الاثنين، يناير 14، 2008

انسحاب


حين تعرفت عليها من عشر سنوات كانت مشرقه محبه للحياه ملتزمه ومتدينه باعتدال

تدرس وتتعلم وتناقش

ولكنها تغيرت مع الوقت

كانت تمر بمشاكل وضغوط شديده وقاسيه

فبعد حجاب انيق ملون اصبح خمارا طويلا قاتم اللون

وبعد الدراسه انقطعت لحفظ القرآن اختصرت علاقاتها الاجتماعيه جدا

وقلصتها الي اقصي درجه ممكنه كانت كمن تنسحب من الحياه شيئا فشيئا

لاحظت اتجاهها الجديد واحترمت اختيارها وتباعدت مكالماتنا

فقدرأتني بعيده عن خطها الجديد وعن عالم اخر تفضل ان تبقي فيه

كل فترة نتحدث هاتفيا نختلف فيها وتزيد هوة الخلافات بينا اكتر

في رمضان ترفض عزومه الاهل والحجه عدم تضييع وقت العباده واللي عاوزبيعزم السنه عندةطويله

حاولت اقناعها بأن صله الرحم لها ايضا ثوابها ان اللي ما بيتعزمش في رمضان ما بيتعزمش طول السنه

بلا جدوي ..وفي ا لعيدبعد ان كانت تتباهي بعمايل ايديها من الحلويات والبسكوتات

فجأه اصبح الكحك والبسكوت بدعه والرسول واهله ما كانوش بيعملوابسكوت

تناقشنا كثيرا في ان مفيش نص شرعي بيحرم البسكوت ولا الاحتفال بالعيد بالكحك وكانت هي تراهم بدع مستحدثه

اخيرا هاتفتني حزينه اثر خلاف زوجي فقد انفطعت فقط لقنوات مثل الرساله والناس والحكمه وباقي القنوات الدينيه

تستمع اللي الشيخ الحويني والبدري
فقد سمعت فتوي بحرمانيه جوزة الطيب وحين اخبرت زوجها بذلك انفجر فيها غاضبا بأن هؤلاء شيخ السعوديه المتشددين وان عليها ان تكف عن متابعتهم
هي كانت تراهم اهل السنه واللذين امضوا حياتهم لمعرفه صحيح الدين

من يستحقون ان نستمع لهم اما شيوخ الازهر فدوا بتوع الحكومه!!اشيوخ مأجورة!!ا

الزوج اتصل بدار الافتاء التابعه للازهر وافتوة بعدم ثبوت حرمانيه جوزة الطيب باعتبارها اصلا مسكنه

ولكن من يريد الاحتياط فلا يتعملها

واصر علي استعمالها في اكله واصرت علي اعداد طعام كل منهما منفصلا واحد مخلوط بجوزة الطيب والاخر بدون

كنت في ذهول تام

هو احنا وصلنا الي الي درجه طلب فتوي في جوزة الطيب التي اقسم اني لا اعرف شكلها اصلا وان كنت اعرف انها من بهارات اللحوم فقط

مش قضيتي اني اعرفها للدرجه دي بقينا متنطعين متشددين

كانت تري ان الحرام بين والحلال بين وان بينهما امور مشتبهات وكنت اجادلها ان الدين يسر لا عسروان ده اسمه تنطع وان الله غفور رحيم

ولكن كانت الفجوة ما زالت في اتساع هل هو تدين هل اكتئاب هل انسحاب من الحياه

ام هو رفض للواقع والحياة في صورة الدين لا اعلم

هناك 28 تعليقًا:

الطائر الحزين يقول...

لا افراط ولا تفريط

الموضوع محتاج الوسطية السمحة

الموضوع محتاج فقه الاولويات


موضوع شائك فعلا

تحياتى

قلم جاف يقول...

حاسس إن الوسطية بتتسرب من بين صوابع إيدينا .. بكل أسف..

في كل يوم بيزداد التمذهب تطرفاً ، وبنلاقي الأفكار المتطرفة في كل اتجاه بتدخل علينا ، بتستغل الفقرا في أحيان ، وعاطفتنا الدينية في أحيان أخرى ، وحبنا لأهل البيت في أحيان ثالثة ، وحماسنا لـ"الأمة" الإسلامية الواحدة في أحيان رابعة..

في كل يوم بتزداد المؤسسة الدينية الأزهرية ضعفاً ، وبنزداد هشاشة ، وقابلية للكسر ..لإن فيه اللي بيلعب على نزعات نايمة جوانا ، على رفض العالم المحيط ، على البحث عن دور يلعبه وسط العالم المحيط ، عن حلم ، عن بطل ، عن بطولة ، عن إنجاز .. رغم إن المشي ورا دولا أو دوكهمة أو اللي بالي بالك مش حيؤدي باللي بيمشي في سككهم لأي نتيجة نافعة أو إيجابية..

احنا بنموت بالبطيء.. سوبر سلو مووشن!

Gid-Do - جدو يقول...

الابنة الحبيبة بنت القمر

المقطع اللى جاى دة كان جزء من تعليقى عندك على تدوينتك المسماه مكعبات الثلج

اسف اقول ان مصر بقى فيها هوس اسمه الحلال والحرام لم يمكن موجود على الاطلاق منذ ميلادى فى منتصف الاربعينات حتى هجرتى فى منتصف السبعينات من القرن الماضى مما يجعلنى اسال نفسى هل كنا نعيش لا نعرف الاسلام وبعد كدة المصريين اكتشفوا الاسلام
بكل اسف التشدد اصبح مرض مزمن فى بلدى اللى كانت مضرب المثل فى التسامح والعيش مع بعض فى سلام

احب اضيف ـ لى صديق - على درجة عالية من الثقافة -اضاف قناة اقراء الفضائية الى مجموعة القنوات العربية وقالى ان اضافتها تكلف خمس دولارات شهريا فقلت له انا لن اضيفها ولو كانت بالمجان ـ وبعد عدة اشهر وجدته يقول لى عملت طيب انك لم تضيف قناة اقراء فسالته لايه فاجاب ان اختلاف اراء المشايخ فى القناة كفيل باحداث بلبلة للمثقفين فما بالك بمن كانت ثقافتة محدودة راح يطيوا له عقله ويمشوة مجنون

mohand يقول...

السلام عليكم

معلش متزعليش التعليق بتاع المره اللي فاتت ده كان تهريج
علي غرار الجزار في فيلم مافيا
لا اقصد بيه تجريح ولا خلافه يعني

ردي بقي علي البوست ده

الوسطية :- تختلف من شخص لاخر

دا من وجهي نظري


علي فكره معلومة بس عشان مش عارف ليه انا حاسس انك فاكراني اخواني

انا مش اخواني ولو كنت اخواني مش هخجل اني اصرح بيها

وطبعا مش وهابي عشان بتفرج علي افلام اجنبي عادي

تحياتي

mohand يقول...

اه متنسيش اني متفق معاكي في البوست اللي فات بحذافيره
الا النقطة اللي وضحتها

karakib يقول...

الموضوع له اسباب .. كل يوم بتستفحل في مجتمعنا
و علاجه يحتاج لبحث حقيقي عن الاسباب
كل اللي حصل لها ده نتائج
مافيش دين ممكن يحول حياة الانسان للتوتر و الخوف من كل شيء كده
انا اعرف بعض النسخ المسيحيه من ما تذكرين
يرفضون اكل العيش الفينو في الصيام لأنه مخبوز في صواني الكحك اللي اتعمل بالسمنه
مافيش دين ممكن يحول حياة الانسان للتوتر و الخوف من كل شيء كده
حتي جوزة الطيب !؟ .. ما هو أي بهارات بكمية كبيرة بتعمل حالة من الخدر
ده حتي البصل بيعمل خدر
و بيتصنع منه الويسكي !! مش معناه انه البصل حرام ابدا
الجنزبيل المغلي بيعمل حالة من الهدوء و انا شخصيا لما باشربه باحس اني ريلاكس
الكاكاو كمان !! هو في ايه !؟ كل حاجه هتبقي حرام

عدى النهار يقول...

ما ذكرتِ فى أول البوست من أنها "كانت تمر بمشاكل وضغوط شديده وقاسيه" فيه معظم الإجابة على سؤالك فى آخر البوست

ومؤكد فى كثير من الناس سلوكياتهم بتتغير تحت تأثير ضغوط الحياة. يعنى ممكن تجدى أيضاً من يتحلل تماماً من أى إلتزامات دينية أو إجتماعية وممكن تجدى من حظه أفضل من غيره فيجد عون حقيقى من أهل أو أصدقاء للخروج من أزمة يمر بها

فى أمر آخر مهم وهو أن الناس بتتغير مع الوقت وممكن أن تدقيقها فى أشياء غير ذات قيمة كبيرة يكون وسواس مؤقت ليس إلا.. لذلك لم يعجبنى موقف زوجها والتحدى الذى أبداه فى أمر لايستحق

أبو عمر - الصارم الحاسم يقول...

طب عندي اقتراح مخالف


ما تسيبوها براحتها


ايه اخبار علاقتها بجوزها وتربية اولادها


لو تمام ومش مقصرة في حقهم - وعندها الى حد كبير حق في موضوع عزومات رمضان - لم لا نحترم وجهات نظرها الفقيهة وتقواها

خاصة مش هيموت اهلها ولا هينضروا لو كلوا اكل من غير جوز الطيب

اشمعنى هي مطلوب منها مقاربة ...لكن اهلها لا يريدون هم عمل هذه المقاربة

ممكن يتعلم زوجها ايضا علوم القرآن وعلوم الفقه شيئا فشيئا ....ثم يصلح من هذا الجانب ما قد يعتبر تشددا بالحوار ...هيكون الحوار وقتها افضل من الغضب

بنت القمر يقول...

الطائر الحزين
الحد الفاصل بين الافراط والتفريط غير واضح وكل انسان بيعتقد انه واقف عنده دايما ومحدش بيكون عنده شك انه تجاوزة الي الافراط او التفريط
اشكرك

بنت القمر يقول...

قلم جاف
وسام علي صدر المدونه مرورك وشرف لي مشاركتك مرتين متتاليتين وانا عارفه انك دايما مقل في تعليقاتك وها تزداد سعادتي لو طليت علي البوست الجاي بكرة ان شاء الله
لانه هام جدا
********************
لإن فيه اللي بيلعب على نزعات نايمة جوانا ، على رفض العالم المحيط ، على البحث عن دور يلعبه وسط العالم المحيط ، عن حلم ، عن بطل ، عن بطولة ، عن إنجاز .._________
اتفق مع سيادتك
في تحليلك
وان كنت اعتقد اننا نتيجه لفشلنا في دور نلعبه او حلم ضايع او بطل وبطوله غيرة متوفره
نلجأ بكامل ارادتنا الي التقوقع خلف قشرة من التدين طلبا لحياه اخرويه اكتر سعاده من حياه دينويه تكرس الفشل والهزيمه
قوقعه نختبأفيها حتي تنتهي رحله حياتنا القصير المؤلمه ويأخذ رفضنا للحيلة والاخرين المحيطين صو ر كتير منها التفرغ للعباده او البعد عن مجالس النميمه او البحث عن اقران اخرين اكثر تقوي
علي فكرة انا متابعه جديدك دايما حتي لو لم يسعفني الوقت بالتعليق
اشكر مرورك تحياتي

بنت القمر يقول...

الاب الغالي.....جدو
مش بس اقرأ
دا في طوفان من القنوات الفضائيه اللي بتدلق عليك كل يوم طوفان من الفتاوي العجيبه من ماركه جوزة الطيب حلال ولاحرام وينفع اجوز عشان اروح احج ويبقا معايا محرم ولما نرجع نتطلق ولاحرام
فتاوي عجيبه ومشايخ تتراوح بين اقصي الاعتدال والتطرف
قناه الناس والبركه والحكمه والرساله وغيرهم
وده للاسف في رأيي ناتج عن بعد عدم وجود مؤسسه واحده وجهه واحده مسئوله عن الفتوي ونتيجه لضعف الازهر في القيام بدورة
منور دايما ياجدو
تحياتي

بنت القمر يقول...

مهند
مفيش زعل احنا اخوات
مش اخوان
كل الفكرة بس حضرتك تفهم اني في التدوين مش بقدم نفسي قدوة ولا حاجه انا زي مامتك واختك وجارتك بنت مصريه عاديه . .. ومش مؤهله خالص للفتوي انا ناقشت الموضوع من ناحيه التذوق الفني كمشاهده مرة وام مرة تانيه
وممكن تراجع تعليقات الموضوع تاني
______________________---
بالنسبه للوسطيه فعلا لما تناقشت مع الصديقه كان عندها رد لكل كلمه ليه ما تعزميش في رمضان؟؟
الاجابه وما خلقت الجن والانس الا ليعبدون
العباده اولي
ليه بتدوري وتعملي مشكله علي جوزة الطيب اصلا مش مهمه خالص
الاجابه اتقوا الشبهات
وليه ما بتكلميش في التليفون زي الاول
الاجابه ببعد عن النميمه
كلها اجابات منطقيه
بس دي مش عيشه
لما الرسول قال هلك المتنطعون
كان يقصد مين بقا؟؟
اكيد ناس عدت اللاين من الاعتدال الي التزمت
تحياتي واشكر مرورك

بنت القمر يقول...

كراكيب
تصدق
انا بقالي 10 سنين مجوزة معرفش جوزة الطيب دي شكلها ايه ولا الزعفران وحاجات كتير من البهارات اهو بسمع امي وحماتي بيستعملوها وخلاص
انا كفايه عليا الملح والفلفل بالنسبه للاسباب اعتقد زميلنا قلم جاف وضحها ببراعه اقرا تعليقه
بالنسبه للعيش الفينو وصيام المسيحيين
فكرتني مرة كنت عازمه صديقه مسيحيه صايمه واحترت اضايفها علي ايه كل حاجه يا فيها لبن ويا زبده الجاتوة والكرواسون والرز بابن والكيك
واخيرا اقترحت عليها الجيلي بالموز
فقالت لي ما هو الجيلي برضه جيلاتين بقري
ووصفت لي سوبر ماركت بعييييد بيبيع جيلاتين من اصل نباتي
واخيرا حلينا الحكايه بفروت سلات وخلاص
الحقيقه مش عيب ان الانسان يتمسك بدينه خالص بس الدين لسعادتنا مش سجن لينا
منور تحياتي
ويا ريت تبص بكرة علي البوست الجاي مهم

بنت القمر يقول...

عدي النهار
ها ارد علي تعليقك من اخرة
لما احد الزوجين بيختار طريق زي ده سواء الست او الراجل بتحصل فجوة كبيره جدا لانك بتلاقي الطرف التاني بعيد وكأانه بيرسل لك رساله ضمنيه انا افضل منك.. انا اتقي منك.. انا احسن منك ..والعكس
و وبالتالي تستحيل الحياه جحيم
والحكايه تتقلب عند ومش انت او انتي اللي بتحتكر الصح والغلط
لو الرساله دي من الست الراجل كما لو كانت ومن الراجل للست
اشكرك

بنت القمر يقول...

الصارم الحاسم
الحياة متعلقه بالاختيارات
وحينما يختار الانسان طريق زي ده بيكون عارف اكيد ومدرك حجم ما قد يلا قيه من مشقه
علاقته بزوجها استحالت جحيم بسبب الحلال والحرام في كل كلمه والرساله الخفيه الضمنيه التي قد لايقبلها انسان وخصوصا لو رجل وحط الف خط تحت لو رجل اني انا افضل منك واعرف ربنا عنك واتقي منك وان انت غلط
وانا محتكرة الصواب والخطأ انا بعيد عنك انا مع الشيخ الفلاني ومبهورة بالشيخ العلاني وبيعجبني الشيخ كذا
ده نوع من الرفض الخفي
ونوع من الانزواء والتقوقع عن الزوج والاهل بحجه الدين وما اعتقدش ان الدين يحول حياتنا لسحه صراع بدل ما يكون سبب راحه وسعاده لنا ويخفف الالامنا في هذه الحياة ويعنا علي تحملها
اشكرك
تحياتي

With Myself يقول...

عصابة توتو وحمادة المتمثلة قناة الناس وتوابعها بكره يحرموا الخيار كمان!

في مثل مصري ظريف عن الخيار بلاش أقوله إحتراماً للتعليقات المهذبة :D

اللي يسلم دماغه للعالم دي يبقي عامل زي الشاويش عطية أما كان بيقول " يا أخواتي ده لا ممكن يكون منه 4 أبداً! أنا ماديش عقلي لحد تاني أبداً"

Desert cat يقول...

هذا نموذج من بين الف نموذج
كنت اتحدث عن موضوع بوست فى مدونتى على ثقافة اللعب فى العقول
للاسف من يقبل اللعب بعقله فقد ادخل نفسه فى مشاكل لا تنقطع
فاليوم جوزة الطيب حرام
وبكرة الملح فى الطعام ايضا حرام
ربنا يهدى الجميع لما يحب ويرضى
تحياتى

يا مراكبي يقول...

أنا عجبني جدا العنوان المختصر المعبر بذكاء: إنسحاب

هو فعلا إنسحاب .. إنسحاب حتى من التفكير المنطقي العقلاني الموضوعي اللي لازم يدون حوالين الوسطية اللي رسالة الإسلام كلها قائمة عليها

زمان الوصل يقول...

هذا أوّل تعليق لى فى هذه المدوّنه الجميله :)

وهو تقريبا يشبه تعليق الصارم الحاسم
أنا لا أرى فى موقف السيده موضوع انسحاب هى فقط تختلف و بشدّه مع كثير من الأمور التى اعتدنا عليها حتى صارت جزءا من حياتنا لا نتصوّر أن يعيش أحد بدونه !!

و على فكره هى غير مسئوله عن الرساله الضمنيه التى تصل لغيرها بمعنى أنا أفضل منك طالما هى لم تشر لهذا المعنى صراحة !! نفس الزعم أجده أحيانا فى النقاشات التى تدور حول فرضية الحجاب و هل تريد المحجّبه أن ترسل رساله ضمنيه لغير المحجّبه تحمل معنى أنا أحسن منك !! وكأنّه يفترض أن يكون الناس كلّهم باصطمبات فكريه واحده حتى لا يشعر أحد بأن الآخر أفضل منه حتى لو لم يحاول الأوّل توصيل هذا المعنى !! لن أطلب من المحجّبه أن تخلع الحجاب حتى لا تتهم بتوصيل رساله هى غير معنيه بها !! و لا أرى بأسا فى أن يتحرّى الإنسان علاقة ما يفعله بالحلال و الحرام و هى فى النهايه لم تفرض آراءها على غيرها فزوجها يأكل أكله بجوزة الطيب وهى لا تفعل !! فما الضرر فى أى من هذا !!

With Myself يقول...

زمان الوصل:

الضرر الطبيعي أن الاتنين دول متجوزين مش اتنين صحاب!

عدى النهار يقول...

كان حقك تأجلى نشر موضوعك الجديد شوية لأن الموضوع ده محتاج أخذ ورد أكثر بس إنتى إستعجلتي
:)

الحق الموضوع والتعليقات أثارت عندى سؤال ممكن يكون موضوع تدوينة لكنى أفضل طرحه هنا لتكتمل الصورة

زوجة صديق لي بدأت التحضير لرسالة الماجيستير وذلك يأخذ كثيراً من وقتها مع أسرتها وإهتمامها بها ويؤثر على علاقتها بأهلها وأصدقائها لأنها لا تستطيع أن تلبى دعواتهم لبعض المناسبات القليلة

صديقى تقبّل ذلك فى البداية لكن زوجته يزداد إهتمامها بدراستها يوماً بعد يوم وتجد متعة كبيرة فيها وتحقيق لذاتها خاصة أن حصولها على الماجيستير سيكون له تأثير كبير على وضعها فى الشركة التى تعمل بها

المشاكل بدأت تظهر بينها وبين زوجها وهناك إحساس ببعض التوتر فى العلاقة بينهما إزداد مع إبداءها العزم على التقدم للدكتوراة بعد أن تنتهى من الماجيستير وعملها يدفعها لذلك ووعدها بمكافاءة مجزية إن هى تقدمت فى مجال الدراسة لأن فى ذلك خدمة للعمل أيضاً

ياترى الزوجة عليها أن تتخلى عن رغبتها من أجل الحفاظ على الود والهدؤ لأسرتها أم على الزوج أن يتفهم طموحها ويعينها على تحقيق ما تصبو إليه نفسها خاصة أن نجاحها فيه فائدة لها وللأسرة كلها وهو فى إستطاعته أن يجعل الأمور أسهل على الجميع إن هو تعاون معها

كما ترين أنا إستبدلت الدين فى موضوعك بشىء آخر وأنا فعلاً أتسآل هل طموح الزوجة هنا سيقابل بالإدانة والإندهاش (مع إسبعاد الأراء التى لاترى للمرأة حق فى ذلك بصفة عامة)؟

أبو عمر - الصارم الحاسم يقول...

الأخت عدى النهار

بس ده دين وارضاء لله... مش ماجستير

بنت القمر يقول...

ويذ ماي سيلف
قناه الناس او اي قناه دينيه متخصصه
لها جمهور عريض جدا ولو حضرتك متعرفش اقولك انا وعشان دي صناعه جديده بتقدم الكويس والوحش وما ينفعش نحطهم كلهم في سله واحد بعضها تقدم حاجات مفيده وهادفه ولغه بسيطه وبعضها يقدم قتاوي متشدده جدا او عدائيه ضد المرأةجدا
انا عن نفسي لما بيكون عندي سؤال باتصل بالازهر
فيه قنوات بتحط مقدمات او تترات موسيقيه وبعضها لا
في بعضها بيجيب مذيعات وبعضها لا
في قنوات لسه بتتخبط اعمل بس سيرش هتلاقي كتير وعشان كده ما ينفعش نجمع كله ف ي السله نفسها
تحياتي

بنت القمر يقول...

ديزرت كات
مش المشكله ان جوزة الطيب حرام اصلا هي حاجه مش مهمه وممكن اي حد يستغني عنها بس انها يتعمل عنها خلاف زوجي وطبيخ في حلتين ده صعب اوي
منورة يا كات

بنت القمر يقول...

يا مراكبي
زورونا دائما تجدوا ما يسركم
تحياتي





************************
زمان الوصل اهلا بيك
هي تختلف وتدفع تمن اختلافها
طب حضرتك مش بتتعزم في رمضان ولا بتعزم حد ولا بتاكل بسكوت
ليه حرام
وانت شايف ان ممكن او في وقت الاهل تجتمع علي ترابيزة واحده غير في رمضان يا اخي
في ناس ما بيدخلوش بيت اخواتهم الا في رمضان نحرم ده كمان ويبقا مش انسحاب
امال يبق ايه
منور

بنت القمر يقول...

عدي النهار
انا عارفه اني حوست نفسي
في بوستين مرة واحده
واتحولت من البص هنا وهناك وعند الاخرين
بس انا استعجلت عشان اعتقدت ان الاخرين شافو معايا حلقه زينب عبد العزيز
بس واضح اني شفتها لوحدي
***************
بالنسبه للماجستير بتاع زوجه الصديق
بص هنا الموضوع مختلف سنه
ها اقولك في الحاله اللي قدامي الانسحاب حصل نتيجه الرفض مش الانسحاب حصل الاول للدين فجه وراه رفض
يعني هي رافضه حياتها وزوجها وظروفها وزي عاده الاسر المصريه مفيش عندنا بنات تتطلق
لو جبتي سيره الطلاق ها نتبري منك
طب البديل ايه اعيش حياة رافضاها من اعماقي وادور علي سعاده تانيه في حياه اخرويه ترضيني وتحقق لي الي مش قادرة احققه في دنيتي اهرب من الناس بحجه العباده وحفظ القرآن
اهرب من التليفون بحجه النميمه
اهرب من الاهل بحجه مفيش وقت واهرب
واهرب
بس منور خالص







******************
الصارم الحاسم
عدي النهار اخ عزيز وفاضل وهو الاخ مدحت
ومعرفش معلومات تانيه والله
ومن الافاضل اللي تقدر تتابع مدوناتهم
منور خالص

زمان الوصل يقول...

عزيزى / عزيزتى ويذ ماىسيلف :)

هل يمكن توضيح أكثر لما تعنيه بجملتك المختصره للغايه؟
ما فهمته أن الزوجين يتناولان الطعام معا كل ما هنالك أن أحدهما يأكله بنكهه مختلفه عن النكهه التى يأكل بها الآخر !! فهل يقلل هذا من شأن العلاقه و يجعلها صحوبيه مش جواز !! لو الزوجه لا تحب السبانخ و زوجها يحبها و طبختها له لكنّها لم تأكلها و أكلت معه -على نفس المائده- أكل تانى هل سنعتبر موقفهم معبّر عن اتنين أصحاب مش اتنين متجوّزين !! أنا أرى الموقفين متشابهين ولا أدرى لماذا يعترض الزوج على موقف زوجته طالما هى لم تفرض وجهة نظرها عليه !!

عزيزتى بنت القمر

الحمد لله عائلتى تجتمع كثيرا جدّا فى غير رمضان :) يمكن عائلتى تعتبر استثناء لأنّنا بنتلكك على أى مناسبه نجتمع فيها ولو من غير مناسبه .. و أظن أن اللقاءات العائليه ممكنه جدّا فى رمضان و فى غير رمضان لو رتّبنا أولوياتنا و عرفنا فيم ننفق وقتنا

لو نظرتى لوقت رمضان ستجديه محدود للغايه و ربّما يكون أكثر حكمه الاجتماع فى العيد مثلا .. لا أقصد أن آخذ جانب السيده المذكوره فى المدوّنه لكنّى أحاول أن أتفهّم وجهة نظرها .. لو هى تقضى فى إعداد الطعام لأسرتها الصغيره جزءا من الوقت سيكون هذا كاف جدّا من وجهة نظرها كى يضيع فى شئون بسيطه و تكون شئون أجلّ مثل العباده مستحقّه للباقى من الوقت .. أنا أعطيها العذر لأنّها هى الزوجه و هى التى تعلم تماما مقدار الوقت المتاح لها فى العباده فى رمضان بعد الفراغ من الواجبات المنزليه
ولو ناس لا يدخلون بيوت إخواتهم إلاّ فى رمضان يكون اللوم عليهم هم لقطع الرحم و ليس عليها إن رأت الوقت غير مناسب للعزايم ..

أنا عندى تحفّظ كبير على اعتبار اللجوء للعباده و حفظ القرآن هروب من الناس و إن كنت لا أفهم لماذا يعد قدر كبير من التقرّب منهم و الاختلاط بهم ميزه ينبغى ألاّ تترك !! أنا بقيت أتشكّك كثيرا فى زعم أن "الإنسان حيوان اجتماعى"

أنا مش باكل فى العيد غير "بيتى فور" الحقيقه :) مليش تقل على باقى الأصناف
و سعدت فعلا بالتعرّف على مدوّنتك ..

أبو عمر - الصارم الحاسم يقول...

اوووبس

اسف يا اخ عدى النهار

(: