان قبل ما يعملوا الجزء الي على البحر
فكرتيني بأيام جميلة
(يا ريت متسأليش لو كانت جميلة سافرت لية)

اسكندراني اوي يقول...

سيدتي يعجبني دايما طريقه سردك للاحداث والله وكاني شايفها
اه من القعده في المحروسه وجمالها

اه يااااني فكرتينا بالذي مضى بقى

الموضوع حعلقك عليه من ناحيتين
اولا المفجوعه دي مش تعمل حسابها
ان الشاب الغلبان اللي معاها ده انه يكون جايب الفلوس دي بطلوع الروح
عموما ماطرح ما يسري .....وبس
ههههههههههههههههه

الشق التاني
اللي انتي قلتيه ده عن نفسك وعن تعاملك مع ادم ومع اولادك
دي نسخه من سيدات كثيرات عندهم اصل من عصر مضى وولى للاسف
عصر كانت فيه الست بتعرف يعني ايه اسره وازاي تحترم زوجها
اصحتن قليلات اوي
ربنا يباركلك فيهم ويباركلهم فيكي

Bella يقول...

مرحبا بك في نقابتنا المتواضعة لعالم المنقرضين

لي صديقة تحكي لنا باعتبارها ست ناصحة وواعية انها لما تخرج مع جوزها رغم انها بتحبه ومقدرة ظروفه وكل الكلام ده لكن مش طول الوقت بتطلب حاجات على القد او تفضل مراعية لظروفه المادية لان الرجال بطبعهم بيعتبروا الرضا بالقليل حق مكتسب وبعدين القليل ده يفضل يقل ويقل لما يتلاشى
علشان كده كل شوية والتانية بتطلب حاجة غالية او تخليه يدفع دم قلبه في طقم لبس بالشيئ الفلاني

او يوديها فسحة في مكان غالي

لان ده حسب قولها طبعا بيحسس الراجل بقيمته الكبيرة وانه قادر على ابهارها
في الاول كنت باناقشها ونقعد نختلف كتير وكانت تتهمني بالعبط طبعا كالعادة واني جاية من جيل التلاتينان ويابنتي فوقي بقى اللى زيك انقرضوا وماحدش بيقدر الناس اللى كده
بالعكس بيطمعوا في طيبتهم

بمرور الوقت ابتديت احس ان كلامها فيه جزء صحيح فعلا

بس برضه لاني اتربيت بطريقة مختلفة عن طريقة ستنا الناصحة دي مش ح اعرف اعمل زيها

الشخص القنوع اللى عينه مليانة صعب اصلا يعمل حركة زي دي

وبعدين مين قال ان معرفة مقدار الحب تقاس بحجم الانفاق

مش عارفة صراحة

يبدو ان من كتر الناس اللى بتفكر بالنصاحة دي ونجاح اسلوبهم بمرور الوقت بنحس اننا اغراب في هذا المجتمع المادي الغريب

بوست جميل جدا

تحياتي

ذو النون المصري يقول...

فكرتيني بالطلعه الحيده مع خطيبتي
لم تطلب اي شيء
الح عليها تطلب و جبت انا لي و لها علي مزاجي لكن هي كانت من النوع الكاره للاكل خارج البيت امام الناس في مكان عام اصلا و بالمثل انا ايضا
فكان يوم وحيد لم يتكرر في الدخول للمطاعم
...........................
ساسو
..........
لو حد بص و راقب الناس حوله هذا ليس معناه كما ظننت او فهمت
لكن مراقبة الناس و التعرف علي ما يجري في احوال المجتمع من حولنا و محاولة مقارنة الاجيال و تفسير سلوكيات الناس كل هذا ليس بعيب و لا يدعو للخجل

With Myself يقول...

بنت القمر:
أنا رجل لكن مش بشنبات :D

متفق معاكي في بعض الأشياء

Bella:
أنا ليا وجهة نظر مرتبطة بالدخل ، بمعني إذا البني آدم ميسور الحال اللي يمنعه حتي يتعشي في فندق فايف ستارز و يدفع مينمم تشارج محترم؟
أنا فقط ضد ان يكون مقدار الانفاق هو معيار الغلاوة ، شخصياً أيام ما كنت خاطب كنت بروح كافيهات محترمة من امثال سيلانترو وكوستا وكذلك كنت ساعات بقضيها عادي ، ما يمنعش ان الاماكن دي بتكون حلوة بس علي فترات وعلي حسب الظروف والمود اللي الواحد فيه.. أما تبقي عمال علي بطال لمجرد إثبات الغلاوة فهذا ما أرفضه.

أما نظرية صاحبتك عن الراجل فإسمحيلي إني أقولك أنها غلط .. الراجل الطبيعي بتكون قمة سعادته أن يسعد حبيبته أو مراته أو من هو مسؤول عنهم ، إحساس المسؤلية إحساس أصيل عند الرجل لا يحتاج لهذه الألعاب..
أنا بقول علي الراجل المضبوط مش نص شباب مصر دلوقت :P

بنت القمر يقول...

اسكندراني في الغربه
اولا حج مبرور
وذنب مغفور
تانيا الاحسن يكون في صراحه ومكاشفه يعني انا ظروفي كدا ودخلي كدا وعندي قسط عربيه او شقه وتسيب لها تقدير الامور
يعني تصرف بطبيعتك بدون تظاهر وفنجرة زياده عشان متكنش وهمتها بمستوي عالي بتتمناة وساعتها تكون اتخدعت ولا العكس تأربط عليها وتخنقها وانت ربنا ميسرهالك تقوم تكرهك الاعتدال معقول ولقرا تعليق ويز ما ي سيلف التاني علي بيلا
تحياتي

بنت القمر يقول...

اسكندراني اوي
طبعا مطرح ما بسري بس الفكرة انهم شكلهم متواضع جدا
ومش اد كل ده
عشان كدا حسيت ان معندهاش دم كان ممكن تكتفي بطلب واحد او جاتوة وشاي
بس يظهر طريقه تفكير الناس بتتغير بسرعه او علي رأي بيلا نوعيتنا دي بقت نكته ومدعاه للسخريه
تحياتي

بنت القمر يقول...

بيلا
انتي كمان من النقابه طايب
منورة
بصي انا عارفه ان دي طريقه تفكير شريحه كبيره من الستات ويظهر كدا ان الشريحه بتكبر اكتر في الجيل الجديد
احيانا الواحد يحس كتير انه اهبل ومضيع حقه وخصوصا لو آدم بقا قرص عليكي في حاجه تقومي تاكلي في روحك وتقولي دا انا يا ما عملت وضحيت حتي لو في سرك
بس الامور ترجع تاني بسرعه لطبيعتها
وساعت الجد متقدريش وتستحرمي تستغليه
وعموما يا بيلا
العينه دي كمان مش سعيده لانها اصلا الذات العليا بتكون وارمه وناقحه عليها ومهما تديها برضه مش بتقنع وبتبص للي في ايد غيرها وتبالغ في تقدير ذاتها
اما اعضاء نقابتنا الاجلاء
هبل بيضحك عليهم بأي حاجه كيلو سفندي ولا كيس بقسماط ولا كلمه حلوة وتبقي فرحانه ومزقططه لو قالك يا حبي لا يا روحي وممكن تنامي عليها من غير عشا كمان
وتطلعيها من بقك عشانه
ههههههههههههههه
مش بقلك دودو من سيبيريا

بنت القمر يقول...

ذو النون المصري
ربنا يبارك لك فيها
ممكن تكون بتكسف ولا مش عاوزة تتقل عليك فسابتك تختار
ولو مش بتحب تاكل بره تقدر تعوضها بتمن الاكل بره بهديه بسيطه ورد ولا ساعه ولا كتاب او حاجه تكون نفسها فيها من طلبات الجهاز
يعني متركنش علي كدا
لان الهديه مهما قلت مهمه
تهادوا تحابوا
سلامي لها
واشكر مرورك

بنت القمر يقول...

ويذ ماي سيلف
اسفه غلطه غير مقصوده لان حضرتك اول مرة تشرف وكمان لنا زميله مدونه اديبه اسمها مع نفسي والخطوط دخلت علي بعض بس هي بتكتب مع نفسي عربي
تحياتي

With Myself يقول...

بنت القمر:

ولا يهمك ، انا دعبست فعلاً ولقيت مع نفسي أنثي ، توارد خواطر بس هي قبلي :D

ضحكت جداً علي تعبير (أهلاً بتعليقاتكم المهذبة).. أنا مش قصدي حاجة والله ، دي مدونتك وأنتي حرة فيها ، لكن الإستباق في التعليق ضحكني..

صباح الورد

غير معرف يقول...

سيدتى ..

الحمدلله ان مثلك موجود والا ضاعت باقى المعانى الحلوة فى هذا الزمن الغريب

اكاد اقول اننا اذا كنا بهذا الحياء .. فلا لزوم لاى قواعد أخرى .. كل شئ سيأتى جميلا مضبوطا دون تنبيه

كثيرون لهم تلك الاخلاق الرفيعة .. وهم فى رأيى زينة الحياة الحقيقية

كل سنة وانت دائما طيبة كما انت وللأسرة جميعا

karakib يقول...

دائما ما يكون الطرفين مشتركين في الخطأ
يعني هو مش فاهم ان ده استغلال و قلة ادب
هو في حد بياكل بيتزا و مكرونه ورا بعض !! ده يبقي اسمه ايه !! كان فاضل بطاطس و رز كمان و تبقي قفلت كل النشويات
ما علينا
هو اللي اهبل
واحدة زي دي اقعد اكل معاها
و اقوم اسيبها و اروح من غير ما اقول لها و اسيبها تدفع الحساب
و مش عايز اشوفها تاني
و لو اتصلت هاقول لها
البني ادم الشبعان اللي عينه مليانه ما يعملش كده
يالا يا امورة روحي اتجوزي واحد عنده مطعم